Għal Rinaxximent Industrijali Ewropew

Il-Kummissjoni Ewropea fasslet firxa ta’ proposti dwar kif tkun modernizzata l-bażi industrijali tal-UE sabiex issaħħaħ il-kompetittività u t-tkabbir ekonomiku tagħha.

ATT

Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Għal Rinaxximent Industrijali Ewropew (COM(2014) 14 final 22.1.2014 -- Mhux ippubblikata fil-Ġurnal Uffiċjali).

SOMMARJU

F’dan is-sett dettaljat ħafna ta’ proposti politiċi, il-Kummissjoni Ewropea qiegħda ssejjaħ lill-pajjiżi tal-UE sabiex jirrikonoxxu l-importanza prinċipali tal-industrija fit-tisħiħ tal-kompetittività u t-tkabbir ekonomiku madwar l-UE. Il-proposti huma ddisinnjati sabiex jipprovdu sinjal ċar tal-impenn tal-UE għall-immodernizzar tal-bażi industrijali tal-Ewropa.

Il-proposti jkopru varjetà wiesa’ ta’ oqsma. Dawn jinkludu:

• miżuri fis-suq intern u fuq livell internazzjonali sabiex ikun żgurat aċċess għall-enerġija u l-materja prima bi prezzijiet affordabbli li jirriflettu l-kundizzjonijiet internazzjonali;
• l-għaqda tal-finanzjament mill-UE u dak nazzjonali għall-għanijiet ta’ innovazzjoni, investiment u ri-industrijalizzazzjoni;
• li ssir aktar faċli għal ditti fl-UE (u SME’s b’mod partikolari) illi jiksbu aċċess għal swieq globali f’kundizzjonijiet kompetittivi aktar favorevoli.

Żvilupp tal-infrastruttura

Qasam mil-lista twila ta’ oqsma ta’ prijorità li ssemmi l-Kummissjoni fil-konklużjonijiet tagħha huwa l-iżvilupp tal-infrastruttura. Dan ifisser il-ħolqien ta’ ambjent attraenti għall-kumpaniji u għall-produzzjoni. Hawnhekk, il-Kummissjoni trid iddaħħal fis-seħħ miżuri u leġiżlazzjoni dwar l-informazzjoni, l-enerġija, it-trasport, l-ispazju u n-netwerks diġitali ta’ komunikazzjoni. Il-Kummissjoni tisħaq li dewmien fl-użu ta’ infrastruttura bħal din itellef il-kompetittività futura tal-UE.

Inżommu d-drittijiet tal-proprjetà intelletwali

Eżempju ieħor ta’ sett ta’ proposti huwa relatat ma’ drittijiet ta’ proprjetà intellettwali. F’dinja fejn il-kompetittività ta’ spiss tiġi mill-vantaġġ li tkun tal-ewwel u mill-branding, huwa dejjem aktar importanti għall-kumpaniji tal-UE li jżommu d-drittijiet tal-proprjetà intelletwali fis-swieq relevanti kollha, b’mod speċjali fl-industriji kreattivi fejn il-falsifikazzjoni hija problema serja. Hawnhekk il-Kummissjoni diġà espandiet in-netwerk ta’ helpdesks għad-drittijiet tal-proprjetà intelletwali għal ASEAN (l-Asja tax-Xlokk) u MERCOSUR (l-Amerika t’Isfel) sabiex joffru servizzi mifruxin ma’ żona ġeografika usa’ u qed tikkunsidra li testendi dawn is-servizzi ta’ appoġġ għal partijiet oħrajn tad-dinja.

Għal aktar informazzjoni, ara wkoll:

• Is-sit elettroniku tad-Direttorat Ġenerali għall-Intrapriża u l-Industrija fuq Komunikazzjoni dwar il-Politika Industrijali 2014
• Is-sit elettroniku tad-Direttorat Ġenerali għall-Intrapriża u l-Industrija fuq Missjoni għat-Tkabbir
• Stqarrija għall-Istampa

L-aħħar aġġornament: 11.06.2014