Ostakoli għall-kummerċ u l-investiment fl-UE

Kull sena, il-Kummissjoni Ewropea tippubblika rapport dwar l-ostakoli għall-kummerċ u l-investiment li jħabbtu wiċċhom magħhom il-kumpaniji tal-Unjoni Ewropea (UE) fis-swieq tas-sħab ekonomiċi ewlenin tagħha. Ir-rapport tal-2015 jikkonkludi li, minkejja l-irkupru ekonomiku globali, dawn l-ostakoli għadhom preżenti.

ATT

Rapport mill-Kummissjoni lill-Kunsill Ewropew- Rapport dwar l-Ostakoli għall-Kummerċ u l-Investiment 2015 (COM(2015) 127 final tas-17.3.2015)

SOMMARJU

Kull sena, il-Kummissjoni Ewropea tippubblika rapport dwar l-ostakoli għall-kummerċ u l-investiment li jħabbtu wiċċhom magħhom il-kumpaniji tal-Unjoni Ewropea (UE) fis-swieq tas-sħab ekonomiċi ewlenin tagħha. Ir-rapport tal-2015 jikkonkludi li, minkejja l-irkupru ekonomiku globali, dawn l-ostakoli għadhom preżenti.

X’JAGĦMEL DAN IR-RAPPORT?

Ir-rapport huwa parti mill-istrateġija għat-tisħiħ tal-kummerċ stabbilita fl-2010 biex tikkumplimenta l-Istrateġija Ewropa 2020.

Ir-rapport:

• jagħti ħarsa ġenerali lejn in-negozjati tal-UE dwar il-kummerċ u l-investiment,
• jeżamina l-ostakoli għall-kummerċ u l-investiment li qed iħabbtu magħhom negozji tal-UE fl-Arġentina, il-Brażil, iċ-Ċina, l-Indja, il-Ġappun, ir-Russja u l-Istati Uniti,
• jidentifika l-azzjonijiet meħuda mill-Kummissjoni biex tiżgura l-aċċess sikur għas-swieq globali għad-ditti Ewropej.

PUNTI EWLENIN

In-negozjati li għaddejjin

Il-kisbiet fl-2014 jinkludu:

• ġew solvuti l-kwistjonijiet pendenti tal-“ Pakkett ta’ Bali ” tad-WTO - inkluż dawk relatati mal-Ftehim dwar il-Faċilitazzjoni tal-Kummerċ,
• tkomplew in-negozjati tal-Istati Uniti dwar is-Sħubija Trans-Atlantika ta’ Kummerċ u ta’ Investiment,
• ġew konklużi n-negozjati dwar il-ftehim kummerċjali bejn l-UE u l-Kanada,
• ġew iffirmati l-Ftehimiet ta’ Assoċjazzjoni mal-UE mill-Moldova u l-Ġeorġja li jinkludu Żoni ta’ Kummerċ Ħieles Approfonditi u Komprensivi,
• jinsabu għaddejjin in-negozjati maċ-Ċina dwar Ftehim ta’ Investiment komprensiv. Dan huwa mistenni jkun ta’ benefiċċju għaż-żewġ naħat billi jiżgura swieq li huma miftuħa għall-investiment fiż-żewġ direzzjonijiet.

Eżempji ta’ ostakoli ewlenin għall-kummerċ u l-investiment identifikati

L-Arġentina u l-Brażil

• id-“ dikjarazzjoni ġuramentata minn qabel mill-importatur ” tal-Arġentina għall-importazzjonijiet kollha tibqa’ sfida ewlenija,
• ir-restrizzjonijiet tal-Arġentina fuq it-trasferiment ta’ muniti barranin, dividendi* u royalties*,
• limitazzjonijiet fuq sjieda barranija fil-Brażil, pereżempju fis-setturi tal-midja, l-avjazzjoni u tal-minjieri,
• it-taxxi diskriminatorji u s-sussidjar ta’ produtturi domestiċi fil-Brażil,
• il-miżuri tal-Brażil li jħarbtu l-kundizzjonijiet għall-parteċipazzjoni f’sejħiet għal offerti pubbliċi.

Iċ-Ċina

• ir-restrizzjonijiet sinifikanti fuq l-investiment barrani,
• kwistjonijiet rigward ir-rispett għad-drittijiet ta’ proprjetà intellettwali,
• it-teknoloġija ta’ sigurtà tal-informatika żviluppata fiċ-Ċina biss hija meqjusa bħala “sikura”,
• ostakoli għall-aċċess għas-suq fis-setturi tas-saħħa u l-kożmetiċi,
• ostakoli relatati ma’ aspetti sanitarji u fitosanitaji.

L-Indja

• ostakoli għall-aċċess għas-suq fis-setturi tal-IT u l-prodotti elettroniċi,
• approċċ restrittiv għall-użu ta’ stikers fuq l-imballaġġ li wassal għal tfixkil serju fil-kummerċ tal-prodotti tal-ikel.

Il-Ġappun

• l-akkwist pubbliku (inklużi l-linji ferrovjarji).

Ir-Russja

• implimentazzjoni żbaljata tat-tariffi relatati mad-WTO fil-każ ta’ ħafna prodotti,
• liġi ġdida dwar il-lokalizzazzjoni tad-dejta personali teħtieġ li d-dejta personali kollha tal-individwi Russi tinħażen fiżikament u tiġi pproċessata fir-Russja, bl-ebda eżenzjoni għal dejta kummerċjali; dan għandu implikazzjonijiet ċari għall-kumpaniji tal-UE li se jkunu jistgħu jużaw biss ċentri tad-dejta bbażati r-Russja biex jipproċessaw id-dettalji ta’ individwi Russi,
• ostakoli relatati ma’ aspetti sanitarji u fitosanitarji,
• projbizzjoni fuq prodotti agrikoli u oġġetti tal-ikel mill-UE minħabba sanzjonijiet kontra r-Russja fil-kuntest tas-sitwazzjoni fl-Ukrajna,
• regolamenti li spiss jistabbilixxu ċertifikazzjoni eċċessiva u rekwiżiti ta’ valutazzjoni tal-konformità,
• sussidji għall-manifatturi u x-xerreja ta’ makkinarju agrikolu b’ċerti rekwiżiti ta’ kontenut lokali.

L-Istati Uniti

• ir-restrizzjonijiet “ Buy American ” li jirregolaw l-akkwist pubbliku,
• ostakoli relatati ma’ aspetti sanitarji u fitosanitarji,
• diffikultajiet biex jiġu mħarsa d-drittijiet tal-proprjetà intellettwali - bħal indikazzjonijiet ġeografiċi tal-UE fuq l-ikel u x-xorb.

Sforzi tal-Kummissjoni favur l-aċċess għas-suq

Il-Kummissjoni tagħmel użu minn diversi għodod biex tindirizza l-ostakoli għall-kummerċ u l-investiment:

• in-negozjati li għaddejjin dwar Ftehim ta’ Kummerċ Ħieles (FTA) (l-UE f’negozjati ma’ erba’ mis-sitt sħab),
• l-implimentazzjoni u l-infurzar ta’ FTAs eżistenti,
• proċedimenti tar-Riżoluzzjoni tad-Disputi tad-WTO,
• Kumitati tad-WTO,
• Samits internazzjonali (spiss fil-format tal-G20, jiġifieri lagħat li jinvolvu l-akbar 20 ekonomija tad-dinja).

Għal aktar informazzjoni, ara L-Aċċess għas-Swieq fuq il-websajt tal-Kummissjoni Ewropea.

TERMINI EWLENIN

* Dividendi: flus imħallsa minn kumpanija lill-azzjonisti tagħha.

* Royalties: somom imħallsa lid-detentur tal-proprjetà intellettwali għall-użu tagħha. Eżempji jinkludu l-ħlas lil mużiċist għal kull reġistrazzjoni mibjugħa jew lil inventur għall-użu ta’ privattiva.

l-aħħar aġġornament 07.08.2015