KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL U LILL-QORTI TAL-AWDITURI

Sinteżi tal-kisbiet tal-ġestjoni tal-Kummissjoni fl-2011

1.           Introduzzjoni

L-Artikolu 317 tat-Trattat dwar il-Funzjonament tal-Unjoni Ewropea (TFUE), jagħti lill-Kummissjoni Ewropea r-responsabbiltà li timplimenta l-baġit tal-UE, fil-limiti tal-approprjazzjonijiet disponibbli u wara li tikkunsidra l-prinċipji ta' ġestjoni finanzjarja tajba. Huwa jipprevedi li l-Istati Membri jikkoperaw mal-Kummissjoni sabiex jassiguraw li l-approprjazzjonijiet jintużaw skont dawn il-prinċipji.

Bl-adozzjoni ta’ dan ir-Rapport Sinteżi, fuq il-bażi tal-assigurazzjonijiet u r-riżervi magħmula mid-Diretturi Ġenerali u l-Kapijiet tas-Servizzi fir-RAA tagħhom, il-Kummissjoni tieħu r-responsabbiltà politika globali għall-ġestjoni tal-baġit tal-UE.

Fir-Rapport ta' Sinteżi, il-Kummissjoni tidentifika wkoll il-kwistjonijiet amministrattivi ewlenin li għandhom jiġu indirizzati bi prijorità u l-azzjoni li għandha tittieħed biex jiġu indirizzati d-dgħufijiet identifikati.

Fl-2011, għar-raba' sena konsekuttiva, il-Qorti tat opinjoni pożittiva mhux ikkwalifikata dwar il-kontijiet ikkonsolidati tal-UE għall-2010. Fir-rigward tal-legalità u r-regolarità tal-pagamenti, il-Qorti stmat li r-rata ta' żball[1] għall-pagamenti in ġenerali hija bejn 2% u 5%, li jikkompara tajjeb mas-sitwazzjoni sal-2006, meta r-rata ta’ żball l-aktar probabbli kienet għadha 'l fuq minn 7%. Dan juri li l-miżuri meħuda maż-żmien għar-rimedju tad-dgħufijiet identifikati qed jaħdmu, u huwa xhieda tal-isforzi kontinwi li tagħmel il-Kummissjoni.

Il-Kummissjoni tifhem li l-Qorti ddeċidiet li tintroduċi tibdiliet fil-metodoloġija. Dawn it-tibdiliet jikkonċernaw ir-ridefinizzjoni tat-tranżazzjonijiet sottostanti fil-kampjun tal-verifika tagħha (minbarra l-prefinanzjament u jinkludi l-ikklerjar) kif ukoll il-metodu biex jiġu kkwantifikati irregolaritajiet serji fl-appalti pubbliċi fl-oqsma kollha tal-politika. Is-sena finanzjarja 2011 se sservi bħala sessjoni ta' prattika għall-metodoloġija l-ġdida tal-Qorti. L-approċċ il-ġdid li se jiġi applikat mill-2012 x'aktarx li mekkanikament iżid ir-rati ta' żball irrappurtati b'seħħ mill-2012.

Il-Kummissjoni tifhem li dawn it-tibdiliet se jkunu ġeneralment spjegati u r-rati ta' żball se jiġu ppreżentati fir-rapporti annwali f'tali mod li l-komparabbiltà mas-snin ta' qbel mhix se tintilef.    Il-Kummissjoni madankollu tinsab imħassba mill-impatt li jista' jkollha ż-żieda fir-rati ta' żball ippubblikata fuq l-ispiża tal-kontroll minħabba li dan jista’ lill-partijiet interessati biex jitolbu kontrolli addizzjonali u b'hekk jpoġġu aktar il-piż amministrattiv fuq il-benefiċjarji u fuq is-servizzi tal-Kummissjoni.

2.           It-Tisħiħ tas-sisien tal-assigurazzjoni

2.1.        Il-katina tar-responsabbiltà

Il-Kulleġġ jiddelega l-implimentazzjoni operazzjonali tal-objettivi politiċi u amministrattivi lid-Diretturi Ġenerali u lill-Kapijiet tas-Servizzi, li, bħala 'Uffiċjali Awtorizzanti permezz ta' Delega' (AODs) jirċievu l-mezzi biex jaġixxu. Din l-organizzazzjoni ta' ġestjoni deċentralizzata hija kkaratterizzata minn definizzjoni ċara tar-responsabbiltajiet tal-atturi differenti. L-AODs għandhom setgħa kompleta biex jiddefinixxu l-aktar sistema ta' kontroll xierqa u effettiva sabiex jiżguraw tmexxija soda u effiċjenti tar-riżorsi li għalihom huma responsabbli. Ir-RAA prinċipali huwa l-mezz li bih l-AOD jagħtu kont tal-ġestjoni tagħhom tar-riżorsi umani u finanzjarji li għalihom huma responsabbli. L-AODs jirrappurtaw fuq il-prestazzjoni tad-doveri tagħhom fir-RAA[2], li jinkludu dikjarazzjoni ffirmata ta’ assigurazzjoni li tkopri inter alia l-legalità u r-regolarità tat-tranżazzjonijiet finanzjarji. Ir-RAA huwa r-rapport li fih jiddokumentaw kwalunkwe kwistjoni li tqum mil-ġestjoni tagħhom li teħtieġ tinġieb għall-attenzjoni tal-Kulleġġ għar-rikonoxximent fil-livell politiku. Kull RAA jikkonferma b'mod espliċitu li l-Kummissarju/i responsabbli ġie/ġew informat(i) dwar l-aspetti ewlenin tar-RAA, fosthom dwar ir-riżervi li l-AOD beħsiebhom jagħmlu, qabel l-aħħar firma tad-dikjarazzjoni ta' assigurazzjoni.

Dan ir-Rapport Sinteżi jiġi adottat mill-Kulleġġ wara diskussjoni f'waħda mil-laqgħat ta’ kull ġimgħa tal-Kummissjoni

2.2.        Il-Kwalità tar-Rapporti Annwali tal-Attività

Ir-RAA jikkostitwixxu sors ewlieni ta' tagħrif għall-Qorti u għall-Awtorità tal-Kwittanza. Fir-rapport annwali tagħha għall-2010, il-Qorti evalwat il-kwalità ta' wieħed-u-għoxrin RAA tal-2010 minn total ta’ disgħa u erbgħin. Fl-opinjoni tal-Qorti, tnax-il RAA tal-2010 vverifikati 2010 jagħtu 'valutazzjoni ġusta tal-ġestjoni finanzjarja fir-rigward r-regolarità' u disgħa RAA tal-2010 vverifikati jagħtu valutazzjoni 'parzjalment' ġusta. Għal sebgħa minn dawk id-disa' RAA, il-Qorti kienet tal-opinjoni li l-ambitu jew skala ta' riżerva kellhom ikunu usa. Ir-RAA tal-2011 jispjegaw kif is-servizzi rilevanti ħadmu biex jindirizzaw il-kwistjonijiet enfasizzati mill-Qorti.

L-Istruzzjonijiet Permanenti għar-RAA tal-2011 ġew mirquma aktar biex tittejjeb il-kwalità tal-evidenza ppreżentata bħala sostenn għall-assigurazzjonijiet li saru, u biex ir-rapporti jkunu jistgħu jinqraw aħjar. L-analiżi tal-Kummissjoni turi li, ġeneralment, l-istruzzjonijiet riveduti ġew implimentati b’mod adegwat madwar il-Kummissjoni. Is-servizzi kollha rrappurtaw indikaturi ta' regolarità li jkopru l-oqsma baġitarji kollha sinifikanti u modi ta’ ġestjoni u dawk li rappurtaw avveniment sussegwenti dan għamluh b'konformità mal-linji gwida reveduti.

Il-Kummissjoni tinnota titjib kbir lejn determinazzjoni aktar oġġettiva u preċiża tal-ambitu tar-riżervi u l-iskopertura finanzjarja li tirriżulta.  Dawn it-titjibiet jinkludu konsistenza aħjar fl-użu tat-terminoloġija, fil-preżentazzjoni tar-rati ta’ żball, fil-kalkolu tal-ammont fir-riskju u l-applikazzjoni ta’ kriterji ta’ materjalità kif ukoll l-użu tal-aħjar tagħrif affidabbli disponibbli fil-qasam ta' ġestjoni kondiviża.

Fi tfittxija kontinwa għal titjib, is-servizzi ċentrali tal-Kummissjoni qed ikomplu jkunu involuti sa stadju bikri billi jagħtu appoġġ lid-DĠs fl-abbozzar tar-RAA, jiddiskutu kwistjonijiet ewlenin mad-Direttorati-Ġenerali u mas-Servizzi u jipprovdu l-gwida meħtieġa biex titjieb il-kwalità tat-testi finali. Għal darba oħra, il-(pre)reviżjoni bejn il-pari wriet li hija pjattaforma effettiva għas-servizzi differenti, bħala pari, biex jikkondividu l-fehmiet tagħhom dwar il-formulazzjoni ta' għadd ta' kwistjonijiet trasversali fir-RAA tagħhom, kif jiġi żgurat approċċ koerenti u kif id-dgħufijiet identifikati jkunu jistgħu jiġu indirizzati b'mod xieraq.

Ir-RAA huma l-mezz prinċipali li permezz tiegħu l-AOD jiddokumentaw ir-responsabbiltà tagħhom lill-Kulleġġ u huma sors ta' evidenza għad-Dikjarazzjoni ta’ Assigurazzjoni (DAS). Il-Kummissjoni hija impenjata li tibqa' ttejjeb il-leġġibbiltà u l-komparabbiltà tar-RAA. Il-Kummissjoni tagħti struzzjonijiet lis-Segretarjat Ġenerali u lid-Direttorat-Ġenerali għall-Baġit sabiex kontinwament jipprovdu gwida lid-Direttorati-Ġenerali u s-Servizzi, permezz ta' analiżi regolari tal-Istruzzjonijiet Permanenti, noti ta’ gwida, miżuri ta’ taħriġ, analiżi tal-kwalità tal-abbozzi tar-RAA u laqgħat ta' (pre-) analiżi mill-pari.

2.3.        Rappurtar fuq ir-rati ta' żball

Id-Diretturi Ġenerali jinkludu riżervi fid-dikjarazzjonijiet ta’ assigurazzjoni tagħhom abbażi tal-valutazzjoni tagħhom tal-materjalità tad-dgħufijiet u/jew osservazzjonijiet rigward l-elementi kostitwenti tar-RAA tagħhom. Element ewlieni użat sabiex jiddetermina jekk riżerva hix meħtieġa jew le hija evalwazzjoni ta' skopert jew tar-rati ta' żball irrappurtati u l-iskopertura finanzjarja relatata.

Id-dipartimenti tal-Kummissjoni jużaw approċċi differenti biex jikkunsidraw u jikkalkolaw ir-rati residwi ta' żball, li jikkunsidraw l-ispeċifiċitajiet tal-oqsma tal-politika li għalihom huma responsabbli. Kulfejn possibbli, is-Segretarju Ġenerali u d-Direttur-Ġenerali għall-Baġit ħeġġew l-armonizzazzjoni ta' aspetti differenti, partikolarment l-użu tar-rata residwa tal-iżbalji. L-Istruzzjonijiet Permanenti għalhekk ġew imsaħħa biex jassiguraw l-użu konsistenti ta’ terminoloġija u kriterji mis-servizzi kollha, rigward ir-rata residwa tal-iżbalji, l-użu ta' approċċ multiannwali, u l-kunċett ta’ 'avvenimenti sussegwenti' (avvenimenti li jiġru bejn tmiem is-sena u l-firma tar-rapport mill-AOD fi tmiem Marzu).

Numru kbir ta DĠ diġà daħħlu approċċ multiannwali fir-rappurtar ta’ żbalji. Il-Kummissjoni tagħti struzzjonijiet lis-Servizzi l-oħra li joperaw programmi multiannwali biex fir-RAA tagħhom jiżvelaw ir-riskju finanzjarju kumulattiv taħt l-istrateġija ta' kontroll multiannwali, hekk li mill-2012 'il quddiem dan se jkun l-uniku approċċ.

Matul is-sena ta' rappurtar, id-DĠs għall-Fondi Strutturali ħadmu fuq approċċ ġdid u komuni għad-determinazzjoni tal-materjalità. Id-deċiżjoni dwar jekk issirx riżerva hija issa bbażata fuq approċċ maqsum fuq tliet stadji:

- evalwazzjoni tas-sistemi nazzjonali ta' ġestjoni u ta' kontroll;

- jittieħed kont sħiħ tar-rati ta’ żball ipproġettati kif misjuba mill-awtoritajiet nazzjonali u rrappurtati fir-Rapporti Annwali ta’ Kontroll, meta dawn jistgħu jiġu validati, minflok bl-użu tal-stimi predefiniti tal-livelli ta’ żball;[3] u

- l-applikazzjoni ta' riskju residwu kumulattiv għal kull programm, biex jimmonitorja l-kapaċità korrettiva tas-sistemi ta' ġestjoni u kontroll multiannwali.

Dan l-approċċ ifisser ukoll li r-RAA jiżvelaw ir-riżultati tal-valutazzjoni tal-Kummissjoni dwar is-sistemi ta’ kontroll tal-programmi operazzjonali kollha, filwaqt li tqis il-livelli differenti ta' assigurazzjoni u l-opinjonijiet ta' verifika nazzjonali. Dan huwa skont il-prinċipju tal-Verifika Unika u jenfasizza wkoll il-fatt li l-Istati Membri huma responsabbli għal kontroll tal-ambjent tagħhom stess.

Il-Kummissjoni tqis dawn l-isforzi biex tarmonizza l-kriterji tal-materjalità bħala titjib importanti li jikkontribwixxi għall-koerenza, il-leġġibbiltà u t-trasparenza tar-RAA. Hija tagħti struzzjonijiet lid-Direttorati Ġenerali għall-Politika Reġjonali, għall-Impjiegi, għall-Affarijiet Soċjali u l-Inklużjoni, għall-Agrikoltura u l-Iżvilupp Rurali, għall-Affarijiet Marittimi u s-Sajd biex ikomplu din l-armonizzazzjoni u biex jiftiehmu dwar sett uniku ta’ kriterji u preżentazzjoni għar-RAA tal-2012. Id-Direttorat-Ġenerali għall-Affarijiet Interni, għalkemm għandu bażijiet legali differenti,  għandu jkun assoċjat kemm jista' jkun ma' dan il-proċess ta' armonizzazzjoni.

2.4.        Il-Verifika Interna

Il-Kumitat dwar il-Progress tal-Verifika (KPV) kompla jinforma lill-Kulleġġ dwar kwistjonijiet ta' verifika, inklużi kwistjonijiet b′dimensjoni korporattiva. Il-KPV informa wkoll lill-Kulleġġ dwar il-progress miksub sa tmiem l-2011 fl-implimentazzjoni ta' rakkomandazzjonijiet ta' verifiki aċċettati. Ġew implimentati 80% tar-rakkomandazzjonijiet kollha aċċettati fil-perjodu 2007-2011. Minn 118-il rakkomandazzjoni importanti pendenti fl-aħħar tal-2011, 24 biss kienu skadew b’iktar minn 6 xhur meta mqabbla mad-data fil-mira ppjanata inizjalment

F'Mejju tal-2011, is-Servizz tal-Awditjar Intern tal-Kummissjoni ppreżenta r-Rapport Annwali tal-Awditjar Intern tal-2011 kif inhu stipulat skont l-Artikolu 86(3) tar-Regolament Finanzjarju. Huwa akkumpanja t-tieni Opinjoni Ġenerali tas-Servizz tal-Awditjar Intern tal-Kummissjoni . L-opinjoni hija msejsa fuq il-ħidma li saret mill-Kapaċitajiet tal-Awditjar Intern u mis-Servizz tal-Awditjar Intern matul il-perjodu bejn l-2009 u l-2011 bħala parti mill-pjan tal-awditjar strateġiku kkoordinat. Huwa jiffoka fuq il-ġestjoni finanzjarja.

L-Opinjoni Ġenerali tipprovdi opinjoni pożittiva dwar il-ġestjoni finanzjarja fil-Kummissjoni bl-eċċezzjoni ta’ dawk l-oqsma li fuqhom ġew espressi riservi minn Diretturi Ġenerali fir-Rapporti tal-Attività Annwali tagħhom. L-impatt finanzjarju potenzjali stmat ta' dawn ir-riżervi huwa anqas minn 2% tal-baġit kollu iżda mhux ir-riżervi kollha huma kwantifikabbli iżda jirrappreżentaw riskji potenzjali għar-reputazzjoni.

Il-Kummissjoni tinnota wkoll li fl-"Enfasi dwar Kwistjoni" mehmuż mal-Opinjoni Ġenerali, is-Servizz tal-Awditjar Intern jenfasizza għadd ta' kwistjonijiet li jeħtieġ jiġu indirizzati mis-servizzi tal-Kummissjoni:

- Il-ħtieġa ta' aktar armonizzazzjoni tal-kalkolu tar-rata residwa ta' iżball madwar il-Kummissjoni;

- Dgħjufijiet identifikati fl-għajnuna esterna fir-rigward ta’ sejħiet għal proposti ċentralizzati u deċentralizzati, u b'mod partikolari, il-ħtieġa li jitjieb l-ippjanar, ir-rappurtar u l-monitoraġġ tal-kontrolli eżerċitat mid-Delegazzjonijiet tal-UE fil-qasam tal-ġestjoni tal-għotjiet;

- Oqsma tal-politika fejn ir-riskju ta' żball għadu għoli wisq u problemi partikolari assoċjati mal-ġestjoni kondiviża fil-qasam tal-Politika ta’ Koeżjoni;

- Il-ħtieġa ta' koordinazzjoni u armonizzazzjoni aħjar fl-istrateġiji ta’ kontroll fil-livell tal-familji ta' politika, partikolarment il-programmi għal kontrolli fuq il-post fid-DĠ li jikkonċernaw il-politika tar-riċerka;

- In-nuqqasijiet fis-sistemi ta' kontroll fl-Istati Membri, partikolarment il-verifiki tal-ewwel livell fuq talbiet mis-servizzi responsabbli għall-implimentazzjoni skemi ta’ għajnuna;

- Miżuri li fi tmiem l-2011 kienu għadhom fil-proċess li jiġu implimentati, biex jindirizzaw xi riskji sinifikanti, bħat-titjib fil-governanza, il-ġestjoni tal-proġetti u kontabilità ta’ assi fissi għal Sistemi tas-Satelliti tan-Navigazzjoni Globali (GNSS); Tittejjeb l-effettività ta' kontrolli ex-ante fuq talbiet imħallsa fil-qasam tar-riċerka; L-iżviluppi fl-IT jiġu ġestiti bil-għan li tiġi evitata d-duplikazzjoni; monitoraġġ minn ħafna servizzi ta' skadenzi għall-pagamenti u l-implimentazzjoni ta' strateġija kontra l-frodi.

3.           L-assigurazzjoni miġbura permezz tar-RAA u r-riżervi li saru mid-Diretturi Ġenerali

Wara li eżaminat ir-RAA, b'mod partikolari d-dikjarazzjonijiet iffirmati minn kull Direttur Ġenerali, il-Kummissjoni tinnota li huma kollha taw assigurazzjoni raġonevoli fir-rigward tal-użu adegwat ta' riżorsi għall-iskop intenzjonat tagħhom, tal-konformità mal-prinċipji ta' ġestjoni finanzjarja tajba u tal-fatt li l-proċeduri ta' kontroll li ntużaw jagħtu l-garanziji meħtieġa rigward il-legalità u r-regolarità tat-tranżazzjonijiet sottostanti. Xi AODs żvelaw nuqqasijiet residwi u għamlu riżervi fir-RAA tagħhom, mingħajr ma xeħtu dubju fuq l-assigurazzjoni ġenerali mogħtija.

Erbatax-il Direttur-Ġenerali u żewġ Diretturi ta’ Aġenziji Eżekuttivi ħarġu total ta' sebgħa u għoxrin riżerva fir-RAA tagħhom tal-2011. Saru riżervi fi 17-il servizz, li flimkien huma responsabbli għal aktar minn 90% tal-operazzjonijiet finanzjarji tal-Kummissjoni (infiq u dħul). Dawn kienu jinkludu erbatax mis-sbatax-il riżerva li kienu diġà saru fl-2010 u li sa tmiem l-2011 kienet għadha għaddejja azzjoni dwarhom, flimkien ma' tlettax-il riżerva ġdida. Tliet riżervi tal-2010 tneħħew.

L-ammont totali f’riskju kif kwantifikat fir-riżervi żdied b'mod sinifikanti, minn EUR 600 miljun fir-RAA tal-2010 għal potenzjal massimu ta’ EUR 3 564 miljun[4] for-RAA tal-2011. Din iż-żieda fin-numru ta’ riżervi monetarji u fi skoperta monetarja għall-ammonti f'riskju ma tirriżultax minn deterjorament fil-kwalità tal-ġestjoni finanzjarja fil-Kummissjoni. Huwa pjuttost minħabba l-effett ikkumbinat ta' għadd ta' fatturi tekniċi u strutturali:

- Fost dawn is-sebgħa u għoxrin riżerva, sitta jikkonċernaw l-istess kwistjoni u l-istess programm (FP7). Dan għaliex is-Seba' Programm Kwadru (FP7), li fl-2011 kiseb momentum (ara Kapitolu 3.5), huwa ġestit minn ħames Direttorati Ġenerali u Aġenzija Eżekuttiva waħda u għalhekk iwassal għal riżervi multipli.

- Il-punt relattiv ta' maturità fiċ-ċiklu ta' implimentazzjon tal-baġit multiannwali:  

· f'ġestjoni diretta, il-ġenerazzjoni ta' programmi 2007-2013 s'issa laħqu livell ta' implimentazzjoni li jippermetti li jinġibdu konklużjonijiet minn verifiki ex-post (li jispjega l-introduzzjoni tar-riżerva FP7 għar-riċerka);

· f'ġestjoni kondiviża, l-Istati Membri jibdew jirrappurtaw ir-riżultati tal-verifika minn kampjun ikbar ta' programmi operazzjonali kontinwi (li parzjalment jispjega ż-żieda fl-ambitu tar-riżervi tad-Direttorat-Ġenerali għall-Politika Reġjonali);

· il-maġġoranza tal-programmi tal-2007-2013 issa jinsabu għal kollox operattivi. Żieda fil-livell tal-implimentazzjoni tal-programmi 2007-2013 twassal għal volumi ogħla ta' pagamenti u għalhekk għandhom riskju inerenti ogħla ta' żbalji meta mqabbla mas-snin preċedenti.

- Fil-Politika tal-Koeżjoni, is-sostituzzjoni (ara l-Kapitolu 3.3) ta’ stimi ta' ġestjoni b'rata fissa bid-dejta attwali ta' żball irrappurtata mill-awtoritajiet ta' verifika fl-Istati Membri rriżultat f’valutazzjoni aħjar tar-riskji ta' regolarità, iżda dan kien ifisser ukoll li għadd ogħla ta’ programmi jaqgħu taħt ir-riserva, b'ammonti akbar fil-periklu.

- Il-linji gwida ġodda dwar kif għandu jiġi kkunsidrat il-prefinanzjament għall-kalkolu tar-rati ta' żball reżidwu u l-ammonti fir-riskju jirrikjedu li s-servizzi jinkludu l-prefinanzjament preċedenti li ġie approvat flimkien mal-pagamenti tal-bilanċ finali u interim, u b'hekk iżżommhom milli jaggregaw 'l isfel ir-rati ta’ żball misjuba fil-pagamenti interim u finali bin-nefqa ta' prefinanzjament il-ġdid li għalihom ir-rata ta' żball għadha żero.

- Għal għadd ta’ programmi, ir-riskju ta' regolarità huwa qrib ferm tal-limitu tal-materjalità ta' 2%. Varjazzjonijiet żgħar ħafna minn sena għal sena, fir-rata ta’ żball misjuba madwar il-limitu maż-żmien jirriżultaw f'riżervi intermittenti.

Id-Diretturi-Ġenerali u lill-Kapijiet tas-Servizzi kollha identifikaw ir-raġunijiet ewlenin għal r-riservazzjoni tiegħu/tagħha u stabbilixxew azzjonijiet ta' rimedju biex jindirizzawhom. Ġeneralment, l-aktar tħassib komuni jikkonċerna r-regoli ta' eliġibbiltà kumplessi għal benefiċjarji ta' għotjiet (kwistjoni li tolqot il-fondi ġestiti b'mod ċentralizzat dirett) u mill-applikazzjoni żbaljata ta' regoli tal-akkwist pubbliku (kawża frekwenti ta' żbalji fil-fondi kondiviżi u ġestiti indirettament). Il-Kummissjoni fasslet konklużjonijiet operattivi minn din l-esperjenza u għamlet proposti għal simplifikazzjoni maġġuri (ara l-Kapitolu 4.5 hawn taħt) fil-ġenerazzjoni li jmiss tal-programmi.

Wara valutazzjoni tar-riżultati tal-kontroll, tneħħew tliet riżervi li kienu ġew riportati mis-snin ta' qabel. Biex titneħħa riżerva, l-AODs intalbu jippreżentaw il-miżuri li ġew stabbiliti biex jindirizzaw id-dgħufijiet identifikati, biex juru li l-miżuri kienu tassew effettivi u li d-dgħufijiet ġew indirizzati b'mod effettiv. Fil-parti l-kbira tal-każi, dan jitlob evidenza għall-awditjar li r-rati ta' żball kienu naqsu għal livell aċċettabbli jew li s-sistemi ssaħħew u qegħdin jiffunzjonaw kif suppost.

3.1.        Dħul

Riżorsi proprji tradizzjonali (RPT) jirrappreżentaw 12.2% tad-dħul totali għall-baġit tal-UE għall-2011. Dawn huma stabbiliti u miġbura mill-Istati Membri. Tliet kwarti minn dawn l-ammonti jitħallsu lill-baġit tal-UE, filwaqt li l-kwart li jifdal jinżamm mill-Istati Membri biex ikopri l-ispejjeż tal-ġbir. Minħabba l-pożizzjoni ġeografika tiegħu, il-Belġju huwa kontributur ewlieni għall-RPT, u fl-2011 akkonta għal 9,45% tal-RPT totali. L-ispezzjonijiet imwettqa mill-Kummissjoni u l-verifiki mwettqa mill-Qorti enfasizzaw kwistjoni ta' rikonċiljazzjoni bejn l-ammonti trasferiti u rekords sottostanti. Id-Direttur-Ġenerali għall-Baġit għamel riżerva dwar assigurazzjoni insuffiċjenti dwar l-affidabbiltà tas-sistemi ta' rilaxx u tal-kontabilità Belġjani. Il-Kummissjoni talbet azzjoni ta' rimedju, inkluż it-tisħiħ tal-kontrolli interni u verifiki esterni fuq skala totali tas-sistema tal-kontijiet. Sadanittant, hemm inċertezza rigward il-korrettezza tal-ammonti tal-RPT Belġjani kkreditati fil-kont tal-Kummissjoni. 

Il-Kummissjoni tfakkar l-impenji li daħlu għalihom l-awtoritajiet tal-Istati Membri kkonċernati fir-rigward tal-pjani ta' azzjoni mfassla biex jirrimedjaw in-nuqqasijiet identifikati fis-sistemi ta' pproċessar tad-dikjarazzjonijiet tad-dwana tagħhom, u ttenni li se tissorvelja mill-qrib u b'mod strett l-implimentazzjoni tagħhom.

3.2.        L-Agrikoltura u r-Riżorsi Naturali

Fir-rapport annwali tagħha għall-2010, il-Qorti kkonkludiet, abbażi tal-istima tar-rata ta’ żball[5] ta' ftit aktar minn 2%, li l-Kapitolu Agrikoltura u Riżorsi Naturali kien milqut minn żball materjali. Fl-istess ħin, hija indikat li l-pagamenti diretti koperti mis-Sistema Integrata ta' Amministrazzjoni u Kontroll (IACS), li jirrappreżentaw 91,4% tan-nefqa totali tal-FAEG, kienu ħielsa minn żbalji materjali.

Fir-RAA tiegħu għall-2011, id-Direttur Ġenerali għall-Agrikoltura u l-Iżvilupp Rurali għamel tliet riżervi.

- Minħabba l-importanza tal-IACS għall-ġestjoni u l-kontroll tan-nefqa agrikola, u n-nuqqasijiet serji tal-IACS fil-Bulgarija u l-Portugall, ir-riżerva tal-2010 ġiet riportata għal raġunijiet ta’ reputazzjoni, anke jekk l-impatt finanzjarju tan-nuqqasijiet ma jaqbiżx il-limitu tal-materjalità. Fl-2010, din ir-riżerva kopriet il-Bulgarija, ir-Rumanija u l-Portugall. Fl-2011, ir-riżerva għar-Rumanija tneħħiet minħabba li l-verifiki tal-Kummissjoni ddeterminat li l-pjan ta’ azzjoni Rumen kien tlesta u li x-xogħol magħmul kien meqjus xieraq.

- Riżerva ġdida dwar in-nefqa għal miżuri ta' żvilupp rurali globali saret minħabba li r-rata residwali ta' żball (sa 2,36%) kienet ikkunsidrata kemmxejn 'l fuq mil-limitu tal-materjalità fl-2011. Din iż-żieda fir-rata ta' żball hija prinċipalment minħabba li l-iżvilupp rurali huwa suġġett għal għadd kbir u/jew kumpless ta' kondizzjonijiet previsti fil-programmi li jżidu r-riskju tal-iżbalji mill-benefiċjarji u b'hekk il-kontrolli mill-awtoritajiet nazzjonali isiru aktar diffiċli u kostużi.

- Saret riżerva rigward ir-reputazzjoni għal nuqqasijiet fis-superviżjoni u l-kontroll ta’ prodotti organiċi ċċertifikati. Avvenimenti fl-2011 urew li l-kontrolli fis-settur tal-biedja organika huma kkunsidrati bħala insuffiċjenti u li jista’ jkun hemm dgħjufijiet fis-superviżjoni tal-UE rigward is-sistemi ta' kontroll tal-Istati Membri u pajjiżi terzi, inkluża s-superviżjoni tal-korpi tal-kontroll li jiċċertifikaw prodotti organiċi għall-importazzjoni fl-UE.

Id-Direttur Ġenerali għall-Affarijiet Marittimi u s-Sajd sostniet fuq ir-riżerva tagħha rigward l-Istrument Finanzjarju għall-Gwida tas-Sajd (SFGS) fir-rigward ta' programm wieħed fil-Ġermanja, għal liema se tkun meħtieġa korrezzjoni iżda li hija pendenti minħabba eżerċizzju ta' valutazzjoni.

Id-Direttur-Ġenerali għall-Affarijiet Marittimi u s-Sajd ħarġet riżerva ġdida dwar il-Fond Ewropew għas-Sajd u sistemi ta' ġestjoni u kontroll u investimenti abbord, minħabba li kienu ġew identifikati żbalji fir-rigward tal-eliġibbiltà tan-nefqa, u kien ġie stabbilit li l-Istati Membri ma jivverifikawx biżżejjed jekk l-investimenti abbord iżidux il-kapaċità tal-bastimenti biex jaqbdu l-ħut.

Id-Direttur-Ġenerali għall-Azzjoni Klimatika sostna r-riżerva preċedenti tiegħu minħabba l-ħsara għar-reputazzjoni tal-Kummissjoni minħabba ksur sinifikanti tas-sigurtà fir-reġistri nazzjonali tas-Sistema tal-UE għall-Iskambju ta' Kwoti tal-Emissjonijiet (ETS).

Id-Direttur-Ġenerali għas-Saħħa u l-Konsumaturi ħareġ riżerva dwar il-preċiżjoni tal-pretensjonijiet għall-ispejjeż tal-Istati Membri taħt il-programmi għall-qerda u l-monitoraġġ tal-mard tal-annimali fil-qasam ta' politika li jirrigwarda l-ikel u l-għalf . Is-sorsi ewlenin tal-iżbalji misjuba huma pretensjonijiet għall-ispejjeż minn Stati Membri li ma jkunux japplikaw b'mod korrett ir-regoli tal-eliġibilità stabbiliti fil-leġiżlazzjoni. Bil-għan li jnaqqas ir-rata ta' żball fil-qasam tal-għalf u tal-ikel, id-Direttur-Ġenerali għas-Saħħa u l-Konsumaturi kien diġà ħat għadd ta' passi fis-snin preċedenti. Pereżempju, definizzjoni aktar preċiża u restrittiva ta’ spiża eliġibbli ġiet introdotta b’deċiżjoni tal-Kummissjoni għal programmi veterinarji b'seħħ mill-1 ta’ Jannar 2011. L-introduzzjoni ta' somom f'daqqa mill-2012 se tkompli tnaqqas l-iżbalji li saru fil-pretensjonijiet għall-ispiża li jsiru mill-Istati Membri fis-snin li ġejjin.

3.3.                  Il-Koeżjoni, l-Enerġija u t-Trasport

Għal ħafna snin, il-Politika ta’ Koeżjoni kellha livell ta' stima tal-iżball ogħla mill-oqsma ta' politika l-oħrajn. Fl-2010, il-Qorti stmat ir-rata ta’ żball l-aktar probabbli għal dan il-Kapitolu għal 7,7%. Ir-rata ta’ żball misjuba hija suġġett għal varjazzjonijiet minn sena għall-oħra u hija influwenzata mill-istadju relattiv taċ-ċiklu tal-implimentazzjoni multiannwali. L-2010 kienet l-ewwel sena fejn il-parti l-kbira tal-programmi taħt il-qafas regolatorju attwali kienu għaddejjin bis-sħiħ, u bosta mill-awtoritajiet nazzjonali kienu implimentaw proġetti u ddikjaraw nefqa, b’hekk żiedu r-riskju inerenti ta' żbalji.

Id-Direttur Ġenerali għall-Politika Reġjonali ħareġ żewġ riżervi: waħda riżerva ta' reputazzjoni fuq is-sistemi ta' ġestjoni u kontroll għal programmi operazzjonali identifikati fil-Ġermanja, l-Ungerija, l-Irlanda, l-Italja, Spanja u għal programmi transkonfinali taħt il-FEŻR/Fond ta' Koeżjoni għall-perjodu 2000-2006; u oħra dwar is-sistemi ta' ġestjoni u kontroll tal-FEŻR/Fond ta’ Koeżjoni għal programmi operazzjonali identifikati fi tmintax-il Stat Membru[6], sistemi ta’ ġestjoni u kontroll tal-IPA f'Dik li kienet ir-Repubblika Jugoslava tal-Maċedonja u programmi ta' Kooperazzjoni Territorjali Ewropej, u programm għall-kooperazzjoni tal-IPA[7]/transkonfinali għall-perjodu 2007-2013.

Id-Direttur Ġenerali għall-Impjiegi, l-Affarijiet Soċjali u l-Inklużjoni għamel żewġ riżervi: waħda tikkonċerna s-sistemi ta' ġestjoni u kontroll għal programmi operazzjonali identifikati fil-Ġermanja, Franza, l-Italja u Spanja taħt il-FSE 2000-2006, u l-oħra għal programmi operazzjonali identifikati fil-Belġju, ir-Repubblika Ċeka, il-Ġermanja, l-Italja, il-Latvja, il-Litwanja, ir-Rumanija, is-Slovakkja, Spanja u r-Renju Unit skont il-FSE 2007-2013 kif ukoll għall-programm IPA għal dik li kienet il-Repubblika Jugoslava tal-Maċedonja. Iż-żewġ riżervi b'segwitu għan-nuqqasijiet serji f'aspetti ewlenin tas-sistemi ta' ġestjoni u kontroll tal-programmi operazzjonali identifikati.

Dawn in-nuqqasijiet marbuta mar-riżervi għaż-żewġ Direttorati Ġenerali jirrigwardaw, pereżempju, attivitajiet ta’ ċertifikazzjoni, rati għolja ta' żball, konformità mar-regoli tal-akkwist pubbliku, ir-regoli ta' eliġibbiltà, verifiki ta' ġestjoni jew nuqqas ta’ rendikont tal-entrati.

Il-Kummissjoni se tkomplu b'mod rigoruż l-eżerċizzju tar-rwol ta' superviżjoni tagħha billi ssejjaħ lill-Istati Membri biex jindirizzaw immedjatament id-defiċjenzi misjuba fis-sistemi ta’ ġestjoni u kontroll tagħhom u wkoll permezz tal-interruzzjoni jew is-sospensjoni f'waqthom tal-pagamenti kif ukoll billi meta meħtieġ tagħmel korrezzjonijiet finanzjarji. Il-Kummissjoni ser tiffoka l-isforzi tagħha fuq dawn l-oqsma, permezz ta' azzjoni preventiva u korrettiva konġunta. Fir-reviżjoni triennali tar-Regolament Finanzjarju, kif ukoll fil-proposti speċifiċi għas-settur, il-Kummissjoni pproponiet li l-awtoritajiet nazzjonali akkreditati jipprovdu dikjarazzjoni annwali ta' assigurazzjoni tal-ġestjoni għall-programmi kollha taħt ġestjoni kondiviża kif diġà huwa l-każ għall-politika agrikola.

Id-Direttorati-Ġenerali ta’ koeżjoni jipprovdu kwantifikazzjoni tar-riżervi permezz ta' rappurtar tal-ammont ġenerali stmat li hu fir-riskju u billi jagħmlu stima tar-riskju finanzjarju:

- L-ammont ġenerali stmat li hu fir-riskju (abbażi tar-rata ta' żball validata) tirreferi għall-kwantifikazzjoni ta' żbalji bħala persentaġġ tal-pagamenti interim tal-2011 għall-programmi 2007-2013 kollha u huwa kkalkolat mill-Kummissjoni abbażi tal-awditjar tal-operazzjonijiet imwettqa mill-Awtoritajiet tal-Verifika u r-rati ta' żbalji rrapportati fir-Rapporti Annwali ta' Kontroll tagħhom għall-2011, wara validazzjoni mid-Direttorati Ġenerali kkonċernati. L-ammont fir-riskju huwa bejn 3.1% u 6.8% għad-Direttorat-Ġenerali għall-Politika Reġjonali u bejn 2% u 2.5% għal id-Direttorat-Ġenerali għall-Impjiegi, l-Affarijiet Soċjali u l-Inklużjoni.

- L-istima tar-riskju finanzjarju tirreferi għall-impatt tal-programmi għall-perjodu 2007-2013 fejn id-Direttorati-Ġenerali kkonċernati ma għandhomx assigurazzjoni raġonevoli u għalhekk għamlu riżerva. L-impatt finanzjarju stmat tar-riżervi huwa bejn EUR 632 miljun u EUR 1 427 miljun għad-Direttorat-Ġenerali għall-Politika Reġjonali u huwa ta’ EUR 59 miljun għad-Direttorat-Ġenerali għall-Impjiegi, l-Affarijiet Soċjali u l-Inklużjoni. Dawn l-ammonti jikkorrispondu rispettivament għal 2.1% sa 4.8% u 0,6% tal-pagamenti magħmula fl-2011.

B'mod ġenerali, il-kwantifikazzjoni tar-riżervi fl-RAA tad-Direttur-Ġenerali għall-Politika Reġjonali u d-Direttur-Ġenerali għall-Impjiegi, l-Affarijiet Soċjali u l-Inklużjoni mhumiex direttament komparabbli mar-rati ta' żball konsolidati għall-Politika ta’ Koeżjoni kif stmati mill-Qorti fir-Rapport Annwali tagħha. Id-differenzi ewlenin jirrigwardaw:

- It-taħlita tal-programmi li jiġu ttestjati jistgħu jkollhom impatt fuq ir-riżultati tat-test: Il-Qorti qed tibbaża l-kalkolu tagħha fuq kampjun rappreżentattiv ta’ transazzjonijiet (pagamenti) u qed testrapola dan għan-nefqiet kollha taħt il-Politika ta’ Koeżjoni filwaqt li r-rati ikkalkulati mill-Kummissjoni huma speċifiċi għall-Fond u jkopru kull programm jew gruppi tal-programmi mħaddma taħt sistemi ta' ġestjoni u kontroll identiċi.

- Id-differenza fiż-żmien: l-ammont fir-riskju huwa kkalkolat mill-Kummissjoni fi stadju iktar tard fiċ-ċiklu tal-kontroll meta mqabbel mar-rata ta' żball irrapportata mill-Qorti. B'osservanza tar-regolamenti rilevanti, ir-Rapporti ta’ Kontroll Annwali sottomessi mill-Istati Membri jikkonċernaw in-nefqa tal-2010 filwaqt li r-rata ta' żball irrappurtata annwalment mill-Qorti hija kkalkulata abbażi tal-iżbalji identifikati fis-sena konċernata.

- Il-Kummissjoni timplimenta strateġiji ta' kontroll multiannwali, għaldaqstant l-AOD jevalwaw il-funzjonament tas-sistemi ta' kontroll. B’kuntrast, il-Qorti hija meħtieġa tesprimi opinjoni ta' verifika annwali. Filwaqt li r-riskju ta' irregolaritajiet f'għadd ta' programmi jista' jitqies li qiegħed taħt kontroll fuq bażi multiannwali, dan jista' jkun ferm ogħla mill-istimi tal-medji f'għadd ta' programmi u Stati Membri meta dawn jinħadmu fuq bażi annwali. Għal din ir-raġuni, huwa għal kollox iġġustifikat li l-ammont fir-riskju rrappurtati fir-RAA mis-servizzi tal-Kummissjoni għal azzjonijiet strutturali iqis id-diversi azzjonijiet mitiganti u korrettivi fis-seħħ taħt il-ġestjoni multiannwali u s-sistemi ta' kontroll (li jippermetti li jsiru korrezzjonijiet xi snin wara l-pagament ta' fondi mill-Istat Membru lill-benefiċjarji u mill-Kummissjoni lill-Istat Membru). Għaldaqstant, ir-rata ta' żbalji fid-DAS tal-Qorti hija tipikament ogħla, għaliex tinkludi żbalji li jkunu jistgħu jiġu kkoreġuti fis-snin ta' wara ladarba jkunu intervjenew l-atturi kollha involuti fil-katina ta' kontroll.

- Il-kwantifikazzjoni tar-rati ta’ żball kultant hija bbażata fuq suppożizzjonijiet differenti speċjalment fejn il-valur reali tal-iżball mhuwiex magħruf. Pereżempju, għall-kuntrarju is-servizzi tal-Kummissjoni, il-Qorti tikkwantifika ksur serju tar-regoli tal-akkwist pubbliku fuq il-valur sħiħ tal-kuntratt, filwaqt li t-telf ekonomiku reali tal-baġit tal-UE huwa limitat għall-marġini ta’ profitt addizzjonali għal kuntratturi li jibbenefikaw minn tali ksur.

Is-servizzi tal-Kummissjoni analizzaw l-iżbalji misjuba mill-Qorti għas-snin 2006-2009 u ppreżentaw l-analiżi tagħhom f’dokument ta' ħidma[8]. Dan id-dokument juri li n-nuqqas ta’ konformità mal-kriterji ta’ eliġibbiltà u żbalji fir-regoli tal-akkwisti pubbliċi jew proċeduri huma t-tipi ta' żbalji l-aktar komuni misjuba fil-Politika ta' Koeżjoni. Rendikonti tal-entrati inadegwati u kalkoli mhux korretta tar-rata ta’ kofinanzjament għal proġetti li jiġġeneraw dħul huma wkoll sorsi ta' żball. L-analiżi mwettqa turi li l-għażla tal-proġetti u spejjeż ineliġibbli huma l-iżbalji ewlenin ta’ eliġibbiltà, filwaqt li fl-appalt pubbliku s-sorsi ewlenin ta’ żball huma l-valutazzjoni tal-offerti, l-użu ta’ proċeduri ta’ offerti mhux xierqa, u kwistjonijiet ta' pubblikazzjoni.

Fl-2011, il-Kummissjoni għamlet proposti għall-qafas finanzjarju multiannwali li jmiss, inkluż tisħiħ sinifikanti, partikolarment fil-ġestjoni kondiviża (li tikkostitwixxi madwar 80% tal-baġit), bil-ħsieb li jitjieb it-tfassil tal-iskemi ta’ finanzjament, li jiġi indirizzat ir-riskju ta' żball, jiġi limitat il-piż amministrattiv għall-benefiċjarji u partijiet interessati oħra u jitnaqqsu l-ispejjeż operazzjonali tal-kontrolli. Bħala parti mir-reviżjoni tar-Regolament Finanzjarju, il-Kummissjoni pproponiet l-introduzzjoni ta' dikjarazzjonijiet annwali tal-ġestjoni ta' assigurazzjoni mill-korpi akkreditati għall-programmi kollha taħt ġestjoni kondiviża kif diġà huwa l-każ għall-politika agrikola.

Fil-proposti tagħha għall-politika ta' koeżjoni għall-2014-2020 il-Kummissjoni pproponiet ukoll li tkompli ttejjeb il-ġestjoni finanzjarja u r-regolarità tan-nefqa tal-baġit permezz ta' retenzjoni ta' 10% mill-pagamenti lill-Istati Membri matul is-sena u approvazzjoni annwali tal-kontijiet ladarba l-Istati Membri jiċċertifikatw il-kontijiet għal kull programm.

L-għoti ta' informazzjoni finanzjarja affidabbli u kompluta u dejta ta' verifika mill-Istati Membri hija eżempju wieħed ta' qasam fejn huwa meħtieġ titjib. Din hija r-raġuni għaliex il-Kummissjoni minn din is-sena ’l quddiem, se tittrasmetti s-sommarji annwali tal-Istati Membri b'analiżi tal-kontenut tagħhom lill-Awtorità tal-Kwittanza skont id-dispożizzjonijiet tal-Artikolu 319 tat-Trattat. Fejn xieraq, il-Kummissjoni se tirrakkomanda lill-awtoritajiet nazzjonali kif itejbu ulterjorment l-istrumenti ta' rappurtar l-aktar rigward ir-riżultati tal-verifika u opinjonijiet nazzjonali biex b'hekk ikunu jistgħu jikkontribwixxu aħjar lejn il-proċess tal-assigurazzjoni tal-Kummissjoni.

Il-Kummissjoni tistieden lill-Istati Membri biex juru l-impenn tagħhom biex jitjiebu r-responsabilità u t-trasparenza billi jiġu rinforzati l-miżuri ta' kontroll fejn meħtieġ, għall-bqija tal-perjodu kurrenti ta' programmar, b'mod partikolari fir-rigward tal-kontrolli tal-ġestjoni tal-ewwel livell, qabel iċ-ċertifikazzjoni tan-nefqa lill-Kummissjoni.  Hija tistedinhom ukoll biex isegwu l-gwida tagħha dwar it-trattament tal-iżbalji u rapporti ta’ kontroll annwali, kif ukoll dwar is-sommarji annwali, biex dawn isiru sorsi addizzjonali importanti ta' assigurazzjoni lill-Kummissjoni u sors utli ta' informazzjoni għall-awtorità tal-kwittanza. Il-Kummissjoni tinkoraġġixxi lill-Istati Membri kollha biex isegwu l-eżempju tal-15-il Stat Membru[9] li inkludew dikjarazzjonijiet ta' assigurazzjoni fis-sommarji annwali tagħhom u biex jieħdu miżuri oħrajn biex juru l-impenn tagħhom lejn tmexxija finanzjarja tajba tal-fondi tal-UE u trasparenza.

3.4.                  L-Għajnuna esterna, l-Iżvilupp u t-Tkabbir

Wara l-ħolqien tas-Servizz Ewropew għall-Azzjoni Esterna, ir-regoli għall-amministrazzjoni u l-kontabililità tal-baġit tal-UE ġew iċċarati. Il-persunal tas-SEAE u l-persunal tal-Kummissjoni kienu allokati separatament fid-Delegazzjonijiet bil-għan wieħed jiddistingwi bejn il-kompiti ewlenin tal-Kummissjoni u dawk tas-SEAE fid-Delegazzjonijiet, filwaqt li tinżamm marġini ta' flessibbiltà.  Biex ikun żgurat li l-persunal (u riżorsi oħra amministrattivi) kienu qed jiġu użati għall-għanijiet li għalihom huma kienu maħsuba;  il-Kapijiet tad-Delegazzjoni ngħataw struzzjonijiet u gwida konġunti mill-SEAE/Kummissjoni[10] dwar il-ġestjoni tal-persunal fid-Delegazzjonijiet.

Wara r-reviżjoni tar-Regolament Finanzjarju fl-24 ta' Novembru 2010, il-Kapijiet tad-Delegazzjonijiet tal-UE għall-ewwel darba akkumpanjaw lill-Uffiċjal Awtorizzanti annwali tagħhom b'rapport ta' sottodelega flimkien ma’ dikjarazzjoni ta’ assigurazzjoni.

Barra minn hekk, il-Kapijiet tad-Delegazzjonijiet ġew ipprovduti b'qafas konġunt miftiehem tas-SEAE/Kummissjoni[11] dwar il-ġestjoni tad-delegazzjonijiet tal-Unjoni Ewropea. Għal dan il-għan, ġie stabbilit il-Kumitat tat-Tmexxija għad-Delegazzjonijiet ("EUDEL") (magħmul mir-rappreżentanti tas-SEAE u tal-Kummissjoni).

Kif rakkomandat mill-Qorti Ewropea tal-Awdituri, sabiex ikompli jirfed id-dikjarazzjoni ta’ assigurazzjoni fir-RAA, id-Direttorat-Ġenerali għall-Iżvilupp u l-Kooperazzjoni żviluppa indikatur prinċipali biex jistma l-impatt finanzjarju tal-iżbalji residwali ladarba l-kontrolli ta’ konformità jkunu ġew implimentati kollha. Wara t-tnedija tax-xogħol ta' verifika, tali indikatur huwa issa mistenni li jkun disponibbli għas-sena ta' rappurtar 2012. Fil-każ tad-Direttorat-Ġenerali għat-Tkabbir, indikatur bħal dan huwa diġà disponibbli għall-fondi taħt ġestjoni deċentralizzata. Pjan ta’ ħidma pilota ġie implimentat sabiex il-kopertura testendi biex tinkludi fondi taħt ġestjoni ċentralizzata.

Kif ġie enfasizzat fl-opinjoni globali interna tal-Awditur, l-assigurazzjoni mogħtija mill-kontrolli fuq l-għajnuna esterna, imħaddma mid-delegazzjonijiet dekonċentrati, teħtieġ li tiġi mtejba permezz ta' ppjanar u superviżjoni aħjar.

3.5.                  Ir-Riċerka u politiki interni oħra

L-istrateġija komuni ta' verifika tad-Direttorati-Ġenerali tar-Riċerka (inkluża kampanja ta' verifika intensiva bl-estrapolazzjoni ta' żbalji sistemiċi) għas-Sitt Programm Kwadru (PK6) (2002-2006) irnexxiet f'termini ta' kopertura tal-verifika u r-riżultati tal-verifika miksuba. Fi tmiem il-perjodu, ir-rata residwa ta' żball multiannwali[12] kienet niżlet sostanzjalment, u laħqet livell ferm qrib il-mira ta' 2%. Għalkemm ir-riżervi tal-PK6 inżammu, l-ispiża tal-kontrolli ma tiġġustifikax l-isforzi addizzjonali biex il-livell jinżel taħt it-2%.

Rigward il-PK6, r-rata tal-iżbalji li nstabet fl-2011 mid-Direttur-Ġenerali għas-Soċjetà tal-Informazzjoni u l-Midja (taħt it-2%) ikkonfermat l-approċċ li kien diġà ttieħed fl-2010 li d-dikjarazzjoni ta' assigurazzjoni ma tkunx iktar ikkwalifikata, minħabba li r-rata ta' żball multiannwali (jiġifieri imkejla għall-PK6 kollu) kienet mistennija li tinżel taħt il-mira matul l-2011.

Is-Seba' Programm Kwadru għar-Riċerka (PK7) (2007-2013) kiseb momentum fl-2011 hekk kif il-programm għadda nofs il-perjodu tiegħu u l-ewwel proġetti, imnedija fil-bidu tal-programm, bdew jiġu konklużi. Kif diġà indikat is-sena l-oħra fir-rati ta' żbalji proviżorji, kampjuni rappreżentattivi tal-verifika wrew li r-rata ta’ żball fil-popolazzjoni totali kienet taqbeż il-limitu ta' 2%. Konsegwentement, id-Direttorati-Ġenerali għar-Riċerka u l-Aġenzija Eżekuttiva għar-Riċerka[13] introduċew riżervi dwar il-PK7 b'seħħ mill-2011.

Il-miżuri ta' simplifikazzjoni fl-2011 għandu jkollhom impatt pożittiv fuq ir-rata ta' żball fil-futur. Il-bqija tal-iskop biex jitnaqqsu l-iżbalji se jiġi indirizzat b'mod partikolari permezz tal-azzjonijiet li ġejjin: titjib fil-gwida u fil-feedback lill-parteċipanti u l-awdituri dwar l-iktar żbalji komuni; titjib l-istrateġija tal-kontroll ex-ante; u jitwettaq għadd xieraq ta' verifiki ex-post sabiex titnaqqas, flimkien ma' azzjonijiet ta' rkupru, ir-rata residwa ta' żball fuq perspettiva multiannwali. Anke b'dawn il-miżuri, l-istrateġija ta' kontroll tal-PK7 probabbilment se twassal għal rata residwa ta' żball fi tmiem iċ-ċiklu tal-ħajja tal-PK7 bejn 2% u 5%.

Taħt il-proċeduri attwali, seba’ Uffiċjali Awtorizzanti permezz ta' Delega huma responsabbli għall-ġestjoni tal-baġit tar-Riċerka. Kull wieħed jimmira li jistabbilixxi r-rata ta’ żball rappreżentattiva għall-parti tiegħu/tagħha mill-baġit. Dan iwassal għal restrizzjonijiet ta' ppjanar konsiderevoli u għal verifiki multipli tal-istess benefiċjarji mis-servizzi differenti. Għal dik ir-raġuni, ġie miftiehem li, b'seħħ mill-2012, Kampjun Rappreżentattiv Komuni tal-Verifika (CRAA) jiġu introdott madwar il-familja tar-Riċerka. B'mod partikolari, dan se jnaqqas il-piż tal-verifika minn fuq il-benefiċjarji billi jnaqqas l-għadd ta’ verifiki ripetuti.

Id-Direttur-Ġenerali għall-Komunikazzjoni żamm ir-riżerva ta' reputazzjoni introdotta għall-ewwel darba fl-2008, fuq non-konformità potenzjal mal-leġiżlazzjoni applikabbli fuq id-drittijiet tal-proprjetà intelletwali mis-servizzi tal-Kummissjoni. Il-parti l-kbira tal-azzjoni korrettiva dettaljata fil-pjan ta’ azzjoni ittieħdet, iżda l-evoluzzjoni kostanti fil-qasam tal-medja (bħas-Sistema ta' Monitoraġġ tal-Midja jew l-użu estensiv ta’ midja ġdida) qed toħloq sfidi ġodda tal-konformità li jridu jiġu ttrattati qabel din ir-riżerva tista titneħħa, xi ħaġa li hi mistennija li sseħħ is-sena d-dieħla.

Ir-rata ta' żball għal azzjonijiet ġestiti ċentralment[14] mid-Direttorat-Ġenerali għall-Edukazzjoni, l-Awdjoviżiv u l-Kultura niżel taħt it-2% u fl-2010 riżerva dwar il-ġestjoni diretta ċentralizzata tista' titneħħa wara l-implimentazzjoni tal-azzjonijiet effettivi mitiganti u l-użu ta' kampjun aktar rappreżentattiv.

Id-Direttur tal-Aġenzija Eżekuttiva għall-Edukazzjoni, l-Awdjoviżiv u l-Kultura rrappurtaw progress fl-implimentazzjoni ta' pjani ta' azzjoni biex jittejbu s-sistemi ta' kontroll għall-għotjiet ta' ġestjoni. L-Aġenzija Eżekuttiva għall-Edukazzjoni, l-Awdjoviżiv u l-Kultura neħħiet ir-riżerva tas-sena l-oħra dwar il-Kultura u għall-Programm għaż-Żgħażagħ wara li naqsu r-rati ta' żball. Madankollu, l-Aġenzija Eżekuttiva ddeċidiet li toħroġ riżerva ġdida għall-programm ta’ Tagħlim Tul il-Ħajja (LLP). Sabiex tittratta r-riżervi msemmija, l-Aġenzija kienet diġà adottat pjan ta’ azzjoni wara r-RAA tal-2010 li ppreveda miżuri mitiganti għall-programmi kollha ġestiti mill-Aġenzija, inkluż il-programm LLP. L-Aġenzija se tkompli bl-isforzi tagħha biex tgħin lill-benefiċjarji jikkonformaw mar-rekwiżiti, b'mod partikolari fejn jikkonċerna l-provvista ta' dokumenti ta' appoġġ.

Id-Direttur Ġenerali għall-Affarijiet Interni għamel żewġ riżervi fir-RAA tal-2011, wieħed minnhom rigward ir-riskji ta' reputazzjoni minħabba dewmien fl-implimentazzjoni ta' sistema tal-IT fuq skala kbira, il-proġett SIS II. Għal dan il-proġett, sar progress sinifikanti fl-2011 lejn l-iskjerament b'suċċess ta' din is-sistema tal-IT fuq skala kbira. Il-pjan ta’ azzjoni ddettaljat kien implimentat kollu, iżda avvenimenti ġodda kkawżaw dewmien addizzjonali, bħal l-inabbiltà tal-Istat Membru responsabbli li jipprovdi wieħed mill-għodod tat-test oriġinarjament previsti għall-ittestjar u għal jekk jitfaċċa dewmien ġdid fl-iżviluppi nazzjonali f’ċerti Stati Membri jew dewmien fil-livell tas-sistema ċentrali. It-tieni riżerva, li hi ġdida, tikkonċerna r-riskju finanzjarju li jirriżulta mir-rata residwa ta' żball fil-popolazzjoni mhux awditjata ta' għotjiet fil-programmi finanzjarji 'Prevenzjoni, Stat ta' Tħejjija u Maniġġar tal-Konsegwenzi tat-Terroriżmu u riskji oħra relatati mas-Sigurtà'' (CIPS) u “Prevenzjoni u Ġlieda kontra l-Kriminalità” (ISEC). Dawn il-programmi jimmiraw oqsma ta' politika relattivament ġodda u benefiċjarji ġodda, u d-Direttur-Ġenerali għall-Affarijiet Interni huwa kunfidenti li żieda fin-numru ta' verifiki flimkien ma' aktar informazzjoni u informazzjoni aħjar lill-benefiċjarji se jgħinu biex jonqsu r-rati ta' żball fil-futur qrib.

Id-Direttur-Ġenerali għall-Intrapriża u l-Industrija estenda r-riżerva tiegħu rigward l-affidabbiltà tar-rappurtar finanzjarju mill-Aġenzija Spazjali Ewropea (ASE). Matul l-2011, il-monitoraġġ u l-istrateġija ta' kontroll tal-Kummissjoni għall-ASE kompliet tissaħħaħ: Huwa se jkompli bil-verifika tar-rapporti finanzjarji pprovduti mill-ASE u se jinkoraġġixxi u jappoġġja lill-ASE fl-implimentazzjoni tal-pjan ta’ azzjoni tagħha, żviluppat biex tindirizza r-rakkomandazzjonijiet magħmula mill-Kumitat tal-Verifika Esterna tal-ASE u biex titjieb il-kwalità tar-rappurtaġġ finanzjarju lill-Kummissjoni. Minħabba l-azzjonijiet għaddejjin bħalissa, il-Kummissjoni tistenna li l-kwistjonijiet jiġu korretti malajr biex dan jippermetti t-tnaqqis u finalment it-tneħħija ta' din ir-riżerva. Barra minn hekk, l-użu ta’ esperti esterni għen biex tiġi żgurata l-affidabbiltà tal-ammonti tal-assi fissi inklużi fuq il-karta tal-bilanċ tal-UE fl-2011.

Il-Kummissjoni hija sodisfatta bil-ħidma mwettqa biex tindirizza l-kwistjoni dwar id-drittijiet tal-proprjetà intellettwali minn is-servizzi kollha tagħha u tħeġġiġhom biex jieħdu l-passi neċessarji sabiex din ir-riżerva tista' titneħħa fl-2012. Hija tilqa’ l-linji gwida[15] dwar il-ġestjoni tad-drittijiet tal-proprjetà intellettwali tal-Kummissjoni.

Il-Kummissjoni tilqa' r-rata baxxa ta' żball residwali fi tmiem il-ħajja tal-PK6 għar-Riċerka u tinnota l-aspettattivi u l-limitazzjonijiet stabbiliti għall-istrateġija ta' verifika tal-PK7.

Il-Kummissjoni tinnota r-riżerva għal-programm LLP ġestit mill-Aġenzija Eżekuttiva EAC, minkejja xogħol li sar biex il-benefiċjarji jkunu infurmati aħjar rigward ir-rekwiżiti. Hija tistieden lill-Aġenzija biex iżżid l-isforzi tagħha.

Il-Kummissjoni tirrikonoxxi li l-iżvilupp u l-ġestjoni ta' sistemi tal-IT fuq skala kbira bħall-SIS II jippreżentaw sfidi partikolari. Hija daħħlet fis-seħħ mekkaniżmi ta' goveranza qawwija u se tkompli tagħti l-ogħla prijorità għaż-żamma ta' governanza effettiva u kooperazzjoni mill-qrib mal-partijiet interessati f'dak li jirrigwarda s-SIS II.

4.           Kwistjonijiet u soluzzjonijiet trasversali

4.1.        Il-valur miżjud tal-baġit tal-UE

Ir-rappurtar fuq il-kisbiet tal-ġestjoni tal-Kummissjoni mhuwiex limitat biss għal rappurtar fuq il-konformità mar-regoli finanzjarji u r-rati ta' żball. Il-kwalità tal-infiq u l-valur miżjud tal-baġit tal-UE huma fatturi importanti li hemm bżonn jintwerew. Fir-RAA tagħhom, l-Uffiċjali Awtorizzanti b'Delega jispjegaw kif huma għamlu użu mir-riżorsi finanzjarji u umani allokati lilhom sabiex jinkisbu l-objettivi tal-politika stabbiliti mill-Kulleġġ, li juru kif il-politiki ġġeneraw valur miżjud għas-soċjetà tal-UE. L-Istruzzjonijiet Permanenti għat-tħejjija tar-Rapporti Annwali tal-Attività isejħu għal aktar attenzjoni lil dan it-tip ta' rappurtar.

Fi Frar 2012, abbażi tal-Artikolu 318 TFUE, il-Kummissjoni rrappurtat[16] għall-ewwel darba dwar l-evalwazzjoni tal-finanzji tal-UE dkont fuq ir-riżultati miksuba. Dan ir-rapport ifittex li jagħti ħarsa ġenerali lejn l-għanijiet tal-programmi tal-UE, u l-impatti u r-riżultati miksuba skont l-istadju milħuq fil-programmi fiż-żmien tal-evalwazzjoni. Billi jkopri kull sena numru limitat ta' programmi li għalihom l-evalwazzjonijiet relevanti huma disponibbli, dan ir-rapport se jkopri fit-terminu medju firxa wiesgħa ta' programmi finanzjarji taħt il-metodi differenti ta' ġestjoni. Ir-rapport ikopri żewġ oqsma ewlenin ta' intervent finanzjarju dirett mill-UE: L-Edukazzjoni u l-Kultura u r-Riċerka.

Barra minn hekk, is-Servizz tal-Awditjar Intern għamel sforzi kbar biex jiddefinixxi l-qafas tal-awditjar tal-prestazzjoni tiegħu u biex jiżviluppa programm intern ta' taħriġ għall-awdituri dwar din il-kwistjoni.

Il-Kummissjoni tagħti struzzjonijiet lis-Segretarjat Ġenerali biex jesplora opportunitajiet biex ir-Rapport Annwali tal-Evalwazzjoni bbażat fuq l-Artikolu 318 TFUE isir aktar inklużiv, billi jkopru l-medda sħiħa ta’ attivitajiet iffinanzjati mill-baġit, inklużi l-indikazzjonijiet xierqa rigward ir-rakkomandazzjonijiet ta' kwittanza, filwaqt li jistrieħ estensivament fuq l-informazzjoni disponibbli relatata mal-prestazzjoni bħal rapporti ta' evalwazzjoni, l-RAA u d-Dikjarazzjonijiet ta' Attività  għall-Abbozz tal-Baġit.

4.2.        Rappurtar trasparenti dwar l-interruzzjonijiet u sospensjoni ta' pagamenti, korrezzjonijiet u rkupri finanzjarji fil-ġestjoni kondiviża[17]

4.2.1.     Informazzjoni dwar interruzzjoni u sospensjoni tal-pagamenti mill-Kummissjoni

B'konformità mal-impenn tagħha lejn l-awtorità ta' kwittanza, fil-Pjan ta' Azzjoni tagħha tal-2008 biex issaħħaħ ir-rwol superviżorju għall-azzjonijiet strutturali, il-Kummisjoni inkoraġġiet lis-servizzxi tagħha biex jinterrompu l-proċeduri tal-pagamenti u jipproponu proċeduri ta' sospensjoni hekk kif ikunu onorati l-kundizzjonijiet legali. Rigward il-ġestjoni kondiviża, il-Kummissjoni twaqqaf jew tissospendi l-proċeduri ta' pagament hekk kif ikun hemm evidenza li tindika defiċjenza fil-ġestjoni tas-sistemi ta' kontroll tal-Istati Membri. 

Is-servizzi li jwettqu tranżazzjonijiet permezz ta' ġestjoni kondiviża rrapportaw id-deċiżjonijiet ta'  interruzzjoni/sospensjoni kollha fir-RAA tagħhom. Din l-informazzjoni tinkludi l-programmi operazzjonali kkonċernati, l-Istat Membru affettwat, it-tip ta' dgħufija misjuba, il-fatti prinċipali li jiġġeneraw kull deċiżjoni u l-impatt baġitarju tad-deċiżjoni. Dan it-tagħrif jikkostitwixxi dimensjoni importanti ta’ assigurazzjoni raġonevoli u ta' responsabbiltà.

Wara l-introduzzjoni tal-istrument ġdid ta' interruzzjoni għall-perjodu ta’ programmar 2007-2013, id-Diretturi-Ġenerali li joperaw f'ġestjoni kondiviża, fl-2011, ħadu deċiżjonijiet formali biex jinterrompu skadenzi għall-pagamenti ta' 91 programm li jammontaw għal EUR 2 634 miljun. Il-Kulleġġ addotta wkoll erba'[18] deċiżjonijiet ta' sospensjoni tal-pagamenti għall-programmi tal-2007-2013.  Il-pagamenti ma jerġgħux jinbdew sakemm l-AOSDs jiksbu evidenza ta' awditjar ċara li r-raġunijiet għall-interruzzjonijiet u/jew sospensjonijiet ġew rimedjati fil-post, li twettqu l-korrezzjonijiet finanzjarji meħtieġa u li mhemmx aktar riskji għal infiq futur li jridu jiġu ċċertifikati lill-Kummissjoni.

Il-Kummissjoni tikkonferma li AODs għandhom sistematikament jinterrompu l-proċeduri tal-pagament u jipproponu lill-Kulleġġ li l-proċeduri għandhom jiġu sospiżi hekk kif jintlaħqu l-kundizzjonijiet applikabbli u sakemm il-miżuri korrettivi neċessarji jkunu ġew implimentati mill-awtoritajiet nazzjonali relevanti.

4.2.2.     Il-korrezzjonijiet finanzjarji imposti mill-Kummissjoni fuq l-Istati Membri

Il-korrezzjonijiet finanzjarji l-oħrajn li ġew irrapportati kienu dawk li ġew imposti mill-Kummissjoni fuq l-Istati Membri. Id-Direttorat Ġenerali għall-Politika Reġjonali rrapporta korrezzjonijiet finanzjarji kumulattivi ta' EUR 7,13 biljuni li rriżultaw minn awditi tal-UE fil-perjodu bejn l-2011 u l-2006. Id-Direttorat Ġenerali għall-Impjiegi, l-Affarijiet Soċjali u l-Inklużjoni rrapportat EUR 1,8 biljun u d-Direttorat-Ġenerali għall-Agrikoltura u l-Iżvilupp Rurali rrapportat EUR 7,7 biljun.

In-noti tal-kontijiet annwali tal-Unjoni Ewropea fihom aktar informazzjoni estensiva dwar il-korrezzjonijiet finanzjarji deċiżi mill-Kummissjoni u li ġew implimentati matul is-sena, u anke fuq l-irkupri.

4.2.3.     Informazzjoni mill-Istati Membri dwar il-korrezzjonijiet u l-irkupri finanzjarji

Il-korrezzjoni ta' ammonti mħallsa bi żball hija aspett maġġuri ta' ġestjoni finanzjarja tajba. Fl-2011, saru sforzi kontinwi sabiex jiġu imposti korrezzjonijiet finanzjarji fejn meħtieġ, tittejjeb il-kwalità tad-dejta tal-Istati Membri dwar il-korrezzjonijiet u l-irkupri finanzjarji u l-promozzjoni tal-użu tal-aħjar prattiki sabiex isir titjib fil-mekkaniżmi ta' rkupru fil-livell tal-Istati Membri u fil-livell tal-UE.

Dwar il-ġestjoni kondiviża, ir-RAA jipprovdu informazzjoni dettaljata dwar il-korrezzjonijiet finanzjarji li jiġu implimentati u rrapportati mill-Istati Membri lill-Kummissjoni u valutazzjoni tas-sistemi nazzjonali ta' kontroll. Fil-qasam tal-Politika ta' Koeżjoni, l-Istati Membri jimplimentaw korrezzjonijiet finanzjarji li jirriżultaw mix-xogħol ta' awditjar tagħhom stess u minn awditi tal-UE. Dawn jiġu rrapportati sena tard sal-31 ta' Marzu, u għalhekk fl-2011 huma rrapportaw dwar il-korrezzjonijiet tagħhom tal-2010. Madankollu, l-AOSDs irrapportaw l-aktar figuri aġġornati magħrufa sad-data tal-iffirmar tar-RAA tagħhom.

Rigward il-Politika Reġjonali, l-Istati Membri rrappurtaw li, sal-aħħar tal-2010, kienu għamlu korrezzjonijiet finanzjarji kumulattivi ta' EUR 5,1 biljuni għall-programmi 2000-2006. L-Istati Membri rrappurtaw li dawn l-korrezzjonijiet finanzjarji kienu implimentati permezz ta’ prelevazzjonijiet (madwar EUR 4 biljuni jew 78% tal-ammont totali tal-irkupri) jew irkupri minn benefiċjarji individwali (madwar EUR 1,1 biljun jew 22%).

Għall-programmi tal-FEŻR/FK 2007-2013, l-Istati Membri rrappurtaw li fl-2010 saru korrezzjonijiet finanzjarji ta' EUR 212-il miljun (EUR 156 miljun bħala prelevazzjonijiet, EUR 31 miljun bħala rkupri u EUR 25 miljun bħala irkupri pendenti). Għall-2011, bħala d-data tal-iffirmar tar-RAA, l-Istati Membri rrappurtaw korrezzjonijiet għal total ta' EUR 342 miljun għall-programmi tal-FEŻR/FK.

Għall-programmi tal-FSE 2007-2013, l-Istati Membri rrappurtaw għall-2010 korrezzjonijiet finanzjarji ta' EUR 52 miljun (EUR 33 miljun bħala prelevazzjonijiet, EUR 4 miljuni bħala rkupri u EUR 15-il miljun bħala rkupri pendenti).

4.3.        Użu tal-prefinanzjament

Il-Kummissjoni tinnota li l-kontijiet proviżorju annwali tal-2011 juru kemmxejn tnaqqis fl-ammont tal-prefinanzjament. Dan l-ammont huwa magħmul minn tliet elementi ewlenin:

- L-ewwel, il-prefinanzjament tradizzjonali f’diversi programmi biex ikun żgurat il-"float" meħtieġ għall-benefiċjarji biex jibdew il-programmi u l-azzjonijiet. Il-profil normali tal-infiq tal-programmi multiannwali huwa kkaratterizzat minn ammonti ogħla tal-prefinanzjament fl-ewwel snin tal-perjodu ta’ programmar. B'diversi programmi bħal dawn jiksbu momentum fl-2010/2011, il-proporzjon ta' prefinanzjament għalhekk qe jitlef l-importanza meta mqabbel mal-pagamenti finali.

- It-tieni, l-Istrumenti Finanzjarji (SF), li dejjem qed jintużaw bħala mezzi komplementari għall-finanzjament fil-Fondi Strutturali u fl-FAEŻR. Min-natura tagħhom, l-SF jirrikjedu sehem kbir ta' pagamenti bil-quddiem u għalhekk huma assimilati għall-prefinanzjament. Il-Kummissjoni qed issaħħaħ il-monitoraġġ f'dan il-qasam kif spjegat hawn taħt fit-taqsima 4.4.

- Fl-aħħarnett, pre-finanzjament imħallas lill-Istati Membri taħt ġestjoni kondiviża u kkomplementat bi prefinanzjament addizzjonali bħala parti mill-pakkett ta' miżuri adottati biex jiġġieled l-effetti tal-kriżi ekonomika. Dan il-prefinanzjament huwa wkoll sorveljat mill-qrib kontra l-implimentazzjoni.

Filwaqt li prefinanzjament tal-programmi varji huwa neċessarju biex jippermetti lill-benefiċjarji jibdew il-proġetti tagħhom, l-interessi finanzjarji tal-UE jeħtieġ li jiġu salvagwardjati u jridu jiġu kkunsidrati restrizzjonijiet operazzjonali u kost-effettivi. Il-Kummissjoni pproponiet bidliet[19] għar-Regolament Finanzjarju biex jitjieb is-segwitu tal-prefinanzjament.

4.4.        Strumenti finanzjarji

L-istrumenti finanzjarji (SF) għandhom effett multiplikatur: huma mezz biex jattiraw riżorsi addizzjonali minn baġits nazzjonali jew reġjonali, banek pubbliċi jew privati u investituri oħra sabiex l-ammont globali disponibbli għall-investiment jiżdied. Dan l-effett multiplikatur ivarja skont it-tip tal-istrument finanzjarju, iżda evalwazzjoni bikrija sabet li kull ewro investit fi-SF jista’ jimmobilizza bejn EUR 3,4 sa 7,5 f’fondi addizzjonali.

Użu akbar ta' strumenti finanzjarji jikkostitwixxi sfida ġdida minn perspettiva ta' kontroll intern u responsabbiltà. Il-Kummissjoni timmonitorja u tirrapporta dwar tali strumenti taħt l-Artikolu 49 tal-Ftehim interistituzzjonali[20] għal strumenti implimentati taħt ġestjoni ċentralizzata indiretta u għal inizjattivi konġunti mal-BEI u l-FEI taħt il-Politika Reġjonali.

Id-Direttorati-Ġenerali li jagħmlu użu minn SF ikopru l-aspetti relatati mal-politika u mal-governanza fil-Partijiet 1 u 2 tar-RAA tagħhom, u jsemmu fil-Parti 3 l-monitoraġġ tagħhom ta' dawn l-istrumenti.

Is-servizzi tal-Kummissjoni ħejjew Dokument ta' Ħidma tal-Persunal[21] iddedikat li jiddeskrivi s-sitwazzjoni rigward l-użu ta' SF fl-Istati Membri sa tmiem l-2010 għall-Fondi Strutturali. Barra minn hekk, il-bażi legali[22] applikabbli ġiet emendata sabiex ir-rappurtar dwar kwistjonijiet finanzjarji u ta' implimentazzjoni isiru proċedura regolari, standardizzata u obbligatorja taħt ir-rappurtar annwali dwar l-implimentazzjoni tal-programmi. Dan se jtejjeb konsiderevolment l-informazzjoni disponibbli għall-Kummissjoni minn nofs l-2012. Fuq din il-bażi, sa Ottubru 2012, il-Kummissjoni ser tikkunsinna l-ewwel rapport dwar l-SF.

Id-Direttorat Ġenerali għall-Affarijiet Ekonomiċi u Finanzjarji inkluda fl-RAA tabella li telenka l-SF kollha li għalihom ġew nominati Politika jew DĠ  ta' Implimentazzjoni kif ukoll informazzjoni dwar il-monitoraġġ u l-arranġamenti tal-kontroll u r-responsabbiltajiet tal-imsieħba kollha involuti, flimkien ma' deskrizzjoni tar-rekwiżiti għar-rappurtar u l-katini ta' responsabbiltà.

Id-Direttorat-Ġenerali għall-Agrikoltura u l-Iżvilupp Rurali, emenda l-bażi legali applikabbli billi tejjeb il-kondizzjonijiet meħtieġa għat-twaqqif ta’ ċerti strumenti finanzjarji u għat-tisħiħ tal-implimentazzjoni tagħhom u l-użu tar-riżorsi li jmorru lura fl-istrumenti[23].

Il-Kummissjoni varat eżerċizzju ta' evalwazzjoni biex, sa tmiem l-2012, tipprovdi analiżi għal kull Stat Membru kif ukoll valutazzjoni ġenerali tal-użu tal-istrumenti finanzjarji.

Il-Kummissjoni qed twettaq ukoll verifika tematika dwar l-implimentazzjoni ta' kampjun tal-SF, sabiex tevalwa l-assigurazzjoni li tista' tingħata dwar l-implimentazzjoni ta’ dawn l-istrumenti, sal-livell ta' riċevituri individwali.

Il-Kummissjoni tagħti struzzjonijiet lis-servizzi kollha biex fir-RAA tagħhom jirrapportaw dwar l-attivitajiet tagħhom rigward l-SF. Hija tagħti wkoll struzzjonijiet s-servizzi inkarigati mill-Fondi għall-Iżvilupp Strutturali u Rurali biex jirrapportaw dwar ir-riżultati tal-evalwazzjoni u x-xogħol tal-verifika mwettqa f'dan il-qasam fir-RAA tagħhom għas-sena 2012.

Il-Kummissjoni tistieden lill-istituzzjonijiet l-oħra biex jirreaġixxu pożittivament għall-proposta tagħha għall-perjodu ta’ pprogrammar li jmiss, fejn hija tipproponi tisħiħ għall-mekkaniżmi ta' monitoraġġ għall-SF.

4.5.        It-triq 'il quddiem: Spejjeż-benefiċċji tal-kontrolli u sistemi interni ta’ kontroll proporzjonali għar-riskju

Il-Kummissjoni għandha r-responsabbiltà, permezz ta' kontrolli robusti u kejl effettiv tal-prestazzjoni, mhux biss li tiżguraw li l-fondi jintefqu tajjeb iżda wkoll biex tieħu miżuri biex twieġeb għall-ħtieġa li jiġu ssimplifikati l-programmi tal-infiq tagħha sabiex jitnaqqsu l-piż u l-ispejjeż amministrattivi għall-benefiċjarji tal-fondi u għall-atturi kollha nvoluti, b'konformità mal-aġenda tar-Regolament Intelliġenti tal-Kummissjoni[24]. Filwaqt li sar progress fil-programmi attwali[25], il-Kummissjoni pproponiet semplifikazzjonijiet aktar ambizzjużi għall-ġejjieni.

Ġestjoni finanzjarja soda teħtieġ li l-kontrolli jkunu effettivi, effiċjenti u ekonomiċi. L-istrateġiji ta' kontroll għandhom jimmiraw kontrolli fuq oqsma iktar riskjużi: tali kontrolli mmirati jipprovdu assikurazzjoni raġonevoli lill-kontribwenti fiskali Ewropej filwaqt li jippermettu lill-benefiċjarji jikkonċentraw fuq il-ksib tal-għanijiet ta' politika aktar milli hu possibbli llum.

4.5.1.     Reviżjoni tar-Regolament Finanzjarju

Ir-Regolament Finanzjarju fih regoli u prinċipji finanzjarji komuni applikabbli għall-oqsma kollha ta’ politika. Bħala l-ewwel pass, f'Mejju 2010[26], il-Kummissjoni varat proċess għar-reviżjoni tar-Regolament Finanzjarju. Il-proposta ssaħħaħ il-ħtieġa għall-allinjament tas-sistemi ta' kontroll mar-riskji identifikati u il-kosteffettività tal-kontrolli. Hija tistabbilixxi qafas ċar ta' implimentazzjoni ġenerali, li jkopri l-modi kollha ta’ ġestjoni (inkluż qafas komuni għal ġestjoni kondiviża) u tistabbilixxi regoli apposta għal strumenti finanzjarji innovattivi u premjijiet. Fil-qasam tal-għotjiet ġestiti direttament mill-Kummissjoni, il-proposta speċifikament tippromwovi l-użu ta’ metodi ssimplifikati biex “jikkalkulaw” spejjeż eliġibbli (bħal somom f'salt, rati fissi u skali standard ta' kosti ta' unità), jiffaċilitaw l-aċċettazzjoni ta' spejjeż iddikjarati skont “il-prattiki tal-kontabilità li l-benfiċjarju soltu juża'”, u jintroduċu proċeduri eħfef għal għotjiet żgħar.

L-abbozz kurrenti tar-Regolament Finanzjarju rivedut se jinkludu dispożizzjonijiet li se jirrikjedu servizzi biex tingħata informazzjoni dwar l-istruttura interna rigward is-sistema ta' kontroll, stima tal-ispejjeż u l-benefiċċji tal-kontrolli implikati minn sistema bħal din u valutazzjoni tal-livell mistenni tar-riskju ta' żball, meta proposti ta' nfiq ġodda jew riveduti qed jiġu ppreżentati lill-awtorità leġiżlattiva. Barra minn hekk ir-regolament rivedut se jeħtieġ li l-AOD jqis il-kosteffettività meta jitwaqqfu sistemi interni ta' kontroll u jipprovdi valutazzjoni globali tal-ispejjeż u l-benefiċċji tal-kontrolli fir-rapport annwali tal-attività.

F'Ġunju 2011 u b'antiċipazzjoni għal dawn ir-rekwiżiti, id-Direttorati-Ġenerali inkludew fil-proposti leġiżlattivi programmi ta' nfiq post-2013 stima tal-ispejjeż u l-benefiċċji tal-kontrolli assunti mis-sistemi ta’ kontroll u valutazzjoni tal-livell ta' riskju mistenni ta’ nuqqas ta’ konformità mar-regoli applikabbli.

Minħabba r-rwol ċentrali tar-Regolament Finanzjarju bħala referenza għal-leġiżlazzjoni speċifika għas-settur, il-Kummissjoni tħeġġeġ lill-Parlament Ewropew u lill-Kunsill biex jilħqu ftehim qabel il-waqfa tas-sajf.

4.5.2.     Aġenda għas-Simplifikazzjoni tal-QFM 2014-2020

Il-possibbiltajiet usa' taħt ir-Regolament Finanzjarju rivedut ippermettew lill-Kummissjoni sabiex tippreżenta proposti għal miżuri ta' simplifikazzjoni aktar adattati għall-benefiċjarji u partijiet interessati oħra, li jiżguraw li l-fondi tal-UE jkunu jistgħu jiġu mqassma b'mod li huwa ċar, jinftiehem faċilment, u sempliċi biex jiġi applikat. Il-Kummissjoni għamlet għadd ta' proposti biex tagħmel il-kontrolli aktar proporzjonati u kosteffettivi. Pereżempju fil-Politika Agrikola Komuni, l-Iskema tal-Bidwi Żgħir proposta għandha tnaqqas il-piż amministrattiv minn fuq numru sinifikanti ta' bdiewa, mingħajr ma jiżdied ir-riskju finanzjarju lill-UE. Eżempju ieħor huwa l-possibbiltà għall-benefiċjarji tal-fondi għar-riċerka li jiżaw il-prattiki ta' kontabilità normali tagħhom għat-tħejjija pretensjonijiet tal-kosti.

Biex tiżgura li s-simplifikazzjoni ma tiftaħx il-bieb għal riskju akbar ta' żball, il-Kummissjoni kienet konxja tal-ħtieġa li tipproponi miżuri bbilanċjati li jikkunsidraw l-ispejjeż u l-benefiċċji tal-kontroll u l-livell mistenni ta’ nuqqas ta' konformità mar-rekwiżiti regolatorji, kif issuġġerit mill-Qorti fl-Opinjoni tagħha 1/2010. Partikolarment, il-Kummissjoni tat riżultati rigward dawn l-isfidi identifikati mill-Qorti: tejbien fit-tfassil ta’ skemi ta’ finanzjament biex jissaħħu l-ġestjoni u l-mekkaniżmi tal-kontroll; is-simplifikazzjoni tal-iskemi tal-għotjiet filwaqt li xorta waħda inkisbu l-objettivi tal-politika; u punti ta' riferiment xierqa għall-valutazzjoni tal-ġestjoni tar-riskju li jqisu l-ispejjeż u l-benefiċċji tal-kontrolli.

Dawn l-elementi ta' simplifikazzjoni għandhom jippermettu lill-Kummissjoni biex tallinja aħjar is-sistemi ta' kontroll tagħha mar-riskji identifikati u titnaqqas il-probabbiltà ta’ żball.

4.6.        L-Istrateġija tal-Kummissjoni Kontra l-Frodi (CAFS)

Wara l-adozzjoni tal-Istrateġija l-ġdida tal-Kummissjoni Kontra l-Frod[27], ġie mħejji Pjan ta’ Azzjoni intern[28]. Dan se jeħtieġ li d-Direttorati-Ġenerali kollha jiżviluppaw strateġija kontra l-frodi fuq livell lokali sa l-2013. Miżuri f'dan il-qasam (bħal analiżi speċifika tar-riskju tal-benefiċjarji, il-monitoraġġ mill-qrib ta' proġetti jew kuntratti magħżula, jew kwalunkwe miżuri oħra biex jittaffew ir-riskji tal-frodi) huma diġà deskritti f’xi Rapporti Annwali ta’ Attività, flimkien ma’ riżultati speċifiċi ta' azzjonijiet kontra l-frodi meħuda matul sena ta’ rappurtar u kwalunkwei elementi ta’ assigurazzjoni li jistgħu jittieħdu minnhom. Dan se jkun ġeneralizzati aktar fir-RAA tal-2012 u l-2013.

Il-Kummissjoni tagħti struzzjonijiet lis-servizzi sabiex jinkludu fir-RAA tagħhom informazzjoni dwar il-prevenzjoni tal-frodi bħala parti mill-valutazzjoni tas-sistemi interni ta’ kontroll tagħhom, li jirriflettu l-implimentazzjoni tal-istrateġija settorjali u li jiddeskrivu miżuri biex itaffu r-riskji tal-frodi.

[1]               L-iżball l-aktar probabbli stmat mill-Qorti, għall-pagamenti globali kienet ta' 3,7% fl-2010. (ĠU C326 tal-10 ta’ Novembru 2011, paragrafu 1.16).

[2]               L-Artikolu 60 tar-Regolament Finanzjarju.

[3]               L-hekk imsejħa "rati fissi għal korrezzjonijiet finanzjarji"

[4]               Din hija s-somma tal-ammonti kwantifikati kollha fir-riżervi (massimu ta' EUR 982 miljun) u ammont stmat f’riskju (EUR 1 582 miljun) għar-riżerva tad-DĠ BUDG fir-rigward tar-Riżorsi Proprji Tradizzjonali. Għal dawk id-Direttorati-Ġenerali li rrapportaw firxa minn minimu sa massimu, ġie meqjus l-ammont massimu.

[5]               Il-Qorti tal-Awdituri tikkalkula li r-rata ta’ żball l-aktar probabbli hija 2,3%. (ĠU C 326 tal-10 ta’ Novembru 2011, Anness 3.1).

[6]               L-Awstrija, il-Bulgarija, ir-Repubblika Ċeka, l-Estonja, Franza, il-Ġermanja, il-Greċja, l-Ungerija, l-Italja, il-Latvja, il-Litwanja, il-Pajjiżi Baxxi, il-Polonja, ir-Rumanija, is-Slovenja, is-Slovakkja, Spanja, u r-Renju Unit.

[7]               L-Istrument għall-Assistenza ta' Qabel l-Adeżjoni

[8]               'Analiżi tal-Iżbalji fil-Politika ta’ Koeżjoni għas-Snin 2006-2009, l-Azzjonijiet meħuda mill-Kummissjoni u l-mixja 'l quddiem', SEC (2011) 1179 finali.

[9]               Għall-FES u l-ERDF 15-il Stat Membru pprovdew minn jeddhom 'Dikjarazzjoni dwar il-livell ġenerali tal-assigurazzjoni' fis-Sommarju Annwali tagħhom: il-Bulgarija, Ċipru, ir-Repubblika Ċeka, id-Danimarka, l-Estonja, il-Greċja, il-Finlandja, Franza, l-Ungerija, il-Portugall, ir-Rumanija, is-Slovakkja, is-Slovenja, l-Isvezja u r-Renju Unit.

[10]           Nota ta’ C. Day u D. O'Sullivan bid-data 20/12/2011 dwar il-Ġestjoni tal-persunal fid-delegazzjonijiet.

[11]              JOIN (2012) 8 finali, Deċiżjoni konġunta tal-Kummissjoni u tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà tat-28.03.2012 dwar mekkaniżmi ta' koperazzjoni rigward il-ġestjoni tad-delegazzjonijiet tal-Unjoni Ewropea.

[12]             Ir-rata residwa ta' żball multiannwali tagħti l-impatt reali tal-iżbalji fuq il-baġit tal-UE, billi tqis il-korrezzjonijiet u l-irkupri matul il-perjodu kollu tal-programm kwadru.

[13]             AER għas-sottoattivitajiet 'Spazju' u 'Sigurtà' biss

[14]             L-azzjonijiet ġestiti ċentralment jirrappreżentaw 11% tal-fondi ġestiti mid-Direttorat-Ġenerali għall-Edukazzjoni, l-Awdjoviżjoni u l-Kultura

[15]             'Linji gwida prattiċi lill-persunal tal-KE dwar kif jittratta l-IP-, id-Drittijiet tal-Awtur- u xogħlijiet protetti bil-Marka Kummerċjali', Novembru 2010.

[16]             COM(2012) 40 finali.

[17]             Il-figuri msemmijin f'dan il-paragrafu huma proviżorji għaliex dawn huma pendenti mil-verifika mill-Qorti tal-Awdituri tal-kontijiet tad-dispożizzjoni 2011.

[18]             Deċiżjoni ta' sospensjoni waħda dwar il-programm tal-FEŻR fil-Kalabrija (l-Italja) u tliet deċiżjonijiet ta’ sospensjoni dwar l-FSE l-Gżejjer Baleariċi (Spanja), il-Kalabrija (l-Italja) u PACA (Provence-Alpes-Côte d'Azur) (Franza).

[19]             L-Artikolu 87 (4) propost tar-Regolament Finanzjarju rivedut.

[20]             Ftehim interistituzzjonali bejn il-Parlament Ewropew, il-Kunsill u l-Kummissjoni dwar dixxiplina baġitarja u ġestjoni finanzjarja soda (2006/C 139/01).

[21]             SWD(2012) 36 finali.

[22]             Ir-Regolament Nru 1083/2006 li jistabbilixxi regoli ġenerali għall-Fondi Strutturali.

Ir-Regolament Nru 679/2011 tal-14.7.2011 li jemenda r-Regolament ta' implimentazzjoni Nru 1974/2006 dwar il-fond għall-iżvilupp rurali (FAEŻR)

[24]             COM(2010)543.

[25]             Pereżempju fis-Seba' Programm Kwadru għar-Riċerka, fejn fl-2011 kienu introdotti miżuri ta' simplifikazzjoni ddedfikati u ż-żmien tal-għotjiet naqas bi kważi 30 jum.

[26]             COM(2010) 815 finali.

[27]             COM(2011) 376 finali.

[28]             SEC(2011) 787 finali.