Pjan ta’ Ħidma tal-UE għaż-Żgħażagħ għall-perjodu 2016-2018

SOMMARJU TA’:

Riżoluzzjoni dwar il-Pjan ta’ Ħidma tal-UE għall-kooperazzjoni fil-qasam taż-żgħażagħ għall-perjodu 2016-2018

SOMMARJU

X’TAGĦMEL IR-RIŻOLUZZJONI?

Riżoluzzjoni tal-Kunsill tal-2009 tistabbilixxi l-qafas għall-kooperazzjoni tal-UE fil-qasam taż-żgħażagħ għall-perjodu 2010-2018.

Din ir-riżoluzzjoni tal-2015 tispjega fid-dettall pjan ta’ ħidma speċifiku tal-UE għaż-żgħażagħ għall-perjodu 2016-2018, li huwa maħsub biex jipprovdi opportunitajiet aħjar għaż-żgħażagħ fil-pajjiżi tal-UE.

PUNTI EWLENIN

Billi jibni fuq il-Pjan ta’ Ħidma għaż-Żgħażagħ għall-perjodu 2014-2015, il-pjan ta’ ħidma għall-perjodu 2016-2018 jiffoka fuq temi u azzjonijiet tal-UE speċifiċi.

Temi ta’ prijorità

• 1.

  inklużjoni soċjali mtejba taż-żgħażagħ, billi jittieħdu f’kunsiderazzjoni l-valuri sottostanti tal-UE (id-demokrazija, l-istat tad-dritt u d-drittijiet fundamentali);

• 2.

  parteċipazzjoni akbar taż-żgħażagħ fil-ħajja demokratika fl-Ewropa;

• 3.

  tranżizzjoni aktar faċli taż-żgħażagħ miż-żgħożija għall-istat ta’ adulti, b’mod partikolari l-integrazzjoni tagħhom fis-suq tax-xogħol;

• 4.

  sostenn għas-saħħa u l-benesseri taż-żgħażagħ, inkluża s-saħħa mentali;

• 5.

  kontribut għall-indirizzar tal-isfidi u l-opportunitajiet tal-era diġitali għall-politika taż-żgħażagħ, il-ħidma fost iż-żgħażagħ u ż-żgħażagħ infushom;

• 6.

  kontribut għar-rispons għall-opportunitajiet u l-isfidi kkawżati mill-għadd dejjem jikber ta’ migranti u refuġjati żgħażagħ fl-UE.

Gruppi fil-mira

L-azzjonijiet kollha li jridu jiġu implimentati mill-pajjiżi tal-UE u mill-Kummissjoni għandhom ikunu mmirati għaż-żgħażagħ kollha. Hemm enfasi partikolari fuq:

• iż-żgħażagħ f’riskju ta’ emarġinazzjoni,
• dawk barra mill-edukazzjoni, impjieg jew taħriġ (l-hekk imsejħa NEETs), u
• immigranti u refuġjati żgħażagħ li għadhom kif waslu.

Azzjonijiet

Lista ta’ azzjonijiet speċifiċi skont it-temi ta’ prijorità msemmija fuq huma deskritti fl-Anness I tar-riżoluzzjoni bi skeda ta’ żmien speċifika għall-implimentazzjoni tagħhom, bħal:

• studji dwar
  • sistemi ta’ kwalità għall-ħidma fost iż-żgħażagħ
  • il-volontarjat taż-żgħażagħ u
  • l-intraprenditorija taż-żgħażagħ.
• gruppi ta’ esperti dwar
  • il-prevenzjoni tal-emarġinazzjoni u r-radikalizzazzjoni
  • id-diġitalizzazzjoni u ż-żgħażagħ
  • l-integrazzjoni tar-refuġjati żgħażagħ.

SFOND

Għal aktar tagħrif, ara:

• il-portal taż-żgħażagħtal-Kummissjoni Ewropea
• ir-rapport tal-UE dwar iż-Żgħażagħ għall-2015.

ATT

Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, li ltaqgħu fil-Kunsill, dwar Pjan ta’ Ħidma tal-Unjoni Ewropea għaż-Żgħażagħ għall-perjodu 2016-2018 (ĠU C 417, 15.12.2015, p. 1-9)

ATTI RELATATI

Riżoluzzjoni tal-Kunsill tas-27 ta’ Novembru 2009 dwar qafas imġedded għal kooperazzjoni Ewropea fil-qasam taż-żgħażagħ (2010-2018) (ĠU C 311, 19.12.2009, p. 1-11)

Riżoluzzjoni tal-Kunsill u tar-Rappreżentanti tal-Gvernijiet tal-Istati Membri, li ltaqgħu fil-Kunsill tal-20 ta’ Mejju 2014, dwar Pjan ta’ Ħidma tal-Unjoni Ewropea għaż-Żgħażagħ għall-perjodu 2014-2015 (ĠU C 183, 14.6.2014, p. 5-11)

l-aħħar aġġornament 13.06.2016