Statistika tal-UE dwar l-introjtu u l-kondizzjonijiet tal-għajxien

SOMMARJU TAD-DOKUMENT:

Regolament (KE) Nru 1177/2003 jirrigwarda l-istatistika Komunitarja dwar l-introjtu u l-kondizzjonijiet tal-għixien

X’INHU L-GĦAN TAR-REGOLAMENT?

Dan jistabbilixxi sistema għall-ġbir u l-kompilazzjoni ta’ statistika dwar l-introjtu u l-kondizzjonijiet tal-għajxien fl-Unjoni Ewropea (UE), magħrufa bħala (UE-SILC).
Din id-data sservi għall-monitoraġġ tal-progress tal-Istrateġija Ewropa 2020 u partikolarment l-mira tagħha tat-tnaqqis tal-faqar, u għalhekk huwa importanti li jiġi żgurat li d-data miġbura tkun komparabbli billi tiġi żgurata l-armonizzazzjoni tar-regoli dwar il-ġbir u l-kompilazzjoni tagħha.

PUNTI EWLENIN

L-UE-SILC tfittex li tiġbor data trażversali* u lonġitudinali* tempestiva dwar l-introjtu u dwar il-livell u l-kompożizzjoni tal-faqar u tal-esklużjoni soċjali fil-livell nazzjonali u Ewropew.
Din tkopri data trażversali dwar l-introjtu, il-faqar, l-esklużjoni soċjali u kondizzjonijiet tal-għajxien oħrajn, kif ukoll data lonġitudinali ristretta għall-introjtu, ix-xogħol u numru limitat ta’ indikaturi mhux monetarji tal-esklużjoni soċjali (eż. il-problemi biex wieħed ilaħħaq mal-ħajja, l-ammont ta’ dejn u nuqqas inforzat ta’ ħtiġijiet bażiċi).
Id-data trażversali u lonġitudinali għandha tkun ibbażata fuq kampjuni li huma rrappreżentattivi lokalment abbażi tal-probabbiltà.
Ir-Regolament jistabbilixxi sett ta’ regoli li jiddefinixxi l-listi armonizzati ta’ fatturi varjabbli primarji u sekondarji fil-mira li l-pajjiżi tal-UE għandhom jittrażmettu lill-uffiċċju tal-istatistika tal-Kummissjoni Ewropea, il-Eurostat:
- il-fatturi varjabbli primarji jinġabru kull sena u jinkludu fil-livell tal-unità domestika, data bażika, djar, deprivazzjoni materjali u introjtu, u fil-livell personali, data bażika, edukazzjoni, saħħa, xogħol u introjtu;
- il-fatturi varjabbli sekondarji, li jinġabru kull 4 snin jew inqas frekwenti, jinkludu informazzjoni fil-livell tal-unità domestika jew fil-livell personali dwar aspetti bħall-kondizzjonijiet tad-djar, il-faqar li jgħaddi minn ġenerazzjoni għall-oħra u d-deprivazzjoni materjali.
Kull data dwar l-unità domestika u l-individwu għandha tkun aċċessibbli fil-komponent trażversali u fil-komponent lonġitudinali, sabiex tkun tista’ ssir analiżi multidimensjonali fil-livell tal-unitajiet domestiċi u tal-persuni u b’mod partikolari investigazzjoni ta' kwistjonijiet kbar ta’ tħassib soċjali li huma ġodda u li jeħtieġu riċerka speċifika.
Il-pajjiżi tal-UE jfittxu li jiżguraw li ż-żmien tal-ġbir tad-data tagħhom jinżamm l-istess minn sena għal sena.
Għall-ewwel 4 snin tal-UE-SILC, il-pajjiżi tal-UE rċivew kontribuzzjoni finanzjarja mill-UE għax-xogħol involut fil-ġbir tad-data.
Il-Eurostat jista’ jagħti aċċess għal data kunfidenzjali jew joħroġ settijiet ta’ mikrodata anonimizzata mis-sorsi tal-UE-SILC, għal għanijiet xjentifiċi.
Il-Kumitat tas-Sistema Ewropea tal-Istatistika li huwa magħmul minn esperti nazzjonali jgħin, u huwa ppresedut mill-Kummissjoni. Huwa jiddeċiedi dwar kwistjonijiet bħal oqsma sekondarji fil-mira li għandhom jiġu koperti.
Ir-Regolament ġie emendat 3 darbiet, li huma:
- fl-2004, bit-tkabbir tal-UE li jinkludi 10 pajjiżi ġodda;
- fl-2007, it-tkabbir ulterjuri tal-UE li jinkludi l-Bulgarija u r-Rumanija; u
- fl-2013, bl-inklużjoni tal-Kroazja.

MINN META JAPPLIKA R-REGOLAMENT?

Ilu japplika mit-23 ta’ Lulju 2003.

SFOND

L-UE-SILC tnediet fl-2003, meta kienet tkopri 6 pajjiżi tal-UE (il-Belġju, id-Danimarka, il-Greċja, l-Irlanda, il-Lussemburgu u l-Awstrija), kif ukoll in-Norveġja, u hija parti integrali mis-Sistema Ewropea tal-Istatistika. Matul is-snin, il-kopertura tagħha kibret biex tkopri t-28 pajjiż kollha tal-UE, it-3 pajjiżi tal-Assoċjazzjoni Ewropea tal-Kummerċ Ħieles (l-Iżlanda, in-Norveġja u l-Iżvizzera), kif ukoll l-Eks-Repubblika Jugoslava tal-Maċedonja, is-Serbja u t-Turkija.

* TERMINI EWLENIN

Data trażversali: data li tirrelata ma’ żmien partikolari jew perjodu ta’ żmien. Din id-data tista’ tittieħed minn kampjuni ta’ stħarriġ trażversali u tista’ tkun ikkombinata ma’ data reġistrata (jiġifieri data dwar il-persuni, l-unitajiet domestiċi jew l-abitazzjonijiet miġbura minn reġistru amministrattiv jew statistiku).

Data lonġitudinali: data li tirrelata mat-tibdil fiż-żmien fuq livell individwali, osservati perjodikament fuq ċertu perjodu ta’ żmien. Din tista’ tinġabar minn stħarriġ trażversali permezz ta’ kampjun f'rotazzjoni fejn l-individwi ladarba jkunu magħżula jiġu segwiti, jew minn panel ta’ stħarriġ pura; Din tista’ tkun ikkombinata ma’ data reġistrata.

DOKUMENT EWLIENI

Ir-Regolament (KE) Nru 1177/2003 tal-Parlament Ewropew u tal-Kunsill tas-16 ta’ Ġunju 2003 jirrigwarda l-istatistika Komunitarja dwar l-introjtu u l-kondizzjonijiet tal-għixien (UE-SILC) (ĠU L 165, 3.7.2003, pp. 1–9)

L-emendi suċċessivi għar-Regolament (KE) Nru 1177/2003 ġew inkorporati fit-test oriġinali. Din il-verżjoni kkonsolidata għandha valur dokumentarju biss.

DOKUMENTI RELATATI

Ir-Regolament tal-Kummissjoni (KE) Nru 1980/2003 tal-21 ta’ Ottubru 2003 li jimplimenta r-Regolament (KE) Nru 1177/2003 tal-Parlament Ewropew u tal-Kunsill li jikkonċerna l-istatistiċi tal-Komunità dwar dħul u kondizzjonijiet ta' għajxien (UE-SILC) fir-rigward ta' definizzjonijiet u definizzjonijiet aġġornati (ĠU L 298, 17.11.2003, pp. 1-22)

Ara l-verżjoni kkonsolidata

Ir-Regolament tal-Kummissjoni (KE) Nru 1981/2003 tal-21 ta’ Ottubru 2003 li jimplimenta r-Regolament (KE) Nru 1177/2003 tal-Parlament Ewropew u tal-Kunsill dwar statistiċi Komunitarji dwar id-dħul u kondizzjonijiet tal-ħajja (UE-SILC) fir-rigward tal-aspetti ta' fieldwork u l-proċeduri ta' imputazzjoni (ĠU L 298, 17.11.2003, pp. 23–28)

Ir-Regolament tal-Kummissjoni (KE) Nru 1982/2003 tal-21 ta’ Ottubru 2003 li jimplimenta r-Regolament (KE) Nru 1177/2003 tal-Parlament Ewropew u tal-Kunsill rigward l-istatistiċi tal-Komunità fuq id-dħul u l-kondizzjonijiet tal-ħajja (UE-SILC) li jirrigwardaw ir-regoli dwar il-kampjuni u t-traċċar (ĠU L 298, 17.11.2003, pp. 29–33)

Ir-Regolament tal-Kummissjoni (KE) Nru 1983/2003 tas-7 ta’ Novembru 2003 li jimplimenta r-Regolament (KE) Nru 1177/2003 tal-Parlament Ewropew u tal-Kunsill dwar statistiċi tal-Komunità fuq id-dħul u l-kondizzjonijiet tal-ħajja (UE-SILC) rigward il-lista ta’ varjabbli ta’ mira primarja (ĠU L 298, 17.11.2003, pp. 34–85)

Ara l-verżjoni kkonsolidata

Ir-Regolament tal-Kummissjoni (KE) Nru 28/2004 tal-5 ta’ Jannar 2004 li jimplimenta r-Regolament (KE) Nru 1177/2003 tal-Parlament Ewropew u tal-Kunsill dwar l-istatistika tal-Komunità fuq l-introjtu u l-kondizzjonijiet ta' ħajja (EU-SILC) fejn għandu x'jaqsam il-kontenut dettaljat tar-rapport intermedju u finali dwar il-kwalità (ĠU L 5, 9.1.2004, pp. 42–56)

l-aħħar aġġornament 18.11.2016