02014R0532 — MT — 20.04.2021 — 001.001

Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

►B

REGOLAMENT TA' DELEGA TAL-KUMMISSJONI (UE) Nru 532/2014

tat-13 ta' Marzu 2014

li jissupplimenta r-Regolament (UE) Nru 223/2014 tal-Parlament Ewropew u tal-Kunsill dwar il-Fond għal Għajnuna Ewropea għall-Persuni l-Aktar fil-Bżonn

(ĠU L 148 20.5.2014, p. 54)

Emendat bi:

 

 

Il-Ġurnal Uffiċjali

  Nru

Paġna

Data

►M1

REGOLAMENT DELEGAT TAL-KUMMISSJONI (UE) 2021/629 tal-4 ta’ Novembru 2020

  L 132

4

19.4.2021



▼B

REGOLAMENT TA' DELEGA TAL-KUMMISSJONI (UE) Nru 532/2014

tat-13 ta' Marzu 2014

li jissupplimenta r-Regolament (UE) Nru 223/2014 tal-Parlament Ewropew u tal-Kunsill dwar il-Fond għal Għajnuna Ewropea għall-Persuni l-Aktar fil-Bżonn



KAPITOLU I

DISPOŻIZZJONIJIET ĠENERALI

Artikolu 1

Suġġett

Dan ir-Regolament jistabbilixxi d-dispożizzjonijiet li ġejjin li jissupplimentaw ir-Regolament (UE) Nru 223/2014:

(a) 

ir-regoli li jispeċifikaw l-informazzjoni fir-rigward tad-dejta li trid tiġi rreġistrata u maħżuna f'forma kompjuterizzata fi ħdan is-sistema ta' sorveljanza stabbilita mill-awtorità maniġerjali;

(b) 

ir-rekwiżiti minimi dettaljati għar-rekord għall-verifika fir-rigward tar-rekords kontabilistiċi li jridu jinżammu u d-dokumenti ta' sostenn li jridu jsiru fil-livell tal-awtorità taċ-ċertifikazzjoni, l-awtorità maniġerjali, il-korpi intermedji u l-benefiċjarji;

(c) 

l-iskop u l-kontenut tal-awditi tal-operazzjonijiet u l-awditi tal-kontijiet u l-metodoloġija għall-għażla tal-kampjun tal-operazzjonijiet;

(d) 

ir-regoli dettaljati dwar l-użu tad-dejta miġbura matul l-awditi mwettqa mill-uffiċjali tal-Kummissjoni jew mir-rappreżentanti awtorizzati tal-Kummissjoni;

(e) 

ir-regoli dettaljati dwar il-kriterji għad-determinazzjoni ta' nuqqasijiet serji fil-funzjonament effettiv tas-sistemi tal-ġestjoni u l-kontroll, inkluż it-tipi ewlenin ta' dawn in-nuqqasijiet, il-kriterji għall-istabbiliment tal-livell ta' korrezzjoni finanzjarja li tiġi applikata u l-kriterji għall-applikazzjoni ta' korrezzjonijiet finanzjarji ta' rati fissi jew estrapolati.



KAPITOLU II

DISPOŻIZZJONIJIET SPEĊIFIĊI GĦAS-SISTEMI TAL-ĠESTJONI U L-KONTROLL

Artikolu 2

Id-dejta li trid tiġi rreġistrata u maħżuna f'forma kompjuterizzata

(Artikolu 32(8) tar-Regolament (UE) Nru 223/2014)

1.  
L-informazzjoni dwar id-dejta li trid tiġi rreġistrata u maħżuna f'forma kompjuterizzata għal kull operazzjoni fis-sistema ta' sorveljanza imfassla skont l-Artikolu 32(2)(d) tar-Regolament (UE) Nru 223/2014 hija stabbilita fl-Anness I ta' dan ir-Regolament.
2.  
Id-dejta tiġi rreġistrata u maħżuna għal kull operazzjoni inkluż, fil-każ tal-operazzjonijiet appoġġjati mill-OP II, id-dejta dwar il-parteċipanti individwali, maqsuma skont is-sess fejn disponibbli, sabiex fejn dan huwa meħtieġ tippermetti li tiġi aggregata għall-finijiet tas-sorveljanza, l-evalwazzjoni, il-ġestjoni finanzjarja, il-verifikazzjoni u l-verifika. Hija tippermetti wkoll l-aggregazzjoni ta' din id-dejta b'mod kumulattiv għall-perjodu sħiħ ta' pprogrammar.

Artikolu 3

Ir-rekwiżiti minimi fid-dettall għar-rekord għall-verifika

(Artikolu 32(9) tar-Regolament (UE) Nru 223/2014)

1.  

Ir-rekwiżiti minimi ddettaljati għar-rekord għall-verifika fir-rigward tar-rekords tal-kontabbiltà li għandhom jinżammu u d-dokumenti ta' sostenn li għandhom jinżammu, għandhom ikunu dawn li ġejjin:

(a) 

ir-rekord għall-verifika għandu jippermetti li tiġi vverifikata l-applikazzjoni tal-kriterji tal-għażla stabbiliti fil-programm operatorju għall-ikel u/jew l-assistenza materjali bażiku (OP I), jew mill-kumitat ta' monitoraġġ għall-OP II;

(b) 

fir-rigward tal-għotjiet taħt l-Artikolu 25(1)(a) tar-Regolament (UE) Nru 223/2014, ir-rekord għall-verifika għandu jippermetti li l-ammonti aggregati ċċertifikati lill-Kummissjoni jiġu rikonċiljati mar-rekords kontabilistiċi ddettaljati u d-dokumenti ta' appoġġ miżmuma mill-awtorità taċ-ċertifikazzjoni, l-awtorità maniġerjali, il-korpi intermedjarji u l-benefiċjarji fir-rigward tal-operazzjonijiet kofinanzjati taħt il-programm operazzjonali;

(c) 

fir-rigward tal-għotjiet taħt l-Artikoli 25(1)(b) u (c), ir-rekord għall-verifika għandu jippermetti li l-ammonti aggregati ċċertifikati lill-Kummissjoni jiġu rikonċiljati mad-dejta ddettaljata relatata mal-produzzjoni jew ir-riżultati u d-dokumenti ta' sostenn miżmuma mill-awtorità taċ-ċertifikazzjoni, l-awtorità maniġerjali, il-korpi intermedjarji u l-benefiċjarji, inkluż fejn ikun applikabbli dokumenti dwar il-metodu biex jiġu stabbiliti tabelli standard ta' kostijiet unitarji u s-somom f'daqqa, fir-rigward tal-operazzjonijiet kofinanzjati taħt il-programm operazzjonali;

(d) 

fir-rigward tal-ispejjeż determinati skont l-Artikoli 25(1)(d) tar-Regolament (UE) Nru 223/2014, ir-rekord għall-verifika għandu juri u jiġġustifika l-metodu ta' kalkolu, fejn ikun applikabbli, u l-bażi fuq liema ġew deċiżi r-rati fissi, u l-ispejjeż diretti eliġibbli jew l-ispiża ddikjarata taħt kategoriji oħra magħżula għal liema tapplika r-rata fissa;

(e) 

fir-rigward tal-ispejjeż determinati skont l-Artikolu 26(2)(b),(c), (e) u 26(3) it-tieni parti), tar-Regolament (UE) Nru 223/2014, ir-rekord għall-verifika għandu jippermetti li jiġu sostanzjati l-ispejjeż diretti eliġibbli jew l-ispiża ddikjarata taħt kategoriji oħra ta' spejjeż li tapplika għalihom ir-rata fissa;

(f) 

ir-rekord għall-verifika għandu jippermetti li tiġi vverifikata l-kontribuzzjoni pubblika lill-benefiċjarju;

(g) 

għal kull operazzjoni, kif ikun xieraq, ir-rekord għall-verifika għandu jinkludi l-ispeċifikazzjonijiet tekniċi u l-pjan ta' finanzjament, id-dokumenti li jikkonċernaw l-approvazzjoni tal-għotja, id-dokumenti relatati mal-proċeduri ta' akkwist pubbliku, ir-rapporti mill-benefiċjarju u r-rapporti dwar l-awditi u l-awditjar imwettaq;

(h) 

ir-rekord għall-verifika għandu jinkludi informazzjoni dwar il-verifiki u l-awditi tal-ġestjoni mwettaq fuq l-operazzjoni;

(i) 

ir-rekord għall-verifika għandu jippermetti li tiġi rikonċiljata dejta fir-rigward tal-indikaturi tal-produzzjoni għall-operazzjoni mad-dejta u r-riżultat irrapportat u, fejn ikun xieraq, il-miri għall-programm;

Għall-ispejjeż imsemmija fil-punti (c) u (d), ir-rekord għall-verifika għandu jippermetti li jiġi vverifikat il-metodu ta' kalkolu użat mill-awtorità maniġerjali għall-konformità mal-Artikolu 25(3) tar-Regolament (UE) Nru 223/2014.

2.  
L-awtorità maniġerjali għandha tiżgura li huwa disponibbli rekord tal-identità u l-post tal-korpi li għandhom dokumenti ta' sostenn meħtieġa biex jiġi vverifikat rekord għall-verifika xieraq li jissodisfa r-rekwiżiti minimi kollha stabbiliti fil-paragrafu 1.

▼M1

L-Artikolu 3a

Ir-rekwiżiti minimi dettaljati għar-rekord għall-verifika dwar l-appoġġ li jingħata indirettament lil min hu l-aktar fil-bżonn, pereżempju permezz ta’ vawċers, kards, jew strumenti oħra

(l-Artikolu 32(9) tar-Regolament (UE) Nru 223/2014)

1.  

Minbarra r-rekwiżiti minimi dettaljati għar-rekords għall-verifika stabbiliti fl-Artikolu 3, ir-rekords għall-verifika tal-operazzjonijiet li jipprovdu ikel jew assistenza materjali bażika, jew it-tnejn li huma lill-persuni l-aktar fil-bżonn permezz ta’ vawċers, kards jew strumenti oħra f’konformità mal-Artikolu 23(4a) tar-Regolament (UE) Nru 223/2014 għandhom:

(a) 

jippermettu li fuq il-bażi tar-rekords kontabilistiċi u d-dokumenti ta’ sostenn miżmumin mill-awtorità taċ-ċertifikazzjoni, mill-awtorità maniġerjali, minn korpi intermedji u mill-benefiċjarji, jiġi rikonċiljat l-għadd totali ta’ vawċers, kards, jew strumenti oħra li jkunu nħarġu mal-għadd totali ta’ vawċers, kards jew strumenti oħra li jkunu twasslu lir-riċeventi aħħarin u ntużaw;

(b) 

rigward il-kostijiet eliġibbli stabbiliti fil-punt (a) tal-Artikolu 26(2), jippermettu li l-ammonti aggregati ċċertifikati lill-Kummissjoni jiġu rikonċiljati mal-valur tal-vawċers, tal-kards, jew ta’ strumenti oħra li jkunu ntużaw mir-riċeventi aħħarin;

(c) 

jinkludu d-dokumenti li jikkonċernaw l-għotja ta’ vawċers, kards, jew strumenti oħra lir-riċeventi aħħarin, id-distribuzzjoni tagħhom lir-riċeventi aħħarin, u l-użu tagħhom.

Għall-użu ta’ kards, vawċers, jew strumenti oħra, ir-rekords għall-verifika għandhom juru li l-vawċers, il-kards jew l-istrumenti l-oħra ntużaw biss biex jinxtraw l-ikel jew l-assistenza materjali bażika, jew it-tnejn li huma.

2.  

Meta jingħata l-ikel u/jew l-assistenza materjali bażika lil min hu l-aktar fil-bżonn permezz ta’ vawċers, kards, jew strumenti oħra fil-format ta’ fuq il-karta, ir-rekord għall-verifika għandu jinkludi wkoll dawn li ġejjin:

(a) 

il-miżuri ta’ sigurtà li jevitaw il-falsifikazzjoni, li jwettqu l-awtorità maniġerjali, il-korpi intermedjarji u l-benefiċjarji;

(b) 

miżuri li jissalvagwardaw l-istokk tal-vawċers;

(c) 

l-identifikazzjoni tal-korpi li jidentifikaw lir-riċeventi aħħarin u tal-korpi li jiddistribwixxu l-vawċers, il-kards jew l-istrumenti l-oħra lir-riċeventi aħħarin;

(d) 

dokumentazzjoni li turi li l-vawċers, il-kards jew l-istrumenti l-oħra twasslu lir-riċeventi aħħarin.

▼B

Artikolu 4

Użu ta' dejta miġbura matul l-awditi mwettqa mill-uffiċjali tal-Kummissjoni jew rappreżentanti awtorizzati tal-Kummissjoni

(Artikolu 34(8) tar-Regolament (UE) Nru 223/2014)

1.  
Il-Kummissjoni għandha tieħu l-miżuri kollha meħtieġa biex tevita kwalunkwe żvelar mhux awtorizzat tad-dejta miġbura mill-Kummissjoni matul l-awditi tagħha jew l-aċċess għaliha.
2.  
Il-Kummissjoni għandha tuża d-dejta miġbura matul l-awditi tagħha għall-iskop uniku li tissodisfa r-responsabbiltajiet tagħha skont l-Artikolu 36 tar-Regolament (UE) Nru 223/2014. Il-Qorti tal-Awdituri u l-Uffiċċju Ewropew kontra l-Frodi għandu jkollhom aċċess għad-dejta miġbura.
3.  
Id-dejta miġbura ma għandhiex tintbagħat lil persuni oħrajn għajr dawk fl-Istati Membri jew f'istituzzjonijiet tal-Unjoni li dmirjiethom jitolbu li jkollhom aċċess għaliha skont ir-regoli applikabbli mingħajr il-qbil espliċitu tal-Istat Membru li jforni d-dejta.

Artikolu 5

Awditi tal-operazzjonijiet

(Artikolu 34(7) tar-Regolament (UE) Nru 223/2014)

1.  
Għandhom jitwettqu awditi tal-operazzjonijiet fir-rigward ta' kull sena tal-kontabbiltà fuq kampjun ta' operazzjonijiet magħżula b'metodu stabbilit jew approvat minn awtorità tal-awditjar skont l-Artikolu 6 ta' dan ir-Regolament.
2.  

L-awditi tal-operazzjonijiet għandhom jitwettqu abbażi tad-dokumenti ta' sostenn li jikkostitwixxu r-rekords għall-verifika u għandhom jivverifikaw il-legalità u r-regolarità tan-nefqa ddikjarata lill-Kummissjoni, inkluż l-aspetti li ġejjin:

(a) 

li l-operazzjoni ntgħażlet skont il-kriterji tal-għażla għall-programm operazzjonali, li ma tlestietx fiżikament jew ma ġietx implimentata b'mod sħiħ qabel ma l-benefiċjarju ssottometta l-applikazzjoni għall-finanzjament taħt il-programm operazzjonali, ġiet implimentata skont id-deċiżjoni ta' approvazzjoni u ssodisfat kwalunkwe kundizzjoni applikabbli meta sar l-awditjar dwar il-funzjonalità, l-użu u l-objettivi tagħha li għandhom jinkisbu;

(b) 

li n-nefqa ddikjarata lill-Kummissjoni tikkorrispondi għar-rekords kontabilistiċi u li d-dokumentazzjoni ta' sostenn meħtieġa turi rekord għall-verifika xieraq kif stabbilit fl-Artikolu 3 ta' dan ir-Regolament;

(c) 

li għan-nefqa ddikjarata lill-Kummissjoni stabbilita skont l-Artikolu 25(1)(b) u (c), ikunu twasslu l-produzzjoni u r-riżultati li jsostnu l-pagamenti lill-benefiċjarju, id-dejta tal-parteċipanti, fejn ikun applikabbli, jew rekords oħra relatati mal-produzzjoni u r-riżultati huma konsistenti mal-informazzjoni sottomessa lill-Kummissjoni u li d-dokumentazzjoni ta' sostenn meħtieġa turi rekord għall-verifika xieraq kif stabbilit fl-Artikolu 3 ta' dan ir-Regolament.

L-awditi għandhom jivverifikaw ukoll li l-kontribuzzjoni pubblika tkun tħallset lill-benefiċjarju skont l-Artikolu 42(2) tar-Regolament (UE) Nru 223/2014.

3.  
L-awditi tal-operazzjonjiet għandhom, fejn ikun applikabbli, jinkludu verifiki fuq il-post tal-implimentazzjoni fiżika tal-operazzjoni.
4.  
L-awditi tal-operazzjonijiet għandhom jivverifikaw il-preċizjoni u l-kompletezza tan-nefqa korrispondenti rreġistrata mill-awtorità taċ-ċertifikazzjoni fis-sistema kontabilistika tagħha u r-rikonċiljazzjoni tar-rekords għall-verifika fil-livelli kollha.
5.  
Fejn il-problemi misjuba jidhru li fin-natura tagħhom huma sistemiċi u għalhekk jinvolvu riskju għal operazzjonijiet oħrajn taħt il-programm operazzjonali, l-awtorità tal-awditjar għandha tiżgura eżaminazzjoni ulterjuri, inkluż, fejn ikun meħtieġ, awditi addizzjonali biex tiġi stabbilita l-iskala ta' tali problemi, u għandha tirrakkomanda l-azzjonijiet korrettivi meħtieġa.
6.  
Mal-ammont ta' nefqa vverifikat, għandha tingħadd biss in-nefqa li taqa' taħt il-kamp ta' applikazzjoni ta' awditjar li jitwettaq skont il-paragrafu 1, għall-finijiet ta' rapportar lill-Kummissjoni dwar il-kopertura annwali. Għal dawk il-finijiet, għandu jintuża l-mudell għar-rapport ta' kontroll stabbilit abbażi tal-Artikolu 34(6) tar-Regolament (UE) Nru 223/2014.

Artikolu 6

Metodoloġija għall-għażla tal-kampjun tal-operazzjonijiet

(Artikolu 34(7) tar-Regolament (UE) Nru 223/2014)

1.  
L-awtorità tal-awditjar għandha tistabbilixxi l-metodu għall-għażla tal-kampjun (“il-metodu ta' kampjunar”) skont ir-rekwiżiti stabbiliti f'dan l-Artikolu, filwaqt li jitqiesu l-istandards aċċettati fuq livell internazzjonali, INTOSAI, IFAC jew IIA.
2.  
Minbarra l-ispjegazzjonijiet mogħtija fl-istrateġija tal-awditjar, l-awtorità tal-awditjar għandha żżomm rekord tad-dokumentazzjoni u l-opinjoni professjonali użata biex jiġu stabbiliti l-metodi ta' kampjunar, li jkopru l-ippjanar, l-għażla, l-ittestjar u l-istadji tal-evalwazzjoni, sabiex jintwera li l-metodu stabbilit huwa xieraq.
3.  
Kampjun għandu jkun rappreżentattiv tal-popolazzjoni minn fejn jintgħażel u jippermetti lill-awtorità tal-awditjar tasal għal opinjoni tal-awditjar valida skont l-Artikolu 34(5)(a) tar-Regolament (UE) Nru 223/2014. Dik il-popolazzjoni għandha tinkludi n-nefqa ta' programm operazzjonali li huwa inkluż fl-applikazzjonijiet għall-ħlas sottomessi lill-Kummissjoni skont l-Artikolu 41 tar-Regolament (UE) Nru 223/2014 għal sena tal-kontabbiltà partikolari. Il-kampjun jista' jintgħażel matul jew wara s-sena tal-kontabbiltà.
4.  

Għall-fini tal-applikazzjoni tal-Artikolu 34(1) tar-Regolament (UE) Nru 223/2014, metodu ta' kampjunar huwa statistiku meta jiżgura:

(i) 

għażla b'mod każwali tal-oġġetti fil-kampjun;

(ii) 

l-użu tat-teorija ta' probabbiltà biex jiġu evalwati r-riżultati tal-kampjun, inkluż il-kejl u l-kontroll tar-riskju tal-kampjunar u tal-preċiżjoni ppjanata u milħuqa.

5.  
Il-metodu tal-kampjunar għandu jiżgura għażla b'mod każwali ta' kull unità fil-popolazzjoni billi juża numri każwali ġġenerati għal kull unità sabiex jintgħażlu l-unitajiet li jikkostitwixxu l-kampjun jew permezz ta' għażla sistematika billi juża punt ta' bidu każwali u billi japplika regola sistematika biex jintgħażlu l-oġġetti addizzjonali.
6.  
L-unità għandha tiġi stabbilita mill-awtorità tal-awditjar, abbażi ta' opinjoni professjonali. L-unità tista' tkun operazzjoni, proġett f'operazzjoni jew talba għall-ħlas minn benefiċjarju. Fir-rapport ta' kontroll għandha tiġi inkluża informazzjoni dwar it-tip ta' unità ddeterminata u dwar l-opinjoni professjonali użata għal dak il-għan.
7.  
Fejn in-nefqa totali relatata mal-unità għas-sena tal-kontabbiltà hija ammont negattiv, din għandha tiġi eskluża mill-popolazzjoni msemmija fil-paragrafu 3 ta' hawn fuq u għandha tiġi awditjata b'mod separat. L-awtorità tal-awditjar tista' tieħu wkoll kampjun ta' din il-popolazzjoni separata.
8.  
Fejn japplikaw kundizzjonijiet għall-kontroll proporzjonali pprovduti fl-Artikolu 58(1) tar-Regolament (UE) Nru 223/2014, l-awtorità tal-awditjar tista' teskludi l-oġġetti msemmija f'dak l-Artikolu mill-popolazzjoni li ser jittieħed kampjun minnha. Jekk l-operazzjoni kkonċernata tkun diġà ntgħażlet fil-kampjun, l-awtorità tal-awditjar għandha tissostitwixxiha permezz ta' għażla b'mod każwali xierqa.
9.  
In-nefqa kollha ddikjarata lill-Kummissjoni fil-kampjun għandha tkun soġġetta għall-awditjar.

Fejn l-unitajiet magħżula jinkludu numru kbir ta' talbiet għal ħlas jew fatturi sottostanti, l-awtorità tal-awditjar tista' tivverifikahom permezz ta' sottokampjunar, billi tagħżel it-talbiet għall-ħlas sottostanti jew il-fatturi billi tuża l-istess parametri ta' kampjunar użati biex jintgħażlu l-unitajiet tal-kampjun ewlieni.

F'dak il-każ, id-daqsijiet xierqa tal-kampjun għandhom jiġu kkalkolati f'kull unità sabiex jiġu vverifikati u, fi kwalunkwe każ, ma għandhomx ikunu inqas minn 30 talba għall-ħlas sottostanti jew fatturi għal kull unità.

10.  
L-awtorità tal-awditjar tista' tqassam fi grupp popolazzjoni, billi taqsam popolazzjoni f'sottopopolazzjonijiet, li kull waħda minnhom hija grupp ta' unitajiet li għandhom karatteristiċi simili, b'mod partikolari f'termini ta' riskju jew rata ta' żball mistennija jew fejn il-popolazzjoni tinkludi operazzjonijiet li jikkonsistu minn kontribuzzjonijiet finanzjarji minn programm operazzjonali għal oġġetti ta' valur għoli.
11.  
L-awtorità tal-awditjar għandha tevalwa l-affidabbiltà tas-sistema bħala għolja, medja jew baxxa, filwaqt li tqis ir-riżultati tal-awditi tas-sistema biex tiddetermina l-parametri tekniċi tal-kampjunar biex b'hekk il-livell ikkombinat ta' assigurazzjoni miksub mill-awditi tas-sistemi u l-awditi tal-operazzjonijiet ikun għoli. Għal sistema vvalutata bħala li għandha affidabbiltà għolja, il-livell ta' fiduċja użat għall-operazzjonijiet ta' kampjunar ma għandux ikun inqas minn 60 %. Għal sistema vvalutata bħala li għandha affidabbiltà baxxa, il-livell ta' fiduċja użat għall-operazzjonijiet ta' kampjunar ma għandux ikun inqas minn 90 %. Il-livell massimu ta' materjalità għandu jkun 2 % tan-nefqa msemmija fil-paragrafu 3.
12.  
Fejn jinstabu irregolaritajiet jew riskju ta' irregolaritajiet, l-awtorità tal-awditjar għandha tiddeċiedi abbażi ta' opinjoni professjonali jekk huwiex meħtieġ li jsir awditjar ta' kampjun kumplimentari tal-operazzjonijiet addizzjonali jew partijiet tal-operazzjonijiet li ma ġewx ivverifikati fil-kampjun każwali sabiex jingħata kas tal-fatturi ta' riskju speċifiċi identifikati.
13.  
L-awtorità tal-awditjar tanalizza r-riżultati tal-awditi tal-kampjun kumplimentari separatament, toħroġ b'konklużjonijiet imsejsa fuq dawk ir-riżultati u tikkomunikahom lill-Kummissjoni fir-rapport annwali tal-kontroll. L-irregolaritajiet li joħorġu fil-kampjun kumplimentari ma jiġux inklużi fil-kalkolu tal-iżball każwali proġettat tal-kampun każwali.
14.  
Abbażi tar-riżultati tal-awditi tal-operazzjonijiet għall-finijiet tal-opinjoni tal-awditjar u r-rapport ta' kontroll imsemmi fl-Artikolu 34(5)(a) u (b) tar-Regolament (UE) Nru 223/2014, l-awtorità tal-awditjar għandha tikkalkula rata ta' żball totali, li għandha tkun it-total tal-iżbalji każwali proġettati u, jekk ikun applikabbli, l-iżbalji sistemiċi u l-iżbalji anomali li ma jkunux ġew korretti, diviż bil-popolazzjoni.

Artikolu 7

Awditi tal-kontijiet

(Artikolu 34(7) tar-Regolament (UE) Nru 223/2014)

1.  
L-awditi tal-kontijiet imsemmi fl-Artikolu 49(1) tar-Regolament (UE) Nru 223/2014 għandu jitwettaq mill-awtorità tal-awditjar fir-rigward ta' kull sena tal-kontabbiltà.
2.  
L-awditjar tal-kontjiet għandu jipprovdi assigurazzjoni raġonevoli dwar il-kompletezza, l-eżattezza u l-veraċità tal-ammonti ddikjarati fil-kontijiet.
3.  
Għall-finijiet tal-paragrafi 1 u 2, l-awtorità tal-awditjar għandha tqis, b'mod partikolari, ir-riżultati tal-awditi tas-sistema mwettaq fuq l-awtorità taċ-ċertifikazzjoni u l-awditi fuq l-operazzjonijiet.
4.  
L-awditjar tas-sistema għandu jinkludi verifika tal-affidabbiltà tas-sistema kontabilistika tal-awtorità taċ-ċertifikazzjoni u, fuq bażi ta' kampjun, tal-eżattezza tan-nefqa tal-ammonti rtirati u l-ammonti rkuprati rreġistrati fis-sistema kontabilistika tal-awtorità taċ-ċertifikazzjoni.
5.  

Għall-fini tal-opinjoni tal-awditjar, sabiex jiġi konkluż li l-kontijiet jagħtu stampa reali u ġusta, l-awtorità tal-awditjar għandha tivverifika li l-elementi kollha meħtieġa mill-Artikolu 49 tar-Regolament (UE) Nru 223/2014 huma inklużi b'mod korrett fil-kontijiet u jikkorrispondu għar-rekords kontabilistiċi ta' sostenn miżmuma mill-awtoritajiet jew mill-korpi kollha rilevanti u l-benefiċjarji matul ix-xogħol tal-awditjar imwettaq mill-awtortà tal-awditjar. L-awtorità tal-awditjar b'mod partikolari, abbażi tal-kontijiet li għandhom jiġu pprovduti mill-awtorità taċ-ċertifikazzjoni, għandha tivverifika li:

(a) 

l-ammont totali ta' nefqa pubblika eliġibbli ddikjarata skont l-Artikolu 49(1)(a) tar-Regolament (UE) Nru 223/2014 jaqbel man-nefqa u l-kontribuzzjoni pubblika korrispondenti inkluża fl-applikazzjonijiet għal ħlas sottomessi lill-Kummissjoni għas-sena tal-kontabbiltà rilevanti u, jekk ikun hemm differenzi, li jkunu ngħataw spjegazzjonijiet xierqa fil-kontijiet għall-ammonti ta' rikonċiljazzjoni;

(b) 

l-ammonti rtirati u rkuprati matul is-sena tal-kontabbiltà, l-ammonti li għandhom jiġu rkuprati fi tmiem is-sena tal-kontabbiltà u l-ammonti irrekuperabbli ppreżentati fil-kontijiet jikkorrispondu għall-ammonti mdaħħla fis-sistemi kontabilistiċi tal-awtorità taċ-ċertifikazzjoni u huma bbażati fuq deċiżjonijiet mill-awtorità maniġerjali responsabbli jew l-awtorità taċ-ċertifikazzjoni;

(c) 

in-nefqa ġiet eskluża mill-kontijiet skont l-Artikolu 49(2) tar-Regolament (UE) Nru 223/2014, fejn ikun applikabbli, u li l-korrezzjonijiet meħtieġa kollha huma riflessi fil-kontijiet għas-sena tal-kontabbiltà kkonċernata;

Il-verifiki msemmija fil-punti (b) u (c) jistgħu jitwettqu fuq bażi ta' kampjun.



KAPITOLU III

DISPOŻIZZJONIJIET SPEĊIFIĊI GĦALL-ĠESTJONI FINANZJARJA U L-KORREZZJONIJIET FINANZJARJI

Artikolu 8

Kriterji biex jiġu stabbiliti nuqqasijiet serji fil-funzjonament effettiv tas-sistemi ta' ġestjoni u kontroll

(Artikolu 55(4) tar-Regolament (UE) Nru 223/2014)

1.  
Il-Kummissjoni għandha tibbaża l-valutazzjoni tagħha tal-funzjonament effettiv tas-sistemi ta' ġestjoni u kontroll fuq ir-riżultati tal-awditi tas-sistemi kollha disponibbli, inkluż testijiet tal-kontrolli, u ta' awditi tal-operazzjonijiet.

Il-valutazzjoni għandha tkopri l-ambjent ta' kontroll intern tal-programm, l-attivitajiet ta' ġestjoni u kontroll tal-awtoritajiet maniġerjali u taċ-ċertifikazzjoni, il-monitiraġġ mill-awtorità maniġerjali u taċ-ċertifikazzjoni, u l-attivitajiet ta' kontroll tal-awtorità tal-awditjar u għandha tkun ibbażata fuq il-verifika tal-konformità mar-rekwiżiti ewlenin stabbiliti fit-Tabella 1 tal-Anness II.

Is-sodisfar ta' dawn ir-rekwiżiti ewlenin għandu jiġi vvalutat abbażi tal-kategoriji stabbiliti fit-Tabella 2 tal-Anness II.

2.  
It-tipi ewlenin ta' nuqqas serju fil-funzjonament effettiv tas-sistema ta' ġestjoni u kontroll għandhom ikunu l-każijiet fejn kwalunkwe wieħed mir-rekwiżiti ewlenin imsemmija fil-punti 2, 4, 5, 13, 15, 16 u 18 tat-Tabella 1 tal-Anness II, jew tnejn jew aktar mir-rekwiżiti ewlenin l-oħra fit-Tabella 1 tal-Anness II jiġu vvalutati bħala li jaqgħu taħt il-kategoriji 3 jew 4 stabbiliti fit-Tabella 2 tal-Anness II.

Artikolu 9

Kriterji biex jiġu applikati rati fissi jew korrezzjonijiet finanzjarji estrapolati u kriterji għad-determinazzjoni tal-livell ta' korrezzjoni finanzjarja

(Artikolu 55(4) tar-Regolament (UE) Nru 223/2014)

1.  
Għandhom jiġu applikati korrezzjonijiet finanzjarji għal programm operazzjonali kollu jew parti minnu, fejn il-Kummissjoni tidentifika nuqqas serju wieħed jew aktar fil-funzjonament tas-sistema ta' ġestjoni u kontroll.

Minkejja l-ewwel sottoparagrafu, għandhom jiġu applikati korrezzjonijiet finanzjarji estrapolati, għal programm operazzjonali kollu jew parti minnu, fejn il-Kummissjoni tidentifika irregolaritajiet sistematiċi f'kampjun rappreżentattiv ta' operazzjonijiet, li jippermettu kwantifikazzjoni aktar eżatta tar-riskju għall-baġit tal-Unjoni. F'dan il-każ, ir-riżultati tal-eżaminazzjoni tal-kampjun rappreżentattiv għandhom jiġu estrapolati għall-bqija tal-popolazzjoni minn fejn ittieħed il-kampjun għall-finijiet tad-determinazzjoni tal-korrezzjoni finanzjarja.

2.  

Il-livell ta' korrezzjoni b'rata fissa għandu jiġi stabbilit filwaqt li jitqiesu l-elementi li ġejjin:

(a) 

l-importanza relattiva tan-nuqqas serju jew in-nuqqasijiet serji fil-kuntest tas-sistema ta' ġestjoni u kontroll kollha kemm hi;

(b) 

il-frekwenza u l-firxa tan-nuqqas serju jew in-nuqqasijiet serji;

(c) 

il-grad ta' riskju ta' telf għall-baġit tal-Unjoni.

3.  

Filwaqt li jitqiesu dawn l-elementi, il-livell ta' korrezzjoni finanzjarja għandu jiġi stabbilit kif ġej:

(a) 

fejn in-nuqqas serju jew in-nuqqasijiet serji fis-sistema ta' ġestjoni u kontroll huma tant fundamentali, frekwenti jew mifruxin li jirrappreżentaw falliment totali tas-sistema, liema falliment ipoġġi f'riskju l-legalità u r-regolarità tan-nefqa kollha kkonċernata, għandha tiġi applikata rata fissa ta' 100 %;

(b) 

fejn in-nuqqas serju jew in-nuqqasijiet serji fis-sistema ta' ġestjoni u kontroll huma tant frekwenti u mifruxin li jirrappreżentaw falliment estremament serju fis-sistema, liema falliment ipoġġi f'riskju l-legalità u r-regolarità ta' proporzjon għoli ħafna min-nefqa kkonċernata, għandha tiġi applikata rata fissa ta' 25 %;

(c) 

fejn in-nuqqas serju jew in-nuqqasijiet serji fis-sistema ta' ġestjoni u kontroll huma dovuti għall-fatt li s-sistema mhijiex tiffunzjona b'mod sħiħ jew qiegħda tiffunzjona b'mod tant ħażin jew b'mod tant mhux frekwenti li tpoġġi f'riskju l-legalità u r-regolarità ta' proporzjon għoli mill-infiq ikkonċernat, għandha tiġi applikata rata fissa ta' 10 %;

(d) 

fejn in-nuqqas serju jew in-nuqqasijiet serji fis-sistema ta' ġestjoni u kontroll huma dovuti għall-fatt li s-sistema mhijiex tiffunzjona b'mod konsistenti u b'hekk tpoġġi f'riskju l-legalità u r-regolarità ta' proporzjon sinifikanti min-nefqa kkonċernata, għandha tiġi applikata rata fissa ta' 5 %.

4.  
Fejn l-applikazzjoni ta' rata fissa stabbilita skont il-paragrafu 3 tkun sproporzjonata, il-livell ta' korrezzjoni għandu jitnaqqas.
5.  
Fejn, minħabba nuqqas tal-awtoritajiet responsabbli biex jieħdu miżuri korrettivi wara l-applikazzjoni ta' korrezzjoni finanzjarja f'sena tal-kontabbiltà, l-istess nuqqas serju jew nuqqasijiet serji huma identifikati f'sena tal-kontabbiltà sussegwenti, ir-rata ta' korrezzjoni tista', minħabba l-persistenza tan-nuqqas serju jew in-nuqqasijiet serji, tiżdied għal livell li ma jaqbiżx dak tal-kategorija ogħla li jmiss.

Artikolu 10

Dan ir-Regolament għandu jidħol fis-seħħ fil-jum ta' wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

L-Artikolu 3 għandu japplika mill-1 ta' Diċembru 2014, fir-rigward tal-informazzjoni dwar id-dejta rreġistrata u maħżuna msemmija fl-Anness I.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

▼M1



ANNESS I

Lista tad-data li trid tiġi rreġistrata u maħżuna f’forma kompjuterizzata fis-sistema ta’ monitoraġġ (imsemmija fl-Artikolu 2)

Id-data hija meħtieġa għal operazzjonijiet appoġġjati minn OP I u OP II ( 1 ) u għat-tipi kollha ta’ konsenja sakemm ma jkunx speċifikat mod ieħor fit-tieni kolonna.



Kampi tad-data

Indikazzjoni tat-tip ta’ OP jew tip ta’ konsenja li għalih mhijiex meħtieġa data

Data dwar il-benefiċjarju (1)

1.  Isem jew identifikatur uniku ta’ kull benefiċjarju

 

2.  Informazzjoni dwar jekk il-benefiċjarju huwiex korp tad-dritt pubbliku jew korp tad-dritt privat

 

3.  Informazzjoni dwar jekk il-VAT fuq in-nefqa imġarrab mill-benefiċjarju huwiex irrekuperabbli skont il-leġiżlazzjoni nazzjonali tal-VAT

 

4.  Id-dettalji ta’ kuntatt tal-benefiċjarju

 

Data dwar l-operazzjoni

5.  Isem jew identifikatur uniku tal-operazzjoni

 

6.  Deskrizzjoni qasira tal-operazzjoni

 

7.  Data tas-sottomissjoni tal-applikazzjoni għall-operazzjoni

 

8.  Data tal-bidu kif indikata fid-dokument li jistabbilixxi l-kondizzjonijiet għall-appoġġ

 

9.  Data tat-tmiem kif indikata fid-dokument li jistabbilixxi l-kondizzjonijiet għall-appoġġ

 

10.  Data effettiva meta l-operazzjoni tkun fiżikament ikkompletata jew implimentata kompletament

 

11.  Korp li joħroġ id-dokument li jistabbilixxi l-kondizzjonijiet għall-appoġġ

 

12.  Data tal-ħruġ tad-dokument li jistabbilixxi l-kondizzjonijiet għall-appoġġ

 

13.  Munita tal-operazzjoni

 

14.  CCI tal-programm(i) li minnu/hom l-operazzjoni hija appoġġata

 

15.  Tip(i) ta’ assistenza materjali indirizzata

Mhux applikabbli għall-OP II

16.  Tip(i) ta’ azzjonijiet appoġġjati

Mhux applikabbli għall-OP I

17.  Kodiċi(jiet) għall-forma tal-finanzjament

 

18.  Kodiċi(jiet) għall-lokalizzazzjoni

 

19.  Kwantità ta’ ikel mixtri minn korp pubbliku jew organizzazzjoni sieħba, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

20.  Kwantità ta’ ikel miksub minn korp pubbliku, fejn applikabbli, skont l-Artikolu 23(4) tar-Regolament (UE) Nru 223/2014, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

21.  Kwantità ta’ ikel mogħti lill-organizzazzjonijiet sieħba, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

22.  Kwantità ta’ ikel konsenjat lir-riċeventi aħħarin, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

23.  Kwantità ta’ assistenza materjali bażika mixtrija minn korp pubbliku jew organizzazzjoni sieħba, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

24.  Kwantità ta’ assistenza materjali bażika mogħtija lill-organizzazzjonijiet sieħba, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

25.  Kwantità ta’ assistenza materjali bażika mogħtija lir-riċeventi aħħarin, fejn applikabbli

Mhux applikabbli għall-OP II

Mhux applikabbli għal konsenja indiretta ta’ ikel, bħal permezz ta’ vawċers, kards jew strumenti oħra

26.  Għadd ta’ vawċers jew kards (jew strumenti oħra ta’ konsenja indiretta) maħruġa

Mhux applikabbli għall-OP II

Mhux applikabbli għall-konsenja diretta ta’ ikel u/jew assistenza materjali bażika

27.  Għadd ta’ vawċers jew kards (jew strumenti oħra ta’ konsenja indiretta) ikkonsenjati lir-riċeventi aħħarin

Mhux applikabbli għall-OP II

Mhux applikabbli għall-konsenja diretta ta’ ikel u/jew assistenza materjali bażika

28.  Għadd ta’ vawċers jew kards (jew strumenti oħra ta’ konsenja indiretta) użati mir-riċeventi aħħarin

Mhux applikabbli għall-OP II

Mhux applikabbli għall-konsenja diretta ta’ ikel u/jew assistenza materjali bażika

29.  Ammont totali ta’ nefqa ttoppjat fuq vawċers jew kards (jew strumenti oħra ta’ konsenja indiretta) ikkonsenjati lir-riċeventi aħħarin

Mhux applikabbli għall-OP II

Mhux applikabbli għall-konsenja diretta ta’ ikel u/jew assistenza materjali bażika

30.  Ammont totali ta’ nefqa f’vawċers jew kards (jew strumenti oħra ta’ konsenja indiretta) użati mir-riċeventi aħħarin

Mhux applikabbli għall-OP II

Mhux applikabbli għall-konsenja diretta ta’ ikel u/jew assistenza materjali bażika

Data dwar indikaturi

31.  Titlu tal-indikaturi komuni rilevanti għall-operazzjoni

 

32.  Identifikatur għall-indikaturi komuni rilevanti għall-operazzjoni

 

33.  Livell ta’ lħuq tal-indikaturi komuni għal kull sena ta’ implimentazzjoni jew fit-tmiem tal-operazzjoni

 

34.  Titlu tal-indikaturi speċifiċi għal kull programm rilevanti għall-operazzjoni

Mhux applikabbli għall-OP I

35.  Identifikatur għall-indikaturi speċifiċi għal kull programm rilevanti għall-operazzjoni

Mhux applikabbli għall-OP I

36.  Miri speċifiċi għall-indikaturi tal-produzzjoni speċifiċi għal kull programm

Mhux applikabbli għall-OP I

37.  Livell ta’ lħuq tal-indikaturi tal-output speċifiċi għal programm għal kull sena ta’ implimentazzjoni jew fit-tmiem tal-operazzjoni,

Mhux applikabbli għall-OP I

38.  Unità ta’ kejl għal kull mira ta’ output

Mhux applikabbli għall-OP I

39.  Linja bażi għall-indikaturi tar-riżultati

Mhux applikabbli għall-OP I

40.  Livell ta’ mira għall-indikaturi tar-riżultati

Mhux applikabbli għall-OP I

41.  Unità ta’ kejl għal kull mira u linja bażi tar-riżultati

Mhux applikabbli għall-OP I

42.  Unità ta’ kejl għal kull indikatur tal-output

 

Data finanzjarja dwar kull operazzjoni (fil-munita applikabbli għall-operazzjoni)

43.  Ammont totali tal-kost eliġibbli tal-operazzjoni approvat fid-dokument li jistabbilixxi l-kondizzjonijiet għall-appoġġ

 

44.  Ammont totali tal-kostijiet eliġibbli li jikkostitwixxu nefqa pubblika kif definita fl-Artikolu 2(12) tar-Regolament (UE) Nru 223/2014

 

45.  Ammont tal-appoġġ pubbliku, kif stipulat fid-dokument li jistabbilixxi l-kondizzjonijiet għall-appoġġ

 

Data dwar pretensjonijiet ta’ pagament mill-benefiċjarju (fil-munita applikabbli għall-operazzjoni)

46.  Data tal-irċevuta ta’ kull pretensjoni ta’ pagament mingħand il-benefiċjarju

 

47.  Data ta’ kull pagament lill-benefiċjarju abbażi ta’ pretensjoni ta’ pagament

 

48.  Ammont ta’ nefqa eliġibbli fi pretensjoni ta’ pagament li tifforma l-bażi għal kull pagament lill-benefiċjarju

 

49.  Ammont ta’ nefqa pubblika kif definit fl-Artikolu 2(12) tar-Regolament (UE) Nru 223/2014 li jikkorrispondi man-nefqa eliġibbli li tifforma l-bażi għal kull pagament

 

50.  Ammont ta’ kull pagament lill-benefiċjarju abbażi ta’ pretensjoni ta’ pagament

 

51.  Id-data tal-bidu tal-verifiki fuq il-post tal-operazzjoni mwettqa skont l-Artikolu 32(5)(b) tar-Regolament (UE) Nru 223/2014

 

52.  Data ta’ awditi fuq il-post tal-operazzjoni skont l-Artikolu 34(1) tar-Regolament (UE) Nru 223/2014 u l-Artikolu 6 tar-Regolament Delegat (UE) Nru 532/2014 (2)

 

53.  Korp li jagħmel l-awditjar jew il-verifika

 

Data dwar in-nefqa fi pretensjoni ta’ pagament minn benefiċjarju bbażata fuq kost reali (fil-munita applikabbli għall-operazzjoni)

54.  Nefqa pubblika eliġibbli ddikjarata lill-Kummissjoni stabbilita abbażi tal-kostijiet effettivament imġarrba u mħallsa

 

55.  Nefqa pubblika kif iddefinit fl-Artikolu 2(12) tar-Regolament (UE) Nru 223/2014 li jikkorrispondi għan-nefqa pubblika eliġibbli ddikjarata lill-Kummissjoni stabbilita fuq il-bażi tal-kostijiet effettivament rimborżati u mħallsa

 

56.  Tip ta’ kuntratt jekk l-għoti tal-kuntratt ikun soġġett għad-dispożizzjonijiet tad-Direttiva 2004/18/KE tal-Parlament Ewropew u tal-Kunsill (3) (forniment ta’ servizzi/forniment ta’ oġġetti) jew id-Direttiva 2014/23/UE tal-Parlament Ewropew u tal-Kunsill (4)

 

57.  Ammont tal-kuntratt jekk l-għoti tal-kuntratt ikun soġġett għad-dispożizzjonijiet tad-Direttiva 2004/18/KE jew id-Direttiva 2014/23/UE

 

58.  Nefqa eliġibbli mġarrba u mħallsa abbażi ta’ kuntratt jekk il-kuntratt ikun soġġett għad-dispożizzjonijiet tad-Direttiva 2004/18/KE jew id-Direttiva 2014/23/UE

 

59.  Proċedura tal-akkwist użata jekk l-għoti tal-kuntratt ikun soġġett għad-dispożizzjonijiet tad-Direttiva 2004/18/KE jew id-Direttiva 2014/23/UE

 

60.  Isem jew identifikatur uniku tal-kuntratt jekk l-għoti tal-kuntratt huwa soġġett għad-dispożizzjonijiet tad-Direttiva 2014/23/UE

 

Data dwar in-nefqa fi pretensjoni ta’ pagament minn benefiċjarju bbażata fuq skali standard ta’ kost unitarju (ammonti fil-munita applikabbli għall-operazzjoni)

61.  Ammont tan-nefqa pubblika eliġibbli ddikjarata lill-Kummissjoni stabbilita abbażi ta’ skali standard ta’ kost unitarju

 

62.  Nefqa pubbliku kif iddefinit fl-Artikolu 2(12) tar-Regolament (UE) Nru 223/2014 li jikkorrispondi għan-nefqa pubblika eliġibbli ddikjarata lill-Kummissjoni stabbilita abbażi ta’ skali standard ta’ kost unitarju

 

63.  Definizzjoni ta’ unità li tintuża għall-finijiet tal-iskala standard ta’ kost unitarju

 

64.  Numru ta’ unitajiet konsenjati kif indikat fil-pretensjoni ta’ pagament għal kull element unitarju

 

65.  Kost unitarju għal unità waħda, f’kull element unitarju

 

Data dwar in-nefqa fi pretensjoni ta’ pagament minn benefiċjarju bbażata fuq pagamenti f’somma f’daqqa (ammonti fil-munita applikabbli għall-operazzjoni)

66.  Ammont tan-nefqa pubblika eliġibbli ddikjarata lill-Kummissjoni stabbilit abbażi ta’ somom f’daqqa

 

67.  Nefqa pubblika kif iddefinit fl-Artikolu 2(12) tar-Regolament (UE) Nru 223/2014 li tikkorrispondi għan-nefqa pubblika eliġibbli ddikjarata lill-Kummissjoni stabbilita abbażi ta’ somom f’daqqa

 

68.  Għal kull somma f’daqqa, riżultati tanġibbli (outputs jew riżultati) miftiehma fid-dokument li jistabbilixxi l-kondizzjonijiet għall-appoġġ bħala l-bażi għall-iżborż ta’ ħlasijiet ta’ somom f’daqqa

 

69.  Għal kull somma f’daqqa, l-ammont maqbul fid-dokument li jistabbilixxi l-kondizzjonijiet għall-appoġġ

 

Data dwar in-nefqa fi pretensjoni ta’ pagament mill-benefiċjarju bbażata fuq ir-rati fissi (fil-munita applikabbli għall-operazzjoni)

70.  Ammont tan-nefqa pubblika eliġibbli ddikjarata lill-Kummissjoni stabbilit abbażi ta’ rata fissa

 

71.  Nefqa pubblika kif iddefinit fl-Artikolu 2(12) tar-Regolament (UE) Nru 223/2014 li tikkorrispondi għan-nefqa pubblika eliġibbli ddikjarata lill-Kummissjoni stabbilita abbażi ta’ rata fissa

 

Data dwar irkupri mill-benefiċjarju

72.  Data ta’ kull deċiżjoni ta’ rkupru

 

73.  Ammont ta’ appoġġ pubbliku affettwat minn kull deċiżjoni ta’ rkupru

 

74.  Nefqa totali eliġibbli affettwata minn kull deċiżjoni ta’ rkupru

 

75.  Data tal-irċevuta ta’ kull ammont imħallas lura mill-benefiċjarju wara deċiżjoni ta’ rkupru

 

76.  Ammont ta’ appoġġ pubbliku mħallas lura mill-benefiċjarju wara deċiżjoni ta’ rkupru (mingħajr imgħax jew penali)

 

77.  Nefqa totali eliġibbli li tikkorrispondi mal-appoġġ pubbliku mħallas lura mill-benefiċjarju

 

78.  Ammont ta’ appoġġ pubbliku irrekuperabbli wara deċiżjoni ta’ rkupru

 

79.  Nefqa totali eliġibbli li tikkorrispondi mal-appoġġ pubbliku irrekuperabbli

 

Data dwar talba għall-ħlas lill-Kummissjoni (f’EUR)

80.  Data tas-sottomissjoni ta’ kull talba għall-ħlas inkluż in-nefqa eliġibbli mill-operazzjoni

 

81.  L-ammont totali ta’ nefqa pubblika eliġibbli mġarrba mill-benefiċjarju u mħallsa fl-implimentazzjoni tal-operazzjoni inkluża f’kull talba għall-ħlas

 

82.  L-ammont totali tan-nefqa pubblika kif definit fl-Artikolu 2(12) tar-Regolament (UE) Nru 223/2014 tal-operazzjoni inkluż f’kull talba għall-ħlas

 

Data dwar kontijiet sottomessi lill-Kummissjoni skont l-Artikolu 48 tar-Regolament (UE) Nru 223/2014 (f’EUR)

83.  Data tas-sottomissjoni ta’ kull sett ta’ kontijiet inkluża n-nefqa fl-operazzjoni

 

84.  Data tas-sottomissjoni tal-kontijiet li fihom in-nefqa finali tal-operazzjoni hija inkluża wara t-tlestija tal-operazzjoni (fejn in-nefqa totali eliġibbli hija ta’ EUR 1 000 000 jew aktar (l-Artikolu 51 tar-Regolament (UE) Nru 223/2014))

 

85.  Ammont totali tan-nefqa pubblika eliġibbli tal-operazzjoni mdaħħal fis-sistemi kontabilistiċi tal-awtorità taċ-ċertifikazzjoni li ġie inkluż fil-kontijiet

 

86.  Ammont totali tan-nefqa pubblika kif definit fl-Artikolu 2(12) tar-Regolament (UE) Nru 223/2014 li tkun saret fl-implimentazzjoni tal-operazzjoni li tikkorrispondi mal-ammont totali tan-nefqa pubblika eliġibbli rreġistrat fis-sistemi kontabilistiċi tal-awtorità taċ-ċertifikazzjoni li ġie inkluż fil-kontijiet

 

87.  Ammont totali ta’ pagamenti magħmula lill-benefiċjarju skont l-Artikolu 42(2) tar-Regolament (UE) Nru 223/2014 li jikkorrispondi mal-ammont totali tan-nefqa pubblika eliġibbli rreġistrat fis-sistemi kontabilistiċi tal-awtorità taċ-ċertifikazzjoni li ġie inkluż fil-kontijiet

 

88.  Nefqa pubblika totali eliġibbli tal-operazzjoni użata matul is-sena kontabilistika inkluża fil-kontijiet

 

89.  Nefqa pubblika totali kif iddefinita fl-Artikolu 2(12) tar-Regolament (UE) Nru 223/2014 li tikkorrispondi man-nefqa pubblika eliġibbli totali użata matul is-sena kontabilistika inkluża fil-kontijiet

 

90.  Nefqa totali pubblika eliġibbli tal-operazzjoni rkuprata matul is-sena kontabilistika inkluża fil-kontijiet

 

91.  Nefqa pubblika totali li tikkorrispondi man-nefqa pubblika eliġibbli totali tal-operazzjoni rkuprata matul is-sena kontabilistika inkluża fil-kontijiet

 

92.  Nefqa pubblika eliġibbli totali tal-operazzjoni li għandha tiġi rkuprata fi tmiem is-sena kontabilistika inkluża fil-kontijiet

 

93.  Nefqa pubblika totali tal-operazzjoni li tikkorrispondi man-nefqa pubblika eliġibbli totali li għandha tiġi rkuprata fi tmiem is-sena kontabilistika inkluża fil-kontijiet

 

94.  Ammont totali eliġibbli tan-nefqa pubblika tal-operazzjoni irrekuperabbli fi tmiem is-sena kontabilistika inkluż fil-kontijiet

 

95.  Nefqa pubblika totali tal-operazzjoni li tikkorrispondi mal-ammont tan-nefqa pubblika irrekuperabbli fi tmiem is-sena kontabilistika inkluża fil-kontijiet

 
(1)   

Il-benefiċjarju jinkludi, fejn applikabbli, korpi oħra li jġarrbu nefqa fl-operazzjoni li jiġi ttrattat bħala nefqa imġarrab mill-benefiċjarju.

(2)   

Ir-Regolament ta’ Delega tal-Kummissjoni (UE) Nru 532/2014 tat-13 ta’ Marzu 2014 li jissupplimenta r-Regolament (UE) Nru 223/2014 tal-Parlament Ewropew u tal-Kunsill dwar il-Fond għal Għajnuna Ewropea għall-Persuni l-Aktar fil-Bżonn (ĠU L 148, 20.5.2014, p. 54).

(3)   

Id-Direttiva 2004/18/KE tal-Parlament Ewropew u tal-Kunsill tal-31 ta’ Marzu 2004 fuq kordinazzjoni ta’ proċeduri għall-għoti ta’ kuntratti għal xogħlijiet pubbliċi, kuntratti għal provvisti pubbliċi u kuntratti għal servizzi pubbliċi (ĠU L 134, 30.4.2004, p. 114).

(4)   

Id-Direttiva 2014/23/UE tal-Parlament Ewropew u tal-Kunsill tas-26 ta’ Frar 2014 dwar l-għoti ta’ kuntratti ta’ konċessjoni (ĠU L 94, 28.3.2014, p. 1).

▼B



ANNESS II

Rekwiżiti ewlenin tas-sistemi ta' ġestjoni u kontroll u l-klassifikazzjoni tagħhom rigward it-tħaddim effettiv tagħhom imsemmija fl-Artikolu 9



Tabella 1

Rekwiżiti ewlenin

Rekwiżiti ewlenin tas-sistema ta' ġestjoni u kontroll

Korpi/awtoritajiet ikkonċernati

Kamp ta' applikazzjoni

1

Separazzjoni adegwata tal-funzjonijiet u sistemi adegwati għar-rappurtar u għall-monitoraġġ f'każijiet fejn l-awtorità responsabbli tafda t-twettiq tal-kompiti lil korp ieħor.

L-awtorità maniġerjali

Ambjent tal-kontroll intern

2

Għażla xierqa tal-operazzjonijiet.

L-awtorità maniġerjali

Attivitajiet ta' ġestjoni u kontroll

3

Informazzjoni adegwata għall-benefiċjarji dwar il-kundizzjonijiet li japplikaw għall-operazzjonijiet magħżula.

L-awtorità maniġerjali

4

Verifiki adegwati tal-ġestjoni

L-awtorità maniġerjali

5

Sistema effettiva biex jiġi żgurat li d-dokumenti kollha dwar in-nefqa u l-awditjar jinżammu biex ikun żgurat rekord adegwat għall-awditjar.

L-awtorità maniġerjali

Attivitajiet ta' ġestjoni u kontroll/Monitoraġġ

6

Sistema affidabbli għall-ġbir, ir-reġistrazzjoni u l-ħżin tad-dejta għall-finijiet ta' monitoraġġ, evalwazzjoni, ġestjoni finanzjarja, verifika u awditjar.

L-awtorità maniġerjali

7

L-implimentazzjoni effettiva ta' miżuri proporzjonati kontra l-frodi

L-awtorità maniġerjali

Attivitajiet ta' ġestjoni u kontroll

8

Proċeduri xierqa għat-tfassil tad-dikjarazzjoni tal-maniġment u s-sommarju annwali tar-rapporti finali tal-awditjar u tal-kontrolli mwettqa.

L-awtorità maniġerjali

9

Separazzjoni adegwata tal-funzjonijiet u sistemi adegwati għar-rappurtar u għall-monitoraġġ f'każijiet fejn l-awtorità responsabbli tafda t-twettiq tal-kompiti lil korp ieħor.

L-awtorità taċ-ċertifikazzjoni

Ambjent tal-kontroll intern

10

Proċeduri xierqa biex jitfasslu u jiġu ppreżentati l-applikazzjonijiet għall-ħlas.

L-awtorità taċ-ċertifikazzjoni

Attivitajiet ta' ġestjoni u kontroll/Monitoraġġ

11

Jinżammu rekords kompjuterizzati xierqa tal-infiq iddikjarat u l-kontribuzzjoni pubblika korrispondenti.

L-awtorità taċ-ċertifikazzjoni

Attivitajiet ta' ġestjoni u kontroll

12

Rendikont xieraq u sħiħ ta' ammonti li jistgħu jiġu rkuprati, dawk irkuprati u dawk irtirati.

L-awtorità taċ-ċertifikazzjoni

13

Proċeduri xierqa għat-tfassil u ċ-ċertifikazzjoni tal-kompletezza, l-akkuratezza u l-veraċità tal-kontijiet annwali.

L-awtorità taċ-ċertifikazzjoni

14

Separazzjoni adegwata tal-funzjonijiet u sistemi adegwati biex jiżguraw li kwalunkwe entità oħra li twettaq awditjar skont l-istrateġija ta' awditjar tal-programm ikollha l-indipendenza funzjonali meħtieġa u tqis l-istandards tal-awditjar aċċettati internazzjonalment.

Awtorità tal-verifika

Ambjent tal-kontroll intern

15

Awditi adegwati tas-sistemi.

Awtorità tal-verifika

L-attivitajiet ta' kontroll

16

Awditi adegwati tal-operazzjonijiet

Awtorità tal-verifika

17

Awditi adegwati tal-kontijiet

Awtorità tal-verifika

18

Proċeduri adegwati biex tiġi pprovduta opinjoni tal-awditjar kredibbli u biex jitħejja r-rapport annwali tal-kontroll.

Awtorità tal-verifika



Tabella 2

Klassifikazzjoni ta' sistemi ta' ġestjoni u kontroll fir-rigward tat-tħaddim effettiv tagħhom

Kategorija 1

Jaħdem sew. Le, jew hemm bżonn biss ta' xi titjib minuri

Kategorija 2

Xogħlijiet. Huwa meħtieġ xi titjib

Kategorija 3

Jaħdem parzjalment. Hemm bżonn ta' titjib sostanzjali

Kategorija 4

Essenzjalment ma jaħdimx.


( 1 ) OP I jirreferi għall-programmi operazzjonali għall-ikel u/jew l-assistenza materjali u OP II jirreferi għall-programmi operazzjonali għall-inklużjoni soċjali tal-persuni l-aktar fil-bżonn