Nibnu reżiljenza fil-pajjiżi li qegħdin jiżviluppaw

SOMMARJU TAD-DOKUMENT:

Komunikazzjoni tal-Kummissjoni COM(2012) 586 finali: L-Approċċ tal-UE għar-Reżiljenza: Nitgħallmu mill-kriżijiet tas-sigurtà tal-ikel

SOMMARJU

X’TAGĦMEL DIN IL-KOMUNIKAZZJONI?

Tfittex li tuża l-lezzjonijiet minn dan ir-reġjun biex ittejjeb l-effettività tal-kontribuzzjoni tal-UE biex tnaqqas il-vulnerabbiltà f'pajjiżi fraġli u suxxettibbli għal diżastri, billi tinkludi l-kunċett ta' reżiljenza* bħala għan ċentrali.

PUNTI EWLENIN

Biex jitnaqqsu l-ħtiġijiet umanitarji, jittaffa l-faqar u tiġi indirizzata l-fraġilità hemm bżonn ta' sforzi sistematiċi biex tinbena r-reżiljenza tal-popolazzjonijiet vulnerabbli.
Hemm bżonn ta' strateġiji multidimensjonali u fit-tul immirati biex itaffu l-kawżi sottostanti tal-kriżijiet u jsaħħu l-kapaċitajiet biex tiġi ġestita aħjar l-inċertezza u l-bidla.
Servizzi mtejba, opportunità u protezzjoni minn xokkijiet u tensjonijiet se jtejbu l-għajxien ta' dawk l-iktar vulnerabbli. Meta titfaċċa kriżi, il-ġestjoni tar-riskju twassal għal rispons iktar bikri u iktar effettiv biex tindirizza l-ħtiġijiet immedjati, tillimita t-telf u tħaffef l-irkupru.
Il-kunsiderazzjonijiet tar-reżiljenza - il-ġestjoni tar-riskju u t-tnaqqis tal-vulnerabbiltà - għandhom jiġu integrati kif xieraq fl-istrateġiji kollha tal-iżvilupp u l-irkupru.

Ir-rispons tal-UE għall-kriżijiet tal-ikel fl-Afrika

B'segwitu għall-kriżijiet tal-ikel fl-Afrika, ġie stabbilit rispons ta' żvilupp umanitarju mill-UE. Minbarra l-attivitajiet li jsalvaw il-ħajja, din l-assistenza kkontribwixxiet ukoll għall-proċess ta' rkupru, pereżempju, permezz tad-dispożizzjoni ta' żrieragħ u għodod u ġestjoni tal-ilma mtejba.

L-istrateġiji tar-reżiljenza fit-tul qed jgħinu lill-pajjiżi u lill-komunitajiet affettwati biex jirkupraw u jibnu l-kapaċità biex ilaħħqu ma' kriżijiet futuri.

L-inizjattivi tar-reżiljenza SHARE* u AGIR* jirrappreżentaw titjib fil-mod ta' kif jinteraġixxu l-assistenza umanitarja u l-iżvilupp. L-assistenza fuq perjodu ta' żmien qasir titjieb meta tiġi rikonoxxuta r-rabta ta' bejn is-serħan, ir-rijabilitazzjoni u l-iżvilupp (LRRD). L-UE tista' timpenja ruħha biex tindirizza l-kawżiet prinċipali tan-nuqqas ta' sikurezza tal-ikel iktar fit-tul billi tirrestawra l-għajxien, issaħħaħ il-protezzjoni soċjali u s-sistemi tal-ġestjoni tad-diżastri u ttejjeb in-nutrizzjoni.

Dawn il-miżuri jiffukaw fuq is-sigurtà tal-ikel - u l-kriżijiet tal-ikel - fl-Afrika sub-Saħarjana. Madankollu, dan l-approċċ huwa applikabbli għal reġjuni oħrajn u għal tipi oħrajn ta' vulnerabbiltà bħal reġjunijiet mhedda minn:

għargħar
ċikluni
terremoti
nixfiet
maltempati u tsunami
tibdil fil-klima
żidiet fil-prezzijiet tal-ikel.

Jikkonċentra fuq 3 komponenti prinċipali:

1.
L-antiċipazzjoni tal-kriżijiet permezz tal-valutazzjoni tar-riskji
2.
L-iffukar fuq il-prevenzjoni u t-tħejjija
3.
It-titjib fir-rispons għall-kriżijiet.

Il-Komunikazzjoni tippreżenta pjan ta' 10 punti biex iżżid ir-reżiljenza, inkluż li tippromwovi djalogu dwar ir-reżiljenza mal-pajjiżi mhux tal-UE permezz ta' mezzi disponibbli bħan-Nazzjonijiet Uniti, u l-fora tal-G8 u G20 ta' nazzjonijiet sinjuri u emerġenti. Il-pjan ġie kkonsolidat u estiż fil-Pjan ta’ Azzjoni għar-Reżiljenza fil-Pajjiżi li għandhom it-Tendenza li Jesperjenzaw il-Kriżijiet 2013–2020 li jsejjaħ lill-UE u lill-pajjiżi tal-UE biex:

jappoġġjaw lill-AGIR, SHARE u inizjattivi ta' reżiljenza oħrajn f'kuntesti u f'reġjuni differenti,
jinkludu ġestjoni tar-riskji tad-diżastri fuq l-aġenda tar-reżiljenza,
jippromwovu approċċi integrati għall-adattament tat-tibdil fil-klima, it-tnaqqis tar-riskju tad-diżastri u r-reżiljenza,
reżiljenza integrata fl-aġenda tas-sigurtà tal-ikel u n-nutrizzjoni,
isaħħu l-mekkaniżmi tal-assistenza għall-gruppi vulnerabbli tal-popolazzjoni, jappoġġjaw l-iżvilupp tal-approċċi nazzjonali għall-protezzjoni soċjali,
jestendu l-appoġġ għas-soluzzjonijiet tal-finanzjament tar-riskju fil-livell nazzjonali u lokali, inkluż bonds għall-katastrofi u l-assigurazzjoni,
jappoġġjaw l-iżvilupp ta' settur privat lokali, opportunitajiet ta' tkabbir u soluzzjonijiet li jdumu għat-tisħiħ tar-reżiljenza tal-popolazzjonijiet vulnerabbli,
jappoġġjaw l-inizjattivi lokali mill-organizzazzjonijiet lokali,
jiżviluppaw metidoloġiji, ittestjar u valutazzjoni ta' reżiljenza urbani,
jiżviluppaw approċċi ta' reżiljenza għall-isfidi kroniċi ta' refuġjati,
jappoġġjaw ir-reżiljenza u l-iżvilupp tal-kapaċità fil-livell lokali fl-Inizjattiva Voluntiera tal-Għajnuna tal-UE (f'diskussjoni),
itejbu l-għarfien tar-reżiljenza u l-bażi tal-evidenza,
jiżviluppaw approċċi komuni għall-promozzjoni,
jipprovdu gwida għar-reżiljenza operattiva għall-Kummissjoni Ewropea u msieħba oħra,
jużaw metidoloġiji u għodod imtejba għall-valutazzjonijiet tar-riskju, il-ġestjoni tar-riskju u l-kejl tar-reżiljenza u
japplikaw u jiżviluppaw strumenti finanzjarji flessibbi u kontinġenzi.

SFOND

Il-kriżijiet rikorrenti tal-ikel u n-nutrizzjoni fis-Saħel u l-Qarn tal-Afrika jaffettwaw lil miljuni ta' nies, jirriżultaw f'ġuħ mifrux u jikkontribwixxu biex iżommu lin-nies fi stat perpetwu ta' faqar. Din is-sitwazzjoni tenfasizza l-ħtieġa għal approċċ fit-tul u sistematiku għall-bini tar-reżiljenza tal-pajjiżi u popolazzjonijiet vulnerabbli.

TERMINI EWLENIN

* Reżiljenza: il-kapaċità ta' individwu, unità domestika, komunità, pajjiż jew reġjun li jifilħu għal, jadattaw u jirkupraw malajr minn tensjonijiet u xokkijiet

* SHARE: Nappoġġjaw ir-Reżiljenza tal-Qarn tal-Afrika

* AGIR: Alleanza Globali għar-Reżiljenza

ATT

Komunikazzjoni mill-Kummissjoni lill-Parlament Ewropew u lill-Kunsill - L-Approċċ tal-UE għar-Reżiljenza: Nitgħallmu mill-kriżijiet tas-sigurtà tal-ikel (COM(2012) 586 finali tat-3.10.2012)

ATTI RELATATI

Konklużjonijiet tal-Kunsill dwar l-approċċ tal-UE għar-reżiljenza, Brussell, 28 ta' Mejju 2013

Dokument ta' Ħidma tal-Persunal tal-Kummissjoni: Pjan ta’ Azzjoni għar-Reżiljenza fil-Pajjiżi li għandhom it-Tendenza Jesperjenzaw il-Kriżijiet 2013– 2020 ( SWD(2013) 227 finali tad-19.6.2013)

l-aħħar aġġornament 25.11.2015