IL-KUMMISSJONI EWROPEA

Brussell, 26.5.2016

COM(2016) 286 final

2016/0150(NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tiġi adottata f’isem l-Unjoni Ewropea fil-Kumitat għall-Kummerċ u għall-Iżvilupp CARIFORUM-UE tal-Ftehim ta’ Sħubija Ekonomika bejn l-Istati tal-CARIFORUM, minn naħa, u l-Komunità Ewropea u l-Istati Membri tagħha, min-naħa l-oħra, rigward it-twaqqif ta’ Kumitat Speċjali għall-Agrikoltura u għas-Sajd

MEMORANDUM TA’ SPJEGAZZJONI

1.KUNTEST TAL-PROPOSTA

Raġunijiet u għanijiet tal-proposta

Il-proposta mehmuża għal Deċiżjoni tal-Kunsill tikkostitwixxi l-istrument legali għat-twaqqif ta’ Kumitat Speċjali għall-Agrikoltura u għas-Sajd fil-Ftehim ta’ Sħubija Ekonomika (FSE), iffirmat fil-15 ta’ Ottubru 2008 bejn l-Istati tal-CARIFORUM, min naħa, u l-Komunità Ewropea u l-Istati Membri tagħha, min-naħa l-oħra. Il-Ftehim japplika b'mod provviżorju mid-29 ta' Diċembru 2008.

L-agrikoltura u s-sajd huma qasam importanti tal-Ftehim, u skont l-Artikolu 230(4) tal-FSE UE-CARIFORUM, jista' jitwaqqaf kwalunkwe kumitat speċjali sabiex jiġu ttratti b'aktar effiċjenza l-kwistjonijiet marbutin mal-implimentazzjoni ta’ dan il-Ftehim. Dan il-Kumitat Speċjali għall-Agrikoltura u għas-Sajd se jkun magħmul minn rappreżentanti tal-Kummissjoni Ewropea, minn naħa, u rappreżentanti tad-Direttorat tal-CARIFORUM u tal-Istati Firmatarji tal-CARIFORUM min-naħa l-oħra.

Il-Kumitat Speċjali għandu jiġi stabbilit b’deċiżjoni tal-Kumitat għall-Kummerċ u għall-Iżvilupp CARIFORUM-UE (magħmul minn rappreżentanti tal-Partijiet f’livell ta’ uffiċjali għolja). F’dan ir-rigward, id-Deċiżjoni tal-Kunsill proposta tinkludi bħala anness, l-abbozz tad-Deċiżjoni li l-Partijiet qablu dwarha waqt il-ħames laqgħa annwali tal-Kumitat għall-Kummerċ u għall-Iżvilupp CARIFORUM-UE li seħħet f’Guyana fl-14 ta’ Lulju 2015.

Konsistenza ma’ dispożizzjonijiet ta’ politika eżistenti fil-qasam ta’ politika

Il-FSE UE-CARIFORUM jinkludi kapitolu speċifiku ddedikat għall-kwistjonijiet dwar l-agrikoltura u s-sajd.

Konsistenza ma' politiki oħrajn tal-Unjon

It-twqqif ta’ dan il-Kumitat Speċjali għall-Agrikoltura u għas-Sajd huwa konsistenti u ħa inkonsiderazzjoni l-konklużjoni tal-aħħar żewġ laqgħat annwali tal-Kumitat għall-Kummerċ u għall-Iżvilupp CARIFORUM-UE li seħħew fi Brussell fl-2014 u f’Guyana fl-2015.

2.    BAŻI ĠURIDIKA, SUSSIDJARJETÀ U PROPORZJONALITÀ

Bażi ġuridika

Il-bażi ġuridika għal din id-deċiżjoni tal-Kunsill hija t-Trattat dwar il-Funzjonament tal-Unjoni Ewropea, u b’mod partikolari l-Artikolu 207 flimkien mal-Artikolu 218(9) tiegħu.

Sussidjarjetà (għal kompetenza mhux esklużiva)

Il-politika kummerċjali komuni, f'konformità mal-Artikolu 3 tat-TFUE, hija definita bħala kompetenza esklużiva tal-Unjoni.

Proporzjonalità

Din il-proposta hi meħtieġa sabiex jiġi stabbilit kwalunkwe kumitat speċjali, kif stabbilit fl-Artikolu 230(4) tat-test tal-FSE UE-CARIFORUM u fir-regoli ta’ proċedura tal-Kumitat għall-Kummerċ u għall-Iżvilupp CARIFORUM-UE.

Għażla tal-istrument

Din il-proposta hija skont l-Artikolu 218(5) TFUE, li jipprevedi l-adozzjoni ta' deċiżjonijiet mill-Kunsill dwar ftehimiet internazzjonali. Ma jeżisti l-ebda strument ġuridiku ieħor li jista' jintuża sabiex jintlaħaq l-objettiv espress f'din il-proposta.

3.    RIŻULTATI TAL-EVALWAZZJONIJIET EX POST, KONSULTAZZJONIJIET MAL-PARTIJIET IKKONĊERNATI U VALUTAZZJONIJIET TAL-IMPATT

Evalwazzjonijiet ex post / kontrolli tal-idoneità tal-leġiżlazzjoni eżistenti

Konsultazzjonijiet mal-partijiet ikkonċernati

Mhux applikabbli.

Ġbir u użu tal-kompetenzi

Valutazzjoni tal-impatt

Idoneità regolatorja u simplifikazzjoni

Drittijiet fundamentali

Il-proposta ma għandhiex konsegwenzi għall-protezzjoni tad-drittijiet fundamentali fl-Unjoni.

4.    IMPLIKAZZJONIJIET BAĠITARJI

5.    ELEMENTI OĦRAJN

Il-pjanijiet għall-implimentazzjoni u l-arranġamenti ta’ monitoraġġ, ta’ evalwazzjoni u ta’ rappurtar

Id-dokumenti ta’ spjegazzjoni (għad-direttivi)

Spjegazzjoni dettaljata tad-dispożizzjonijiet speċifiċi tal-proposta

2016/0150 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tiġi adottata f’isem l-Unjoni Ewropea fil-Kumitat għall-Kummerċ u għall-Iżvilupp CARIFORUM-UE tal-Ftehim ta’ Sħubija Ekonomika bejn l-Istati tal-CARIFORUM, minn naħa, u l-Komunità Ewropea u l-Istati Membri tagħha, min-naħa l-oħra, rigward it-twaqqif ta’ Kumitat Speċjali għall-Agrikoltura u għas-Sajd

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 207 flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)Il-Ftehim ta' Sħubija Ekonomika bejn l-Istati tal-CARIFORUM, minn naħa, u l-Komunità Ewropea u l-Istati Membri tagħha, min-naħa l-oħra 1 ("il-Ftehim"), ġie ffirmat fil-15 ta' Ottubru 2008, u mid-29 ta' Diċembru 2008 ġie applikat provviżjorjament.

(2)Skont l-Artikolu 230(4) tal-Ftehim, il-Kumitat għall-Kummerċ u għall-Iżvilupp CARIFORUM-UE jista’ jistabbilixxi u jissorvelja kull kumitat speċjali sabiex jitratta kwistjonijiet li jaqgħu taħt il-kompetenza tiegħu.

(3)Sabiex jintlaħqu l-objettivi previsti fl-Artikolu 37 tal-Ftehim, għandu jitwaqqaf Kumitat Speċjali għall-Agrikoltura u għas-Sajd sabiex jitratta b’mod aktar effiċenti l-kwistjonijiet relatati ma’ dawn il-kwistjonijiet, kif ġie mifthiem waqt laqgħat preċedenti tal-Kumitat għall-Kummerċ u għall-Iżvilupp CARIFORUM-UE.

(4)Huwa xieraq li tkun stabbilita l-pożizzjoni li għandha tiġi adottata f’isem l-Unjoni fil-Kumitat għall-Kummerċ u għall-Iżvilupp CARIFORUM-UE rigward it-twaqqif ta’ Kumitat Speċjali għall-Agrikoltura u għas-Sajd.

(5)Il-pożizzjoni tal-Unjoni fil-Kumitat għall-Kummerċ u għall-Iżvilupp CARIFORUM-UE għandha għalhekk tkun ibbażata fuq l-abbozz mehmuż tad-Deċiżjoni,

ADOTTA DIN ID-DEĊIŻJONI:

Artikolu 1

Il-pożizzjoni li għandha tiġi adottata f’isem l-Unjoni fil-Kumitat għall-Kummerċ u għall-Iżvilupp CARIFORUM-UE tal-Ftehim ta’ Sħubija Ekonomika bejn l-Istati tal-CARIFORUM, minn naħa, u l-Komunità Ewropea u l-Istati Membri tagħha, min-naħa l-oħra, rigward it-twaqqif ta’ Kumitat Speċjali għall-Agrikoltura u għas-Sajd għandha tiġi bbażata fuq l-abbozz tad-deċiżjoni, mehmuż ma' din id-deċiżjoni, tal-Kumitat għall-Kummerċ u għall-Iżvilupp CARIFORUM-UE.

Bidliet żgħar fl-abbozz tad-Deċiżjoni jista' jkun hemm qbil dwarhom mir-rappreżentanti tal-Unjoni fil-Kumitat għall-Kummerċ u għall-Iżvilupp CARIFORUM-UE, mingħajr ma tkun meħtieġa deċiżjoni oħra tal-Kunsill.

Artikolu 2

Din id-Deċiżjoni tidħol fis-seħħ fil-jum tal-adozzjoni tagħha.

Magħmul fi Brussell,

(1) ĠU L 289, 30.10.2008, p. 3.

IL-KUMMISSJONI EWROPEA

Brussell, 26.5.2016

COM(2016) 286 final

ANNESS

tal-

Proposta għal Deċiżjoni tal-Kunsill

dwar il-pożizzjoni li għandha tiġi adottata f’isem l-Unjoni Ewropea fil-Kumitat għall-Kummerċ u għall-Iżvilupp CARIFORUM-UE tal-Ftehim ta’ Sħubija Ekonomika bejn l-Istati tal-CARIFORUM, minn naħa, u l-Komunità Ewropea u l-Istati Membri tagħha, min-naħa l-oħra, rigward it-twaqqif ta’ Kumitat Speċjali għall-Agrikoltura u għas-Sajd

ABBOZZ

ID-DEĊIŻJONI NRU…/2016 TAL-KUMITAT GĦALL-KUMMERĊ U GĦALL-IŻVILUPP CARIFORUM-UE

stabbilit fi ħdan il-Ftehim ta’ Sħubija Ekonomika bejn l-Istati tal-CARIFORUM minn naħa, u l-Komunità Ewropea u l-Istati Membri tagħha, min-naħa l-oħra, rigward it-twaqqif ta' Kumitat Speċjali għall-Agrikoltura u għas-Sajd

IL-KUMITAT GĦALL-KUMMERĊ U GĦALL-IŻVILUPP CARIFORUM-UE

Wara li kkunsidra l-Ftehim ta' Sħubija Ekonomika bejn l-Istati tal-CARIFORUM minn naħa, u l-Komunità Ewropea u l-Istati Membri tagħha, min-naħa l-oħra (“il-Ftehim”), u b'mod partikolari l-Artikolu 230(4)(a) tiegħu,

Wara li kkunsidra r-Regoli ta’ Proċedura tal-Kumitat għall-Kummerċ u għall-Iżvilupp CARIFORUM-UE, stabbilit mill-Kunsill Konġunt CARIFORUM-UE fis-17 ta’ Mejju 2010 permezz tad-Deċiżjoni Nru 1/2010, u b’mod partikolari l-Artikolu 11 tagħha,

Billi:

Huwa xieraq li jiġi stabbilit Kumitat Speċjali għall-Agrikoltura u għas-Sajd sabiex jintlaħqu l-objettivi tad-dispożizzjonijiet tal-Ftehim dwar l-agrikoltura u s-sajd,

IDDEĊIEDA KIF ĠEJ:

Artikolu 1

1.Il-Kumitat Speċjali għall-Agrikoltura u għas-Sajd CARIFORUM-UE qiegħed b’dan jiġi stabbilit sabiex iwettaq il-funzjonijiet stabbiliti fl-Artikolu 2.

2.Il-Kumitat Speċjali għall-Agrikoltura u għas-Sajd CARIFORUM-UE għandu jkun ukoll forum għall-Partijiet sabiex jiskambjaw esperjenzi, informazzjoni u l-aħjar prattiki, u sabiex isseħħ konsultazzjoni dwar il-kwistjonijiet kollha relatati mal-objettivi stabbiliti fil-Kapitolu 5 tat-Titolu I tal-Parti II tal-Ftehim u li huma rilevanti għall-kummerċ bejn il-Partijiet.

Artikolu 2

Il-Kumitat Speċjali għall-Agrikoltura u għas-Sajd għandu:

(a)b'mod ġenerali janalizza mill-qrib l-aspetti kollha tal-Kapitolu 5 - Agrikoltura u Sajd - tat-Titolu I tal-Parti II, tal-Ftehim;

(b)b'mod ġenerali janalizza mill-qrib l-aspetti l-oħra kollha tal-Ftehim li jirrigwardaw l-agrikoltura u s-sajd, inklużi l-oqsma li ġejjin tat-Titolu I tal-Parti II – il-Kummerċ tal-merkanzija:

(i)Kapitolu 1 - Il-kwistjonijiet kollha marbutin mal-kummerċ ta’ prodotti agrikoli u tas-sajd, inklużi t-tariffi;

(ii)Kapitolu 3 - L-Artikolu 28 - Is-sussidji fuq l-esportazzjonijiet agrikoli;

(iii)Kapitolu 6 - L-ostakli tekniċi għall-kummerċ, f'dak li għandu x'jaqsam ma' prodotti agrikoli u tas-sajd; kif ukoll

(iv)Kapitolu 7 - Il-miżuri sanitarji u fitosanitarji, f'dak li għandu x'jaqsam ma' prodotti agrikoli u tas-sajd;

(c)b'mod ġenerali janalizza mill-qrib l-aspetti kollha tat-Titolu IV, il-Kapitolu 2 – L-Innovazzjoni u l-Proprjetà Intelletwali, peress li huma marbutin mal-prodotti agrikoli u tas-sajd, inkluż l-Artikolu 145 - L-indikazzjonijiet ġeografiċi u l-Artikolu 149 - Il-varjetajiet tal-pjanti;

(d)jimpenja ruħu fi djalogu dwar kwistjonijiet marbutin mal-agrikoltura u mas-sajd, inkluż fl-oqsma li ġejjin:

(i)il-produzzjoni, il-konsum u l-kummerċ agrikolu kif ukoll dwar l-iżviluppi rispettivi fis-suq tal-prodotti agrikoli u tas-sajd;

(ii)il-promozzjoni tal-investiment fis-setturi agrikoli, alimentari u tas-sajd inklużi l-attivitajiet fuq skala żgħira, u t-trasferiment tal-għarfien għal dawn is-setturi;

(iii)il-politiki, il-liġijiet u r-regolamenti dwar l-agrikoltura, l-iżvilupp rurali u s-sajd;

(iv)il-bidliet istituzzjonali u fil-politika meħtieġa sabiex ikunu sostnuti t-trasformazzjoni tas-setturi agrikoli u tas-sajd kif ukoll il-formulazzjoni u l-implimentazzjoni tal-politiki reġjonali dwar l-agrikoltura, l-ikel, l-iżvilupp rurali u s-sajd sabiex ikun hemm integrazzjoni reġjonali;

(v)it-teknoloġiji ġodda, ir-riċerka u l-innovazzjoni kif ukoll il-politiki u l-miżuri relatati mal-kwalità; kif ukoll

(vi)l-iżviluppi fil-politika kummerċjali dwar komoditajiet u prodotti agrikoli tradizzjonali, inklużi l-banana, ir-rum, ir-ross u z-zokkor;

(e)jassisti lill-Kumitat għall-Kummerċ u għall-Iżvilupp CARIFORUM-UE rigward il-funzjonijiet li ġejjin:

(i)biex jissorvelja u jkun responsabbli mill-implimentazzjoni tad-dispożizzjonijiet tal-Ftehim dwar l-agrikoltura u s-sajd u għall-applikazzjoni xierqa tagħhom, kif ukoll biex jiddiskuti u jirrakkomanda l-prijoritajiet ta’ kooperazzjoni f’dan ir-rigward;

(ii)biex jissorvelja l-elaborazzjoni ulterjuri tad-dispożizzjonijiet tal-Ftehim dwar l-Agrikoltura u s-Sajd, u biex jevalwa r-riżultati miksuba mill-applikazzjoni tiegħu;

(iii)jieħu azzjoni sabiex jevita tilwim u jsolvi tilwim li jista’ jinqala’ rigward l-interpretazzjoni jew l-applikazzjoni tad-dispożizzjonijiet tal-Ftehim dwar l-agrikoltura u s-sajd, skont id-dispożizzjonijiet tal-Parti III tiegħu;

(iv)biex jiddiskuti u jieħu azzjoni li tista' tiffaċilita l-kummerċ, l-investiment u l-opportunitajiet ta’ negozju fis-setturi tal-agrikoltura u tas-sajd bejn il-Partijiet; kif ukoll

(v)biex jiddiskuti kwistjonijiet marbutin mad-dispożizzjonijiet tal-Ftehim dwar l-agrikoltura u s-sajd u kull kwistjoni li tista’ taffettwa biex l-għanijiet tiegħu jintlaħqu;

(f)jagħmel rakkomandazzjonijiet lill-Kumitat għall-Kummerċ u għall-Iżvilupp CARIFORUM-UE bl-għan li tittejjeb l-implimentazzjoni u l-operat tad-dispożizzjonijiet tal-Ftehim dwar l-agrikoltura u s-sajd.

Artikolu 3

Il-Kumitat Speċjali għall-Agrikoltura u għas-Sajd jkun magħmula minn rappreżentanti tal-Kummissjoni Ewropea, minn naħa, u rappreżentanti tad-Direttorat tal-CARIFORUM u tal-Istati Firmatarji tal-CARIFORUM, min-naħa l-oħra.

Artikolu 4

Din id-Deċiżjoni tidħol fis-seħħ fil-(…)

Magħmul fi (…), fi (…) 2016.