RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-applikazzjoni tar-Regolament (KE) Nru 1523/2007 li jipprojbixxi t-tqegħid fis-suq u l-importazzjoni fil-Komunità jew l-esportazzjoni mill-Komunità ta’ pil tal-qtates u tal-klieb u ta’ prodotti oħra li fihom pil ta’ din ix-xorta /* COM/2013/0412 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar l-applikazzjoni tar-Regolament (KE) Nru 1523/2007
li jipprojbixxi t-tqegħid fis-suq u l-importazzjoni fil-Komunità jew
l-esportazzjoni mill-Komunità ta’ pil tal-qtates u tal-klieb u ta’ prodotti
oħra li fihom pil ta’ din ix-xorta (Test b’rilevanza għaż-ŻEE) 1. Kuntest Ir-Regolament (KE) Nru 1523/2007[1] jipprojbixxi t-tqegħid
fis-suq u l-importazzjoni fl-Unjoni jew l-esportazzjoni mill-Unjoni ta’ pil
tal-qtates u tal-klieb u ta’ prodotti oħra li fihom pil ta’ din ix-xorta. Il-projbizzjoni ġiet adottata sabiex
jiġi indirizzat it-tħassib taċ-ċittadini Ewropej, li jqisu
l-klieb u l-qtates bħala annimali domestiċi u li għalhekk ma
jridux jixtru prodotti li fihom il-pil tal-klieb jew tal-qtates. Hija armonizzat il-miżuri li jipprojbixxu
l-pil tal-klieb u tal-qtates u l-prodotti li fihom pil ta’ din ix-xorta
fil-livell tal-UE minħabba li ħmistax-il Stat Membru[2] kienu diġà adottaw
leġiżlazzjoni nazzjonali sabiex jirrestrinġu l-produzzjoni
tal-pil tal-klieb u tal-qtates u l-kummerċ fih. Mhux faċli li wieħed jiddistingwi l-pil
tal-klieb u tal-qtates minn tipi oħrajn ta’ pil jew mill-materjal
sintetiku li jintuża bħala imitazzjoni tal-pil. Dan huwa l-każ
b’mod partikulari meta l-pil jintuża bħala inforra jew
fit-tiżjin tal-ħwejjeġ (pereżempju fl-għonq ta’ kowt)
jew fil-ġugarelli jew fl-aċċessorji (pereżempju
fil-ħoloq taċ-ċwievet bl-annimali tal-fer). Il-projbizzjoni fuq il-pil tal-klieb u tal-qtates
ilha tapplika fl-Unjoni Ewropea sa mill-31 ta’ Diċembru 2008. L-Artikolu 7 tar-Regolament jistipula li “Il-Kummissjoni
għandha tirrapporta lill-Parlament Ewropew u lill-Kunsill dwar
l-applikazzjoni ta’ dan ir-Regolament, inkluż dwar l-attivitajiet doganali
relatati miegħu, sa mhux aktar tard mill-31 ta’ Diċembru 2010”.
Dan ir-rapport huwa t-tweġiba tal-Kummissjoni għal din it-talba. Ir-rapport għandu l-għan li jagħti
ħarsa ġenerali lejn l-implimentazzjoni tal-projbizzjoni fuq il-pil
tal-klieb u tal-qtates fl-UE matul l-2009 u l-2010. Dan ir-rapport dam ma
ġie adottat minħabba li l-Istati Membri kellhom bżonn
jiġbru biżżejjed tagħrif dwar l-implimentazzjoni
tal-projbizzjoni. Xi dejta waslet biss fil-bidu tal-2012 u b’hekk analiżi
sħiħa setgħet issir biss matul l-2012. Ir-rapport jiddeskrivi l-miżuri tal-infurzar
li l-Istati Membri implimentaw sabiex jiġu evitati t-tqegħid fis-suq
u l-importazzjoni fl-Unjoni jew l-esportazzjoni mill-Unjoni ta’ pil tal-qtates
u tal-klieb u ta’ prodotti oħra li fihom pil ta’ din ix-xorta. B’mod partikulari, ir-rapport jagħti
ħarsa ġenerali lejn il-metodi tal-analiżi li l-Istati Membri
jużaw biex jidentifikaw l-ispeċi ta’ oriġini tal-pil u lejn
il-penali applikabbli f’każ ta’ ksur. Ir-rapport jenfasizza
l-kwistjonijiet ewlenin marbutin mal-implimentazzjoni li l-partijiet
interessati u l-Istati Membri semmew lill-Kummissjoni. Fl-aħħar nett, dan id-dokument
jirrapporta dwar l-impatt li l-partijiet interessati ewlenin iħossu li
kellha l-applikazzjoni ta’ dan ir-Regolament. 2. L-obbligi tal-Istati Membri L-Istati Membri huma primarjament responsabbli
għall-applikazzjoni tal-projbizzjoni[3]. Barra minn hekk, jeħtieġ li huma: –
jgħarrfu lill-Kummissjoni bil-metodi
analitiċi li jużaw biex jidentifikaw l-ispeċi ta’ oriġini
tal-pil (l-Artikolu 5 tar-Regolament); u –
jistabbilixxu r-regoli dwar il-penali li japplikaw
f’każ ta’ ksur tar-Regolament u jgħarrfu lill-Kummissjoni bihom
(l-Artikolu 8 tar-Regolament). 3. Il-metodoloġija Sabiex jitfassal dan ir-rapport, il-Kummissjoni
użat is-sorsi ta’ tagħrif li ġejjin: –
it-tweġibiet tal-Istati Membri għal kwestjonarju
dwar l-infurzar tal-projbizzjoni fuq il-pil tal-klieb u tal-qtates fl-2009 u
fl-2010 li l-Kummissjoni bagħtet fl-2011[4]; –
it-tagħrif mibgħut mill-Istati Membri
dwar il-penali li japplikaw fil-każ ta’ ksur tar-Regolament; –
il-korrispondenza li il-Kummissjoni rċeviet
mingħand il-partijiet interessati jew mingħand l-Istati Membri; –
ir-riżultati ta’ laqgħa li l-Kummissjoni
organizzat fit-18 ta’ Jannar 2012[5]
biex tiddiskuti l-implimentazzjoni tal-projbizzjoni ma’ rappreżentanti
tal-Istati Membri u mal-partijiet interessati ewlenin[6]. 4. L-implimentazzjoni
tal-projbizzjoni 4.1. Kontrolli fl-Istati Membri Sabiex jimplimentaw il-projbizzjoni, l-Istati
Membri kellhom jistabbilixxu sistemi ta’ kontrolli. Dan kien jikkonsisti
l-iktar fl-integrazzjoni tal-verifiki marbutin mal-projbizzjoni fis-sistemi
eżistenti tagħhom ta’ kontrolli u se jiġi deskritt fit-taqsimiet
li ġejjin. L-azzjonijiet li ttieħdu kienu aktar
elaborati jew anqas, skont l-Istat Membru partikulari. B’mod partikulari,
l-għadd ta’ Stati Membri li ħadu azzjonijiet marbutin
mat-taħriġ u mal-proċeduri kif ukoll mat-tixrid tat-tagħrif
kien limitat. Minħabba li ħafna mill-pil tal-klieb u
tal-qtates u ħafna mill-prodotti li fihom pil ta’ din ix-xorta jiġu
minn pajjiżi terzi, l-għan ewlieni tas-sistemi ta’ kontrolli
stabbiliti fl-Istati Membri huwa li jipprevjenu d-dħul fl-Unjoni ta’
importazzjonijiet kummerċjali illegali ta’ pil tal-klieb u tal-qtates minn
pajjiżi terzi. M’hemm l-ebda evidenza tal-produzzjoni tal-pil tal-klieb u
tal-qtates fl-UE u, għaldaqstant, il-probabbiltà li jkun hemm
esportazzjoni tiegħu hija waħda teoretika biss. 4.1.1. Liġijiet nazzjonali li
jipprojbixxu l-pil tal-klieb u tal-qtates L-Istati Membri kkonċernati ħassru u/jew
emendaw il-liġijiet nazzjonali li jipprojbixxu l-pil tal-klieb u
tal-qtates li kienu fis-seħħ qabel l-adozzjoni tar-Regolament.
Għalhekk, id-dħul fis-seħħ tar-Regolament ippermetta li
jkun hemm regoli armonizzati fil-livell tal-UE dwar il-projbizzjoni. Dan
jissimplifika x-xogħol tal-persunal uffiċjali li jwettaq il-kontrolli
u tal-operaturi li jinnegozjaw fil-pil, fil-prodotti tal-pil u
fl-imitazzjonijiet tal-pil li jkunu legali. 4.1.2. Il-penali li japplikaw
fil-każ ta’ ksur tal-projbizzjoni L-Istati Membri għandhom ir-responsabbiltà
jistabbilixxu l-penali li japplikaw fil-każ ta’ ksur
tad-dispożizzjonijiet tar-Regolament. Il-penali għandhom ikunu
effettivi, proporzjonati u dissważivi. Ħafna mill-Istati Membri emendaw
il-liġijiet nazzjonali tagħhom sabiex jintroduċu sanzjonijiet
amministrattivi u/jew kriminali fil-każ ta’ ksur tal-projbizzjoni. Xi
Stati Membri oħrajn diġà kellhom fis-seħħ penali b’mod
ġenerali għall-importazzjoni ta’ prodotti illegali jew
għat-tqegħid fis-suq tagħhom li kienu japplikaw fil-każ ta’
ksur tar-Regolament. Is-sanzjonijiet amministrattivi jikkonsistu
l-iktar f’multi imposti fuq l-operaturi u ma jeskludux il-possibbiltà li
jintużaw ukoll sanzjonijiet kriminali. B’mod ġenerali, għas-sanzjonijiet
kriminali, il-każ irid jitressaq quddiem qorti nazzjonali
tal-ġustizzja. Kif jidher fit-Tabella 1, il-livell ta’ penali
applikabbli jvarja ħafna minn Stat Membru għall-ieħor. Fl-aħħar nett, l-Istati Membri kollha
għandhom is-setgħat legali li jikkonfiskaw il-prodotti illegali u li
jitolbu li dawn jinqerdu. It-Tabella 1: Sommarju tal-penali li
japplikaw fl-Istati Membri fil-każ ta’
ksur tal-projbizzjoni fuq il-pil tal-klieb u tal-qtates Penali || Firxa ta’ penali Sanzjonijiet amministrattivi || Minn bejn EUR 250 u EUR 500 sa EUR 20 000 Sanzjonijiet kriminali || Multi li jvarjaw minn EUR 1 500 sa EUR 40 000 Minn erba’ (4) xhur sa tliet (3) snin il-ħabs Sors: it-tweġibiet
tal-Istati Membri għall-kwestjonarju dwar l-implimentazzjoni mibgħut
mill-Kummissjoni 4.1.3. L-awtoritajiet kompetenti li
huma responsabbli għall-implimentazzjoni tal-projbizzjoni Minħabba li l-għan ewlieni tal-kontrolli
kien li jipprevjenu d-dħul fl-Unjoni tal-importazzjonijiet illegali
tal-pil tal-klieb u tal-qtates minn pajjiżi terzi, l-awtoritajiet doganali
jew l-awtoritajiet doganali u l-awtoritajiet veterinarji kienu l-awtoritajiet
kompetenti ewlenin li l-Istati Membri għażlu bħala
l-awtoritajiet responsabbli għall-implimentazzjoni tal-projbizzjoni. L-awtoritajiet doganali kienu responsabbli
għall-identifikazzjoni ta’ kunsinni kummerċjali potenzjalment
illegali minn pajjiżi terzi li dwarhom kien hemm suspett li kienu jinkludu
l-pil tal-klieb u tal-qtates. L-esperjenza tagħhom fil-prevenzjoni
tal-importazzjonijiet illegali, miksuba f’oqsma oħrajn, kienet essenzjali
biex huma jidentifikaw il-kunsinni f’riskju. F’każ ta’ suspett,
is-servizzi doganali se jwettqu verifiki biex jikkonfermaw is-suspetti
tagħhom. Għalhekk, il-proċedura ta’ kontroll
tal-importazzjonijiet tal-pil tal-klieb u tal-qtates ġiet integrata
fil-proċeduri doganali ġenerali li diġà jinkludu kontrolli
bbażati fuq ir-riskju. Minħabba li ma kinux wisq il-kontrolli li
twettqu, x’aktarx li l-implimentazzjoni tal-projbizzjoni ma ħolqitx
piż sostanzjali għall-awtoritajiet doganali. F’każijiet fejn kienu involuti l-awtoritajiet
veterinarji, dawn kienu responsabbli l-aktar għall-ispezzjoni fiżika
tal-kunsinni suspettużi, għat-teħid ta’ kampjuni u
għall-bgħit tal-kampjuni għall-analiżi fejn dan kien
meħtieġ. F’każijiet fejn kienu involuti diversi
awtoritajiet kompetenti, ħafna mill-Istati Membri kkonċernati
ħadu miżuri biex jiżguraw li dawn l-awtoritajiet jikkooperaw u
jiskambjaw l-informazzjoni bejniethom. 4.1.4. It-taħriġ u
l-proċeduri Fil-livell tal-UE, il-Kummissjoni
daħħlet il-miżuri ta’ kontroll marbutin mal-projbizzjoni
fil-Bażi tad-Dejta Ewropea dwar it-Tariffi Doganali li tinsab onlajn
imsejħa “TARIC”[7]. Il-bażi tad-dejta msejħa “TARIC” hija
bażi tad-dejta disponibbli onlajn għall-uffiċjali u l-operaturi
tan-negozju f’diversi lingwi, li fiha huma integrati, b’mod partikulari,
miżuri marbutin ma’ miżuri dwar ir-restrizzjonijiet fuq l-importazzjoni
u l-esportazzjoni. Fl-2009, ġiet iddefinita lista ta’ prodotti u ta’
kodiċijiet tan-Nomenklatura Magħquda (NM)[8] ta’ prodotti li dwarhom kien
hemm suspett li kien fihom il-pil tal-klieb u tal-qtates fil-livell tal-UE u
din ġiet integrata fit-TARIC. Diversi Stati Membri semmew kemm it-TARIC hija
utli biex tgħinhom jidentifikaw il-kunsinni potenzjalment illegali.
Madankollu, Stat Membru wieħed qies bħala wisq eżawrjenti
l-lista tal-prodotti u tal-kodiċijiet tan-NM ta’ prodotti li dwarhom hemm
suspett li dawn fihom il-pil tal-klieb u tal-qtates. Meta l-uffiċjali li jwettqu l-kontrolli fuq
l-importazzjonijiet u l-esportazzjonijiet tal-pil idaħħlu prodott jew
kodiċi tan-NM li jinsab fil-lista msemmija hawn fuq fit-TARIC,
il-bażi tad-dejta se turihom li hemm bżonn jiċċekkjaw jekk
l-operatur tan-negozju mmarkax kaxxa fid-dikjarazzjoni doganali tiegħu li
fiha jiddikjara li l-pil importat jew esportat mhux ġej mill-klieb u
mill-qtates, hekk kif imsemmi fir-Regolament (KE) Nru 1523/2007. Minbarra t-TARIC, xi Stati Membri ħarġu
linji gwida u tagħrif għall-persunal uffiċjali tagħhom dwar
l-implimentazzjoni tal-projbizzjoni. Dan it-tagħrif kien jinkludi
tagħrif prattiku biex wieħed iwettaq il-kontrolli, kif ukoll
tagħrif dwar id-dispożizzjonijiet tar-Regolament u tal-liġi
nazzjonali. Eżempju ta’ dawn id-dokumenti jinsab fis-sit tal-internet li
ġej: https://findok.bmf.gv.at/findok/targetSearchSubmit.do;jsessionid=9605F10870FC605A9F5E848516744BF5. 4.1.5. Il-metodi tal-analiżi
biex tiġi identifikata l-ispeċi ta’ oriġini tal-pil L-Istati Membri użaw il-metodi ta’
analiżi li ġejjin biex jidentifikaw l-ispeċi ta’ oriġini
tal-pil: –
l-identifikazzjoni viżwali; –
l-identifikazzjoni tax-xagħar bil-mikroskopju; –
l-analiżi tad-DNA (ir-reazzjoni katina
tal-polimerażi); –
l-identifikazzjoni tal-ispeċi tal-annimali
permezz tal-ispettrometrija tal-massa tat-tip MALDI-TOF. Il-lista tal-metodi u tal-laboratorji użati
f’kull Stat Membru hija mogħtija fl-Anness I ta’ dan ir-rapport. L-Istati Membri użaw l-aktar il-mikroskopija,
l-analiżi tad-DNA u l-identifikazzjoni tal-ispeċi tal-annimali
permezz tal-ispettrometrija tal-massa tat-tip MALDI-TOF. Kull wieħed minn
dawn il-metodi għandu l-vantaġġi u l-iżvantaġġi
tiegħu, skont it-tip ta’ kampjuni meħuda, il-livell ta’
identifikazzjoni meħtieġ, kemm jista’ jiġi ripetut il-metodu u
l-ispejjeż involuti. L-identifikazzjoni tax-xagħar
bil-mikroskopju tista’ tistabbilixxi jekk il-kampjun
ikunx fih pil tal-annimali jew pil sintetiku. L-analiżi tad-DNA
tista’ tidentifika jekk il-kampjun huwiex ġej minn xi qattus jew xi kelb
domestiku u l-ispeċi tal-oriġini tal-pil, dejjem jekk ikun hemm
il-primers rilevanti speċifiċi għall-ispeċi. L-analiżi
tad-DNA tista’ tiddistingwi l-kampjuni tal-pil tal-klieb domestiċi minn
dawk tal-volpi, tal-lupu, tal-ġakall u tar-rakkun. Madankollu,
l-analiżi tad-DNA ma tistax tiddistingwi l-pil tal-qtates domestiċi
minn dak miksub minn qtates domestiċi mħalltin ma’ qtates tat-tip
Bengal. Biex l-analiżi tad-DNA tkun suċċess, hemm bżonn ta’
ammont minimu ta’ DNA iżolat u ta’ kwalità minima tiegħu, u xi
kultant mhux faċli li wieħed jikseb dan l-ammont u din il-kwalità
meta l-kampjun ikun ġej mill-pil ittrattat (pereżempju, meta dan ikun
miżbugħ). L-identifikazzjoni tal-ispeċi tal-annimali permezz tal-ispettrometrija tal-massa tat-tip MALDI-TOF tista’
tidentifika firxa usa’ ta’ speċi tal-oriġini meta mqabbla
mal-analiżi tad-DNA u tista’ tidentifika l-ispeċi tal-oriġini tal-pil
anke meta l-pil ikun ittrattat. Iktar dettalji dwar il-metodi differenti
tal-analiżi ngħataw waqt il-laqgħa li l-Kummissjoni organizzat
għall-partijiet interessati u għall-Istati Membri
fit-18 ta’ Jannar 2012 u jinsabu fis-sit tal-internet li ġej:
http://ec.europa.eu/food/animal/welfare/seminars/docs/methods_analysis_identifying_species_origin_fur_en.pdf. Il-firxa tal-ispejjeż tal-metodi
tal-analiżi użati biex jiġi identifikat il-pil tal-klieb u
tal-qtates hija mogħtija fit-tabella t’hawn taħt. It-Tabella 2: L-ispejjeż tal-metodi
tal-analiżi biex tiġi identifikata l-ispeċi
ta’ oriġini tal-pil Il-metodu || L-ispejjeż Il-mikroskopija || Minn EUR 30 sa EUR 60 L-identifikazzjoni tal-ispeċi tal-annimali permezz tal-ispettrometrija tal-massa tat-tip MALDI-TOF || Minn EUR 150 sa EUR 250 L-analiżi tad-DNA || Minn EUR 150 sa EUR 1 075 Sors: it-tweġibiet
tal-Istati Membri għall-kwestjonarju dwar l-implimentazzjoni mibgħut
mill-Kummissjoni Ħafna mill-Istati Membri jinnominaw
laboratorju fit-territorju tagħhom fejn il-persunal uffiċjali
tagħhom jista’ jibgħat il-kampjuni għall-identifikazzjoni
tal-pil tal-klieb u tal-qtates. Diversi Stati Membri għażlu, jew qed
jikkunsidraw, li l-kampjuni jintbagħtu b’sottokuntratt, lejn laboratorju
li jkun jinsab fi Stat Membru ieħor, minħabba n-nuqqas attwali ta’
għarfien espert fil-laboratorji tagħhom u minħabba l-għadd żgħir
ta’ kampjuni li għandhom jiġu analizzati. 4.1.6. It-tixrid tat-tagħrif Kif issemma qabel, il-bażi tad-dejta dwar
it-tariffi doganali msejħa “TARIC” hija disponibbli onlajn
għall-operaturi tan-negozju. Permezz tat-TARIC, l-operaturi tan-negozju
jista’ jkollhom aċċess għar-Regolament u jkunu infurmati li,
sabiex jimportaw jew jesportaw il-pil, fid-dikjarazzjoni doganali tagħhom
iridu jiddikjaraw li l-prodotti li beħsiebhom jimportaw jew jesportaw ma
fihomx pil tal-klieb u tal-qtates. Barra minn hekk, diversi Stati Membri pprovdew
tagħrif lill-operaturi tan-negozju potenzjali kkonċernati,
lill-importaturi u lill-bejjiegħa bl-imnut u lill-konsumaturi. Ġew
ippubblikati ittri ta’ informazzjoni fil-ġurnal uffiċjali jew fuq
is-sit tal-internet uffiċjali tal-Istati Membri. 4.2. Ir-riżultati
tal-kontrolli L-Istati Membri ffukaw l-attivitajiet ta’ kontroll
tagħhom fuq l-importazzjonijiet. Barra minn hekk, fl-Unjoni dawn
il-kontrolli ġew ikkompletati permezz ta’ verifiki mwettqin l-iktar fi
ħwienet fejn isir il-bejgħ bl-imnut. Fejn kien meħtieġ, ittieħdu kampjuni
għall-analiżi biex tiġi kkonfermata l-preżenza ta’ pil
tal-klieb u tal-qtates. Il-prodotti illegali identifikati ġew ikkonfiskati
u meqrudin. Fil-każ ta’ ksur, ġew applikati sanzjonijiet. It-tabelli t’hawn taħt jipprovdu sommarju
tal-verifiki mwettqin mill-Istati Membri u tar-riżultati tagħhom.
L-Istati Membri ma taw l-ebda dejta speċifika dwar il-kwantità ta’ pil
tal-klieb u tal-qtates li nstab u dwar is-sanzjonijiet li ġew applikati. It-Tabella 3: Kontrolli mwettqin biex
jiġu evitati l-importazzjonijiet kummerċjali illegali
tal-pil tal-klieb u tal-qtates Sena || L-għadd ta’ kunsinni kummerċjali importati li ġew iċċekkjati || L-għadd ta’ kunsinni kummerċjali importati li minnhom ittieħdu l-kampjuni għall-analiżi || L-għadd ta’ kunsinni li ma ġewx aċċettati għall-importazzjoni || L-għadd ta’ kunsinni kkonfiskati || L-għadd ta’ kunsinni importati li nqerdu L-2009 || 9687 || 0 || 1 || 0 || 0 L-2010 || 25275 || 5 || 2 || 67 || 0 Sors: it-tweġibiet
tal-Istati Membri għall-kwestjonarju dwar l-implimentazzjoni mibgħut
mill-Kummissjoni It-Tabella 4: Kontrolli mwettqin
għat-tqegħid illegali tal-pil tal-klieb u tal-qtates
fis-suq tal-UE Sena || L-għadd ta’ kontrolli mwettqin fil-ħwienet u għand il-bejjiegħa bl-imnut || L-għadd ta’ kunsinni li minnhom ittieħdu l-kampjuni għall-analiżi || L-għadd ta’ kunsinni kummerċjali kkonfiskati mill-ħwienet u mingħand il-bejjiegħa bl-imnut[9] || L-għadd ta’ kunsinni kummerċjali meqrudin meħudin mill-ħwienet u mingħand il-bejjiegħa bl-imnut[10] || L-għadd ta’ verifiki li kellhom fil-mira s-siti tal-internet li fuqhom jinbiegħu l-prodotti || L-għadd ta’ verifiki li kellhom fil-mira l-pakketti mibgħutin bil-posta L-2009 || 119 || 46 || 66 || 56 || 0 || 0 L-2010 || 169 || 52 || 40 || 28 || 0 || 0 Sors: it-tweġibiet
tal-Istati Membri għall-kwestjonarju dwar l-implimentazzjoni mibgħut
mill-Kummissjoni It-Tabella 5:
L-għadd ta’ kampjuni analizzati L-Istat Membru || L-għadd ta’ kampjuni analizzati || Fl-2009 || Fl-2010 l-Awstrija || 1 || 10 ir-Repubblika Ċeka || 0 || 1 il-Ġermanja || 1 || id-Danimarka || 15-il kampjun b’kollox fl-2009 u fl-2010 il-Finlandja || 0 || 2 Franza || 46 kampjun (li minnhom 17-il kampjun ma kienx konformi[11]) || 20 kampjun (li kollha kienu konformi) l-Italja || 20 ir-Renju Unit || 0 || 3 Għadd totali || 119 Sors: it-tweġibiet
tal-Istati Membri għall-kwestjonarju dwar l-implimentazzjoni mibgħut
mill-Kummissjoni L-għadd ta’ kontrolli, kif ukoll l-għadd
ta’ kampjuni li ttieħdu u li ntbagħtu għall-analiżi,
żdied fl-2010 meta mqabbel mal-2009. L-2009 kienet l-ewwel sena meta
r-Regolament daħal fis-seħħ u l-livell ta’ implimentazzjoni
żdied fl-2010 minħabba li sa dak iż-żmien l-Istati Membri
kienu ħadu l-miżuri biex jorganizzaw il-kontrolli. Mit-tagħrif mibgħut mill-Istati Membri,
il-prodotti li l-Istati Membri identifikaw bħala prodotti li potenzjalment
fihom il-pil tal-klieb u tal-qtates kienu l-iktar il-ġkieket u
l-kowtijiet, ix-xalpi, l-imkatar ta’ madwar l-għonq, il-ħoloq
taċ-ċwievet u l-ġilda. 5. Kwistjonijiet marbutin
mal-implimentazzjoni Xi partijiet
interessati qiesu li ma twettqux biżżejjed kontrolli uffiċjali
fuq it-tqegħid tal-pil tal-klieb u tal-qtates fis-suq tal-UE, u b’mod
partikulari fuq il-bejgħ fuq l-internet. Il-kwistjoni tar-rekwiżiti ta’ ttikkettar
ġiet diskussa wkoll fil-kuntest tal-applikazzjoni tar-Regolament (KE)
Nru 1007/2011[12]
fil-ġejjieni b’rabta mat-tikkettar ta’ ħwejjeġ li jkun fihom
ftit pil, hekk kif inhu l-obbligu skont l-Istati Membri. Ir-Regolament (KE) Nru 1007/2011
jeżiġi li tiġi indikata l-preżenza ta’ partijiet li ma
jkunux magħmulin mit-tessuti u li jkunu ġejjin mill-annimali fuq
it-tikketti jew il-marki tal-prodotti tat-tessuti li jkun fihom it-tali
partijiet, biex il-konsumaturi jkunu jistgħu jagħmlu
għażliet infurmati dwarhom. It-tikketti jew
il-marki m’għandhomx iqarrqu bil-konsumaturi. 6. L-impatt tar-Regolament Il-partijiet
interessati ewlenin enfasizzaw l-impatt pożittiv tar-Regolament.
Il-projbizzjoni fuq il-pil tal-klieb u tal-qtates issa hija fis-seħħ
fl-Istati Membri kollha. Ir-Regolament jarmonizza r-regoli u għalhekk
jissimplifika x-xogħol tal-operaturi tan-negozju li jimportaw il-pil jew
l-oġġetti li jinkludu l-pil jew li jqegħduhom fis-suq tal-UE.
Barra minn hekk, skont l-Assoċjazzjoni Ewropea ta’ dawk li jrabbu
l-annimali għall-pil, il-projbizzjoni ma kellhiex impatt negattiv fuq
il-kummerċ tal-pil. Skont il-fehma tal-partijiet interessati,
wieħed jista’ jassumi li l-projbizzjoni u l-kontrolli mwettqin fl-Istati
Membri jiżguraw li r-riskju li l-konsumaturi Ewropej jitqiegħdu
f’sitwazzjoni fejn jistgħu jkunu qed jixtru pil tal-klieb u tal-qtates
huwa limitat ħafna. 7. Konklużjoni L-Istati Membri stabbilixxew sistema ta’ kontrolli
sabiex jimplimentaw il-projbizzjoni. Huma integraw b’mod ewlieni l-verifiki
marbutin mal-projbizzjoni fis-sistemi eżistenti tagħhom ta’ kontrolli
billi ħadu l-azzjonijiet li ġejjin: –
l-emenda tal-liġijiet nazzjonali tagħhom
sabiex jitħassru l-miżuri nazzjonali preċedenti li jipprojbixxu
l-pil tal-klieb u tal-qtates u biex jintroduċu penali; –
il-ħatra tal-awtoritajiet kompetenti u
tal-uffiċjali responsabbli; –
l-għażla tal-metodi tal-analiżi u
tal-laboratorji li jwettqu dawn l-analiżijiet, sabiex jiġi
identifikat jekk il-pil ikunx ġej minn kelb jew qattus domestiku
f’każ li jkun hemm suspett dwaru; –
it-taħriġ u t-tfassil ta’ proċeduri
sabiex l-uffiċjali li jwettqu l-kontrolli jkunu infurmati dwarhom; –
it-tixrid tat-tagħrif lill-operaturi
tan-negozju u lill-pubbliku inġenerali. L-għan ewlieni tas-sistemi ta’ kontrolli huwa
li jipprevjenu d-dħul fl-Unjoni tal-importazzjonijiet kummerċjali
illegali tal-pil tal-klieb u tal-qtates minn pajjiżi terzi, minħabba
li ħafna minnu ġej minn dawn il-pajjiżi terzi. Għalhekk, fl-2009 u fl-2010, l-Istati Membri
ffukaw il-kontrolli tagħhom l-iktar fuq il-prevenzjoni
tal-importazzjonijiet illegali. L-involviment dirett tal-awtoritajiet doganali
u l-użu tal-bażi tad-dejta tal-Kummissjoni msejħa “TARIC”
mill-operaturi tan-negozju u mill-Istati Membri jippermettu implimentazzjoni
armonizzata tal-projbizzjoni fuq l-importazzjonijiet illegali. B’mod ġenerali, l-applikazzjoni
tar-Regolament kellha impatt pożittiv għax ir-Regolament issimplifika
x-xogħol tal-operaturi tan-negozju, minħabba li ħa post diversi
projbizzjonijiet nazzjonali li kienu applikati bi proċeduri differenti.
Barra minn hekk, fil-fehma tal-partijiet interessati, il-projbizzjoni
kkontribwiet biex tillimita r-riskju li l-konsumaturi Ewropej ikunu esposti
għax-xiri tal-pil tal-klieb u tal-qtates jew ta’ prodotti li jkun fihom
pil ta’ din ix-xorta. ANNESS I:
Il-metodi ta’ identifikazzjoni tal-pil tal-klieb u tal-qtates użati
fl-Istati Membri Numru || L-Istat Membru || Il-metodu applikabbli 1 || l-Awstrija || L-identifikazzjoni tax-xagħar bil-mikroskopju u tqies l-użu tal-analiżi tad-DNA 2 || il-Belġju || Ma ngħata l-ebda tagħrif dwar dan fit-tweġiba għall-kwestjonarju 3 || il-Bulgarija || L-identifikazzjoni tax-xagħar bil-mikroskopju u l-metodu msejjaħ “MALDI-TOF” 4 || Ċipru || Il-metodu msejjaħ “MALDI-TOF” 5 || ir-Repubblika Ċeka || L-analiżi tad-DNA 6 || id-Danimarka || L-analiżi tad-DNA 7 || l-Estonja || L-identifikazzjoni viżwali u l-identifikazzjoni tax-xagħar bil-mikroskopju 8 || il-Finlandja || L-identifikazzjoni tax-xagħar bil-mikroskopju 9 || Franza || L-identifikazzjoni tax-xagħar bil-mikroskopju u l-analiżi tad-DNA 10 || il-Ġermanja || L-analiżi tad-DNA u l-metodu msejjaħ “MALDI-TOF” 11 || il-Ġreċja || Ma ntbagħtet l-ebda tweġiba għall-kwestjonarju 12 || l-Ungerija || L-identifikazzjoni tax-xagħar bil-mikroskopju u l-analiżi tad-DNA 13 || l-Irlanda || Il-metodu msejjaħ “MALDI-TOF” 14 || l-Italja || L-identifikazzjoni viżwali, l-identifikazzjoni tax-xagħar bil-mikroskopju, l-analiżi tad-DNA u l-metodu msejjaħ “MALDI-TOF” 15 || il-Latvja || L-identifikazzjoni tax-xagħar bil-mikroskopju 16 || il-Litwanja || L-identifikazzjoni tax-xagħar bil-mikroskopju u qed jitqies l-użu tal-analiżi tad-DNA 17 || il-Lussemburgu || Il-metodu msejjaħ “MALDI-TOF” 18 || Malta || L-analiżi tad-DNA 19 || il-Pajjiżi l-Baxxi || L-identifikazzjoni tax-xagħar bil-mikroskopju u l-metodu msejjaħ “MALDI-TOF” 20 || il-Polonja || L-identifikazzjoni viżwali u l-analiżi tad-DNA 21 || il-Portugall || Qed jitqies l-għoti ta’ sottokuntratt lil laboratorju li jinsab barra l-pajjiż 22 || ir-Rumanija || Il-metodu msejjaħ “MALDI-TOF” 23 || is-Slovakkja || L-identifikazzjoni tax-xagħar bil-mikroskopju, l-analiżi tad-DNA u l-metodu msejjaħ “MALDI-TOF” 24 || is-Slovenja || L-identifikazzjoni tax-xagħar bil-mikroskopju u l-analiżi tad-DNA 25 || Spanja || L-identifikazzjoni tax-xagħar bil-mikroskopju u l-analiżi tad-DNA 26 || l-Isvezja || L-analiżi tad-DNA u l-metodu msejjaħ “MALDI-TOF” 27 || ir-Renju Unit || L-analiżi tad-DNA Sors:
it-tweġibiet tal-Istati Membri għall-kwestjonarju dwar
l-implimentazzjoni mibgħut mill-Kummissjoni ANNESS II:
Lista tal-partijiet interessati kkonsultati Isem l-organizzazzjoni AEDT - The European Association of Fashion Retailers (l-Assoċjazzjoni Ewropea tal-Bejjiegħa bl-Imnut tal-Prodotti tal-Moda) COTANCE GAIA HSI - Humane Society International IFTF - International Fur Trade Federation (il-Federazzjoni Internazzjonali tal-Kummerċ fil-Pil) European Fur Breeders Association (l-Assoċjazzjoni Ewropea ta’ dawk li jrabbu l-annimali għall-pil) Euroleather UNIC - Unione Nazionale Industria Conciaria Fondation Brigitte Bardot (il-Fondazzjoni Brigitte Bardot) IFAW - International Fund for Animal Welfare (il-Fond Internazzjonali għall-Benesseri tal-Annimali) [1] Ir-Regolament (KE) Nru 1523/2007
tal-11 ta’ Diċembru 2007 li jipprojbixxi t-tqegħid
fis-suq u l-importazzjoni fil-Komunità jew l-esportazzjoni mill-Komunità ta’
pil tal-qtates u tal-klieb u ta’ prodotti oħra li fihom pil ta’ din
ix-xorta (ĠU L 343, 27.12.2007, p. 1). [2] Ir-rapport jittratta l-applikazzjoni tar-Regolament tul
il-perjodu mill-2009 sal-2010. [3] Il-projbizzjoni tirreferi għall-“projbizzjoni fuq
il-pil tal-klieb u tal-qtates”. Dan japplika għall-bqija ta’ dan it-test. [4] L-Istati Membri kollha wieġbu, minbarra
l-Greċja. [5] Wieħed jista’ jsib l-aġenda tal-laqgħa u
l-preżentazzjonijiet li saru waqt din il-laqgħa fis-sit tal-internet
li ġej:
http://ec.europa.eu/food/animal/welfare/seminars/docs/agenda_implementation_ban_cat_dog_fur_en.pdf. [6] L-organizzazzjonijiet li attendew din il-laqgħa
huma mogħtija f’lista fl-anness ta’ dan ir-rapport. [7] Il-bażi tad-dejta msejħa “TARIC” hija
aċċessibbli onlajn fis-sit tal-internet li ġej:
http://ec.europa.eu/taxation_customs/customs/customs_duties/tariff_aspects/customs_tariff/index_en.htm. [8] Meta l-prodotti jiġu ddikjarati lill-awtoritajiet
tad-dwana fl-Unjoni, ġeneralment dawn għandhom jiġu
kklassifikati skont in-Nomenklatura Magħquda (NM). Il-prodotti importati u
esportati jridu jiġu ddikjarati billi wieħed igħid taħt
liema subintestatura tan-nomenklatura dawn jaqgħu. [9] Mhux bil-fors ittieħed kampjun
għall-analiżi mill-kunsinni kkonfiskati, minħabba li n-nuqqas
ta’ konformità seta’ ġie nnutat għal raġunijiet oħra
minbarra r-riżultati pożittivi tal-analiżi. [10] Mhux bil-fors ittieħed kampjun
għall-analiżi mill-kunsinni li nqerdu, minħabba li n-nuqqas ta’
konformità seta’ ġie nnutat għal raġunijiet oħra minbarra
r-riżultati pożittivi tal-analiżi. [11] In-nuqqas ta’ konformità jfisser li kien hemm
riżultati pożittivi għall-preżenza tal-pil tal-klieb jew
tal-qtates. [12] Ir-Regolament (UE) Nru 1007/2011 tal-Parlament
Ewropew u tal-Kunsill tas-27 ta’ Settembru 2011 dwar l-ismijiet
ta’ fibri ta’ tessuti u t-tikkettar u l-immarkar relatati tal-kompożizzjoni
tal-fibri ta’ prodotti tat-tessut (ĠU L 272, 18.10.2011,
p. 1–64).