IL-KUMMISSJONI EWROPEA
Brussell, 4.3.2016
COM(2016) 120 final
KOMUNIKAZZJONI MILL-KUMMISSJONI LILL-PARLAMENT EWROPEW, IL-KUNSILL EWROPEW U L-KUNSILL
Lura lejn Schengen - Pjan ta' Direzzjoni
1.Introduzzjoni
Schengen huwa fost l-akbar kisbiet tal-integrazzjoni Ewropea. Il-ħolqien ta' żona interna mingħajr fruntieri li fiha n-nies u l-merkanzija jistgħu jiċċirkulaw b'mod ħieles kien ta' benefiċċju sinifikanti kemm għaċ-ċittadini Ewropej kif ukoll għan-negozju. Schengen huwa wieħed mill-mezzi ewlenin li permezz tiegħu ċ-ċittadini Ewropej jistgħu jeżerċitaw il-libertajiet tagħhom, u li bih is-suq intern ikun jista' jiffjorixxi u jiżviluppa.
Madankollu fix-xhur reċenti s-sistema ħadet theżżiża sal-qalba tagħha mid-daqs tal-isfida li taffaċċa l-ikbar kriżi ta' refuġjati mit-Tieni Gwerra Dinjija 'l hawn. Il-kunflitt u l-kriżi fis-Sirja u mkejjen oħra fir-reġjun wasslu għal għadd mingħajr preċedent ta' refuġjati u migranti li qed jaslu fl-Unjoni Ewropea, li min-naħa l-oħra kixfu nuqqasijiet serji f'partijiet mill-fruntieri esterni tal-Unjoni, u rriżultaw f'li xi Stati Membri qegħdin jieħdu approċċ permissiv. Dan wassal għall-ħolqien ta' rotta mill-Balkani tal-Punent li tara lill-migranti jivvaġġaw malajr lejn it-tramuntana. B'reazzjoni, bosta Stati Membri rrikorrew għall-introduzzjoni mill-ġdid ta' kontrolli fil-fruntieri interni temporanji, li qajmet dubji dwar it-tħaddim xieraq tal-ispazju ta' moviment liberu ta' Schengen u l-benefiċċji tiegħu għaċ-ċittadini Ewropej u l-ekonomija Ewropea. Għaldaqstant, huwa tal-akbar importanza għall-Unjoni Ewropea kollha kemm hi li z-żona Schengen, mingħajr kontrolli fil-fruntieri interni, tiġi lura għal li kienet.
Dan kien rikonoxxut mill-Kunsill Ewropew tat-18 u d-19 ta' Frar li ta mandat ċar li jiġi restwrat, b'mod kunċertat, it-tħaddim normali taż-żona Schengen filwaqt li jingħata sostenn sħiħ lill-Istati Membri fl-iktar ċirkostanzi diffiċli.
Hemm bżonn jittieħdu azzjonjiet fi tliet oqsma biex is-sistema tal-ġestjoni tal-fruntieri Schengen terġa' lura għan-normal. L-ewwel, hemm bżonn li jittieħdu passi biex isir rimedju għan-nuqqasijiet serji li ġew identifikati fil-ġestjoni mill-Greċja tal-fruntiera esterna. L-Istati Membri, l-Aġenziji tal-UE, u l-Kummissjoni għandhom ilkoll jgħinu lill-Greċja f'dan ir-rispett. It-tieni, l-approċċ permissiv għandu jintemm. L-Istati Membri jridu jieħdu r-responsabbiltajiet tagħhom u jimxu mal-liġi tal-UE, kemm meta jagħtu aċċess għall-proċedura ta' ażil għal min ikun qed jitolbu, kif ukoll meta jiċħdu d-dħul mill-fruntiera ta' min ma jissodisfax il-kundizzjonijiet tad-dħul; skont il-liġi tal-UE, l-applikanti għall-ażil ma għandhomx id-dritt li jagħżlu l-Istat Membru li jagħtihom il-protezzjoni. It-tielet, it-taħlita preżenti ta' deċiżjonijiet unilaterali dwar ir-rintroduzzjoni tal-kontroll fil-fruntieri trid tiġi sostitwita b'approċċ koordinat lejn il-kontrolli temporanji fil-fruntieri, bil-għan li sussegwentement kull kontroll fuq il-fruntiera intern jitneħħa malajr kemm jista' jkun, bil-mira ċara li dan isir sad-data ċara ta' Diċembru 2016. Il-Kodiċi tal-Fruntieri ta' Schengen jiddisponi b'mod ċar li jsir dan l-approċċ koordinat.
Il-kriżi preżenti wkoll issottolinjat ir-rabtiet strutturali viċini bejn il-ġestjoni tal-fruntieri u oqsma relatati. In-nuqqas ta' kontrolli fil-fruntieri interni għandu jimxi id f'id mal-inkwadrar ta' politika komuni dwar l-ażil, l-immigrazzjoni u l-kontroll tal-fruntieri esterni, imsejsa fuq is-solidarjetà bejn l-Istati Membri, u li tkun ġusta fir-rigward ta' ċittadini ta' pajjiżi terzi. Għaldaqstant huwa essenzjali li jsir qbil dwar il-Gwardja Ewropea tal-Fruntiera u tal-Kosta u li din tiġi adottata sa Ġunju l-iktar sabiex tkun tista' tibda taħdem fis-sajf, biex tiżgura li l-Unjoni Ewropea tkun tista' twettaq ir-responsabbiltà konġunta li jiġu mħarsa l-fruntieri esterni. Barra minn hekk, sfidi relatati li huma lil hinn mill-kontroll fil-fruntieri jeħtieġ li jiġu indirizzati sabiex joħolqu l-kunfidenza meħtieġa biex jiġi restawrat it-tħaddim sħiħ taż-żona Schengen, kif miktub il-Komunikazzjoni tal-Kummissjoni tal-10 ta' Frar. Dan jinkludi b'mod partikolari tnaqqis sostanzjali fil-fluss ta' migranti irregolari lejn il-Greċja, billi ssir ħidma mat-Turkija biex jiġi implimentat il-Pjan ta' Azzjoni Konġunt, u bis-sostenn tan-NATO. L-applikazzjoni sħiħa tar-regoli Dublin eżistenti għandha tiġi lura għal li kienet, bil-parteċipazzjoni sħiħa tal-Greċja, b'konformità mar-rakkomandazzjoni tal-Kummissjoni tal-10 ta' Frar, filwaqt li dawn ir-regoli jiġu mtejba għall-ġejjieni, imsejsa fuq l-għan tas-solidarjetà u l-qsim ġust tar-responsabbiltà bejn l-Istati Membri. L-iskemi ta' rilokazzjoni ta' emerġenza li hemm fis-seħħ minn Settembru 2015 iridu jipproduċu riżultati konkreti f'termini ta' volumi sinifikanti ta' persuni li jiġu rilokati mill-Greċja. Dawk in-nies li ma għandhomx dritt jibqgħu fl-Unjoni Ewropea jridu jiġu mibgħuta lura effettivament.
Meħudin f'daqqa u b'mod koordinat, dawn il-miżuri se jħejju s-sisien għal ritorn lejn żona Schengen li qiegħda taħdem b'mod normali, sa mhux aktar tard minn tmiem l-2016. Dan il-pjan ta' direzzjoni jistipula l-passi li jeħtieġu li jsiru sabiex dan l-għan jinkiseb.
2.Il-prezz tan-nuqqas tax-Schengen
L-introduzzjoni mill-ġdid tal-kontrolli fil-fruntieri interni fuq bażi mtawla fl-UE ma ssolvix l-isfidi tal-kriżi tal-migrazzjoni, iżda ġġib magħha spejjeż ekonomiċi, politiċi u soċjali enormi għall-UE u l-Istati Membri individwali. Din ukoll tqiegħed riskju li tipperikola l-kooperazzjoni ġudizzjarja u tal-pulizija, li saret wieħed mill-elementi ewlenin tal-valur miżjud li jiġi mis-sistema ta' Schengen.
L-istabbilizzazzjoni tas-sistema ta’ Schengen permezz tal-użu tal-mekkaniżmi ta’ salvagwardja tagħha hija essenzjali sabiex jiġi żgurat li eventwalment jitneħħew il-kontrolli fuq il-fruntieri interni kollha. Li dan ma jsirx mhux biss iċaħħad lin-nies mill-benefiċċji enormi tal-moviment liberu bejn il-fruntieri, iżda jimponi spejjeż enormi fuq l-ekonomija tal-UE kollha kemm hi billi jagħmel ħsara lis-Suq Uniku. Minn perspettiva ekonomika, il-Kummissjoni stmat li l-istabbiliment mill-ġdid sħiħ tal-fruntieri interni biex jissorvelja l-moviment tal-persuni fiż-żona Schengen jiġġenera spejjeż diretti għall-ekonomija tal-UE f'medda bejn EUR 5 biljun u EUR 18-il biljun. Dawn l-ispejjeż ikunu kkonċentrati fuq ċerti atturi u reġjuni iżda ma jistax ikun evitat li jaffettwaw lill-ekonomija tal-UE kollha kemm hi.
L-iskambju liberu tal-merkanzija fl-UE bħalissa jammonta għal iktar minn EUR 2 800 biljun fil-valur u 1 700 miljun tunnellata ta' volum. L-ogħla u l-iktar impatt immedjat tal-kontrolli fuq il-fruntieri jinħassu mis-settur tal-kummerċ bit-triq, bi spiża diretta addizzjonali kull sena ta' EUR 1,7 biljun sa EUR 7,5 biljun addizzjonali. Stati Membri bħall-Polonja, in-Netherlands jew il-Ġermanja jaffaċċaw iktar minn EUR 500 miljun fi spejjeż addizzjonali għat-trasport bit-triq tal-merkanzija, filwaqt li oħrajn, bħal Spanja jew ir-Repubblika Ċeka jispiċċaw bin-negozji tagħhom iħallsu iktar minn EUR 200 miljun fi spejjeż żejda. Dawn l-ispejjeż se jkollhom impatt partikolarment dannuż fuq is-setturi li joperaw b'marġni żgħar u / jew fejn it-trasport jirrappreżenta proporzjon għoli tal-ispejjeż. Fost is-setturi li jistgħu jkunu partikolarment affettwati nsibu s-settur agrikolu u dak kimiku, kif ukoll it-trasport tal-materja prima. Fit-terminu medju ta' żmien, l-ispejjeż tat-trasport li jistgħu jiżdiedu għal xejn minħabba dewmien fil-kontrolli fil-fruntieri jistgħu jagħmlu ħsara lill-iżvilupp effiċjenti tal-ktajjen tal-valur tal-UE u l-kompetittività tal-ekonomija tal-UE kollha kemm hi.
Hemm 1,7 miljun ħaddiem fl-UE li jaqsmu fruntiera biex imorru x-xogħol kuljum. Il-kontrolli fil-fruntiera jiswew lill-ħaddiema jew vjaġġaturi oħra bejn EUR 1,3 biljun u EUR 5,2 biljun f'termini ta' ħin mitluf. Barra minn hekk, żvantaġġ iktar importanti ta' stennijiet twal fil-fruntiera huwa li n-nies jiġu skoraġġuti milli jfittxu opportunitajiet ta' xogħol transfruntieri, u dan inaqqas l-ammont disponibbli ta' ħaddiema potenzjali. Dan, f'terminu medju ta' żmien, inaqqas l-effiċjenza ekonomika ta' xi reġjuni.
Il-Kummissjoni tistma li tal-anqas 13-il miljun lejl turistiku jistgħu jintilfu fl-UE minħabba fit-tnaqqis ta' mawriet turistiċi kkawżat minn kontrolli fil-fruntiera ingumbranti, bi spiża totali ta' EUR 1,2 biljun għas-settur turistiku. Jekk il-kontrolli fil-fruntieri jġibu magħhom ukoll frammet tal-politika komuni dwar il-viżi tal-UE, l-impatt potenzjali għall-industrija tat-turiżmu jista' jimmultiplika (bejn EUR 10 biljun u EUR 20 biljun). Jekk aġenti tal-ivvjaġġar li jippruvaw jimminimizzaw l-għadd ta' pajjiżi li jżuru turisti ġejjin mill-bogħod li jrendu ħafna, bħal turisti mill-Asja, dan iweġġa' lid-destinazzjonijiet turistiċi tal-UE kollha ħlief dawk l-iktar popolari.
Finalment, bejn EUR 0,6 biljun u EUR 5,8 biljun fi spejjeż amministrattivi se jkollhom jitħallsu mill-gvernijiet minħabba l-bżonn ta' iktar persunal għall-kontrolli fil-fruntieri. L-investiment fl-infrastruttura neċessarja jżid bosta biljuni.
L-ispejjeż spjegati fuq l-iktar li jirriflettu huma l-effetti tal-ewwel ordni tal-kontrolli fil-fruntieri. L-ispejjeż fuq terminu medju ta' żmien u indiretti jistgħu jkunu ferm ogħla, b'impatt mingħajr preċedent fuq il-kummerċ, l-investiment u l-mobilità intrakomunitarji.
Mill-perspettiva taċ-ċittadini, l-introduzzjoni mill-ġdid tal-kontrolli fil-fruntieri fl-UE tagħmel ħsara lil-libertà taċ-ċittadini li jivvjaġġaw, li hija waħda mill-egħżeż kisbiet tal-UE. Din tirriskja li teqred waħda mill-kisbiet ċentrali tal-integrazzjoni Ewropea u l-bini ta' spazju Ewropew kondiviż.
3.L-iżgurar tal-protezzjoni tal-fruntieri esterni
Il-kriżi migratorja u tar-refuġjati, li ma kellhiex preċedent, wasslet għal diffikultajiet serji biex bosta Stati Membri jiżguraw il-kontrolli tal-fruntieri esterni effiċjenti, b'konformità mal-acquis ta' Schengen, u biex jirċievu u jipproċessaw il-migranti li jkunu ġejjin. Il-Greċja, l-iktar minħabba l-qagħda ġeografika tagħha, qiegħda tkun affettwata b'mod partikolari minn dawn l-iżviluppi minħabba bidla fil-flussi migratorji, bir-riżultat li l-Baħar Eġew sar l-iktar żona esposta għall-migrazzjoni irregolari. Fl-2015, iktar minn 868 000 ruħ daħlu fiż-żona Schengen irregolarment minn din is-sezzjoni tal-fruntiera esterna. Dan l-influss massiv huwa tat-tip li jitfa' pressjoni qawwija fuq il-kontroll fil-fruntiera esterna ta' kwalunkwe Stat Membru. Madankollu, dan ifisser li hemm bżonn immedjat li n-nuqqasijiet preżenti fil-protezzjoni tal-fruntiera esterna minn u fil-Greċja jiġu indirizzati. Din hija primarjament ir-responsabbiltà tal-Greċja, iżda fl-aħħar mill-aħħar tal-Unjoni kollha kemm hi. Il-fruntieri esterni tal-Greċja huma wkoll il-fruntieri esterni ta' kull membru taż-żona Schengen. Li l-Greċja jerġa' jkollha fruntiera esterna b'saħħitha hija parti indispensabbli minn sforzi usa' biex il-politika tal-ażil, il-migrazzjoni u l-fruntieri tiġi stabbilizzata, inkluż l-għan li Greċja terġa' lura għas-sistema ta' Dublin.
Fil-kriżi attwali, saru evidenti nuqqasijiet strutturali usa' fil-mod li bih il-fruntieri esterni tal-Unjoni qegħdin jiġu mħarsa. Biex tindirizzahom, il-Kummissjoni ppreżentat proposta ambizzjuża għal Gwardja Ewropea tal-Fruntiera u tal-Kosta f'Diċembru 2015. Huwa kruċjali li l-koleġiżlaturi, il-Parlament Ewropew u l-Kunsill, jadottaw ir-Regolament propost mingħajr dewmien, sa mhux iktar tard minn Ġunju, biex din tkun tista' tibda taħdem fis-sajf biex tiżgura livell għoli ta' protezzjoni tal-fruntieri esterni. Għal dan il-għan:
L-Istati Membri jridu diġà minn issa jibdew jagħmlu t-tħejjijiet meħtieġa għall-ippuljar tar-riżorsi mandatorju.
Fil-frattemp, l-Istati Membri għandhom, b'mod volontarju, iżidu l-appoġġ li jagħtu lill-operazzjonijiet konġunti tal-Frontex u l-interventi rapidi fil-fruntieri, partikolarment bħalissa fil-Greċja.
Fil-limiti tal-mandat preżenti tagħha, il-Frontex, b'koordinazzjoni mal-Aġenzija Ewropea għall-Kontroll tas-Sajd u l-Aġenzija Ewropea għas-Sigurtà Marittima, għandha wkoll tieħu l-passi kollha possibbli biex tħejji għall-istabbiliment tal-Gwardja Ewropea tal-Fruntiera u tal-Kosta. B'mod partikolari, il-Frontex għandha tagħmel passi ta' tħejjija biex tippermetti lill-Gwardja Ewropea tal-Fruntiera u tal-Kosta, ladarba tibda taħdem, biex mill-ewwel twettaq l-ewwel testijiet ta' vulnerabbiltà skont il-mekkaniżmi ta' valutazzjoni u l-prevenzjoni tar-riskji, u tlestihom sa mhux aktar tard minn Settembru. Dan huwa partikolarment relevanti minħabba li r-rotot migratorji jistgħu jinbidlu, u s-sezzjonijiet kollha tal-fruntieri esterni tal-UE għandhom ikunu siguri.
3.1.L-indirizzar tan-nuqqasijiet fil-ġestjoni tal-fruntieri esterni fil-Greċja
Il-Kummissjoni adottat rapport ta' evalwazzjoni tax-Schengen fit-2 ta' Frar 2016, abbażi ta' żjarat fil-post mhux imħabbra fil-fruntiera fuq l-art bejn il-Greċja u t-Turkija u fil-Gżejjer ta' Chios u Samos, li saru mill-10 sat-13 ta' Novembru 2015. B'riżultat, fit-12 ta' Frar 2016, il-Kunsill adotta sett ta' 50 rakkomandazzjoni lill-Greċja biex tirranġa nuqqasijiet serji fil-ġestjoni tal-fruntieri esterni. Ir-rakkomandazzjoni jikkonċernaw b'mod partikolari l-identifikazzjoni, ir-reġistrazzjoni u t-teħid tal-marki tas-swaba' tal-migranti irregolari, u s-sorveljanza fil-fruntieri marittimi.
Il-Mekkaniżmu ta' Evalwazzjoni ta' Schengen u l-Kodiċi tal-Fruntieri ta' Schengen stabbilixxa proċedura ċara biex jiġu indirizzati n-nuqqasijiet serji identifikati.
Filwaqt li rrikonoxxiet it-titjib li kien diġà sar miż-żjara fil-post ta' Novembru 2015, fl-24 ta' Frar il-Kummissjoni adottat deċiżjoni ta' implimentazzjoni li tistabbilixxi rakkomandazzjonijiet dwar miżuri speċifiċi li kellhom jittieħdu mill-Greċja, kif jiddisponi l-Kodiċi dwar il-Fruntieri ta' Schengen. Dawn il-miżuri huma ddiżinjati bil-għan li jiżguraw konformità sħiħa mill-Greċja mar-rakkomandazzjonijiet tal-Kunsill. L-implimentazzjoni ta' dawn il-miżuri taqdi l-iskop li tiġi żgurata s-sorveljanza tal-fruntieri adegwata (inkluż is-sejbien u l-qbid), kif ukoll l-identifikazzjoni, ir-reġistrazzjoni u l-ilqugħ korrett u sħiħ ta' ċittadini ta' pajjiżi terzi li qasmu l-fruntiera esterna b'mod irregolari, u r-ritorn ta' dawk li ma jeħtiġux protezzjoni. Dan japplika wkoll għall-kontrolli ta' ħruġ iktar b'saħħithom fil-fruntiera bejn il-Greċja u dik li kienet ir-Repubblika Jugoslava tal-Maċedonja. B'dan il-mod, dawn il-miżuri jiżguraw li ż-żona Schengen kollha kemm hi taħdem kif suppost.
Fil-qafas li jistabbilixxi l-Kodiċi tal-Fruntieri ta' Schengen, jeħtieġ li jittieħdu l-passi li ġejjin biex fil-ħarsien tal-fruntieri esterni fil-Greċja r-regoli ta' Schengen jerġgħu jibdew jiġu applikati b'mod ordinat:
It-12 ta' Marzu 2016: Il-Greċja għandha tippreżenta l-pjan ta' azzjoni tagħha (meħtieġ sa mhux iktar tard minn xahar wara l-adozzjoni tar-rakkomandazzjonijiet tal-Kunsill). Sal-istess data (imbagħad kull xahar), il-Greċja għandha tagħmel rapporti lill-Kummissjoni dwar il-progress li jkun sar fl-implimentazzjoni tar-rakkomandazzjonijiet tal-Kummissjoni tal-24 ta' Frar 2016.
It-12 ta' April 2016: wara li tkun ikkonsultat mal-esperti tal-Istati Membri involuti fiż-żjarat fil-post f'Novembru 2015, mhux iktar tard minn xahar wara l-preżentazzjoni tal-pjan ta' azzjoni, il-Kummissjoni se tippreżenta l-valutazzjoni tagħha tal-adegwatezza ta' dan il-pjan ta' azzjoni lill-Kunsill. L-Istati Membri l-oħra jiġu mistiedna jikkummentaw dwar il-pjan ta' azzjoni.
Mill-11 sas-17 ta' April 2016: se titwettaq evalwazzjoni ta' Schengen mill-esperti tal-Istati Membri u l-Kummissjoni tal-fruntieri tal-arja, l-art u l-baħar tal-Greċja. Il-programm għall-evalwazzjoni tal-fruntieri tal-art u l-baħar jinkludi xi lokalitajiet miżjura f'Novembru 2015 (il-fruntiera fuq l-art mat-Turkija, u l-Gżira Samos). L-informazzjoni miġbura waqt din iż-żjara ta' evalwazzjoni se tkun disponibbli jiem wara ż-żjara.
It-12 ta' Mejju 2016: mhux iktar tard minn din id-data, il-Greċja għandha tirrapporta dwar l-implimentazzjoni tar-rakkomandazzjonijiet tal-Kunsill.
Fuq il-bażi tal-informazzjoni kollha li jkollha disponibbli, il-Kummissjoni se tivvaluta mingħajr dewmien jekk il-Greċja hijiex tissodisfa l-obbligi tagħha skont il-Kodiċi tal-Fruntieri ta' Schengen u sa liema punt in-nuqqasijiet serji fil-ġestjoni tal-fruntieri esterni fil-Greċja jkunu ġew rimedjati.
3.2.Sostenn immedjat għall-Greċja
Id-diffikultajiet li taffaċċa l-Greċja fil-protezzjoni tal-fruntiera esterna għandhom impatt fuq l-Unjoni Ewropea kollha kemm hi. Għaldaqstant huwa neċessarju li l-Istati Membri l-oħrajn juru solidarjetà u kollettivament jieħdu responsabbiltà biex jindirizzaw is-sitwazzjoni. L-Aġenziji tal-UE u l-Kummissjoni wkoll għandhom jgħinu lill-Greċja. Iktar preċiżament, l-Istati Membri, l-Aġenziji tal-UE, u l-Kummissjoni għandhom jappoġġaw lill-Greċja hi u timplimenta r-Rakkomandazzjonijiet li jkunu sarulha mill-Kunsill u l-Kummissjoni fir-rigward tal-passi li ġejjin:
L-esperti tal-Kummissjoni fil-post fil-Greċja għandhom ikomplu jikkooperaw mill-qrib mal-awtoritajiet responsabbli Griegi u jikkoordinaw l-azzjoni tal-atturi l-oħrajn involuti (Frontex, l-Uffiċċju Ewropew ta' Appoġġ fil-qasam tal-Ażil, l-Europol, l-awtoritajiet nazzjonali ta' Stati Membri oħra, u organizzazzjonijiet internazzjonali). Fost l-azzjonijiet, għandu jkun hemm identifikazzjoni u reġistrazzjoni ta' 100 % tal-entrati kollha, inklużi verifiki ta' sigurtà sistematiċi fil-konfront ta' bażijiet tad-dejta.
Meta tippreżenta l-pjan ta' azzjoni tagħha (mhux iktar tard mit-12 ta' Marzu), il-Greċja għandha, fl-istess ħin, tippreżenta valutazzjoni ċara tal-ħtiġijiet. Din tippermetti lil Stati Membri oħra, l-Aġenziji tal-UE, u l-Kummissjoni biex jipprovdu appoġġ fil-ħin lill-Greċja skont il-ħtiġijiet identifikati.
Il-Frontex għandha mill-ewwel tivvaluta l-valutazzjoni tal-ħtiġijiet tal-Greċja biex tħejji għal iktar skjerament ta' timijiet tal-Gwardja tal-Fruntiera Ewropea. Jekk ikun meħtieġ, il-Frontex għandha tvara sejħiet addizzjonali għall-kontribuzzjonijiet mhux iktar tard mit-22 ta' Marzu.
L-Istati Membri l-oħra mbagħad għandhom jieħdu r-responsabbiltà tagħhom, u jirrispondu għal dawn is-sejħiet f'mhux iktar żmien minn għaxart (10) ijiem billi jipprovdu riżorsi umani u tagħmir tekniku.
4.L-applikazzjoni tar-regoli u t-tmiem tal-approċċ permissiv
4.1.It-tmiem tal-approċċ permissiv u r-restawr tat-trasferimenti Dublin għall-Greċja
Approċċ permissiv la huwa aċċettabbli politikament u lanqas legalment. Politikament, il-konklużjonijiet adottati mill-Kunsill Ewropew fil-laqgħa tiegħu tat-18 u d-19 ta' Frar jitolbu li jkun hemm "tmiem tal-approċċ permissiv". Minflok deċiżjonijiet unilaterali, għandu jiġi implimentat l-approċċ miftiehem għal kooperazzjoni u koordinazzjoni aħjar bejn il-pajjiżi li jinsabu fir-rotta tal-Balkani tal-Punent.
Legalment, f'konformità mal-Artikolu 6 tad-Direttiva dwar il-Proċeduri tal-Ażil, jekk ċittadin ta' pajjiż terz jitlob l-ażil fi Stat Membru, inkluż meta l-applikazzjoni ssir fil-fruntiera, l-Istat Membru jrid jagħti aċċess għall-proċedura ta' ażil lil dik il-persuna. Il-kwistjoni ta' jekk dak l-Istat Membru jibqax responsabbli hu biex jitratta l-applikazzjoni partikolari mbagħad tkun deċiża skont id-dispożizzjonijiet relevanti tal-liġi tal-UE, partikolarment ir-Regolament ta' Dublin.
F'dak ir-rigward, il-Komunikazzjoni tal-Kummissjoni tal-10 ta' Frar issottolinjat li jekk is-Sistema Ewropea Komuni tal-Ażil se taħdem kif suppost, għandu jkun hemm l-opportunità ta' veru li l-applikanti għall-ażil jiġu ritornati lejn il-pajjiż li minnu jkunu daħlu l-ewwel fl-UE ("trasferimenti Dublin"), kif previst mir-regoli tal-UE komunament maqbula. Għalhekk, fl-10 ta' Frar il-Kummissjoni adottat Rakkomandazzjoni li telenka l-passi konkreti meħtieġa biex Greċja terġa' lura fis-sistema ta' Dublin. Ir-rapportar mill-Greċja dwar il-progress tagħha fl-implimentazzjoni tal-azzjonijiet rakkomandati, kif ukoll kontribuzzjonijiet oħra bħar-rapporti mill-Kumitat tal-Ministri tal-Kunsill tal-Ewropa dwar l-eżekuzzjoni ta' sentenzi u mill-UNCHR, se jikkjarifikaw il-valutazzjoni jekk il-kundizzjonijiet humiex tali li jippermettu lill-Istati Membri jkomplu t-trasferimenti individwali lejn il-Greċja skont ir-Regolament ta' Dublin, filwaqt li jiġi kkunsidrat li l-volum ta' trasferimenti u l-kategoriji ta' nies li jridu jiġu trasferiti jkollu jikkorespondi mal-progress speċifiku li jkun qed isir. Min-naħa tagħha, il-Kummissjoni se tagħmel il-valutazzjoni tagħha tal-kwistjoni qabel il-Kunsill Ewropew ta' Ġunju.
Fl-istess waqt, l-Istati Membri jridu jirrifjutaw li jdaħħlu mill-fruntiera esterna lil ċittadini ta' pajjiżi terzi li ma jissodisfawx il-kundizzjonijiet tad-dħul fit-territorju li jipprovdi l-Artikolu 5 tal-Kodiċi tal-Fruntieri ta' Schengen, inklużi ċittadini ta' pajjiżi terzi li ma jkunux applikaw għall-ażil minkejja li kellhom l-opportunità li jagħmlu dan. Għal Stati Membri li rrintroduċew il-kontrolli fil-fruntieri interni tagħhom, dawn l-Istati Membri jridu wkoll jirrifjutaw li jdaħħlu mill-fruntieri interni tagħhom lil ċittadini ta' pajjiżi terzi li ma jissodisfawx il-kundizzjoni għad-dħul fit-territorju. Dan irrispettivament mill-intenzjoni taċ-ċittadin ta' pajjiż terz li japplika għall-ażil fi Stat Membru ieħor.
L-approċċ permissiv huwa inkompatibbli mar-regoli ta' Schengen u ta' Dublin, iħeġġeġ il-movimenti sekondarji u għandu jintemm. Barra minn hekk, dan l-approċċ jimmina t-tħaddim tajjeb tal-iskema ta' rilokazzjoni, u għalhekk huwa waħda mir-raġunijiet għall-implimentazzjoni fqira tad-deċiżjonijiet ta' rilokazzjoni li saru s'issa. Għaldaqstant, it-tmiem koordinat tal-approċċ permissiv huwa rekwiżit għat-tħaddim tas-sistemi ta' Schengen u ta' Dublin, kif ukoll tal-iskema ta' rilokazzjoni.
4.2.Għajnuna biex il-Greċja timmaniġġa l-pressjoni migratorja
Fil-Komunikazzjoni tagħha tal-10 ta' Frar, il-Kummissjoni identifikat xejra mar-rotta tal-Balkani tal-Punent lejn l-issikkar gradwali tal-kontrolli fuq il-fruntieri li fl-aħħar tista' tispiċċa fl-għeluq tagħhom. Din ix-xejra aċċellerat u wasslet għall-għeluq intermittenti tal-fruntiera bejn dik li kienet ir-Repubblika Jugoslava tal-Maċedonja u l-Greċja, parzjalment b'reazzjoni għal restrizzjonijiet jew għeluq li saru f'pajjiżi oħra mar-rotta.
Minħabba li l-influss ta' migranti għal ġol-Greċja ma naqasx, hemm għadd dejjem jikber ta' migranti maqbuda fil-Greċja. Għandhom jittieħdu passi urġenti biex tiġi indirizzata l-kriżi umanitarja li qed tikber fil-Greċja u biex tiġi allevjata l-pressjoni migratorja li qed taffaċċa:
L-implimentazzjoni tal-Pjan ta' Azzjoni UE-Turkija u tal-iskema ta' ammissjoni umanitarja volontarja mat-Turkija għandha twassal għal tnaqqis fin-numru ta' usil fil-Greċja; fir-rigward ta' dan, iktar kemm jieħdu sehem Stati Membri f'din l-iskema, iktar il-prospetti biex tiġi miġġielda l-immigrazzjoni irregolari fil-Baħar Eġew ikunu tajbin.
Ir-ripatrijazzjoni ta' persuni li ma jkollhomx dritt jibqgħu u li ma għandhom l-ebda bżonn ta' protezzjoni internazzjonali lejn il-pajjiżi tal-oriġini u ta' tranżitu, inkluża t-Turkija, għandha wkoll tnaqqas l-għadd ta' migranti irregolari preżenti fil-Greċja. Il-Greċja għandha taċċellera r-riammissjonijiet, b'mod partikolari mat-Turkija, abbażi tal-ftehimiet ta' riammissjoni eżistenti applikabbli u bis-sostenn ta' Stati Membri oħra.
L-iskemi ta' rilokazzjoni miftehma huma għodod essenzjali biex inaqqsu l-piż fuq l-Istati Membri taħt l-akbar pressjoni u biex jitreġġa lura l-ordni fil-ġestjoni tal-migrazzjoni. Fil-każ tal-Greċja, dawn saru għodda ta' assistenza umanitarja. L-Istati Membri jridu jżidu r-rata ta' rilokazzjoni, billi jħaffu l-ipproċessar b'konformità mal-ħtieġa li jitwettqu kontrolli tas-sigurtà kif suppost. Il-Kummissjoni tinsab lesta biex tagħti assistenza amministrattiva u loġistika. B'konformità mal-iskemi, l-Istati Membri għandhom ukoll jieħdu l-passi kollha biex irażżnu l-movimenti sekondarji billi jirrikjedu r-ritorn immedjat lejn l-Istat Membru ta' rilokazzjoni u billi jieħdu l-miżuri preventivi neċessarji fil-qasam tal-aċċess għall-benefiċċji soċjali u r-rimedji legali, b'konformità mal-liġi tal-Unjoni.
L-assistenza umanitarja għall-Greċja għandha tiżdied, u tiġi ffaċilitata permezz tal-adozzjoni u l-implimentazzjoni rapida tal-proposta tal-Kummissjoni dwar il-provvediment ta' sostenn ta' emerġenza fl-Unjoni.
B'żieda, l-akkumulazzjoni tal-pressjoni migratorja fil-Greċja tista' twassal għall-użu miżjud ta' rotot alternattivi fir-reġjun usa' tal-Balkani. L-UE għandha tuża l-istrumenti kollha disponibbli (informazzjoni mill-Istati Membri, is-SEAE, il-Kummissjoni, il-Frontex, is-satellita Copernicus) biex tissorvelja l-flussi migratorji u biex tantiċipa kwalunkwe bidliet fir-rotta. Hija għandha tfittex ukoll li tintensifika l-koordinazzjoni ma' pajjiżi li jistgħu jkunu ta' tranżitu bħall-Albanija, il-Montenegro u l-Bożnija-Ħerzegovina.
5.Kontrolli fil-fruntieri interni: minn taħlita għal approċċ koerenti
5.1.Is-sitwazzjoni attwali: l-introduzzjoni mill-ġdid ta' kontrolli fil-fruntieri interni
Minn Settembru 2015, b'kollox tmien pajjiżi taż-żona Schengen daħħlu l-kontrolli fil-fruntieri interni tagħhom minħabba theddida serja għas-sigurtà interna u l-ordni pubbliku marbuta ma' movimenti sekondarji ta' migranti irregolari. Il-pajjiżi konċernati huma l-Belġju, id-Danimarka, il-Ġermanja, l-Ungerija, l-Awstrija, is-Slovenja, l-Iżvezja u n-Norveġja. Id-deċiżjonijiet unilaterali notifikati mill-Istati Membri jirreferu għall-influss ta' numri kbar ta' persuni mingħajr dokumenti jew mingħajr dokumenti adegwati, inklużi minuri, li ma kinux ġew irreġistrati malli daħlu fl-UE, u l-fatt li dawn il-movimenti massivi jwasslu l-kapaċitajiet ta' lqugħ tal-awtoritajiet nazzjonali rispettivi fix-xifer, u huma ta' theddida serja għall-ordni pubbliku jew is-sigurtà interna.
Filwaqt li l-kontrolli fil-fruntiera interna tas-Slovenja u l-Ungerija tneħħew fil-frattemp, il-pajjiżi l-oħra tawlu d-durata tal-kontrolli f'bosta okkażjonijiet, b'konformità mal-Kodiċi tal-Fruntieri ta' Schengen.
Fit-tmien każi kollha l-pajjiżi bbażaw id-deċiżjoni dwar l-introduzzjoni mill-ġdid tal-fruntieri interni fuq id-dispożizzjoni għal każijiet li jeħtieġu azzjoni immedjata (l-Artikolu 25 tal-Kodiċi tal-Fruntieri ta' Schengen), li jippermetti l-introduzzjoni mill-ġdid tal-kontrolli fil-fruntieri interni għal tul ta' żmien sa xahrejn. Minħabba li s-sitwazzjoni ma tjibitx sinifikantement, il-kontrolli ġew sussegwentement imtawla abbażi tal-Artikoli 23 u 24 tal-Kodiċi tal-Fruntieri ta' Schengen, li jippermetti li jerġgħu jiddaħlu l-kontrolli fil-fruntieri interni għal massimu ta' sitt xhur. Għall-informazzjoni ddettaljata dwar id-dati tar-rintroduzzjoni tal-kontrolli fil-fruntieri interni u l-estensjoni tad-durata tagħhom, ara l-ħarsa ġenerali fl-Anness I.
Franza reġgħet daħħlet il-kontrolli fil-fruntieri interni f'Novembru 2015 għal raġunijiet mhux marbuta mal-migrazzjoni irregolari. Il-kontrolli l-ewwel ġew introdotti fil-kuntest tal-Konferenza COP21, imbagħad bħala konsegwenza tal-istat ta' emerġenza li segwa l-attakki terroristiċi li saru Pariġi fit-13 ta' Novembru 2015. Il-kontrolli fil-fruntieri interni fi Franza għadhom għaddejjin. Kontrolli ta' din ix-xorta huma meħtieġa jkunu wkoll konformi mal-provvedimenti tal-Kodiċi tal-Fruntieri ta' Schengen dwar l-introduzzjoni ta' kontrolli fil-fruntiera temporanji. Din il-Komunikazzjoni ma tindirizzax kontrolli fil-fruntieri interni li ġew introdotti għal raġunijiet mhux marbuta mal-migrazzjoni irregolari. Huwa ċar li l-intenzjoni li jkun hemm ritorn għan-normalità ma jkunx jeskludi l-possibiltà li jitqiegħdu fis-seħħ kontrolli tas-sigurtà temporanji, b'konformità mal-Kodiċi tal-Fruntieri ta' Schengen.
L-introduzzjoni mill-ġdid ta' kontrolli fil-fruntieri interni hija miżura eċċezzjonali ta' natura temporanja. Implimentazzjoni kombinata tal-Artikoli 23, 24, u 25 tal-Kodiċi tal-Fruntieri ta' Schengen tippermetti li l-kontrolli fil-fruntieri jinżammu għal perjodu totali ta' mhux iktar minn tmien xhur.
5.2.Lejn approċċ koerenti tal-Unjoni
Il-Kodiċi tal-Fruntieri ta' Schengen jipprovdi wkoll għal approċċ koordinat tal-kontrolli temporanji fil-fruntieri interni (l-Artikolu 26).
Dan il-provvediment japplika f'ċirkostanzi ta' eċċezzjoni fejn it-tħaddim ġenerali taż-żona Schengen jitqiegħed fir-riskju b'riżultat ta' nuqqasijiet serji persistenti marbutin mal-ġestjoni tal-fruntiera esterna. Il-provvediment jeħtieġ ukoll li dawk iċ-ċirkostanzi jkunu jikkostitwixxu theddida serja għall-ordni pubbliku jew is-sigurtà interna fiż-żona Schengen jew partijiet minnha. F'ċirkostanzi ta' eċċezzjoni bħal dawn, il-Kummissjoni tista' tressaq proposta lill-Kunsill għal Rakkomandazzjoni li Stat Membru jew iktar jerġa' jdaħħal il-kontrolli fuq il-fruntiera fil-fruntieri interni kollha tagħhom, jew partijiet minnhom.
F'dan il-mument, hemm nuqqasijiet serji fil-kontroll fil-fruntieri esterni li nħolqu min-nuqqas ta' sorveljanza fuq il-fruntieri u reġistrazzjoni u identifikazzjoni insuffiċjenti ta' migranti irregolari. Bħala konsegwenza tal-movimenti sekondarji skattati minn dawn in-nuqqasijiet, hemm Stati Membri li reġgħu daħħlu l-kontrolli fil-fruntieri interni. Dawn in-nuqqasijiet serji għalhekk jipperikolaw iż-żona Schengen kollha kemm hi, u huma xhieda ta' theddida għall-ordni pubbliku jew is-sigurtà interna f'dik iż-żona.
Jekk il-pressjonijiet migratorji u n-nuqqasijiet serji fil-kontrolli fil-fruntieri jkomplu wara t-12 ta' Mejju, il-Kummissjoni jkollha għalhekk tippreżenta proposta skont l-Artikolu 26(2) tal-Kodiċi tal-Fruntieri ta' Schengen lill-Kunsill li tirrakkomanda approċċ tal-Unjoni koerenti għall-kontrolli fil-fruntieri interni sa ma n-nuqqasijiet srutturali fil-kontrolli fil-fruntieri esterni jiġu mitigati jew rimedjati. Il-Kummissjon se tkun ippreparata għal din l-eventwalità u tieħu azzjoni mingħajr dewmien.
Kwalunkwe proposta mill-Kummissjoni skont l-Artikolu 26 tal-Kodiċi tal-Fruntieri ta' Schengen tkun tipproponi biss il-kontrolli fil-fruntieri fis-sezzjonijiet tal-fruntiera interna fejn il-kontrolli jkunu meħtieġa u proporzjonati biex jirrispondu għat-theddida serja għall-ordni pubbliku u s-sigurtà interna identifikata. Il-kontroll fil-fruntieri interni jkunu wkoll temporanji u għall-iqsar perjodu possibbli skont it-theddida indirizzata. Jekk is-sitwazzjoni ġenerali tippermetti dan, l-għan għandu jkun li l-kontrolli fil-fruntieri interni fiż-żona Schengen jitneħħew fi żmien sitt xhur mill-introduzzjoni tagħhom, jiġifieri sa nofs Novembru 2016.
L-applikazzjoni tal-Artikolu 26 tal-Kodiċi tal-Fruntieri ta' Schengen hija salvagwardja għat-tħaddim ġenerali taż-żona Schengen. La hija sanzjoni kontra xi Stat Membru, u la għandha l-għan li teskludi xi Stat Membru miż-żona Schengen.
6.Konklużjoni
Is-sistema ta' Schengen qed taffaċċa sfida kbira minħabba li hi esposta għal pressjonijiet migratorji għoljin, u nuqqasijiet serji fil-kontroll tal-fruntieri esterni qegħdin itellfuha. Dawn il-pressjonijiet u n-nuqqasjiet, flimkien qegħdin iqiegħdu fir-riskju s-sistema kollha kemm hi.
Dawn l-isfidi għandhom bosta lati. Il-Kummissjoni, fil-Komunikazzjoni tagħha tal-10 ta' Frar identifikat il-politiki differenti li huma meħtieġa li hemm bżonn li jsiru biex il-kriżi, fil-kumplessità kollha tagħha, tiġi indirizzata. Abbażi ta' dawk is-sejbiet, u b'risposta għas-sejħa tal-Kunsill Ewropew biex ikun hemm ritorn għal sitwazzjoni li fiha l-Istati Membri kollha japplikaw il-Kodiċi tal-Fruntieri ta' Schengen, din il-Komunikazzjoni tidentifika perkors lura lejn in-normalità, ibbażat fuq l-applikazzjoni sistematika tar-regoli. Waqt li wieħed ma jistax iħares lejn il-perkors identifikat mingħajr ma jħares lejn fatturi oħra, bħall-implimentazzjoni b'suċċess tal-Pjan ta' Azzjoni UE-Turkija, li jwassal għal tnaqqis materjali u sostenibbli tal-fluss tal-migrazzjoni irregolari, issa wasal iż-żmien li l-Istati Membri kollha jiġbdu ħabel wieħed biex iħarsu waħda mill-aqwa kisbiet tal-Unjoni.
Għal dan il-għan, il-pjan ta' direzzjoni li jwassal lura għal żona Schengen li qed taħdem kollha kemm hi, jinvolvi l-passi li ġejjin:
L-4 ta' Marzu 2016 (u kull xahar wara dan): Il-Greċja tirrapporta dwar il-progress tagħha fl-implimentazzjoni tal-azzjonijiet identifikati fir-Rakkomandazzjoni dwar it-tkomplija tat-trasferimenti ta' Dublin.
Mhux iktar tard mit-12 ta' Marzu 2016: Il-Greċja tippreżenta l-pjan ta' azzjoni tagħha biex timplimenta r-rakkomandazzjonijiet li saru mill-Kunsill, flimkien ma' valutazzjoni tal-ħtiġijiet.
Is-16 ta' Marzu 2016: Komunikazzjoni mill-Kummissjoni dwar ir-riforma tar-Regolament ta' Dublin imsejsa fuq l-għan tas-solidarjetà u l-qsim tal-piżijiet ġust bejn l-Istati Membri.
Is-16 ta' Marzu 2016: il-Kummissjoni tippreżenta l-Ewwel Rapport dwar ir-Rilokazzjoni u r-Risistemazzjoni tagħha.
Mhux iktar tard mit-22 ta' Marzu 2016: il-Frontex tniedi sejħiet addizzjonali għall-kontribuzzjonijiet biex tiskjera iktar timijiet Ewropej ta' Gwardji tal-Fruntieri biex tiġi appoġġata l-Greċja.
Mhux iktar tard mill-1 ta' April 2016: l-Istati Membri jwieġbu s-sejħa tal-Frontex billi jagħtu riżorsi umani u tagħmir tekniku.
Mhux iktar tard mit-12 ta' April 2016: il-Kummissjoni tippreżenta l-valutazzjoni tagħha tal-adegwatezza tal-pjan ta' azzjoni mħejji mill-Greċja.
Is-16 ta' April 2016: il-Kummissjoni tippreżenta t-Tieni Rapport dwar ir-Rilokazzjoni u r-Risistemazzjoni tagħha.
Mill-11 sas-17 ta' April 2016: se titwettaq evalwazzjoni ta' Schengen mill-esperti tal-Istati Membri u l-Kummissjoni tal-fruntieri tal-arja, l-art u l-baħar tal-Greċja.
Mhux iktar tard mit-12 ta' Mejju 2016: il-Greċja tirrapporta dwar l-implimentazzjoni tar-rakkomandazzjonijiet tal-Kunsill.
It-12 ta' Mejju 2016: jekk in-nuqqasijiet serji fil-kontroll fil-fruntieri esterni jibqgħu hemm, il-Kummissjoni se tippreżenta proposta skont l-Artikolu 26(2) tal-Kodiċi tal-Fruntieri ta' Schengen.
It-13 ta' Mejju 2016: jekk in-nuqqasijiet serji fil-kontroll fil-fruntieri esterni jibqgħu hemm, il-Kunsill għandu jadotta rakkomandazzjoni skont l-Artikolu 26(2) tal-Kodiċi tal-Fruntieri ta' Schengen bħal approċċ koerenti tal-Unjoni lejn il-kontrolli fil-fruntieri interni.
Is-16 ta' Mejju 2016: il-Kummissjoni tippreżenta it-Tielet Rapport tagħha dwar ir-Rilokazzjoni u Risistemazzjoni.
Mhux iktar tard minn Ġunju 2016: il-koleġiżlaturi jilħqu qbil politiku dwar il-Gwardja Ewropea tal-Fruntiera u tal-Kosta u jadottaw l-att legali.
Ġunju 2016: il-Kummissjoni tippreżenta l-valutazzjoni tagħha tal-possibiltà li jerġgħu jinbdew it-trasferimenti Dublin lejn il-Greċja.
Mhux iktar tard minn Awwissu 2016: Il-Gwardja Ewropea tal-Fruntiera u tal-Kosta tiġi operattiva.
Mhux iktar tard minn Settembru 2016: il-Gwardja Ewropea tal-Fruntiera u tal-Kosta tkun operattiva.
Mhux iktar tard minn Novembru 2016: il-Gwardja Ewropea tal-Fruntiera u tal-Kosta tkun qed taħdem kollha, u tkun wettqet l-ewwel testijiet tal-vulnerabbiltà sabiex ikunu jistgħu jittieħdu kwalunkwe miżuri preventivi meħtieġa.
Diċembru 2016: jekk is-sitwazzjoni ġenerali tippermetti, id-data fil-mira biex jintemmu l-miżuri ta' salvagwardja eċċezzjonali li jkunu ttieħdu.