Il-qerda tal-faqar u l-kisba tal-iżvilupp sostenibbli

SOMMARJU TAD-DOKUMENT:

Komunikazzjoni (COM(2014) 335 final) — Ħajja diċenti għal kulħadd: minn viżjoni għal azzjoni kollettiva

X’INHU L-GĦAN TAL-KOMUNIKAZZJONI?

• Din tfittex li tikkontribwixxi għall-pożizzjoni tal-Unjoni Ewropea (UE) fin-negozjati internazzjonali fuq l-Aġenda tal-2030 għall-Iżvilupp Sostenibbli.
• L-Aġenda tal-2030 għandha l-għan li tirrinforza l-impenn tal-komunità internazzjonali biex teqred il-faqar u tappoġġa l-iżvilupp sostenibbli.

PUNTI EWLENIN

Għanijiet ewlenin

• Il-komunikazzjoni tiddeskrivi l-prinċipji ewlenin, l-oqsma ta’ prijorità u l-miri potenzjali għal Aġenda integrata ġdida li jirriżultaw mis-segwitu għall-Għanijiet ta’ Żvilupp tal-Millennju (MDGs), il-konferenzi ta’ Rio +20 u ta’ Monterrey.
• L-Għanijiet ta’ Żvilupp tal-Millennju (SDGs) għandhom jikkontribwixxu qafas internazzjonali ġdid li se jieħu post l-MDGs fil-kuntest ta’ sħubija globali ġdida bejn il-pajjiżi kollha, kif ukoll mas-soċjetà ċivili (pereżempju, ċittadini li jaġixxu kollettivament) u s-settur privat.

Prinċipji

• Il-viżjoni tal-UE għall-Aġenda tal-2030 (waqt il-fażi tan-negozjar qabel l-adozzjoni) kienet li għandha timmira għall-qerda tal-faqar estrem u li d-dinja taqbad id-direzzjoni lejn is-sostenibbiltà, u b'hekk tkun żgurata ħajja deċenti għal kulħadd sal-2030.
• Il-pożizzjoni tal-UE waqt in-negozjati kienet li l-Aġenda tal-2030 għandha tkun:
  • ibbażata fuq it-tliet dimensjonijiet tal-iżvilupp sostenibbli: dik soċjali, ambjentali u ekonomika;
  • globali fl-ambizzjoni tagħha u applikabbli b’mod universali;
  • ibbażata fuq is-sjieda nazzjonali, filwaqt li tqis il-kuntesti nazzjonali, il-kapaċitajiet u l-livelli ta’ żvilupp differenti;
  • ibbażata fuq id-drittijiet u ffukata fuq il-persuni.

Oqsma ta’ prijorità u miri

• L-oqsma ta’ prijorità identifikati kellhom l-għan li jikkontribwixxu għad-diskussjonijiet globali li jsiru fil-Grupp ta’ Ħidma Miftuħ tan-Nazzjonijiet Uniti (NU) dwar l-Għanijiet ta’ Żvilupp Sostenibbli. Dawn l-oqsma ta’ prijorità jinkludu:
  • il-faqar;
  • l-inugwaljanza;
  • is-saħħa;
  • is-sigurtà tal-ikel;
  • l-edukazzjoni;
  • l-ugwaljanza bejn is-sessi;
  • l-ilma u s-sanità;
  • l-enerġija sostenibbli;
  • xogħol deċenti;
  • it-tkabbir inklużiv u sostenibbli;
  • il-konsum u l-produzzjoni sostenibbli;
  • il-bijodiversità;
  • id-degradazzjoni tal-art; u
  • l-ibħra u l-oċeani.
• L-UE riedet ukoll tara li l-Aġenda tal-2030 tindirizza l-ġustizzja, l-ugwaljanza u l-ekwità, il-governanza tajba, id-demokrazija u l-istat tad-dritt, kif ukoll soċjetajiet paċifiċi u l-ħelsien mill-vjolenza.

Il-moblizzazzjoni tar-riżorsi finanzjarji meħtieġa

Minħabba l-isfidi, jeħtieġ li jsir użu sħiħ mir-riżorsi kollha disponibbli:

• 1.

  riżorsi interni bit-titjib tal-politika u l-amministrazzjoni fiskali, il-ġlieda kontra l-flussi illeċiti u l-korruzzjoni u t-titjib tal-ġestjoni tar-riżorsi naturali;

• 2.

  appoġġ internazzjonali għall-aċċcess ta’ riżorsi u investimenti addizzjonali, bħat-taħlit ta’ forom differenti ta’ finanzjament;

• 3.

  is-settur privat biex jiġi appoġġat it-tkabbir inklużiv u sostenibbli.

L-UE talbet lill-pajjiżi tal-UE biex jikkonfermaw l-impenn tagħhom biex tintlaħaq il-mira ta’ 0.7 % tal-prodott nazzjonali gross tagħhom impenjat favur l-għajnuna uffiċjali għall-iżvilupp sal-2015.

SFOND

Għal aktar informazzjoni, ara:

• “Kwistjonijiet internazzjonali” fuq is-sit elettroniku tal-Kummissjoni Ewropea.

DOKUMENT EWLIENI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Ħajja diċenti għal kulħadd: Minn viżjoni għal azzjoni kollettiva (COM(2014) 335 final, 2.6.2014)

DOKUMENTI RELATATI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Ħajja diċenti għal kulħadd: Neqirdu l-faqar u nagħtu lid-dinja futur sostenibbli (COM(2013) 92 final, 27.2.2013)

l-aħħar aġġornament 12.12.2016