Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

li jissupplimenta r-Regolament (UE) Nru 575/2013 tal-Parlament Ewropew u tal-Kunsill dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment, fir-rigward ta’ standards tekniċi regolatorji biex jiġi speċifikat il-kalkolu tal-aġġustamenti għar-riskju ta’ kreditu speċifiċi u ġenerali

Identifikazzjoni tal-Aġġustamenti Ġenerali u Speċifiċi għar-Riskju ta’ Kreditu għall-finijiet tal-Artikoli 111, 159, 166, 167, 168, 178, 246 u 266 tar-Regolament (UE) Nru 575/2013

Għall-finijiet ta’ dan ir-Regolament, l-ammonti li jeħtieġ li jiġu inklużi fil-kalkolu tal-aġġustamenti ġenerali u speċifiċi għar-riskju ta’ kreditu minn istituzzjoni jkunu ugwali għall-ammonti kollha li bihom jkun tnaqqas il-kapital tal-Grad 1 ta’ Ekwità Komuni ta’ istituzzjoni biex jirrifletti telf relatat esklussivament mar-riskju tal-kreditu skont il-qafas tal-kontabbiltà applikabbli u rikonoxxut bħala tali fir-rapport tal-profitt u t-telf, irrispettivament minn jekk jirriżultax minn indebolimenti, aġġustamenti tal-valur jew provvedimenti għal entrati li ma jidhrux fil-karta bilanċjali.

Kwalunkwe ammont li jirriżulta skont l-ewwel subparagrafu li jkun ġie rikonoxxut matul is-sena finanzjarja, jista’ biss jiġi inkluż fil-kalkolu tal-aġġustamenti ġenerali u speċifiċi għar-riskju ta’ kreditu jekk l-ammonti rispettivi jkunu tnaqqsu mill-kapital tal-Grad 1 ta’ Ekwità Komuni ta’ istituzzjoni, f’konformità mal-Artikolu 36(1) tar-Regolament (UE) Nru 575/2013, jew, fil-każ ta’ profitti interim jew profitti fi tmiem is-sena li ma jkunux ġew approvati skont l-Artikolu 26(2) ta’ dak ir-Regolament, permezz ta’ tnaqqis immedjat korrispondenti fil-kapital tal-Grad 1 ta’ Ekwità Komuni għad-determinzzjoni tal-fondi proprji.

L-ammonti msemmija fil-paragrafu 1 jiġu inklużi fil-kalkolu tal-aġġustamenti ġenerali għar-riskju ta’ kreditu mill-istituzzjoni (l-Aġġustamenti Ġenerali għar-Riskju ta’ Kreditu) meta jissodisfaw iż-żewġ kriterji li ġejjin:

(a)

huma: jkunu disponibbli b’mod ħieles u bis-sħiħ, fir-rigward ta’ tajming u ammont, biex jagħmlu tajjeb għal telf marbut mar-riskju tal-kreditu li jkun għandu ma seħħx;

(b)

jirriflettu telf marbut mar-riskju ta’ kreditu għal grupp ta’ skoperturi li għalihom l-istituzzjoni attwalment ma għandha l-ebda evidenza li seħħ avveniment ta’ telf.

L-ammonti l-oħra kollha msemmija fil-paragrafu 1 jiġu inklużi fil-kalkolu tal-aġġustamenti speċifiċi għar-riskju ta’ kreditu (Aġġustamenti Speċifiċi għar-Riskju ta’ Kreditu).

Bil-kundizzjoni li jiġu ssodisfati l-kriterji tal-Paragrafu 2, l-istituzzjoni tinkludi t-telf li ġej fil-kalkolu tal-Aġġustamenti Ġenerali għar-Riskju ta’ Kreditu:

(a)

telf rikonoxxut biex ikopri l-esperjenza ta’ telf mill-portafoll ogħla mill-medja matul l-aħħar snin, għalkemm attwalment ma jkunx hemmx evidenza ta’ avvenimenti ta’ telf li ssostni l-livell ta’ telf osservat fil-passat;

(b)

telf minn deterjorazzjoni ta’ kreditu għal grupp ta’ skoperturi li l-istituzzjoni ma tkunx konxja minnu iżda li abbażi tal-esperjenza tal-passat, huwa statistikament probabbli li jkun hemm xi grad ta’ nuqqas ta’ ħlas.

l-istituzzjoni tinkludi dejjem it-telf li ġej fil-kalkolu tal-Aġġustamenti Speċifiċi għar-Riskju ta’ Kreditu msemmija fil-Paragrafu 3:

(a)

telf rikonoxxut fir-rapport tal-introjtu għal strumenti mkejla bil-valur ġust li jirrappreżenta indeboliment marbut mar-riskju tal-kreditu skont il-qafas tal-kontabbiltà applikabbli;

(b)

telf b’riżultat ta’ avvenimenti attwali jew fil-passat li ħoloq skopertura individwali sinifikanti jew skoperturi li mhumiex individwalment sinifikanti li jiġu vvalutati individwalment jew kollettivament;

(c)

telf li fir-rigward tiegħu l-esperjenza storika, aġġustata abbażi tad-dejta attwalment osservabbli, tindika li jkun seħħ telf iżda l-istituzzjoni tkun għadha mhijiex konxja liema skopertura individwali ġarbet dan it-telf.

Mingħajr preġudizzju għall-paragrafu 1, meta jikkalkulaw l-aġġustamenti speċifiċi għar-riskju ta’ kreditu għall-finijiet tal-assenjazzjoni tal-piżijiet tar-riskju msemmija fil-punti (a) u (b) tal-Artikolu 127(1) tar-Regolament (UE) Nru 575/2013 għall-parti mhux garantita ta’ skopertura inadempjenti, l-istituzzjonijiet għandhom jinkludu kull differenza pożittiva bejn l-ammont dovut mid-debitur fuq dik l-iskopertura u s-somma ta’ dawn li ġejjin:

(a)

it-tnaqqis fil-fondi proprji addizzjonali jekk dik l-iskopertura tkun ġiet amortizzata kompletament;

(b)

kwalunkwe tnaqqis diġà eżistenti fil-fondi proprji relatat ma’ dik l-iskopertura.

Assenjazzjoni tal-Aġġustamenti Speċifiċi tar-Riskju ta’ Kreditu għal grupp ta’ skoperturi għall-iskoperturi fil-grupp

Meta Aġġustament Speċifiku għar-Riskju ta’ Kreditu jirrifletti telf relatat mar-riskju ta’ kreditu ta’ grupp ta’ skoperturi, l-istituzzjonijiet jassenjaw dak l-Aġġustament Speċifiku għar-Riskju tal-Kreditu lill-iskoperturi individwali kollha ta’ dak il-grupp b’mod proporzjonali mal-ammonti tal-iskopertura ponderati għar-riskju. Għal dak l-għan, il-valur tal-iskopertura jiġi ddeterminat bla ma jitqies l-ebda Aġġustament Speċifiku għar-Riskju ta’ Kreditu.

Għat-trattament tal-ammonti ta’ telf mistennija msemmi fl-Artikolu 159 tar-Regolament (UE) Nru 575/2013 għal grupp ta’ skoperturi li mhumiex fi stat ta’ inadempjenza, l-istituzzjonijiet mhumiex meħtieġa jassenjaw Aġġustament Speċifiku għar-Riskju ta’ Kreditu lill-iskoperturi individwali tal-grupp.

Fejn Aġġustament Speċifiku għar-Riskju ta’ Kreditu jkun marbut ma’ grupp ta’ skoperturi, li r-rekwiżiti ta’ fondi proprji għar-riskju ta’ kreditu tagħhom jiġu parzjalment ikkalkolati skont l-Approċċ Standardizzat u parzjalment skont l-Approċċ Ibbażat fuq Klassifikazzjoni Interna, l-istituzzjoni tassenja dak l-Aġġustament Speċifiku għar-Riskju ta’ Kreditu lill-grupp ta’ skoperturi koperti minn kull Approċċ b’mod proporzjonali mal-ammonti tal-iskopertura tal-grupp, ponderati għar-riskju, qabel ma tapplika l-azzjonijiet imsemmija fil-paragrafi 1 u 2. Għal dak l-għan, il-valur tal-iskopertura jiġi ddeterminat bla ma jitqies l-ebda Aġġustament Speċifiku għar-Riskju ta’ Kreditu.

Meta jassenjaw l-Aġġustamenti Speċifiċi għar-Riskju ta’ Kreditu lill-iskoperturi, l-istituzzjonijiet jiżguraw li l-istess porzjon ma jiġix assenjat darbtejn lil skoperturi differenti.

Kalkolu tal-aġġustamenti għar-riskju ta’ kreditu għall-fini tad-determinazzjoni tal-valur tal-iskopertura skont l-Artikoli 111, 166, 167, 168, 246 u 266 tar-Regolament (UE) Nru 575/2013

Għall-finijiet tad-determinazzjoni tal-valur tal-iskopertura skont l-Artikoli 111, 166 sa 168, 246 u 266 tar-Regolament (UE) Nru 575/2013, l-istituzzjonijiet jikkalkolaw l-Aġġustamenti Speċifiċi għar-Riskju ta Kreditu marbuta ma’ skopertura bħala l-ammonti tal-Aġġustamenti Speċifiċi għar-Riskju ta’ Kreditu għal dik l-iskopertura individwali, jew bħala l-ammonti tal-Aġġustamenti Speċifiċi għar-Riskju ta’ Kreditu li l-istituzzjoni assenjat lil dik l-iskopertura skont l-Artikolu 2.

Kalkolu tal-aġġustamenti ġenerali u speċifiċi għar-riskju ta’ kreditu għall-finijiet tat-trattament tal-ammonti ta’ telf mistennija skont l-Artikolu 159 tar-Regolament (UE) Nru 575/2013

Għall-finijiet tat-trattament tal-ammonti ta’ telf mistennija skont l-Artikolu 159 tar-Regolament (UE) Nru 575/2013, l-istituzzjoni tikkalkola t-total tal-Aġġustamenti Ġenerali għar-Riskju ta’ Kreditu relatati mal-iskoperturi inklużi fit-trattament tal-ammonti ta’ telf mistennija bħala s-somma ta’ dawk l-ammonti, identifikati bħala l-Aġġustamenti Ġenerali għar-Riskju ta’ Kreditu skont l-Artikolu 1 ta’ dan ir-Regolament, li l-istituzzjoni tkun assenjat skont l-Artikolu 110(3) tar-Regolament (UE) Nru 575/2013.

Għall-finijiet tat-trattament tal-ammonti ta’ telf mistennija skont l-Artikolu 159 tar-Regolament (UE) Nru 575/2013, il-kalkolu tat-total tal-Aġġustamenti Speċifiċi għar-Riskju ta’ Kreditu relatati mal-iskoperturi inklużi fit-trattament tal-ammonti ta’ telf mistennija jkun is-somma tal-ammonti tal-punti (a) u (b), esklużi l-iskoperturi fi stat ta’ inadempjenza:

(a)

ammonti identifikati bħall-Aġġustamenti Speċifiċi għar-Riskju ta’ Kreditu skont l-Artikolu 1 li huma relatati mar-riskju tal-kreditu ta’ skopertura individwali;

(b)

ammonti identifikati bħall-Aġġustamenti Speċifiċi għar-Riskju ta’ Kreditu skont l-Artikolu 1 li huma relatati mar-riskju tal-kreditu ta’ grupp ta’ skoperturi u li ġew assenjati skont l-Artikolu 2.

It-total tal-Aġġustamenti Speċifiċi għar-Riskju ta’ Kreditu relatati ma’ skopertura fi stat ta’ inadempjenza jiġi kkalkolat bħala s-somma tal-ammonti kollha tal-Aġġustamenti Speċifiċi għar-Riskju ta’ Kreditu għal dik l-iskopertura individwali, jew bħala l-ammonti tal-Aġġustamenti Speċifiċi għar-Riskju ta’ Kreditu li l-istituzzjoni tkun assenjat lil dik l-iskopertura skont l-Artikolu 2.

Kalkolu tal-Aġġustamenti Speċifiċi għar-Riskju ta’ Kreditu għar-rekwiżiti ta’ fondi proprji għall-finijiet tad-determinazzjoni ta’ inadempjenza skont l-Artikolu 178 tar-Regolament (UE) Nru 575/2013

Għall-finijiet tad-determinazzjoni ta’ inadempjenza skont l-Artikolu 178 tar-Regolament (UE) Nru 575/2013, l-Aġġustamenti Speċifiċi għar-Riskju ta’ Kreditu jiġu kkalkolati bħala l-ammonti tal-Aġġustamenti Speċifiċi għar-Riskju ta’ Kreditu relatati mar-riskju tal-kreditu ta’ skopertura individwali jew obbligant individwali.

L-istituzzjonijiet jiddokumentaw l-identifikazzjoni u l-kalkolu tal-Aġġustamenti Ġenerali għar-Riskju ta’ Kreditu u l-Aġġustamenti Speċifiċi tar-Riskju ta’ Kreditu.

Dan ir-Regolament jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

		Il-Ġurnal Uffiċjali
		Nru	Paġna	Data
►M1	REGOLAMENT DELEGAT TAL-KUMMISSJONI (UE) 2022/954 tat-12 ta’ Mejju 2022	L 165	24	21.6.2022