L-ugwaljanza bejn is-sessi fl-isport

SOMMARJU TAD-DOKUMENT:

Konklużjonijiet dwar l-ugwaljanza bejn is-sessi fl-isport

X'INHU L-GĦAN TAL-KONKLUŻJONIJIET?

Huma jfittxu li jistabbilixxu kif l-ugwaljanza bejn is-sessi — prinċipju li qed jiġi integrat fl-oqsma ta’ politika kollha tal-Unjoni Ewropea (UE) — tista’ tiġi applikata għall-isport. Dawn jipprovdu linji gwida volontarji għall-awtoritajiet nazzjonali, il-Kummissjoni Ewropea u l-organizzazzjonijiet sportivi.

PUNTI EWLENIN

Biex jippromwovu l-ugwaljanza bejn is-sessi, il-konklużjonijiet jistiednu lill-awtoritajiet nazzjonali:

• jiżviluppaw pjanijiet ta’ azzjoni għall-pajjiż kollu;
• jenfasizzaw il-valur tad-diversità u l-bilanċ bejn is-sessi fl-amministrazzjoni sportiva;
• jedukaw lil dawk li jieħdu d-deċiżjonijiet, lill-kowċis u lill-ġenituri biex jeliminaw l-isterjotipi tas-sessi minn età żgħira;
• jindirizzaw il-vjolenza sessista u jipproteġu lil vittmi attwali u potenzjali mill-fastidju sesswali u l-abbuż;
• jużaw l-avvenimenti sportivi għas-sensibilizzazzjoni dwar it-traffikar tal-bnedmin għall-isfruttament sesswali.

Flimkien, l-awtoritajiet nazzjonali u l-Kummissjoni huma mitluba:

• jiżviluppaw metodi biex jevalwaw jekk il-persuni jkunux adatti biex jaħdmu fil-qasam tal-isport, speċjalment mat-tfal;
• jagħmlu użu minn programmi, bħal Erasmus+ (eż. taħt il-faxxa tal-inklużjoni soċjali tiegħu), u l-fondi tal-UE oħrajn biex jippromwovu l-ugwaljanza b’attenzjoni partikolari fuq il-kowċis u l-mezzi tax-xandir;
• jaraw jekk jistgħux jużaw ir-rispett għall-ugwaljanza bejn is-sessi bħala kundizzjoni biex jirċievu l-finanzjament pubbliku.

L-organizzazzjonijiet sportivi nnifishom jistgħu jikkontribwixxu billi:

• jippromwovu l-ugwaljanza fl-amministrazzjoni sportiva, fost il-kowċis u fil-livelli kollha tat-teħid ta’ deċiżjonijiet, bħal bords eżekuttivi u kumitati sportivi;
• jużaw kodiċi ta’ etika biex jindirizzaw il-vjolenza sessista u jistabbilixxu hotlines u servizzi ta’ appoġġ għal dawk milquta;
• iħeġġu r-rappurtar mhux sessist tal-isport mill-mezzi tax-xandir.

SFOND

• L-ugwaljanza bejn in-nisa u l-irġiel hi waħda mill-prinċipji fundamentali tal-UE. Din hija miktuba fit-trattati tagħha u fil-Karta tad-Drittijiet Fundamentali. L-isport jista’ jgħin biex dan jinkiseb billi jiġu promossi l-opportunitajiet ugwali u l-inklużjoni soċjali u jiġu żviluppati l-ħiliet, l-għarfien u l-kapaċitajiet tal-individwi.
• L-ugwaljanza bejn is-sessi hija wkoll prijorità fil-Pjan ta’ Ħidma tal-UE għall-Isport (2014–2017). Wieħed minn 5 Gruppi Esperti stabbiliti biex jgħinu fl-implimentazzjoni tal-Pjan ta’ Ħidma (Grupp Espert dwar il-Governanza Tajba) ingħata l-mandat li jħejji rakkomandazzjonijiet dwar l-ugwaljanza bejn is-sessi fl-isport.
• Il-Kummissjoni taħdem mill-qrib ma' organizzazzjonijiet bħall-organizzazzjoni tal-isports mhux governattiva Ewropea, il-grupp tan-Nisa Ewropej u l-Isport u l-Grupp ta' Ħidma Internazzjonali tan-Nisa fl-Isport fl-iżvilupp ta' politiki u inizjattivi ġodda.
• Għal aktar informazzjoni ara:
  • “L-ugwaljanza bejn is-sessi fl-isport” fuq is-sit elettroniku tal-Istitut Ewropew għall-Ugwaljanza bejn is-Sessi
  • “Proposta għal Azzjonijiet Strateġiċi 2014–2020” fuq is-sit elettroniku tal-Kummissjoni Ewropea
  • Grupp ta' Esperti dwar Governanza Tajba, Rakkomandazzjonijiet fuq l-Ugwaljanza bejn is-Sessi fl-Isport
  • Il-sit elettroniku tal-Isport tal-Kummissjoni Ewropea

DOKUMENT EWLIENI

Konklużjonijiet tal-Kunsill tal-21 ta’ Mejju 2014 dwar l-Ugwaljanza bejn is-Sessi fl-Isport (2014/C 183/09) (ĠU C 183, 14.6.2014, p. 39-42)

l-aħħar aġġornament 09.01.2017