30.8.2019 |
MT |
Il-Ġurnal Uffiċjali tal-Unjoni Ewropea |
C 293/1 |
SEJĦA GĦAL NOMINI BIL-ĦSIEB TAL-ELEZZJONI TAL-OMBUDSMAN EWROPEW
(2019/C 293/01)
Wara li kkunsidra l-Artikoli 24 u 228 tat-Trattat dwar il-Funzjonament tal-Unjoni Ewropea u l-Artikolu 106a tat-Trattat Euratom,
Wara li kkunsidra r-regolamenti u l-kundizzjonijiet ġenerali li jirregolaw it-twettiq tad-dmirijiet tal-Ombudsman adottati mill-Parlament Ewropew fid-9 ta' Marzu 1994 (1) u, b'mod partikolari, l-Artikoli 6 u 7 tagħhom.
Wara li kkunsidra l-Artikolu 231 tar-Regoli ta' Proċedura tal-Parlament Ewropew dwar l-elezzjoni tal-Ombudsman,
Billi din l-elezzjoni tal-Ombudsman Ewropew mill-Parlament Ewropew se tkun għat-tul tal-leġiżlatura parlamentari 2019-2024,
Billi l-Ombudsman Ewropew hu eliġibbli għal ħatra mill-ġdid,
Billi l-Ombudsman Ewropew jintgħażel minn fost persuni li huma ċittadini tal-Unjoni, li għandhom id-drittijiet ċivili u politiċi kollha, li joffru kull garanzija ta' indipendenza u li jissodisfaw il-kundizzjonijiet rikjesti għat-twettiq tal-ogħla kariga ġudizzjarja f'pajjiżhom jew li jkollhom il-kompetenza u l-esperjenza rikonoxxuti biex iwettqu d-dmirijiet tal-Ombudsman,
1.
Qed issir stedina għal nomini bl-intenzjoni li jiġi elett Ombudsman Ewropew mill-Parlament Ewropew.
2.
L-applikanti jeħtiġilhom l-appoġġ ta' minimu ta' 40 Membru tal-Parlament Ewropew li jkunu ċittadini ta' mill-inqas żewġ Stati Membri u jridu jipprovdu d-dokumenti ġustifikattivi kollha li hemm bżonn biex jintwera b'mod konklużiv li jissodisfaw il-kundizzjonijiet rikjesti mir-regolamenti u l-kundizzjonijiet ġenerali għall-qadi tad-dmirijiet tal-Ombudsman u impenn solenni minnhom li, jekk jinħatru, ma jinvolvu ruħhom fl-ebda okkupazzjoni oħra, kemm jekk bi ħlas kif ukoll jekk bla ħlas, waqt iż-żmien tagħhom fil-kariga.
3.
In-nomini iridu jintbagħtu lill-President tal-Parlament Ewropew sa mhux aktar tard mit-30 ta' Settembru 2019 (2).
4.
L-ipproċessar tad-data personali kollha matul il-proċedura ta' valutazzjoni u elezzjoni se jkun konformi mar-Regolament (UE) 2018/1725 tal-Parlament Ewropew u tal-Kunsill (3). Id-dettalji kollha dwar l-attivitajiet ta' pproċessar huma disponibbli fuq http://www.europarl.europa.eu/ombudsmanelection2019/en/home/home.html
D.M. SASSOLI
President tal-Parlament Ewropew
(1) ĠU L 113, 4.5.1994, p. 15.
(2) In-nomini għandhom jintbagħtu lil:
Il-President tal-Parlament Ewropew
(In-nomini għall-kariga ta' Ombudsman Ewropew)
PHS 06A055
Indirizz tal-posta:
Louise Weiss Building |
Allée du Printemps |
BP 1024/F |
67070 Strasbourg Cedex |
FRANCE |
jew |
Paul-Henri Spaak Building |
Rue Wiertz/Wiertzstraat |
1047 Bruxelles/Brussel |
BELGIQUE/BELGIË |
In-nomini għandhom jiddikjaraw id-dettalji tal-kuntatt rilevanti, inkluż l-indirizz elettroniku.
(3) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).