KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI It-Teknoloġiji u l-Innovazzjoni fil-qasam tal-Enerġija /* COM/2013/0253 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI It-Teknoloġiji u l-Innovazzjoni
fil-qasam tal-Enerġija 1. DAĦLA It-teknoloġija u l-innovazzjoni huma
kruċjali biex nilħqu l-isfidi kollha tagħna tal-enerġija... Jeħtieġ li l-UE tagħmel
iżjed biex iddaħħal fis-suq teknoloġiji tal-enerġija
ġodda, sostenibbli u b’livell baxx ta' emissjonijiet ta' karbonju, bi
prestazzjoni għolja u orħos. It-teknoloġiji ġodda huma
vitali biex jinkisbu l-miri kollha tal-UE għall-2020[1] fl-oqsma tal-enerġija,
il-klima, u l-politika ekonomika u soċjali, kif ukoll dawk għall-2030
u l-2050. L-UE għandu jkollha strateġija b’saħħitha u
dinamika dwar it-teknoloġija u l-innovazzjoni biex tikseb il-miri
politiċi tagħha, issaħħaħ il-kompetittiva tagħha
u tikkoordina aħjar l-investimenti. ... u jikkomplementaw
il-leġiżlazzjoni tal-UE dwar l-enerġija Il-politiki tal-UE dwar is-suq intern
tal-enerġija, l-effiċjenza enerġetika u l-enerġija
rinnovabbli jappoġġjaw id-dħul tat-teknoloġiji fis-suq,
minn Pannelli Fotovoltajċi għal apparat effiċjenti, miters
intelliġenti jew awtomatizzazzjoni domestika. Jeħtieġ li l-UE
tkompli ssaħħaħ ir-rwol tat-teknoloġija u l-innovazzjoni fi
ħdan il-politika tal-enerġija, mhux biss b’teknoloġiji
speċifiċi, iżda wkoll billi tistimola mudelli tan-negozju
ġodda, bl-adattament soċjali u tas-suq u bit-titjib fis-sistema
tal-enerġija li joffri perspettiva strateġika fit-tul
għall-investimenti. ....f’settur tal-enerġija li
qiegħed dejjem jevolvi B'riżultat tal-politiki tal-UE,
l-investimenti globali fl-enerġija rinnovabbli għamlu progress b’mod
stabbli u dan jirrikjedi flessibbiltà akbar u ġestjoni tal-enerġija
aħjar. L-eliminazzjoni gradwali tal-enerġija nukleari f’xi
pajjiżi u l-espansjoni mgħaġġla tal-produzzjoni tal-gass
mhux konvenzjonali qegħdin ibiddlu l-ekonomiji tal-enerġija madwar
id-dinja. Sabiex tappoġġja l-kompetittività industrijali Ewropea,
jeħtieġ li l-politika tal-UE dwar it-teknoloġija u
l-innovazzjoni fil-qasam tal-enerġija tnaqqas l-ispejjeż b'mod
mgħaġġel kif ukoll tħaffef l-introduzzjoni ta'
teknoloġiji sostenibbli ġodda fis-suq. Dan huwa partikolarment
importanti fi żmien ta’ tnaqqis fir-ritmu ekonomiku li għandu konsegwenzi
diretti fuq l-investimenti privati u l-baġits nazzjonali. 2. X’KISBET L-UE? 2.1. Il-leġiżlazzjoni
ħeġġet id-dħul tat-teknoloġija u l-innovazzjoni
fis-suq Is-suq intern tal-enerġija tal-UE
jgħin biex jinħolqu swieq miftuħa u kompetittivi fejn l-atturi
fl-industrija jinvestu f’teknoloġiji u servizzi ġodda u innovattivi.
Id-dimensjoni tas-suq intern tal-enerġija tipprovdi l-ispazju biex
il-forzi tas-suq jistimolaw l-innovazzjoni u l-iżvilupp
tat-teknoloġija. Dan huwa appoġġjat minn sforzi biex tiġi
mmodernizzata, integrata u estiża l-infrastruttura tal-grilja sas-sena
2020 u lil hinn minnha, partikolarment għall-elettriku. L-UE identifikat
12-il kuritur ta’ prijorità, fost oħrajn biex tintegra aktar l-elettriku
mir-riħ u mix-xemx filwaqt li tiżgura l-provvista bla interruzzjoni.
Ir-regoli tekniċi li qed jiġu żviluppati għas-suq intern
(jiġifieri l-kodiċijiet tan-netwerk) jiffokaw fuq l-integrazzjoni ta’
teknoloġiji b'reazzjoni għas-sistema tal-enerġija li qed
tinbidel. Bħala parti minn din il-ħidma l-Operaturi tas-Sistema ta’
Trażmissjoni (TSO) qed jiżviluppaw il-metodi ġodda ta' mmudellar
u għodod tal-operat tal-grilja aktar intelliġenti. Li l-konsumaturi
jsiru atturi attivi f’suq integrat tal-enerġija tfisser li l-politika
tal-UE qed tixpruna wkoll l-iżvilupp ta’ teknoloġiji
“intelliġenti” u relatati mal-IT, bħal miters intelliġenti,
karozzi tal-elettriku, ir-rispons għad-domanda, il-mikroġenerazzjoni
u t-teknoloġiji tal-ħżin lokali sabiex ikun hemm domanda
flessibbli u kontroll aħjar tal-konsum. Sabiex jintlaħqu l-miri tal-2020,
il-politika tal-enerġija tal-UE tappoġġja bidla lejn
teknoloġiji ta’ ġenerazzjoni b’emissjoni baxxa ta’ karbonju.
Id-Direttiva dwar l-Enerġija Rinnovabbli u l-appoġġ fl-Istati
Membri xprunaw it-tkabbir qawwi fl-enerġija rinnovabbli u t-tnaqqis
sinifikanti fl-ispiża. Bħala parti mit-tranżizzjoni lejn sistema
tal-enerġija b’emissjoni baxxa ta’ karbonju, il-politika tal-UE stimolat
it-teknoloġiji tal-ġbir u l-ħżin tad-diossidu tal-karbonju
(CCS) kif ukoll il-ġenerazzjoni tal-enerġija nukleari aktar sikura. Permezz tal-politika u
l-leġiżlazzjoni tal-UE dwar l-effiċjenza enerġetika,
inklużi d-Direttivi dwar l-Effiċjenza Enerġetika u l-Ekodisinn,
it-teknoloġiji qegħdin jitressqu fis-suq. B’mod parallel,
il-leġiżlazzjoni settorjali tal-effiċjenza enerġetika dwar
l-ekodisinn qed tixpruna l-iżvilupp u l-użu ta’ apparat
effiċjenti fl-enerġija (eż. bojlers, magni tal-ħasil,
televixins, kompjuters) li tgħin lill-konsumaturi biex jiffrankaw
fl-enerġija. Fis-settur tal-bini, il-leġiżlazzjoni tal-UE
tippromwovi r-rinnovazzjoni tal-bini effiċjenti fl-enerġija u
l-kostruzzjoni tal-bini b’użu ta’ kważi żero enerġija.
Fis-settur tat-trasport, huma mħeġġa l-vetturi tal-elettriku u
b’emissjoni baxxa ta’ karbonju. Is-Sistema tal-UE għan-Negozjar
tal-Emissjonijiet u d-Deċiżjoni dwar il-Qsim tal-Isforz integraw
il-prezz tal-emissjonijiet tal-Gassijiet Serra (GHG)
fid-deċiżjonijiet operattivi u ta' investiment tan-negozji tal-UE u
kkontribwixxew għal tnaqqis sostanzjali fl-emissjonijiet, iżda r-rwol
tagħhom bħala l-ixprun ewlieni lejn investimenti b'livell baxx ta'
karbonju fit-tul qed jiġi kkontestat minħabba s-sinjal tal-prezz baxx
u volatili tal-karbonju prodott b'reazzjoni għall-kriżi. 2.2. It-titjib
tal-kundizzjonijiet ta’ qafas għar-riċerka u l-innovazzjoni L-Unjoni tal-Innovazzjoni stabbilixxiet
strateġija integrata għar-riċerka u l-innovazzjoni, li ttejjeb
il-finanzjament pubbliku u tindirizza l-ostakli li jżommu lura
l-investiment privat. Sar progress sinifikanti biex jitjiebu l-kundizzjonijiet
ta’ qafas, inkluża l-protezzjoni tal-privattiva unitarja (filwaqt li
jitnaqqsu konsiderevolment l-ispejjeż tal-privattivi), reġim
tal-kapital ta’ riskju effettiv fl-UE, u l-immodernizzar tar-regoli dwar
l-akkwist pubbliku. Iż-Żona Ewropea tar-Riċerka qed ittejjeb
l-impatt tal-finanzjament għar-riċerka tal-Istati Membri u
l-kundizzjonijiet ta’ qafas għar-riċerkaturi, inkluż billi
tallinja aħjar il-finanzjament minn Stati Membri differenti, ittejjeb
il-mobilità u l-karrieri tar-riċerkaturi u tagħti
lir-riċerkaturi aċċess għal infrastrutturi xjentifiċi
ta’ klassi dinjija. 2.3. Il-pjan
SET — jitmexxa s-seba’ Programm Kwadru tar-Riċerka tal-UE Il-Pjan tat-Teknoloġija Strateġika
tal-Enerġija (SET) tal-UE twaqqaf fl-2008 bħala l-qafas ta’ spinta
teknoloġika tal-politiki tal-UE dwar l-enerġija u l-klima. Dan jissejjes
fuq struttura ta’ implimentazzjoni bi tliet pilastri: Grupp ta’ Tmexxija,
l-Inizjattivi Industrijali Ewropej (EIIs), u l-Alleanza Ewropea
għar-Riċerka dwar l-Enerġija (EERA) u hija appoġġjata
minn sistema ta’ informazzjoni (SETIS) [2].
Il-Grupp ta’ Tmexxija dwar it-Teknoloġiji Strateġiċi
tal-Enerġija għen biex isir djalogu strutturali mal-Istati Membri li
wassal biex jikber l-allinjament tal-politiki nazzjonali dwar ir-riċerka u
l-innovazzjoni fil-qasam tal-enerġija u ppromwova bidla lejn azzjonijiet
konġunti biex jintlaħqu objettivi komuni aktar malajr kif ukoll b’mod
aktar effettiv. Il-Pjan SET ta prijorità lil dawk
it-teknoloġiji l-aktar rilevanti għall-objettivi tal-politika dwar
l-enerġija u l-klima għall-2020: ir-riħ, l-enerġija solari,
in-netwerks tal-elettriku, is-CCS, il-bijoenerġija, l-enerġija
nukleari, iċ-ċelloli tal-fjuwil u l-idroġenu, l-effiċjenza
enerġetika. L-EIIs imwaqqfa għal dawn is-setturi kollha ddefinixxew
l-oqsma prijoritarji ta’ riċerka u innovazzjoni permezz ta’ Pjanijiet
Direzzjonali tat-Teknoloġija inkluż pjan direzzjonali maħsub
dwar il-materjali[3]
u ffokaw l-azzjoni tagħhom fuq proġetti kbar ta’ valur Ewropew.
Permezz tal-EERA jiġu akkomunati l-kapaċitajiet ta’ riċerka
nazzjonali sabiex jiġu żviluppati soluzzjonijiet ġodda li jkollhom
impatt lil hinn mill-2020. Il-fondi Ewropej saru disponibbli,
primarjament taħt is-seba’ Programm Kwadru tar-Riċerka (FP7) permezz
tal-mobilizzazzjoni ta’ partijiet differenti bħalma huma l-Enerġija u
t-Teknoloġiji Abilitanti Essenzjali (eż. l-ICT u l-Materjali).
Mill-2007 sal-2012, it-Tema tal-Enerġija tal-FP7 appoġġjat
b’madwar EUR 1,8 biljun madwar 350 proġett. L-FP7 pprovda
wkoll appoġġ sostanzjali permezz ta’ sħubijiet pubbliċi u
privati u strumenti finanzjarji (ara hawn taħt). Barra minn hekk, l-appoġġ
fil-livell tal-UE ġie pprovdut ukoll permezz tal-Istitut Ewropew
tal-Innovazzjoni u t-Teknoloġija (IET) u l-Komunità ta’ Konoxxenza u
Innovazzjoni tiegħu InnoEnergy. Ġie pprovdut finanzjament
addizzjonali sostanzjali mill-Programm Ewropew tal-Enerġija
għall-Irkupru (EEPR) kif ukoll mill-Programm New Entrance Reserve
NER 300. L-investimenti pubbliċi u privati fl-iżvilupp
teknoloġiku għas-setturi tal-Pjan SET żdiedu minn
EUR 3,2 biljun fl-2007 għal EUR 5,4 biljun fl-2010[4] (Grafika 1). Illum
l-industrija twettaq madwar 70 % tat-total ta’ investiment
fir-riċerka u l-innovazzjoni fil-prijoritajiet tal-Pjan SET filwaqt li
l-Istati Membri huma responsabbli għal madwar 20 % u l-Kummissjoni
Ewropea għal 10 %. Grafika 1
Stima tal-investiment pubbliku u korporattiv fir-R&Ż fl-2010 skont
it-teknoloġija u s-sors (JRC/SETIS)[5] B’riżultat ta’ dawn l-isforzi, twettqu
kisbiet importanti fl-iżviluppi teknoloġiċi kif ukoll tnaqqis
fl-ispejjeż għat-teknoloġiji tal-Pjan SET. Matul dawn l-aħħar żewġ
deċennji l-prezzijiet tas-sistema Fotovoltajka naqsu madwar id-dinja
kollha, xprunati b’mod sinifikanti mill-iżviluppi fit-teknoloġija u
fis-suq. L-ispiża tal-moduli fotovoltajċi naqset drastikament (bi
tliet darbiet f'sentejn)[6].
Il-mira tal-Pjan SET ta’ EUR 1/kW[7]
sal-2030 tista’ diġà ssir realtà sal-2020 u b’hekk jitnaqqsu b'mod
sinifikanti l-ispejjeż għas-soċjetà. L-enerġija mir-riħ
(prinċipalment fuq l-art) diġà tikkontribwixxi b’mod sinifikanti
għall-ġenerazzjoni tal-enerġija: 106 GW ta’ kapaċità
tar-riħ installata fi tmiem l-2012 iġġenerat 210 TWh jew
7 % tal-produzzjoni tal-elettriku Ewropea[8].
Id-dħul annwali tal-fornituri ewlenin tat-tagħmir tar-riħ
laħaq l-EUR 20 biljun fl-2012. Filwaqt li r-riħ huwa suq
globali, għandu influwenza lokali qawwija: is-sehem mis-suq madwar
id-dinja tal-manifattur tat-turbini jiddependi ferm fuq il-prestazzjoni tas-suq
domestiku tagħhom.
L-isforzi tal-UE jissoktaw ukoll bl-applikazzjonijiet
tal-enerġija mir-riħ lil hinn mill-kosta fejn it-teknoloġija
għadha qed titjieb u l-ispejjeż qegħdin jonqsu. Fis-settur tat-trasport, l-isforzi tal-UE
jiffokaw fuq l-ilħuq ta' 10 % tal-konsum ta' enerġija
mill-enerġija rinnovabbli, b'mod partikolari permezz ta' fjuwils
alternattivi. Sabiex jiġi indirizzat iibdil indirett fl-użu tal-art
(ILUC), il-Kummissjoni pproponiet li għandha tinkiseb mhux aktar min-nofs
il-mira ta' 10 % permezz tal-bijofjuwils konvenzjonali, filwaqt li
tiżdied id-domanda għal bijofjuwils avvanzati għal 6 Mtoe
jew 15-il impjant, kull wieħed b'kapaċità annwali ta' 100 Ktoe.
Ingħata bidu pożittiv permezz tal-FP7 li ffinanzja disa’ proġetti
ta’ wiri fuq skala kbira tal-bijofjuwils linjoċellulożi
b’kapaċitajiet ta’ 40 000 sa 80 000 tunnellata fis-sena. 2.4. Il-programm
Enerġija Intelliġenti-Ewropa (IEE) Mill-2007, il-programm innovattiv Enerġija
Intelliġenti-Ewropa (IEE) ippromwova l-kummerċjalizzazzjoni
tat-teknoloġiji u indirizza l-ostakli mhux teknoloġiċi
(finanzjarji, regolatorji u amministrattivi). Il-programm iffoka fuq
l-effiċjenza enerġetika u l-enerġija rinnovabbli. Permezz ta’
aktar minn 300 proġett, dan il-Programm ġab aktar minn
EUR 4 biljun ta’ investiment relatat fis-setturi kollha ta’ użu
finali, inkluż it-trasport. L-IEE wassal għall-integrazzjoni ta’
mudelli ta’ negozju ġodda li jistimolaw il-finanzjament privat.
Eżempju ta’ tali mudell tan-negozju huwa l-Ikkuntrattjar
għall-Prestazzjoni tal-Enerġija (EPC), fejn l-investiment inizjali
f’miżuri għall-iffrankar tal-enerġija jitħallas
mill-ġdid permezz tal-iffrankar tal-ispejjeż minn effiċjenza
enerġetika ogħla. L-IEE s’issa rreplika dan il-mudell tan-negozju
f’10 Stati Membri, inklużi xi wħud fejn il-kunċett
fil-biċċa l-kbira ma kienx magħruf. L-IEE stabbilixxa wkoll kooperazzjoni
mal-istituzzjonijiet finanzjarji biex jirnexxielu jimmobilizza investimenti ta’
madwar EUR 2 biljun (b’finanzjament tal-UE ta'
EUR 38 miljun) fl-enerġija sostenibbli permezz ta’
faċilitajiet ta’ assistenza li tingħata fl-iżvilupp ta’
proġetti (ELENA[9]
u l-Mobilizzazzjoni tal-Investiment Lokali fl-Enerġija). Il-programm kien
minn tal-ewwel li appoġġja lill-atturi tat-“trasformazzjoni
tal-enerġija” bħall-awtoritajiet lokali u reġjonali, l-iskejjel,
l-isptarijiet u l-akkomodazzjoni soċjali kif ukoll indirizza
l-bżonnijiet tal-prattikanti permezz tal-għoti ta’ taħriġ u
informazzjoni. L-investimenti huma mistennija li jiġġeneraw iffrankar
fl-enerġija ta' aktar minn 2000 GWh fis-sena. Permezz tal-inizjattiva Build-up Skills,
il-programm qed jindirizza l-ħtiġijiet tal-prattikanti li jibnu bini
b'użu ta' kważi żero enerġija madwar l-UE. Fil-qasam
tal-industriji intensivi fl-enerġija, il-proġett CARE+ immobilizza
l-SMEs fl-industrija kimika biex jiffrankaw l-enerġija b'bejn 10 u
20 %. 2.5. Sħubijiet
Pubbliċi-Privati u Impriża Konġunta L-Impriża Konġunta
taċ-Ċelloli tal-Fjuwil u l-Idroġenu (FCH JU),
appoġġjata mill-FP7, wasslet biex jiġi implimentat programm ta’
attivitajiet ta' riċerka u wiri mmexxi mill-industrija li jkopri
l-applikazzjonijiet kemm stazzjonarji kif ukoll mobbli tal-ġenerazzjoni
tal-enerġija. It-EUR 380 miljun f’għotjiet allokati s’issa
wasslu biex varjetà ta’ applikazzjonijiet jitressqu eqreb lejn is-suq (eż.
il-vetturi għall-immaniġġar materjali, is-sistemi ta’
enerġija ta’ riżerva) filwaqt li jitnaqqsu l-ispejjeż u jitjiebu
l-effiċjenza u t-tul ta' ħajja tal-applikazzjonijiet. Is-Sħubijiet Pubbliċi-Privati (PPPs)
orjentati lejn ir-riċerka dwar l-effiċjenza enerġetika fil-bini
u dwar il-fabbriki tal-ġejjieni, kif ukoll dwar il-karozzi
ekoloġiċi, laqqgħu flimkien il-partijiet interessati f’kull
wieħed minn dawn is-setturi biex joħolqu aġenda komuni u
jiggwidaw il-finanzjament tal-UE lejn l-objettivi tagħhom. Mill-2009
sal-2012, ġew impenjati EUR 1,6 biljun mill-UE, flimkien ma’
livell simili ta’ investimenti fis-settur privat. Il-PPPs irnexxielhom jattiraw
il-parteċipazzjoni qawwija tal-SMEs. 2.6. It-titjib
fl-aċċess għall-finanzjament permezz tad-dejn - Faċilità
ta' Finanzjament għall-Kondiviżjoni tar-Riskji (RSFF) Taħt l-FP7, l-RSFF qed
tappoġġja lill-Bank Ewropew tal-Investiment (BEI) biex jipprovdi
madwar EUR 10 biljun f’impenji ta’ self (b’kontribuzzjoni tal-UE ta'
EUR 1 biljun) u biex jattira aktar minn EUR 20 biljun ta'
investimenti fir-riċerka u fl-innovazzjoni, speċjalment minn
kumpaniji kbar u soċjetajiet ta' kapital medju. L-RSFF
tħeġġeġ lill-promoturi tal-proġetti biex iwettqu
attivitajiet ta’ riċerka u innovazzjoni li huma marbuta ma' livell
għoli ta' riskju. Mill-2009 sal-2012, is-settur tal-enerġija kien
jikkostitwixxi bejn 14 u 18 % tal-portafoll tal-RSFF, inklużi
investimenti pijunieri ewlenin fl-enerġija solari u mir-riħ u
investimenti biex titjieb l-effiċjenza enerġetika, b’mod partikolari
fis-settur tal-karozzi. 2.7. Id-Dimensjoni
Reġjonali — appoġġ mill-politika ta’ koeżjoni Fi ħdan il-baġit tal-politika ta’
koeżjoni l-enerġija sostenibbli tgawdi minn finanzjament
konsiderevoli, b’aktar minn EUR 10 biljun ippjanati għal
investiment fl-effiċjenza enerġetika u fl-enerġija rinnovabbli
fil-perjodu ta’ pprogrammar 2007-2013. Eżempju ta’ dan huwa l-proġett
Wave Hub fil-Lbiċ tal-Ingilterra, immirat biex joħloq l-akbar sit
tat-test fid-dinja għal apparat li jiġġenera l-elettriku
mill-moviment tal-mewġ. Eżempju ieħor huwa l-proġett Green
Buildings Cluster tal-Awstrija t’isfel, li jgħaqqad il-professjonisti
tal-kostruzzjoni u tal-bini mar-riċerkaturi biex jindirizza l-isfidi
bħalma huma l-bidla fil-klima u jippermetti l-innovazzjoni permezz
tal-kooperazzjoni. 2.8 Il-valutazzjoni tal-qafas tal-UE
għat-teknoloġija u l-innovazzjoni fil-qasam tal-enerġija L-Ewropa tinsab fit-triq it-tajba biex trawwem
l-iżvilupp ta’ teknoloġiji fil-qasam tal-enerġija u toħloq
il-kundizzjonijiet xierqa għall-innovazzjoni, iżda għad fadal
ħafna xi jsir. L-evoluzzjoni rapida tax-xenarju
tal-enerġija tirrikjedi approċċ sistemiku u l-kapaċità ta'
reazzjoni għal żviluppi ġodda. Kemm l-evalwazzjoni
tal-implimentazzjoni tal-Pjan SET[10]
kif ukoll il-konsultazzjoni pubblika[11]
li saret b’appoġġ ta’ din il-Komunikazzjoni jikkonfermaw li l-Pjan
SET jeħtieġ aktar iffokar fuq l-integrazzjoni tas-sistema
tal-enerġija, l-integrazzjoni ta’ attivitajiet tul il-katina
tal-innovazzjoni, u koordinazzjoni akbar tal-EIIs u tal-EERA b’appoġġ
għal dan. Jeħtieġ li jiżdiedu aktar l-iżviluppi
tal-katini tal-provvista industrijali, filwaqt li tinħtieġ
koordinazzjoni akbar tal-atturi u l-investimenti tul il-katina tar-riċerka
u l-innovazzjoni biex jitħaffu l-iżvilupp u l-adozzjoni mis-suq. Barra minn hekk, għalkemm l-Istati Membri
jaqsmu objettivi komuni fir-rigward tal-industrija u tar-riċerka, l-impenn
tagħhom lejn il-Pjan SET bħalissa huwa ta’ kwalità inferjuri.
L-investimenti koordinati u/jew konġunti bejn l-Istati Membri u mal-UE
jridu jitrawmu sabiex jiġu promossi l-investimenti fis-settur privat
b’appoġġ għall-Pjanijiet Direzzjonali għat-Teknoloġija
tal-EEIs u l-Programmi Konġunti tal-EERA. Bl-istess mod, jeħtieġ
li jiġi żgurat impenn ċar mill-imsieħba industrijali
inkluż f’PPPs imsejsa fuq viżjoni kondiviża u objettivi definiti
b’mod ċar, filwaqt li l-kapaċitajiet ta’ riċerka tal-EERA jridu
jkunu aktar integrati biex titħaffef il-kisba tar-riżultati
b’konnessjonijiet akbar mal-industrija. Evalwazzjoni esterna tal-programm IEE fl-2011[12] ikkonkludiet li din
għandha rwol kruċjali fl-iżvilupp tal-innovazzjoni tas-servizz,
tal-għarfien u l-bini tal-kapaċità u tal-mudelli ta’ negozju
ġodda li jiġbdu l-finanzjament privat għall-adozzjoni
tat-teknoloġiji tal-effiċjenza enerġetika u tal-enerġija
rinnovabbli fis-suq. Abbażi ta' dan l-eżempju ta' suċċess,
jeħtieġ li l-miżuri li jappoġġjaw l-adozzjoni mis-suq
tal-innovazzjoni fl-enerġija jiġu estiżi għal oqsma
oħra ta’ politika tal-enerġija u jkunu marbuta aktar
bis-sħiħ mal-Fondi Strutturali u ta’ Koeżjoni. B’mod simili, l-evalwazzjoni interim
tal-FCH JU[13]
rrakkomandat konċentrazzjoni akbar fuq ir-riċerka applikata u
l-attivitajiet ta' wiri fuq skala kbira marbuta mal-ħtiġijiet
tas-sistema tal-enerġija, bħall-użu tal-idroġenu biex
jinħażen l-elettriku rinnovabbli. Dawn jenfasizzaw il-ħtieġa ta'
katina integrata għar-riċerka u l-innovazzjoni fil-livell tal-UE li
tkun mifruxa mir-riċerka bażika għall-adozzjoni mis-suq. 3. STRATEĠIJA
GĦALL-INNOVAZZJONI U T-TEKNOLOĠIJA FIL-QASAM TAL-ENERĠIJA
SAS-SENA 2020 U LIL HINN MINNHA Jeħtieġ li l-istrateġija
Ewropea għat-teknoloġija u l-innovazzjoni fil-qasam tal-enerġija
taċċellera l-innovazzjoni fl-aktar teknoloġiji avvanzati
b’livell baxx ta’ karbonju u s-soluzzjonijiet innovattivi, u tnaqqas id-distakk
bejn ir-riċerka u s-suq. Dan huwa rikonoxxut b’mod ċar fil-proposti
tal-Kummissjoni għal Orizzont 2020, li jlaqqgħu flimkien
l-appoġġ tal-UE għar-riċerka u l-innovazzjoni (inklużi
s-suċċessuri għall-programmi attwali tal-FP7 u tal-IEEII u
appoġġ ulterjuri għall-EIT) f'qafas simplifikat. Madankollu,
il-finanzjament tal-UE għadu parti limitata mill-finanzjament globali
fl-Ewropa kollha, u l-prinċipji u l-iżviluppi ewlenin għandhom
jiġu ugwalment riflessi f’investimenti tal-Istati Membri u tas-settur
privat. L-implimentazzjoni għandha tkun dejjem aktar imsejsa fuq
sħubijiet li jibnu l-iskala u l-ambitu meħtieġa, u tikseb impatt
akbar minn riżorsi pubbliċi u privati skarsi. 3.1. Prinċipji
ewlenin Inżidu l-valur fil-livell tal-UE L-intervent tal-UE għandu jiffoka fuq
il-qasam fejn jista’ verament iżid il-valur. Dan għandu
jikkonċentra fuq sforzi fuq skala kbira li jmorru lil hinn minn dak li
l-Istati Membri jistgħu jiksbu waħedhom jew bilateralment, filwaqt li
jippromwovi l-innovazzjoni permezz ta’ regolamentazzjoni u finanzjament.
Għandu jappoġġja l-bini tal-kapaċità ta’ riċerka u
innovazzjoni biex jaċċellera l-iżviluppi, u jiġġenera
ekonomiji ta’ skala. Meta jiġu ffissati l-prijoritajiet
għandha titqies is-sistema sħiħa tal-enerġija L-iżvilupp ta’ teknoloġiji fil-qasam
tal-enerġija għandu jitqies mill-perspettiva tal-provvista ta'
servizzi tal-enerġija kosteffikaċi lill-klijenti finali: id-dawl,
it-tisħin, it-tkessiħ, it-trasport ekoloġiku eċċ.
L-iżviluppi teknoloġiċi individwali għandhom jiġu
vvalutati għall-integrazzjoni u l-impatt tagħhom fuq is-sistema
sħiħa tal-enerġija (il-produzzjoni, it-trażmissjoni,
id-distribuzzjoni u l-użu tal-enerġija). Approċċ sistemiku
jfisser li wieħed imur lil hinn mid-diviżjonijiet eżistenti bejn
is-sorsi tal-enerġija u l-użi finali, u għalhekk għandu
jisfrutta s-sinerġiji bejn is-setturi (eż. l-enerġija, l-ICT,
it-trasport, l-agrikoltura), filwaqt li jieħu vantaġġ
mill-komplementarjetajiet u r-riperkussjonijiet transsettorjali, kif ukoll
ifittex soluzzjonijiet imsejsa fuq iċ-ċiklu tal-ħajja li jnaqqsu
l-ħtieġa ġenerali għall-enerġija billi jnaqqsu
l-iskart u jużaw il-materjali mill-ġdid u jirriċiklawhom. L-integrazzjoni tal-azzjonijiet tul
il-katina tal-innovazzjoni fl-enerġija u t-tisħiħ tar-rabta
mal-politika tal-enerġija L-appoġġ għaċ-ċiklu
tal-innovazzjoni minn riċerka bażika għall-adozzjoni mis-suq
ifisser l-appoġġ għall-miżuri ta' introduzzjoni fis-suq
biex jiġu żviluppati l-kapaċitajiet, jiġu pprovati
l-kunċetti għat-teknoloġiji tal-ġenerazzjoni li jmiss,
jiġu indirizzati l-ostakli regolatorji, jiġu analizzati
l-kundizzjonijiet tas-suq ta’ teknoloġiji speċifiċi u
jinħoloq orizzont u ambjent ta’ investiment li jwasslu għal aktar
investiment fl-innovazzjoni. L-akkomunament tar-riżorsi u l-użu
ta’ portafoll ta’ strumenti finanzjarji L-isfida tal-enerġija teħtieġ
investimenti fir-riċerka u fl-innovazzjoni li ma jistgħux
jintlaħqu minn Stat Membru jew attur privat iżolat. Fi żmien
meta jinħtieġu soluzzjonijiet immotivati mir-riċerka u meta r-riżorsi
pubbliċi jinsabu taħt pressjoni, jeħtieġ li jkun hemm
ingranaġġ tal-investimenti individwali tal-Istati Membri
b'appoġġ għall-industrija bi programmi li jippermettu
żviluppi industrijali ambizzjużi u komprensivi, u indirettament
b’integrazzjoni akbar tal-istituzzjonijiet ta' riċerka u finanzjament
istituzzjonali nazzjonali. L-istadji differenti tal-innovazzjoni u
l-introduzzjoni jeħtieġu mekkaniżmi ta’ finanzjament xierqa.
Għandu jissaħħaħ l-isfruttar tas-sinerġiji mal-Fondi
Strutturali u tal-Investimenti tal-UE speċjalment permezz ta' oqfsa ta' politika
strateġiċi tar-riċerka u l-innovazzjoni fil-livell nazzjonali
u/jew reġjonali bil-għan tal-ispeċjalizzazzjoni[14] intelliġenti.
Jistgħu jintużaw ukoll programmi oħra għall-finanzjament
tal-innovazzjoni, bħall-Faċilità Nikkollegaw l-Ewropa (grilji intelliġenti
u awtostradi tal-elettriku) jew strumenti ta’ finanzjament bħal dawk
proposti fil-komponent ta' Aċċess għal Finanzjament ta’ Riskju
tal-Orizzont 2020 jew imħaddma direttament mill-Bank Ewropew
tal-Investiment. Barra minn hekk, il-mekkaniżmi ta’ finanzjament tal-ETS
simili għall-Programm NER 300 jistgħu jiġu previsti
fil-ġejjieni. Inżommu l-alternattivi
miftuħa, filwaqt li nikkonċentraw fuq l-aktar teknoloġiji
promettenti għal wara l-2020 Il-biċċa l-kbira
tat-teknoloġiji fil-qasam tal-enerġija għandhom termini ta'
żmien twal u għalhekk id-deċiżjonijiet dwar l-investiment
issa se jkollhom riperkussjonijiet lil hinn mill-2020. B’riżultat ta’ dan,
jeħtieġ li l-UE tixpruna l-iżvilupp ta’ spettru ta’ teknoloġiji
li jistgħu biss jilħqu l-maturità tagħhom wara l-2020.
L-istrateġija tat-teknoloġija u l-innovazzjoni fil-qasam
tal-enerġija tistabbilixxi qafas għat-twassil ta' teknoloġiji u
soluzzjonijiet tal-enerġija vijabbli u ekonomiċi kemm fuq perjodu
qasir kif ukoll fit-tul, għall-UE u għas-suq globali. Din tibni fuq
il-proposta tal-Kummissjoni Ewropea Orizzont 2020 li bħalissa hija
soġġetta għal deċiżjoni skont il-proċess
leġiżlattiv. Se tinkorpora wkoll ir-riżultati tad-dibattitu fuq
il-Green Paper dwar il-qafas għall-2030 għall-politika fil-qasam
tal-klima u l-enerġija. 3.2 Żviluppi ewlenin li huma
meħtieġa L-użu tal-potenzjal sħiħ
tal-effiċjenza enerġetika u l-iffokar fuq il-konsum ta’ użu
finali L-investiment fl-effiċjenza
enerġetika jgħin lill-konsumaturi jiffrankaw u jippermetti
lill-industriji tal-UE jiddependu inqas fuq il-prezzijiet tal-enerġija,
inaqqsu l-ispejjeż tagħhom u jżidu l-kompetittività
tagħhom. Il-bini, bi kważi 40 %
tal-konsum finali tal-enerġija, huwa prijorità għolja biex
tiżdied ir-rata ta’ rinnovazzjonijiet effiċjenti fl-użu tal-enerġija
għall-bini eżistenti u biex il-bini ġdid ikun b’użu ta’
kważi żero enerġija. Jeħtieġ li jiġu
żviluppati u pprovati l-materjal ġdid għall-bini, il-pjanijiet
għall-integrazzjoni tal-enerġija rinnovabbli fil-bini, u
kunċetti u mudelli ta’ negozju ġodda għar-rinnovazzjoni tal-bini
effiċjenti fl-enerġija. Dawn għandhom ikunu appoġġjati
minn konverġenza bejn approċċi nazzjonali u reġjonali
regolatorji biex jitnaqqsu l-piżijiet amministrattivi, jiġu
stabbiliti metodoloġiji standard biex jitkejjel il-prestazzjoni
enerġetika tal-bini, u jjkun jista' jiffunzjona s-suq uniku. L-iżvilupp u l-adozzjoni
tal-innovazzjonijiet li jnaqqsu sostanzjalment l-ispejjeż
tal-enerġija tal-industrija għandhom jingħataw prijorità, b’mod
partikolari għall-SMEs u l-industriji intensivi fl-enerġija (eż.
l-użu ta’ insulazzjoni industrijali madwar l-Ewropa għandu jnaqqas
il-konsum annwali tal-enerġija b'4 %). Dan jinkludi appoġġ
għall-iżvilupp tal-ħiliet fejn għandu x'jaqsam l-iffrankar
mill-effiċjenza enerġetika fl-industrija permezz ta' taħriġ
tal-awdituri tal-enerġija u tal-maniġers tal-enerġija. It-twassil ta' soluzzjonijiet
kompetittivi għal sistema tal-enerġija nadifa, sostenibbli, sikura u
effiċjenti L-innovazzjonijiet li jiżguraw
il-flessibbiltà u s-sigurtà tas-sistema Ewropea tal-enerġija se
jnaqqsu l-ispejjeż tal-infrastruttura sħiħa tal-enerġija u
jħejjuha biex tassumi ammonti ferm akbar ta’ enerġija rinnovabbli.
It-teknoloġiji tal-ħażna tal-elettriku se jkunu importanti
fil-livell tat-trażmissjoni u tad-distribuzzjoni. L-innovazzjonijiet huma meħtieġa biex
jiżguraw il-kontinwità tal-provvista tal-elettriku u jirrazzjonalizzaw
id-domanda għall-infrastrutturi permezz tal-ibbilanċjar
kosteffikaċi tal-enerġija elettrika rinnovabbli, fil-livell lokali
permezz ta’ reazzjoni għad-domanda u l-flessibbiltà u fil-livell
tat-trażmissjoni permezz tal-innovazzjoni fit-trasport tal-elettriku fuq
distanzi twal biex ikun hemm ibbilanċjar bejn id-diversi siti ta' sorsi
ta’ enerġija rinnovabbli, pereżempju, għall-kollegament
tal-enerġija mir-riħ lil hinn mill-kosta. Permezz tat-teknoloġiji li jippermettu l-parteċipazzjoni
attiva tal-konsumaturi, se titjieb l-effiċjenza enerġetika
fin-netwerks, filwaqt li jsir aktar użu tal-ICT. L-innovazzjoni fil-grilji
tad-distribuzzjoni u l-iżvilupp ta’ ambjent tas-suq li jagħti
s-setgħa lill-konsumaturi, filwaqt li jiżgura l-protezzjoni adegwata
ta' dawk l-aktar vulnerabbli, biex jibbenefikaw mill-aħjar kundizzjonijiet
ta' prezzijiet u enerġija u biex jipproduċu u jbiegħu l-enerġija
tagħhom stess. Filwaqt li għadd ta’ teknoloġiji
ġew żviluppati b'suċċess u ddaħħlu fis-suq
(l-enerġija mir-riħ fuq l-art u l-enerġija solari fotovoltajka)
bis-saħħa tal-appoġġ għall-użu, jinħtieġ
approċċ miftuħ u flessibbli għall-iżvilupp
ulterjuri ta’ portafoll ta’ alternattivi tal-enerġija kosteffikaċi u
sostenibbli. Oqsma promettenti oħra tal-enerġija rinnovabbli
jinkludu l-enerġija mir-riħ fil-wiċċ tal-baħar u
fil-baħar fond, l-enerġija tal-oċeani, l-avvanzi
fl-enerġija solari kkonċentrata u applikazzjonijiet fotovoltajċi
ġodda. Tinħtieġ aktar konċentrazzjoni fir-riċerka dwar
it-teknoloġiji tat-tisħin u tat-tkessiħ, fit-teknoloġiji
tal-idroġenu u ċ-ċelloli tal-fjuwil. L-innovazzjoni hija wkoll
meħtieġa f’materjali ġodda, f'teknoloġiji abilitanti
ewlenin bħall-ICT, fin-nanoteknoloġija, fil-mikro u
n-nanoelettronika, fil-fotonika, fil-bijoteknoloġija u fil-proċessi
ta’ manifattura avvanzati. Ir-Reattur
Termonukleari Sperimentali Internazzjonali (ITER) huwa proġett[15] fil-qalba tar-riċerka
fit-tul tal-UE fil-qasam tal-enerġija ta' fużjoni. L-iżvilupp teknoloġiku huwa
meħtieġ biex jingħata appoġġ għall-operat
sikur tas-sistemi nukleari, għall-iżvilupp ta’ soluzzjonijiet
sostenibbli għall-ġestjoni ta’ skart radjuattiv, u għal
kompetenzi nukleari. Dan għandu jiffoka fuq is-sikurezza tal-impjanti
nukleari eżistenti, partikolarment fid-dawl tal-estensjoni tal-ħajja
operattiva tagħhom, kif ukoll tas-sikurezza tas-sistemi nukleari
tal-futur. Għandha tissokta r-riċerka fil-qasam ta’ soluzzjonijiet
fit-tul għall-ġestjoni ta’ skart radjuattiv fl-Ewropa permezz
tal-iżvilupp tar-rimi fil-livell ġeoloġiku. Dawn l-isforzi
għandhom ikunu akkumpanjati minn riċerka multidixxiplinari dwar
ir-riskji ta’ dożi baxxi ta’ radjazzjoni. Ir-reatturi tal-fissjoni
nukleari tal-ġenerazzjoni li jmiss bħas-sistemi tal-“Ġenerazzjoni
IV” huma l-alternattivi fit-tul fil-qasam tal-enerġija nukleari. Il-provvista ta' fjuwils alternattivi
sostenibbli għat-taħlita tal-fjuwils użata fit-trasport
fl-Ewropa, b'konformità mal-istrateġija
għall-fjuwils[16]
alternattivi għas-sostituzzjoni fit-tul taż-żejt bħala sors
ta’ enerġija għal kull xorta ta’ trasport. Dan jirrikjedi
l-iżvilupp immirat u t-tnaqqis fl-ispejjeż tal-fjuwils (b’mod
partikolari l-bijofjuwils avvanzati, il-bijometanu u l-idroġenu) u
t-teknoloġiji applikati għat-trasport. It-trawwim tal-innovazzjoni f’ambjenti
reali u permezz ta’ qafas xprunat mis-suq Tinħtieġ enfasi partikolari fuq
il-bliet li jużaw ferm aktar enerġija milli huma kapaċi
jipproduċu. Tinħtieġ aktar integrazzjoni u ottimizzazzjoni
tal-flussi tal-enerġija, tal-informazzjoni u tat-trasport fil-livell ta’
distretti, bliet u komunitajiet. Din hija l-premessa tas-Sħubija Ewropea
għall-Innovazzjoni għall-Bliet u Komunitajiet Intelliġenti[17]: li turi soluzzjonijiet urbani
intelliġenti fuq skala kummerċjali bbażati fuq l-użu
tal-ICT fis-setturi tal-enerġija u tat-trasport li jistgħu jipprovdu
soluzzjonijiet kosteffikaċi f’żoni urbani Ewropej. Il-miżuri tal-adozzjoni mis-suq huma
meħtieġa fid-diffużjoni tat-teknoloġiji innovattivi kollha
fil-qasam tal-enerġija biex ikun jista' jsir skalar 'il fuq
tal-investimenti fil-katini tal-provvista u biex jappoġġjaw
l-implimentazzjoni tal-politika għall-grilji, l-enerġija rinnovabbli
u l-effiċjenza enerġetika bl-għan li jiġu indirizzati
l-ostakli mhux teknoloġiċi, inkluż: ·
l-iżvilupp tal-kapaċità tal-atturi
tas-suq u tal-awtoritajiet pubbliċi biex jintroduċu politiki u
miżuri effettivi, li jħeġġu l-introduzzjoni
tat-teknoloġiji fis-suq. Dan jinkludi l-iżvilupp kontinwu
tal-prattikanti (eż. l-iżviluppi tal-ħiliet
għat-tekniċi, l-inġiniera); ·
l-appoġġ tal-iżvilupp u
tal-introduzzjoni ta’ soluzzjonijiet ta’ finanzjament innovattivi
għall-enerġija rinnovabbli u għall-effiċjenza
enerġetika, inkluż il-finanzjament għall-użu tagħhom. L-istrateġiji ta’ innovazzjoni nazzjonali
u reġjonali għandhom jiżvolġu rwol importanti fit-trawwim
tal-innovazzjoni f’ambjenti reali. Dawn għandhom jiġu mmobilizzati
biex jappoġġjaw l-iżvilupp tal-kapaċitajiet
għar-riċerka u l-innovazzjoni u biex jaċċelleraw
l-isfruttar u d-disseminazzjoni tar-riżultati tar-riċerka u
tal-innovazzjoni fis-suq, b’attenzjoni partikolari għall-ħolqien ta’
ambjent tan-negozju favorevoli għall-innovazzjoni għall-SMEs u
l-industrija reġjonali u lokali inkluż it-titjib tal-aċċess
għall-finanzjament ta’ riskju. 4. IMPLIMENTAZZJONI TAL-ISTRATEĠIJA
GĦALL-INNOVAZZJONI U T-TEKNOLOĠIJA FIL-QASAM TAL-ENERĠIJA Il-pjan SET għadu l-istrument
prinċipali biex jintlaħqu l-isfidi indirizzati hawn fuq. Dan
jipprovdi l-punt ta’ referenza għall-investimenti tal-UE, nazzjonali,
reġjonali u privati fir-riċerka u fl-innovazzjoni fil-qasam
tal-enerġija. Madankollu, il-Pjan SET irid ukoll
jissaħħaħ, sabiex jirreaġixxi għall-isfidi ġodda
u biex jikkonsolida aħjar il-kapaċità u r-riżorsi disponibbli
fl-Ewropa kollha għar-riċerka u l-innovazzjoni. Għal dan il-għan,
qed jiġu proposti l-bidliet li ġejjin: ·
Sabiex tiġi indirizzata l-integrazzjoni
tas-sistema tal-enerġija u tal-katina tal-innovazzjoni, għandu
jiġi żviluppat Pjan Direzzjonali, taħt il-gwida tal-Grupp
tat-Tmexxija tal-Pjan SET, li jinkorpora l-prinċipji u l-miżuri
ewlenin identifikati f’din il-Komunikazzjoni. Dan il-Pjan Direzzjonali Integrat
għandu jikkonsolida l-pjanijiet direzzjonali għat-teknoloġija
(aġġornati) tal-Pjan SET filwaqt li jżomm l-ispeċifiċitajiet
tat-teknoloġiji; dan għandu jkopri l-katina sħiħa
tar-riċerka u l-innovazzjoni mir-riċerka bażika sal-wiri u
l-appoġġ għad-diffużjoni fis-suq; u għandu jidentifika
rwoli u kompiti ċari għad-diversi partijiet interessati bħall-EERA,
l-EIIs, l-EIT, il-PPPs Ewropej rilevanti u partijiet interessati oħra
bħall-universitajiet, l-investituri u l-finanzjaturi filwaqt li
jippromwovi s-sinerġiji u l-interazzjonijiet ta’ bejniethom. L-ewwel Pjan
Direzzjonali Integrat għandu jiġi żviluppat sa tmiem l-2013. ·
Abbażi tal-Pjan Direzzjonali Integrat,
l-Istati Membri u l-Kummissjoni għandhom jiżviluppaw Pjan ta’
Azzjoni li jistabbilixxi investimenti konġunti u/jew koordinati minn
Stati Membri individwali, bejn l-Istati Membri u mal-UE. Dawn l-investimenti
għandhom imorru lil hinn minn programmi ta’ għotjiet u jinkludu
kuntratti u strumenti ta’ inġinerija finanzjarja. Il-Pjan ta’ Azzjoni se
jsegwi approċċ flessibbli u jinkludi modi differenti ta'
implimentazzjoni bħall-allinjament tal-finanzjament mill-Istati Membri u
mill-KE fuq il-prijoritajiet identifikati fil-pjan direzzjonali integrat u
l-investimenti konġunti bejn l-Istati Membri jew/u mal-Unjoni Ewropea. Dan
għandu jkopri l-kapaċitajiet ta' finanzjament istituzzjonali u ta'
riċerka tal-EERA. Għandu jiġi żviluppat sa nofs l-2014 u
jiġi aġġornat regolarment u appoġġjat min-netwerk(s)
tal-korpi ta’ finanzjament. ·
Sistema ta' rappurtar robusta msejsa fuq is-Sistema
ta’ Informazzjoni Strateġika għat-Teknoloġiji fil-Qasam
tal-Enerġija (SETIS) tal-Pjan SET għandha timmonitorja
l-implimentazzjoni tal-Pjan Direzzjonali Integrata u l-Pjan ta’ Azzjoni.
Abbażi tad-dejta pprovduta mill-Istati Membri, ir-rappurtar dwar
il-progress għandu jsir kull sena sabiex issir valutazzjoni tal-impatt fuq
l-objettivi tal-politika dwar l-enerġija u orjentazzjoni aħjar
tal-appoġġ tal-UE u dak nazzjonali. ·
Għandha tiġi stabbilita struttura ta’
koordinazzjoni taħt il-Grupp ta’ Tmexxija tal-Pjan SET biex
tippromwovi l-investimenti fir-riċerka u fl-innovazzjoni fuq
l-effiċjenza enerġetika. Din għandha tkopri s-Sħubijiet
Pubbliċi-Privati tal-UE rilevanti f’dan il-qasam, is-Sħubija Ewropea
għall-Innovazzjoni tal-Bliet u l-Komunitajiet Intelliġenti u
inizjattivi oħra sabiex tiġi ffaċilitata d-diffużjoni
fis-suq. Din l-istruttura għandha tkun magħmula minn atturi
tal-komunità tal-industrija u tas-suq, awtoritajiet pubbliċi u
finanzjaturi. Għaldaqstant, jista' jkun li
s-sħubija, l-operat u l-mandat tal-Grupp ta' Tmexxija tal-Pjan SET
ikollhom bżonn jissaħħu biex jindirizzaw l-isfida
tal-iżvilupp tal-Pjan Direzzjonali Integrat. Bl-istess mod, l-Inizjattivi Industrijali
Ewropej u l-Pjattaformi Ewropej għat-Teknoloġija assoċjati
jridu jaġġustaw il-mandat, l-istruttura u l-parteċipazzjoni
tagħhom inkluż permezz ta’ komponent industrijali aktar
b'saħħtu biex jaġġornaw il-Pjanijiet Direzzjonali
tat-Teknoloġija tagħhom u jikkontribwixxu għall-Pjan
Direzzjonali Integrat. It-teknoloġiji emerġenti u l-iżviluppi
ġodda jridu jiġu indirizzati, b’mod partikolari l-ħżin u
l-enerġija tal-oċeani b'rabta mal-istrateġija tat-Tkabbir
Marittimu. Fl-istess waqt, l-Alleanza Ewropea għar-Riċerka dwar
l-Enerġija trid tkompli tintegra l-kapaċitajiet ta' riċerka
tagħha u żżid l-impatt tas-suq/kummerċjali
tar-riżultati tagħha, b’kollaborazzjoni mill-qrib mal-Inizjattivi
Industrijali Ewropej. F'dawn l-istrutturi kollha, għandhom jiġu
integrati partijiet interessati ġodda sabiex jindirizzaw l-innovazzjoni
mhux teknoloġika u t-tneħħija tal-ostakli regolatorji,
finanzjarji, kummerċjali u ta' mġiba u b’hekk itejbu t-tħejjija
tas-suq. Dan jinkludi atturi lokali, SMEs, ICT, regolaturi, operaturi
tan-netwerk, finanzjaturi u konsumaturi. Id-dimensjoni esterna għandha ssaħħaħ l-eċċellenza u l-ġibda tal-UE
bħala sieħba fir-riċerka. Il-kooperazzjoni internazzjonali
fil-qasam tar-R&Ż b'konformità mal-Istrateġija ta’ Kooperazzjoni
Internazzjonali[18]
u mal-Orizzont 2020 għandha tkun iffokata fuq dawk l-isfidi
tar-riċerka u l-innovazzjoni fil-qasam tal-enerġija billi tista’
żżid mal-valur tagħhom għall-benefiċċji
għall-UE. Id-dimensjoni esterna tal-politika tal-enerġija,
inklużi d-Djalogi bilaterali dwar l-Enerġija[19] u l-Ftehimiet ta’
Kooperazzjoni fix-Xjenza u t-Teknoloġija konklużi mill-Kummissjoni
mal-pajjiżi terzi msieħba, għandhom jiġu implimentati b’mod
ikkoordinat u ta' tisħiħ reċiproku. Il-Konvenzjoni
Qafas tan-Nazzjonijiet Uniti dwar it-Tibdil fil-Klima (UNFCCC), li
tipprovdi qafas internazzjonali għall-klima u għat-teknoloġiji
tal-enerġija, hija wkoll sieħeb importanti. Permezz
tal-Mekkaniżmu ta’ Teknoloġija tiegħu, is-suq globali
għat-trasferiment tat-teknoloġija lejn pajjiżi li qed
jiżviluppaw u dawk emerġenti mistenni li jikber Pajjiżi bħall-Istati Uniti,
il-Ġappun u ċ-Ċina qegħdin iniedu u jimplimentaw programmi
ambizzjużi għat-tnaqqis fil-livell ta’ karbonju, li
jirrappreżentaw opportunitajiet ta' kooperazzjoni sinifikanti
tar-riċerka u l-innovazzjoni għas-settur tar-riċerka Ewropew ki
fukoll opportunitajiet tas-suq għall-industrija, pereżempju fl-oqsma
tal-grilji intelliġenti, iċ-ċelloli tal-fjuwil u l-idroġenu,
l-enerġija rinnovabbli jew is-sikurezza nukleari u l-fużjoni
nukleari. Għandha tissokta l-kooperazzjoni multilaterali bejn l-UE,
l-Istati Uniti u l-Ġappun dwar il-materja prima kritika
għall-enerġija. Il-potenzjal tal-enerġija solari għandu
jkompli jiġi sfruttat b’kooperazzjoni mal-Pajjiżi Msieħba
tal-Mediterran. 5. KONKLUŻJONIJIET L-istrateġija tal-UE
għat-teknoloġija u l-innovazzjoni fil-qasam tal-enerġija hija
parti integrali mill-politika tal-enerġija tal-UE. Fil-fatt, din
għandha tikkomplementa l-miżuri regolatorji eżistenti,
tiżgura li l-UE tkun minn ta’ quddiem nett fl-innovazzjoni fis-swieq
internazzjonali tal-enerġija, kif ukoll tindirizza l-isfidi maħluqa
mis-sitwazzjoni ekonomika attwali. Għandha tikkontribwixxi
għat-tisħiħ tal-kompetittività fil-kosti tal-enerġija
tagħna u l-affidabbiltà tal-provvista. F’din il-Komunikazzjoni,
il-Kummissjoni stabbilixxiet l-istrateġija tagħha biex tiżgura
li l-UE żżomm il-klassi dinjija fis-settur tat-teknoloġija u
tal-innovazzjoni sabiex tindirizza l-isfidi għas-sena 2020 u lil hinn
minnha. Sabiex tappoġġja dan
l-approċċ, il-Kummissjoni: ·
se ·
tiżgura l-iżvilupp, flimkien
mal-partijiet interessati tal-Pjan SET, ta' Pjan Direzzjonali Integrat dwar
il-prijoritajiet identifikati fl-Istrateġija tal-UE tat-teknoloġija u
l-innovazzjoni fil-qasam tal-enerġija sa tmiem l-2013. ·
tiddefinixxi, flimkien mal-Istati Membri, Pjan ta’
Azzjoni ta' investimenti konġunti u individwali b’appoġġ
għall-Pjan Direzzjonali Integrat sa nofs l-2014. ·
ssaħħaħ flimkien mal-Istati Membri
s-sistema ta’ rappurtar għall-monitoraġġ tal-Pjan Direzzjonali
Integrat u l-Pjan ta’ Azzjoni msejjes fuq is-Sistema ta’ Informazzjoni
Strateġika għat-Teknoloġiji fil-Qasam tal-Enerġija (SETIS)
tal-Pjan SET. ·
tistieden, flimkien mal-Istati Membri fil-kuntest
tal-Grupp ta’ Tmexxija, lill-Inizjattivi Industrijali Ewropej u
lill-Pjattaformi Ewropej għat-Teknoloġija assoċjati biex
jaġġustaw il-mandat, l-istruttura u l-parteċipazzjoni
tagħhom bl-għan li jaġġornaw il-Pjanijiet Direzzjonali
tat-Teknoloġija tagħhom u jikkontribwixxu għall-Pjan Direzzjonali
Integrat. ·
tistabbilixxi struttura ta’ koordinazzjoni, fi
ħdan il-Grupp ta’ Tmexxija tal-Pjan SET, biex tippromwovi l-investimenti
fir-riċerka u fl-innovazzjoni dwar l-effiċjenza enerġetika ·
titlob lill-Parlament Ewropew u lill-Kunsill biex: –
jaffermaw mill-ġdid l-appoġġ
tagħhom għall-Pjan SET bħala parti mill-politiki Ewropej dwar
l-Enerġija u t-Tibdil fil-Klima u r-rinfurzar tiegħu
għall-iżvilupp tat-teknoloġija u l-innovazzjoni fil-qasam
tal-enerġija kif stabbilit f’din il-Komunikazzjoni –
japprovaw il-prinċipji ewlenin u
l-iżviluppi proposti meħtieġa għat-teknoloġija u
l-innovazzjoni fil-qasam tal-enerġija madwar l-UE; –
jappoġġjaw l-allinjament tar-riżorsi
tal-UE, nazzjonali, reġjonali u privati għal dan l-approċċ
integrat għar-riċerka u l-innovazzjoni; ·
tistieden lill-Istati Membri u r-reġjuni biex
jappoġġjaw l-implimentazzjoni tal-Pjan Direzzjonali Integrat u l-Pjan
ta’ Azzjoni permezz ta’: –
koordinazzjoni msaħħa tal-programmi ta’
riċerka u innovazzjoni fil-qasam tal-enerġija tagħhom kif ukoll
permezz tal-użu ta’ Fondi Strutturali u tal-Investiment tal-UE u
tad-dħul mill-irkantar tal-EU ETS; –
kollaborazzjoni akbar permezz ta’ azzjonijiet
konġunti u raggruppamenti dwar proġetti b’valur miżjud Ewropew; –
integrazzjoni akbar tal-finanzjament istituzzjonali
nazzjonali u tal-kapaċitajiet ta’ riċerka permezz ta’ Alleanza
Ewropea għar-Riċerka dwar l-Enerġija. –
id-dħul fis-seħħ
tal-appoġġ għall-adozzjoni mis-suq aktar mgħaġġla
tat-teknoloġiji tal-enerġija sostenibbli. [1] kif intqal fil-Komunikazzjoni dwar il-Pjan SET fl-2007
(COM (2007) 723) u fil-Komunikazzjoni dwar l-Investiment fit-teknoloġiji
b’livell baxx ta’ karbonju fl-2009 (COM (2009) 519) [2] Il-Grupp ta' Tmexxija tal-Pjan SET, magħmul minn
Stati Membri tal-UE, għandu l-mandat li jfassal azzjonijiet konġunti
u jagħmel ir-riżorsi disponibbli għall-implimentazzjoni tal-Pjan
SET. L-EIIs jissejsu fuq il-Pjattaformi Ewropej għat-Teknoloġija, u
jipproponu Pjanijiet Direzzjonali tat-Teknoloġija biex jiġu allinjati
l-isforzi tal-UE, tal-Istati Membri u tal-industrija bl-għan li
jintlaħqu objettivi komuni. L-EERA tiġbor flimkien l-istabbilimenti
ewlenin tal-UE tar-riċerka fil-qasam tal-enerġija u ngħatat
il-mandat biex timplimenta programmi konġunti permezz tal-qsim
tal-kapaċitajiet nazzjonali fl-Ewropa. Is-Sħubija Ewropea għall-Innovazzjoni
tal-Bliet u l-Komunitajiet Intelliġenti bdiet bħala l-komponent
tal-effiċjenza enerġetika tal-Pjan SET u issa tintegra soluzzjonijiet
innovattivi fil-livell tal-applikazzjonijiet fuq skala reali tal-enerġija,
tat-trasport u tal-ICT tal-bliet u l-komunitajiet. Is-Sistema ta’ Informazzjoni
Strateġika għat-Teknoloġiji fil-Qasam tal-Enerġija (SETIS)
tal-Kummissjoni hija mmexxija u kkoordinata miċ-Ċentru Konġunt
tar-Riċerka (JRC) tal-KE [3] SEC(2011) 1609 - Dokument ta’ Ħidma tal-Persunal
tal-Kummissjoni “Materials Roadmap Enabling Low Carbon Energy Technologies” [4] Skont (COM (2009) 519) ġie stmat li
jinħtieġu EUR 8 biljun fis-sena sabiex l-azzjonijiet
tal-Pjan SET javvanzaw b’mod effettiv [5] Għas-settur nukleari l-infiq li għandu
x’jaqsam mal-Euratom [6] Dokument ta’ Ħidma tal-Persunal, Valutazzjoni
tat-Teknoloġija Grafika 3.2 [7] EUR 1/kW għal sistemi turnkey 100 kW
sal-2030 (espress fi prezzijiet tal-2011, eskluża l-VAT) [8] Kalkoli tal-JRC imsejsa fuq fattur tal-kapaċità ta’
23 %, li hija ċ-ċifra medja tal-2011 għall-Ewropa [9] Il-Faċilità ELENA ta' replikazzjoni tas-suq tnediet
mill-Kummissjoni Ewropea u mill-Bank Ewropew tal-Investiment (BEI)
f’Diċembru 2009 biex jappoġġjaw l-investimenti
fl-effiċjenza enerġetika u l-proġetti tal-enerġija
rinnovabbli. Il-Faċilità ELENA, immexxija mill-BEI, il-KfW, is-CEB u
l-BERŻ, hija ffinanzjata permezz tal-Programm IEE tal-Kummissjoni Ewropea. [10] Ir-rieżami tal-Pjan SET mill-JRC/SETIS jinsab fuq: http://setis.ec.europa.eu/set-plan-implementation/set-plan-review-2010-2012 [11] Ir-rapport
sħiħ dwar il-konsultazzjoni pubblika jinsab fuq: http://ec.europa.eu/energy/technology/consultations/20130315_technology_innovation_en.htm [12] “Evalwazzjoni ex-ante tas-suċċessur ta’
“Enerġija Intelliġenti-Ewropa II” (2007-2013)”, tinsab disponibbli
fuq: http://ec.europa.eu/energy/intelligent/files/doc/2011_iee2_programme_ex_ante_en.pdf [13] Disponibbli
fuq:
http://ec.europa.eu/research/evaluations/pdf/archive/other_reports_studies_and_documents/eval_fuel_cell_hydro_report_2011.pdf [14] Fil-proposta għall-Politika Reġjonali
għall-2014-2020, l-Istati Membri jew ir-reġjuni huma mitluba
jiżviluppaw dawn l-istrateġiji [15] żviluppat b’mod konġunt mill-Ġappun,
iċ-Ċina, l-Indja, il-Korea t’Isfel, ir-Russja, l-Istati Uniti u l-UE.
[16] COM(2013) 17 finali [17] COM(2012) 4701 finali [18] COM(2012) 497 finali [19] COM(2011) 539 finali