9.8.2008   

MT

Il-Ġurnal Uffiċjali ta’ l-Unjoni Ewropea

C 204/110

1.1

Il-KESE jemmen li l-ħarsien tas-saħħa tal-ħaddiema kontra l-effetti negattivi diretti u indiretti tal-kampi elettro-manjetiċi għandhom jaqgħu taħt id-dispożizzjonijiet ta' direttiva Ewropea kemm jista' jkun malajr. Madankollu, meta jqis l-argumenti li resqet il-Kummissjoni u dawk ippreżentati f'din l-opinjoni, il-KESE huwa favur il-proposti tal-Kummissjoni.

1.2

Il-problemi li jqumu sabiex id-dispożizzjonijiet tad-Direttiva 2004/40/KE jiġu implimentati fil-prattika ma jissolvewx billi sempliċement tiġi posposta d-data tat-traspożizzjoni. Għalhekk il-KESE taqbel mal-Kummissjoni dwar il-ħtieġa li jsir xogħol urġenti biex din id-direttiva titjib.

1.3

Il-KESE jenfasizza li l-fatt li d-data kurrenti għad-dħul fis-seħħ tad-direttiva ġiet posposta b'erba' snin u l-emendi ippjanati għall-kontenut tagħha ser jagħtu messaġġ ambigwu lill-ħaddiema u lil min iħaddimhom. Il-KESE għalhekk jistenna li l-Kummissjoni tieħu passi urġenti sabiex ittaffi l-effetti negattivi ta' din l-inċertezza fis-sistema legali ta' l-UE.

1.4

Il-Kumitat jirrakkomanda li l-Kummissjoni tqis il-kummenti ddettaljati u l-proposti li hemm f'din l-opinjoni fil-ħidma futura tagħha.

2.1

L-iskop tal-proposta tal-Kummissjoni hu li tipposponi b'erba' snin, sat-30 ta' April 2012, il-perjodu ta' traspożizzjoni tad-Direttiva 2004/40/KE dwar il-ħtiġijiet minimi għas-saħħa u s-sigurtà fir-rigward ta' l-espożizzjoni ta' ħaddiema għal riskji li jiġu minn aġenti fiżiċi (kampi elettro-manjetiċi).

2.2

Il-ġustifikazzjoni prinċipali għall-proposta tal-Kummissjoni hija l-preokkupazzjoni li l-valuri limiti ta' espożizzjoni għall-ħaddiema stabbiliti mid-direttiva jistgħu jżommu l-iżvilupp tad-dijanjożi medika bl-użu ta' immaġini b'riżonanza manjetika (MRI). Il-Kummissjoni tixtieq ukoll li jkollha aktar żmien biex tagħmel valutazzjoni ddettaljata fuq l-effetti tad-direttiva fuq is-sigurtà ta' kategoriji oħra ta' ħaddiema u l-iżvilupp ta' setturi oħra ta' l-ekonomija li jużaw il-kampi elettro-manjetiċi.

2.3

Fl-istess waqt, il-Kummissjoni ħabbret li ser tipproponi xi tibdil fid-Direttiva 2004/40/KE b'rabta mal-pubblikazzjoni skedata fl-2008 u l-2009 tar-riżultati tar-riċerka xjentifika ġdida, inkluż ir-rakkomandazzjonijiet ta' l-ICNIRP (1) u d-WHO (2), li l-Kummissjoni qed tistenna ser jipproponu valuri limitu ta' espożizzjoni differenti minn dawk li bħalissa hemm stipulati fid-Direttiva.

2.4

Il-proposta tal-Kummissjoni Ewropea għadha ma ġietx diskussa f'opinjoni mill-imsieħba soċjali Ewropej.

2.5

Il-proposta li temenda d-Direttiva 2004/40/KE hija t-tmintax-il Direttiva individwali skond it-tifsira ta' l-Artikolu 16(1), tad-Direttiva 89/391/KEE; hija tirrigwarda l-ħarsien tal-kategoriji kollha tal-ħaddiema mir-riskji ġejjin mill-espożizzjoni għall-kampi elettro-manjetiċi fil-post tax-xogħol (3). L-abbozz ta' Direttiva (4) oriġinali ma kienx ġie sottopost għal opinjoni min-naħa tal-KESE, peress li l-opinjoni tal-KESE ta' l-1993 (5) dwar id-direttivi relatati ma' l-erba' aġenti fiżiċi fuq il-post tax-xogħol kienet meqjusa bħala biżżejjed għal dan l-iskop.

2.6

Il-ħarsien mill-espożizzjoni eċċessiva għall-kampi elettro-manjettiċi bħalissa tvarja ħafna fost l-Istati Membri — seba' pajjiżi diġà infurmaw lill-Kummissjoni li lestew l-implimentazzjoni tad-direttivi fil-liġijiet tagħhom (l-Awstrija, ir-Repubblika Ċeka, l-Islovakkja, il-Litwanja, il-Latvja, l-Estonja u l-Italja (6)); f'pajjiżi oħra, dispożizzjonijiet oħra, għadhom japplikaw (l-Isvezja, il-Finlandja, il-Polonja, il-Bulgarija, ir-Rumanija, ir-Renju Unit, Franza eċċ.); fl-aħħar hemm xi pajjiżi li m'għandhom l-ebda dispożizzjoni f'dan il-qasam (7).

3.1

Meta wieħed iqis id-dispożizzjonijiet tad-Direttiva Qafas 89/391/KE u d-data xjentifika estensiva li hija disponibbli, jidher biċ-ċar li dawn il-kwistjonijiet iridu jiġu koperti minn direttiva Ewropea ħalli jiġi żgurat il-ħarsien adegwat tas-saħħa tal-ħaddiema, b'kunsiderazzjoni speċjali għall-ommijiet potenzjali mill-effetti negattivi diretti u indiretti tal-kampi elettromanjetiċi u sabiex il-ħaddiema jkunu jistgħu jwettqu d-dmirijiet professjonali tagħhom b'mod korrett.

3.2

Madankollu, meta jqis l-argumenti li ressqet il-Kummissjoni u dawk ippreżentati f'din l-opinjoni, il-KESE huwa favur il-proposta tal-Kummissjoni.

3.3

Il-KESE jaqbel mal-Kummissjoni li hemm bżonn urġenti li d-Direttiva tiġi mtejba sabiex tiżgura l-implimentazzjoni fil-prattika tad-dispożizzjonijiet mid-Direttiva. Il-KESE jemmen li d-Direttiva mtejba għandha tieħu aproċċ aktar sofistikat lejn il-kwistjoni tal-ħarsien mir-riskju ta' espożizzjoni għal kampi elettro-manjetiċi, u tqis il-kummenti ddettaljati li ġew żviluppati hawn taħt.

3.4

Il-Kumitat jinnota b'dispjaċir li l-Kummissjoni Ewropea, għall-ewwel darba fl-istorja tagħha, ittardjat d-dħul fis-seħħ tad-dispożizzjonijiet ta' direttiva obbligatorja dwar preskrizzjonijiet minimi tas-sigurtà tal-ħaddiema u l-ħelsien tagħhom minn riskji fuq il-post tax-xogħol.

3.5

It-tħabbira min-naħa tal-Kummissjoni li hemm bżonn ta' tibdil fil-kontenut tad-direttiva u t-talba tagħha lill-Istati Membri sabiex iwaqqfu t-traspożizzjoni (8), effettivament tfisser li d-Direttiva fil-forma kurrenti tagħha qed tiġi rtirata. Iżda formalment, dak kollu li jkun qed jiġri jkun li tiġi posposta d-data tad-dħul fis-seħħ. Dan ser iwassal għal inkonsistenzi legali, peress li l-partijiet kollha kkonċernati ser jirċievu messaġġi konfliġġenti dwar l-ambitu ta' l-azzjoni meħtieġa sabiex tillimita l-espożizzjoni tal-ħaddiema Ewropej mill-kampi elettro-manjetiċi. Il-KESE għalhekk jenfasizza l-importanza li jiġu stabbiliti regoli konsistenti kemm jista' jkun malajr.

3.6

L-analiżi tad-Direttiva 2004/40/KE implimentati f'diversi Stati Membri. li saret bi tħejjija għat-traspożizzjoni tad-direttiva, wriet numru ta' nuqqasijiet li kienu jagħmlu t-traspożizzjoni tagħha partikolarment diffiċli. Il-Kumitat jafda li l-abbozz tal-verżjoni mtejba tad-direttiva, li l-Kummissjoni tittama li tkun lesta fl-2009, tiġi sottomessa għall-opinjoni tal-Kumitat u li kwalunkwe kumment li jagħmel jiġi kkunsidrat serjament.

3.7

Il-Kumitat jinnota li livelli kurrenti ta' ħarsien għall-ħaddiema mir-riskji ta' espożizzjoni għall-kampi elettro-manjetiċi jvarjaw bejn l-Istati Membri individwali.Il-preparazzjoni urġenti ta' test imtejjeb għad-direttiva, li jipprovdi lill-ħaddiema kollha b'livell xieraq ta' sigurtà waqt li jkunu esposti għall-kampi elettromanjetiċi, għandha tiġi trattata bħala kwistjoni prijoritarja.

4.1

Ir-raġunijiet li għalihom il-Kummissjoni pposponiet id-data ta' l-għeluq għat-traspożizzjoni tad-direttiva jidhru li huma xi ftit sbilanċjati u jiffukaw biss fuq grupp żgħir ħafna ta' ħaddiema (diversi mijjiet ta' individwi madwar l-Ewropa) li huma esposti b'mod partikolari għal riskji ta' dan it-tip, jiġifieri, impjegati li joperaw t-tagħmir ta' l-MRI. Madankollu, il-ġustifikazzjoni ma tqisx l-effetti li jseħħu meta tiġi posposta azzjoni biex jiġu protetti impjegati, li jiffurmaw parti minn grupp ta' ħaddiema li huwa ħafna akbar, mill-impatt ta' sorsi ta' kampi elettro-manjetiċi użati f'diversi setturi ekonomiċi (weldjar, tagħmir ta' l-elettroliżi, emittenti bl-antenni, installazzjonijiet tad-dawl eċċ.) li ta' l-anqas jgħoddu diversi miljuni madwar l-Ewropa.

4.2

Il-KESE jenfasizza li l-posponiment ta' l-iskadenza tat-traspożizzjoni waħdu mhux ser isolvi l-problemi li ġew identifikati riċentement, li huma relatati ma' definizzjonijiet impreċiżi. Dan ikun meħtieġ biex tinħoloq sitwazzjoni ekwa għaż-żewġ naħat ta' l-industrija.

4.3

Il-KESE jemmen li huwa importanti li r-regoli li jiġu stabbiliti jkollhom bażi xjentifika soda. L-istorja tar-riċerka xjentifika fl-effetti ta' l-espożizzjoni tal-kampi elettro-manjetiċi tmur lura għan-nofs is-seklu 20, u tagħti sfond li huwa stabbilit tajjeb għal-limiti minimi ta' espożizzjoni għas-saħħa u s-sigurtà tal-ħaddiema. Għalhekk, il-KESE jemmen li l-adozzjoni tad-direttivi mtejba għandha sseħħ mhux aktar tard mill-erba' snin proposti mill-Kummissjoni.

4.4

Il-KESE jemmen li l-Kummissjoni Ewropea għandha turi sens akbar ta' inizjattiva u indipendenza billi attivament toħloq politika ta' ħarsien għall-ħaddiema kontra espożizzjoni eċċessiva għall-kampi elettro-manjetiċi fil-post tax-xogħol (partikolarment, peress li l-popolazzjoni ġenerali bħalissa hija koperta minn dan il-ħarsien taħt ir-Rakkomandazzjoni 519/1999 (9))u xi pajjiżi diġà ħolqu sistemi legali għall-ħarsien tal-ħaddiema kontra l-espożizzjoni għall-kampi elettromanjetiċi

4.5

Il-Kumitat jemmen li, permezz ta' konsultazzjoni madwar l-Ewropa kollha ta' esperti xjentifiċi u legali u l-istituzzjonijiet mis-27 Stat Membru kollha il-Kummissjoni tkun tista' tagħmel użu aktar effettiv ta' l-esperjenza prattika tagħhom u tqis id-diversi soluzzjonijiet leġislattivi speċifiċi adottati fir-reġjuni varji sabiex issolvi problemi identifikati riċentement li issa qed iżommu t-traspożizzjoni u l-applikazzjoni effettiva tad-Direttiva 2004/40/KE.

4.6

Il-KESE jappella lill-Kummissjoni, hekk kif għamel fl-opinjoni tiegħu ta' l-1993 (10) sabiex tagħmel riċerka ħalli tidentifika r-riskji għas-saħħa tal-ħaddiema minħabba fil-kundizzjonijiet fuq il-post tax-xogħol bħall-espożizzjoni għall-kampi manjetiċi statiċi jew il-kampi elettro-majetiċi ta' frekewenza intermedjarja (inkluż l-espożizzjoni fuq medda ta' snin).

4.7

Meta wieħed iqis it-titjib fid-Direttiva 2004/40/KE mħabbra mill-Kummissjoni u s-sejħa, li diġà saret referenza għaliha, lill-Istati Membri sabiex iwaqqfu kull ħidma fuq it-traspożizzjoni formali tad-dispożizzjonijiet tad-Direttiva fis-sistema legali nazzjonali, ma għandha tiġi ppubblikata l-ebda informazzjoni fl-istandards tas-CENELEC (11) dwar “l-armonizzazzjoni tagħhom mad-Direttiva 2004/40/KE” sakemm jitfassal it-test imtejjeb tad-direttiva. Dan għandu jagħmilha possibbli li jinżamm livell xieraq ta' konsistenza fi ħdan is-sistema legali ta' l-UE.

4.8

Peress li l-proċess li biħ il-kundizzjonijiet ta' l-espożizzjoni tal-ħaddiema jsir konformi mad-dispożizzjonijiet tad-direttiva jista', f'ċerti każi, jinvolvi proċeduri tekniċi importanti (inkluż it-tibdil ta' tagħmir), l-implimentazzjoni tad-dispożizzjonijiet tad-direttiva fin-negozji trid, sa ċertu punt, tqis fatturi ekonomiċi. F'dan il-kuntest, ta' min wieħed jeżamina l-esperjenzi tal-passat fl-implimentazzjoni tad-dispożizzjonijiet tad-direttiva tat-tagħmir tax-xogħol (12), li inkludiet perjodu adegwat għall-adattar ta' l-istazzjonijiet tax-xogħol għar-rekwiżiti żviluppati fid-direttiva.

4.9

Mill-perspettiva ta' min iħaddem, huwa partikolarment importanti li jiddaħħlu d-dispożizzjonijiet marbuta ma' tagħmir ġdid l-ewwel għaliex l-implimentazzjoni tas-soluzzjonijiet tekniċi li jnaqqsu jew kompletament jeliminaw ir-riskju għall-ħaddiema hija l-aktar metodu irħis u effettiv għall-produtturi. Il-KESE jenfasizza li din it-tip ta' azzjoni tipproteġi wkoll lil dawk in-nies li jużaw dan it-tagħmir għal attività ekonomika indipendenti u li m'humiex formalment koperti mill-ħarsien li jiġi mid-direttiva dwar il-ħarsien ta' l-impjegati (per eżempju waqt xogħol ta' weldjar f'ditti ta' artiġjanat familjari jew f'xogħol ta' l-agrikoltura).

4.10

Barra minn hekk, id-dispożizzjonijiet għall-produtturi u dawk li jipprovdu d-dokumentazzjoni dwar in-natura u l-firxa tal-kampi elettro-manjetiċi prodotti minn apparat varju, fil-futur, ser jagħmluha possibbli li jonqsu l-ispejjeż b'mod sinifikanti minħabba fil-valutazzjoni tax-xogħol marbut mar-riskji ta' l-espożizzjoni għall-kampi elettro-manjetiċi. Fil-preżent, l-assenza ta' kwalunkwe regolament effettiv fil-livell Ewropew tfisser li dokumentazzjoni ta' din it-tip ta' tiġix provduta. Dan huwa ta' piż partikolarment għall-intrapriżi żgħar u ta' daqs medju li ma tantx ikunu jistgħu jifilħu għall-ispejjeż ta' valutazzjoni tar-riskju professjonali.

4.11

L-aċċess għad-dokumentazzjoni adattata tal-produtturi tippermetti lit-trejdjunjonisti jew lill-kumpaniji ta' l-assikurazzjoni li jiżviluppaw attivitajiet varji mmirati li jħarsu lill min iħaddem, irrispettivament mill-iskadenza ta' l-implimentazzjoni tad-direttiva u d-dispożizzjonijiet futuri tagħha (skond il-prattika li tiġi rakkomandata universalment li wieħed jevita riskji mhux meħtieġa, fejn possibbli).

4.12

Il-KESE jesprimi t-tħassib tiegħu għaliex il-fatt li l-iskadenza tat-traspożizzjoni ġiet posposta jista' jwassal b'mod dirett sabiex fil-futur ikompli jidħol apparat fil-postijiet tax-xogħol mingħajr dokumentazzjoni dwar ir-riskji marbuta ma' l-użu jew it-tiswija tiegħu.