IL-KUMMISSJONI EWROPEA
Brussell, 1.6.2018
COM(2018) 395 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Inizjattiva tal-UE dwar il-Pollinaturi
{SWD(2018) 302 final}
{SWD(2018) 303 final}
1.Il-ħtieġa ta’ azzjoni tal-UE dwar il-pollinaturi
Tul dawn l-aħħar snin, is-sitwazzjoni tal-popolazzjonijiet tan-naħal tal-għasel, li raw telf fl-UE u madwar id-dinja, ġibdet l-attenzjoni tal-pubbliku. Wara dan il-fenomenu tant pubbliċizzat hemm problema fuq skala ħafna akbar, jiġifieri t-tnaqqis drammatiku fl-okkorrenza u d-diversità tat-tipi kollha ta’ insetti pollinaturi selvaġġi, inkluż naħal selvaġġi, sirfidi, friefet u baħrijiet. Għadd kbir ta’ speċijiet pollinaturi huma estinti jew mhedda bl-estinzjoni.
Din hija raġuni serja għat-tħassib minħabba li l-pollinaturi jifformaw parti integrali minn ekosistemi b’saħħithom. Mingħajrhom, ħafna speċijiet ta’ pjanti jonqsu fin-numru u eventwalment jgħibu flimkien mal-organiżmi li jiddependu fuqhom, u dan ikollu implikazzjonijiet ekoloġiċi, soċjali u ekonomiċi serji. L-għelejjel dipendenti fuq id-dakkir jiddependu fuq id-dakkir mill-annimali fi gradi differenti. Huwa stmat li bejn 5 u 8 % tal-produzzjoni globali attwali tal-għelejjel hija attribwita b’mod dirett għad-dakkir mill-annimali. Fl-UE biss, madwar 84 % tal-ispeċijiet tal-għelejjel u 78 % tal-ispeċijiet tal-fjuri selvaġġi, jiddependu, tal-anqas parzjalment, fuq id-dakkir mill-annimali. Sa kważi EUR 15-il biljun tal-produzzjoni agrikola annwali tal-UE hija attribwita b’mod dirett għall-insetti pollinaturi.
L-ewwel rapport globali dwar il-pollinaturi maħruġ mill-Pjattaforma Intergovernattiva tal-Politika tax-Xjenza dwar il-Bijodiversità u s-Servizzi Ekosistemiċi isemmi t-tibdil fl-użu tal-art, il-ġestjoni agrikola u l-użu ta’ pestiċidi intensivi, it-tniġġis ambjentali, l-ispeċijiet aljeni invażivi, il-patoġeni u t-tibdil fil-klima bħala t-theddidiet ewlenin għall-pollinaturi. Huwa jidentifika wkoll lakuni sinifikanti fl-għarfien dwar kif jiffunzjonaw dawn il-motivaturi u l-ħtieġa li tittieħed azzjoni transsettorjali sabiex jiġu indirizzati. Il-Konvenzjoni dwar id-Diversità Bijoloġika approvat is-sejbiet tar-rapport u saħqet fuq l-importanza tal-pollinaturi u s-servizzi tal-ekosistema li jagħtu għall-ilħuq ta’ numru mill-Għanijiet ta’ Żvilupp Sostenibbli tan-NU.
L-UE introduċiet firxa ta’ miżuri ta’ benefiċċju għall-pollinaturi, l-aktar taħt politiki ambjentali u tas-saħħa (b’mod partikolari d-Direttivi dwar l-Għasafar u l-Ħabitats u l-leġiżlazzjoni tal-UE dwar il-pestiċidi), kif ukoll skont il-politika agrikola komuni, il-politika ta’ koeżjoni u l-politika dwar ir-riċerka u l-innovazzjoni. Hemm ukoll fis-seħħ għadd ta’ strateġiji nazzjonali u reġjonali dwar il-pollinaturi. Madankollu, s’issa ma kien hemm l-ebda azzjoni tal-UE unika u koordinata li tindirizza t-tnaqqis fil-pollinaturi permezz ta’ approċċ integrat li jinvolvi setturi u politiki differenti. Jenħtieġ li l-UE u l-Istati Membri tagħha jindirizzaw il-problema flimkien.
Din il-Komunikazzjoni tippreżenta objettivi strateġiċi u sett ta’ azzjonijiet li jridu jittieħdu mill-UE u mill-Istati Membri tagħha sabiex jindirizzaw it-tnaqqis tal-pollinaturi fl-UE u jikkontribwixxu għall-isforzi ta’ konservazzjoni globali. Din tistabbilixxi l-qafas għal approċċ integrat għall-problema u użu aktar effettiv tal-għodod u l-politiki eżistenti.
Din l-inizjattiva turi l-ambizzjoni tal-Kummissjoni li taċċellera l-progress lejn il-mira tal-UE 2020 li twaqqaf u treġġa’ lura t-telf tal-bijodiversità u tas-servizzi ekosistemiċi affermati mill-ġdid mill-Pjan ta’ Azzjoni għan-natura, in-nies u l-ekonomija. Hija twieġeb għas-sejħiet għall-azzjoni li saru mill-Parlament Ewropew u mill-Kunsill għall-ħarsien tal-pollinaturi u l-ħabitats tagħhom sabiex jitwaqqaf it-tnaqqis tagħhom. Il-konsultazzjoni pubblika li qed tħejji din l-inizjattiva stabbiliet li inizjattiva tal-UE dwar il-pollinaturi hija appoġġjata ferm fost il-gruppi ta’ partijiet ikkonċernati, u b’mod partikolari mill-pubbliku ġenerali.
2.Il-komponenti tal-inizjattiva
L-objettivi u l-azzjonijiet stabbiliti f’din l-inizjattiva jimmiraw li jtejbu l-għarfien xjentifiku dwar it-tnaqqis fl-insetti pollinaturi, jindirizzaw il-kawżi prinċipali tiegħu u jsaħħu l-kollaborazzjoni bejn l-atturi kollha kkonċernati. Filwaqt li l-enfasi qiegħda fuq il-pollinaturi selvaġġi, l-inizjattiva tindirizza l-isfidi komuni għall-pollinaturi kollha. Għalhekk, din se tkun ta’ benefiċċju wkoll għall-pollinaturi domestikati, b’mod partikolari n-naħal tal-għasel, u se tikkumplimenta l-appoġġ tal-UE eżistenti għall-apikultura u s-saħħa tan-naħal.
PRIJORITÀ I: Intejbu l-għarfien dwar it-tnaqqis tal-pollinaturi, il-kawżi u l-konsegwenzi tiegħu
PRIJORITÀ II: Nindirizzaw il-kawżi tat-tnaqqis tal-pollinaturi
PRIJORITÀ III: Inżidu s-sensibilizzazzjoni, ninvolvu s-soċjetà b’mod ġenerali u nippromwovu l-kollaborazzjoni
Filwaqt li l-azzjonijiet proposti huma ddeżinjati biex jiġu implimentati fuq perjodu ta' żmien qasir, dawn se jintroduċu proċessi ewlenin u mekkaniżmi sabiex l-isfida tiġi trattata b’mod ħolistiku fuq terminu twil. L-implimentazzjoni ta’ suċċess ta’ dawn l-azzjonijiet se titlob riżorsi finanzjarji u umani adegwati. Dawk li jfasslu l-politiki u l-awtoritajiet pubbliċi ma jistgħux jindirizzaw l-isfida waħidhom; jeħtieġ li ċ-ċittadini tal-UE u s-settur tan-negozju jiġu involuti wkoll.
L-inizjattiva tistabbilixxi objettivi fuq terminu twil u azzjonijiet fuq terminu qasir taħt tliet prijoritajiet:
It-tabella fl-anness tipprovdi dettalji tal-azzjonijiet u s-subazzjonijiet varji taħt kull prijorità.
2.1.PRIJORITÀ I: Intejbu l-għarfien dwar it-tnaqqis tal-pollinaturi, il-kawżi u l-konsegwenzi tiegħu
L-UE diġà appoġġjat il-ġenerazzjoni ta’ għarfien prezzjuż (pereżempju permezz tal-proġetti ALARM u STEP u l-Lista l-Ħamra Ewropea). Filwaqt li dawn juru biċ-ċar tnaqqis allarmanti fil-pollinaturi u jiggarantixxu azzjoni immedjata, il-lakuni fl-għarfien għadhom konsiderevoli. Il-firxa sħiħa tat-tnaqqis mhix magħrufa u r-riperkussjonijiet tagħha fuq is-soċjetà umana u l-ekonomija għadhom ma ġewx mifhuma kompletament. Għalkemm it-theddidiet ewlenin għall-pollinaturi ġew stabbiliti u jippermettu li tittieħed azzjoni immedjata u bbażata fuq l-għarfien, l-għarfien dwar l-impatti individwali u l-interazzjoni tagħhom jeħtieġ aktar riċerka. Għalhekk, it-titjib fl-għarfien jirrappreżenta pedament ta’ din l-inizjattiva u se jeħtieġ l-isforzi konġunti tal-Kummissjoni, l-Istati Membri, l-Aġenzija Ewropea għall-Ambjent, l-akkademiċi, il-partijiet ikkonċernati u ċ-ċittadini.
L-ispeċijiet u l-popolazzjonijiet tal-pollinaturi fl-UE jeħtieġ li jiġu ssorveljati aħjar. L-iżvilupp ta’ proċess ta’ monitoraġġ ikkoordinat bil-għan li jimla l-lakuna tal-għarfien dwar l-istatus u x-xejriet tagħhom se jitlob sforz konġunt mill-UE u l-Istati Membri tagħha. Se jkun meħtieġ grupp ta’ esperti tekniċi biex ifasslu metodoloġija tal-monitoraġġ kosteffiċjenti u standardizzata. Ix-xjenza mill-pubbliku, l-għodod u t-teknoloġija tal-ICT bħall-barcoding tad-DNA u t-tagħlim awtomatiku għandhom il-potenzjal li jikkontribwixxu għall-proċess. Id-data fuq is-sit ta’ kwalità tajba mill-monitoraġġ se tagħmilha possibbli li speċijiet ta’ pollinaturi mhedda jiġu vvalutati u jiġu żviluppati indikaturi tal-pollinaturi robusti. Dawn l-indikaturi jgħinu sabiex jiġu vvalutati l-impatti ta’ politiki tal-UE varji, primarjament fl-oqsma tal-ambjent, l-agrikoltura u s-saħħa, u sabiex jiġi intraċċat il-progress tal-UE lejn l-Għanijiet ta’ Żvilupp Sostenibbli 2 (“Neliminaw il-ġuħ”) u 15 (“Il-Ħajja fuq l-art”). Flimkien mad-data dwar it-theddid għall-pollinaturi u d-dakkir, dawn jagħmluha possibbli li titwettaq valutazzjoni integrata tat-tnaqqis tal-pollinaturi, l-impatti tagħhom fuq is-soċjetà u l-ekonomija permezz ta’ għodod bħall-immappjar u l-valutazzjoni tal-ekosistemi u s-servizzi tagħhom u l-kontijiet tal-kapital naturali dwar il-pollinaturi u d-dakkir, u sabiex jiġi żviluppat rispons għall-politika adegwat.
Ir-riċerka u l-innovazzjoni jeħtieġ li jiġu msaħħa minn kull aspett: id-daqs tal-problemi (l-istatus u x-xejriet tal-pollinaturi), l-indirizzar tal-kawżi (it-theddidiet għall-pollinaturi, l-importanza relattiva u l-interazzjoni tagħhom) u l-konsegwenzi (l-impatti fuq in-natura, il-benessri tal-bniedem u l-ekonomija). Jenħtieġ li r-riċerka fundamentali (is-sistematika, it-tassonomija) kif ukoll ir-riċerka applikata jiġu appoġġjati sabiex tissaħħaħ il-kapaċità tal-monitoraġġ u l-valutazzjoni tal-UE fir-rigward tal-pollinaturi. Diversi proġetti ta’ riċerka li għadhom għaddejjin diġà se jkunu qed iħallu r-riżultati dwar il-pollinaturi, kif ukoll dwar l-innovazzjonijiet fil-protezzjoni tal-pjanti, l-approċċi integrati tas-saħħa u alternattivi għall-pestiċidi.
L-aċċess miftuħ għal data u informazzjoni rilevanti għall-pollinaturi hija prekundizzjoni għal użu aħjar ta’ riżorsi eżistenti sabiex jiġi ġġenerat kemm għarfien ġdid kif ukoll soluzzjonijiet innovattivi. Jenħtieġ li jsiru aktar sforzi sabiex id-data u l-informazzjoni mxerrdin jinġabru flimkien u jsiru aċċessibbli b’mod faċli.
2.2.PRIJORITÀ II: Nindirizzaw il-kawżi tat-tnaqqis tal-pollinaturi
Il-varjetà ta’ motivaturi tat-tnaqqis tal-pollinaturi titlob azzjonijiet ta’ mitigazzjoni f’setturi u politiki varji.
L-aktar speċijiet u ħabitats mhedda tal-pollinaturi tal-UE, bħal dawk protetti taħt id-Direttiva dwar il-Ħabitats jew inklużi fil-Lista l-Ħamra Ewropea, jenħtieġ li jkunu soġġetti għal azzjoni u finanzjament ta’ prijorità. Il-programm LIFE, b’mod partikolari se jkollu rwol importanti f’dan ir-rigward.
Telf ta’ ħabitats
Sabiex ittejjeb l-implimentazzjoni tad-Direttivi dwar l-Għasafar u l-Ħabitats, il-Kummissjoni qed timplimenta l-Pjan ta’ Azzjoni għan-natura, in-nies u l-ekonomija. Filwaqt li d-Direttiva dwar il-Ħabitats telenka biss għadd limitat ta’ speċijiet ta’ pollinaturi, il-miżuri ta’ konservazzjoni għal tipi ta’ ħabitats protetti bħall-bwar jistgħu jkunu ta’ benefiċċju sinifikanti għall-pollinaturi. Għalhekk, it-titjib fl-implimentazzjoni tad-Direttiva huwa ta’ importanza ewlenija fl-indirizzar ta’ waħda mit-theddidiet ewlenin għall-pollinaturi — it-telf tal-ħabitats. L-infrastruttura ekoloġika tista’ ttejjeb aktar il-kundizzjonijiet naturali meħtieġa għas-sostenn ta’ ħabitats tal-pollinaturi prosperi billi tipprovdi soluzzjonijiet ibbażati fuq in-natura u ssaħħaħ il-koerenza u l-konnettività tan-netwerk Natura 2000 f’pajsaġġi rurali u urbani usa’.
Il-politika agrikola komuni u l-politika ta’ koeżjoni tal-UE jippreżentaw opportunitajiet ewlenin għaż-żamma u l-ħolqien ta’ ħabitats tal-pollinaturi f’żoni rurali u urbani sal-2020. L-istruttura tal-politika agrikola komuni (inklużi l-kundizzjonalità, il-pagamenti diretti u l-miżuri ta’ żvilupp rurali) tipprovdi sett wiesa’ ta’ strumenti meħtieġa biex jgħinu fl-indirizzar tal-pressjonijiet fuq il-pollinaturi li jirriżultaw minn ġestjoni agrikola intensiva u tibdil fl-użu tal-art, inkluż l-abbandun tal-art agrikola. Dawn, b’mod partikolari, jinkludu żoni ta’ interess ekoloġiku taħt appoġġ ta’ pagament dirett lill-bdiewa, li jipprovdu biċċiet ta’ artijiet ta’ lqugħ għall-pollinaturi u art mistrieħa għal pjanti rikki fin-nektar u fit-trab tad-dakra, kif ukoll miżuri agrikoli, ambjentali u klimatiċi taħt programmi ta’ żvilupp rurali. Inċentivi importanti oħrajn jappoġġjaw lill-bdiewa għas-sistemi tal-biedja sostenibbli fiż-żoni ta’ Natura 2000, u fl-investiment fil-biedja organika. Jenħtieġu sforzi kontinwati sabiex tiġi rikonoxxuta l-importanza tal-pollinaturi għall-produttività agrikola.
Filwaqt li r-rwol taż-żoni rurali huwa fundamentali għal popolazzjonijiet ta’ pollinaturi b’saħħithom, l-importanza ta’ żoni urbani u periurbani fl-appoġġ tal-ħabitats tal-pollinaturi qiegħed jiġi rikonoxxut dejjem aktar ukoll. L-ispazji pubbliċi u privati bħal parks, ġonna, soqfa ekoloġiċi u ħitan ekoloġiċi jaġixxu ta’ ħabitats ta’ rifuġju għall-pollinaturi u “tranżizzjonijiet” li jippermettu lill-pollinaturi jiċċaqilqu u jinfirxu fiż-żoni urbanizzati. Billi jkunu magħquda ma’ żoni naturali u seminaturali fil-kampanja, dawn jappoġġjaw netwerk ta’ ħabitats ta’ pollinaturi fil-pajsaġġ usa’. Għadd ta’ soluzzjonijiet promettenti, bħal soluzzjonijiet ibbażati fuq in-natura, jistgħu jtejbu l-integrazzjoni tal-ħabitats tal-pollinaturi f’netwerks tal-infrastrutturi ewlenin bħat-toroq u l-linji ferrovjarji u tal-elettriku, li spiss jiġu assoċjati mad-deterjorament tal-ħabitat u tipikament jinfirxu f’firxiet kbar ta’ pajsaġġi Ewropej varji. L-awtoritajiet reġjonali u lokali jenħtieġ li jiġu mħeġġa jinvestu f’tali soluzzjonijiet.
L-użu tal-pestiċidi
Ir-riskji u l-impatti tal-pestiċidi fuq il-pollinaturi jirriżultaw mit-tossiċità tas-sustanza attiva u l-livell ta’ esponiment. Fl-UE, is-sustanzi attivi użati fil-prodotti għall-protezzjoni tal-pjanti jistgħu jiġu approvati biss billi tiġi segwita valutazzjoni tar-riskju sabiex jiġi żgurat li ma jkun hemm l-ebda effett mhux mixtieq fuq in-naħal tal-għasel. Fl-2013, l-Awtorità Ewropea dwar is-Sigurtà fl-Ikel (EFSA) żviluppat dokument ta’ gwida biex issaħħaħ il-valutazzjoni tar-riskju attwali billi, fost l-oħrajn, tinkludi l-effetti kroniċi u l-ispeċijiet tan-naħal selvaġġi mar-rekwiżiti ta’ valutazzjoni. Madankollu, din il-gwida għadha ma ġietx approvata mill-Istati Membri; għalhekk se tkun meħtieġa azzjoni ulterjuri sabiex tiġi żgurata l-implimentazzjoni tagħha.
Fl-2013, il-Kummissjoni llimitat l-użu ta’ tliet pestiċidi neonikotinojdi wara li ntwera li huma ta’ periklu kbir għan-naħal. Fi Frar 2018, l-analiżi tal-evidenza tal-EFSA ikkonfermat dawn ir-riskji. Kif iddikjarat fir-Regolament (KE) 1107/2009, huwa importanti li jiġu introdotti miżuri biex jiġu mmitigati dawn ir-riskji. Il-proposta tal-Kummissjoni biex jiġi ristrett aktar l-użu ta’ tliet pestiċidi neonikotinojdi ġiet approvata mill-Istati Membri fis-27 ta’ April 2018.
Barra minn hekk, id-Direttiva 2009/128/KE tipprevedi firxa ta’ azzjonijiet li jappoġġjaw l-użu sostenibbli tal-pestiċidi approvati. Il-miri u l-miżuri speċifiċi jistgħu jiġu stabbiliti fil-pjanijiet ta’ azzjoni nazzjonali taħt id-Direttiva sabiex jiġu indirizzati l-impatti tal-pestiċidi fuq il-pollinaturi.
Speċijiet aljeni invażivi
L-ispeċijiet aljeni invażivi huma theddida oħra ewlenija għall-pollinaturi. Ir-Regolament (UE) 1143/2014 jipprevedi li jittieħed sett ta’ miżuri f’dan il-qasam mal-UE kollha. L-isforzi kontinwi biex jiġu implimentati dawn il-miżuri u biex jiġu elenkati speċijiet ġodda meqjusa bħala theddida se jimmitigaw l-effetti dannużi, bħal dawk assoċjati mal-predazzjoni miż-żnażan tat-tip bgħula ta’ saqajhom sofor (Vespa velutina), jew il-qerda tal-ħabitats tal-pollinaturi minn ċerti speċijiet ta’ pjanti bħall-balzmu tal-Himalaya (Impatiens glandulifera) li joqtol il-veġetazzjoni lokali. Barra minn hekk, jenħtieġ li jiġi promoss l-użu ta’ speċijiet ta’ pollinaturi lokali u speċijiet ta’ pjanti lokali għall-użu privat u pubbliku sabiex jiġu evitati l-perikli li l-speċijiet aljeni jippreżentaw għall-ispeċijiet tal-pollinaturi lokali.
Theddidiet oħra
Il-pollinaturi jintlaqtu wkoll mit-tibdil fil-klima, mit-tniġġis ambjentali u mill-mard. It-tibdil fil-klima jaffettwa d-distribuzzjoni u l-firxa tal-pollinaturi, il-ħabitats u l-interazzjoni tagħhom, kemm permezz ta’ bidliet gradwali kif ukoll ta’ avvenimenti estremi tat-temp. Filwaqt li ma hemmx biżżejjed studji komprensivi dwar l-effetti ta’ diversi inkwinanti (bħat-tniġġis tal-arja, il-metalli tqal u t-tniġġis tad-dawl) u mard, huwa magħruf li dawn jagħmlu ħsara lill-pollinaturi selvaġġi jew jaffettwaw lill-ħabitats tagħhom b’mod negattiv. Din l-inizjattiva ma tindirizzax dawn it-theddidiet b’mod dirett. Il-politiki tal-UE dwar l-azzjoni klimatika, it-tniġġis tal-arja u azzjonijiet għas-saħħa tan-naħal se jgħinu sabiex jiġu mitigati l-impatti tagħhom fuq il-pollinaturi. Madankollu, l-inizjattiva se tikkontribwixxi biex dawn it-theddidiet u theddidiet oħrajn jiġu indirizzati billi tappoġġja ż-żamma, il-ħolqien u l-konnessjoni ta’ ħabitats sani għall-pollinaturi u billi tittratta l-firxa ta’ speċijiet mhux lokali li jġorru patoġeni dannużi u mard, u b’hekk issaħħaħ ir-reżiljenza klimatika globali tal-ekosistemi Ewropej.
2.3.PRIJORITÀ III: Inżidu s-sensibilizzazzjoni, ninvolvu s-soċjetà b’mod ġenerali u nippromwovu l-kollaborazzjoni
It-trattament tat-tnaqqis tal-pollinaturi jitlob approċċ strateġiku fil-livelli kollha ta’ governanza u l-involviment ta’ diversi atturi. Din l-inizjattiva se tqajjem kuxjenza mas-soċjetà kollha dwar l-importanza tal-pollinaturi u l-ħtieġa urġenti biex tittieħed azzjoni. Billi tiġi promossa u mxerrda l-aħjar prassi u jiġu appoġġjati attivitajiet ta’ kollaborazzjoni ulterjuri, hija se timmira li timmobilizza l-komunità xjentifika, lil dawk li jfasslu l-politiki, lin-negozji u ċ-ċittadini biex jaġixxu u jikkooperaw.
Filwaqt li diġà jeżistu għadd ta’ pjattaformi li jappoġġjaw il-kollaborazzjoni dwar il-pollinaturi (bħan-netwerks ta’ riċerka u l-pjattaformi tal-iskambju tal-politiki), il-kapaċità għall-kollaborazzjoni jeħtieġ li tiġi msaħħa aktar. Il-Kummissjoni u l-Istati Membri jenħtieġ li jqajmu kuxjenza dwar l-opportunitajiet ta’ finanzjament f’dan ir-rigward u jippromwovuhom. L-għodod u l-mudelli komuni għall-iżvilupp ta’ pjanijiet u strateġiji għall-pollinaturi, il-bini fuq l-aħjar prattiki eżistenti, se jrawmu azzjoni ulterjuri fil-livell nazzjonali, reġjonali u lokali. Iż-żieda fin-nefqa tal-UE fuq programmi tal-apikultura nazzjonali tista’ wkoll twessa’ l-fehim pubbliku u professjonali dwar l-importanza tal-pollinaturi selvaġġi għas-soċjetà u l-ekonomija.
L-UE se żżid il-kontribut tagħha għall-azzjoni globali dwar il-pollinaturi billi ssaħħaħ l-appoġġ għall-azzjonijiet ta’ konservazzjoni skont l-Inizjattiva Internazzjonali dwar il-Pollinaturi, immexxija mill-Organizzazzjoni tal-Ikel u l-Agrikoltura tan-Nazzjonijiet Uniti, u billi trawwem kollaborazzjoni internazzjonali permezz tal-Koalizzjoni tal-Eżekuzzjoni tal-Pjan dwar il-Pollinaturi.
3.Konklużjoni
L-Inizjattiva dwar il-Pollinaturi tal-UE se tikkontribwixxi għall-objettivi tal-istrateġija tal-UE dwar il-bijodiversità sal-2020 u l-politiki settorjali bħall-politika agrikola komuni u l-politika ta’ koeżjoni. Hija se tipprovdi wkoll informazzjoni siewja dwar il-progress tal-UE lejn l-Għanijiet ta’ Żvilupp Sostenibbli tan-NU.
L-inizjattiva se taħdem f’sinerġija mal-Pjan ta’ Azzjoni għan-natura, in-nies u l-ekonomija, b’mod partikolari bil-gwida li ġejja dwar l-infrastruttura ekoloġika fil-livell tal-UE u dwar l-integrazzjoni tas-servizzi tal-ekosistema fit-teħid tad-deċiżjonijiet. Hija qed tiġi introdotta hekk kif se jibdew in-negozjati interistituzzjonali dwar il-qafas finanzjarju pluriennali tal-UE ta’ wara l-2020. Għalkemm huwa previst li l-azzjonijiet proposti jitlestew sal-2020, se jkun importanti li jinżamm ir-ritmu u li jsir l-aħjar użu mill-istrumenti ta’ finanzjament tal-UE futuri sabiex jiġu appoġġjati azzjonijiet li jkollhom impatt u li jindirizzaw it-tnaqqis tal-pollinaturi fuq terminu twil.
Il-Kummissjoni tistieden lill-Parlament Ewropew u lill-Kunsill biex japprovaw din l-inizjattiva u biex jipparteċipaw b’mod attiv fl-implimentazzjoni tagħha, b’kooperazzjoni mill-qrib mal-partijiet ikkonċernati rilevanti kollha.
Sa tmiem l-2020, il-Kummissjoni se tanalizza l-progress dwar l-implimentazzjoni tal-inizjattiva, u jekk ikun hemm bżonn se tipproponi rakkomandazzjonijiet għal azzjoni ulterjuri. Dan il-proċess se jikkontribwixxi għall-analiżi finali tal-istrateġija tal-UE dwar il-bijodiversità sal-2020 u s-segwitu tagħha.
ANNESS — Lista ta’ azzjonijiet
Dan l-anness jipprovdi ħarsa ġenerali lejn l-objettivi u l-azzjonijiet inklużi taħt kull prijorità tal-Inizjattiva tal-UE dwar il-Pollinaturi. L-azzjonijiet se jiġu implimentati sal-2020. L-objettivi jistabbilixxu perspettiva fuq terminu twil għall-2030.
PRIJORITÀ I: Intejbu l-għarfien dwar it-tnaqqis tal-pollinaturi, il-kawżi u l-konsegwenzi tiegħu
|
Objettiv
Il-pollinaturi u l-ħabitats tagħhom jiġu mmonitorjati u vvalutati b’mod regolari. Hemm skema ta’ monitoraġġ mal-UE kollha li tipprovdi data għall-valutazzjoni tal-istatus u x-xejriet tagħhom. Din tifforma l-bażi għal indikaturi tal-pollinaturi b’saħħithom u fil-ħin li jgħinu sabiex jiġu vvalutati l-impatti tal-politiki tal-UE rilevanti u sabiex isir possibbli li jiġi żviluppat atlas Ewropew dwar il-pollinaturi u d-dakkir. Ir-riżorsi jiġu mobilizzati taħt il-programmi ta’ riċerka u innovazzjoni tal-UE sabiex jimtlew il-lakuni fl-għarfien dwar it-tnaqqis tal-pollinaturi, il-kawżi u l-konsegwenzi tiegħu fuq is-soċjetà u l-ekonomija. Id-data u l-informazzjoni dwar il-pollinaturi hija aċċessibbli liberament.
|
AZZJONI 1 APPOĠĠ GĦALL-MONITORAĠĠ U L-VALUTAZZJONI
|
1A)
|
Il-Kummissjoni se tfassal u tittestja skema ta’ monitoraġġ tal-pollinaturi mal-UE kollha biex tiżgura l-provvediment ta’ data ta’ kwalità tajba għall-valutazzjoni tal-istatus u x-xejriet ta’ speċijiet ta’ pollinaturi fl-UE u l-iżvilupp ta’ indikatur tal-pollinaturi. Se jiġi stabbilit grupp ta’ esperti tekniċi biex jappoġġja din il-ħidma.
|
L-ewwel stadju importanti fil-Q4 2018
|
1B)
|
Il-Kummissjoni se tibda l-ħidma fuq il-Lista l-Ħamra Ewropea tas-sirfidi.
|
Q1 2019
|
1C)
|
Il-Kummissjoni se tiżviluppa lista ta’ ħabitats importanti għall-pollinaturi u tivvaluta l-kundizzjonijiet tagħhom abbażi ta’ rappurtar ipprovdut mill-Istati Membri taħt id-Direttiva dwar il-Ħabitats u data oħra disponibbli.
|
L-ewwel stadju importanti fil-Q1 2019
|
1D)
|
Il-Kummissjoni se tniedi proġett pilota dwar il-monitoraġġ tal-preżenza tal-pestiċidi fl-ambjent permezz tal-prodotti tan-naħal tal-għasel (pereżempju t-trab tad-dakra) sabiex tivvaluta l-fattibbiltà tal-użu ta’ dan l-approċċ innovattiv sabiex tinforma dwar l-esponiment tal-pollinaturi għall-pestiċidi.
|
Q4 2018
|
1E)
|
Il-Kummissjoni se tapplika l-qafas “immappjar u valutazzjoni tal-ekosistemi u s-servizzi tagħhom” għall-pollinaturi, inkluż l-iżvilupp ta’ kontijiet kapitali naturali dwar il-pollinaturi u d-dakkir, sabiex b’mod integrat tivvaluta t-tnaqqis tal-pollinaturi, l-impatti tagħhom fuq is-soċjetà u l-ekonomija, u tikseb rispons dwar il-politika adegwat.
|
Q2 2019
|
AZZJONI 2 — NAPPOĠĠJAW IR-RIĊERKA U L-INNOVAZZJONI
|
2A)
|
Il-Kummissjoni se tkompli tippromwovi u tappoġġja r-riċerka u l-innovazzjoni dwar il-pollinaturi u l-kawżi u l-konsegwenzi tat-tnaqqis tagħhom taħt Orizzont 2020 – il-Programm Qafas tal-UE għar-Riċerka u l-Innovazzjoni ta’ bejn l-2014 u l-2020.
|
Kontinwa
|
2B)
|
Fil-qafas tal-iskambji permezz tan-netwerk EIP-AGRI (Sħubija Ewropea għall-Innovazzjoni għal Produttività u Sostenibbiltà fil-Qasam Agrikolu), il-Kummissjoni se tqajjem il-kuxjenza tal-partijiet ikkonċernati dwar l-opportunitajiet fir-rikonoxximent tal-ħtiġijiet tal-pollinaturi u s-servizz ta’ dakkir li jipprovdu.
|
Kontinwa
|
2C)
|
Il-Kummissjoni se tqis kif tippromwovi aktar ir-riċerka u l-innovazzjoni biex tindirizza t-tnaqqis tal-pollinaturi fl-implimentazzjoni tal-programm Orizzont Ewropa – il-Programm Qafas tal-UE għar-Riċerka u l-Innovazzjoni wara l-2020.
|
Kontinwa
|
AZZJONI 3 — NIFFAĊILITAW IL-KONDIVIŻJONI TAL-GĦARFIEN U L-AĊĊESS GĦAD-DATA
|
3A)
|
Il-Kummissjoni se tniedi pjattaforma online dwar il-pollinaturi sabiex isservi ta’ hub ċentrali tad-data u tal-informazzjoni.
|
L-ewwel stadju importanti fil-Q1 2019
|
3 B)
|
Jenħtieġ li l-Istati Membri jagħmlu data spazjali rilevanti, bħad-data dwar l-użu tal-art, disponibbli fid-dominju pubbliku abbażi tar-rekwiżiti taħt id-Direttiva dwar l-INSPIRE u l-Aċċess għall-Informazzjoni Ambjentali.
|
L-ewwel stadju importanti fil-Q2 2019
|
PRIJORITÀ II: Nindirizzaw il-kawżi tat-tnaqqis tal-pollinaturi
|
Objettiv
Jiġu identifikati u implimentati miżuri ta’ konservazzjoni xierqa għall-ispeċijiet ta’ pollinaturi mhedda u l-ħabitats tagħhom. Il-miżuri rilevanti għall-pollinaturi jiġu integrati bis-sħiħ fil-politika agrikola komuni u l-politika ta’ koeżjoni, u l-Istati Membri jagħmlu użu sħiħ mill-opportunitajiet sabiex imantnu u jirkupraw il-ħabitats tal-pollinaturi f’żoni rurali u urbani. Il-ħabitats tal-pollinaturi huma konnessi b’mod effettiv fil-pajsaġġ usa’, li jippermettilhom jinfirxu mat-territorji. Il-pollinaturi huma protetti mill-impatti tal-pestiċidi u ta’ speċijiet aljeni invażivi.
|
AZZJONI 4 — NIKKONSERVAW SPEĊIJIET U ĦABITATS TA’ POLLINATURI MHEDDA
|
4A)
|
Il-Kummissjoni se tkompli tiżviluppa pjanijiet ta’ azzjoni għall-aktar speċijiet u ħabitats ta’ pollinaturi mhedda elenkati fid-Direttiva dwar il-Ħabitats, u se tappoġġja lill-Istati Membri u lill-partijiet ikkonċernati biex jimplimentawhom, inkluż permezz tal-Programm LIFE.
|
L-ewwel stadju importanti fil-Q2 2019
|
4B)
|
Il-Kummissjoni, b’kooperazzjoni mal-Istati Membri, se tidentifika miżuri ta’ konservazzjoni u approċċi ta’ ġestjoni sabiex tottimizza l-benefiċċji għall-pollinaturi mhedda u l-ħabitats tagħhom, inkluż fil-qafas tal-proċess bijoġeografiku Natura 2000 u permezz ta’ workshop dedikat.
|
L-ewwel stadju importanti fi
Q2 2019
|
4C)
|
L-Istati Membri jenħtieġ li jindirizzaw miżuri ta’ prijorità għal ħabitats tal-pollinaturi importanti fl-oqfsa ta’ azzjoni prijoritarji għall-ġestjoni tas-siti ta’ Natura 2000 u l-infrastruttura ekoloġika kif ukoll il-protezzjoni tal-ispeċijiet.
|
Q3 2019
|
AZZJONI 5 — INTEJBU L-ĦABITATS TAL-POLLINATURI FL-ART AGRIKOLA U MADWARHA
|
5A)
|
Il-Kummissjoni se tivvaluta l-esperjenza eżistenti dwar l-użu ta’ miżuri rilevanti għall-pollinaturi taħt il-politika agrikola komuni ta’ bejn l-2014 u l-2020. Abbażi ta’ dan, se tiżviluppa gwida għall-immaniġġjar tal-awtoritajiet u l-bdiewa, li fiha tipprovdi pariri tekniċi dwar kif tiżdied l-effikaċja tal-miżuri, u kif din tista’ tiġi promossa b’mod attiv fil-politika agrikola komuni wara l-2020.
|
L-ewwel stadju importanti fil-Q4 2018
|
5B)
|
L-Istati Membri jenħtieġ li jħeġġu l-adozzjoni ta’ miżuri rilevanti għall-pollinaturi fi programmi tal-iżvilupp rurali għal bejn l-2014 u l-2020, inkluż permezz ta’ taħriġ u sensibilizzazzjoni għall-bdiewa u partijiet ikkonċernati rilevanti oħra.
|
Kontinwa
|
5C)
|
Il-Kummissjoni se tippromwovi l-integrazzjoni tal-konsiderazzjonijiet tal-pollinaturi fl-implimentazzjoni tal-politika agrikola komuni ta’ wara l-2020, u se tinkludi indikatur tal-pollinaturi fil-qafas tal-prestazzjoni u l-monitoraġġ ladarba jiġi ffinalizzat u jkun operazzjonali.
|
Kontinwa
|
AZZJONI 6 — INTEJBU L-ĦABITATS TAL-POLLINATURI FIŻ-ŻONI URBANI U L-PAJSAĠĠ USA’
|
6A)
|
Il-Kummissjoni se tiġbor l-aħjar prattiki u tiżviluppa gwida għall-awtoritajiet lokali dwar kif jinħoloq ambjent favorevoli għall-pollinaturi, u se tinkludi lill-pollinaturi fil-kriterji għall-Premju tal-Belt Kapitali Ekoloġika tal-Ewropa u l-Premju Green Leaf.
|
Q2 2019
|
6B)
|
Il-Kummissjoni se żżid is-sensibilizzazzjoni fost l-awtoritajiet ta' ġestjoni tal-politika ta’ koeżjoni u l-partijiet ikkonċernati dwar il-konservazzjoni tal-pollinaturi u opportunitajiet ta’ finanzjament relatati fil-perjodu ta’ bejn l-2014 u l-2020 u wara l-2020.
|
L-ewwel stadju importanti fil-Q4 2018
|
6C)
|
Permezz ta’ gwida dwar l-infrastruttura ekoloġika fil-livell tal-UE u dwar l-integrazzjoni tal-ekosistemi u s-servizzi tagħhom fit-teħid ta’ deċiżjonijiet, il-Kummissjoni se tippromwovi azzjonijiet fil-livell tal-pajsaġġ li jżommu u jirkupraw il-ħabitats tal-pollinaturi, u l-integrazzjoni tagħhom fl-ippjanar spazjali u proċessi tat-teħid ta’ deċiżjonijiet rilevanti oħrajn.
|
L-ewwel stadju importanti fi
Q4 2018
|
AZZJONI 7 — INNAQQSU L-IMPATTI TAL-UŻU TAL-PESTIĊIDI FUQ IL-POLLINATURI
|
7A)
|
Il-Kummissjoni se tħeġġeġ lill-Istati Membri biex jinkludu miri u miżuri speċifiċi għall-konservazzjoni tal-pollinaturi fil-pjanijiet ta’ azzjoni nazzjonali riveduti tagħhom skont id-Direttiva 2009/128/KE sabiex inaqqsu r-riskji u l-impatti tal-użu tal-pestiċidi fuq il-pollinaturi, u se tivvaluta s-sitwazzjoni fit-tieni rapport dwar l-implimentazzjoni tad-Direttiva.
|
L-ewwel stadju importanti fi
Q2 2019
|
7B)
|
Il-Kummissjoni se tadotta pjan ta’ implimentazzjoni għall-EFSA Guidance Document on the risk assessment of plant protection products on bees (Apis mellifera, Bombus spp. u naħal solitarju) sabiex issaħħaħ il-valutazzjoni tar-riskju tal-pestiċidi fuq il-pollinaturi.
|
Q4 2018
|
7C)
|
Il-Kummissjoni se tadotta miżuri legali għall-projbizzjoni ta’ kull użu fuq barra tat-tliet pestiċidi neonikotinojdi li ilhom soġġetti għal restrizzjonijiet speċifiċi mill-2013 (imidakloprid, tiametossam u klotijanidin).
|
Q2 2018
|
AZZJONI 8 — INNAQQSU L-IMPATTI TA’ SPEĊIJIET ALJENI INVAŻIVI FUQ IL-POLLINATURI
|
8A)
|
Il-Kummissjoni se tipprovdi gwida teknika lill-Istati Membri dwar kif jipprevjenu u jirregolaw speċijiet aljeni ta’ ħsara għall-pollinaturi fil-kamp ta’ applikazzjoni tar-Regolament (UE) 1143/2014.
|
Q3 2019
|
8B)
|
Il-Kummissjoni se tiżviluppa gwida biex tippromwovi l-użu ta’ speċijiet tal-pjanti u pollinaturi lokali fis-settur pubbliku u privat.
|
Q3 2019
|
PRIJORITÀ III: Inżidu s-sensibilizzazzjoni, ninvolvu s-soċjetà b’mod ġenerali u nippromwovu l-kollaborazzjoni
|
Objettiv
Is-sensibilizzazzjoni fis-soċjetà b’mod ġenerali dwar l-importanza tal-pollinaturi u l-ħtieġa urġenti għall-azzjoni sabiex jitwaqqaf it-tnaqqis tagħhom. Il-politiki pubbliċi għandhom impatt akbar minħabba l-mobilizzazzjoni effettiva tan-negozji u ċ-ċittadini. L-azzjonijiet individwali għandhom impatt akbar minħabba li hemm koordinazzjoni aħjar tal-atturi rilevanti fil-livelli kollha. L-UE tkun globalment minn ta’ quddiem sabiex tappoġġja u tiffaċilita l-azzjoni internazzjonali dwar il-pollinaturi.
|
AZZJONI 9 — INĦEĠĠU LIS-SETTUR TAN-NEGOZJU U LIĊ-ĊITTADINI BIEX JIEĦDU AZZJONI
|
9A)
|
Il-Kummissjoni se tipprovdi gwida u se tagħti inċentiv lin-negozji biex jikkontribwixxu għall-konservazzjoni tal-pollinaturi, b’mod partikolari fil-qasam agroalimentari. Hija se tkompli tippromwovi prattiki tajba u mudelli tan-negozju innovattivi ta’ benefiċċju għall-pollinaturi permezz tal-pjattaforma EU Business @ Biodiversity u l-Premju Ewropew tal-Ambjent għan-Negozji, u se tipprovdi opportunitajiet ta’ finanzjament permezz tal-Faċilità ta’ Finanzjament tal-Kapital Naturali.
|
L-ewwel stadju importanti fi
Q2 2019
|
9B)
|
Il-Kummissjoni se tesplora l-possibbiltà li tapplika l-ekotikketta tal-UE ma’ prodotti li jappoġġjaw il-konservazzjoni tal-pollinaturi, bħal taħlitiet taż-żrieragħ ta’ fjuri selvaġġi, pjanti tal-qsari għall-pollinaturi u prodotti tal-ġnien rilevanti oħra, b’konformità mal-konklużjonijiet u r-rakkomandazzjonijiet tal-kontroll tal-idoneità konklużi fl-2017.
|
Q3 2019
|
9C)
|
Il-Kummissjoni se tiżviluppa u xxerred materjal edukattiv dwar il-pollinaturi. Hija se tiżviluppa wkoll gwida dwar kif iċ-ċittadini jistgħu jinvolvu ruħhom fil-konservazzjoni tal-pollinaturi u x-xjenza mill-pubbliku dwar il-pollinaturi. Tali attivitajiet ta’ impenn għall-preservazzjoni tal-pollinaturi jistgħu jitwettqu fil-kuntest tal-Korp Ewropew ta’ Solidarjetà, li jappoġġja liż-żgħażagħ biex jidħlu għal proġetti ta’ benefiċċju għall-komunitajiet u l-ambjent madwar l-Ewropa. Barra minn hekk, il-programmi tal-apikultura nazzjonali jistgħu jikkumplimentaw dawn l-isforzi permezz ta’ taħriġ sabiex jitwessa’ l-fehim pubbliku u professjonali dwar l-importanza tal-pollinaturi selvaġġi.
|
Kontinwa
|
AZZJONI 10 — NIPPROMWOVU L-ISTRATEĠIJI TAL-POLLINATURI U L-KOLLABORAZZJONI FIL-LIVELLI KOLLHA
|
10A)
|
Il-Kummissjoni se tiżviluppa mudelli u għodod komuni sabiex tiffaċilita l-iżvilupp ta’ strateġiji tal-pollinaturi fil-livell nazzjonali, reġjonali u lokali, filwaqt li tibni fuq l-aħjar prassi eżistenti.
|
Q3 2019
|
10B)
|
Il-Kummissjoni se tidentifika opportunitajiet għat-titjib tal-kollaborazzjoni fost l-atturi rilevanti kollha permezz ta’ pjattaformi eżistenti u tippromwovi kollaborazzjoni ulterjuri permezz ta’ mekkaniżmi fil-livell tal-UE, inkluż taħt Il-Programm Qafas għar-Riċerka u l-Innovazzjoni tal-UE ta’ bejn l-2014 u l-2020, il-programmi dwar il-Kooperazzjoni Territorjali Ewropea (Interreg), l-Iżvilupp Lokali Mmexxi mill-Komunità, l-istrumenti Peer2Peer TAIEX-EIR u TAIEX-REGIO.
|
L-ewwel stadju importanti fi
Q1 2019
|
10C)
|
Il-Kummissjoni se tippromwovi l-integrazzjoni ta’ konsiderazzjonijiet u miżuri ta’ konservazzjoni tal-pollinaturi f’politiki, pjanijiet u programmi appoġġjati mill-UE f’pajjiżi fil-fażi tal-iżvilupp u pajjiżi ġirien, b’konfirmità mal-objettivi tal-Inizjattiva Internazzjonali dwar il-Pollinaturi.
|
Kontinwa
|
10D)
|
L-UE se tissieħeb fil-Koalizzjoni tal-Eżekuzzjoni tal-Pjan dwar il-Pollinaturi u trawwem azzjoni internazzjonali effettiva dwar il-pollinaturi.
|
Q4 2018
|