KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Lil hinn mill-2015: lejn approċċ komprensiv u integrat għall-finanzjament tal-qerda tal-faqar u tal-iżvilupp sostenibbli /* COM/2013/0531 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Lil hinn mill-2015: lejn approċċ
komprensiv u integrat għall-finanzjament tal-qerda tal-faqar u
tal-iżvilupp sostenibbli Introduzzjoni Fis-sentejn li ġejjin, is-sħab
kollha għandhom jagħtu prijorità lil azzjoni deċiżiva biex
jitħaffef il-progress lejn l-Għanijiet ta’ Żvilupp tal-Millennju
(Millenium Development Goals - MDG). Għal dak l-għan, hekk kif
qed noqorbu lejn l-avveniment speċjali tan-NU dwar l-MDGs f’Settembru
2013, l-UE u l-Istati Membri tagħha għandhom bżonn iżidu
l-isforzi tagħhom biex jilħqu impenji kurrenti, inkluż
finanzjament miżjud u aktar effettiv b'sostenn lill-pajjiżi li qed
jiżviluppaw, kif deskritt fil-qosor fil-Komunikazzjoni tal-Kummissjoni
"Aġenda għall-Bidla"[1]. L-azzjonijiet
tal-UE u l-Istati Membri tagħha (minn hawn ’il quddiem imsejħa
"l-UE") huma analizzati fir-rapport ta' responsabbiltà tal-UE
tal-2013. B’mod parallel, il-konverżazzjoni globali
dwar l-aġenda usa’ lil hinn mill-2015 bdiet permezz ta’ diversi
proċessi. Il-Komunikazzjoni tal-Kummissjoni "Ħajja deċenti
għal kulħadd: Neqirdu l-faqar u nagħtu lid-dinja futur
sostenibbli"[2],
approvata mill-Kunsill[3],
iffokat fuq il-"xiex"u fasslet viżjoni għal wara l-2015 li
tindirizza t-tnaqqis tal-faqar u l-iżvilupp sostenibbli f’qafas
ġenerali. Il-Komunikazzjoni dwar il-Ftehim Internazzjonali dwar it-Tibdil
fil-Klima tal-2015[4]
tqajjem numru ta’ kwistjonijiet importanti relatati mal-finanzjament tal-ġlieda
kontra t-tibdil fil-klima, lil hinn mis-sena 2020. B’segwitu
għall-Komunikazzjoni "It-titjib tal-appoġġ tal-UE lil
pajjiżi li qed jiżviluppaw sabiex jimmobilizzaw il-finanzjament
għall-iżvilupp"[5]
u l-Konklużjonijiet sussegwenti tal-Kunsill[6], it-tnejn jinkludu
t-teħid ta' approċċ komprensiv lejn ir-riżorsi ta'
finanzjament kollha kif ukoll approċċ integrat lejn il-proċessi
varji li jindirizzaw l-istess sorsi. Il-Komunikazzjoni preżenti tiffoka fuq
fejn jidħol il-finanzjament tal-"kif" fil-qafas ta' wara l-2015.
Għandha l-iskop li tiżviluppa approċċ komuni tal-UE lejn
kwistjonijiet ta’ finanzjament fid-diskussjonijiet internazzjonali — xi
struttura tista' tingħata lil approċċ globali, x'riżorsi
huma disponibbli u li jistgħu jiġu mmobilizzati, liema proċessi
jistgħu jwasslu għal hemm u liema prinċipji għandhom
jiggwidaw ix-xogħol. F’dan l-istadju, l-UE għandha tibqa’
miftuħa għal djalogu mal-imsieħba, u l-Komunikazzjoni ma
tipproponi l-ebda azzjonijiet jew impenji ġodda għall-UE. Dawn ikunu
jistgħu jsiru aktar tard fil-kuntest ta’ ftehim globali dwar firxa ta’
impenji li jirriflettu l-ħtiġijiet u l-kapaċitajiet dejjem
jinbidlu ta’ diversi sħab internazzjonali lil hinn mill-2015. Il-Komunikazzjoni tenfasizza l-finanzjament
għall-pajjiżi li qed jiżviluppaw, iżda l-approċċ
propost jista’ jitqies applikabbli b’mod universali. Il-prinċipju
ċentrali jgħodd għall-pajjiżi kollha — il-firxa ta’ sorsi
ta’ finanzjament huwa l-istess għal għanijiet ta’ politika kollha u
jeħtieġ li jintuża b’mod li jinkisbu l-aħjar riżultati. 1. Xenarju
dejjem jinbidel fejn jidħlu l-finanzi Matul l-aħħar deċennju d-dinja
għaddiet minn tibdil konsiderevoli, speċjalment fid-distribuzzjoni
tal-ġid globali, il-kapaċità tal-pajjiżi li jinfluwenzaw
it-tendenzi globali u fir-rwol dejjem jiżdied ta’ donaturi emerġenti,
b'mod li nbidel il-mod ta' kif nifhmu l-finanzjament għall-iżvilupp. Bosta proċessi internazzjonali
jikkunsidraw kwistjonijiet ta’ finanzjament. Ir-rapport mill-Panel ta’ Livell
Għoli tan-NU dwar wara l-2015 u l-Grupp ta’ Ħidma Miftuħ tan-NU
dwar l-Għanijiet tal-Iżvilupp Sostenibbli jinkludu elementi dwar
il-finanzjament u mezzi oħra ta’ implimentazzjoni; il-Kumitat tan-NU
maħtur biex iressaq alternattivi għal strateġija ta’
finanzjament għall-iżvilupp sostenibbli beda l-ħidma tiegħu,
u l-Assemblea Ġenerali tan-NU qed torganizza konsultazzjonijiet sabiex
possibbilment jissaħħaħ il-proċess ta’ finanzjament
għall-iżvilupp. Barra minn hekk, il-Konvenzjoni ta’ Qafas tan-NU dwar
it-tibdil fil-klima tistrieħ fuq il-mobilizzazzjoni u l-użu effettiv
ta’ finanzjament tal-ġlieda kontra t-tibdil fil-klima għal wara
l-2020 u l-Konvenzjoni dwar id-Diversità Bijoloġika qed tħaddem
l-istrateġija tagħha ta’ mobilizzazzjoni tar-riżorsi. Dawn
il-proċessi, u oħrajn, jikkunsidraw l-istess riżorsi għall-kisba
ta' firxa ta’ għanijiet ta’ politika, li jistgħu jwasslu għal
impenji dduplikati. Minflok, l-investimenti lejn dawn il-miri, ibbażati
fuq impenji eżistenti u futuri, għandhom jaħdmu ħarir ma’
xulxin u joħolqu sinerġiji, kemm fuq livell nazzjonali kif ukoll
internazzjonali. Għalhekk il-proċessi varji li jkopru l-finanzjament
għandhom ikunu koerenti mas-sett ta’ prinċipji li dwarhom hemm qbil
komuni u jiġu integrati ma’ xulxin sabiex jimmassimizzaw l-utilità
tagħhom biex jinkisbu diversi objettivi ta' politika globali. Id-diskussjonijiet li għaddejjin
bħalissa jippreżentaw opportunità ta' tiġdid tal-Kunsens ta’
Monterrey biex jinħoloq approċċ lejn il-finanzjament li jkun
effettiv fejn jintużaw il-biċċa l-kbira tar-riżorsi —
fil-livell nazzjonali. Il-Kunsens ta’ Monterrey tal-2002, kif ukoll
id-Dikjarazzjoni ta’ Doha tal-2008 dwar il-finanzjament
għall-iżvilupp stabbiliet bil-miktub prinċipju ta’ sens komun li
għadu validu: iċ-ċavetta għall-progress tinsab fl-azzjoni
nazzjonali ta’ kull pajjiż, b'mod li r-riżorsi kollha disponibbli
jintużaw tajjeb. Dan l-approċċ komprensiv lejn il-finanzjament
għandu jkun fil-qalba tad-diskussjonijiet dwar il-finanzjament u
għandu jsir dejjem aktar operattiv. Ir-riżorsi jistgħu jiġu minn
żewġ sorsi: dawk pubbliċi u dawk privati, kemm fil-livell
domestiku kif ukoll dak internazzjonali. Il-finanzjament domestiku pubbliku
jinkludi t-taxxi u introjti oħrajn tal-gvern, inkluż minn
riżorsi naturali. Il-finanzjament internazzjonali pubbliku jista’
jieħu l-forma ta’ għotjiet, ekwità jew self. Il-finanzjament
domestiku privat jinkludi investimenti minn intrapriżi lokali u
mill-organizzazzjonijiet karitatevoli. Il-finanzjament internazzjonali privat
jinkludi investimenti internazzjonali, trasferimenti privati bħalma huma
rimessi u donazzjonijiet. Sorsi ġodda u innovattivi bħalma hi taxxa
fuq it-tranżazzjonijiet finanzjarji, dħul minn skambju
tal-emissjonijiet tal-karbonju jew taxxi fuq il-ħażna tal-karburanti
wkoll jiġu jaqgħu f’waħda mill-kategoriji msemmija hawn fuq. Dawn huma l-kategoriji ta’ riżorsi li
kull pajjiż jista’ jinvesti fil-miri kollha li dwarhom ikun hemm qbil
nazzjonali u internazzjonali, għalkemm ikunu qed jintużaw strumenti
differenti għal skopijiet ewlenin differenti. Dawn għandhom jikkostitwixxu
l-bażi ta’ approċċ ta’ finanzjament. Ir-riżorsi
pubbliċi huma direttament disponibbli u jistgħu jintużaw
mill-gvernijiet. Il-finanzjament privat huwa fundamentalment differenti
għaliex isegwi l-interessi privati u jkun meħtieġ li jiġi
ddirezzjonat biex ikun ta' sostenn għal għanijiet ta' politika. Dawk
li jfasslu l-politika pubblika għandhom jaraw li jżidu l-finanzjament
disponibbli u jiżguraw li r-riżorsi jkunu mmirati b'mod effettiv lejn
miri maqbula. Għal dan l-għan, is-sorsi kollha għandhom jitqiesu
flimkien bħala taħlita ta’ mezzi disponibbli għall-kisba
tar-riżultati. 2. Fejnhom
il-flus? L-attenzjoni għandha tingħata fejn jiswa, skont
il-perspettiva tal-pajjiż li qed jiżviluppa F’pajjiżi li qed jiżviluppaw fl-2010
kien hemm madwar EUR 7 129 biljun[7]
f'finanzjament pubbliku u privat disponibbli, bil-potenzjal li dan
jikkontribwixxi għall-qerda tal-faqar u l-iżvilupp sostenibbli. Tabella 1: Il-finanzi disponibbli
għall-pajjiżi li qed jiżviluppaw [biljun EUR, 2010) Finanzjament
domestiku pubbliku It-total: 3 317 Dħul mit-taxxa 3 252 Potenzjal ta' tneħħija ta' sussidji fuq
fjuwils fossili li jagħmlu l-ħsara 309 Self estern pubbliku: 65 Punti f'Memorandum Riżervi totali, inkluż deheb: 4 074 Flussi 'l barra finanzjamentji illeċiti:
649 (stima ta' telf ta' 120 minn
dħul mit-taxxi) inkluż minn korruzzjoni, attivitajiet kriminali, u
l-evażjoni u l-evitar tat-taxxa. Finanzjament
internazzjonali pubbliku Total minfuq: 158 Għotjiet skont l-Għajnuna
Uffiċjali għall-Iżvilupp (ODA): 92, li
minnhom 39 mill-UE Self konċessjonarju: 7, li minnhom 3 mill-UE Finanzjament ieħor ta' għajnuna
uffiċjali: 54, li minnhom -4 mill-UE Operazzjonijiet ta’ sigurtà internazzjonali
ssanzjonati min-NU: 5, li minnhom 2 mill-UE Finanzjament privat
— domestiku u internazzjonali Total: 3 652 Investiment domestiku privat: 2 678 Investimenti Internazzjonali: 624 Investiment
Dirett Barrani 443 Investiment
ta' Portafoll Barrani 181 Self estern pubbliku: 70 Rimessi: 238 Il-potenzjal jekk l-ispejjeż ta'
trasferiment jitnaqqsu għal 5%: 12 kull sena Filantropija Privata: 42 Id-dejta tikkonferma li r-riżorsi
domestiċi pubbliċi jeċċedu l-finanzjament internazzjonali
pubbliku (b’fattur ta’ 20), li dan stess hu biss 2 % tal-finanzjament
totali disponibbli f’pajjiżi li qed jiżviluppaw. Il-finanzjament
privat huwa fil-livell tal-finanzjament pubbliku. Fl-istess ħin, hemm
differenzi fundamentali bejn il-pajjiżi fejn tidħol l-għamla ta’
sorsi ta’ finanzjament, kif jidher mis-sitwazzjonijiet differenti ta’
pajjiżi bi dħul baxx (LICs) u pajjiżi bi dħul medju (MICs).
Grafika 1 Grafika 2 2.1. Finanzjament domestiku pubbliku — l-akbar u l-aqwa sors
għall-gvernijiet Il-finanzjament domestiku pubbliku
(EUR 3 317bn) huwa s-sors ewlieni ta’ finanzjament direttament
disponibbli għall-gvernijiet biex jintefqu fuq għanijiet ta' politika
u għalhekk huwa l-aktar element importanti f’approċċ ta’
finanzjament. Lil hinn mill-provvediment ta' spazju fiskali għall-infiq
fuq il-prijoritajiet, għandu wkoll isaħħaħ
ir-responsabbiltà domestika u jikkontribwixxi għal relazzjoni soda bejn il-gvern
u ċ-ċittadini. Il-biċċa l-kbira tal-pajjiżi
jistgħu jżidu b’mod sinifikanti l-infiq domestiku tagħhom fuq
il-prijoritajiet, inkluż billi jżidu d-dħul mit-taxxa,
jiġġieldu l-flussi illeċiti u jneħħu s-sussidji minn
fuq fjuwils fossili li jikkawżaw il-ħsara. 2.1.1. Il-mobilizzazzjoni tar-riżorsi domestiċi L-introjtu mit-taxxa ta’ pajjiżi li qed
jiżviluppaw ivarja, u bħala medja huwa ta' 13% tal-PDG fil-LICs u 22%
tal-PDG fil-MICs. Il-UNDP kienet issuġġeriet li sehem ta' dħul
tal-gvern li jkun konsistenti mal-MDG jista' jkun ta' aktar minn 20% tal-PDG, u
dan il-fatt juri li l-biċċa l-kbira tal-MICs għandhom ikunu
jistgħu jilħqu dawn l-għanijiet biss bl-użu ta’
riżorsi domestiċi pubbliċi. Barra minn hekk, skont il-FMI,
iż-żieda tad-dħul tal-gvern b’madwar 3 % tal-PDG tkun
tista' ssir relattivament malajr, anki mingħajr ma jitqies il-potenzjal
ta’ żieda fl-introjti minn riżorsi naturali u minn taxxi
ekoloġiċi ġodda. Dan juri li, anki fil-każ tal-LICs, huwa
possibbli li, għat-tul, tintemm id-dipendenza fuq l-għajnuna. Il-flussi illegali, li huma stmati li
jilħqu EUR 649bn fis-sena, u li jiġu minn pereżempju
l-qligħ mill-kriminalità, l-evażjoni tat-taxxi u l-korruzzjoni, huma
elementi sostanzjali ta' ħela ta' finanzi pubbliċi għal bosta
pajjiżi. It-telf ta’ introjtu mit-taxxa huwa parti waħda biss
tal-impatt negattiv ta’ dawn il-flussi, peress li dawn jiskoraġġixxu
wkoll l-investimenti leġittimi u jimminaw il-kuntratt soċjali usa'.
Il-pajjiżi għandhom irażżnu l-flussi illeċiti permezz
ta' miżuri regolatorji u ta’ infurzar. 2.1.2. Is-self u t-tislif sostenibbli Is-self jippermetti lill-pajjiżi biex
jantiċipaw l-investimenti u jżommu nefqa pubblika stabbli fid-dawl
ta' volatilità fejn jidħol dħul. Id-dejn kumplessiv ta’ pajjiżi
li qed jiżviluppaw naqas matul is-snin, iżda għad fadal
ħafna li huma fir-riskju jew li m'għandhomx aċċess
għas-swieq finanzjarji u jiddependu fuq self uffiċjali. Selliefa
privati u selliefa uffiċjali mhux tal-Paris Club saru kredituri aktar prominenti
lill-pajjiżi li qed jiżviluppaw. Dan jenfasizza l-ħtieġa
biex l-atturi kollha japplikaw prinċipji ta' self u tislif responsabbli
biex jiġi żgurat li d-dejn ikun sostenibbli. Il-biċċa l-kbira
tal-EUR 4 074bn li l-pajjiżi li qed jiżviluppaw
għandhom bħala riżervi internazzjonali jinżammu minn ftit
fost l-MICs, filwaqt li l-ifqar pajjiżi ftit għandhom taħt
rashom. Ir-riżervi ta’ prekawzjoni huma parti mid-difiża li jkollu
pajjiż kontra x-xokkijiet u jistgħu jiġu kkumplimentati minn
strumenti bbażati fuq l-assikurazzjoni, filwaqt li qafas ta’ politika
makroekonomika soda u prudenzjali huwa ċ-ċavetta biex jiġu
limitati l-vulnerabbiltajiet. 2.1.3. Il-finanzjament domestiku pubbliku disponibbli għandu jintnefaq
tajjeb L-infiq kif xieraq tal-flus disponibbli huwa
daqstant importanti daqs iż-żieda fir-riżorsi. Il-pajjiżi
għandhom iżommu mar-regoli ta’ ġestjoni tajba tal-finanzi
pubbliċi u jiżguraw l-akbar valur miżjud possibbli tal-flus
disponibbli. L-investimenti l-aktar siewja biex jintlaħqu l-miri stabbiliti
għandhom jiġu prijoritizzati u l-infiq fuq għan wieħed ta'
politika għandu wkoll ikun ta' sostenn għal miri oħra. 2.1.4. Azzjonijiet kruċjali biex jiżdiedu r-riżorsi
domestiċi investiti lejn l-għanijiet ta' politika miftiehma
globalment Kull pajjiż għandu fil-livell
nazzjonali: –
Jirriforma s-sistemi ta’ taxxa,
isaħħaħ l-amministrazzjonijiet tat-taxxa u jimplimenta
leġiżlazzjoni li tnaqqas il-korruzzjoni. Dan jinkludi li tiżdied
it-trasparenza, ir-responsabbiltà u s-sostenibbiltà fl-amministrazzjoni
tar-riżorsi naturali u li tiġi kkonfrontata l-evażjoni u
l-evitar tat-taxxa. –
Jiġu implimentati politiki li jiżguraw li
l-flus jintefqu tajjeb, inkluż permezz ta' sħubiji innovattivi,
jiġu megħjuna l-fondi privati u jiġu eliminati s-sussidji
tal-fjuwils fossili li jikkawżaw il-ħsara. –
Jiġu segwiti prinċipji responsabbli ta'
self u tislif sovran u tinbena r-reżiljenza. Sabiex jingħata sostenn lill-isforzi
nazzjonali, il-pajjiżi u l-atturi internazzjonali kollha flimkien
għandhom: –
Jobbligaw lis-settur finanzjarju u
lill-intrapriżi multinazzjonali f’setturi ewlenin biex jaħdmu fi
trasparenza, inkluża l-Inizjattiva għat-Trasparenza tal-Industriji
Estrattivi u inizjattivi oħra li jappoġġjaw l-użu
sostenibbli tar-riżorsi naturali, permezz ta’ regoli dwar il-flussi illegali,
rappurtar pajjiż pajjiż, iktar trasparenza fiskali u l-iskambju ta’
informazzjoni. L-UE qed tmexxi l-azzjoni globali dwar dawn il-kwistjonijiet,
iżda l-progress jiddependi wkoll fuq atturi oħrajn li juru li
jaderixxu ma' dawn il-prinċipji. –
Jiġu implimentati regoli kontra l-korruzzjoni
simili għall-Konvenzjoni tan-NU kontra l-Korruzzjoni. –
Tissaħħaħ l-arkitettura finanzjarja
internazzjonali għas-sostenibbiltà tad-dejn u l-assorbiment tax-xokkijiet. 2.2. Il-Finanzjament internazzjonali pubbliku — għal xi wħud
għadu importanti L-ODA għadu s-sors ewlieni ta'
finanzjament għas-36 LICs li huma wkoll l-aktar affettwati minn sfidi
globali; dan jammonta għal 12 % tal-PDG tagħhom, li diġà
huwa anqas mill-introjti domestiċi tal-LICs. Fl-istess ħin,
il-finanzjament internazzjonali pubbliku (158bn) huwa ta’ importanza
marġinali għall-pajjiżi li qed jiżviluppaw meħuda
flimkien (0.7 % tal-PDG). Fil-każ tal-108 MICs, l-ODA
tirrappreżenta medja ta’ biss 0.2 % tal-PDG, ħaġa li
tikkonferma li l-għajnuna għandha tkun iffukata fuq il-pajjiżi
li l-aktar għandhom bżonnha. 2.2.1. Aktar finanzjament u l-monitoraġġ ta' dak li hu importanti Il-finanzjament estern pubbliku
għall-pajjiżi li qed jiżviluppaw hu riżultat ta’
deċiżjonijiet baġitarji domestiċi minn kull donatur. L-UE
kollettivament tipprovdi aktar għajnuna mill-pajjiżi żviluppati
l-oħra flimkien, issodisfat l-impenji tagħha msejħa
"Għajnuna għall-Kummerċ" sa mill-2008, kisbet
riżultati għar-rigward tal-impenji finanzjarji hekk imsejħa
"Fast Start Climate Finance" u qed iżżid il-finanzjament
tal-bijodiversità konformi mad-deċiżjonijiet ta' Nagoya u Hyderabad.
Filwaqt li l-ODA kollettiva tal-UE tnaqqset kemm kemm fl-2012, il-kapijiet ta’
Stat u Gvern tal-UE kkonfermaw mill-ġdid l-impenn tagħhom biex
jintlaħaq iż-0.7 % tal-ING sal-2015 minkejja s-sitwazzjoni
ekonomika diffiċli. L-ekonomiji u l-pajjiżi emerġenti li laħqu
l-ogħla status tal-MIC għandhom jagħtu s-sehem ġust ta’
finanzjament pubbliku internazzjonali, skont ir-riżorsi finanzjarji
disponibbli għalihom. Il-kunċett tal-ODA qiegħed jiġi
kkritikat dejjem aktar jew għax huwa wiesgħa wisq jew inkella
għax la jkopri l-fornituri kollha tal-kooperazzjoni
għall-iżvilupp u l-anqas l-azzjonijiet kollha relevanti. Teżisti
l-ħtieġa ta' riforma tal-ODA u ta' monitoraġġ aħjar
tal-finanzjament għal għanijiet differenti ta’ politika, inkluż
titjib fl-indikaturi ta' politika (pereż. ir-Rio-markers) li juru l-volumi
tal-ODA li jappoġġjaw għanijiet speċifiċi ta’
politika. Għandha titfassal bażi solida biex jinqabad il-finanzjament
kollu li jibbenefika lill-pajjiżi li qed jiżviluppaw, sabiex l-atturi
kollha jkunu jistgħu jinżammu responsabbli bl-użu tal-istess
kejl. Il-ħidma fi ħdan il-Kumitat għall-Għajnuna
fl-Iżvilupp (DAC) dwar riforma tal-ODA hija kontribut importanti għal
dan il-għan. Il-monitoraġġ tal-finanzjament internazzjonali
għandu jkun parti minn mekkaniżmu komprensiv ta' monitoraġġ
li jkun ikopri wkoll il-finanzjament domestiku u privat. 2.2.2. Il-finanzjament estern disponibbli għandu jintnefaq tajjeb Bħal fil-każ tar-riżorsi
domestiċi, l-użu tajjeb tal-flus ifisser kemm li jsiru
l-affarijiet it-tajba, kif ukoll li l-affarijiet isiru tajjeb: il-flus
għandhom jiġu kkonċentrati fejn ikunu l-aktar
meħtieġa, u użati b’modi innovattivi u effettivi biex
jiżguraw li jservu diversi għanijiet ta’ politka fl-istess ħin,
pereż. billi ċerti għanijiet speċifiċi ta’ politika
jiġu integrati fil-politika ġenerali. Modalitajiet innovattivi ta' kif jitwassal
il-finanzjament jistgħu jtejbu l-effettività u għandhom jitqawwew.
Il-fużjoni ta' għotjiet mas-self u l-ekwità, kif ukoll
il-mekkaniżmi ta' garanzija u ta' qsim tar-riskju jistgħu
jikkatalizzaw l-investimenti privati u pubbliċi, u l-UE qed taħdem
attivament għal dan. B’mod aktar wiesa’, kif żviluppat mill-Grupp ta’
Direzzjoni dwar il-Finanzjament Innovattiv għall-Iżvilupp,
il-finanzjament innovattiv jista’ jkollu potenzjal sinifikanti li
jiġġenera l-introjtu u jiżgura finanzjament aktar stabbli u
prevedibbli. Xi mekkaniżmi innovattivi ta’ finanzjament
bħall-Mekkaniżmu għall-Iżvilupp Nadif huma mfassla biex
jiffokaw fuq it-twettiq ta' xi għan speċifiku ta' politika, iżda
dawn it-tipi ta’ investimenti għandhom iqisu wkoll il-kuntest usa’ u
jikkontribwixxu għal għanijiet oħra. Biex l-affarijiet isiru tajjeb,
il-komunità internazzjonali ħadet impenji ċari permezz
tas-sħubija ta’ Busan għall-kooperazzjoni għall-iżvilupp
effettiva biex l-azzjonijiet isiru aktar effettivi, abbażi ta' sjieda
demokratika minn pajjiżi li qed jiżviluppaw u għarfien komuni
dwar il-ħtieġa li jipprovdu beni pubbliċi globali. Din jista’
jiġi mminat minn proċessi multilaterali li jfittxu li jassenjaw
finanzjament għal oqsma ta’ politika speċifiċi filwaqt li
l-pajjiżi li qed jiżviluppaw jeħtieġ li jiddireġuh
lejn fejn jista' jagħmel l-affarijiet it-tajba biex jinkisbu l-miri
nazzjonali relatati ma’ għanijiet globali. 2.2.3. Azzjonijiet kruċjali biex jiżdiedu r-riżorsi
internazzjonali pubbliċi investiti f’għanijiet globali Kull pajjiż għandu jieħdu
s-sjieda u jitlob li kull finanzjament estern ikun isegwi l-pjani nazzjonali
tiegħu ta’ żvilupp li jintegra għanijiet miftiehma, skont
il-prinċipji ta’ Busan. Il-pajjiżi kollha u l-atturi
internazzjonali għandhom jaqblu li: –
Isegwu l-prinċipji u l-impenji
tas-sħubija ta’ Busan dwar il-provvediment ta' finanzjament
internazzjonali pubbliku. –
Jikkontribwixxu s-sehem ġust tagħhom
għall-isforz globali abbażi ta' spettru dinamiku ta’ impenji.
Il-pajjiżi l-aktar għonja għandhom jikkontribwixxu aktar
mill-MICs u mill-ekonomiji emerġenti, filwaqt li appoġġ estern
għandu jiffoka fuq il-LICs. Il-kooperazzjoni mal-MICs, biex tkun ta'
benefiċċju b’mod partikulari lill-MICs fuq in-naħa ta' isfel,
għandha tkun iffokata fuq azzjonijiet katalitiċi kruċjali. –
Issir riforma tal-ODA u jiġi mmonitorjat
il-finanzjament estern pubbliku fil-kuntest ta’ mekkaniżmu komprensiv ta'
responsabbiltà reċiproka. –
Intużaw modalitajiet ta' finanzjament li
jirriflettu l-ħtiġijiet tal-pajjiż, b’rispett lejn
is-sostenibbiltà finanzjarja għat-tul. Għandhom jitqawwew
il-mekkaniżmi innovattivi li jimmobilizzaw riżorsi addizzjonali, kif
ukoll ikun hemm żvilupp aktar qawwi ta' kapaċitajiet u assistenza
teknika aħjar. 2.3. Il-finanzjament privat — il-mutur ewlieni tat-tkabbir Il-finanzjament privat huwa fundamentalment
differenti mill-finanzjament pubbliku. Dan isegwi interessi privati u, minnu
nnifsu, ma jsegwix xi għanijiet ta’ politika pubblika. Fl-istess ħin,
l-investimenti privati (EUR 3 652bn) huma l-ixpruni ewlenin
tat-tkabbir u jistgħu jikkontribwixxu għal dawn l-għanijiet.
Anki bidla żgħira fix-xejriet tal-prijoritajiet u l-modalitajiet
tal-investiment privat tista' ġġib magħha benefiċċji
sinifikanti għall-għanijiet ta’ politika pubblika. Dan
iċ-ċaqliq fix-xejriet jista’ jintlaħaq primarjament permezz ta’
inċentivi ta' politika domestiċi u internazzjonali, pereż.
sħubijiet pubbliċi-privati. Is-settur privat domestiku u dak
internazzjonali huma integrati sew, jirreaġixxu għall-istess
inċentivi u għalhekk huma kkunsidrati flimkien. Is-separazzjoni hija
biss rilevanti għall-monitoraġġ tal-impenji. 2.3.1. L-investiment u l-kummerċ; ix-xjenza, it-teknoloġija u
l-innovazzjoni L-investiment domestiku huwa ferm u ferm akbar
mill-investiment barrani u huwa l-ingredjent ewlieni tal-iżvilupp
ekonomiku. L-investiment dirett barrani, u b'mod minuri, is-self estern privat,
jikkomplementaw dan, anki billi jdaħħlu l-għarfien u
t-teknoloġija. L-investimenti b’impatt pożittiv fuq l-għanijiet
pubbliċi għandhom jiġu sostnuti permezz ta’ politika ambjentali
konduċenti u ta' mekkaniżmi innovattivi bħal pagamenti
bbażati fuq il-prestazzjoni għal servizzi ta' ekosistemi, krediti
tal-karbonju jew kumpens tal-bijodiversità. Il-kummerċ huwa mezz ewlieni biex
tiżdied l-attività u l-produttività. Sabiex jinkisbu dawn
il-benefiċċji, il-pajjiżi għandhom joħolqu ambjent
favorevoli li jiffaċilita l-kummerċ fuq livell internazzjonali,
reġjonali u nazzjonali. Il-pajjiżi l-aktar għonja għandhom
jipprovdu aċċess preferenzjali u sostenn lil dawk l-aktar foqra. L-UE
diġà qed tipprovdi aċċess ġeneruż għas-swieq
tal-UE, inkluż aċċess sħiħ bla tariffi u bla kwoti
għal-LDCs. Il-biċċa l-kbira tal-kummerċ tal-pajjiżi li
qed jiżviluppaw diġà jsir ma’ pajjiżi oħra li qed
jiżviluppaw, u l-potenzjal ta’ liberalizzazzjoni tal-kummerċ
min-Nofsinhar għan-Nofsinhar għandu jiġi sfruttat. Fil-livell
internazzjonali, il-kapaċità tal-LDCs li jibbenefikaw mill-kummerċ
jeħtieġ attenzjoni speċifika. Għandhom jiġu sfruttati teknoloġiji
ġodda biex jintlaħqu għanijiet globali permezz ta’ iktar
integrazzjoni globali. Ir-reazzjoni reċiproka bejn it-teknoloġija
adattata għal kuntest ta' pajjiż li qed jiżviluppa u
l-innovazzjoni tista’ tkompli tiġi sostnuta billi
jitħeġġeġ aktar investiment fir-riċerka, fost
oħrajn permezz ta’ mekkaniżmi innovattivi bħall-garanzija ta'
xiri bil-quddiem. 2.3.2. Rimessi Ir-rimessi huma fluss privat sinifikanti u
jirrappreżentaw sehem kbir mill-PDG f’bosta pajjiżi li qed
jiżviluppaw. Tnaqqis fil-kost tat-trasferimenti tar-rimessi għal
5 % skont l-impenn tal-G20[8]
iġib miegħu benefiċċji sinfikanti, inkluż fil-każ
ta’ trasferimenti bejn il-pajjiżi tan-Nofsinhar u li jiswew aktar flus.
Kemm il-pajjiżi li jibagħtu kif ukoll dawk li jirċievu
għandhom jadottaw politiki li joħolqu kundizzjonijiet tas-suq
kompetittivi u trasparenti, jipprovdu aċċess għal servizzi
finanzjarji aħjar u jħeġġu użu aktar infurmat u
produttiv tar-rimessi. 2.3.3. Filantropija privata Il-filantropija privata għandha
ħafna mill-attributi tal-assistenza uffiċjali. Ġie stmat li din
laħħqet EUR 42bn fl-2010 u tista’ tkun ta' kontribut importanti
f’komunitajiet speċifiċi u dwar kwistjonijiet speċifiċi.
Minħabba n-natura stess tal-għotjiet privati, ftit jista'
jittieħed kont tagħhom fil-pjani nazzjonali għall-iżvilupp,
madankollu għandha tiżdied it-trasparenza, il-prevedibbiltà u
l-effettività tagħhom. 2.3.4. Azzjonijiet kruċjali biex jiżdiedu r-riżorsi privati
investiti fi prijoritajiet ta' politika Kull pajjiż għandu fil-livell
nazzjonali: –
Joħloq klima ta’ negozju li
tappoġġja l-għanijiet ta’ politika f’konformità mal-impenji
internazzjonali dwar ix-xogħol deċenti, titrawwem l-innovazzjoni u
l-iżvilupp ta’ sistemi finanzjarji domestiċi. –
Juża r-riżorsi pubbliċi biex
jinvesti f’oqsma li jagħtu stimolu lill-investimenti privati lejn
prijoritajiet ta' politika. Barra minn dan, il-pajjiżi u l-atturi
internazzjonali kollha għandhom jaqblu li: –
Joħolqu ambjent ta' politika internazzjonali
b'regoli trasparenti u ġusti, inkluż fejn jidħol il-kummerċ
u s-swieq finanzjarji. –
Juża l-finanzi pubbliċi biex jagħti
stimolu lill-investimenti privati u jagħti sostenn lill-innovazzjoni,
inkluż permezz ta’ teknoloġiji. Barra minn hekk, is-settur privat għandu
jaqbel li: –
Jsegwi l-prinċipji ta’ responsabbiltà korporattiva
soċjali u ambjentali tajba, u b’hekk jikkontribwixxi għal moviment
lejn ekonomija ekoloġika inklussiva, inkluża l-valutazzjoni
tal-impatt tal-investimenti fuq l-għanijiet ta’ politika, billi jsegwi
l-prinċipju tad-distakkament fil-prezzijiet ta’ trasferiment, ikunu
trasparenti fl-attivitajiet tagħhom, u li jaderixxu ma’ linji gwida
internazzjonali ta’ CSR u tal-investitur. –
Il-filantropija privata għandha tapplika
l-prinċipji ta’ Busan fl-għoti tal-assistenza. 3. Lejn
approċċ komprensiv u integrat għall-finanzjament 3.1. Prinċipji Aġenda globali b’miri kondiviżi
għal wara l-2015 għandha tkun ta' inċentiv
għall-protagonisti kollha biex ir-riżorsi tagħhom jintużaw
tajjeb. Din għandha tiġi kkumplimentata minn approċċ sod
għal finanzjament li jkun universali fl-applikazzjoni tiegħu,
jirrifletti l-iżviluppi globali u li jkun iqis ir-riżorsi kollha
għad-dispożizzjoni ta’ atturi differenti. It-tiġdid u
t-twessigħ tal-aġenda internazzjonali dwar il-Finanzjament għall-Iżvilupp
biex din tkun xierqa għad-dinja ta' għada tkun l-aktar ta' ġid
għal dan l-iskop. Filwaqt li l-proċess lejn l-elaborazzjoni ta'
għanijiet globali għadu biss fil-bidu tiegħu, id-diskussjonijiet
dwar il-finanzjament għandhom jiġu ggwidati minn ċerti
prinċipji kruċjali: –
Il-finanzjament għandu jitqies fil-kuntest ta’
politiki. Politiki tajba huma l-pilastru ċentrali tal-implimentazzjoni,
għaliex it-tibdil fil-politiki huwa aktar effettivi mill-infiq tal-flus
biex tiġi kkumpensata politika ħażina. –
Ir-riżorsi disponibbli kollha għandhom
jitqiesu b’mod komprensiv flimkien, billi huma partijiet mill-istess total.
It-tliet kategoriji ta’ finanzjament — dak domestiku pubbliku, dak
internazzjonali pubbliku u dak privat — jipprovdu struttura li tidentifika
azzjonijiet ewlenin fil-livell nazzjonali u internazzjonali. –
Approċċ globali lejn il-finanzjament
għandu jħalli l-prijoritizzazzjoni tar-riżorsi l-ewwel u qabel
kollox fil-livell ta' pajjiż. Dan huwa fejn jistgħu jittieħdu
bl-aktar mod effettiv id-deċiżjonijiet dwar il-kompromessi xierqa
bejn id-diversi għanijiet ta’ politika, fi ħdan qafas ta’ impenji,
għanijiet u miri maqbula internazzjonalment. Il-livell ta’ pajjiż
għandu jkun fiċ-ċentru tal-attenzjoni għall-valutazzjoni
tat-taħlita ta’ politiki, finanzjament u strumenti meħtieġa biex
jintlaħqu għanijiet miftiehma, peress li dan huwa fejn
isseħħ l-implimentazzjoni. Il-pajjiżi kollha għandhom
jimpenjaw ruħhom biex jagħmlu l-aħjar użu mir-riżorsi
disponibbli biex jintlaħqu l-għanijiet politiċi miftiehma. –
Bl-istess mod kif l-għanijiet differenti ta’ politika
jridu jkunu reċiprokament rinforzanti, il-mezzi biex jintlaħqu dawn
l-għanijiet għandhom jaħdmu fil-livell ta' pajjiż
bħala pakkett wieħed ta’ sorsi u strumenti marbuta, biex ikunu
jistgħu jintlaħqu d-diversi objettivi ta' politika bl-istess ammont
ta' flus. Il-finanzjament irid jagħti sostenn lis-sinerġiji bejn
għanijiet universali varji. Filwaqt li jiġu rispettati l-impenji
eżistenti, il-prinċipju għandu jkun l-integrazzjoni ta’
għanijiet fil-politiki nazzjonali aktar milli li jitwarrab il-finanzjament
fil-livell globali għal skop speċifiku, li joħloq
frammentazzjoni. –
Il-finanzjament estern pubbliku għandu
jiġi bbilanċjat mill-ġdid lejn il-pajjiżi l-aktar
fil-bżonn, filwaqt li l-ekonomiji emerġenti u l-pajjiżi li jkunu
laħqu l-ogħla status ta' MIC għandhom jagħtu l-kontribut
ġust tagħhom għal dak l-iskop. –
Il-finanzjament kollu għandu jiġi
mmonitorjat flimkien b’mod armonizzat sabiex tiġi żgurata
t-trasparenza u r-responsabbiltà reċiproka kemm fuq livell nazzjonali kif
ukoll fuq livell globali, bil-għan li jkun hemm użu aktar effettiv
tiegħu lejn diversi għanijiet ta' żvilupp sostenibbli globali u
nazzjonali. Għandu jittejjeb l-intraċċar tal-flussi finanzjarji
kollha, inkluż il-kontribut tagħhom lejn għanijiet nazzjonali u
globali kif ukoll kejn miri relatati dwar finanzi relatati, fejn dawn il-miri
jeżistu. Kruċjali f'dan se tkun id-disponibbiltà u l-kwalità
tad-dejta fuq livell nazzjonali, u għandhom jissaħħu
l-kapaċitajiet tal-istatistika. 3.2. Kuntest
ewlieni għal proċessi internazzjonali Filwaqt li jibnu fuq il-wegħda
fid-Dikjarazzjoni ta’ Doha li tittieħed azzjoni globali kkonċertata
fejn jidħlu sfidi differenti, id-diskussjonijiet internazzjonali dwar
finanzjament għandhom ikunu marbuta taħt umbrella waħda.
Għalhekk, il-Kumitat tal-Esperti tan-NU b’mandat tal-Konferenza Rio+20
biex jipproponi għażliet għal strateġija ta’ finanzjament
tal-iżvilupp sostenibbli għandu jkun koerenti bis-sħiħ
mal-proċess tal-finanzjament għall-iżvilupp. Biex dawn il-linji
jiġu amalgamati, għandha tiġi organizzata konferenza
internazzjonali biex jiġi żviluppat approċċ komprensiv u
integrat għall-finanzjament, fuq il-bażi tal-eżitu tal-Kumitat
ta’ Esperti u l-proċessi ta’ preparazzjoni ta’ qafas għal wara
l-2015. Kif ġie wkoll suġġerit fir-rapport dwar
iż-żmien ta' wara l-2015 mill-Panel ta' Livell Għoli tan-NU, dan
il-proċess globali msaħħaħ għandu jistabbilixxi
approċċ ġenerali għall-finanzjament, b’mod partikolari
għall-aġenda ta' wara l-2015. Il-prinċipji stabbiliti hawn fuq
għandhom jiżguraw ukoll il-koerenza u l-koordinazzjoni ta’ flussi
speċifiċi ta' finanzjament, u tal-proċessi ta' negozjar li
għaddejjin (eż. fil-kuntest tal-Ftehim tal-2015 dwar it-tibdil
fil-klima). Dan jiżgura li kull pajjiż ikun jista' jimmira
r-riżorsi lejn fejn dawn jikkontribwixxu l-aħjar lejn miri komuni
miftiehma. 3.3. Il-passi li jmiss għall-Unjoni Ewropea Din il-Komunikazzjoni għandha l-għan
li jkun hemm approċċ komuni tal-UE għad-diskussjonijiet dwar
il-finanzjament fl-aġenda għal wara l-2015, il-grupp ta’ ħidma
miftuħ dwar l-għanijiet ta' żvilupp sostenibbli, il-kumitat
tal-esperti tan-NU biex jipproponi għażliet għal strateġija
ta’ finanzjament tal-iżvilupp sostenibbli u r-reviżjoni
tal-proċess tal-finanzjament għall-iżvilupp. Barra minn hekk,
għandha wkoll tinkwadra l-pożizzjonijiet komuni tal-UE
fil-finanzjament tal-proċessi dwar il-klima, il-bijodiversità, is-sustanzi
kimiċi u proċessi internazzjonali oħra. L-approċċ imfisser hawn fuq huwa
kontribut għad-diskussjonijiet internazzjonali u l-UE għandha
tuża din biex tħares 'il barra u tinvolvi ruħha
f'diskussjonijiet ma' msieħba. [1] COM(2011) 637 [2] COM(2013) 92 [3] 11559/13 [4] COM(2013) 167 [5] COM(2012) 366 [6] 14533/12 [7] Is-sorsi kollha taċ-ċifri f’din
il-Komunikazzjoni huma elenkati fid-Dokument ta’ Ħidma tal-Persunal
mehmuż. [8] Id-dikjarazzjoni tas-Summit tal-G20
tal-5 ta’ Diċembru 2011, il-punt 77