Statistika kummerċjali

SOMMARJU TAD-DOKUMENT:

Regolament (KE) Nru 295/2008 dwar statistika strutturali kummerċjali

X'INHU L-GĦAN TAR-REGOLAMENT?

Huwa jfittex li jiżgura li tinġabar, tiġi kkompilata u tiġi trasmessa statistika kummerċjali strutturali ta' kwalità għolja (SBS) mill-pajjiżi tal-Unjoni Ewropea għall-Eurostat skont standards u formati maqbula.

PUNTI EWLENIN

X'inhuma SBSs?

L-SBSs jiddeskrivu l-istruttura, il-karatteristiċi ewlenin u l-prestazzjoni tan-negozji u huma għodda vitali għal dawk li jfasslu l-politika, kif ukoll jgħinu fit-teħid tad-deċiżjonijiet.

Għaliex importanti li jkun hemm SBSs?

Statistika komparabbli, affidabbli, dettaljata u fil-ħin hija vitali għal tfassil ta’ politika effettiva. SBSs jipprovdu bażi li minnha wieħed jista' janalizza l-prestazzjoni ta' attivitajiet ekonomiċi u ta' setturi varji. Qegħdin isiru komponent dejjem iktar importanti fil-kontroll tal-effikaċja tal-politiki f'oqsma, bħas-suq intern tal-UE u l-implimentazzjoni tal-istrateġija Ewropa 2020.

Xi jkopru l-SBSs?

Aspetti koperti jinkludu:

• struttura u evoluzzjoni tal-attivitajiet ta'negozji (manifattura, bini, distribuzzjoni u servizzi, iżda mhux, pereżempju, agrikoltura, forestrija jew sajd u amministrazzjoni pubblika;
• fatturi ta' produzzjoni użati (xogħol, kapital, eċċ.) u elementi oħrajn li jippermettu li jsir il-kejl tal-attività kummerċjali, il-kompetittività u l-prestazzjoni;
• żvilupp reġjonali, nazzjonali, tal-UE u internazzjonali ta' negozji u swieq — utli biex wieħed jifhem is-setturi speċifiċi u jqabbel l-attività u l-prestazzjoni fi swieq differenti;
• tmexxija tan-negozju fir-rigward ta', pereżempju, ir-riċerka u l-iżvilupp, il-protezzjoni ambjentali, l-investiment; u
• intrapriżi ta' daqs żgħir u medju (eż. għall-evalwazzjoni tal-intraprenditorija).

Ġbir u trasmissjoni ta' SBSs

Kull sena, il-pajjiżi tal-UE għandhom jibagħtu lill-Eurostat għadd ta' “settijiet ta' dejta” (skont id-daqs tal-kumpanija, reġjun, eċċ.) miġburin minn istituti nazzjonali tal-istatistika. Dawn jiġu kkumpilati permezz tal-klassifikazzjoni NACE, in-nomenklatura tal-attivitajiet ekonomiċi fl-Unjoni Ewropea. Il-kwalità tad-dejta tiġi ċċekkjata qabel tiġi ppubblikata (bla ħlas) fuq is-sit elettroniku tal-Eurostat.

Kif jintużaw l-SBSs?

SBSs jipprovdu informazzjoni dwar:

• il-ġid maħluq minn kull attività, analizzat skont l-impjegat u l-produttività;
• tendenzi fl-istruttura tas-setturi tan-negozju;
• attivitajiet li fihom jispeċjalizzaw il-pajjiżi/reġjuni, u kif dawn huma strutturati fi swieq differenti.

Konformità

Rapport tal-Kummissjoni 2014 jikkonkludi li l-konformità mal-liġi hija “tajba ħafna” jew “tajba” għal ħafna mill-pajjiżi tal-UE.

MINN META JAPPLIKA R-REGOLAMENT?

Ilu japplika mid-29 ta' April 2008.

SFOND

Għal aktar informazzjoni, ara:

• “Introdotti statistika strutturali tan-negozju” fuq il-websajt tal-Eurostat.

DOKUMENT EWLIENI

Regolament (KE) Nru 295/2008 tal-Parlament Ewropew u tal-Kunsill tal-11 ta’ Marzu 2008 dwar statistika strutturali kummerċjali (ĠU L 97, 9.4.2008, p. 13-59)

Emendi suċċessivi għar-Regolament (KE) Nru 295/2008 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Rapport tal-Kummissjoni lill-Parlament Ewropew u lill-Kunsill dwar l-implimentazzjoni tar-Regolament (KE) Nru 295/2008 tal-Parlament Ewropew u tal-Kunsill dwar statistika strutturali kummerċjali (COM(2014) 243 final tal- 24.4.2014)

Korriġendum

l-aħħar aġġornament 07.11.2016