|
26.1.2013 |
MT |
Il-Ġurnal Uffiċjali tal-Unjoni Ewropea |
C 26/4 |
Sentenza tal-Qorti tal-Ġustizzja (L-Ewwel Awla) tat-22 ta’ Novembru 2012 (talba għal deċiżjoni preliminari tas-Sąd Rejonowy Poznań — il-Polonja) — Bank Handlowy w Warszawie SA, PPHU “ADAX”/Ryszard Adamiak vs Christianapol sp. z o.o.
(Kawża C-116/11) (1)
(Kooperazzjoni ġudizzjarja f’materji ċivili - Regolament (KE) Nru 1346/2000 - Proċedimenti ta’ falliment - Kunċett ta’ “għeluq tal-proċedimenti” - Possibbiltà għall-qorti li quddiemha jitressaq proċediment sekondarju ta’ falliment li tevalwa l-istat ta’ falliment tad-debitur - Possibbiltà li jinfetaħ proċediment ta’ stralċ bħala proċediment sekondarju ta’ falliment meta l-proċediment prinċipali jkun proċediment ta’ salvagwardja)
2013/C 26/07
Lingwa tal-kawża: il-Pollakk
Qorti tar-rinviju
Sąd Rejonowy Poznań-Stare Miasto w Poznaniu
Partijiet fil-kawża prinċipali
Rikorrenti: Bank Handlowy w Warszawie SA, PPHU “ADAX”/Ryszard Adamiak
Konvenuta: Christianapol sp. z o.o
Suġġett
Talba għal deċiżjoni preliminari — Sąd Rejonowy Poznań — Interpretazzjoni tal-Artikolu 4(1) u (2)(j) kif ukoll tal-Artikolu 27 tar-Regolament tal-Kunsill (KE) Nru 1346/2000, tad-29 ta’ Mejju 2000, dwar proċedimenti ta’ falliment (ĠU Edizzjoni Speċjali bil-Malti, Kapitolu 19, Vol. 1. p. 91) — Proċedimenti sekondarji ta’ falliment — Dritt tal-qorti kompetenti li tiftaħ tali proċediment sabiex teżamina l-falliment tad-debitur
Dispożittiv
|
(1) |
L-Artikolu 4(2)(j) tar-Regolament (KE) tal-Kunsill (KE) Nru 1346/2000, tad-29 ta’ Mejju 2000, dwar proċedimenti ta’ falliment, kif emendat bir-Regolament tal-Kunsill (KE) Nru 788/2008, tal-24 ta’ Lulju 2008, għandu jiġi interpretat fis-sens li huwa d-dritt nazzjonali tal-Istat Membru fejn jinfetaħ il-proċediment ta’ falliment li għandu jiddetermina l-mument li fih jingħalaq dan il-proċediment. |
|
(2) |
L-Artikolu 27 tar-Regolament Nru 1346/2000, kif emendat bir-Regolament Nru 788/2008, għandu jiġi interpretat fis-sens li jippermetti l-ftuħ ta’ proċediment sekondarju ta’ falliment fl-Istat Membru fejn ikun jinsab stabbiliment tad-debitur f’sitwazzjoni fejn il-proċediment prinċipali jkollu għan protettiv. Il-qorti li jkollha ġurisdizzjoni tiftaħ proċediment sekondarju għandha, filwaqt li tosserva l-prinċipju ta’ kooperazzjoni leali, tieħu inkunsiderazzjoni l-għanijiet tal-proċediment prinċipali u l-istruttura tar-Regolament. |
|
(3) |
L-Artikolu 27 tar-Regolament Nru 1346/2000, kif emendat bir-Regolament Nru 788/2008, għandu jiġi interpretat fis-sens li l-qorti li quddiemha titressaq talba għall-ftuħ ta’ proċediment sekondarju ta’ falliment ma tistax teżamina l-istat ta’ falliment tad-debitur li fil-konfront tiegħu jkun infetaħ proċediment prinċipali fi Stat Membru, lanqas jekk dan il-proċediment tal-aħħar ikollu għan protettiv. |