RAPPORT TAL-KUMMISSJONI LILL-PARLAMENT EWROPEW U LILL-KUNSILL Rapport Komprensiv dwar il-Funzjonament tal-Fond ta' Garanzija /* COM/2014/0214 final */
Werrej 1............ Il-Fond li jħares il-baġit
tal-Unjoni minn talbiet minħabba inadempjenzi sa mill-1994. 2 2............ Il-karatteristiċi ewlenin tal-mekkaniżmu
ta’ proviżjonament 2 2.1......... Proviżjonament ibbażat fuq
l-iżborżamenti netti 3 2.2......... Il-mekkaniżmu ta’ livellar 3 2.3......... Il-valuri ta’ attivazzjoni 3 3............ It-tħaddim tal-Fond. 3 3.1......... Operazzjonijiet koperti mill-Fond. 3 3.1.1...... Self estern tal-BEI kopert mill-Fond –
il-volumi u l-karatteristiċi ewlenin tar-riskju tal-garanziji
mogħtija lill-BEI. 4 3.1.2...... Self ta' Assistenza Makrofinanzjarja kopert
mill-Fond. 4 3.1.3...... Operazzjonijiet tal-Euratom koperti
mill-Fond. 5 3.2......... L-evoluzzjoni tar-riskju tal-kreditu. 5 4. .......... avvenimenti li kellhom impatt fuq
il-fond matul il-perjodu 2010 – 2013. 5 4.1......... L-inadempjenzi tas-self garantit
lis-Sirja. 5 4.2......... Il-Kroazja saret membru tal-UE fl-2013. 6 5............ Il-ġestjoni tal-assi tal-Fond f’ambjent
diffiċli tas-suq. 6 5.1......... Il-prestazzjoni tal-Fond. 6 5.2......... Żvilupp tad-daqs tal-Fond. 6 6............ Il-prospetti għall-mandat
il-ġdid 2014-2020. 7 6.1......... Il-mandat tal-BEI. 7 6.2......... Assistenza Makrofinanzjarja. 7 6.3......... Euratom.. 8 6.4......... Proposta ta' proviżjonament
għall-QFP tal-2014-2020. 8 7............ rata ta' proviżjonament fil-mira. 10 8............ Konklużjoni 11 1. Il-Fond li jħares il-baġit tal-Unjoni minn talbiet
minħabba inadempjenzi sa mill-1994 Il-Fond ta’ Garanzija għall-azzjonijiet
esterni ("il-Fond") kien stabbilit fl-1994 bir-Regolament tal-Kunsill
(KE, Euratom) Nru 2728/94 tal-31 ta’ Ottubru 1994[1] sabiex iħares
il-baġit tal-Unjoni fil-każ ta’ inadempjenza mill-benefiċjarji
tas-self mogħti jew garantit mill-Unjoni Ewropea. Ir-Regolament ġie
emendat tliet darbiet[2]
u bħalissa l-Fond qed jiġi operat taħt ir-Regolament tal-Kunsill
(UE, Euratom) Nru 480/2009 tal-25 ta’ Mejju 2009[3] (verżjoni
kodifikata). Il-funzjonament tal-Fond ġie
rieżaminat erba' darbiet (fl-1998, fl-2003, fl-2006 u fl-2010). B’segwitu
għar-rieżami fl-2006, ġie implimentat mekkaniżmu ġdid
ta’ proviżjonament. Dan daħal fis-seħħ fl-2007. Dan
ir-rapport jippreżenta l-ħames rieżami tal-Fond u kien
tħabbar fil-konklużjoni tar-rapport tal-2010. Informazzjoni
addizzjonali dwar l-attività u l-funzjonament tal-Fond jistgħu jinstabu
fir-rapporti annwali dwar il-ġestjoni tal-Fond u dwar il-garanziji koperti
mill-baġit tal-UE. Dan ir-rapport huwa strutturat kif ġej:
iż-żewġ taqsimiet li ġejjin (2 u 3) ifakkru
l-karatteristiċi ewlenin tal-mekkaniżmu attwali ta'
proviżjonament u l-funzjonament tal-Fond. Imbagħad, it-Taqsima 4
tenfasizza l-avvenimenti ewlenin li kellhom impatt fuq il-Fond
mill-aħħar rapport komprensiv fl-2010 filwaqt li t-Taqsima 5
tkopri l-ġestjoni tal-assi tal-Fond. It-Taqsima 6 tagħti
l-perspettiva ta’ operazzjonijiet koperti mill-Fond u l-impatt tagħhom fuq
il-ħtiġijiet ta’ proviżjonament għall-QFP 2014-2020.
It-Taqsima 7 tagħmel rieżami tar-rata ta’ proviżjonament
fil-mira filwaqt li t-Taqsima 8 tikkonkludi. Id-Dokument ta’ Ħidma
tal-Persunal tal-Kummissjoni (DĦP) jikkomplementa dan ir-rapport billi
jipprovdi l-graffs u t-tabelli. 2. Il-karatteristiċi ewlenin tal-mekkaniżmu ta’
proviżjonament Tliet fatturi ewlenin tal-mekkaniżmu
l-ġdid introdott fl-2007 huma (a) il-proviżjonament fuq il-bażi
ta’ żborżamenti netti, (b) mekkaniżmu ta' livellar u (c) valuri
ta’ attivazzjoni. 2.1. Proviżjonament ibbażat fuq
l-iżborżamenti netti Il-mekkaniżmu ta' proviżjonament
attwali introdott fl-2007 bidel ir-regoli tal-proviżjonament
għall-Fond billi ġab fi tmiemha l-prattika ta’ qabel
tal-proviżjonament tal-Fond fuq il-bażi ta' projezzjonijiet tas-self
iffirmat b’mod indipendenti mill-iżborżamenti attwali. Il-mekkaniżmu
ta' proviżjonament minn dakinhar ġie bbażat fuq
l-iżborżamenti netti. L-għan ta' dan it-tibdil kien li jsir
titjib fil-funzjonament tal-Fond billi l-għadd ta' trasferimenti annwali
jonqsu għal darba biss bejn il-baġit tal-Unjoni u l-Fond u b'hekk
tiżdied l-effiċjenza tal-flussi baġitarji. 2.2. Il-mekkaniżmu ta’ livellar Sabiex il-baġit tal-UE jitħares minn
xokkijiet, il-mekkaniżmu ta’ proviżjonament jipprevedi
mekkaniżmu ta’ livellar li għandu l-għan li jillimita l-ammont
annwali trasferit lejn il-Fond fil-każ ta’ inadempjenzi maġġuri.
Il-mekkaniżmu ta' livellar jiffunzjona
kif ġej: jekk b’riżultat ta’ inadempjenza waħda jew iktar,
l-ammont li għandu jiġi kopert mill-Fond jaqbeż
il-EUR 100 miljun f’sena waħda (b’impatt fuq il-baġit
għall-bidu tas-sena n+2 wara l-iżborż), l-l-eċċess fuq
il-EUR 100 miljun jitħallas gradwalment fil-Fond. B'mod
partikolari, id-daqs tal-ħlas parzjali annwali jkun l-inqas minn
EUR 100 miljun, jew l-ammont dovut li jkun jonqos (l-Artikolu 6
tar-Regolament Nru 480/2009). Il-mekkaniżmu ta' livellar għadu ma
ġiex attivat minħabba li l-Fond għadu ma ntalabx għal
ammonti li jeċċedu l-EUR 100 miljun kull sena bħala
konsegwenza ta' inadempjenza waħda jew aktar. 2.3. Il-valuri ta’ attivazzjoni Barra dan, ġew introdotti l-hekk
imsejħa valuri ta' attivazzjoni. Il-funzjoni tagħhom hija li
jżommu lill-awtorità baġitarja infurmata dwar telf maġġuri
fil-Fond (attivat meta l-valur tal-Fond jaqa' taħt it-80% tal-ammont
fil-mira) jew li jipprokuraw rapport mill-Kummissjoni dwar miżuri eċċezzjonali
li jistgħu jkunu meħtieġa biex jerġa’ jimtela l-Fond
(attivati meta l-Fond jaqa' taħt is-70% tal-ammont fil-mira). Il-valuri
ta’ attivazzjoni għadhom ma ġewx milħuqa s’issa. 3. It-tħaddim
tal-Fond Din it-Taqsima tistipula
l-operazzjonijiet koperti mill-Fond u l-evoluzzjoni tar-riskju ta’ kreditu
tas-self garantit. 3.1. Operazzjonijiet
koperti mill-Fond L-operazzjonijiet
ta' self koperti mill-Fond jirrigwardaw tliet strumenti differenti li
jibbenefikaw minn garanzija mill-baġit tal-Unjoni Ewropea: garanziji
lill-Bank Ewropew tal-Investiment (BEI) għas-self jew garanziji ta' self
lil operazzjonijiet f'pajjiżi terzi, self tal-Euratom lil pajjiżi
terzi u self ta' Assistenza Makrofinanzjarja (AMF) tal-UE lil pajjiżi
terzi. Iċ-ċart fid-DĦP (it-Taqsima 1) tiddeskrivi
l-funzjonament tal-Fond u l-flussi finanzjarji kollha li għandhom impatt
fuq il-valur tiegħu. 3.1.1. Self estern tal-BEI kopert mill-Fond –
il-volumi u l-karatteristiċi ewlenin tar-riskju tal-garanziji
mogħtija lill-BEI Madwar 97% tal-ammont totali pendenti kopert
mill-Fond huma garanziji maħruġa fuq self mogħti mill-BEI
għal proġetti f’pajjiżi terzi. Abbażi tat-twettiq imbassar
tal-mandat, din il-predominanza tal-garanziji tal-BEI fir-riskju kopert
mill-Fond mhux se tinbidel fil-ġejjieni. Jekk ir-riċevitur ta’ self
garantit jonqos milli jagħmel pagament fid-data ta' maturità u lanqas ma
jħallas fi żmien tliet xhur wara, il-BEI jitlob lill-Kummissjoni biex
tħallas l-ammonti dovuti mid-debitur inadempjent skont il-ftehim ta’
garanzija bejn il-BEI u l-UE. Jekk il-BEI ikollu garanti ieħor pubbliku
jew privat flimkien mal-garanzija tal-UE, dan il-garanti jiġi attivat
qabel issir it-talba għall-garanzija tal-UE. Graff 1: Sehem tal-operazzjonijiet tal-BEI
koperti mill-Fond fl-aħħar tal-2012 (kapital u mgħax dovut) L-operazzjonijiet ta’ finanzjament tal-BEI
f’pajjiżi terzi konklużi ma’ Stat, konklużi ma’ entità
tas-settur pubbliku jew tas-settur privat kopert b’garanzija mill-Istat, jew
konkluż ma’ awtoritajiet reġjonali jew lokali, jew ma'
intrapriżi pubbliċi jew istituzzjonijiet tal-Gvern u/jew
ikkontrollati mill-Gvern b'riskju ta’ kreditu adattat, huma koperti minn
garanzija komprensiva. Għal tipi oħra ta’ operazzjonijiet, l-aktar
l-operazzjonijiet tas-settur privat, il-garanzija hija limitata għal
avvenimenti ta’ riskju politiku definiti sew. 3.1.2. Self ta' Assistenza Makrofinanzjarja kopert
mill-Fond Assistenza makrofinanzjarja (AMF) qed
tiġi provduta, fil-forma ta’ self u/jew għotjiet mhux rimborsabbli,
biex tagħti sostenn lil pajjiżi li huma kandidati, kandidati
potenzjali u tal-viċinat tal-UE biex isolvu l-problemi tal-bilanċ
tal-pagamenti fuq perjodu ta’ żmien qasir biex jistabbilizzaw il-finanzi
pubbliċi, u biex tinkoraġġixxi l-implimentazzjoni tar-riformi
strutturali. Il-AMF tingħata fuq bażi eċċezzjonali u
temporanja fuq kundizzjonalità stretta tal-politika ekonomika, li tipikament
tikkumplementa l-programmi ta’ aġġustament tal-FMI. L-operazzjonijiet
tal-AMF iridu jiġu awtorizzati individwalment mill-Kunsill u l-Parlament. Jekk pajjiż benefiċjarju jonqos milli jonora l-obbligi ta’
ripagament tas-self tiegħu, il-Kummissjoni tista’ tattiva l-Fond sabiex
jitħallas lura s-self korrispondenti. Fl-2012, is-sehem tal-operazzjonijiet tal-AMF
kien limitat ħafna (madwar 2%) meta mqabbel mal-ammont totali ta' kapital
u imgħax pendenti kopert mill-Fond (ara l-Graff 1). 3.1.3. Operazzjonijiet tal-Euratom koperti mill-Fond Il-faċilità tas-self tal-Euratom tista’
tintuża biex tiffinanzja proġetti fl-Istati Membri
(id-Deċiżjoni tal-Kunsill 77/270/Euratom) jew f’ċerti
pajjiżi terzi (l-Ukraina, ir-Russja jew l-Armenja) (id-Deċiżjoni
tal-Kunsill 94/179/Euratom). Fl-1990 il-Kunsill illimita s-self għal
EUR 4 biljuni, li minnhom madwar EUR 3,7 biljuni ġew
iffirmati u EUR 3,4 biljuni ġew imqassma. Il-Kummissjoni
tinforma lill-Kunsill u tipproponi limitu ta’ self ġdid meta l-valur
totali tat-tranżazzjonijiet jilħaq it-EUR 3,8 biljuni. Bħal fil-każ tal-AMF, il-Fond jista’
jissejjaħ jekk benefiċjarju jonqos milli jonora l-obbligi ta’
ripagament tas-self tiegħu. Fl-2012, is-sehem tal-operazzjonijiet tal-Euratom
kien marġinali (inqas minn 1%) meta mqabbel mal-ammont totali pendenti ta’
kapital u imgħax kopert mill-Fond (ara l-Graff 1). 3.2 L-evoluzzjoni tar-riskju tal-kreditu Il-Fond ikopri r-riskju ta’ self u garanziji
fuq self lill-pajjiżi terzi. Sa mill-bidu tal-implimentazzjoni tal-mandat
estern tal-BEI[4]
għall-2007-2013, l-ammont pendenti kopert żdied b’medja ta’ 13,5%
kull sena għal madwar EUR 23,1 biljun fl-2013 (self pendenti
biż-żieda tal-imgħax akkumulat). It-tkabbir tal-ammont pendenti
koperti mill-Fond ma jfissirx neċessarjament li l-Fond iġorr riskju
proporzjonalment ogħla fi proporzjon maż-żieda fl-ammont kopert,
peress li r-riskju tal-kreditu globali jrid jiġi evalwat ukoll abbażi
tal-kwalità ta’ min qed jissellef. Meta wieħed jivvaluta l-evoluzzjoni
tar-riskju ta’ kreditu matul iż-żmien jista’ jikkonkludi li fi tmiem
Ottubru 2013 kien hemm titjib modest fil-profil tar-riskju ta’ kreditu
tas-self kopert meta mqabbel mal-2009. B’mod partikolari, il-proporzjon
tas-self garantit mill-Fond li hu relatat ma' dawk li jissellfu li
għandhom grad ta' kwalità għolja ta' investiment żdied matul
iż-żmien (ara t-Taqsima 5 tad-DĦP). Din l-osservazzjoni
hija waħda mill-elementi li jirfdu l-konklużjoni li jinżamm
livell ta’ 9 % għar-rata tal-mira. 4. avvenimenti
li kellhom impatt fuq il-fond matul il-perjodu 2010 – 2013 Żewġ avvenimenti li kellhom impatt
fuq il-Fond fil-perjodu kienu l-inadempjenzi tas-self garantit mogħtija
mill-BEI lis-Sirja u s-sħubija mal-UE tal-Kroazja li huma ddettaljati hawn
taħt. 4.1. L-inadempjenzi tas-self garantit lis-Sirja B'riżultat tad-deterjorament
tas-sitwazzjoni fis-Sirja, fl-2011 il-Kunsill għall-Affarijiet Barranin,
il-Parlament Ewropew u l-Kunsill ħadu ċerti deċiżjonijiet
rigward il-pajjiż. B’mod partikolari, huma pprojbew milli jsiru
żborzi mill-BEI b’rabta mal-ftehimiet ta’ self eżistenti. Din
id-Deċiżjoni kienet imbagħad ikkonsolidata
fid-Deċiżjoni tal-Kunsill 2011/782/PESK
tal-1 ta’ Diċembru, ir-Regolament tal-Kunsill (UE)
Nru 36/2012 tat-18 ta’ Jannar 2012 u d-Deċiżjoni
tal-Kunsill 2013/255/PESK tal-31 ta’ Mejju 2013. Billi fis-snin
ta' qabel is-Sirja kienet tħallas is-self tagħha lill-BEI
kompletament u fil-ħin, minn Novembru 2011, il-bank beda
jiffaċċa arretrati fuq self għall-proġetti fis-Sirja.
B’konsegwenza ta’ dan, u f’konformità mal-Ftehim ta' Garanzija bejn l-UE u
l-BEI, fl-2012 il-BEI għamel 4 talbiet lill-Fond għal ammont totali
ta’ madwar EUR 42 miljun. Matul l-2013, saru tmien talbiet supplimentari
lill-Fond, għal ammont totali ta’ EUR 82,5 miljun. Ammont ta’
EUR 2,1 miljuni kien irkuprat fl-2012. Il-kapital totali
pendenti ta’ self garantit pendenti relatat mas-Sirja jammonta għal madwar
EUR 551 miljun, bl-aħħar self jimmatura fl-2030.
F’konformità mal-Ftehim ta’ Garanzija, meta l-UE tkun għamlet pagament taħt
il-Garanzija tal-UE, hija tissurroga fid-drittijiet u r-rimedji tal-BEI.
Proċeduri ta’ rkupru għandhom jitwettqu mill-BEI fir-rigward ta’
somom surrogati, b'konformità mal-Ftehim ta' Rkupru bejn l-UE u l-BEI. 4.2. Il-Kroazja saret membru tal-UE fl-2013 Wara l-adeżjoni
tal-Kroazja fl-UE f’Ġunju 2013, ir-riskju assoċjat ma’ dan
il-pajjiż qed ikompli jkun kopert mill-baġit tal-UE iżda mhux se
jibqa’ jiġi kopert mill-Fond. Konsegwentement, ammont ta’ madwar EUR 30,3 miljun
li jikkorrispondi għal skopertura tal-Kroazja ta’ madwar
EUR 337 miljun (ammonti pendenti flimkien mal-imgħax akkumulat)
ġie trasferit mill-Fond għall-Baġit tal-UE fl-2013. 5. Il-ġestjoni tal-assi
tal-Fond f’ambjent diffiċli tas-suq Din it-taqsima tivvaluta l-prestazzjoni u
l-evoluzzjoni tal-assi tal-Fond matul il-perjodu 2010-2013. 5.1. Il-prestazzjoni tal-Fond Matul il-perjodu kollu 2010-
Ġunju 2013, il-Fond kellu medja ta’ redditu assolut globali ta’ 2,42%
fis-sena. Matul l-istess perjodu il-punt ta' riferiment tal-Fond kellu medju
ta’ redditu ta' 1,86% fis-sena. Il-punt ta’ riferiment tal-Fond huwa
taħlita magħmula l-aktar minn indiċijiet iBoxx (b’mod
partikolari indiċijiet EUR tas-Sovrani taż-Żona Euro u EUR
Kollateralizzati Koperti) u Euribid għall-iskopertura ta' terminu qasir.
Il-prestazzjoni tal-Fond eċċediet il-punt ta' riferiment b'medja
ta' 0,56 punt bażi kull sena. Il-prestazzjoni tal-Fond inkisbet
fil-kuntest tal-aktar kriżi serja fis-swieq finanzjarji globali ta’
kriżi fl-istorja riċenti. L-assi tal-Fond
fil-31 ta’ Diċembru 2012 kienu jammontaw għal madwar
EUR 2 biljuni (li minnhom madwar EUR 155,7 miljun kienu
jirrappreżentaw il-kontribuzzjoni li għandha titħallas
mill-baġit tal-UE kmieni fl-2013). Is-sensittività tal-portafoll għar-riskju
tar-rata tal-imgħax, kif imkejla skont it-tul ta' żmien, kienet
limitata għal madwar 1,45 fit-30 ta’ Ġunju 2013. 5.2. Żvilupp tad-daqs tal-Fond Il-Graff 2 fid-DĦP turi li l-volum
tal-Fond fl-2007 u 2008 naqas wara l-implimentazzjoni tal-mekkaniżmu
l-ġdid ta’ proviżjonament u żdied mill-2008 'l hawn biex
laħaq madwar EUR 2 miljuni fl-2012. It-tnaqqis fl-2007 huwa
spjegat mill-andament kajman tal-iżborżamenti tas-self fil-bidu
tal-mandat estern kurrenti tal-BEI (iżda relatat mal-mandati
preċedenti) li wassal għal eċċess ta’
EUR 125,75 miljun li ġie trasferit mill-Fond
għall-Baġit tal-UE. L-aċċelerazzjoni fir-ritmu
tal-iżborżamenti tal-mandat tas-self estern fl-2010 u t-tkabbir
tal-operazzjonijiet tal-AMF minħabba l-kriżi finanzjarja jispjegaw
din iż-żieda fid-daqs tal-assi tal-Fond (ara t-Taqsima 6 Tabella 1
tad-DĦP). Barra l-proviżjonament, is-sors ewlieni
l-ieħor tal-introjtu tal-Fond huwa r-redditu li jaqla’ minn fuq l-assi
tiegħu. Ir-redditu li sar fuq l-assi tal-Fond waqa’ mill-2007 'l hawn
minħabba t-tnaqqis ġenerali fir-rati tal-imgħax tas-suq
għal livelli storikament baxxi. Ir-redditu li sar matul il-perjodu
2007-2013 kien jammonta għal EUR 281 miljun (ara
t-Tabella 1 Kolonna b, tad-DĦP, dħul u ħruġ ta'
flus mill-ħolqien tal-Fond 'l hawn). 6. Il-prospetti
għall-mandat il-ġdid 2014-2020 Din it-taqsima teżamina l-prospetti tal-operazzjonijiet ta’ self
koperti mill-Fond (BEI, AMF, Euratom) u l-impatt potenzjali
tal-proviżjonament matul l-QFP 2014-2020. 6.1. Il-mandat tal-BEI Il-mandat tal-BEI jirrappreżenta aktar minn 95% tal-portafoll
kopert mill-Fond. Il-mekkaniżmu ta' proviżjonament tal-Fond, li
għandu l-għan li jżomm il-Fond f’livell ta’ 9%
tal-iżborsamenti ta' self pendenti, fil-fatt joħloq limitu fid-daqs
tal-mandat estern tal-BEI kopert mill-garanzija tal-baġit tal-UE. Il-Kummissjoni għamlet proposta għal Deċiżjoni
tal-Parlament Ewropew u tal-Kunsill dwar l-għoti ta' garanzija tal-UE
lill-Bank Ewropew tal-Investiment kontra t-telf minn operazzjonijiet ta'
finanzjament li jappoġġaw proġetti ta' investiment barra
l-Unjoni [COM(2013) 293 tat-23.05.2013]. Din il-proposta
tissuġġerixxi limitu massimu ta’ EUR 28 biljun għal
operazzjonijiet ta’ finanzjament tal-BEI koperti minn garanzija tal-UE, matul
il-perjodu 2014-2020 u taqsam il-limitu f’żewġ partijiet: (i) limitu fiss ta' ammont massimu ta' EUR 25 biljun;
kif ukoll (ii) ammont addizzjonali fakultattiv ta'
EUR 3 biljuni. L-impatt baġitarju tal-attivazzjoni possibbli tal-limitu
addizzjonali fakultattiv jkollu jiġi kkalkulat skont it-tbassir
aġġornat dwar il-ħtiġijiet ta' proviżjonament tal-Fond
fil-mument tar-rieżami ta' nofs it-term. Negozjati sussegwenti dwar il-mandat il-ġdid ġew
konklużi bejn il-Kunsill, il-Parlament Ewropew u l-Kummissjoni
fis-17 ta’ Diċembru 2013 bil-ftehim li jiżdied
il-limitu massimu fiss b’EUR 2 biljuni, li jitla’ għal ammont
massimu ta’ EUR 27 biljun. Dan il-ftehim jeħtieġ li
jiġi approvat formalment mill-Kunsill u l-Parlament Ewropew matul l-2014. 6.2. Assistenza Makrofinanzjarja Mill-2011 'l hawn il-Kummissjoni adottat erba' proposti
leġiżlattivi għal assistenza makrofinanzjarja (AMF): tnejn
fl-2011, għall-Ġeorġja f'Jannar 2011 u għar-Repubblika
Kirgiża f'Diċembru 2011, u tnejn fl-2013, għall-Ġordan
f'April u għat-Tuneżija f'Diċembru Mit-tieni nofs tal-2011, il-kundizzjonijiet tal-finanzjament
għas-swieq kapitali globali esperjenzaw deterjorament sinifikanti. Barra
minn hekk, ir-Rebbiegħa Għarbija u t-taqlib politiku u ekonomiku li
rriżulta fil-pajjiżi Għarab Mediterranji msieħba
qiegħed pressjoni akbar fuq il-baġits u l-pożizzjonijiet esterni
ta’ dawn l-ekonomiji. Dawn l-iżviluppi wasslu biex fl-2012 u fl-2013
żdiedet id-domanda għall-AMF. L-ewwel każ kien it-talba
mill-Gvern Eġizzjan għal AMF ta’ EUR 500 miljun, li
inizjalment ġiet trażmessa f’Ġunju 2011 u mġedda fi
Frar u Novembru 2012. It-tieni każ kien it-talba mill-Ġordan
f’Diċembru 2012 għal AMF f’forma ta’ self sa
EUR 200 miljun. Barra minn hekk, f’Awwissu 2013, l-awtoritajiet
tat-Tuneżija talbu għal AMF sa EUR 500 miljun. Wara li
għamlet stima, flimkien mal-FMI, tal-ħtiġijiet ta’ finanzjament
estern residwu tal-Ġordan u tat-Tuneżija, il-Kummissjoni adottat
f’April 2013 (il-Ġordan) u Diċembru 2013 (it-Tuneżija)
proposti leġiżlattivi għal assistenza ta’ EUR 180 miljun u
EUR 250 miljun rispettivament, fil-forma ta’ self.
F'Diċembru 2013, id-deċiżjoni leġiżlattiva dwar
l-assistenza lill-Ġordan ġiet adottata mill-Parlament Ewropew u
mill-Kunsill. L-għajnuna għandha tiġi żborżata matul
l-2014. L-AMF ippjanata għat-Tuneżija għandha tiġi
rilaxxata fl-2014 u l-2015. Wara l-iżviluppi diffiċli fl-Ukarina, il-Kumissjoni pproponiet
operazzjoni ta' emerġenza tal-AMF addizzjonali ta' sa
EUR 1 biljun f'self, li tikkomplementa l-programm tal-AMF li
jeżisti diġà ta' EUR 610 miljun f'self.
L-iżborżamenti tal-fondi għaż-żewġ
operazzjonijiet huma previsti għa matul l-2014-2015. Barra minn hekk, fi Frar 2014 l-awtoritajiet Armeni wkoll
bagħtu talba għal operazzjoni ġdida tal-AMF. L-iżborżamenti projettati stmati ta’ self tal-AMF matul
il-perjodu 2014-2015 (minħabba n-natura eċċezzjonali
tal-assistenza tal-AMF, ma jeżisti l-ebda tbassir għall-perjodu lil
hinn mill-2015) jirrappreżentaw madwar EUR 2,6 biljun li minnhom
EUR 1,7 biljun huma stmati għall-2014 u EUR 0,9 biljun
għall-2015 (dawn iċ-ċifri jinkludu l-aħħar operazzjoni
proposta għall-Ukraina).. L-iżborżamenti taħt dan is-self
se jkollhom impatt fuq il-proviżjonament tal-Fond mhux aktar kmieni
mill-2016 skont ir-ritmu tal-iżborż tas-self. 6.3. Euratom Fl-2012, ma saru l-ebda żborżamenti
ta' self taħt il-faċilità ta’ self tal-Euratom. F'Awwissu 2013 ġew
iffirmati faċilità ta’ self u ftehim ta' garanzija
(EUR 300 miljun) mal-Ukraina biex itejbu l-kwalità tas-sigurtà
tal-impjanti nukleari tagħhom. L-ewwel porzjon ta’ din il-faċilità
ta’ self hija mistennija li titħallas fl-2014. Fil-perjodu 2014-2020, proġett jew tnejn fl-Istati Membri jew
f’ċerti Stati Mhux Membri speċifiċi jistgħu jibbenefikaw
mill- EUR 326 miljun li jifdal li għadhom disponibbli
taħt il-faċilità. Il-Kummissjoni jkollha
tinforma lill-Kunsill u tagħmel proposta għal limitu ġdid ta'
self meta l-ammonti aggregati ta’ self jilħqu EUR 3,8 biljuni
(bħalissa EUR 3,7 biljuni). 6.4. Proposta ta' proviżjonament għall-QFP
tal-2014-2020 Kif jidher
fit-Tabella 2 tad-DĦP, matul il-perjodu tal-qafas finanzjarju
2007-2013, ir-riżorsi baġitarji annwali disponibbli previsti fil-QFP
2007-2013 (EUR 200 miljun fis-sena fi prezzijiet attwali) kienu
ġeneralment biżżejjed għall-proviżjonament tal-Fond
fil-maġġoranza s-snin. Il-proporzjon bejn it-total tat-trasferimenti
mill-baġit tal-UE għall-Fond u l-allokazzjoni totali tal-baġit
huwa mistenni li jkun madwar 44% fi tmiem il-perjodu 2007-2013. Dan il-livell ta' utilizzazzjoni kien affettwat mill-adozzjoni
tal-mekkaniżmu l-ġdid tal-proviżjonament fl-2007 li temm
il-proviżjonament eċċessiv strutturali. Barra minn hekk,
ir-ritmu tal-iżborżamenti ta' self tal-BEI ffirmati taħt
il-mandat attwali osservati fil-perjodu 2007-2009 ma kienx
mgħaġġel daqs kemm kien mistenni. Fl-2011, il-mandat fakultattiv
fil-qasam tat-tibdil fil-klima (EUR 2 biljun fi prezzijiet kurrenti)
ġie attivat; barra minn hekk, il-limitu għall-pajjiżi
Mediterranji ġie miżjud b’EUR 1,6 biljun fi prezzijiet
kurrenti (id-Deċiżjoni Nru 1080/2011/UE). Madankollu, dawn
it-tibdiliet se jkollhom impatt fuq il-proviżjonament tal-QFP 2014-2020. Skont il-proposta tal-Kummissjoni tat-23.05.2013
għal mandat estern ġdid tal-BEI, il-limitu massimu totali
għall-proviżjonament tal-Fond għall-mandat 2014-2020 ikun
jammonta għal EUR 1,193 biljun, meta mqabbel ma’
EUR 1,4 biljun taħt il-qafas finanzjarju 2007-2013
(iż-żewġ ammonti fi prezzijiet kurrenti). Il-ftehim sussegwenti tas-17 ta' Diċembru 2013
(f'negozjati bejn il-Kunsill, il-Parlament u l-Kummissjoni, li għad irid
jiġi adottat mill-koleġiżlatur) biex il-limitu massimu fiss
tal-Garanzija tal-UE lill-BEI jiżdied b'EUR 2 biljuni jipprevedi
wkoll ammont addizzjonali ta' EUR 110 miljun[5] fi dħul assenjat[6] biex ikopri
il-ħtiġijiet addizzjonali ta' proviżjonament tal-Fond. L-ammont ta’ proviżjonament totali għall-QFP 2014-2020 huwa
mistenni li jkopri l-ħtiġijiet tal-Fond matul il-perjodu 2014-2020,
abbażi tal-informazzjoni disponibbli meta kien qed jinkiteb dan ir-rapport
u fuq il-bażi ta’ xejriet mistennija ta’ żborżamenti u
rimborżi lura ta’ self garantit. Il-ħtiġijiet annwali effettivi għall-proviżjonament
tal-Fond fl-2014-2020 se jiddependu fl-aħħar mill-aħħar
mir-ritmu attwali tal-firem, l-iżborsamenti u r-rimborżi tas-self fuq
it-tliet attivitajiet koperti mill-Fond (is-self garantit tal-BEI, il-QFP u
l-Euratom). Fattur importanti ieħor li għandu impatt fuq il-bidla
potenzjali fil-ħtiġijiet tar-riżorsi baġitarji għal
dan il-perjodu huwa l-impatt tat-talbiet fuq l-assi tal-Fond b'segwitu
għal inadempjenzi fil-pagamenti fuq is-self garantit lis-Sirja mill-2011
'l hawn. Il-ħtiġijiet ta’ proviżjonament mistennja
għall-2014-2020 iqisu l-impatt tat-talbiet attwali relatati ma’ self
Sirjan mhux irkuprat li seħħet fl-2012 u l-2013, kif ukoll
l-ipoteżi li l-inadempjenzi fuq il-pagamenti li jimmaturaw ikomplu sa nofs
l-2015. Meta jitqies il-fatt li din l-ipoteżi hija inevitabbilment
arbitrarja, it-talbiet relatati mal-inadempjenzi tas-Sirja jistgħu
jintemmu qabel jew ikomplu wara dan il-perjodu. Fl-aħħar nett, ir-riżorsi
tal-Fond se jkunu kkomplementati mir-redditu miksub billi jiġu investiti
l-assi tal-Fond. Madankollu, minħabba livelli ta' rati storikament baxxi
tal-imgħax prevalenti fiż-żmien tat-tħejjija ta’ dan
ir-rapport, ir-redditi jistgħu jkunu aktar baxxi minn dawk fil-perjodi
preċedenti. 7. rata
ta' proviżjonament fil-mira Bejn Settembru 2009 u Frar 2010
saret evalwazzjoni tal-Fond. L-għan tal-evalwazzjoni kien li tiġi
evalwata r-rilevanza, l-effettività u l-effiċjenza tal-Fond, b’mira
partikolari fuq kemm huma adattati l-livelli attwali tal-parametri ewlenin
tal-Fond, notevolment ir-rata fil-mira. L-istudju kkonferma li l-livell kurrenti
ta’ 9% kien adattat fir-rigward tar-riskju ta’ kreditu kurrenti fuq is-self u
l-operazzjonijiet tas-self garantit koperti mill-Fond. Anki fix-xenarju ta' ritmu
mgħaġġel ta’ telf[7],
il-valutazzjoni kwantitattiva imwettqa bħala parti mill-evalwazzjoni
msemmija hawn fuq tindika li anke telf kbir improbabbli jista' potenzjalment
ikun kopert mill-Fond. Fil-passat, il-BEI qatt ma aċċellera t-talbiet
fuq self inadempjenti garantit f’kuntest fejn il-garanzija tal-UE tipprovdi
serħan il-moħħ li pagamenti pendenti dovuti minn min jissellef
ikunu koperti anke jekk dan tal-aħħar ikompli bl-inadempjenza. Il-Fond ikopri r-riskju ta’ kreditu
tal-inadempjenzi fi 42 pajjiż. L-għaxar pajjiżi ewlenin li
għalihom il-Fond għandu l-akbar skopertura jiffurmaw madwar 81%
tal-iskopertura totali. Id-distribuzzjoni ġeografika tal-operazzjonijiet
ta’ għoti b’self koperti mill-Fond kienet relattivament stabbli matul
il-perjodu 2000-2013. Id-distribuzzjoni reġjonali tal-mandat tal-BEI
tispjega din l-istabbilità minħabba li l-qsim mill-ġdid tal-operazzjonijiet
tas-self bejn il-mandat ta’ qabel u dak attwali huwa simili. Madwar 83%
tal-operazzjonijiet ta’ self huma ffukati fuq il-pajjiżi kandidati
potenzjali u kandidati tal-Mediterran (ara l-Graff 3 fid-DĦP). L-analiżi tal-evoluzzjoni l-profil tar-riskju
tal-kreditu tas-self kopert mill-Fond sa tmiem l-2012 tissuġġerixxi
li l-parametru ewlieni tal-Fond (ir-rata "fil-mira" ta' 9%) huwa
ffissat f’livell suffiċjenti fir-rigward tar-riskju li jġorr il-Fond.
B’mod partikolari, il-profil tar-riskju ta’ kreditu tal-operazzjonijiet ta'
self, kif imkejla mill-klassifikazzjoni medja peżata, tjieb xi ftit meta
mqabbel mas-sena ta’ qabel (ara 3.2 hawn fuq u t-Taqsima 5 fid-DĦP).
Dan il-profil ta’ riskju iktar baxx huwa wieħed mir-raġunijiet li
jappoġġaw il-livell attwali tar-rata fil-mira. Filwaqt li l-profil tar-riskju ta’ kreditu
ġenerali tjieb fis-snin riċenti, f’Ottubru 2013 madwar 49% tas-self
tal-portafoll garantit kellhom klassifikazzjoni tal-kreditu taħt il-grad
ta’ investiment. Dan jimplika li l-probabbiltà ta’ inadempjenza f’sena
waħda mhix negliġibbli, skont rati standard għal kumulattivi
storiċi għal klassifikazzjonijiet tal-kreditu differenti
għar-riskji sovrani fuq possibbilitajiet ta’ limiti ta' żmien differenti
ppubblikati mill-aġenziji l-kbar tal-klassifikazzjoni tal-kreditu.
Madankollu, dan ir-riskju huwa meqjus indirizzat mir-rata ta’
proviżjonament fil-mira ta’ 9%. Matul il-perjodu 1994-2011, il-Fond intalab
għall-ammont kumulattiv ta’ madwar EUR 478 miljun u kellu rata
tal-irkupru ta’ 100% (ara t-Tabella 1 tad-DĦP). L-aħħar
talbiet ġew irreġistrati fl-2012 u fl-2013 b’relazzjoni mas-Sirja.
Fl-2012, intalab ammont ta’ EUR 42 miljun, li minnhom ġew
irkuprati EUR 2,1 miljuni u tħallsu EUR 24 miljun.
Huwa stmat li t-talbiet għall-2013 huma ta’ madwar
EUR 82,5 miljun. Abbażi tal-analiżi f'dan ir-rapport,
il-parametru ewlieni tal-Fond (ir-rata "fil-mira" ta’ 9%), huwa
ffissat f’livell suffiċjenti biex iqis ir-riskju li jġorr il-Fond u
l-evoluzzjoni potenzjali ta’ dan ir-riskju ta’ kreditu minħabba l-impatt
tal-kriżi finanzjarja. 8. Konklużjoni Il-mekkaniżmu kurrenti ta’
proviżjonament qed ikompli jwassal it-titjib imwiegħed
fil-proċess baġitarju bi proviżjonament ibbażat fuq
l-iżborżamenti netti osservati. Dan irriżulta fi proċess
baġitarju mtejjeb għall-proviżjonament tal-Fond. L-analiżi kwantitattiva tar-riskju kopert
mill-Fond u r-rata fil-mira ta’ 9% tal-Fond uriet li din ir-rata fil-mira,
flimkien ma' karatteristiċi ewlenin l-oħra tal-Fond, huma adattati.
Il-Kummissjoni għalhekk ma tarax il-bżonn li tbiddel ir-rata fil-mira
jew il-karatteristiċi l-oħra tal-Fond. Madankollu din
ir-rata fil-mira għandha tiġi eżminata minn żmien għal
żmien sabiex jiġi vvalutat jekk għadhiex proporzjonata
mal-profil tar-riskju li jġorr il-Fond. Din
l-analiżi ssir fi żmien meta jsir l-eżami ta’ nofs it-terminu
tal-mandat estern. Jekk din l-analiżi tikkonkludi li bidliet
fil-funzjonament tal-Fond huma meħtieġa, jinħareġ rapport
komprensiv dwar il-funzjonament tal-Fond. [1] Ir-Regolament tal-Kunsill (KE, Euratom) Nru 2728/94
(ĠU L 293, tas-12.11.1994, p. 1). [2] Ir-Regolament tal-Kunsill (KE, Euratom)
Nru 1149/1999 (ĠU L 139, 2.6.1999, p. 1); Ir-Regolament
tal-Kunsill (KE, Euratom) Nru 2273/2004 (ĠU L 396, 31.12.2004,
p. 28); Ir-Regolament tal-Kunsill (KE, Euratom) Nru 89/2007 (ĠU
L 22, tas-31.1.2007, p. 1). [3] ĠU L 145, 10.6.2009, p. 10. [4] Id-Deċiżjoni Nru 1080/2011/UE
tal-Parlament Ewropew u tal-Kunsill tal-25 ta’ Ottubru 2011 li
tagħti garanzija tal-UE lill-Bank Ewropew tal-Investiment kontra telf minn
self u garanziji għal self għal proġetti 'l barra mill-Unjoni u
li tħassar id-Deċiżjoni Nru 633/2009/KE (ĠU
L 280, 27.10.2011, p. 1). [5] Ammont ta’ EUR 110 miljun, li joriġina
minn operazzjonijiet konklużi qabel l-2007, imħallas lura lill-kont
fiduċjarju stabbilit għall-Faċilità Ewro-Mediterranja ta’
Investiment u Sħubija (FEMIP) u attribwibbli għall-appoġġ
mill-baġit, għandu jikkostitwixxi dħul assenjat estern
(għall-mandat estern tal-BEI 2014-2020) skont l-Artikolu 21(4)
tar-Regolament Finanzjarju u għandu jintuża għall-Fond. [6] Minħabba li dħul assenjat jagħti lok
għal approprjazzjonijiet tan-nefqa addizzjonali mingħajr
il-ħtieġa li jinġabru riżorsi proprji addizzjonali ma
għandux jgħodd kontra l-limiti massimi tal-QFP, ara l-Premessa 8
tar-Regolament tal-Kunsill li jistabbilixxi l-qafas finanzjarju pluriennali
għas-snin 2014-2020: "Il-QFP m’għandux iqis il-partiti
tal-baġit iffinanzjati mid-dħul assenjat fit-tifsira tar-Regolament
(UE, Euratom) Nru 966/2012 tal-Parlament Ewropew u tal-Kunsill ("ir-Regolament
Finanzjarju")." [7] Normalment il-Fond jissejjaħ biss biex jikkumpensa
għall-ammont tal-ħlas maqbuż (imgħax u/jew kapital) f’data
partikolari meta dovut. Dan ifisser li l-ammont kollu tal-ħlasijiet dovuti
fil-ġejjieni jaffettwaw il-Fond biss maż-żmien hekk kif dawn
il-ħlasijiet jiġu dovuti. Teoretikament, wara li jinqabeż
pagament, il-kreditur ta’ self jista' jitlob il-pagamenti futuri kollha. Sabiex
jiġi simulat stress massimu fuq il-Fond, l-analiżi kwantitattiva
ssimulat ukoll xenarju li fih il-pagamenti maqbuża jattivaw aċċelerazzjoni
tal-pagamenti kollha dovuti fil-ġejjieni.