RAPPORT TAL-KUMMISSJONI LILL-KUNSILL dwar l-applikazzjoni tal-Artikolu 263 (1) tad-Direttiva tal-Kunsill 2006/112/KE dwar it-tnaqqis tal-perjodi ta’ żmien allokati /* COM/2012/0337 final */
RAPPORT TAL-KUMMISSJONI LILL-KUNSILL dwar l-applikazzjoni tal-Artikolu 263 (1)
tad-Direttiva tal-Kunsill 2006/112/KE dwar it-tnaqqis tal-perjodi ta’
żmien allokati 1. daħla Skont l-Artikolu 2 tad-Direttiva tal-Kunsill
2008/117/KE tas-16 ta’ Diċembru 2008, il-Kummissjoni hija mitluba
tippreżenta, fuq il-bażi tal-informazzjoni pprovduta mill-Istati
Membri u mhux aktar tard mit-30 ta’ Ġunju 2011, rapport li jivvaluta
l-impatt tal-Artikolu 263(1) tad-Direttiva 2006/112/KE dwar l-abbiltà tal-Istati
Membri li jiġġieldu kontra l-frodi tal-VAT b’rabta ma’ provvisti
intra-Komunitarji ta' prodotti u servizzi kif ukoll dwar l-utilità
tal-possibbiltajiet previsti fl-Artikolu 263(1a) sa (1c), u, jekk ikun
meħtieġ, tagħmel proposti xierqa. L-ewwel tħassib tal-Istati Membri
fil-ġlieda tagħhom kontra t-tranżazzjonijiet frodulenti kien li
l-informazzjoni li tinsab fid-dikjarazzjonijiet rikapitulattivi ma kinitx
disponibbli qabel 6 xhur, u dan hu wisq għal skopijiet ta' analiżi
tar-riskju. Għalhekk, l-ewwel inizjattiva meħuda mill-Kummissjoni
f'dan il-qasam kienet li tippreżenta proposta biex temenda d-Direttiva
tal-VAT sabiex il-perjodu ta’ żmien allokat biex tiġi
ppreżentata u trażmessa d-dikjarazzjoni rikapitulattiva jitnaqqas
għal xahar. L-adozzjoni tad-Direttiva 2008/117/KE tas-16 ta’
Diċembru 2008 kienet rispons inizjali għal talba tal-Istati Membri
biex is-sistema tal-VAT tissaħħaħ u biex jingħataw
għajnuna fl-isforzi tagħhom biex jiġġieldu kontra l-frodi
tal-VAT. Din id-Direttiva emendat l-Artikolu 263(1) tad-Direttiva 2006/112/KE
sabiex tippermetti tnaqqis fil-limiti statutarji taż-żmien
għad-dikjarazzjoni tat-tranżazzjonijiet transkonfinali
għall-finijiet tal-VAT, flimkien ma’ tnaqqis fil-limiti ta’ żmien
għall-iskambju ta’ din l-informazzjoni bejn l-Istati Membri. Dan sar
bil-għan li l-frodi, partikolarment fir-rigward tal-“karużelli
tal-VAT”, tinqabad aktar malajr. L-Artikolu, li kellu jkun ġie implimentat
sal-1 ta’ Jannar 2010, jirrikjedi li: Bħala regola ġenerali, mill-1 ta’
Jannar 2010 ’l quddiem, għall-finijiet tal-VAT it-tranżazzjonijiet
transkonfinali se jiġu ddikjarati kull xahar; L-Istati Membri, madankollu, se jkunu
jistgħu jawtorizzaw lil operaturi b’fatturat ta’ inqas minn EUR 50,000
(eskluża l-VAT) f’perjodu ta’ tliet xhur għall-fornimenti
transkonfinali tal-merkanzija (jekk iridu, EUR 100,000, sal-31 ta’
Diċembru 2011) u lill-fornituri kollha tas-servizzi biex jibqgħu
jippreżentaw id-dikjarazzjonijiet rikapitulattivi fuq bażi
trimestrali. Ir-rapport tal-Kummissjoni jkopri l-mistoqsijiet
prinċipali li ġejjin: (1)
L-aċċelerazzjoni tal-iskambju
tal-informazzjoni sa liema punt tejbet l-abbiltà tal-Istati Membri li
jiġġieldu kontra l-frodi tal-VAT? Pereżempju, wasslet biex
il-kummerċjanti neqsin jinqabdu aktar malajr, jew għal sistema
nazzjonali aħjar għall-ġestjoni tar-riskju? (2)
Il-possibbiltajiet stabbiliti fl-Artikolu 263
tad-Direttiva 2006/112/KE kellhom xi impatt fuq l-objettiv li titjieb l-abbiltà
tal-Istati Membri li jiġġieldu kontra l-frodi tal-VAT filwaqt li
jiġu mminimizzati l-piżijiet amministrattivi fuq in-negozji,
b’konformità mal-Aġenda ta’ Lisbona? (3)
It-tnaqqis tal-perjodu ta’ żmien allokat biex
jiġu ppreżentati d-dikjarazzjonijiet rikapitulattivi u l-għoti
tad-diversi possibbiltajiet x’impatt kellhom fuq in-negozji, meta
wieħed iqis li l-Aġenda ta’ Lisbona għandha l-għan li
timminimizza l-piżijiet amministrattivi fuq in-negozji? Sabiex l-Istati Membri jingħataw ftit
taż-żmien biex jaraw kif se jaħdmu d-dispożizzjonijiet
il-ġodda, il-Kummissjoni ddeċidiet li testendi d-data sa meta jrid
ikun ġie ppreżentat ir-rapport. 2. sorsi ta' informazzjoni użati
għall-evalwazzjoni tal-applikazzjoni tal-artikolu 263(1). L-implimentazzjoni u l-applikazzjoni tal-Artikolu
263 (1) hija kwistjoni ta’ responsabbiltà nazzjonali għall-Istati Membri.
Konsegwentement, din l-evalwazzjoni tista’ tkun ibbażata biss fuq
l-informazzjoni li waslet mingħand l-Istati Membri. Sabiex tiġbor
l-informazzjoni neċessarja bil-għan li tevalwa l-impatt ta’ din
il-leġiżlazzjoni li għadha kif ġiet adottata,
il-Kummissjoni bagħtet żewġ kwestjonarji lill-Istati
Membri: wieħed qabel l-implimentazzjoni tad-dispożizzjonijiet
il-ġodda u l-ieħor wara l-implimentazzjoni tagħhom. It-tir
prinċipali tal-kwestjonarji kien li jsir paragun bejn is-sitwazzjoni
fl-Istati Membri qabel l-implimentazzjoni tat-tnaqqis tal-perjodi ta’
żmien allokati u s-sitwazzjoni fl-Istati Membri wara l-implimentazzjoni
tal-leġiżlazzjoni l-ġdida. Huwa importanti li jissemma li mhux
l-Istati Membri kollha kienu f'pożizzjoni li japplikaw id-dispożizzjonijiet
il-ġodda mill-1 ta' Jannar 2010. Barra minn hekk, kienu biss 22 l-Istati
Membri li rrispondew għall-kwestjonarju, u kultant l-ammont ta’ dettall
tat-tweġibiet ma kienx biżżejjed biex tkun tista’ ssir
analiżi xierqa. Għal dak li għandu x’jaqsam mal-impatt
tat-tnaqqis tal-perjodi ta’ żmien allokati u tal-għoti
tal-possibbiltajiet fuq in-negozji, il-Kummissjoni ħabirket biex tikseb
l-informazzjoni meħtieġa permezz ta’ studju[1]. Għal
dan il-għan, ikkummissjonat lill-PwC biex twettaq studju tal-esperti
bil-għan li tiġi eżaminata l-perspettiva tan-negozji. L-istudju
kien ikkonsenjat f'Ottubru 2011 u wieħed jista’ jaqrah fuq is-sit
elettroniku tal-Kummissjoni, fl-indirizz li ġej: http://ec.europa.eu/taxation_customs/common/publications/studies/index_en.htm 3. is-Sejbiet ewlenin 3.1. Deskrizzjoni qasira tal-mod
kif l-Istati Membri implimentaw id-dispożizzjonijiet tal-Artikolu 263 (1)
il-ġdid fil-leġiżlazzjoni nazzjonali tagħhom[2] Skont l-Artikolu 263(1) il-ġdid tad-Direttiva
2006/112/KE, ir-regola ġenerali hija li, mill-1 ta’Jannar 2010 ’l quddiem,
id-dikjarazzjonijiet rikapitulattivi għall-provvisti intra-Komunitarji
tal-merkanzija, inklużi l-fornituri dovuti, u tas-servizzi, għandhom
isiru għal kull xahar kalendarju f’perjodu ta’ mhux aktar minn xahar u
konformement mal-proċeduri li għandhom jiġu stabbiliti
mill-Istati Membri. L-analiżi turi li l-implimentazzjoni
(prattika) tal-Artikolu 263(1) tad-Direttiva 2006/112/KE, u speċjalment
tal-possibbiltajiet stabbiliti fih, mhijiex uniformi. Pereżempju: –
17-il Stat Membru implimentaw id-deroga biex
id-dikjarazzjonijiet rikapitulattivi jiġu ppreżentati fuq bażi
trimestrali, u 10 oħra ma implimentawhiex; –
5 Stati Membri għamlu l-applikazzjoni
tad-deroga mandatarja u 12 għamluha fakultattiva; –
2 Stati Membri għandhom dikjarazzjoni
rikapitulattiva separata għall-prodotti u għas-servizzi, filwaqt li
l-25 l-oħra għandhom dikjarazzjoni rikapitulattiva waħda
għal kollox. F’4 Stati membri, jista’ jkun hemm xi differenzi fil-perjodi
tar-rappurtar għall-provvisti intra-Komunitarji tal-merkanzija,
inklużi l-fornituri dovuti, fuq naħa, u għas-servizzi fuq
in-naħa l-oħra; –
22 Stat Membru jitolbu li d-dikjarazzjonijiet
jiġu ppreżentati elettronikament (f’10 Stati Membri, madankollu,
japplikaw xi eċċezzjonijiet) filwaqt li 5 oħra jipprovdu
għal preżentazzjoni elettronika fakultattiva. L-Anness 1 fih tabella li tipprova
tippreżenta din is-sitwazzjoni kumplessa fil-qosor 3.2. Il-konsegwenzi
għall-amministrazzjonijiet tat-taxxi 3.2.1. L-impatt fuq ħidmet
l-amministrazzjonijiet tat-taxxi Il-maġġoranza tal-Istati Membri
kkonfermaw li d-dejta mid-dikjarazzjonijiet rikapitulattivi tintuża b'mod
li jixbah lil dak li kien jintuża qabel l-introduzzjoni tar-rappurtar ta’
kull xahar. Issa, madankollu, hemm numru akbar ta’ dikjarazzjonijiet
rikapitulattivi li qed jiġu ppreżentati kemm għall-prodotti kif
ukoll għas-servizzi. Filwaqt li għadd ta’ Stati Membri (bħal
CY, DE, PL, SK, SI u UK) qalu li esperjenzaw żieda fil-piż
amministrattiv għall-amministrazzjoni tat-taxxi, minħabba l-fatt li
d-dikjarazzjonijiet rikapitulattivi issa qed jiġu ppreżentati aktar
spiss, Stati Membri oħra (e.g. ES) iddefendew din is-sitwazzjoni
minħabba li din tippermettilhom iqassmu l-pressjoni tax-xogħol
aħjar fuq is-sena kollha, u b'hekk jiġu evitati
l-konġestjonijiet ta’ kull tliet xhur kalendarji. Raġuni oħra li
ngħatat għaż-żieda fil-volum tax-xogħol hija
l-inklużjoni tas-servizzi fid-dikjarazzjoni rikapitulattiva, li hija
innovazzjoni oħra li tirriżulta mill-adozzjoni tal-pakkett tal-VAT. Il-maġġoranza tal-Istati Membri huma
tal-fehma li t-tnaqqis tal-perjodi ta’ żmien allokati jista’ jżid
l-effiċjenza tal-amministrazzjoni tat-taxxi, permezz ta’ skambju aktar
mgħaġġel tal-informazzjoni, analiżi aktar effiċjenti
tar-riskju, awditjar aktar effiċjenti u benefiċċji akbar
għall-Eurofisc. Ġie enfasizzat ukoll li teżisti
t-tendenza li d-deċiżjonijiet jittieħdu b’mod aktar
preċiż, u li tnaqqset ukoll il-ħtieġa li jintbagħtu
rikjesti għall-informazzjoni. 3.2.2. L-impatt fuq l-analiżi
tar-riskju B’mod ġenerali, l-Istati Membri rrappurtaw
li, minkejja l-fatt li issa qed jirċievu d-dejta mid-dikjarazzjonijiet
rikapitulattivi kull xahar, f’dan l-istadju ma saru l-ebda bidliet fil-prattiki
tagħhom fir-rigward tal-analiżi tar-riskju. F’għadd kbir ta’
Stati membri għadhom qed jintużaw l-istess parametri bħal qabel.
Ċerti Stati membri (e.g. HU u FI) ħabbru pjanijiet biex
jimmodernizzaw is-sistemi tagħhom tal-analiżi tar-riskju permezz
tal-introduzzjoni ta’ parametri addizzjonali. Ġie rrimarkat ukoll li
għalkemm id-dejta użata hija l-istess bħal qabel, il-fatt li
l-informazzjoni qed tasal aktar malajr jippermetti li l-amministraturi
tat-taxxi jirreaġixxu b’iktar ħeffa f’każ ta’ anomaliji. Rigward il-ħin meħtieġ biex
tiġi pproċessata d-dejta, b'mod ġenerali, il-parti l-kbira
tal-Istati membri wieġbu li ma kienu meħtieġa l-ebda
riżorsi addizzjonali għall-proċess tal-analiżi tar-riskju
minħabba li d-dejta li toħroġ mid-dikjarazzjoni rikapitulattiva
kienet diġà komponent tal-valutazzjoni ġenerali tar-riskju
tal-kontribwenti. Jidher li jkun diffiċli biex wieħed jikkalkula
r-riżorsi meħtieġa għall-finijiet tal-analiżi
tar-riskju biss. Aktar kummenti li waslu mingħand l-Istati Membri indikaw
li xi kultant jibqgħu jwettqu analiżi tar-riskju kull perjodu ta’
tliet xhur biss għax dan huwa eżerċizzju li jieħu
ħafna ħin, filwaqt li oħrajn iddikjaraw espliċitament li
l-implimentazzjoni tat-tnaqqis tal-perjodi ta' żmien allokati tkun titlob
li l-amministrazzjonijiet tat-taxxi jallokaw aktar riżorsi umani u
tal-informatika, jekk iridu li jinkisbu l-benefiċċji kollha kemm huma
tal-informazzjoni riċevuta kull xahar. 3.2.3. L-impatt fuq l-awditjar Id-dejta mid-dikjarazzjoni rikapitulattiva
normalment tintuża fil-fażi tal-għażla (l-għażla
tal-awditjar) u waqt il-fażi tal-awditjar (it-twettiq tal-awditjar). Tali dejta tintuża għall-awditjar
fl-Istati Membri kollha kemm huma. Dan huwa parti importanti mis-sistema
tal-valutazzjoni tar-riskju inġenerali minħabba li d-dejta
mid-dikjarazzjonijiet rikapitulattivi tipprovdi tagħrif aktar dettaljat
dwar it-tranżazzjonijiet intra-Komunitarji matul ċertu perjodu.
Il-proċedura ġenerali hi li d-dikjarazzjonijiet rikapitulattivi
jitqabblu mad-denunzji tal-VAT u l-validità tan-numri tal-VAT tiġi
vverifikata permezz tas-sistema VIES. F'każijiet ta' riskju, is-sejbiet
preliminari li jirriżultaw minn dejta li ma jaqblux ġeneralment
iwasslu għal aktar investigazzjoni, inklużi talbiet
għall-informazzjoni lil Stati membri oħrajn f’każ ta’
kummerċ intra-Komunitarju: aktar ma din l-analiżi ssir malajr, aktar
ikun jista’ jsir malajr eżerċizzju ta’ awditjar. It-tnaqqis
tal-perjodi ta’ żmien allokati ma bidilx din il-prattika iżda
għen biex l-amministrazzjoni tat-taxxi li twettaq l-awditjar tibgħat
il-mistoqsijiet jew l-informazzjoni spontanja lill-Istat Membru tal-akkwist
aktar malajr. 3.2.4. L-impatt fuq il-qbid
tal-irregolaritajiet u tal-frodi Għalkemm uħud mill-Istati membri
(bħalma huma GR, LT u RO) irrapportaw żieda fin-numru ta’
kummerċjanti neqsin, il-maġġoranza l-kbira tagħhom indikaw
li kien għadu kmieni wisq biex jiġi identifikat jekk it-tnaqqis
tal-perjodi ta’ żmien allokati wassalx għal żieda fil-qbid
tal-irregolaritajiet. F’dan ir-rigward ma ġew ipprovduti l-ebda
ċifri. Ġie rrimarkat li għalkemm il-każi
ta’ qbid tal-irregolaritajiet ma żdidux, huwa importanti li wieħed
jinnota li t-tnaqqis tal-perjodi ta’ żmien allokati biex jintbagħtu
d-dikjarazzjonijiet rikapitulattivi, flimkien ma’ denunzji tal-VAT kull xahar,
naqqsu l-perjodu ta’ żmien li matulu kumpanija intermedjarja tista’ topera
qabel ma tinqabad. Barra minn hekk, kien innutat ukoll li
minħabba l-fatt li l-Istati membri jistgħu jagħżlu li
jkomplu japplikaw perjodi differenti ta’ rapportar għad-dikjarazzjoni
rikapitulattiva u għad-denunzji tal-VAT, ma kienx possibbli li titwettaq
verifikazzjoni sistematika tad-dejta li tinsab fid-denunzji tal-VAT mad-dejta
riċevuta permezz tad-dikjarazzjoni rikapitulattiva ta’ kull xahar. Ir-rwol tal-EUROFISC biex il-kumpaniji
intermedjarji jinqabdu b’mod aktar sistematiku kien meqjus utli u l-qbid bikri
wassal għal diversi eżerċizzji ta’ awditjar li nbdew aktar
kmieni milli kien isir qabel. Sfortunatament, il-biċċa l-kbira
tal-Istati membri ma tawx dettalji dwar in-numru ta’ każijiet ta’ frodi
skoperti u dwar l-ammont tat-taxxa involut minn mindu ddaħħlu
d-dispożizzjonijiet il-ġodda. Ftit mill-Istati membri (jiġifieri LT, GR u
EE) sabu xi każijiet (potenzjali) ta’ frodi li jirrigwardaw is-servizzi,
imma l-biċċa l-kbira tal-Istati membri ma tawx ċifri
speċifiċi fuq l-ammont ta’ VAT li ntilef kaġun ta' frodi
relatata ma’ dawn il-każijiet. Jidher li għadu kmieni wisq biex
wieħed jivvaluta l-effettività tal-introduzzjoni tad-dejta dwar
is-servizzi fid-dikjarazzjonijiet rikapitulattivi. 3.2.5. L-impatt tal-possibbiltajiet
differenti offruti lill-Istati membri L-Istati membri kienu ntalbu jgħidu jekk,
b’riżultat tal-applikazzjoni ta’ possibbiltajiet differenti minn diversi
Stati membri, kinux esperjenzaw impatt negattiv fuq l-abbiltà tagħhom li
jużaw l-informazzjoni riċevuta. Mir-risposti li waslu jidher li
l-eżerċizzju tat-tqabbil tad-dejta maħruġa mill-Istat
membru tal-provvista ma’ dik maħruġa mill-Istat membru tal-akkwist
huwa problematiku. Minħabba l-perjodi differenti ta’ rappurtar u l-possibbiltajiet
differenti applikati minn Stati membri oħrajn, kien aktar diffiċli li
jkun hemm tqabbil aktar mgħaġġel tad-dejta fl-Istat membru
tal-akkwist. Ovvjament, huwa kważi impossibbli li wieħed
jistrieħ fuq tqabbil sistematiku ta’ kull xahar meta (parti minn)
l-informazzjoni tkun ippreżentata biss kull tliet xhur. Madankollu, dwar dan il-punt inġieb
l-argument li l-possibbiltajiet qegħdin hemm biss għal oqsma ta’
riskju baxx, u li billi kulħadd jaf sew bil-possibbiltajiet applikati
fl-Istati membri differenti, id-diffikultajiet li jistgħu jirriżultaw
mill-fatt li wieħed jirrikorri għal possibbiltà minflok għal
oħra m’għandhomx jiġu esaġerati. Bħala konklużjoni, ir-risposti juru
biċ-ċar li l-biċċa l-kbira tal-Istati membri jħossu li
l-applikazzjoni tal-possibbiltajiet differenti u tal-perjodi differenti
tar-rappurtar joħolqu ostaklu serju għal evalwazzjoni
mgħaġġla u preċiża tad-dejta. Għalhekk,
il-benefiċċji potenzjali li jirriżultaw mit-tnaqqis tal-perjodi
ta’ żmien allokati ma jistax jiġi sfruttat bis-sħiħ. 3.2.6. Konklużjoni Kollox ma’ kollox, l-Istati membri għad
għandhom bżonn ta’ aktar żmien sabiex jivvalutaw is-sitwazzjoni
l-ġdida b’mod preċiż u jipprovdu analiżi fil-fond u
kkwantifikata. Barra minn hekk, xi Stati Membri implimentaw ir-regoli
l-ġodda tard, u minħabba dan ma rnexxielhomx jipprovdu analiżi
aktar fil-fond. Madankollu, jidher li d-dispożizzjonijiet
il-ġodda tal-Artikolu 263 (1) kellhom effett pożittiv fuq
l-effiċjenza tal-attivitajiet kontra l-frodi. L-Istati membri jqisu
t-tnaqqis tal-perjodu ta’ żmien allokat għall-preżentazzjoni
tad-dikjarazzjonijiet rikapitulattivi u għar-rappurtar fis-sistema
tal-VIES bħala titjib kbir fl-attività tagħhom ta’ analiżi
tar-riskju. Konsegwentement, l-iskambju aktar malajr tal-informazzjoni jwassal
għal kontrolli u awditjar aktar bil-ħeffa. Kif inhuma l-affarijiet bħalissa,
l-applikazzjoni ta’ limiti minimi, possibbiltajiet u perjodi tar-rappurtar
differenti hija l-ikbar ostaklu biex il-qbid tal-frodi u l-proċeduri
tal-valutazzjoni tar-riskju jsiru aktar effiċjenti. Kieku jkun hemm
applikazzjoni inqas diverġenti tar-regoli, kemm f'termini ta' perjodi
differenti ta’ rappurtar kif ukoll ta’ diverġenzi bejn l-Istati membri,
l-Istati membri jkunu jistgħu jgawdu aktar mit-tnaqqis tal-perjodu ta’
żmien allokat biex jiġu ppreżentati d-dikjarazzjonijiet
rikapitulattivi. 3.3. L-esperjenzi mill-perspettiva
kummerċjali 3.3.1. Rimarka preliminari Wieħed irid iqis ċerti limitazzjonijiet
u prekawzjonijiet meta jkun qed jevalwa l-konklużjonijiet tal-istudju li
sar mill-kuntrattur estern. B’mod partikolari, wieħed irid iżomm
quddiem għajnejh li l-kampjun ta’ 23 kumpanija li fuqhom sar l-istudju
huwa żgħir wisq biex wieħed jasal għal konklużjonijiet
sodi. Il-kuntrattur estern irrikonoxxa li fil-kampjun identifikat ma kien hemm
l-ebda kumpanija li ntlaqtet mill-fatt li l-Istati membri jistgħu
jirrikorru għal possibbiltajiet differenti. Dan għaliex il-limitu
minimu previst fl-Artikolu 263 (1a) kien inqabeż mill-kumpaniji
magħżula fil-kampjun jew inkella l-kumpaniji kienu għażlu
li ma jirrikorrux għall-possibbiltà ta’ perjodu alternattiv ta’ rappurtar. Barra minn hekk, minħabba l-fatt li l-pakkett
tal-VAT kellu jiġi implimentat fl-istess żmien
mad-dispożizzjonijiet tal-Artikolu 263(1), kien diffiċli
għan-negozji biex jisseparaw l-ispejjeż ikkawżati minn dawn
tal-aħħar mill-ispejjeż ġenerali li jirriżultaw
mill-implimentazzjoni tal-pakkett tal-VAT. Irriżulta wkoll impossibbli li
jiġu identifikati l-ispejjeż marbuta mal-introduzzjoni tal-fornimenti
intra-Komunitarji ta’ servizzi fid-dikjarazzjonijiet rikapitulattivi,
minħabba li r-raggruppament tat-tranżazzjonijiet tal-fornimenti ma’
dawk tas-servizzi huwa prattika kummerċjali komuni. Billi l-kuntrattur estern iddikjara b'mod ċar
li r-riżultati kwantitattivi tal-istudju huma ta’ natura indikattiva u
għandhom jiġu trattati bi prudenza, fit-taqsima li jmiss
id-dokument tal-Kummissjoni jiffoka fuq ir-rispons kwalitattiv ipprovdut
mill-kumpaniji li fuqhom sar l-istudju. 3.3.2. L-impatt fuq il-piż
amministrattiv u fuq l-ispejjeż biex wieħed jikkonforma Fuq il-bażi tal-istudju, ir-rispons
kwalitattiv li taw it-23 kumpanija li fuqhom sar l-istudju jenfasizza xi
kunsiderazzjonijiet rilevanti dwar l-impatt tal-implimentazzjoni tal-Artikolu
263(1) tad-Direttiva 2006/112/KE. Għalkemm il-preżentazzjoni
tad-dikjarazzjonijiet rikapitulattivi kull xahar u r-rikonċiljazzjoni
tad-dejta kull xahar huma identifikati bħala piżijiet amministrattivi
addizzjonali, fl-istess waqt jimmotivaw lill-kumpaniji biex iwettqu kontrolli
interni aktar frekwenti. Dan se jkollu impatt pożittiv fuq il-kwalità
tad-dejta tal-kumpaniji. Għalhekk, meta nħarsu lejn il-ġejjieni,
il-maġġoranza tal-kumpaniji jbassru bilanċ pożittiv meta
wieħed jiżen l-ispejjeż amministrattivi kontra
l-vantaġġi f'termini ta’ kwalità u affidabilità aħjar tad-dejta.
Il-livell ta’ awtomazzjoni għandu impatt kbir
fuq kemm l-affarijiet wieħed jarahom kumplessi u fuq l-ispejjeż
amministrattivi. L-introduzzjoni ta’ proċessi interni awtomatizzati
tinvolvi spiża sinifikanti ta’ darba għall-kumpaniji, għax
ikollhom jibdlu jew jaġġornaw is-sistemi tagħhom u
jimmaniġġjaw il-bidliet interni. Fl-istess ħin, il-kumpaniji
japprezzaw li dan maż-żmien se jirriżulta f’inqas spejjeż
rikurrenti. In-nuqqas ta’ armonizzazzjoni fl-UE fejn
għandhom x’jaqsmu l-perjodi meta jridu jiġu ppreżentati
d-dokumenti, il-format u l-livell tad-dettalji huwa ta’ piż partikolarment
għall-kumpaniji li joperaw minn aktar aktar minn post wieħed jew li
għandhom aktar minn reġistrazzjoni waħda fl-UE.
Il-parteċipanti jissuġġerixxu wkoll li l-armonizzazzjoni
tal-perjodi ta’ żmien allokati għandha tkun akkumpanjata minn
armonizzazzjoni tal-proċeduri dwar il-preżentazzjoni tad-dokumenti –
i.e. mossa li twassal għall-preżentazzjoni elettronika u,
partikolarment, għal interfaċċja sempliċi u faċli biex
tużaha li tissimplifika kemm jista’ jkun il-preżentazzjoni ta’ kull
xahar. Kumpaniji li jagħmlu fornimenti
intra-Komunitarji kemm tal-prodotti kif ukoll tas-servizzi jew tas-servizzi
intra-Komunitarji biss isibu ruħhom f’diffikultajiet meta jiġu biex
jiġbru informazzjoni sħiħa sabiex jagħmlu d-dikjarazzjonijiet
rikapitulattivi. B’mod speċjali, l-introduzzjoni tas-servizzi hija meqjusa
bħala livell ogħla ta’ dettall li jrid jiġi pprovdut meta
mqabbel mas-sitwazzjoni ta’ qabel l-1 ta’ Jannar 2010. Il-kumpaniji li fuqhom sar l-istudju jindikaw li
komunikazzjonijiet mal-awtoritajiet tat-taxxi żdiedu. Hekk kif
jeħtieġ li aktar fornituri (fornituri intra-Komunitarji ta’ servizzi)
jiġu inklużi f’dikjarazzjonijiet rikapitulattivi aktar frekwenti u
anki li l-korrezzjonijiet isiru aktar spiss, l-awtoritajiet tat-taxxi qed
ikollhom aktar mistoqsijiet li jirrekjedu li tittieħed azzjoni dwarhom
mill-kumpaniji milli kien il-każ qabel l-implimentazzjoni
tal-leġiżlazzjoni l-ġdida. Fil-qosor, fis-sentimenti espressi mill-kumpaniji
li fuqhom sar l-istudju jistgħu jiġu identifikati tliet elementi: –
xi negozji għandhom it-tendenza li l-bidliet
regolatorji jarawhom bħala li jkollhom impatt newtrali fuq
l-operazzjonijiet, bl-eċċezzjoni notevoli tal-ispejjeż ta' darba
marbuta mal-aġġornament tas-sistema tagħhom, jew ma' tibdil
fiha, li huma kkunsidrati bħala element sinifikanti tal-ispiża; –
kumpaniji oħrajn jgħidu li jippreferu
bil-kbir is-sitwazzjoni kif kienet qabel l-implimentazzjoni tal-Artikolu 263(1)
tad-Direttiva 2006/112/KE, għax iħossu li din ġabet magħha
fatturi ġodda u kbar tal-ispiża. Madankollu, ma kinux f’qagħda
li jispeċifikaw jekk dawn l-ispejjeż kinux xprunati l-aktar mill-fatt
li issa jridu jiġu inklużi s-servizzi jew mill-fatt li l-perjodu ta'
żmien allokat biex jiġu ppreżentati d-dokumenti tnaqqas għal
xahar; –
għadd ta’ kumpaniji jaraw il-vantaġġi
li se jkollha s-sitwazzjoni l-ġdida fil-futur, u jsemmu inter alia
t-titjib tal-kwalità tad-dejta u inqas każijiet ta’ frodi tat-taxxi. 3.3.3. L-impatt li jista’ jkollha
sitwazzjoni aktar armonizzata fejn l-Istati membri japplikaw l-istess perjodu
ta’ żmien allokat mingħajr derogi u limiti minimi L-impatt potenzjali ta’ sitwazzjoni aktar
armonizzata jista’ jiġi stmat li jkun pożittiv mil-lat kwalitattiv.
Fil-fatt, il-kumpaniji qalu li jistennew li jekk isseħħ
l-armonizzazzjoni fost l-Istati membri tal-UE, din tnaqqsilhom l-ispejjeż.
Jgħidu wkoll li l-armonizzazzjoni tal-perjodi ta’ żmien allokati
għandha tkun akkumpanjata minn armonizzazzjoni tal-proċedura
tal-preżentazzjoni tad-dokumenti – i.e. mossa li twassal għal
preżentazzjoni elettronika obbligatorja fl-Istati membri kollha u,
l-aktar, għal interfaċċja sempliċi u faċli biex
tużaha li tagħmel il-preżentazzjoni ta’ kull xahar faċli
kemm jista’ jkun. 3.3.4. Konklużjoni L-istudju kkonkluda li jkun hemm bżonn ta’
aktar analiżi sabiex l-ispiża addizzjonali ta’ darba u l-ispiża
rikorrenti għan-negozji kaġun tal-leġiżlazzjoni
l-ġdida tal-VAT tiġi vvalutata bi tqabbil mal-għan u
l-benefiċċji tal-leġiżlazzjoni l-ġdida tal-VAT,
jiġifieri t-tnaqqis tad-differenza fil-ġbir tal-VAT b’riżultat
tal-qbid aktar malajr tal-frodi u tat-tnaqqis tar-riskju tal-karużelli
tal-VAT. In-negozji jibbenefikaw ukoll minn dan għax
se jkun hemm inqas riskju li wieħed ikun involut fi frodi tal-VAT kontra
x-xewqa tiegħu u li jinżamm responsabbli għal tali involviment.
Bħala tali, dan jista’ wkoll jgħin biex jitnaqqsu l-frodi tal-VAT u
l-kompetizzjoni inġusta min-naħa ta’ impriżi frodulenti. Tista’ ssir aktar analiżi dwar kif tista’
titnaqqas l-ispiża rikorrenti billi e.g. il-proċedura
tal-preżentazzjoni tad-dokumenti tiġi armonizzata permezz ta’
interfaċċja waħda u faċli biex tużaha
għall-Istati membri kollha u/jew billi jiġi aċċettat li
l-fajls XML jittellgħu fl-istess format fl-Istati membri kollha. 4. Kummenti finali B'mod ġenerali, l-Istati membri huma
tal-fehma li għadu kmieni wisq biex jiġi evalwat bis-sħiħ
l-impatt tat-tnaqqis tal-perjodu ta’ żmien allokat biex jiġu
ppreżentati d-dikjarazzjonijiet rikapitulattivi. Il-Kummissjoni
tagħraf li l-Istati Membri se jkunu jeħtieġu aktar żmien
biex jaġġustaw is-sistemi tagħhom tal-analiżi tar-riskju u
jibbenefikaw bis-sħiħ minn dan it-tibdil fil-leġiżlazzjoni. Madankollu, f'dan l-istadju huwa ċar li,
fil-biċċa l-kbira tagħhom, l-Istati membri jikkunsidraw
id-disponibbiltà akbar tal-informazzjoni mniżżla
fid-dikjarazzjonijiet rikapitulattivi bħala benefiċċju reali
għall-abbiltà tagħhom li jidentifikaw tranżazzjonijiet
frodulenti aktar malajr. Barra mill-iskambju malajr tal-informazzjoni permezz
tan-netwerk tal-Eurofisc, dawn id-dispożizzjonijiet il-ġodda
lill-Istati membri jippermettulhom jiffukaw fuq il-frodaturi b’ħeffa ikbar
minn qabel. Min-naħa l-oħra, il-possibbiltà li
l-Istati membri jitħallew jirrikorru għal perjodi differenti ta’
rappurtar xorta waħda għadu meqjus bħala ostaklu biex
il-miżura tħalli l-effett sħiħ tagħha fil-qasam
tal-valutazzjoni tar-riskju u tal-prevenzjoni tal-frodi. Minn perspettiva kummerċjali, huwa ċar
li tnaqqis fil-perjodu ta’ żmien allokat biex jintbagħtu
d-dikjarazzjonijiet rikapitulattivi jġib miegħu aktar spejjeż
tal-immaniġġjar tad-dokumenti, minħabba li n-numru
tad-dikjarazzjonijiet li jridu jiġu ppreżentati żdied
konsiderevolment. Barra minn hekk, dan wassal għal aktar kuntatti
mal-amministrazzjonijiet tat-taxxi, minħabba li d-dejta trid tiġi
kkoreġuta jew ivverifikata aktar ta’ sikwit. Minkejja dan, il-fatt li
l-informazzjoni issa trid tiġi pprovduta aktar regolarment, kull xahar,
ifisser li l-affidabilità tagħha għandha tiżdied. Bħala konklużjoni ġenerali,
il-Kummissjoni hija tal-fehma li dan ir-rapport ma jiżvelax
biżżejjed elementi li f’dan l-istadju kienu jiġġustifikaw
proposta biex id-dispożizzjonijiet li hemm bħalissa jiġu
emendati. Madankollu, jekk fil-futur jitfaċċaw elementi ġodda,
il-Kummissjoni tista’ tikkunsidra mill-ġdid li temenda dawn id-dispożizzjonijiet. Anness Tabella 1: L-applikazzjoni
tal-possibbiltajiet 1. L-ebda deroga mid-dikjarazzjoni rikapitulattiva ta’ kull xahar || 2. Deroga mid-dikjarazzjoni rikapitulattiva ta’ kull xahar 2a. Deroga fakultattiva || 2b. Deroga mandatarja Qabel l-1 ta’ Jannar 2010(1) u minn dakinhar ’il quddiem || Mill-1 ta' Jannar 2010 ’l quddiem || Qabel l-1 ta’ Jannar 2010(1) u minn dakinhar ’il quddiem || Mill-1 ta' Jannar 2010 ’l quddiem || Qabel l-1 ta’ Jannar 2010(1) u minn dakinhar ’il quddiem || Minn Jannar 2010 ’l quddiem Il-Bulgarija Franza || Ċipru L-Estonja Il-Finlandja Il-Greċja Il-Latvja Il-Litwanja Ir-Rumanija Is-Slovenja || L-Awstrija L-Irlanda L-Italja || Il-Belġju Id-Danimarka Il-Ġermanja Il-Lussemburgu Malta Il-Polonja L-Isvezja Il-Pajjiżi l-Baxxi Ir-Renju Unit || Il-Portugall || Ir-Repubblika Ċeka L-Ungerija Is-Slovakkja Spanja (1) Għall-prodotti
biss Tabella 2: dikjarazzjonijiet
rikapitulattivi separati u magħqudin 1. Dikjarazzjoni rikapitulattiva separata || 2. Dikjarazzjoni rikapitulattiva magħquda 2a. Perjodiċità allinjata || 2b. Perjodiċità differenti Franza Il-Lussemburgu || L-Awstrija L-Italja Il-Belġju Il-Latvja Il-Bulgarija Il-Litwanja Ċipru Malta Ir-Repubblika Ċeka Il-Polonja Id-Danimarka Il-Portugall L-Estonja Ir-Rumanija Il-Finlandja Is-Slovakkja Il-Greċja Is-Slovenja L-Ungerija Spanja L-Isvezja || Il-Ġermanja L-Irlanda Il-Pajjiżi l-Baxxi Ir-Renju Unit Tabella 3: Preżentazzjoni fuq
il-karta u/jew elettronika tad-dikjarazzjonijiet rikapitulattivi Preżentazzjoni elettronika 1. Mandatarja || 2. Mandatarja iżda japplikaw xi eċċezzjonijiet || 3. Fakultattiva 1a. Qabel l-1 ta’ Jannar 2010 u minn dakinhar ’il quddiem || 1b. Mill-1 ta’ Jannar 2010 ’l quddiem || 2a. Qabel l-1 ta’ Jannar 2010 u minn dakinhar ’il quddiem || 2b. Mill-1 ta’ Jannar 2010 ’l quddiem Il-Bulgarija Il-Portugall Is-Slovenja Spanja || Ċipru(1) Ir-Repubblika Ċeka Id-Danimarka(1) L-Ungerija L-Italja il-Latvja(2) Malta Is-Slovakkja || L-Awstrija Il-Belġju Franza Il-Ġermanja Il-Greċja L-Irlanda Il-Pajjiżi l-Baxxi || Il-Finlandja Il-Lussemburgu Ir-Rumanija || L-Estonja Il-Litwanja Il-Polonja L-Isvezja Ir-Renju Unit (1)
Id-dikjarazzjonijiet korrettivi jistgħu jiġu ppreżentati fuq
il-karta; (2) Fl-1 ta’ Jannar 2011 u minn dakinhar ’il quddiem. [1] PricewaterhouseCoopers:
Expert study on the issues arising from a reduced time frame and the options
allowed for submitting recapitulative statements - Application of Article
263(1) of Directive 2006/112/EC (amended by Directive 2008/117/EC) [2] Id-deskrizzjoni
qasira hija meħuda mill-istudju tal-PwC.