Skemi ta’ ċertifikazzjoni tal-kwalità tal-ikel

PUNTI EWLENIN

Filwaqt li xi skemi ta’ ċertifikazzjoni għal prodotti agrikoli u oġġetti tal-ikel ikopru l-konformità mal-istandards obbligatorji, dawn il-linji gwida jikkonċernaw speċifikament skemi ta’ ċertifikazzjoni volontarji. Dawn huma mfassla biex jiżguraw livelli ta’ kwalità f’oqsma bħat-togħma, il-kulur jew ir-riħa kif ukoll, pereżempju, fatturi ambjentali, tal-benesseri tal-annimali jew tal-“kummerċ ġust”.

Il-linji gwida huma mfassla biex jagħmlu dawn l-iskemi ta’ ċertifikazzjoni volontarji iktar effettivi billi:

• jenfasizzaw l-aqwa prattiki;
• jagħmlu r-rekwiżiti tal-iskema iktar ċari;
• iżidu l-opportunitajiet tas-suq u jnaqqsu l-ispejjeż għall-bdiewa u l-produtturi;
• jipproteġu r-responsabbiltà u r-reputazzjoni fir-rigward tal-prodott u l-indikazzjonijiet ta’ fuq it-tikketta għall-bejjiegħa bl-ingrossa u bl-imnut;
• jipprovdu informazzjoni kredibbli u affidabbli dwar il-prodotti għall-konsumaturi; u
• jiżguraw konformità mar-regoli tas-suq intern tal-UE, b’mod partikolari fir-rigward tal-imġiba antikompetittiva.

Il-linji gwida jirrakkomandaw li l-iskemi, għalkemm jistgħu jiġu żviluppati minn gruppi ta’ esperti, għandhom ikunu strutturati biex jinkoraġġixxu l-parteċipazzjoni tal-partijiet interessati kollha, jiġifieri produtturi, bdiewa, awtoritajiet pubbliċi, gruppi ta’ interess u klijenti.

L-iskemi għandu jkollhom il-karatteristiċi li ġejjin:

• iċ-ċertifikazzjoni għandha ssir minn entità indipendenti;
• għandhom jitwettqu spezzjonijiet regolari tal-parteċipanti tal-iskemi, bi kriterji u listi ta’ kontroll ċari;
• għandhom jiġu stabbiliti limiti għas-sanzjonijiet, bi proċeduri ċari għat-trattament ta’ nuqqas ta’ konformità;
• għandhom jeżistu mekkaniżmi ta’ rispons, b’parteċipazzjoni kontinwa fl-iżvilupp tal-ġejjieni.

Il-linji gwida jirrakkomandaw li t-tikketti tal-ikel m’għandhomx jipprovdu diżgwid jew jagħmlu pretensjonijiet foloz dwar prodott fir-rigward ta’:

• in-natura, l-identità, il-proprjetajiet, il-kompożizzjoni, il-kwantità, id-durabbiltà, l-oriġini, il-metodu tal-manifattura jew tal-produzzjoni;
• proprjetajiet li ma jkollhomx, jew karatteristiċi speċjali meta fil-fatt l-oġġetti tal-ikel simili kollha jkollhom dawk il-karatteristiċi;
• reklamar jew promozzjoni b’mod li jiskredita s-sikurezza ta’ prodotti oħra fis-suq jew l-effikaċja tal-kontrolli uffiċjali.