Is-sajd fl-Atlantiku tal-grigal — regoli dwar stokkijiet tal-baħar fond u ilmijiet internazzjonali
SOMMARJU TA’:
Regolament (UE) 2016/2336 — regoli li jipproteġu stokkijiet tas-sajd tal-baħar fond u ekosistemi marini vulnerabbli
X’INHU L-GĦAN TAR-REGOLAMENT?
- Dan ifittex li jiżgura l-isfruttament sostenibbli tal-istokkijiet tal-baħar fond waqt li jnaqqas l-impatt ambjentali ta’ dan is-sajd fuq ekosistemi marini vulnerabbli (VMEs)* fl-ilmijiet fondi u t-titjib tal-bażi ta’ informazzjoni għall-valutazzjoni xjentifika permezz tal-ġbir ta’ data.
- Dan iħassar u jissostitwixxi r-Regolament (KE) Nru 2347/2002, li stabbilixxa r-regoli dwar l-aċċess għal stokkijiet ta’ ħut tal-baħar fond fl-Unjoni Ewropea (UE).
PUNTI EWLENIN
- Sajd tal-baħar fond bi xbieki tat-tkarkir tal-qiegħ (jiġifieri, irkaptu mfassal biex jaqbad speċi fuq jew ħdejn il-qiegħ tal-baħar) taħt 800 metru mill-wiċċ tal-ilma hu pprojbit.
- Abbażi tal-aħjar parir xjentifiku disponibbli, il-Kummissjoni Ewropea stabbilita fl-2022, permezz tar-Regolament (UE) 2022/1614, il-lista ta’ żoni fejn VMEs huma magħrufa li jseħħu jew jistgħu jseħħu fl-ilmijiet tal-UE. Dawn l-oqsma huma magħluqa għall-irkaptu tal-qiegħ kollu li jaħdem fl-ilmijiet tal-UE f’fond ta’ inqas minn 400 metru.
- Huma introdotti żewġ tipi ta’ awtorizzazzjoni tas-sajd għal:
- bastimenti li jħottu aktar minn 8 % ta’ speċi tal-baħar fond fi kwalunkwe vjaġġ tas-sajd u tal-inqas 10 tunnellati fis-sena kalendarja kkonċernata (awtorizzazzjoni fil-mira); u
- bastimenti li għandhom qabdiet aċċessorji* ta’ speċi tal-baħar fond, li huma soġġetti għal flessibbiltà ta’ 15 % aktar minn 10 tunnellati (awtorizzazzjoni b’qabdiet inċidentali).
- Il-kapaċità tas-sajd hija limitata abbażi tal-kapaċità tal-bastimenti li jkunu ħattew aktar minn 10 tunnellati ta’ speċi tal-baħar fond fl-2009-2011.
- Is-sajd tal-baħar fond fil-mira huwa ristrett għal żoni (magħrufa bħala ż-“żona tal-impronti”) fejn seħħ sajd fil-baħar fond fl-2009-2011.
- L-Istati Membri tal-UE jistgħu jissottomettu lill-Kummissjoni, f’isem il-flotot tas-sajd tagħhom, talba biex iwettqu sajd esploratorju barra miż-żona tal-impronti. It-talbiet iridu jkunu akkumpanjati minn valutazzjoni tal-impatt u jindikaw id-durata stmata tas-sajd esploratorju u n-numru stmat ta’ bastimenti li jkunu qed jieħdu sehem u l-kapaċità tagħhom. Il-Kummissjoni tistabbilixxi l-kudizzjonijiet għal sajd bħal dan permezz ta’ atti ta’ implimentazzjoni. Id-durata tas-sajd esploratorju hija limitata għal massimu ta’ sena (tiġġedded darba).
- Il-bastimenti għandhom jirrappurtaw tilqigħ* ma’ VMEs taħt fond ta’ 400 metru u jimxu lejn żona alternattiva tal-inqas 5 mili nawtiċi ’l bogħod miż-żona ta’ tilqigħ.
- Ir-Regolament jintroduċi regoli aktar stretti inkluż:
- restrizzjonijiet fuq trasbord*;
- rappurtar fil-ħin reali dwar l-użu tal-kwota;
- segwitu ta’ qbid li ma jkunx irrappurtat b’mod tajjeb;
- programmi speċifiċi ta’ kontroll u ta’ spezzjoni.
- Il-kwantitajiet li jaqbżu 100 kg ta’ speċi tal-baħar fond jistgħu jinqabdu biss f’portijiet deżinjati. L-intenzjoni li jħottuhom għandha tiġi notifikata tal-inqas 4 sigħat bil-quddiem u siegħa bil-quddiem għall-bastimenti ta’ mhux aktar minn 12-il metru.
- Awtorizzazzjoni tas-sajd tista’ tiġi rtirata tal-inqas xahrejn f’każ ta’ nonkonformità mal-kundizzjonijiet tagħha dwar:
- l-użu ta’ rkapti fis-sajd mhux adegwati;
- iż-żoni ta’ operazzjoni u l-limiti ta’ qbid;
- in-nuqqas li jittieħed osservatur abbord.
- Dan jistabbilixxi wkoll regoli dwar l-istandards tal-ġbir ta’ data u r-rekwiżiti għall-kopertura tal-osservatur sabiex jiġi żgurat il-ġbir ta’ data rilevanti, f’waqtja u preċiża dwar il-qbid u l-qbid aċċessorju ta’ speċi tal-baħar fond. Jeħtieġ ukoll li tinġabar dejta dwar tilqigħ ma’ VMEs ta’ tal-inqas 20 % għal bastimenti fil-mira li jkunu qed jużaw xbieki tat-tkarkir tal-qiegħ u għeżula tal-qiegħ u 10 % koperta għal bastimenti oħrajn. Din il-koperta tista’ tiġi adattata mill-Kummissjoni abbażi ta’ parir xjentifiku.
- Il-miżuri ta’ hawn fuq jikkonċernaw l-ilmijiet tal-UE u ċerti żoni koperti mill-Kumitat tas-Sajd għall-Atlantiku Ċentrali tal-Lvant fejn jistadu l-bastimenti tal-UE. Fiż-żona tal-Kummissjoni tas-Sajd tal-Atlantiku tal-Grigal, ir-regoli eżistenti dwar il-permessi tas-sajd, il-portijiet deżinjati u l-ġbir ta’ data jibqgħu japplikaw, flimkien mal-kopertura miżjuda tal-osservaturi ta’ 20 %.
- Ir-regolament ġie evalwat biex jiġi ddeterminat kemm l-objettivi tiegħu nkisbu. L-evalwazzjoni, ippubblikata f’Mejju 2021, hija disponibbli fuq is-sit web iddedikat: sajd tal-baħar fond.
MINN META JAPPLIKA R-REGOLAMENT?
Ilu japplika mit-12 ta’ Jannar 2017.
SFOND
- Il-politika komuni tas-sajd tal-UE ġiet riformata u regolament bażku ġdid (Regolament (UE) Nru 1380/2013 — ara s-sommarju) daħal fis-seħħ fl-1 ta’ Jannar 2014. Fost affarijiet oħra, dan introduċa obbligu ta’ ħatt l-art u obbligu biex l-istokkijiet kollha fl-ilmijiet tal-UE jiġu mmaniġjati b’mod sostenibbli.
- Sajd tal-baħar fond fl-Atlantiku tal-grigal isir kemm fl-ilmijiet tal-UE kif ukoll f’ilmijiet internazzjonali rregolat minn ftehimiet fi ħdan il-Kummissjoni tas-Sajd tal-Atlantiku tal-Grigal. L-ekonomija ta’ numru ta’ komunitajiet tas-sajd, sa ċertu punt, tiddependi fuq is-sajd tal-baħar fond. Dan is-sajd huwa ddominat minn flotot kostali tradizzjonali u bastimenti tat-tkarkir nomadiċi kbar u jammonta għal 1% tal- ħatt l-art mill-Atlantiku tal-Grigal.
TERMINI EWLENIN
Ekosistemi marini vulnerabbli. L-ekosistemi marini fl-ibħra fondi, definiti minn fraġilità fiżika u funzjonali, li huma f’riskju li ssirilhom ħsara minħabba li jiltaqgħu mal-irkaptu tas-sajd.
Qabdiet aċċessorji. Ħut u speċi tal-baħar mhux mixtieqa li jinqabdu b’mod mhux intenzjonat.
Tilqigħ. Qabdiet ta’ kwantitajiet ta’ speċi indikaturi tal-EVB li jaqbżu l-livelli ta’ limitu.
Trażbord. It-trasferiment ta’ qabda minn bastiment tas-sajd iżgħar għal fuq wieħed ikbar, li mbagħad jinkorporaha f’lott akbar għat-trasport bil-baħar.
DOKUMENT PRINĊIPALI
Ir-Regolament (UE) 2016/2336 tal-Parlament Ewropew u tal-Kunsill tal-14 ta’ Diċembru 2016 li jistabbilixxi kondizzjonijiet speċifiċi għas-sajd tal-istokkijiet tal-baħar fond fl-Atlantiku tal-Grigal u dispożizzjonijiet għas-sajd fl-ilmijiet internazzjonali tal-Atlantiku tal-Grigal u li jħassar ir-Regolament tal-Kunsill (KE) Nru 2347/2002 (ĠU L 354, 23.12.2016, pp. 1-19).
DOKUMENTI RELATATI
Ir-Regolament ta’ Implimentazzjoni tal-Kummissjoni (UE) 2022/1614 tal-15 ta’ Settembru 2022 li jiddetermina ż-żoni eżistenti tas-sajd tal-baħar fond u li jistabbilixxi lista ta’ żoni fejn huma magħrufa li jseħħu jew li x’aktarx iseħħu ekosistemi marini vulnerabbli (ĠU L 242, 19.9.2022, pp. 1-141).
Ir-Regolament tal-Kunsill (UE) 2016/72 tat-22 ta’ Jannar 2016 li jistabbilixxi l-opportunitajiet tas-sajd għall-2016 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni, u li jemenda r-Regolament (UE) 2015/104 (ĠU L 22, 28.1.2016, pp. 1-165).
Emendi suċċessivi għar-Regolament (UE) 2016/72 ġew inkorporati fid-dokument oriġinali. Din il-verżjoni konsolidata għandha valur dokumentarju biss.
Ir-Regolament tal-Kunsil (UE) 2016/2285 tat-12 ta’ Diċembru 2016 li jiffissa għall-2017 u l-2018 l-opportunitajiet tas-sajd għall-bastimenti tas-sajd tal-Unjoni għal ċerti stokkijiet ta’ ħut tal-fond u li jemenda r-Regolament (UE) 2016/72 (ĠU L 344, 17.12.2016, pp. 32-45).
Ir-Regolament tal-Kunsill (UE) Nru1367/2014 tal-15 ta’ Diċembru 2014 li jiffissa għall-2015 u l-2016 l-opportunitajiet tas-sajd għall-bastimenti tal-Unjoni għal ċerti stokkijiet ta’ ħut tal-baħar fond (ĠU L 366, 20.12.2014, pp. 1-14).
Ara l-verżjoni konsolidata.
l-aħħar aġġornament 21.10.2022