PROPOSTA GĦAL REGOLAMENT TAL-PARLAMENT EWROPEW U TAL-KUNSILL li jintroduċi, fl-okkażjoni tal-adeżjoni tal-Kroazja, miżuri temporanji speċjali għar-reklutaġġ ta’ uffiċjali u ta' aġenti temporanji mal-Unjoni Ewropea /* COM/2012/0377 final - 2012/0224 (COD) */
MEMORANDUM TA’ SPJEGAZZJONI 1. IL-KUNTEST TAL-PROPOSTA L-abbozz ta’ Regolament mehmuż
jirrigwarda l-aspetti tal-adeżjoni tal-Kroazja mal-Unjoni Ewropea
fl-1 ta’ Lulju 2013 marbutin mar-reklutaġġ. Fit-tkabbir tal-imgħoddi ġew
adottati miżuri speċifiċi biex jiġu impjegati nies
mill-pajjiżi li kienu se jissieħbu fl-Unjoni. Fil-kuntest ta' dan
it-tkabbir, dan kien jirrikjedi Regolament tal-Kunsill li jidderoga b’mod
temporanju mid-dispożizzjonijiet rilevanti tar-Regolamenti tal-Persunal[1]
li jikkonċernaw ir-reklutaġġ. Il-karatteristiċi ewlenin tal-proposta
huma: 1. Hu propost li d-deroga
mir-Regolamenti tal-Persunal iddum sat-30 ta’ Ġunju 2018. 2. Ir-Regolament jipprevedi
l-organizzazzjoni ta’ kompetizzjonijiet għall-għażla ta’
uffiċjali mill-Kroazja fuq bażi nazzjonali. 3. Il-kompetizzjonijiet
għaċ-ċittadini Kroati jistgħu jsiru, u l-listi ta’
kandidati magħżula jistgħu jittellgħu, qabel
l-adeżjoni ta’ dawn il-pajjiżi fl-Unjoni Ewropea. Madankollu, kull
pajjiż irid ikun issieħeb mal-Unjoni qabel ma ċ-ċittadini
tiegħu jkunu jistgħu jingħataw kariga ta' uffiċjal
mal-Istituzzjonijiet Ewropej. 4. Hemm il-possibilità li
l-Istituzzjonijiet jidderogaw mir-rekwiżit biex jirreklamaw postijiet
vakanti fl-Istituzzjonijiet. L-Istituzzjonijiet jistgħu, madankollu,
jippubblikaw avviżi ta’ postijiet vakanti jekk jixtiequ. Kull Istituzzjoni tiddetermina n-numru ta’
uffiċjali u aġenti temporanji mill-pajjiż kandidat li jridu
jiġu impjegati taħt id-dispożizzjonijiet ta’ dan ir-Regolament
ta’ deroga. 2. IR-RIŻULTATI TAL-KONSULTAZZJONIJIET
MAL-PARTIJIET INTERESSATI U L-VALUTAZZJONIJIET TAL-IMPATT Mhux applikabbli 3. L-ELEMENTI LEGALI TAL-PROPOSTA Huwa propost li ssir deroga
għall-Artikolu 4, subparagrafi (2) u (3), għall-Artikolu 7(1),
għall-Artikolu 27 u għall-Artikolu 29(1), punti a) u b),
tar-Regolamenti tal-Persunal, kif ukoll għall-Kondizzjonijiet tal-Impjieg
applikabbli għall-aġenti l-oħra tal-Unjoni Ewropea safejn dawn
il-kondizzjonijiet jipprevedu l-applikazzjoni tad-dispożizzjonijiet
imsemmija tal-Istatut fir-rigward tar-reklutaġġ ta’ aġenti
temporanji. 2012/0224 (COD) PROPOSTA GĦAL REGOLAMENT TAL-PARLAMENT EWROPEW U TAL-KUNSILL li jintroduċi, fl-okkażjoni
tal-adeżjoni tal-Kroazja, miżuri temporanji speċjali
għar-reklutaġġ ta’ uffiċjali u ta' aġenti temporanji
mal-Unjoni Ewropea IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b’mod partikolari l-Artikolu 336
tiegħu, Wara li kkunsidraw il-proposta tal-Kummissjoni
Ewropea, li ġiet ippreżentata wara konsultazzjoni mal-Kumitat
tar-Regolamenti tal-Persunal, Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Qorti
tal-Ġustizzja[2], Wara li kkunsidraw l-opinjoni tal-Qorti
tal-Awdituri[3], Filwaqt li jaġixxu skont
il-proċedura leġiżlattiva ordinarja, Billi: (1) Fl-okkażjoni
tal-adeżjoni tal-Kroazja fl-1 ta’ Lulju 2013, jaqbel li jiġu adottati
miżuri partikolari u temporanji, li jidderogaw mir-Regolamenti
tal-Persunal għall-uffiċjali tal-Unjoni Ewropea (minn hawn ‘il
quddiem imsejjaħ “Ir-Regolamenti tal-Persunal”) u mill-Kondizzjonijiet
tal-Impjieg applikabbli għall-aġenti l-oħra tal-Unjoni Ewropea
(minn hawn 'il quddiem “Il-Kundizzjonijiet tal-Impjieg”). (2) Minħabba d-daqs relattiv
tal-Istat li se jissieħeb mal-Unjoni u n-numru ta' nies li huma
potenzjalment involuti, huwa importanti li minkejja li dawn il-miżuri huma
fuq bażi temporanja għandhom jibqgħu fis-seħħ
għal perjodu sostanzjali. It-30 ta’ Ġunju 2018 tidher li hija
l-aktar data ta’ skadenza xierqa għalihom. (3) Minħabba
l-ħtieġa biex jitħallew isiru dawn ir-reklutaġġi
mill-aktar fis possibbli wara l-adeżjoni, dan ir-Regolament għandu
jiġi adottat qabel id-data effettiva tal-adeżjoni, ADOTTAW DAN IR-REGOLAMENT: Artikolu 1 1. Minkejja
d-dispożizzjonijiet tal-Artikolu 4, is-subparagrafi (2) u (3), l-Artikolu
7(1), l-Artikolu 27 u l-Artikolu 29(1) il-punti a) u b) tar-Regolamenti
tal-Persunal, wara d-data effettiva tal-adeżjoni tal-pajjiżi
kkonċernati sat-30 ta’ Ġunju 2018, jistgħu jimtlew il-postijiet
vakanti, sal-limitu tan-numru allokat, wara li jiġu meqjusa
d-diskussjonijiet baġitarji, permezz ta’ ħatra ta’ ċittadini
Kroati. 2. Il-ħatriet isiru
mid-data effettiva tal-adeżjoni u, apparti fil-każ ta' uffiċjali
għolja (Diretturi Ġenerali jew l-ekwivalenti tagħhom fi grad AD
16 jew AD 15 u Diretturi jew l-ekwivalenti tagħhom fi grad AD 15 jew AD
14), isiru wara l-kompetizzjonijiet ibbażati fuq il-kwalifiki jew fuq
testijiet organizzati jew wara l-kompetizzjonijiet ibbażati kemm fuq
kwalifiki kif ukoll fuq testijiet organizzati kif speċifikat fl-Anness III
tar-Regolamenti tal-Persunal. Artikolu 2 1. Id-deroga msemmija
fl-Artikolu 1(1) ta’ dan ir-Regolament tapplika mutatis mutandis
għar-reklutaġġ fil-kariga ta' aġenti temporanji ta’
ċittadini tal-Kroazja. 2. Ir-reklutaġġi jsiru
mid-data effettiva tal-adeżjoni. Artikolu 3 Dan ir-Regolament jidħol
fis-seħħ fil-jum wara dak tal-pubblikazzjoni tiegħu f'Il-Ġurnal
Uffiċjali tal-Unjoni Ewropea. Dan ir-Regolament jorbot fl-intier
tiegħu u japplika direttament fl-Istati Membri kollha. Magħmul fi Brussell, Għall-Parlament Ewropew Għall-Kunsill Il-President Il-President [1] Għat-tkabbir tal-2004, ara ĠU L 67,
05.03.2004, p. 1. Għat-tkabbir
tal-2007, ara ĠU L 335, 1.12.2006, p. 5. [2] ĠU C , , p. . [3] ĠU C , , p. .