IL-KUMMISSJONI EWROPEA

Brussell, 27.5.2020

COM(2020) 442 final

KOMUNIKAZZJONI TAL-KUMMISSJONI

Il-baġit tal-UE jmexxi l-pjan ta' rkupru għall-Ewropa

IL-BAĠIT TAL-UE JMEXXI L-PJAN TA’ RKUPRU GĦALL-EWROPA

1.Baġit tal-UE ambizzjuż u innovattiv għall-irkupru Ewropew

Flimkien mat-tlett ixbieki ta’ sikurezza importanti għall-ħaddiema, in-negozji u s-sovrani approvati mill-Kunsill Ewropew fit-23 ta’ April u li ammontaw għal pakkett b’valur ta’ EUR 540 biljun, dawn il-miżuri eċċezzjonali meħudin fil-livell tal-UE se jilħqu EUR 1 290 biljun ta’ appoġġ immirat u fornut minn qabel għall-appoġġ għall-irkupru Ewropew 4 . Meta jiġu applikati estimi konservattivi tal-effett ta’ ingranaġġ tal-qafas finanzjarju pluriennali u ta’ Next Generation EU, l-investiment totali li jista’ jiġi ġġenerat minn dan il-pakkett ta’ miżuri jammonta għal EUR 3,1 triljun.

Dawn il-miżuri jagħtu risposta deċiżiva għall-appelli tal-Parlament Ewropew għal “pakkett massiv ta' rkupru u rikostruzzjoni għal investiment li jappoġġa l-ekonomija Ewropea wara l-kriżi, [...] li jiddaħħal fil-qafas finanzjarju pluriennali (QFP) l-ġdid” 5 u tal-Mexxejja għal fond ta’ rkupru “kbir biżżejjed, immirat lejn is-setturi u l-partijiet ġeografiċi tal-Ewropa l-aktar milquta, u ddedikat lejn l-indirizzar ta’ din il-kriżi bla preċedent” 6 .

Dan il-fehim kondiviż jipprovdi l-bażi għal ftehim rapidu u komprensiv bejn l-istituzzjonijiet. Il-Kummissjoni tappella għal kooperazzjoni mill-qrib ħafna bejn il-Parlament Ewropew u l-Kunsill dwar l-elementi kollha ta’ dan il-pjan ta’ rkupru u tistedinhom biex ta’ kull sena jagħmlu rieżami tal-infiq iffinanzjat bi dħul assenjat estern permezz ta’ Next Generation EU. Il-prinċipji ta’ tali rieżami jistgħu jiġu stipulati f’dikjarazzjoni interistituzzjonali. Ftehim rapidu dwar il-Ġenerazzjoni li jmiss tal-UE u baġit fit-tul ambizzjuż ikunu dikjarazzjoni qawwija ta’ solidarjetà u determinazzjoni Ewropej fi żmien li fih hemm wisq x’nistgħu nitilfu. 

Next Generation EU se jagħti lill-baġit tal-UE l-qawwa addizzjonali neċessarja biex jirrispondi b’mod deċiżiv għall-aktar sfidi urġenti. Dan se jkun strument ta’ emerġenza ta’ darba, implimentat għal perjodu temporanju u użat biss għal miżuri ta’ rispons u rkupru fil-każ ta’ kriżi. Il-fondi se jingħaddew mill-baġit tal-UE lill-Istati Membri biex jappoġġaw il-prijoritajiet ta’ investiment u riforma, u se jintużaw biex isaħħu programmi finanzjarji essenzjali għall-irkupru, bid-data ta’ tmiem tal-31 ta’ Diċembru 2024 . Il-ġbir ta’ finanzjament fis-swieq finanzjarji se jgħin biex il-kostijiet finanzjarji jinfirxu maż-żmien, sabiex b’hekk l-Istati Membri ma jkollhomx għalfejn jagħmlu kontribuzzjonijiet addizzjonali sinifikanti għall-baġit tal-UE fil-perjodu 2021–2027. Il-Kummissjoni se tipproponi wkoll riżorsi proprji ġodda li jistgħu jgħinu biex jiffinanzjaw ir-ripagament tal-finanzjament mis-suq li jinġabar taħt Next Generation EU.

It-tnedija ta’ Next Generation EU malajr se tkun vitali biex tinqaleb il-folja tal-kriżi ekonomika. Barra minn hekk, sabiex il-fondi jsiru disponibbli malajr kemm jista’ jkun biex jirrispondu għall-aktar ħtiġijiet urġenti, il-Kummissjoni tipproponi li temenda l-qafas finanzjarju pluriennali attwali 2014-2020 biex tagħmel EUR 11,5 biljun f’finanzjament disponibbli mill-2020 stess. Dan il-finanzjament addizzjonali jsir disponibbli għal REACT-EU, l-Istrument ta’ Appoġġ għas-Solvenza u l-Fond Ewropew għall-Iżvilupp Sostenibbli, li jirrifletti l-urġenza ta’ dawn il-ħtiġijiet.

2.Kif se jintuża Next Generation EU?

Kull programm u kull euro f’dan il-pakkett se jintużaw biex jindirizzaw l-aktar ħtiġijiet ta’ rkupru kruċjali, kif identifikat fil-valutazzjoni tal-ħtiġijiet tal-Kummissjoni. Dawn il-proposti jiffukaw fuq fejn il-baġit tal-UE jista’ jagħmel l-akbar differenza, billi jikkomplementaw u jamplifikaw ix-xogħol essenzjali li għaddej fl-Istati Membri.

Il-pakkett huwa mibni fuq tliet pilastri: għodod biex jappoġġaw l-isforzi tal-Istati Membri biex jirkupraw, isewwu u joħorġu aktar b’saħħithom mill-kriżi; miżuri biex jagħtu spinta lill-investiment privat u għall-appoġġ ta’ kumpaniji f’diffikultà; u t-tisħiħ tal-programmi ewlenin tal-UE biex jittieħdu t-tagħlimiet mill-kriżi u s-suq uniku jsir aktar b’saħħtu u reżiljenti.

1)Nappoġġaw lill-Istati Membri biex jirkupraw, isewwu, u joħorġu aktar b’saħħithom mill-kriżi

ØFaċilità għall-Irkupru u r-Reżiljenza ġdida

Il-baġit tal-UE jista’ jipprovdi appoġġ qawwi għall-prijoritajiet tal-investiment u r-riforma identifikati permezz tas-Semestru Ewropew, aktar kruċjali minn qatt qabel fi żmien li fih il-baġits nazzjonali qegħdin taħt pressjoni.

Fiċ-ċentru tal-pjan ta’ rkupru se jkun hemm Faċilità ġdida għall-Irkupru u r-Reżiljenza. Il-mira tal-faċilità se tkun li tappoġġa l-investiment u r-riformi essenzjali għal irkupru dejjiemi, biex tittejjeb ir-reżiljenza ekonomika u soċjali tal-Istati Membri, u biex jiġu appoġġati t-tranżizzjonijiet ekonomiċi u diġitali. Se tkun disponibbli għall-Istati Membri kollha, iżda l-appoġġ se jkun ikkonċentrat fil-partijiet tal-Unjoni l-aktar milquta u li fihom hemm l-akbar ħtieġa relatata mar-reżiljenza. Dan se jgħin biex jiġu miġġielda d-diverġenzi li qed jikbru bejn l-Istati Membri u biex inħejju l-ekonomiji tagħna għall-ġejjieni.

Il-faċilità se toffri appoġġ finanzjarju fuq skala kbira għall-investimenti u r-riformi li jagħmlu l-ekonomiji tal-Istati Membri aktar reżiljenti. B’mod kruċjali, se tiżgura li dawn l-investimenti u r-riformi jiffukaw fuq l-isfidi u l-ħtiġijiet ta’ investiment relatati mat-tranżizzjonijiet ekoloġiċi u diġitali. Se tgħin lill-Istati Membri jindirizzaw sfidi ekonomiċi u soċjali li huma saħansitra aktar kritiċi kaġun tal-kriżi, f’bosta oqsma bħal dawk soċjali, tal-impjiegi, tal-ħiliet, tal-edukazzjoni, tar-riċerka u tal-innovazzjoni u tas-saħħa, iżda wkoll f’oqsma relatati mal-ambjent tan-negozju, inkluż l-amministrazzjoni pubblika u s-settur finanzjarju. Il-Kummissjoni se toffri appoġġ tekniku estensiv biex tiżgura li l-fondi jintużaw bl-aħjar mod possibbli.

Il-faċilità għandha baġit propost ta’ EUR 560 biljun biex jgħin fil-finanzjament ta’ rkupru u reżiljenza tal-Istati Membri. Se tkun mgħammra b’faċilità tal-għotjiet b’valur sa EUR 310 biljun u se tkun kapaċi twassal sa EUR 250 biljun f’self. 

Il-Faċilità għall-Irkupru u r-Reżiljenza se tkun integrata sew fis-Semestru Ewropew. L-Istati Membri se jħejju pjanijiet għall-irkupru u r-reżiljenza bħala parti mill-Programmi Nazzjonali ta’ Riforma tagħhom. Dawn il-pjanijiet se jistipulaw il-prijoritajiet tal-investiment u r-riforma u l-pakketti tal-investiment relatati li għandhom jiġu ffinanzjati taħt il-faċilità, u l-appoġġ se jingħata f’pagamenti skont il-progress li jkun sar u fuq il-bażi ta’ parametri referenzjarji predefiniti.

Il-Kummissjoni qed tipproponi inizjattiva REACT-EU ġdida biex iżżid l-appoġġ biex l-Istati Membri jagħmlu l-ekonomiji tagħhom aktar reżiljenti u sostenibbli fil-fażi tat-tiswija tal-kriżi. Dan se jgħin biex tiċkien id-diskrepanza bejn il-miżuri tal-ewwel rispons u l-irkupru aktar fit-tul. 

Permezz ta’ REACT-EU, il-Kummissjoni qed tipproponi li tipprovdi EUR 55 biljun ta’ finanzjament addizzjonali tal-politika ta’ koeżjoni minn issa sal-2022, EUR 50 biljun minn Next Generation EU fl-2021 u l-2022, u EUR 5 biljun diġà fl-2020 billi tadatta l-qafas finanzjarju attwali. Dan se jkun ibbażat fuq ir-regoli attwali tal-koeżjoni, inkluża l-flessibilità eċċezzjonali introdotta permezz tal-Inizjattivi ta’ Investiment fir-Rispons għall-Coronavirus. Skont dawn il-proposti, bejn l-2020 u l-2022 se jiġi pprovdut finanzjament addizzjonali għall-programmi ta’ koeżjoni attwali kif ukoll għall-Fond għal Għajnuna Ewropea għall-Persuni l-Aktar fil-Bżonn, biex b’hekk il-finanzjament għall-miżuri ewlenin ta’ tiswija wara l-kriżi u l-appoġġ għall-persuni l-aktar fil-bżonn ikun jista’ jkompli mingħajr interruzzjoni. 

Il-finanzjament addizzjonali se jiġi allokat skont is-severità tal-impatti ekonomiċi u soċjali tal-kriżi, inkluż il-livell ta’ qgħad fost iż-żgħażagħ u l-prosperità relattiva tal-Istati Membri . L-impenji addizzjonali se jiġu implimentati permezz tal-emendi għall-programmi jew programmi ġodda ddedikati ppreżentati mill-Istati Membri u adottati mill-Kummissjoni. Il-Kummissjoni se taħdem mill-qrib mal-Istati Membri biex jimmaniġjaw dan il-proċess b’aktar mod rapidu u effiċjenti possibbli.

Il-finanzjament se jappoġġa l-azzjonijiet ta’ tiswija tal-kriżi fl-aktar setturi importanti għal irkupru ekoloġiku, diġitali u reżiljenti. Dan se jinkludi investiment biex jissewwew is-swieq tax-xogħol, inluż permezz ta’ sussidji għar-reklutaġġ, skemi ta’ xogħol b'ħinijiet iqsar, appoġġ għas-sistemi tas-saħħa, u l-provvediment ta’ kapital operatorju għall-intrapriżi żgħar u medji. L-appoġġ se jkun disponibbli f’setturi ekonomiċi differenti, inkluż fit-turiżmu u l-kultura, u għall-investimenti essenzjali fit-tranżizzjonijiet ekoloġiċi u diġitali, u b’hekk isaħħaħ l-investiment diġà ppjanat skont il-programmi ta’ koeżjoni futuri. Parti minn dawn ir-riżorsi addizzjonali jistgħu jintużaw ukoll biex jgħinu lin-nies li qed isofru mill-privazzjoni materjali u alimentari.

ØIl-politika ta' koeżjoni għasservizz tal-irkupru ekonomiku għal kulħadd

Lil hinn mir-rispons immedjat għall-kriżi, il-politika ta' koeżjoni se tkun kruċjali biex niżguraw irkupru bbilanċjat fit-tul, biex jiġu evitati assimetriji u diverġenzi fit-tkabbir bejn l-Istati Membri u fi ħdanhom.

Għaldaqstant huwa essenzjali għall-prijoritajiet strateġiċi tal-Unjoni li l-programmi ta’ koeżjoni l-ġodda jiġu varati fl-1 ta’ Jannar 2021, b’mod parallel mal-fondi addizzjonali li jkunu saru disponibbli għall-programmi attwali sa tmiem l-2022. Dawn il-proposti ġew imfassla biex jagħtu l-appoġġ massimu għall-prijoritajiet tal-lum.

Il-Kummissjoni issa qed taġġusta l-proposti tagħha għall-programmi futuri tal-politika ta’ koeżjoni biex jagħtu appoġġ aktar b’saħħtu għall-investimenti ta’ rkupru, pereżempju fir-reżiljenza tas-sistemi nazzjonali tas-saħħa, f’setturi bħat-turiżmu u l-kultura, fl-appoġġ għall-intrapriżi żgħar u medji, f’miżuri għall-impjieg taż-żgħażagħ, fl-edukazzjoni u l-ħiliet, u miżuri li jikkumbattu l-faqar fost it-tfal.

Iż-żgħażagħ aktarx li se jintlaqtu partikolarment ħażin mill-kriżi, u għalhekk jenħtieġ li l-Istati Membri b’livelli ta’ qgħad fost iż-żgħażagħ ogħla mill-medja tal-UE jipprogrammaw mill-inqas 15 % tar-riżorsi tal-Fond Soċjali Ewropew Plus tagħhom b'ġestjoni kondiviża biex jappoġġaw liż-żgħażagħ. Fid-dawl tal-impatt li l-kriżi aktarx ikollha fuq il-persuni l-aktar vulnerabbli fis-soċjetà, il-Kummissjoni tipproponi wkoll li mill-inqas 5 % tan-nefqa totali skont il-Fond Soċjali Ewropew Plus jenħtieġ li tintuża biex tgħin biex it-tfal jinħarġu mill-faqar.

Se tiġi pprovduta assistenza teknika biex l-Istati Membri jimmassimizzaw il-benefiċċji kombinati tal-programmi tal-politika ta’ koeżjoni l-ġodda u l-programmi attwali taħt REACT-EU.

Il-proposti riveduti jipprevedu wkoll flessibbiltà akbar għat-trasferimenti bejn il-fondi u jintroduċu provvedimenti ġodda biex jiġu attivati f’sitwazzjonijiet ta’ emerġenza. Biex jiġi żgurat li jkun hemm biżżejjed appoġġ lill-Istati Membri u lir-reġjuni l-aktar fil-bżonn, il-proposti riveduti tal-Kummissjoni jipprevedu wkoll rieżami tal-allokazzjonijiet tal-koeżjoni nazzjonali fl-2024, huma u jitqiesu l-istatistiċi li kienu disponibbli l-aħħar. Dan ir-rieżami se jwassal biss għal aġġustamenti ’l fuq ta’ sa EUR 10 biljun għall-Istati Membri kollha.

ØAppoġġ għal tranżizzjoni ġusta

L-irkupru u l-prosperità futura tal-Ewropa se jiddependu fuq il-passi li nieħdu issa biex inħejju għat-tranżizzjoni għal ekonomija newtrali għall-klima, effiċjenti fir-riżorsi u ċirkolari. Dan it-tibdil se jaffettwa lill-Ewropej kollha iżda l-piż tal-aġġustament se jkun itqal għal xi setturi u reġjuni minn oħrajn. Bħala parti mill-pakkett ta’ rkupru, il-Kummissjoni qed tipproponi li tuża Next Generation EU biex tipprovdi assistenza finanzjarja biex takkumpanja t-trasformazzjoni tal-ekonomija Ewropea u biex tiżgura li ħadd ma jitħalla lura.

B’mod partikolari, il-Kummissjoni qed tipproponi li tipprovdi finanzjament addizzjonali sostanzjali ta’ EUR 30 biljun għall-Fond għal Tranżizzjoni Ġusta, biex it-total jiġi ta’ EUR 40 biljun. Dan il-finanzjament se jintuża biex jittaffew l-impatti soċjo-ekonomiċi tat-tranżizzjoni lejn in-newtralità klimatika fir-reġjuni l-aktar affettwati, billi pereżempju jappoġġa t-taħriġ mill-ġdid tal-ħaddiema, jgħin lill-SMEs joħolqu opportunitajiet ekonomiċi ġodda, u b’investiment fit-tranżizzjoni lejn l-enerġija nadifa u fl-ekonomija ċirkolari. Aktar finanzjament għall-InvestEU se jfisser ukoll li t-tieni pilastru tal-Mekkaniżmu ta' Tranżizzjoni Ġusta se jissaħħaħ. Il-Kummissjoni qed tagħmel ukoll proposti biex tistabbilixxi l-faċilità ta' self għas-settur pubbliku li tifforma t-tielet pilastru tal-Mekkaniżmu ta' Tranżizzjoni Ġusta. Dan se jiġi appoġġat minn EUR 1,5 biljun mill-baġit tal-UE 7 u EUR 10 biljun f’self mill-Bank Ewropew tal-Investiment. Meħudin flimkien, it-tliet pilastri tal-Mekkaniżmu ta' Tranżizzjoni Ġusta huma mistennija li jimmobilizzaw sa EUR 150 biljun f’investimenti biex jiżguraw li ħadd ma jitħalla lura fit-tranżizzjoni ekoloġika.

Iż-żoni rurali se jkollhom rwol vitali x’jaqdu biex jimplimentaw it-tranżizzjoni ekoloġika u biex jintlaħqu l-miri klimatiċi u ambjentali ambizzjużi tal-Ewropa. Il-Kummissjoni qed tipproponi li jissaħħaħ il-baġit għall-Fond Agrikolu Ewropew għall-Iżvilupp Rurali b’EUR 15 biljun biex jappoġġa lill-bdiewa u liż-żoni rurali biex jagħmlu t-tibdil strutturali meħtieġ għall-implimentazzjoni tal-Patt Ekoloġiku Ewropew, u b’mod partikolari biex tappoġġa l-kisba tal-miri ambizzjużi fl-istrateġiji tal-bijodiversità u “Mill-Għalqa sal-Platt”.

2)Inqajmu l-ekonomija u ngħinu biex l-investiment privat jerġa’ jibda jiċċaqlaq

Il-Kummissjoni għalhekk qed tipproponi Strument ta’ Appoġġ għas-Solvenza ġdid biex jgħin fil-mobilizzazzjoni ta’ riżorsi privati biex jipprovdu appoġġ urġenti lil kumpaniji Ewropej li normalment ikunu vijabbli biex jindirizzaw tħassib ta’ likwidità u ta’ solvenza. L-istrument se jkun temporanju u mmirat unikament u strettament biex jiġi indirizzat l-impatt ekonomiku tal-pandemija. Se jgħin biex jiġu evitati defiċits massivi ta’ kapital u inadempjenzi possibbli ta’ kumpaniji li normalment ikunu vijabbli u l-ħsara ekonomika kbira li dawn jikkawżaw. Dawn il-miżuri b’azzjoni rapida se jiġu kkomplementati minn appoġġ aktar fit-tul taħt programmi bħal InvestEU, il-politika ta' koeżjoni u l-programm għas-suq uniku.

L-istrument temporanju l-ġdid se jinħoloq taħt il-FEIS. Se jimmobilizza l-investiment privat f’kumpaniji li għaddejjin mill-inkwiet billi jipprovdi garanziji parzjali kontra t-telf. Bi provvediment fil-baġit tal-UE ta’ EUR 5 biljun mill-qafas finanzjarju attwali fl-2020 biex jiżgura bidu rapidu u EUR 26 biljun addizzjonali minn Next Generation EU, il-baġit tal-Unjoni se jipprovdi garanzija ta’ madwar EUR 75 biljun lill-Grupp tal-Bank Ewropew tal-Investiment, li se jiżgura twettiq rapidu fuq il-post. L-istrument se jkollu l-mira ta’ livell ta’ investiment ta’ EUR 300 biljun f’appoġġ għas-solvenza.

Il-garanzija se tiġi kalibrata biex tiżgura li l-investimenti jiġu mmirati lil dawk il-kumpaniji li għandhom l-akbar ħtieġa ta’ kapital fl-Istati Membri u s-setturi kollha, b’enfasi partikolari fuq l-Istati Membri li huma anqas kapaċi jintervjenu permezz tal-għajnuna mill-istat u fuq l-Istati Membri u s-setturi li fihom l-effetti ekonomiċi tal-COVID-19 kienu l-aktar serji. Dan huwa essenzjali biex jinżammu kundizzjonijiet ekwivalenti ta' kompetizzjoni fis-suq uniku u biex jiġi evitat li jkomplu jikbru d-diverġenzi ekonomiċi dannużi fl-Unjoni. Jenħtieġ li titqies bir-reqqa s-sitwazzjoni kapitali tal-istituzzjonijiet li jimplimentaw l-Istrument ta’ Appoġġ għas-Solvenza.

Barra minn hekk, bħala miżura komplementari, il-kapital tal-Fond Ewropew tal-Investiment se jiżdied biex jipprovdi appoġġ lil firxa wiesgħa ta’ intrapriżi żgħar u medji, inkluż permezz tal-implimentazzjoni tal-Istrument ta’ Appoġġ għas-Solvenza. Dan se jkompli jżid mal-bini ta’ pakkett komprensiv għall-irkupru Ewropew, ukoll flimkien mal-miżuri miftiehma mill-Kunsill Ewropew f’April. Iż-żieda kapitali li se tasal sa EUR 1,5 biljun se tiġi ffinanzjata kemm taħt il-qafas finanzjarju pluriennali preżenti kif ukoll dak li jmiss.

ØKapaċità tal-investiment u awtonomija strateġika msaħħa

L-investiment privat se jintlaqat ħafna mill-kriżi: l-analiżi tal-Kummissjoni tissuġġerixxi li l-investiment tas-settur privat jista’ jonqos b’aktar minn EUR 1 triljun fl-2020–2021. Biex jiġu ssodisfati l-ħtiġijiet ta’ investiment tal-ekonomija Ewropea se jkun hemm bżonn azzjoni urġenti biex din ix-xejra titreġġa’ lura u tqiegħed il-kundizzjonijiet meħtieġa għal irkupru mmexxi mill-investiment. Dan l-investiment huwa partikolarment kruċjali għas-suċċess tat-tranżizzjonijiet ekoloġiċi u diġitali tal-Ewropa, fejn il-Kummissjoni tistma li l-ħtiġijiet tal-investiment jammontaw għal mill-inqas EUR 1,2 triljun fl-istess perjodu. L-investiment fis-setturi u t-teknoloġiji ewlenin, mill-5G sal-intelliġenza artifiċjali, mill-idroġenu nadif għall-enerġija rinnovabbli offshore, huwa l-muftieħ għall-ġejjieni tal-Ewropa.

Il-programm InvestEU huwa uniku f’kemm jista’ jimmobilizza l-investiment u jappoġġa l-politiki tal-Unjoni tul l-irkupru minn kriżi ekonomika profonda. Dan ġie muri sew mill-esperjenza fl-implimentazzjoni tal-Fond Ewropew għall-Investimenti Strateġiċi u l-istrumenti finanzjarji wara l-kriżi finanzjarja li għaddiet.

Il-Kummissjoni għaldaqstant qed tipproponi li InvestEU tissaħħaħ għal livell ta’ EUR 15,3 biljun għall-erba’ twieqi ta’ politika diġà maqbula mill-koleġiżlaturi. Dan jista’ jiskatta investiment ta’ aktar minn EUR 240 biljun.

L-InvestEU se jipprovdi appoġġ kruċjali għal kumpaniji fil-fażi tal-irkupru u jiżgura enfasi qawwija fost l-investituri fuq il-prijoritajiet ta’ politika fi żmien medju u fit-tul, b’mod partikolari l-Patt Ekoloġiku Ewropew u d-diġitalizzazzjoni. Se jżid il-kapaċità ta’ teħid ta’ riskji tal-Grupp tal-Bank Ewropew tal-Investiment u l-Banek Promozzjonali Nazzjonali b’appoġġ għall-irkupru ekonomiku. Billi jimmobilizza investiment privat sinifikanti, se jikkomplementa l-appoġġ immedjat ipprovdut tul il-fażi tat-tiswija tal-kriżi mill-Istrument ta’ Appoġġ għas-Solvenza u REACT-EU, u l-finanzjament skont il-qafas futur mill-politika ta’ koeżjoni u programmi oħrajn.

Ninvestu fl-awtonomija strateġika: Faċilità għall-Investiment Strateġiku ġdida

Karatteristika ewlenija tal-InvestEU se tkun faċilità ġdida biex iżżid ir-reżiljenza tal-Ewropa billi tinbena l-awtonomija strateġika fi ktajjen tal-valur essenzjali fil-livell Ewropew.

Se tinħoloq Faċilità għall-Investiment Strateġiku bħala tieqa addizzjonali taħt InvestEU. Din il-faċilità se tappoġġa proġetti li jikkontribwixxu għall-bini ta’ ktajjen tal-valur b'saħħithom u reżiljenti madwar l-UE u jsaħħu l-awtonomija tas-suq uniku tal-Unjoni, filwaqt li żżomm il-ftuħ tagħha għall-kompetizzjoni u l-kummerċ f’konformità mar-regoli tagħha. Dan se jsaħħaħ ir-reżiljenza tal-ekonomija tal-Unjoni filwaqt li tipprovdi r-riżorsi għal kumpaniji strateġikament importanti biex jiffjorixxu u jikbru fl-UE. L-appoġġ mill-Istati Membri għal dawn il-proġetti aktarx li mhux se jkun biżżejjed u d-dimensjoni transfruntiera qawwija tfisser li approċċ koordinat Ewropew se jkun essenzjali għas-suċċess.

3)Nitgħallmu mill-kriżi u nindirizzaw l-isfidi strateġiċi tal-Ewropa

ØProgrammi ġodda u msaħħa biex tinbena r-reżiljenza u tissaħħaħ il-kooperazzjoni

Next Generation EU se jipprovdi tisħiħ immirat għal programmi ewlenin li jmexxu t-tkabbir u l-kapaċità tal-Ewropa li tirreżisti u tegħleb kriżijiet futuri. Dawn iż-żidiet huma addizzjonali għall-proposti inizjali tal-Kummissjoni għall-qafas futur, li jibqgħu bażi ġusta u bbilanċjata għal ftehim.

Programm ġdid għat-tisħiħ tas-sigurtà u l-kooperazzjoni fil-qasam tas-saħħa.

Il-kriżi wriet li l-finanzjament għas-saħħa għandu jingħata prijorità ogħla fil-qafas finanzjarju futur. Il-Kummissjoni qed tipproponi programm ambizzjuż u indipendenti l-UE għas-Saħħa li jipprovdi appoġġ dedikat għall-isfidi tas-saħħa li ġejjin kif identifikat fil-valutazzjoni tal-ħtiġijiet. Skont din il-proposta, il-finanzjament għall-programm il-ġdid se jammonta għal EUR 9,4 biljun, tisħiħ kbir meta mqabbel mal-proposti preċedenti taħt il-Fond Soċjali Ewropew Plus.

Il-programm il-ġdid se jgħin biex jiġi żgurat li l-Unjoni tkun mgħammra bil-kapaċitajiet kritiċi li tirreaġixxi malajr għall-kriżijiet tas-saħħa futuri u bl-iskala meħtieġa. Il-programm se jkollu l-għan li joħloq qafas komprensiv għall-prevenzjoni, it-tħejjija u r-rispons għall-kriżijiet tas-saħħa fl-UE, li jikkumplimenta u jsaħħaħ l-isforzi fuq livell nazzjonali u l-appoġġ reġjonali għas-sistemi tal-kura tas-saħħa taħt il-politika ta’ koeżjoni. 

L-ewwel parti tal-programm se tindirizza s-sigurtà tas-saħħa u t-tħejjija għall-kriżijiet. Se tappoġġa l-investimenti f’infrastruttura tas-saħħa kritika, għodda, strutturi, proċessi, u kapaċità tal-laboratorji, inklużi għodod għas-sorveljanza, l-immudellar, it-tbassir, il-prevenzjoni u l-ġestjoni ta’ tifqigħat. Se tappoġġa l-istabbiliment ta’ mekkaniżmu għall-iżvilupp, l-akkwist u l-ġestjoni ta’ prodotti rilevanti għall-kriżijiet tas-saħħa bħall-mediċini - inkluż it-tilqim - u t-trattamenti, is-sustanzi intermedji tagħhom, l-ingredjenti farmaċewtiċi attivi u l-materja prima; apparat mediku u tagħmir mediku bħal ventilaturi, ilbies u tagħmir protettiv, materjali u għodod dijanjostiċi. Dan se jgħin biex jinħoloq qafas ġdid ta’ komunikazzjoni tar-riskju fl-UE li jkopri l-fażijiet kollha ta’ kriżi.

It-tieni parti se tappoġġa viżjoni aktar fit-tul għat-titjib tal-eżiti tas-saħħa permezz ta’ sistemi tas-saħħa effiċjenti u inklużivi fl-Istati Membri, permezz ta’ prevenzjoni u sorveljanza aħjar tal-mard, il-promozzjoni tas-saħħa, l-aċċess, id-dijanjożi u t-trattament, u l-kollaborazzjoni transfruntiera fis-saħħa. Pereżempju, il-programm se jappoġġa l-bini ta’ kapaċità fl-Istati Membri, jiffinanzja programmi ta’ taħriġ għall-persunal mediku u tal-kura tas-saħħa, u jinvesti fit-trasformazzjoni diġitali tas-settur tal-kura tas-saħħa u l-iskjerament ta’ infrastrutturi diġitali interoperabbli, inkluż għar-riċerka u l-kondiviżjoni tad-data.

Il-programm se jkun imfassal u implimentat b’rispett sħiħ għad-diviżjoni tal-kompetenzi bejn l-Unjoni u l-Istati Membri f’dan il-qasam. Dan se jorbot mal-appoġġ rilevanti pprovdut permezz ta' programmi oħra tal-UE u jistabbilixxi modi ġodda biex jiġu implimentati azzjonijiet konġunti u tiġi żgurata d-disponibbiltà ta’ kontromiżuri u riżorsi mediċi f’każ ta’ theddid kbir għas-saħħa. Se jaħdem ma’ rescEU msaħħaħ, li huwa ffukat fuq il-kapaċitajiet ta’ rispons dirett għall-kriżijiet, il-ħażniet, l-iskjerament u d-dispaċċ ta’ tagħmir u persunal f’sitwazzjonijiet ta’ emerġenza, billi jiġu pprovduti l-kontribuzzjonijiet tas-saħħa meħtieġa.

It-tisħiħ tal-kapaċità ta’ rispons tal-mekkaniżmu ta’ protezzjoni ċivili tal-Unjoni.

Lezzjoni ċara mill-pandemija hija li l-Ewropa trid tkun kapaċi tirreaġixxi aktar malajr u b’mod flessibbli fi kriżijiet transfruntieri serji minħabba l-iskala tat-tfixkil potenzjali għall-ekonomiji u s-soċjetajiet tagħna. Għaldaqstant il-Kummissjoni qed tipproponi li ssaħħaħ lil rescEU, il-mekkaniżmu tal-protezzjoni ċivili tal-Unjoni. Dan se jagħmel lil rescEU aktar flessibbli u jżid il-kapaċità tal-Unjoni li taġixxi b’mod unitarju fil-livell tal-UE.

L-allokazzjoni finanzjarja se tiżdied għal EUR 3,1 biljun, li tiffinanzja investimenti fl-infrastruttura ta’ rispons, fil-kapaċità tat-trasport u f’timijiet ta’ appoġġ ta’ emerġenza. Ir-rescEU aġġornat se jagħti lill-Unjoni l-kapaċità u l-infrastruttura loġistika meħtieġa biex tipprovdi għal tipi differenti ta’ emerġenza, inklużi dawk b’komponent mediku, li jikkumplimentaw il-programm il-ġdid l-UE għas-Saħħa. Il-proposta se tissimplifika wkoll u żżid il-flessibbiltà tal-kapaċitajiet operazzjonali. Dan se jiżgura rispons tal-UE aktar f’waqtu u effettiv fil-futur għal emerġenzi fuq skala kbira.

Orizzont Ewropa – ninvestu fl-innovazzjoni u t-tħejjija għall-futur

Orizzont Ewropa se jammonta għal EUR 94,4 biljun biex jiżdied l-appoġġ Ewropew għall-attivitajiet ta’ riċerka u innovazzjoni relatati mas-saħħa u l-klima. Dan se jikkontribwixxi għal tħejjija msaħħa biex jiġu indirizzati b’mod effettiv u rapidu l-emerġenzi u l-investiment f’soluzzjonijiet xprunati mix-xjenza, li jikkumplimentaw il-finanzjament operazzjonali pprovdut bil-programm il-ġdid l-UE għas-Saħħa u rescEU.

Fil-qasam tas-saħħa, it-tisħiħ se jintuża biex jiżdied l-isforz tar-riċerka għal sfidi bħalma huma l-pandemija tal-Coronavirus, l-estensjoni tal-provi kliniċi, il-miżuri protettivi innovattivi, il-viroloġija, it-tilqim, it-trattamenti u d-dijanjostiċi, u t-traduzzjoni tas-sejbiet tar-riċerka f’miżuri ta’ politika tas-saħħa pubblika.

Qed jiġi propost ukoll li jiżdiedu r-riżorsi għar-riċerka u l-innovazzjoni f’oqsma relatati mal-klima. Dan se jsaħħaħ l-appoġġ għall-kompetittività tal-industrija tal-UE f’setturi ekonomiċi relatati u jippromwovi rkupru konsistenti mal-għanijiet tal-Patt Ekoloġiku Ewropew. It-tisħiħ se jipprovdi mezzi addizzjonali għal innovazzjonijiet emerġenti u rivoluzzjonarji minn intrapriżi żgħar u ta’ daqs medju, negozji ġodda, u kumpaniji b’kapitalizzazzjoni medja.

Flimkien mas-sħab globali tagħna fi żmien ta’ kriżi.

Il-pandemija hija sfida dinjija. Mingħajr rispons dinji, kull pajjiż u reġjun fid-dinja, inkluża l-Unjoni, se jibqa’ vulnerabbli. L-UE trid tkompli turi solidarjetà mas-sħab tagħha madwar id-dinja fil-ġlieda kontra l-COVID-19.

Il-Kummissjoni tipproponi li tistabbilixxi l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali għal EUR 86 biljun, permezz ta’ Garanzija għall-Azzjoni Esterna ġdida, u l-Fond Ewropew għall-Iżvilupp Sostenibbli biex jiġu appoġġati s-sħab – b’mod partikolari fil-Balkani tal-Punent, il-Viċinat u fil-bqija tal-Afrika – fl-isforzi tagħhom biex jiġġieldu u jirkupraw mill-impatt tal-pandemija, f’kooperazzjoni mas-sħab internazzjonali bħalma huma l-istituzzjonijiet finanzjarji internazzjonali, in-Nazzjonijiet Uniti u l-Organizzazzjoni Dinjija tas-Saħħa. Aġġustament immirat għall-qafas finanzjarju attwali se jippermetti li EUR 1 biljun ta’ appoġġ addizzjonali jkunu diġà disponibbli fl-2020.

L-appoġġ se jipprovdi likwidità lil intrapriżi żgħar u ta’ daqs medju, jippreserva l-investimenti fi proġetti tal-enerġija rinnovabbli, u jżid il-kapaċità ta’ finanzjament f’muniti lokali f’pajjiżi sħab biex jissaħħu s-sistemi tal-kura tas-saħħa, inkluż l-istat ta’ tħejjija, u biex tinbena l-kapaċità ta’ manifattura għal tilqim, trattamenti u dijanjostika relatati mal-COVID‑19. Dan l-appoġġ akbar se jkun immirat ukoll lejn l-aktar pajjiżi u reġjuni vulnerabbli, filwaqt li jindirizza l-konsegwenzi soċjali u ekonomiċi severi tal-pandemija.

Il-Kummissjoni tipproponi wkoll EUR 5 biljun addizzjonali biex issaħħaħ l-istrument tal-għajnuna umanitarja, li jirrifletti l-ħtiġijiet umanitarji li qed jikbru fl-aktar partijiet vulnerabbli tad-dinja. L-impatt tal-pandemija u l-effett ekonomiku, pereżempju t-telf ta’ dħul minħabba l-kollass taż-żejt u l-prezzijiet tal-materja prima u t-tnaqqis drastiku fir-rimessi, qed iżidu l-ħtiġijiet eżistenti, u dan jagħmilha aktar importanti li l-Unjoni tkun mgħammra biex turi solidarjetà mal-bqija tad-dinja.

ØNgħammru programmi oħra għall-bini ta’ reżiljenza u twettiq ta’ prijoritajiet strateġiċi

ØGħodod ta’ emerġenza aktar flessibbli

3.Kif nagħmluha realtà: Next Generation EU

Il-biċċa l-kbira tal-miżuri ta’ rkupru proposti se jiġu mħaddma minn strument ta’ rkupru temporanju ġdid Next Generation EU b’qawwa finanzjarja ta’ EUR 750 biljun. L-istrument se jkun mekkaniżmu ta’ emerġenza eċċezzjonali u temporanju. Il-finanzjament se jkun possibbli permezz tad-Deċiżjoni dwar ir-Riżorsi Proprji, li se tippermetti lill-Kummissjoni biex tissellef sa EUR 750 biljun f’isem l-Unjoni, għal miżuri matul il-perjodu 2021-2024.

Biex tipprovdi l-kapaċità baġitarja meħtieġa biex jiġu akkomodati r-responsabbiltajiet potenzjali relatati mal-finanzjament ta’ Next Generation EU u skont ir-rekwiżiti ta’ dixxiplina baġitarja, id-Deċiżjoni riveduta dwar ir-Riżorsi Proprji se tinkludi żieda eċċezzjonali u temporanja tal-limiti massimi tar-riżorsi proprji għall-impenji u l-pagamenti b’0,6 % tal-introjtu nazzjonali gross tal-UE. L-espansjoni tal-limiti massimi se tintuża biss għall-fini li jiġu indirizzati l-ħtiġijiet ta’ kriżi tal-COVID 19 u limitata għat-tul meħtieġ biex jiġu koperti dawn l-obbligazzjonijiet.

L-iskala ta’ Next Generation EU u t-tfassil tiegħu jirriflettu l-kobor u l-urġenza tal-isfidi li qed tiffaċċja l-Unjoni. Il-ħtiġijiet ta’ finanzjament għal investimenti urġenti li jqumu wara l-kriżi huma bla preċedent. Rispons deċiżiv u straordinarju fil-livell tal-Unjoni huwa għalhekk meħtieġ. In-natura mingħajr preċedent ta’ din l-operazzjoni u l-ammont eċċezzjonali ta’ dawk il-fondi jeħtieġu li jankraw fis-sistema tar-riżorsi proprji, li hija approvata mill-Istati Membri kollha skont ir-rekwiżiti kostituzzjonali tagħhom. 

Appoġġ addizzjonali ffinanzjat permezz ta’ kontribuzzjonijiet nazzjonali miżjuda immedjatament wara l-kriżi jkompli jżid il-pressjoni fuq il-baġits nazzjonali. F’dawn iċ-ċirkustanzi straordinarji, huwa kompletament iġġustifikat li jintuża mekkaniżmu ta’ finanzjament li jipprovdi spinta ta’ nfiq sinifikanti u f’waqtha mingħajr ma jiżdiedu d-djun nazzjonali, bħala espressjoni ta’ solidarjetà fi skala proporzjonata mal-kriżi.

Is-self se jibni fuq ir-rekord b’saħħtu tal-Unjoni tal-użu ta’ strumenti bbażati fuq is-suq biex jiġu appoġġati l-investiment u r-riformi fl-Istati Membri. L-Unjoni se tissellef fuq il-bażi tas-swieq finanzjarji b’kundizzjonijiet li jirriflettu l-klassifikazzjoni tal-kreditu għolja ħafna tagħha u tidderieġi dawn il-fondi malajr sa fejn ikunu l-aktar meħtieġa.

Għal dan il-għan, il-Kummissjoni se toħroġ bonds b’maturitajiet differenti fis-swieq kapitali, billi tagħmel l-aħjar użu mill-kapaċità ta’ dawn is-swieq biex jassorbu tali bonds filwaqt li tiżgura l-inqas kost medju tas-self. Strateġija ta’ finanzjament diversifikata bħal din tippermetti lill-Kummissjoni twettaq operazzjonijiet ta’ self b’mod l-aktar adattat għall-iskala tal-operazzjonijiet u l-ambjent prevalenti tas-suq.

EUR 500 biljun mill-fondi allokati permezz ta’ Next Generation EU se jintużaw biex jiffinanzjaw il-komponent ta’ għotja tal-Faċilità għall-Irkupru u r-Reżiljenza u jsaħħu l-programmi ewlenin oħra ta’ kriżi u rkupru. Il-bqija tal-finanzjament mobilizzat permezz tal-istrument ta’ EUR 250 biljun se jsir disponibbli għall-Istati Membri fil-forma ta’ self permezz tal-Faċilità għall-Irkupru u r-Reżiljenza.

Il-fondi miġbura se jitħallsu lura wara l-2027 u sa mhux aktar tard mill-2058. Dan se jgħin biex tittaffa l-pressjoni fuq il-baġits tal-Istati Membri fi żmien meta l-finanzi pubbliċi huma taħt pressjoni qawwija, filwaqt li jiġi żgurat li l-obbligi kollha li jirriżultaw minn dan il-ħruġ ta’ dejn se jiġu onorati minn baġits futuri tal-UE. Biex tiffaċilita l-ħlas lura tal-finanzi tas-suq miġbura u tgħin aktar tnaqqas il-pressjoni fuq il-baġits nazzjonali, il-Kummissjoni se tipproponi riżorsi proprji ġodda addizzjonali fi stadju aktar tard tal-perjodu finanzjarju.

Il-flussi ta’ dħul u ta’ pagament kollha bbażati fuq Next Generation EU se jkunu addizzjonali għall-approprjazzjonijiet allokati matul il-proċedura baġitarja annwali, u għaldaqstant mhux se jkollhom impatt fuq il-bilanċ baġitarju. Dawn il-flussi, inkluż l-imgħax imħallas, se jintwerew b’mod distint fil-baġit biex juru l-karattru temporanju u eċċezzjonali tagħhom u biex jipprovdu trasparenza sħiħa 9 .

Barra minn hekk, l-impatt ekonomiku tal-pandemija tal-Coronavirus jenfasizza l-importanza li jiġi żgurat biżżejjed spazju fiskali għall-Unjoni f’każijiet ta’ xokkijiet ekonomiċi li jwasslu għal tnaqqis fl-introjtu nazzjonali gross. Sabiex jiġi ppreservat marġni suffiċjenti skont il-limiti massimi tar-riżorsi proprji għall-Unjoni biex tkopri l-obbligi finanzjarji u l-obbligazzjonijiet kontinġenti tagħha li jkunu dovuti f’sena partikolari, anki taħt l-aktar żviluppi ekonomiċi negattivi, il-Kummissjoni tipproponi li żżid il-limiti massimi tar-riżorsi proprji fuq bażi permanenti għal 1,46 % tal-introjtu nazzjonali gross tal-UE għall-impenji u għal 1,40 % għall-pagamenti.

4.Konklużjoni – it-triq lejn ftehim rapidu dwar baġit ambizzjuż għall-irkupru Ewropew

Is-suċċess tal-pjan ta’ rkupru se jiddependi mhux biss fuq l-iskala u l-ambizzjoni tagħha, iżda wkoll fuq il-ħeffa tal-azzjoni u l-abbiltà li tiġi aġġustata r-reazzjoni fid-dawl tal-iżviluppi. Hemm bżonn urġenti ta’ appoġġ finanzjarju f’ħafna partijiet tal-Unjoni biex in-negozji jibqgħu f’wiċċ l-ilma u jiġu appoġġati dawk li l-aktar għandhom bżonn. Fadal ukoll ftit żmien biex jintlaħaq qbil dwar il-qafas fit-tul – iżda għadu mhux tard wisq. Ftehim rapidu se jippermetti li l-programmi msaħħa jiġu mnedija fil-ħin.

Il-Kummissjoni tikkondividi d-determinazzjoni tal-Parlament Ewropew li jiżgura li jkun hemm tranżizzjoni bla xkiel għall-qafas fit-tul il-ġdid. Madankollu, l-estensjoni tal-qafas attwali mhuwiex sostitut għal ftehim komprensiv dwar baġit fit-tul ġdid u modern. Dan huwa l-uniku mod biex l-Unjoni tiġi mgħammra bil-programmi u l-għodod ġodda li se jkunu essenzjali biex jitwettaq il-pjan ta’ rkupru. Għaldaqstant jenħtieġ li l-fokus sħiħ u indiviż tal-ħidma interistituzzjonali fil-ġimgħat li ġejjin ikun fuq il-finalizzazzjoni ta’ Next Generation EU u l-qafas fit-tul il-ġdid.

Il-Kummissjoni Ewropea tistieden lill-Kunsill Ewropew u lill-koleġiżlaturi biex jeżaminaw malajr dawn il-proposti, bil-ħsieb li jintlaħaq qbil politiku fil-livell tal-Kunsill Ewropew sa Lulju. 

Deċiżjoni bikrija dwar il-proposta biex jiġi emendat il-qafas attwali se tippermetti finanzjament addizzjonali li għandu jsir immedjatament disponibbli għal REACT-EU, l-Istrument ta’ Appoġġ tas-Solvenza u l-Fond Ewropew għall-Iżvilupp Sostenibbli, li jirrifletti l-urġenza ta’ dawn il-ħtiġijiet.

Il-Kummissjoni imbagħad se taħdem mill-qrib mal-Parlament Ewropew u mal-Kunsill biex tiffinalizza ftehim dwar il-qafas futur fit-tul u l-programmi settorjali li jakkumpanjawha. It-tlestija ta’ dan ix-xogħol fil-bidu tal-ħarifa tfisser li l-baġit il-ġdid fit-tul jista’ jkun operattiv u jmexxi l-irkupru tal-Ewropa fl-1 ta’ Jannar 2021.

Azzjoni issa se turi li l-Unjoni hija lesta li tagħmel dak kollu li hu meħtieġ biex l-ekonomija terġa’ lura fi triqtha, biex tipproteġi l-għajxien tal-Ewropej kollha, u biex tinvesti fit-tranżizzjoni fit-tul tal-Ewropa għal futur aktar ġust, aktar ekoloġiku u diġitali.

EUR biljuni, prezzijiet tal-2018

(1)      COM(2020) 456.

(2)      SWD(2020) 98.

(3)      Sakemm ma jkunx indikat mod ieħor, l-ammonti huma espressi fi prezzijiet kostanti tal-2018.

(4)      Fuq il-bażi ta’ suppożizzjoni konservattiva dwar il-multiplikaturi mistennija u r-riżultati miksuba minn strumenti kumparabbli. Madankollu, l-akkuratezza tal-multiplikaturi mistennija tista’ tiġi affettwata mill-volatilità tas-sitwazzjoni ekonomika attwali.

(5)     Riżoluzzjoni tal-Parlament Ewropew tas-17 ta' April 2020 dwar azzjoni koordinata tal-UE biex tikkumbatti l-pandemija tal-COVID-19 u l-konsegwenzi tagħha, riaffermata mir-Riżoluzzjoni tal-Parlament Ewropew tal-15 ta' Mejju 2020 dwar il-qafas finanzjarju pluriennali l-ġdid, ir-riżorsi proprji u l-pjan ta’ rkupru.

(6)      Konklużjonijiet tal-President tal-Kunsill Ewropew wara l-vidjokonferenza tal-Membri tal-Kunsill Ewropew, 23 ta' April 2020.

(7)      EUR 1,25 biljun minn rimborżi minn strumenti finanzjarji preċedenti u EUR 250 miljun mill-baġit.

(8)      COM(2020) 22, COM(2020) 23.

(9)      Il-kostijiet tas-self għall-komponent ta’ għotja ta’ Next Generation EU se jitħallsu mill-baġit tal-UE. Huwa stmat li dawn il-kostijiet se jammontaw għal EUR 17,4 biljun matul il-qafas finanzjarju 2021-2027.

IL-KUMMISSJONI EWROPEA

Brussell, 27.5.2020

COM(2020) 442 final

ANNESSI

tal-

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

Il-baġit tal-UE jmexxi l-pjan ta’ rkupru għall-Ewropa

FAĊILITÀ GĦALL-IRKUPRU U R-REŻILJENZA
	Objettiv: Appoġġ għal investimenti u riformi biex l-ekonomiji tal-UE jsiru aktar reżiljenti u jitrawwem it-tkabbir sostenibbli
	Mekkaniżmu: Għotjiet u self

Ħtiġijiet tal-kriżi u impatt mistenni

Implimentazzjoni

Kumplimentarjetà mal-UE u politiki nazzjonali

Aspetti Finali

ASSISTENZA TA’ RKUPRU GĦALL-KOEŻJONI U T-TERRITORJI TAL-EWROPA (REACT -EU)
	Objettiv: Investiment f’azzjonijiet ta’ riabilitazzjoni għall-kriżi fuq żmien qasir
	Mekkaniżmu: Prinċipalment għotjiet

Ħtiġijiet tal-kriżi u impatt mistenni

Implimentazzjoni

Kumplimentarjetà mal-UE u politiki nazzjonali

Aspetti Finali

INVEST EU (INKLUŻA FAĊILITÀ TA' INVESTIMENT STRATEĠIKU)
	Objettiv: L-immobilizzar tal-investiment biex jappoġġa l-irkupru u t-tkabbir fuq żmien twil, inkluża faċilità ġdida biex tippromwovi l-investimenti f’katini tal-valur Ewropej Strateġiċi
	Mekkaniżmu: Proviżjonament għall-garanzija tal-baġit

Ħtiġijiet tal-kriżi u impatt mistenni

Implimentazzjoni

Kumplimentarjetà mal-UE u politiki nazzjonali

Aspetti Finali

STRUMENT TA’ APPOĠĠ GĦAS-SOLVENZA
	Objettiv: L-immobilizzar ta’ investiment privat biex jipprovdi appoġġ għas-solvenza lill-kumpaniji vijabbli milquta mill-kriżi
	Mekkaniżmu: Proviżjonament għall-garanzija tal-baġit

Ħtiġijiet tal-kriżi u impatt mistenni

Implimentazzjoni

Kumplimentarjetà mal-UE u politiki nazzjonali

Aspetti Finali

Pakkett finanzjarju ta’ EUR 31 biljun se jżid il-garanzija tal-UE fil-qafas finanzjarju kurrenti b’EUR 66 biljun. Din il-garanzija se tippermetti l-immobilizzar ta’ madwar EUR 300 biljun, diġà mill-2020.

PROGRAMM L-UE GĦAS-SAĦĦA
	Objettiv: Investimenti fis-sigurtà tas-saħħa u r-reżiljenza tas-sistemi tas-saħħa
	Mekkaniżmu: Għotjiet u akkwist

Ħtiġijiet tal-kriżi u impatt mistenni

ØBarra minn hekk, inizjattivi speċifiċi ambizzjużi jistgħu pereżempju jiffukaw fuq l-eradikazzjoni ta’ mard speċifiku, bħat-tnaqqis ta’ każijiet tal-kanċer ċervikali u l-influwenza staġonali. Dawn jgħinu biex tiġi evitata ħsara li tista’ tiġi evitata u spejjeż li jistgħu jiġu evitati, u biex jitnaqqsu l-inugwaljanzi fis-settur tas-saħħa.

Implimentazzjoni

ØIl-programm se jiżgura investimenti sostnuti fl-istrutturi u l-għodod meħtieġa għal appoġġ operazzjonali fl-UE biex jiġu indirizzati l-kriżijiet tas-saħħa, l-indirizzar tal-prevenzjoni, it-tħejjija u r-rispons, u l-appoġġ għal koordinazzjoni transsettorjali ġenwina fil-livell tal-UE. Il-ħidma se titwettaq b’kollaborazzjoni mill-qrib mal-ECDC, l-EMA, l-EFSA jew l-ECHA, gruppi ta’ esperti u laboratorji ta’ referenza tal-UE kif ukoll ma’ korpi internazzjonali bħall-Organizzazzjoni Dinjija tas-Saħħa.

ØFuq il-bażi tal-parir xjentifiku, il-programm l-UE għas-Saħħa se jiżgura l-akkwist strateġiku għal oġġetti bħal bijoċidi (diżinfettanti), reaġenti għall-ittestjar, tagħmir protettiv, mediċini essenzjali, tagħmir mediku, reaġenti dijanjostiċi (pereż. appoġġ għat-teħid tan-nifs, CT scanners) u oġġetti rilevanti oħra (bħal materjal ta’ injezzjoni u faxex sterili). Se jkollu l-għan li jistabbilixxi provvista f’waqtha ta’ kontromiżuri xierqa għal mard ewlieni li jittieħed, disponibbli meta meħtieġ għall-Istati Membri. Il-programm se jipprovdi wkoll inċentivi għall-iżvilupp, il-produzzjoni u l-użu ta’ vaċċini fl-Unjoni u biex titnieda mill-ġdid il-produzzjoni tal-UE ta’ mediċini u ta’ ingredjenti farmaċewtiċi / prekursuri attivi.

ØIl-programm il-ġdid se jappoġġa l-isforzi tar-rescEU biex jissaħħaħ il-Korp Mediku Ewropew billi jissussidja gruppi ta’ esperti permanenti. Filwaqt li jibni fuq l-esperjenza mill-qasam veterinarju, se jissussidja esperti tas-saħħa u l-loġistika u, fejn rilevanti, persunal mediku li jista’ jiġi attivat fi kwalunkwe mument u jintbagħtu madwar l-UE biex jipprovdi pariri u għarfien espert. It-timijiet se jkunu appoġġati b’tagħmir (pereż. laboratorji mobbli).

ØIl-programm se jappoġġa wkoll il-koordinazzjoni bejn l-infrastrutturi tal-kura tas-saħħa u l-kapaċità tal-laboratorji mediċi u veterinarji madwar l-Unjoni, fosthom it-tħejjijiet għall-istabbiliment ta’ infrastruttura Ewropea għall-iskambju ta’ informazzjoni dwar possibbiltajiet ta’ kura kritika. Il-programm se jistabbilixxi sistema sempliċi biex tappoġġa l-akkwist konġunt transfruntier ta’ prodotti, għodod u servizzi li juru valur miżjud ċar tal-UE għall-kollaborazzjoni tas-sistemi tas-saħħa.

ØIl-programm l-UE għas-Saħħa se jgħin biex jitwarrab finanzjament għal interventi ewlenin fis-Saħħa elettronika flimkien ma’ finanzjament fil-Programm Ewropa Diġitali, inkluż l-appoġġ tal-użu ta’ data għall-kura tas-saħħa, ir-riċerka u t-tfassil tal-politika (fil-kuntest tal-Ispazju tad-Data Ewropea dwar is-Saħħa) permezz ta’ clouds jew infrastrutturi oħra u teknoloġiji intensivi tad-data bħal għodod ta’ intelliġenza artifiċjali. Se jappoġġa l-użu akbar tat-telesaħħa, inkluż l-użu u t-tisħiħ tal-mudell tat-telemediċina ta’ Networks ta’ Referenza Ewropej. Se jgħin biex jiġu żviluppati punti ta’ riferiment Ewropej u soluzzjonijiet transnazzjonali.

ØIl-programm se jgħin fil-prevenzjoni ta’ mard, anki permezz ta’ appoġġ lill-Istati Membri fil-politiki tagħhom u fuq il-bażi tal-gwida teknika u għażliet politiċi b’saħħithom, dwar il-prevenzjoni u l-promozzjoni ta’ stil ta’ ħajja tajjeb għas-saħħa. Se jgħin fil-ġbir u l-kondiviżjoni xierqa ta’ sorsi ta’ data u intelligence disponibbli fis-servizzi, l-aġenziji tal-UE kif ukoll korpi nazzjonali u internazzjonali relatati mas-saħħa u jippromwovi l-aħjar prattiki bbażati fuq l-evidenza fil-prevenzjoni u l-ġestjoni ta’ mard.

ØL-azzjoni fuq il-prevenzjoni se tkun ibbażata fuq approċċ veru ta’ “Saħħa Waħda” għall-mard u se tinkludi l-bini ta’ għarfien u fehim tal-evoluzzjoni taż-żoonożi, u żoonożi potenzjali.

ØIl-programm se jappoġġa azzjonijiet li jtejbu l-prevenzjoni u l-kontroll tal-infezzjonijiet, li jittestjaw malajr u b’mod korrett għall-infezzjonijiet u li jiddijanjostikaw l-infezzjonijiet, li jittrattaw lill-pazjenti bl-użu tal-antimikrobiċi xierqa u li jnaqqsu l-użu mhux xieraq u perikoluż tal-antimikrobiċi fl-oqsma kollha. Komponent internazzjonali se jiżgura li l-politika tas-saħħa Ewropea tkun marbuta ma’ żviluppi internazzjonali u tikkomplementa b’mod utli l-azzjonijiet dwar kwistjonijiet ta’ tħassib reġjonali u globali.

Kumplimentarjetà mal-UE u politiki nazzjonali

ØIl-prinċipju ewlieni se jkun li l-programm il-ġdid se jkun il-katalizzatur għal approċċi ġodda mill-aħjar prattiki jew soluzzjonijiet innovattivi, jew riżultati ta’ proġetti ta’ riċerka billi jgħinhom jagħmlu proġetti pilota u jittestjawhom fil-livell tal-popolazzjoni suxxettibbli qabel l-introduzzjoni fuq skala sħiħa. Il-programm il-ġdid se jinteraġixxi wkoll mal-Faċilità għall-Irkupru u r-Reżiljenza. Filwaqt li l-Faċilità se tipprovdi inċentivi għal riformi ġodda, il-programm il-ġdid programm l-UE għas-Saħħa jista’ jappoġġa l-koordinazzjoni tal-implimentazzjoni madwar l-Istati Membri.

ØIl-komplementarjetà mal-outputs tal-aġenziji kkonċernati se tibbenefika minn investimenti minn dan il-programm, b’mod partikolari fid-dawl tat-trasferiment tal-aħjar prattiki, protokolli għas-sorveljanza jew programmi għall-bini tal-kapaċità.

Aspetti Finali

IL-MEKKANIŻMU TAL-UNJONI GĦALL-PROTEZZJONI ĊIVILI / rescEU
	Objettiv: It-tisħiħ tal-kapaċità ta’ rispons tal-mekkaniżmu tal-Unjoni għall-protezzjoni ċivili
	Mekkaniżmu: Għotjiet u akkwist

Ħtiġijiet tal-kriżi u impatt mistenni

·Takkwista, tikri, tieħu b’lokazzjoni u taħżen kapaċitajiet identifikati ta’ rescEU;

·Iddaħħal prodotti u persunal minn barra l-UE u tiskjerahom fl-UE;

·Tittrasporta malajr kemm jista’ jkun prodotti u persunal minn diversi punti madwar l-UE għal punti oħra fejn il-prodotti u l-persunal huma meħtieġa. Għarfien espert li jista’ jkun skjerat internazzjonalment għal kull tip ta’ diżastru (inklużi “esperti mediċi pronti” – tobba speċjalisti, infermiera, epidemjologi, intensivisti u timijiet mediċi ta’ emerġenza integrati mgħammra sew);

·Tittrasferixxi malajr vittmi ta’ diżastri/pazjenti għal fejn ikunu jistgħu jirċievu l-kura b’mod l-aktar effiċjenti meta l-kapaċitajiet lokali u nazzjonali ma jkunux jistgħu jlaħħqu. Infrastruttura bħal din se tinkludi sistema ta’ faċilitajiet ta’ kura disponibbli madwar l-Istati Membri.

Implimentazzjoni

ØL-UE se tkun tista’ takkwista direttament, tiffinanzja u tistabbilixxi kapaċitajiet strateġiċi adegwati ta’ rescEU, il-ħżin loġistiku u t-trasport loġistiku, kif ukoll infrastruttura ta’ ġestjoni ta’ informazzjoni ta’ emerġenza interkonnessa li tkun tista’ tkopri kwalunkwe tip ta’ emerġenza, li tista’ tintuża taħt l-awspiċji ta’ rescEU. Dawn il-kapaċitajiet strateġiċi se jkunu supplimentari għal dawk tal-Istati Membri. Jenħtieġ li jkunu lokalizzati fit-territorji ta’ bosta Stati Membri tal-UE b’tali mod li jiżguraw l-aktar kopertura ġeografika effettiva f’rispons għal emerġenza. Il-baġit tal-UE jġarrab kostijiet ta’ dħul/ħruġ/trasport kif ukoll kostijiet ta’ ħżin u finanzjarji.

ØJenħtieġ li l-Kummissjoni tkun tista’ takkwista, tikri jew tieħu b’lokazzjoni kapaċità loġistika u ta’ trasport (kapaċità ta’ trasport bl-ajru/trasport bi skopijiet multipli). Dan jippermetti lill-UE tirreaġixxi għal kwalunkwe tip ta’ sitwazzjoni ta’ emerġenza fl-UE u f’pajjiżi terzi (inkluża dik medika: it-trasferiment ta’ vittmi ta’ diżastri, pazjenti, tobba, Timijiet Mediċi Ewropej, ripatrijazzjonijiet, kif ukoll kwalunkwe tip ta’ merkanzija relatata ma’ rispons ta’ emerġenza). Il-ħżin tal-assistenza u l-kapaċità tat-trasport jenħtieġ li jkunu interkonnessi b’mod strateġiku biex iżidu l-veloċità tal-forniment u jiżguraw il-funzjonament tajjeb tal-katina tal-provvista.

ØIl-mekkaniżmu rescEU se jkollu dispożizzjonijiet li jippermettu flessibbiltà baġitarja, fosthom programmazzjoni pluriennali għal komponent ta’ prevenzjoni u tħejjija u l-iżgurar ta’ disponibbiltà immedjata u flessibbiltà ta’ fondi għal rispons . Kif intwera b’mod ċar mill-kriżi tal-COVID-19, l-emerġenzi huma min-natura tagħhom imprevedibbli u mhux mifruxa b’mod ugwali tul perjodu ta’ programmazzjoni; iżda meta sseħħ emerġenza, il-ħeffa tar-rispons hija essenzjali.

Kumplimentarjetà mal-UE u politiki nazzjonali

Aspetti Finali