Aġenzija Eżekuttiva tar-Riċerka (2014-2020)

Din id-Deċiżjoni ta' Implimentazzjoni tal-Kummissjoni tistabbilixxi l-Aġenzija Eżekuttiva għar-Riċerka (REA). Hija bbażata fi Brussell. Tfittex li timmasimizza l-effiċjenza u l-impatt tal-programmi ta' riċerka u innovazzjoni tal-UE.

ATT

Deċiżjoni ta’ Implimentazzjoni tal-Kummissjoni 2013/778/UE tat-13 ta’ Diċembru 2013 li tistabbilixxi l-Aġenzija Eżekuttiva għar-Riċerka u li tirrevoka d-Deċiżjoni 2008/46/KE.

SOMMARJU

L-REA tikkoordina sejħiet għal proposti għal proġetti, tiżgura l-evalwazzjoni tagħhom u tikkoordina ma' benefiċjarji sussegwenti ta' għotjiet. Tiġġestixxi sehem kbir ta' proġetti ta' Riċerka u Innovazzjoni ta' Orizzont 2020, kif ukoll uħud mill-proġetti għaddejjin il-ħin kollu ffinanzjati taħt il-programm ta' Qafas 7 (FP7). Tipprovdi wkoll appoġġ amministrattiv u loġistiku lid-dipartimenti tal-Kummissjoni u lill-Aġenziji Eżekuttivi li jiġġestixxu Orizzont 2020, proġetti ta' FP7 u programmi oħrajn.

Il-kompiti ewlenin tal-REA jinkludu:

• il-pubblikazzjoni ta' sejħiet għal proposti għall-programmi ta' Riċerka u Żvilupp (R&Ż);
• l-għażla u l-kuntrattar ta' esperti indipendenti għall-evalwazzjoni tal-proposti rċevuti;
• il-koordinazzjoni tal-evalwazzjoni tal-proposti;
• il-finalizzazzjoni tal-għotjiet u l-iffirmar tal-għotjiet ma' applikanti li jirnexxu;
• koordinazzjoni għaddejja l-ħin kollu ma' benefiċjarji tal-għotjiet tul il-ħajja kollha tal-proġett tagħhom.

L-REA tiġġestixxi proġetti fl-oqsma li ġejjin ta' Orizzont 2020:

• Xjenza eċċellenti
  • Azzjonijiet ta' Marie Skłodowska-Curie (MSCA) - Programm ta' Fellowship fir-Riċerka;
  • Teknoloġiji Futuri u Emerġenti (FET Miftuħin) - ideat għal teknoloġiji ġodda, li xi kultant jinvolvu kollaborazzjonijiet mhux konvenzjonali jew prattiċi ġodda.
• Tmexxija Industrijali
  • Riċerka dwar l-ispazju.
• Sfidi tas-Soċjetà
  • Sigurtà tal-ikel, agrikoltura u forestrija sostennibbli, riċerka fl-affarijiet tal-baħar, fl-affarijiet marittimi u tal-ilmijiet interni u l-bijoekonomija;
  • L-Ewropa f'dinja li qed tinbidel - Soċjetajiet inklussivi, innovattivi u riflettivi;
  • Soċjetajiet sikuri
• Objettivi speċifiċi / temi trażversali
  • It-tixrid tal-eċċellenza u t-twessigħ tal-parteċipazzjoni;
  • Ix-xjenza ma' u għas-soċjetà .

L-REA tagħmel kontribuzzjoni prattika għall-ilħuq tal-miri tal-Unjoni tal-Innovazzjoni, inizjattiva emblematika tal-UE li hija parti minn Ewropa 2020, l-istrateġija globali tal-UE għat-tkabbir u l-kompetittività.

ATTI RELATATI

Ir-Regolament tal-Kunsill (KE) Nru 58/2003 li jfassal l-istatut għall-aġenziji eżekuttivi li jridu jiġu fdati b'ċerti kompiti fit-tmexxija tal-programmi tal-Komunità (ĠU L 11 tas-16.1.2003, p. 1-8).

Regolament tal-Kummissjoni (KE) Nru 1653/2004dwar regolament finanzjarju standard tal-aġenziji eżekuttivi skont ir-Regolament tal-Kunsill (KE) Nru 58/2003 li jfassal l-istatut għall-aġenziji eżekuttivi li jridu jiġu fdati b'ċerti kompiti fit-tmexxija tal-programmi tal-Komunità (ĠU L 297 tat-22.9.2004, p 6-16).

L-aħħar aġġornament: 06.11.2014