Il-Banek Promozzjonali Nazzjonali u l-Pjan ta’ Investiment għall-Ewropa

PUNTI EWLENIN

L-IPE huwa pakkett ta’ miżuri li jisfruttaw l-investiment pubbliku u privat fl-ekonomija tal-UE. L-istrument ta’ finanzjament ewlieni għal dan l-investiment huwa l-Fond Ewropew għall-Investiment Strateġiku (FEIS) il-ġdid, li huwa kompost minn kontribuzzjonijiet mis-settur pubbliku u mis-settur privat. Il-kontribuzzjonijiet għall-FEIS mill-pajjiżi tal-UE jsiru primarjament mill-NPBs.

L-NPBs huma definiti bħala korpi legali li jwettqu attivitajiet finanzjarji li jingħataw mandat minn pajjiż tal-UE sabiex iwettqu attivitajiet promozzjonali jew ta’ żvilupp. L-NPBs jistgħu jieħdu forom differenti u pajjiżi tal-UE individwali jistgħu jiddeċiedu jekk għandux jiġi stabbilit NPB, kif ukoll fuq l-għamla u l-forma tiegħu.

Il-Komunikazzjoni:

• tipprovdi ċarezza u prinċipji ta’ gwida dwar kif għandu jinħoloq NPB ġdid, bħal elementi ewlenin li għandhom jiġu inklużi fl-istatuti tal-NPB;
• tagħti gwida dwar il-kompatibbiltà mar-regoli tal-UE dwar l-għajnuna mill-Istat. Minħabba li l-NPBs huma fil-biċċa l-kbira tagħhom iffinanzjati mill-Istat, huma għandhom jiffokaw primarjament fuq ir-rimedju tan-nuqqasijiet tas-suq, sabiex b’hekk jiġi evitat li jinħoloq vantaġġ kompetittiv fuq il-parteċipanti fis-suq privat;
• tistabbilixxi kif NPBs minn pajjiżi tal-UE differenti jistgħu jingħaqdu flimkien u jaħdmu mal-Bank Ewropew tal-Investiment (BEI) bil-għan li jistabbilixxu pjattaformi ta’ investiment li jiġbru l-fondi flimkien u jiffaċilitaw il-koinvestiment, b’mod partikolari mill-investituri privati, f’setturi speċifiċi (eż. l-infrastruttura jew l-effiċjenza enerġetika) jew f’reġjuni speċifiċi;
• tispjega kif il-finanzjament tal-NPBs jista’ jwassal għal sinerġija mal-BEI u ma’ fondi oħrajn tal-UE, eż. il-possibbiltà li jiġi estiż ir-rwol tal-NPBs fl-implimentazzjoni kemm tal-programmi tal-UE ġestiti ċentralment kif ukoll tal-FEIS.