[pic] | IL-KUMMISSJONI TAL-KOMUNITAJIET EWROPEJ |

Brussell, 24.4.2008

COM(2008) 215 finali

RAPPORT MILL-KUMMISSJONI LILL-KUNSILL U LILL-PARLAMENT EWROPEW

dwar l-operat tar-Regolament (KE) Nru 1606/2002 tad-19 ta' Lulju 2002 rigward l-applikazzjoni ta' standards internazzjonali tal-kontabilità

(Test b'rilevanza għaż-ŻEE)

1. Il-Bażi ġuridika

L-Artikolu 10 tar-Regolament (KE) Nru 1606/2002 tad-19 ta' Lulju 2002 (ir-"Regolament dwar l-IAS")[1] jeħtieġ li l-Kummissjoni tirrevedi l-operat tar-Regolament u tirrapporta dwaru lill-Parlament Ewropew u lill-Kunsill sa mhux aktar tard mill-1 ta' Lulju 2007.

2. L-operat tar-Regolament dwar l-IAS

2.1. Id-dispożizzjonijiet ewlenin tar-Regolament dwar l-IAS

Ir-Regolament dwar l-IAS jobbliga lill-kumpaniji Ewropej li t-titoli tagħhom huma ammessi għall-kummerċ f'suq regolat fl-UE li, mill-1 ta' Jannar 2005 'il quddiem, iħejju l-kontijiet ikkonsolidati tagħhom f'konformità ma' l-istandards ta' l-IAS/IFRS[2] u ta' l-interpretazzjonijiet SIC/IFRIC[3] maħruġin mill-Bord ta' l-Istandards Internazzjonali tal-Kontabilità (l-IASB) u adottati mill-UE.

L-Istati Membri jistgħu jħallu jew jeħtieġu li dan il-qafas tal-kontabilità jkun applikat għall-kontijiet ikkonsolidati ta' kumpaniji li t-titoli tagħhom mhumiex ammessi għall-kummerċ f'suq regolat fl-UE u/jew għall-kontijiet (individwali) annwali kemm jekk il-kumpanija tkun ammessa għall-kummerċ f'suq regolat fl-UE kif ukoll jekk ma tkunx. L-użu ta' l-għażliet mogħtija fl-Artikolu 5 tar-Regolament dwar l-IAS mill-Istati Membri huwa deskritt fit-tabella t'hawn taħt[4].

L-użu ta' l-għażliet mogħtija fir-Regolament dwar l-IAS mill-Istat Membri

Il-kumpaniji | Il-kumpaniji nnegozjati pubblikament | Il-kumpaniji li mhumiex innegozjati pubblikament |

L-Istati Membri tħallew ukoll jipposponu l-applikazzjoni ta' dan il-qafas sa l-1 ta' Jannar 2007 għall-kumpaniji li ħarġu biss titoli ta' self ammessi għall-kummerċ f'suq regolat fl-UE u għall-kumpaniji li t-titoli tagħhom huma ammessi għall-kummerċ barra l-UE u li, minħabba f'hekk, kienu qed jużaw standards aċċettati internazzjonalment qabel ma nħareġ ir-Regolament dwar l-IAS.

Għall-finijiet tar-Regolament dwar l-IAS, huma adottati biss l-istandards u l-interpretazzjonijiet internazzjonali tal-kontabilità approvati u maħruġa mill-IASB u mill-kumitat li ġie qablu, l-Kumitat Internazzjonali ta' Standards għall-Kontabilità (l-IASC). Dawn huma adottati mill-Kummissjoni wara proċedura tal-kumitat. L-ewwelnett, il-Kummissjoni għandha tirċievi parir tekniku ta' adozzjoni mill-Grupp Konsultattiv Ewropew għall-Informazzjoni Finanzjarja (l-EFRAG)[5], u mbagħad opinjoni mill-Grupp Konsultattiv ta' Reviżjoni ta' l-Istandards (l-SARG)[6] li teżamina jekk il-parir tekniku mogħti mill-EFRAG huwiex oġġettiv u bbilanċjat. Wara dan, il-Kummissjoni tiddeċiedi jekk hix se tressaq l-istandard jew l-interpretazzjoni għall-adozzjoni. Wara l-vot ta' l-adozzjoni fil-Kumitat Regolatorju tal-Kontabilità (l-ARC)[7], ikun hemm il-konferma min-naħa tal-Parlament Ewropew. Jekk dawn il-passi kollha jmorru tajjeb, il-Kummissjoni tiddeċiedi jekk tadottax l-istandard jew l-interpretazzjoni u tippubblikah/tippubblikaha fil-Ġurnal Uffiċjali.

2.2. L-għejjun ewlenin ta' tagħrif għar-rapport

Għal dan ir-rapport, il-Kummissjoni użat tagħrif miġbur minn diversi għejjun. Fi ħdan il-Kumitat Regolatorju tal-Kontabilità ġew ikkonsultati l-Istati Membri dwar il-punti ewlenin li kienu koperti. Għajn oħra ta' tagħrif ta' valur siewi kienu l-Laqgħat ta' diskussjoni[8] dwar l-applikazzjoni konsistenti ta' l-IFRS fl-UE. Is-Servizzi tal-Kummissjoni kkonċernati wkoll kienu f'kuntatt regolari mal-partijiet interessati huwa u jiddaħħal l-IFRS fl-UE.

Sabiex ikun hemm analiżi teknika sħiħa ta' l-implimentazzjoni ta' l-IFRS, is-Servizzi tal-Kummissjoni qiesu wkoll għadd ta' rapporti dwar l-implimentazzjoni ta' l-IFRS fis-sena 2005, imħejjija minn organizzazzjonijiet u kumpaniji differenti[9].

Dan ir-rapport tal-Kummissjoni jqis ukoll ir-rapport maħruġ mill-Kumitat tar-Regolaturi Ewropej tat-Titoli Finanzjarji (is-CESR) imsejjaħ "L-analiżi tas-CESR ta' l-implimentazzjoni u l-infurzar ta' l-IFRS fl-UE"[10], kif ukoll ir-riżultati ta' studji oħrajn u t-tagħrif disponibbli dwar l-applikazzjoni inizjali ta' l-IFRS fl-UE.

2.3. L-użu effettiv ta' l-IFRS fl-UE

Fis-sena 2005, l-għadd ta' dawk li adottaw l-IFRS u li t-titoli tagħhom kienu ammessi għall-kummerċ f'suq regolat fl-UE kien ta' 7 365, li minnhom 5 534 kienu entitajiet tal-ħruġ ta' l-ishma.

Silta mir-rapport tas-CESR, l-Appendiċi 1: L-għadd ta' dawk li adottaw l-IFRS li huma rreġistrati f'suq regolat fl-UE, ikklassifikati skond il-pajjiż (entitajiet tal-ħruġ ta' l-ishma u tal-ħruġ tal-bonds)

Membri tas-CESR | Entitajiet tal-ħruġ ta' l-ishma | Entitajiet tal-ħruġ tal-bonds[11] | It-Total |

L-Awstrija | 72 | 11 | 83 |

Il-Belġju | 144 | 2 | 146 |

Il-Bulgarija | 369 | 60 | 429 |

Ċipru | 141 | 0 | 141 |

Ir-Repubblika Ċeka | 66 | 24 | 90 |

Id-Danimarka | 140 | 8 | 148 |

L-Estonja | 16 | 6 | 22 |

Il-Finlandja | 135 | 15 | 150 |

Franza | 680 | 200 | 880 |

Il-Ġermanja | 768 | 172 | 940 |

Il-Greċja | 356 | 0 | 356 |

L-Ungerija | 34 | 1 | 35 |

L-Iżlanda | 23 | 8 | 31 |

L-Irlanda | 43 | 40 | 83 |

L-Italja | 288 | 65 | 353 |

Il-Latvja | 13 | 4 | 17 |

Il-Litwanja | 43 | 4 | 47 |

Il-Lussemburgu | 35 | 200 | 235 |

Malta | 15 | 19 | 34 |

In-Norveġja | 188 | 0 | 188 |

Il-Polonja | 197 | 0 | 197 |

Il-Portugall | 50 | 28 | 78 |

Ir-Rumanija | N/C | N/C | N/C |

Is-Slovakkja | N/C | N/C | N/C |

Is-Slovenja | 60 | 6 | 66 |

Spanja | 190 | 120 | 310 |

L-Iżvezja | 350 | 35 | 385 |

L-Olanda (NL) | 165 | 25 | 190 |

Ir-Renju Unit | 953 | 778 | 1 731 |

IT-TOTAL | 5 534 | 1 831 | 7 365 |

NC: Ma ngħatatx tweġiba |

Sal-31 ta' Diċembru 2005, kienu ġew adottati l-istandards u l-interpretazzjonijiet li ġejjin: L-IAS 1 sa 41, l-IFRS 1 sa 6, l-SIC 7 sa 32 u l-IFRIC 1 sa 5, minbarra dawk li tbiddlu jew li tneħħew qabel jew wara dik id-data[12]. Standards u interpretazzjonijiet addizzjonali ġew adottati fl-2006 (l-IFRS 7 u l-IFRIC 6 sa 9) u fl-2007 (l-IFRS 8 u l-IFRIC 10 u 11), flimkien ma' emendi għal standards li kienu diġà ġew adottati. Xi standards (l-IFRS 6), emendi għal standards (dwar l-IAS 39) u emendi għal interpretazzjonijiet (l-IFRIC 4 u 5) li ġew adottati fl-2005 setgħu jiġu applikati mill-1 ta' Jannar 2006 'il quddiem. Wieħed seta' japplika wkoll l-IFRS 7, l-IFRIC 6 u l-emendi għal xi standards adottati fil-11 ta' Jannar 2006 għar-rapporti finanzjarji għas-sena 2005.

Il-membri tas-CESR għamlu analiżi sħiħa tar-rapporti finanzjarji skond l-IFRS għas-sena 2005 ta' 1 410 kumpanija, kif ukoll analiżi tematika tar-rapporti finanzjarji skond l-IFRS għas-sena 2005 ta' 920 kumpanija oħra. Huma ħolqu "database" li fiha, sa l-aħħar ta' Awwissu 2007 kienu ddaħħlu 85 deċiżjoni ta' infurzar.

2.4. L-applikazzjoni konsistenti ta' l-IFRS fl-UE

Hija u tibbaża fuq it-tagħrif miġbur mill-għejjun imsemmija fit-Taqsima 2.2, il-Kummissjoni analizzat kemm qed jiġu applikati b'mod konsistenti fl-UE l-istandards jew l-interpretazzjonijiet li ġew adottati għas-sena finanzjarja 2005. Il-Kummissjoni waslet għall-konklużjonijet li ġejjin:

- Għalkemm, b'mod ġenerali, l-applikazzjoni ta' l-IFRS kienet sfida għall-partijiet interessati kollha, dan ġie applikat mingħajr ma kien hemm tfixkil fis-swieq jew fiċ-ċikli tar-rappurtaġġ. Din hija kisba ewlenija, speċjalment meta wieħed iqis li l-implimentazzjoni ta' l-IFRS fissret bidla ġenerali tal-qafas tal-kontabilità fl-UE għall-kumpaniji li jaqgħu fl-ambitu tar-Regolament dwar l-IAS. Il-bidla għall-IFRS ħtieġet ħidma intensiva u riżorsi sinifikanti min-naħa tal-kumpaniji kkonċernati, b'mod partikulari l-kumpaniji rreġistrati li huma iżgħar[13].

- Fost dawk li jippreparaw, l-awdituri, l-investituri u l-infurzaturi hemm l-impressjoni ġenerali li l-applikazzjoni ta' l-IFRS tejbet il-kumparabilità u l-kwalità tar-rappurtaġġ finanzjarju u li din wasslet għal iktar trasparenza.

- L-għażliet għat-twessigħ ta' l-ambitu tar-Regolament dwar l-IAS ġew implimentati b'mod differenti fi Stati Membri differenti (ara t-Taqsima 2.1 ta’ hawn fuq), skond il-kuntest ekonomiku u legali individwali tagħhom. Din l-istrateġija flessibbli ppermettiet li jkun hemm implimentazzjoni adattata għall-karatteristiċi u għall-partikularitajiet tal-kuntest tal-kontabilità f'kull Stat Membru, b'mod partikulari għar-rabtiet mar-regoli fiskali u mal-liġi tal-kumpaniji. L-użu obbligatorju ta' l-IFRS ma jidhirx li ġie estiż b'mod wiesa' għall-kumpaniji li m'humiex irreġistrati u/jew għall-kontijiet individwali.

- Ħafna mill-partijiet interessati jemmnu li hemm titjib ġenerali f'kemm jinftehmu r-rapporti finanzjarji, ħlief għal ċerti oqsma, fejn donnu għad hemm lok għal titjib, l-iktar dwar l-istrumenti finanzjarji, il-kombinamenti ta' negozji u l-pagamenti bbażati fuq l-ishma.

- Il-kontijiet skond l-IFRS xorta waħda għadhom influwenzati mit-tradizzjonijiet nazzjonali tal-kontabilità. Raġuni għal dan hija n-nuqqas ta' esperjenza u tal-prinċipji tal-kontabilità. Fil-prattika, id-dħul ta' din l-istrateġija tal-kontabilità bbażata fuq il-prinċipji, li teħtieġ ġudizzju professjonali konsiderevoli, kienet sfida f'xi Stati Membri. Madanakollu, hekk kif dawk li jippreparaw u l-awdituri jibdew jidraw l-IFRS, il-problemi tal-bidu ta' l-applikazzjoni għandhom jissolvew.

- Id-dispożizzjonijiet ta' għarfien u ta' kejl ta' l-IFRS jidhru li kienu applikati b'mod iktar ċar u konsistenti minn ċertu rekwiżiti ta' żvelar. B'mod partikulari, hemm lok għal aktar titjib fl-iżvelar tal-politiki ġenerali tal-kontabilità. Ir-regolaturi tat-titoli finanzjarji taw każ dawn il-kwistjonijiet, iżda waslu għall-konklużjoni li dawn ma naqqsux mil-livell ġenerali tal-konformità ma' l-IFRS.

- L-għażliet li jippermetti l-IFRS, inklużi dawk marbutin mal-benefiċċji ta' l-impjegati, ma' l-ispejjeż tas-self u man-negozju bi sħab, ġew użati mill-kumpaniji b'modi differenti. L-għażliet fl-IFRS rigward l-applikazzjoni bikrija wkoll intużaw ħafna. Madanakollu, l-għażliet sabiex l-applikazzjoni tal-kejl tal-valur ġust titwessa' ma ntużawx b'mod estensiv u l-użu tat-tqassim (il-"carve-out") fl-IAS 39 huwa limitat għal ftit banek biss. L-infurzaturi wrew tħassib u jixtiequ li l-għadd ta' għażliet disponibbli fl-IFRS jitnaqqas fil-ġejjieni.

- Is-CESR identifika tħassib aktar speċifiku f'ċerti oqsma, bħall-kombinamenti ta' negozji (l-avvjament, kif ukoll il-kontroll de facto u dak komuni), l-istrumenti finanzjarji (it-taħsir), l-assi mhux kurrenti, l-iżvelar dwar il-politiki tal-kontabilità, l-istimi u s-suppożizzjonijiet. L-infurzaturi rrakkomandaw ukoll li jittejjeb l-iżvelar marbut ma' l-iskemi tal-pensjoni u mal-pagamenti bbażati fuq l-ishma, kif ukoll li jinġiebu aktar f'konformità ma' xulxin il-formati tal-karta tal-bilanċ u tal-kont tal-profitt u t-telf.

- Ftit kienu l-kwistjonijiet tekniċi tal-kontabilità li tressqu quddiem il-Laqgħat ta' diskussjoni dwar l-applikazzjoni konsistenti ta' l-IFRS fl-UE. Naqas ukoll l-għadd ta' kwistjonijiet li ntbagħat lill-IFRIC għall-interpretazzjoni. Dan donnu jindika li l-istrateġija bbażata fuq il-prinċipji b'mod ġenerali qiegħda taħdem sewwa.

- L-akkademiċi diġà bdew janalizzaw l-impatt tad-dħul ta' l-IFRS fuq is-swieq tat-titoli, iżda għadu kmieni wisq biex jingħataw riżultati konklużivi. Madanakollu, l-istudji preliminari jindikaw li, għall-kumpaniji li jagħmlu l-kontijiet skond l-IFRS, hemm tnaqqis globali fl-ispiża tal-kapital.

2.5. It-tħaddim tal-proċess għall-adozzjoni u r-rekwiżiti amministrattivi marbutin miegħu

Din il-parti tar-rapport tagħti ħarsa lejn kif qed jaħdem il-proċess għall-adozzjoni, inklużi l-analiżi teknika, it-tħejjija ta' deċiżjonijiet politiċi u l-attivitajiet amministrattivi u prattiċi li jakkumpanjawhom. Ir-rapport ikopri l-aktar il-perjodu sa l-1 ta’ Lulju 2007, iżda ġew miżjuda wkoll xi elementi sussegwenti oħrajn biex ikun komplut.

Il-Kummissjoni tixtieq tressaq il-kummenti li ġejjin dwar l-aspetti differenti tal-proċess għall-adozzjoni:

- L-analiżi teknika u l-parir ta' adozzjoni: Il-Grupp Konsultattiv Ewropew għall-Informazzjoni Finanzjarja (l-EFRAG) għadda lill-Kummissjoni analiżi u parir ta' adozzjoni fil-ħin u ta' kwalità għolja. Il-parir ta' adozzjoni pprovda lill-Kumitat Regolatorju tal-Kontabilità u lill-Parlament Ewropew bit-tagħrif tekniku li kellhom bżonn biex ikunu jistgħu jieħdu d-deċiżjonijiet tagħhom. Il-pariri kollha ta' adozzjoni inkludew opinjoni ċara dwar jekk l-istandard ikkonċernat kellux jiġi adottat jew le, ħlief fil-każ ta' l-IAS 39. Biż-żmien, l-EFRAG tejjeb l-istruttura tal-parir tiegħu, li llum il-ġurnata jipprovdi, b'mod regolari, bażi għall-konklużjonijiet. Kull xahar, il-Grupp ta’ Esperti Tekniċi (it-TEG) ta' l-EFRAG ikollu laqgħa ta' tlett ijiem.

- Ir-reviżjoni mill-Grupp Konsultattiv ta' Reviżjoni ta' l-Istandards (l-SARG): L-SARG twaqqaf sabiex jiżgura li l-parir ta' adozzjoni mogħti mill-EFRAG ikun ibbilanċjat u newtrali. L-SARG implimentat proċeduri ta' ħidma effiċjenti u tat valutazzjonijiet fil-ħin. Matil is-sena 2007 il-grupp iltaqa' tlett darbiet.

- Il-proċeduri ta' adozzjoni u tal-kumitat: Il-proċedura ta' adozzjoni qiegħda taħdem sewwa, u ħafna mill-istandards u mill-interpretazzjonijiet ġew adottati fil-ħin. L-adozzjoni ta' l-istandards jew l-interpretazzjonijiet, f'konformità mar-Regolament dwar l-IAS, segwiet il-proċeduri attwali tal-kumitat[14]. Dawn il-proċeduri se jinbidlu[15], u se jkun hemm iktar enfasi fuq l-iskrutinju mill-Parlament u mill-Kunsill. Il-Parlament isegwi mill-qrib l-iżviluppi fl-oqsma tal-kontabilità u jieħu sehem attiv fil-proċess għall-adozzjoni. Il-Parlament talab ukoll li tiddaħħal analiżi ta' l-effetti fil-proċess għall-adozzjoni.

- Il-ħtieġa li jiġu analizzati l-effetti ta' l-introduzzjoni ta' standards u interpretazzjonijiet ġodda: Il-valutazzjonijiet ta' l-impatt ilhom parti integrali mill-proċess ġenerali leġiżlattiv ta' l-UE u ta' l-Istati Membri għal ħafna snin. Il-Kummissjoni tehmeż dawn it-tip ta' valutazzjonijiet ma' kull proposta ġdida leġiżlattiva. Qed tidher biċ-ċar il-ħtieġa li jiġu analizzati l-effetti ta' l-istandards tal-kontabilità. Il-valutazzjonijiet ta' l-impatt jew l-analiżi ta' l-effetti għandhom jitwettqu fi stadju bikri tal-proċess tat-tfassil ta' l-istandards, u għalhekk il-Kummissjoni talbet lill-IASB sabiex iwettaq dawn it-tipi ta' analiżi bħala parti mill-proċess ta' tħejjija ta' standards ġodda. Il-Fondazzjoni tal-Kumitat ta' l-Istandards Internazzjonali tal-Kontabilità (l-IASCF)[16] diġà tat kelmitha li se tagħmel dan għall-istandards fil-ġejjieni. Sadanittant, wara taħditiet mal-Parlament Ewropew, il-Kummissjoni qablet li dawn it-tipi ta' analiżi ta' l-effetti għandhom jitwettqu fil-livell ta' l-UE għal standards u interpretazzjonijiet ewlenin li jkunu se jiddaħħlu. Is-Servizzi tal-Kummissjoni għadhom kemm iffinalizzaw studju ta' l-effetti għall-IFRS 8 ("Segmenti ta' l-Operat") u se jħejju analiżi simili għall-IFRIC 12 ("Arranġamenti għall-Konċessjoni ta' Servizz") u għall-IAS 23 ("Il-kosti tas-self"). Għall-istandards li se jiddaħħlu sussegwentement, l-EFRAG – f'ħidma mill-qrib mas-Servizzi tal-Kummissjoni – se jagħti kontribut għal dawn it-tipi ta' analiżi bħala parti mit-tħejjija tal-parir ta' adozzjoni tiegħu.

- L-adozzjonijiet u t-tqassim (il-"carve-out"): L-idea bażika wara r-Regolament dwar l-IAS hija li l-IFRS u l-IFRIC għandhom ikunu ta' kwalità għolja u li dawn tant jirċievu appoġġ ġenerali li jkunu jistgħu jiġu adottati fl-UE. L-istandards u l-interpretazzjonijiet kollha ġew adottati ħlief għal xi partijiet limitati ta' l-IAS 39. Meta kien qed jiġi adottat l-IAS 39, kien intqal biċ-ċar li t-tqassim fl-IAS 39 għandu jkun limitat f'termini taż-żmien u ta' l-ambitu. F'dak li għandu x'jaqsam ma' l-ewwel tqassim relatat ma' l-għażla tal-valur ġust, l-IASB, wara li kkuntattja lis-superviżuri bankarji u lill-banek ċentrali, malajr ressaq soluzzjoni ġdida li wara ġiet adottata fl-UE. Għat-tieni tqassim, li għandu x'jaqsam ma' ċerti regoli tal-"hedging", kien aktar diffiċli li tinstab soluzzjoni. Minkejja l-ħidma intensiva ta' l-IASB u ta' l-industrija bankarja, s'issa għadha ma nstabet l-ebda soluzzjoni. Il-Kummissjoni ħeġġet liż-żewġ naħat iressqu soluzzjonijiet ġodda għal din il-kwistjoni.

- Il-konsolidazzjoni u t-traduzzjoni ta' l-IFRS: Kull IFRS individwali huwa adottat permezz ta' regolament fl-UE. Dan ifisser li m'hi disponibbli l-ebda verżjoni sħiħa kkonsolidata ta' l-IFRS li jkun ġie adottat. Barra minn hekk, l-Istati Membri u l-partijiet interessati għandhom dubji dwar il-kwalità ta' xi wħud mill-verżjonijiet lingwistiċi ta' l-IFRS li jkun ġie adottat. Sabiex jindirizzaw dan it-tħassib, is-Servizzi tal-Kummissjoni li huma responsabbli għal dan taw bidu għal proġett kbir ta' konsolidazzjoni, flimkien ma' reviżjoni lingwistika ddettaljata ta' l-istandards u l-interpretazzjonijiet kollha li ġew adottati.

- It-tul globali tal-proċedura għall-adozzjoni: Iż-żmien medju bejn meta ssir il-pubblikazzjoni min-naħa ta' l-IASB u meta jiġi adottat standard li jkun ġie approvat mill-UE s'issa kien ta' madwar tmien sa għaxar xhur. Probabbilment, id-deċiżjoni li jibdew jitwettqu analiżi ta' l-effetti fil-livell ta' l-UE se ttawwal dan il-proċess b'madwar sitt xhur oħra. Madanakollu, fil-ġejjieni dawn it-tipi ta' analiżi se jsiru parti mill-proċess tat-tfassil ta' l-istandards ta' l-IASB, f'liema każ l-adozzjoni min-naħa ta' l-UE għandha tibqa' tieħu madwar tmien sa għaxar xhur. F'każijiet urġenti, l-Istati Membri u l-Parlament urew li huma flessibbli sabiex ikunu jistgħu jittieħdu deċiżjonijiet ta' adozzjoni ta' malajr (hekk ġara, per eżempju, fil-każ ta' l-IFRS 7 – "L-istrumenti finanzjarji: L-iżvelar"). Huwa ta' interess komuni li l-proċess għall-adozzjoni jsir kemm jista' jkun vantaġġuż. Għadd ta' kumpaniji rreġistrati talbu lill-Kummissjoni sabiex ikun hemm adozzjoni ta' malajr f'dak li għandu x'jaqsam ma' l-IFRS 7 kif ukoll ma' l-IFRS 8, sabiex dawn ikunu jistgħu jiġu applikati b'mod bikri.

3. Konklużjonijiet

L-ewwel sena ta' applikazzjoni obbligatorja ta' l-IFRS fl-UE kienet, b’mod ġenerali, pożittiva, anke jekk il-bidliet regolatorji u n-nuqqas ta' esperjenza kienu ta' sfida għal min kien qed japplikah għall-ewwel darba. Żdied il-valur tat-tagħrif tal-kontabilità mogħti u, b'mod ġenerali, l-IFRS kien applikat b'mod konsistenti fl-UE. Il-livell ta' konsistenza bejn il-kontijiet skond l-IFRS probabbli jiżdied maż-żmien, hekk kif dawk li jippreparaw u l-awdituri jiksbu iktar esperjenza ta' l-applikazzjoni tal-qafas il-ġdid tal-kontabilità.

Il-proċess għall-adozzjoni ta' l-UE nnifsu jiżgura l-kwalità teknika, il-leġittimità politika u r-rilevanza għan-negozju. Is-sistema qiegħda taħdem sewwa u l-istandards ġew adottati fil-ħin. Is-sistema għall-adozzjoni hija flessibbli u diġà ġiet emendata – l-inklużjoni ta' l-SARG, metodi ġodda ta' ħidma fl-EFRAG, regoli ġodda dwar il-proċeduri tal-kumitat, studji ta' l-effetti, eċċ. Ir-riżultat aħħari huwa li issa hemm struttura effiċjenti u leġittima.

Sabiex jinżamm il-livell għoli attwali ta' aċċettazzjoni ta' l-IFRS fl-UE, huwa importanti li l-partijiet interessati jħossu li l-programm ta' ħidma ta' l-IASB qed jindirizza l-kwistjonijiet it-tajbin u li l-istandards jew l-interpretazzjonijiet tal-ġejjieni se jipprovdu soluzzjonijiet xierqa tal-kontabilità. Xi partijiet interessati diġà esprimew dubji dwar xi wħud mill-proġetti tal-kontabilità li qed jitħejjew mill-IASB dal-ħin. Għaldaqstant, huwa kruċjali li l-istituzzjonijiet ta' l-UE, l-Istati Membri u l-partijiet interessati jiġu involuti kmieni kemm jista' jkun fil-proċess tat-tfassil ta' l-istandards, minħabba li dan itejjeb il-kwalità tal-ħidma u jżid il-leġittimità u l-aċċettazzjoni ta' l-istandards jew ta' l-interpretazzjonijiet tal-ġejjieni. Se jiġi ssorveljat mill-qrib ukoll il-mod kif l-IASB jagħmel il-valutazzjoni ta' l-impatt fil-ġejjieni.

Sabiex tiġi żgurata l-kwalità ġenerali ta' l-IFRS u l-IFRIC fil-ġejjieni, huwa importanti wkoll li l-IASB jew l-IASCF ikollu/ikollha struttura xierqa ta' tmexxija u fondi sikuri. Is-Servizzi tal-Kummissjoni jivvalutaw b'mod regolari t-tmexxija u l-iffinanzjar ta' l-IASB jew l-IASCF u jippubblikaw rapporti li jistgħu jitniżżlu minn fuq is-sit ta' l-internet tal-Kummissjoni[17].

[1] Ir-Regolament (KE) Nru 1606/2002 tal-Parlament Ewropew u tal-Kunsill tad-19 ta' Lulju 2002 rigward l-applikazzjoni ta' standards internazzjonali tal-kontabilità, ĠU L 243, 11.9.2002, p. 1

[2] L-Istandards Internazzjonali tal-Kontabilità (l-IAS) inħarġu l-ewwel mill-Kumitat Internazzjonali ta' Standards għall-Kontabilità (l-IASC), il-predeċessur tal-Bord ta' l-Istandards Internazzjonali tal-Kontabilità (l-IASB). L-IASB joħroġ l-Istandards Internazzjonali ta' Rapportaġġ Finanzjarju (l-IFRS).

[3] Il-Kumitat Permanenti għall-Interpretazzjonijiet (l-SIC) kien dak li ġie qabel il-Kumitat għall-Interpretazzjoni tar-Rappurtar Finanzjarju Internazzjonali (l-IFRIC).

[4] Tagħrif meħud minn studju mitlub mill-Kummissjoni u mwettaq mill-"Istitut tal-Kontabilisti Liċenzjati ta' l-Ingilterra u Wales), imsejjaħ "EU Implementation of IFRS and the Fair Value Directive" (L-implimentazzjoni ta' l-IFRS u tad-Direttiva dwar il-Valur Ġust fl-UE), 2007, paġna 24.

[5] Għal aktar tagħrif ara: efrag.org

[6] Għal aktar tagħrif ara: http://ec.europa.eu/internal_market/accounting/ias_en.htm#standards

[7] Għal aktar tagħrif ara: http://ec.europa.eu/internal_market/accounting/committees_en.htm#arc

[8] Għal aktar tagħrif ara: http://ec.europa.eu/internal_market/accounting/ias_en.htm#060609

[9] B'mod partikulari r-rapport imsemmi fin-nota 4. Dan ir-rapport jinkludi lista komprensiva ta' l-istudji l-oħrajn li saru.

[10] Din l-analiżi kienet ippubblikata fis-7 ta’ Novembru 2007 bħala d-dokument nru CESR/07-352 u tinsab fuq is-sit ta' l-internet tas-CESR li ġej:

http://www.cesr-eu.org/index.php?page=contenu_search_res&doconly=all&searchdatefromday=1&searchdatefrommonth=1&searchdatefromyear=1970&searchdatetoday=29&searchdatetomonth=2&searchdatetoyear=2008&searchkeyword=07-352

[11] Xi entitajiet tal-ħruġ tal-bonds jistgħu jkunu ddeċidew li jipposponu l-applikazzjoni ta' l-IFRS sas-sena 2007 f'konformità ma' l-Artikolu 9 tar-Regolament (KE) Nru 1606/2002 tal-Parlament Ewropew u tal-Kunsill.

[12] L-IAS 3 sa 6, l-IAS 9, l-IAS 13 sa 15, l-IAS 22, l-IAS 25, l-IAS 30, l-IAS 35, l-IFRIC 3, l-SIC 1 sa 6, l-SIC 8 u 9, l-SIC 11, l-SIC 14, l-SIC 16 sa 20, l-SIC 22 sa 24, l-SIC 26, l-SIC 28, l-SIC 30 u l-SIC 33.

[13] Analiżi ta' l-ispejjeż ta' l-implimentazzjoni u l-ispejjeż sussegwenti ta' l-applikazzjoni rikorrenti fl-istudju ta' l-ICAEW (ara n-nota 4) uriet li dawn jidhru li huma ogħla għall-kumpaniji li huma iżgħar (li għandhom fatturat ta' inqas minn €500 miljun), u li jammontaw għal 0.31% u 0.06% tal-fatturat tagħhom rispettivament, li jibqgħu livelli aċċettabbli. Il-kumpaniji kkwotati li huma iżgħar ħabbtu wiċċhom ukoll ma' iktar diffikultajiet fl-applikazzjoni ta’ l-IFRS minħabba r-riżorsi limitati tagħhom u n-nuqqas ta' esperjenza fl-IFRS.

[14] Id-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' l-implimentazzjoni konferiti fuq il-Kummissjoni (ĠU L 184, 17.7.1999, p. 23).

[15] Id-Deċiżjoni tal-Kunsill 2006/512/KE tas-17 ta’ Lulju 2006 li temenda d-Deċiżjoni 1999/468/KE li tipprovdi l-proċeduri għall-eżerċizzju tas-setgħat ta' implimentazzjoni konferiti lill-Kummissjoni, ĠU L 200, 22.7.2006, p. 11).

L-istadju l-iktar riċenti: Regolament tal-Parlament Ewopew u tal-Kunsill li jemenda r-Regolament (KE) Nru 1606/2002 rigward l-applikazzjoni ta’ standards internazzjonali tal-kontabilità, f’dak li għandu x’jaqsam mas-setgħat ta’ implimentazzjoni konferiti lill-Kummissjoni, ġie adottat u ppubblikat fil-ĠU fid-9 ta’ April 2008.

[16] L-IASCF hija l-fondazzjoni wara l-IASB.

[17] Għal aktar tagħrif ara: http://ec.europa.eu/internal_market/accounting/ias_en.htm#070112