Riżoluzzjoni tal-Kunsill tal-Unjoni Ewropea u tar-Rappreżentanti tal-Gvernijiet tal-Istati Membri mlaqqgħin fil-Kunsill dwar qafas għall-kooperazzjoni Ewropea fil-qasam taż-żgħażagħ:

L-Istrateġija tal-Unjoni Ewropea għaż-Żgħażagħ 2019-2027

(2018/C 456/01)

IL-KUNSILL TAL-UNJONI EWROPEA U R-RAPPREŻENTANTI TAL-GVERNIJIET TAL-ISTATI MEMBRI MLAQQGĦIN FIL-KUNSILL,

JIRRIKONOXXU l-kooperazzjoni tal-politika tal-UE dwar iż-żgħażagħ sal-2019. L-UE ilha li bdiet kooperazzjoni ddedikata tal-Politika tal-UE dwar iż-Żgħażagħ ibbażata fuq il-prinċipji ta’ parteċipazzjoni attiva u aċċess ugwali għall-opportunitajiet mill-2002 (1), f’sinerġija ma’ politiki oħra mmirati lejn iż-żgħażagħ, bħall-edukazzjoni, it-taħriġ u l-impjiegi. Il-kooperazzjoni wasslet għal bidliet politiċi u leġislattivi fl-Istati Membri u kkontribwiet għall-bini ta’ kapaċitajiet tal-organizzazzjonijiet taż-żgħażagħ.

IFAKKRU li peress li l-għan ta’ din ir-Riżoluzzjoni huwa li titwaqqaf Strateġija tal-UE għaż-Żgħażagħ kapaċi li tindirizza l-isfidi li qed jiffaċċjaw iż-żgħażagħ madwar l-Ewropa kollha, tipprovdi bażi komuni u koerenti tar-rispons tal-UE għalihom, u tikkomplementa l-isforzi u l-inizjattivi tal-Istati Membri f’dan ir-rigward, tali għan jista’ jintlaħaq aħjar fil-livell tal-UE milli mill-Istati Membri waħedhom. Il-Kunsill jista’ għalhekk jadotta inizjattivi, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea, sabiex jintlaħaq dan il-għan. B’konformità mal-prinċipju tal-proporzjonalità, kif stipulat f’dak l-Artikolu, din ir-Riżoluzzjoni ma tmurx lil hinn minn dak li huwa meħtieġ sabiex jinkiseb dak il-għan.

JAGĦRFU li

1. Iż-żgħażagħ għandhom rwol speċifiku fis-soċjetà u jħabbtu wiċċhom ma’ sfidi speċifiċi

Iż-żgħażagħ huma ħerqana li jieħdu l-kontroll ta’ ħajjithom u jitħalltu ma’ u jappoġġaw lill-oħrajn. Meta jieħdu l-kontroll, dawn jesperjenzaw diversi tranżizzjonijiet fil-ħajja personali tagħhom u l-ambjent ta’ madwarhom, mill-edukazzjoni għax-xogħol, imorru jgħixu għal rashom, sħubijiet jew jibdew ħajja tal-familja. Bosta jiffaċċjaw inċertezzi dwar il-ġejjieni tagħhom, bħala riżultat tal-globalizzazzjoni u t-tibdil fil-klima, il-bidla teknoloġika, ix-xejriet demografiċi u soċjoekonomiċi, il-populiżmu, id-diskriminazzjoni, l-esklużjoni soċjali u l-aħbarijiet foloz b’effetti li għadhom mhux magħrufa fuq l-impjiegi, il-ħiliet jew il-mod kif jaħdmu d-demokraziji tagħna.

Għandha tingħata attenzjoni speċjali liż-żgħażagħ f’riskju ta’ marġinalizzazzjoni bbażata fuq sorsi potenzjali ta’ diskriminazzjoni, bħall-oriġini etnika, is-sess, l-orjentazzjoni sesswali, id-diżabbiltà, ir-reliġjon, it-twemmin jew l-opinjoni politika tagħhom.

L-esklużjoni soċjoekonomika u dik demokratika jmorru id f’id (2). Iż-żgħażagħ li qed jitħabtu mal-iżvantaġġi ġeneralment ikunu ċittadini inqas attivi u jkollhom inqas fiduċja fl-istituzzjonijiet. L-Ewropa ma tiflaħx għal talent moħli, esklużjoni soċjali jew diżimpenn fost iż-żgħażagħ tagħha. Iż-żgħażagħ m’għandhomx biss ikunu jistgħu jfasslu ħajjithom stess, iżda għandhom jikkontribwixxu wkoll għal bidla pożittiva fis-soċjetà. Sabiex iż-żgħażagħ jiksbu l-benefiċċji kollha tal-azzjonijiet tal-UE, dawn jeħtieġ li jirriflettu l-aspirazzjonijiet, il-kreattività u t-talenti tagħhom, u jirrispondu għall-bżonnijiet tagħhom. Min-naħa tagħhom, iż-żgħażagħ jarrikkixxu l-ambizzjonijiet tal-UE: skont ir-rapport tal-UE dwar iż-Żgħażagħ (3) din il-ġenerazzjoni hija l-aktar waħda edukata minn kull żmien u partikolarment kapaċi fl-użu tat-Teknoloġiji tal-Informazzjoni u l-Komunikazzjoni u l-media soċjali.

2. Hija meħtieġa Strateġija tal-Unjoni Ewropea għaż-Żgħażagħ 2019-2027

Filwaqt li tibni fuq l-esperjenzi u d-deċiżjonijiet tal-kooperazzjoni fil-qasam taż-żgħażagħ f’dawn l-aħħar snin (4), l-Istrateġija tal-Unjoni Ewropea għaż-Żgħażagħ 2019-2027 għandha l-għan li tindirizza l-isfidi eżistenti u li jmiss li qed jiffaċċjaw iż-żgħażagħ madwar l-Ewropa kollha. L-Istrateġija tal-UE għaż-Żgħażagħ tipprovdi qafas ta’ objettivi, prinċipji, prijoritajiet, oqsma ċentrali u miżuri għal kooperazzjoni tal-politika taż-żgħażagħ għall-partijiet ikkonċernati rilevanti kollha b’kunsiderazzjoni dovuta għall-kompetenzi rispettivi tagħhom u l-prinċipju tas-sussidjarjetà.

Il-partijiet ikkonċernati rilevanti huma, fost oħrajn, l-Istati Membri tal-UE, l-istituzzjonijiet rilevanti tal-Unjoni Ewropea u organizzazzjonijiet internazzjonali oħra, bħall-Kunsill tal-Ewropa, awtoritajiet lokali u reġjonali, kunsilli taż-żgħażagħ, organizzazzjonijiet taż-żgħażagħ, organizzazzjonijiet li jaħdmu maż-żgħażagħ, persuni li jaħdmu maż-żgħażagħ, ir-riċerkaturi u l-atturi tas-soċjetà ċivili kif ukoll l-istrutturi tal-programmi Erasmus+ u l-Korp ta’ Solidarjetà Ewropea u l-programmi suċċessuri tagħhom.

L-involviment u l-għoti tas-setgħa liż-żgħażagħ kollha jippermettu lill-politika taż-żgħażagħ li tikkontribwixxi biex tintlaħaq b’suċċess il-viżjoni ta’ kontinent fejn iż-żgħażagħ jistgħu jaħtfu opportunitajiet u jirrelataw mal-valuri Ewropej.

3. L-Għanijiet Ewropej dwar iż-Żgħażagħ jipprovdu viżjoni għall-Ewropa

Matul is-sitt ċiklu tad-Djalogu Strutturat bit-titolu “Iż-Żgħażagħ fl-Ewropa: Xi jmiss?” dawk li jieħdu d-deċiżjonijiet, iż-żgħażagħ u r-riċerkaturi b’mod konġunt ġabru temi li kienu rilevanti għaż-żgħażagħ permezz ta’ konsultazzjoni madwar l-UE kollha li mbagħad ġabruhom fi 11-il qasam. B’riżultat ta’ dan il-proċess parteċipattiv li involva żgħażagħ minn madwar l-Ewropa kollha, ġew żviluppati il-11-il Għan Ewropew dwar iż-Żgħażagħ. Dawn jirriflettu l-opinjonijiet taż-żgħażagħ Ewropej u jirrappreżentaw il-viżjoni ta’ dawk attivi fid-Djalogu Strutturat.

Huma xhieda tal-ħeġġa ta’ ħafna żgħażagħ Ewropej li jipparteċipaw fid-definizzjoni tad-direzzjoni li għandha tmur fiha l-kooperazzjoni Ewropea fil-qasam taż-żgħażagħ. L-istrateġija tal-UE għaż-Żgħażagħ għandha tikkontribwixxi għat-twettiq ta’ din il-viżjoni taż-żgħażagħ billi timmobilizza strumenti ta’ politika fil-livell tal-UE kif ukoll azzjonijiet fil-livell nazzjonali, reġjonali u lokali min-naħa tal-partijiet ikkonċernati kollha.

Bħala vuċi inedita mill-parteċipanti, l-Għanijiet Ewropej dwar iż-Żgħażagħ huma ppreżentati fit-tul sħiħ tagħhom fl-anness 3 biex iservu – bir-rispett dovut għall-prinċipju tas-sussidjarjetà, il-kompetenza nazzjonali u l-libertà ta’ assoċjazzjoni – bħala ispirazzjoni u jipprovdu orjentazzjoni għall-UE, l-Istati Membri tagħha u l-partijiet ikkonċernati rilevanti u l-awtoritajiet tagħhom.

JILQGĦU

Il-Komunikazzjoni tal-Kummissjoni “L-Impenn, il-Konnessjoni u l-Għoti tas-Setgħa liż-żgħażagħ: Strateġija ġdida tal-UE għaż-Żgħażagħ” tat-22 ta’ Mejju 2018 (5).

GĦALDAQSTANT JAQBLU fuq

1. Għanijiet ġenerali

Il-kooperazzjoni bejn iż-żgħażagħ tal-UE għandha tagħmel l-aħjar użu mill-potenzjal tal-politika dwar iż-żgħażagħ. Hija trawwem il-parteċipazzjoni taż-żgħażagħ fil-ħajja demokratika, f’konformità mal-Artikolu 165 tat-Trattat dwar il-Funzjonament tal-UE. Hija tappoġġa wkoll l-involviment ċiviku u soċjali u għandha l-għan li tiżgura li ż-żgħażagħ kollha jkollhom ir-riżorsi meħtieġa biex jieħdu sehem fis-soċjetà.

Fis-snin li ġejjin, l-istrateġija ser tistinka biex:

—	Tippermetti liż-żgħażagħ ifasslu ħajjithom stess, jappoġġaw l-iżvilupp personali tagħhom u jikbru fl-awtonomija, jibnu r-reżiljenza tagħhom u tagħtihom ħiliet għall-ħajja biex ilaħħqu ma’ dinja li qed tinbidel;

—	Tinkoraġġixxi u tagħti liż-żgħażagħ ir-riżorsi meħtieġa biex isiru ċittadini attivi, aġenti tas-solidarjetà u l-bidla pożittiva ispirati mill-valuri tal-UE u ta’ identità Ewropea;

—	Ittejjeb id-deċiżjonijiet politiċi fir-rigward tal-impatt tagħhom fuq iż-żgħażagħ fis-setturi kollha, b’mod partikolari fl-impjiegi, l-edukazzjoni, is-saħħa u l-inklużjoni soċjali;

—	Tikkontribwixxi għall-qerda tal-faqar fost iż-żgħażagħ u l-forom kollha ta’ diskriminazzjoni u tippromwovi l-inklużjoni soċjali taż-żgħażagħ;

2. Prinċipji ta’ gwida

Il-Politika Ewropea għaż-Żgħażagħ u l-azzjonijiet kollha meħuda fi ħdan l-Istrateġija tal-Unjoni Ewropea għaż-Żgħażagħ 2019-2027 għandha tkun ankrata sew fis-sistema internazzjonali tad-drittijiet tal-bniedem. Il-prinċipji li ġejjin għandhom jiġu applikati fil-linji ta’ politika u l-attivitajiet kollha li jikkonċernaw iż-żgħażagħ:

Ugwaljanza u nondiskriminazzjoni: il-ġlieda kontra l-forom kollha ta’ diskriminazzjoni u l-promozzjoni tal-ugwaljanza bejn is-sessi, ir-rikonoxximent li ż-żgħażagħ huma f’riskju li jiffaċċjaw diversi forom ta’ diskriminazzjoni, inkluż diskriminazzjoni bbażata fuq l-età, u li josservaw il-prinċipji rikonoxxuti fost l-oħrajn fl-Artikoli 21 u 23 tal-Karta tad-Drittijiet Fundamentali tal-Unjoni Ewropea.

Inklużjoni: billi tagħraf li ż-żgħażagħ mhumiex grupp omoġenju, u għalhekk għandhom ħtiġijiet differenti, sfondi, sitwazzjonijiet tal-ħajja u interessi, l-Istrateġija tal-UE għaż-Żgħażagħ għandha tippromwovi attivitajiet u politiki li huma inklużivi għaż-żgħażagħ kollha, speċjalment dawk b’inqas opportunitajiet u/jew dawk li leħinhom jista’ jiġi injorat.

Parteċipazzjoni: ir-rikonoxximent li ż-żgħażagħ kollha huma riżors għas-soċjetà, il-politiki u l-attivitajiet kollha li jikkonċernaw iż-żgħażagħ għandhom iżommu d-dritt taż-żgħażagħ li jipparteċipaw fl-iżvilupp, l-implimentazzjoni u s-segwitu tal-politiki li jaffettwawhom permezz ta’ parteċipazzjoni sinifikanti taż-żgħażagħ u l-organizzazzjonijiet taż-żgħażagħ. F’dan il-kuntest, il-politiki għandhom jitfasslu b’rikonoxximent tal-bidliet li ġabet magħha l-komunikazzjoni diġitali li taffettwa l-parteċipazzjoni demokratika u ċivika.

Dimensjoni globali, Ewropea, nazzjonali, reġjonali u lokali: sabiex jiġi żgurat impatt sostenibbli fuq iż-żgħażagħ, huwa importanti li l-politika tal-UE dwar iż-żgħażagħ tiġi implimentata bil-ħsieb tal-interkonnessjonijiet mal-livelli reġjonali u lokali u li l-attivitajiet jitmexxew biex jappoġġaw politiki dwar iż-żgħażagħ fil-livell lokali. Fl-istess ħin, l-ilħna taż-żgħażagħ għandhom jitqiesu kull meta jkunu indirizzati kwistjonijiet globali.

Approċċ doppju: Politiki li jistinkaw biex itejbu l-ħajja taż-żgħażagħ qatt ma jistgħu jkunu limitati għall-qasam taż-żgħażagħ innifsu. Għalhekk l-approċċ doppju miftiehem fil-qafas tal-kooperazzjoni preċedenti 2010-2018 għadu indispensabbli peress li għandu l-għan li jittratta kwistjonijiet rilevanti għaż-żgħażagħ fuq naħa waħda permezz ta’ inizjattivi ta’ integrazzjoni bejn l-oqsma ta’ politika u min-naħa l-oħra permezz ta’ inizjattivi speċifiċi fil-qasam taż-żgħażagħ.

JAQBLU ULTERJORMENT dwar

1. Ħidma rigward implimentazzjoni effettiva, iffukata u magħquda fi ħdan u bejn is-setturi

Il-ħajjiet taż-żgħażagħ jissawru permezz ta’ politiki li għandhom l-għeruq tagħhom f’diversi oqsma ta’ politika u f’livelli differenti ta’ implimentazzjoni. B’hekk, huwa biss permezz tal-integrazzjoni taż-żgħażagħ bħala prijorità fost l-oqsma differenti ta’ politika li jista’ jiġi żgurat li jiġu kkunsidrati l-ħtiġijiet jew l-effetti speċifiċi għaż-żgħażagħ f’politiki jew programmi maħsuba. Biex tmexxi b’eżempju, għandu jiġi segwit approċċ transsettorjali fil-livell tal-UE bħala bażi fundamentali. Barra minn hekk, l-integrazzjoni taż-żgħażagħ tista’ tkun effettiva biss meta din tiggarantixxi wkoll vuċi għaż-żgħażagħ fl-oqsma ta’ politika kollha possibbli li jaffettwawhom.

Il-kooperazzjoni transsettorjali għandha tissaħħaħ fil-livelli kollha tat-teħid ta’ deċiżjonijiet li jistinkaw għas-sinerġiji, il-komplementarjetà bejn l-azzjonijiet, u inkluż involviment ikbar taż-żgħażagħ.

2. L-indirizzar tal-oqsma ċentrali tas-settur taż-żgħażagħ: Involvi ruħek. Ingħaqad mal-oħrajn. Agħti s-setgħa lilek innifsek.

a. Involvi ruħek

Li ż-żgħażagħ jiġu pprovduti perkorsi ta’ involviment fil-ħajja tagħhom ta’ kuljum iżda wkoll fil-ħajja demokratika hija essenzjali għal demokrazija li tiffunzjona u għas-soċjetà inġenerali. Li l-fokus ikun fuq il-parteċipazzjoni taż-żgħażagħ hija partikolarment importanti, peress li kwalunkwe deċiżjoni meħuda llum ser ikollha l-itwal impatt fuq il-ġenerazzjoni attwali ta’ żgħażagħ. Barra minn hekk, il-grupp ta’ età taż-żgħażagħ huwa inqas rappreżentat f’korpi politiċi u għandu inqas opportunitajiet biex jinfluwenza u jieħu sehem fil-proċessi tat-teħid tad-deċiżjonijiet minn gruppi ta’ età oħra. L-istrateġija tal-UE għaż-Żgħażagħ għandha bħala għan il-parteċipazzjoni sinifikanti ċivika, ekonomika, soċjali, kulturali u politika taż-żgħażagħ.

Għalhekk, l-involviment taż-żgħażagħ għandu jkun bażi importanti tal-kooperazzjoni ta’ politika taż-żgħażagħ tal-UE futura. Dan ifisser ukoll li ż-żgħażagħ iridu jkunu involuti fl-iżvilupp, l-implimentazzjoni u l-evalwazzjoni ta’ linji ta’ politika li jikkonċernawhom, bħalma huma l-Istrateġija tal-UE għaż-Żgħażagħ kif ukoll strateġiji nazzjonali għaż-żgħażagħ. Biex tkun kemm jista’ jkun inklużiva u tadatta għal sfidi attwali u ġodda, l-esplorazzjoni ta’ forom ġodda u alternattivi ta’ parteċipazzjoni huwa essenzjali.

JISTIEDNU LILL-ISTATI MEMBRI U L-KUMMISSJONI EWROPEA, FI ĦDAN L-OQSMA TA’ KOMPETENZA RISPETTIVI TAGĦHOM, BIEX:

—	Iħeġġu u jippromwovu l-parteċipazzjoni demokratika inklużiva taż-żgħażagħ kollha fis-soċjetà u l-proċessi demokratiċi;

—	Jinvolvu b’mod attiv liż-żgħażagħ, l-organizzazzjonijiet taż-żgħażagħ u organizzaturi oħrajn tal-ħidma fost iż-żgħażagħ fl-iżvilupp, l-implimentazzjoni u l-evalwazzjoni tal-politiki li jaffettwaw il-ħajja taż-żgħażagħ fil-livell lokali, reġjonali, nazzjonali u Ewropew;

—

Jappoġġaw l-istabbiliment u l-iżvilupp ta’ rappreżentazzjonijiet taż-żgħażagħ fil-livell lokali, reġjonali u nazzjonali, li jirrikonoxxu d-dritt taż-żgħażagħ li jipparteċipaw u jorganizzaw lilhom infushom, ir-rikonoxximent tal-istrutturi rappreżentattivi taż-żgħażagħ u l-inklużjoni tagħhom fil-ħidma tal-awtoritajiet fil-livell lokali, reġjonali, nazzjonali u Ewropej;

—	Jappoġġaw u jittrażmettu d-Djalogu tal-UE maż-Żgħażagħ (6) sabiex jinkludu varjetà ta’ ilħna ta’ żgħażagħ fil-proċessi ta’ teħid ta’ deċiżjonijiet fil-livelli kollha u jrawmu l-iżvilupp tal-kompetenzi taċ-ċittadinanza, permezz tal-edukazzjoni dwar iċ-ċittadinanza u strateġiji ta’ tagħlim;

—	Jappoġġaw u jiżviluppaw opportunitajiet ta’ “tagħlim biex wieħed jipparteċipa”, li jżidu l-interess f’azzjonijiet parteċipattivi u jgħinu liż-żgħażagħ jippreparaw għall-parteċipazzjoni;

—

Jesploraw u jippromwovu l-użu ta’ forom innovattivi u alternattivi ta’ parteċipazzjoni demokratika pereżempju għodod demokratiċi diġitali u jiffaċilitaw l-aċċess sabiex jappoġġaw il-parteċipazzjoni taż-żgħażagħ fil-ħajja demokratika u jinvolvu liż-żgħażagħ b’mod inklussiv, filwaqt li huma konxji li xi żgħażagħ m’għandhomx aċċess għall-Internet u teknoloġiji diġitali, jew il-ħiliet li jużawhom;

b. Ingħaqad mal-oħrajn

Iż-żgħażagħ fl-Ewropa qed isiru aktar u aktar konnessi. Konnessjonijiet, relazzjonijiet u skambju ta’ esperjenza huma element essenzjali għas-solidarjetà u l-iżvilupp futur tal-Unjoni Ewropea. Din il-konnessjoni titrawwem l-aħjar permezz tal-forom differenti ta’ mobbiltà.

Għalhekk, opportunitajiet għaż-żgħażagħ biex jesperjenzaw skambji, kooperazzjoni, azzjoni kulturali u ċivika f’kuntest Ewropew jeħtieġ li jkunu aċċessibbli għaż-żgħażagħ kollha. Dan jippermettilhom li jiżviluppaw u jsaħħu l-kompetenzi personali, soċjali u ċiviċi, jiżviluppaw ħsieb kritiku u kreattività, iżidu l-impjegabbiltà u jsiru ċittadini Ewropej attivi. Skambji taż-żgħażagħ u proġetti fi ħdan Erasmus+, il-Korp Ewropew ta’ Solidarjetà u l-programmi suċċessuri tagħhom huma sorsi għal tagħlim interkulturali u l-għoti tas-setgħa speċjalment għaż-żgħażagħ b’inqas opportunitajiet.

Il-kooperazzjoni tal-UE dwar iż-żgħażagħ għandha tirfed dawn l-opportunitajiet għaż-żgħażagħ. Hija għandha tibbenefika mill-programmi tal-UE bħal Erasmus+ u l-Korp Ewropew ta’ Solidarjetà u l-programmi suċċessuri tagħhom, sabiex jissaħħaħ l-għarfien dwar iż-żgħażagħ u l-aspirazzjonijiet tagħhom, u biex tissaħħaħ il-kooperazzjoni politika u l-bini tal-komunità.

L-Istrateġija tal-UE għaż-Żgħażagħ għandha trawwem ukoll il-grad ta’ konnessjoni taż-żgħażagħ fl-UE u l-pajjiżi kandidati, is-Sħubija tal-Lvant u s-sħab tal-Balkani tal-Punent (7), kif ukoll ma’ pajjiżi terzi oħra li magħhom l-UE għandha ftehimiet ta’ assoċjazzjoni jew kooperazzjoni, kif adatt, bl-għajnuna tal-UE permezz ta’ programmi ta’ finanzjament rilevanti tal-UE.

JISTIEDNU LILL-ISTATI MEMBRI U L-KUMMISSJONI EWROPEA, FI ĦDAN L-OQSMA TA’ KOMPETENZA RISPETTIVI TAGĦHOM, BIEX:

—

Jippermettu l-aċċess għaż-żgħażagħ kollha, kif ukoll għal persuni li jaħdmu maż-żgħażagħ, għall-opportunitajiet ta’ mobbiltà transkonfinali, inkluż il-volontarjat fis-settur tas-soċjetà ċivili, billi jiġu eliminati ostakli u jimplimentaw miżuri ta’ appoġġ b’attenzjoni speċjali liż-żgħażagħ b’inqas opportunitajiet;

—	Iħeġġu l-involviment taż-żgħażagħ fis-solidarjetà, il-promozzjoni ta’ skemi ta’ appoġġ u jfittxu li jkun hemm komplementarjetà u sinerġiji bejn strumenti ta’ finanzjament tal-UE u skemi nazzjonali, reġjonali u lokali

—	Jinvolvu b’mod attiv iż-żgħażagħ u l-organizzazzjonijiet taż-żgħażagħ fit-tfassil, l-implimentazzjoni u l-evalwazzjoni ta’ programmi ta’ finanzjament rilevanti tal-UE;

—

Jikkondividu l-aħjar prattiki u jkomplu jaħdmu fuq sistemi effettivi għall-validazzjoni u r-rikonoxximent ta’ ħiliet u kompetenzi miksuba permezz ta’ tagħlim mhux formali u informali, inkluż is-solidarjetà u attivitajiet ta’ volontarjat, li jkomplu l-implimentazzjoni tar-Rakkomandazzjoni tal-Kunsill tal-2012 dwar il-validazzjoni tat-tagħlim mhux formali u informali.

c. Agħti s-setgħa lilek innifsek

L-għoti tas-setgħa liż-żgħażagħ tfisser li dawn jiġu mħeġġa jieħdu l-kontroll ta’ ħajjithom. Dan jirrikjedi r-riżorsi u l-għodod meħtieġa u ambjent li huwa lest li jagħti l-attenzjoni kif xieraq lill-vuċi taż-żgħażagħ. Illum, iż-żgħażagħ madwar l-Ewropa qed iħabbtu wiċċhom ma’ diversi sfidi, bħad-diffikultajiet fl-aċċess tagħhom għad-drittijiet soċjali, l-esklużjoni soċjali u d-diskriminazzjoni, kif ukoll theddid li jirriżulta minn aħbarijiet foloz u propaganda.

Sabiex jiġu indirizzati dawn l-isfidi u għalhekk jippermettu verament l-għoti tas-setgħa liż-żgħażagħ, hija meħtieġa ħidma kollaborattiva fuq il-politiki li jindirizzaw is-sitwazzjoni speċifika taż-żgħażagħ u konsegwentement itejbu l-ħajja taż-żgħażagħ fl-UE.

F’dan il-kuntest, il-ħidma fost iż-żgħażagħ fil-forom kollha tagħha, tista’ sservi bħala katalist għal għoti ta’ setgħa: Il-ħidma fost iż-żgħażagħ iġġib benefiċċji uniċi għaż-żgħażagħ fit-transizzjoni tagħhom għall-ħajja adulta (8), li tipprovdi ambjent sikur għalihom biex jiksbu kunfidenza fihom infushom, u jitgħallmu b’mod mhux formali. Il-ħidma fost iż-żgħażagħ hija magħrufa li tagħti liż-żgħażagħ kompetenzi u ħiliet ewlenin personali, professjonali u intraprenditorjali bħall-ħidma f’tim, it-tmexxija, il-kompetenzi interkulturali, il-ġestjoni ta’ proġetti, is-soluzzjoni tal-problemi u l-ħsieb kritiku. F’xi każijiet, il-ħidma fost iż-żgħażagħ hija l-pont fl-edukazzjoni, it-taħriġ jew ix-xogħol, u b’hekk tiġi evitata l-esklużjoni.

Sabiex jinkisbu dawn il-benefiċċji, hemm ħtieġa akbar għar-rikonoxximent ta’ tagħlim mhux formali u informali permezz tal-ħidma fost iż-żgħażagħ, ta’ benefiċċju speċjalment għal dawk bi ftit kwalifiki formali, bħala mod kif titjieb l-impjegabbiltà. Ir-rikonoxximent jista’ jitjieb b’użu aktar sistematiku ta’ għodod ta’ kwalità.

JISTIEDNU LILL-ISTATI MEMBRI U L-KUMMISSJONI EWROPEA, FI ĦDAN L-OQSMA TA’ KOMPETENZA RISPETTIVI TAGĦHOM, BIEX:

—

Jiżviluppaw u jimplimentaw Aġenda Ewropea tax-Xogħol għaż-Żgħażagħ għall-kwalità, l-innovazzjoni u r-rikonoxximent tal-ħidma fost iż-żgħażagħ. Sabiex jiġi sfruttat il-potenzjal sħiħ, huwa meħtieġ li jintegraw l-għarfien espert ta’ rappreżentazzjonijiet fost iż-żgħażagħ, l-organizzazzjonijiet taż-żgħażagħ, il-persuni li jaħdmu maż-żgħażagħ u r-riċerkaturi. Għandhom jinkoraġġixxu aktar sinerġiji mal-ħidma mwettqa mill-Kunsill tal-Ewropa f’dan il-qasam;

—	Jappoġġaw ħidma ta’ kwalità fost iż-żgħażagħ għall-iżvilupp lokali, reġjonali, nazzjonali u Ewropew, inkluż l-iżvilupp tal-politika fil-qasam, taħriġ għall-persuni li jaħdmu maż-żgħażagħ, l-istabbiliment ta’ oqfsa legali u allokazzjoni suffiċjenti ta’ riżorsi;

—

Jappoġġaw l-attivitajiet ta’ ħidma fil-qasam taż-żgħażagħ fil-livelli kollha, inkluż fil-livell lokali, u r-rikonoxximent tal-organizzazzjonijiet taż-żgħażagħ bħala fornituri tal-kompetenzi, l-iżvilupp u l-inklużjoni soċjali permezz tal-ħidma fost iż-żgħażagħ u attivitajiet ta’ edukazzjoni mhux formali, filwaqt li jiġu rispettati l-attivitajiet nazzjonali, reġjonali u lokali f’dan il-qasam;

—

Joħolqu u jiżviluppaw aktar, meta u fejn ikun possibbli, punti ta’ kuntatt faċilment aċċessibbli għaż-żgħażagħ li joffru firxa wiesgħa ta’ servizzi u/jew jipprovdu informazzjoni, inkluż gwida finanzjarja, gwida u appoġġ rigward il-karrieri, is-saħħa u r-relazzjonijiet u opportunitajiet edukattivi, kulturali u ta’ impjieg.

GĦALDAQSTANT JISTIEDNU LILL-ISTATI MEMBRI U L-KUMMISSJONI EWROPEA FI ĦDAN L-OQSMA TA’ KOMPETENZA RISPETTIVI TAGĦHOM, BIEX:

3. Jikkooperaw fuq il-Bażi ta’ Strumenti u Governanza

Biex tiġi implimentata b’mod effettiv l-Istrateġija tal-UE għaż-Żgħażagħ madwar l-UE u fl-Istati Membri, huma meħtieġa strumenti konkreti. Il-miżuri li ġejjin ser jintużaw biex jintlaħqu l-objettivi tal-Istrateġija tal-UE għaż-Żgħażagħ fejn adatt fil-livell lokali, reġjonali, nazzjonali, Ewropew u globali:

Tfassil ta’ politika taż-żgħażagħ ibbażata fuq l-evidenza u l-bini tal-għarfien: Il-Politika tal-UE dwar iż-Żgħażagħ għandha tkun ibbażata fuq l-evidenza u msejsa fuq il-ħtiġijiet u s-sitwazzjonijiet reali taż-żgħażagħ. Dan jirrikjedi riċerka kontinwa, l-iżvilupp tal-għarfien u s-sensibilizzazzjoni taż-żgħażagħ u l-organizzazzjonijiet taż-żgħażagħ. Il-ġbir ta’ data diżaggregata dwar iż-żgħażagħ huwa ta’ importanza partikolari biex jitrawwem fehim tal-ħtiġijiet ta’ gruppi differenti ta’ żgħażagħ, b’mod partikolari dawk b’inqas opportunitajiet. It-tfassil tal-politika bbażata fuq l-evidenza għandu jitwettaq bl-appoġġ tal-Wiki taż-Żgħażagħ, netwerks ta’ riċerka taż-żgħażagħ, il-kooperazzjoni ma’ organizzazzjonijiet internazzjonali bħall-Kunsill tal-Ewropa, l-OECD u korpi oħra, inkluż organizzazzjonijiet taż-żgħażagħ.

Tagħlim reċiproku u tixrid: It-tagħlim reċiproku bejn l-Istati Membri, il-Kummissjoni Ewropea u l-partijiet ikkonċernati rilevanti għandu jkun għodda għall-iżvilupp tal-politika taż-żgħażagħ fir-rigward ta’ oqsma ewlenin kif ukoll trasversali. Il-gruppi ta’ esperti ser ikomplu jiżviluppaw gwida politika, għodod prattiċi u jaqsmu prattiki tajbin; din l-istrateġija ser toffri għodod ġodda għat-tagħlim reċiproku, bħal evalwazzjonijiet bejn il-pari u konsulenza bejn il-pari, forums ta’ livell għoli, analiżijiet u studji, li inġenerali jsegwu l-prijoritajiet tal-Istrateġija tal-UE għaż-Żgħażagħ, u fi ħdan Pjanijiet ta’ Ħidma triennali. Din ser issegwi approċċ aktar sistematiku għall-informazzjoni ta’ kwalità dwar iż-żgħażagħ, għas-sensibilizzazzjoni u t-tixrid, billi tibni fuq in-netwerks eżistenti tagħha.

Governanza parteċipattiva: Sabiex iż-żgħażagħ jiġu rikonoxxuti bħala esperti ta’ ħajjithom stess, huwa kruċjali li jiġi żgurat li ż-żgħażagħ u l-organizzazzjonijiet rappreżentattivi tagħhom jiġu involuti fil-fażijiet differenti tal-implimentazzjoni tal-Istrateġija tal-UE għaż-Żgħażagħ. Il-parteċipazzjoni tkabbar il-viżibbiltà taż-żgħażagħ u t-tħassib tagħhom, iżda żżid ukoll il-viżibbiltà f’għajnejn iż-żgħażagħ ta’ dawk li jieħdu d-deċiżjonijiet fil-politika taż-żgħażagħ. Il-parteċipazzjoni għandha l-għan ukoll li żżid il-leġittimità u rikonoxximent tal-politiki dwar iż-żgħażagħ. Sabiex tinbena bażi għal djalogu ċiviku regolari, il-partijiet ikkonċernati jingħataw rwol akbar fil-koordinazzjoni tal-implimentazzjoni tal-istrateġija, u jiġu offruti opportunitajiet biex jiskambjaw informazzjoni dwar l-attivitajiet u r-riżultati, Pjattaforma tal-Istrateġija tal-UE għaż-Żgħażagħ ser ikollha l-għan li tiffaċilita governanza parteċipattiva u l-koordinazzjoni tal-implimentazzjoni tal-Istrateġija. Il-Kummissjoni hija mistiedna torganizza laqgħat iddedikati li jlaqqgħu flimkien, kif xieraq, rappreżentanti tal-istituzzjonijiet tal-UE, l-Istati Membri, l-Aġenziji Nazzjonali ta’ Erasmus+ u tal-Korp Ewropew ta’ Solidarjetà, l-organizzazzjonijiet taż-żgħażagħ u partijiet ikkonċernati rilevanti oħra, kif ukoll l-awtoritajiet lokali u reġjonali.

Mobilizzazzjoni tal-programmi u l-fondi tal-UE: L-istrateġija ser tippromwovi l-użu effettiv tal-programmi u l-fondi tal-UE, bħall-Erasmus+, il-Korp Ewropew ta’ Solidarjetà, il-Fondi Strutturali u ta’ Investiment Ewropej, l-Orizzont 2020, inkluż l-Azzjonijiet Marie Skłodowska-Curie, l-Ewropa Kreattiva u s-suċċessuri tagħhom. L-Istati Membri huma mistiedna jesploraw is-sinerġiji bejn is-sorsi ta’ finanzjament fil-livelli tal-UE, nazzjonali, reġjonali u lokali.

e.	Monitoraġġ tal-fondi tal-EU: It-trasparenza dwar azzjoni tal-UE għaż-żgħażagħ, għandha tinkludi l-monitoraġġ tal-infiq tal-UE fuq iż-żgħażagħ, bl-użu kif xieraq tal-mekkaniżmi eżistenti.

Komunikazzjoni dwar l-Istrateġija tal-UE għaż-Żgħażagħ: Filwaqt li jżommu f’moħħhom id-diversi partijiet ikkonċernati involuti fit-tfassil tal-politika għaż-żgħażagħ, huwa importanti li jiġu kkomunikati l-fini u l-kontenut tal-Istrateġija tal-UE għaż-Żgħażagħ b’mod komprensiv u f’lingwa adatta għaż-żgħażagħ. L-Istrateġija tal-UE għaż-Żgħażagħ flimkien mal-Għanijiet Ewropej dwar iż-Żgħażagħ jistgħu jipprovdu orjentazzjoni għal persuni involuti mill-qrib fit-tfassil tal-politika taż-żgħażagħ kif ukoll atturi lil hinn minn dak il-qasam, fil-ħolqien ta’ narrattiva ġdida u pożittiva dwar il-politika tal-UE dwar iż-żgħażagħ u tal-Ħidma fost iż-Żgħażagħ fl-Ewropa.

Pjanifikatur tal-Attivitajiet Nazzjonali Futuri (9): Il-Pjanifikatur tal-Attivitajiet Nazzjonali Futuri (FNAP) għandu l-intenzjoni li jippermetti lill-Istati Membri sabiex fuq bażi volontarja jaqsmu l-prijoritajiet tagħhom skont l-Istrateġija tal-UE għaż-Żgħażagħ. L-għan tagħhom huwa li jżidu t-trasparenza fl-implimentazzjoni tal-politiki dwar iż-żgħażagħ fil-livell reġjonali, nazzjonali u tal-UE. Dan għandu jgħin biex jiġu identifikati sħab adatti għal attivitajiet ta’ tagħlim reċiproku, bi tweġiba għal ħtiġijiet individwali tal-Istati Membri. Sabiex jiġi evitat piż amministrattiv addizzjonali, il-FNAPs għandhom jibnu fuq l-oqfsa ta’ politika nazzjonali taż-żgħażagħ/strateġiji nazzjonali taż-żgħażagħ eżistenti.

Id-Djalogu tal-UE maż-Żgħażagħ (10): Filwaqt li jibni fuq il-kisbiet ta’ Djalogu Strutturat maż-żgħażagħ u l-organizzazzjonijiet taż-żgħażagħ, Djalogu maż-Żgħażagħ tal-UE ġdid ser jiġi stabbilit, bl-għodod meħtieġa, bil-għan li jiġu inklużi aktar persuni li jieħdu d-deċiżjonijiet u żgħażagħ, speċjalment dawk mhux mismugħa u/jew b’inqas opportunitajiet fil-proċessi ta’ teħid ta’ deċiżjonijiet u l-implimentazzjoni tal-Istrateġija tal-UE għaż-Żgħażagħ, sabiex jitrawwem l-involviment tagħhom u l-parteċipazzjoni politika tagħhom fl-UE u fis-soċjetà inġenerali. Barra minn hekk, għandu jiġi ffaċilitat skambju aktar regolari bejn il-Gruppi ta’ Ħidma Nazzjonali għad-Djalogu tal-UE maż-Żgħażagħ u l-Kummissjoni Ewropea.

Il-Koordinatur tal-UE għaż-Żgħażagħ: Il-Kunsill jilqa’ l-intenzjoni li jistabbilixxi Koordinatur tal-UE għaż-Żgħażagħ fi ħdan il-Kummissjoni Ewropea, bil-għan li tittejjeb il-kooperazzjoni transsettorjali, kif ukoll l-iżvilupp u l-iskambju tal-għarfien dwar kwistjonijiet taż-żgħażagħ fi ħdan is-servizzi tal-Kummissjoni Ewropea. Koordinatur tal-UE għaż-Żgħażagħ għandu jaħdem id f’id ma’ diversi partijiet ikkonċernati sabiex tiġi żgurata komunikazzjoni koerenti maż-żgħażagħ.

Informazzjoni u Appoġġ taż-Żgħażagħ: bil-forniment adegwat ta’ servizzi u pjattaformi ta’ informazzjoni taż-żgħażagħ ta’ kwalità fil-livelli kollha, inkluż il-Portal għaż-Żgħażagħ Ewropej, u bl-appoġġ tal-organizzazzjonijiet Ewropej kollha, jista’ jiġi promoss aċċess ugwali għaż-żgħażagħ għal informazzjoni ta’ kwalità dwar id-drittijiet u l-opportunitajiet tagħhom, is-servizzi u l-programmi tal-UE għaż-żgħażagħ;

Pjan ta’ Ħidma tal-UE għaż-Żgħażagħ: L-Istrateġija tal-UE għaż-Żgħażagħ ser tkun qed issegwi perijodi triennali ta’ ħidma tul żewġ Triji ta’ Presidenzi. Il-prijoritajiet u l-azzjonijiet għall-perijodi ta’ ħidma rispettivi ser jiġu ppreżentati fil-Pjanijiet ta’ Ħidma tal-UE għaż-Żgħażagħ. Il-Kunsill għandu jiffissa dawn il-Pjanijiet ta’ Ħidma tal-UE flimkien mal-Kummissjoni, billi jibda bi pjan ta’ ħidma 2019-2021 (11). Dawn il-pjanijiet għandhom jieħdu mill-prinċipji u prijoritajiet ta’ din l-Istrateġija, u jindirizzaw kwistjonijiet taż-żgħażagħ f’konfigurazzjonijiet oħra tal-Kunsill u l-korpi preparatorji tagħhom fl-oqsma ta’ politika rilevanti.

Monitoraġġ, rappurtar, evalwazzjoni: Sabiex il-progress tal-koordinazzjoni politika jkun rieżaminat u ffaċilitat, għandu jitwettaq monitoraġġ perjodiku tal-progress miksub. Prattiki tajbin u l-kundizzjonijiet tagħhom għat-trasferibbiltà għandhom jiġu identifikati biex jiffaċilitaw it-tagħlim reċiproku bejn l-Istati Membri. Il-Kummissjoni ser tirrapporta dwar l-implimentazzjoni tal-Istrateġija tal-UE għaż-Żgħażagħ kull tliet snin, ibbażata, fost l-oħrajn, fuq l-informazzjoni pprovduta mill-Istati Membri u l-Wiki taż-Żgħażagħ. Il-Wiki taż-Żgħażagħ ser ikompli jipprovdi informazzjoni dwar l-iżvilupp ta’ politiki nazzjonali għaż-żgħażagħ. Fil-livell tal-UE, l-organizzazzjonijiet taż-żgħażagħ u partijiet ikkonċernati rilevanti oħra ser ikunu involuti mill-qrib fil-monitoraġġ tal-progress permezz tal-Pjattaforma tal-Istrateġija tal-UE. Il-Kwadru Operattiv ta’ Indikaturi tal-UE dwar iż-Żgħażagħ jista’ jintuża biex tkun issorveljata s-sitwazzjoni ġenerali taż-żgħażagħ fl-Istati Membri. L-Istati Membri u l-Kummissjoni Ewropea huma mistiedna jirrieżaminaw il-Kwadru Operattiv ta’ Indikaturi fl-ewwel sena wara l-adozzjoni tal-Istrateġija tal-UE għaż-Żgħażagħ. Jistgħu jkunu stabbiliti indikaturi kwantitattivi u kwalitattivi u parametri referenzjarji, imfassla skont il-ħtiġijiet tal-Istati Membri u s-setturi involuti, bħala mezz sabiex jiġu mqabbla l-aħjar prattiki u tkun immonitorjata l-implimentazzjoni tal-istrateġija. Għandu jsir rieżami tal-politika tal-proġetti ta’ riċerka ffinanzjati mill-UE fl-2019 biex jiġu estratti s-sejbiet rilevanti għall-qasam tal-politika taż-żgħażagħ.

Rieżami ta’ Nofs it-Terminu: Il-Kunsill għandu jwettaq rieżami ta’ nofs it-terminu tal-EUYS abbażi ta’ rapport ta’ evalwazzjoni li għandu jiġi ppreżentat mill-Kummissjoni sal-31 ta’ Diċembru 2023. Hija għandha tirrieżamina kif xieraq din ir-Riżoluzzjoni fis-sena 2024, sabiex taġġustaha għal żviluppi u ħtiġijiet ġodda possibbli.

(1) Riżoluzzjoni tal-Kunsill dwar qafas imġedded fil-qasam taż-żgħażagħ (2010-2018)

Riżoluzzjoni tal-Kunsill u tar-rappreżentanti tal-gvernijiet fir-rigward tal-qafas tal-kooperazzjoni Ewropea fil-qasam taż-żgħażagħ (27 ta’ Ġunju 2002)

(2) Eurofound – taqsima dwar NEETs: https://www.eurofound.europa.eu/topic/NEETs

(3) Dok. 9264/18 ADD 2 - SWD(2018) 169 final parti 1-7

(4) Il-Komunikazzjoni tal-Kummissjoni dwar l-Investiment fiż-Żgħażagħ tal-Ewropa” (COM(2016)940), Konklużjonijiet tal-Kunsill dwar perspettivi strateġiċi għall-kooperazzjoni Ewropea fil-qasam taż-żgħażagħ wara l-2018, Mejju 2017

(5) Dok. 9264/18 + ADD 1 sa ADD 8 - COM(2018) 269 final

(6) Għal aktar dettalji ara l-anness 1 dwar id-Djalogu tal-UE dwar iż-Żgħażagħ

(7) https://ec.europa.eu/neighbourhood-enlargement/policy/eu-and-western-balkans_en

(8) Grupp ta’ esperti dwar il-“kontribuzzjoni tal-ħidma fost iż-żgħażagħ u t-tagħlim mhux formali u informali biex jindirizza l-isfidi li jiffaċċjaw iż-żgħażagħ, b’mod partikolari t-transizzjoni mill-edukazzjoni għall-impjieg”. http://ec.europa.eu/assets/eac/youth/library/reports/contribution-youth-work-summary_en.pdf

(9) Għal aktar dettalji ara l-anness 2 dwar il-Pjanifikatur tal-Attivitajiet Nazzjonali Futuri

(10) Għal aktar dettalji ara l-anness 1 dwar id-Djalogu tal-UE dwar iż-Żgħażagħ

(11) Għal aktar dettalji ara l-anness 4 dwar il-Pjan ta’ Ħidma tal-UE għaż-Żgħażagħ 2019-2021

ANNESS 3

dwar l-Għanijiet Ewropej dwar iż-Żgħażagħ

L-Għanijiet Ewropew dwar iż-Żgħażagħ (1) huma r-riżultat tas-6 ċiklu tad-Djalogu Strutturat maż-żgħażagħ, dawk li jieħdu d-deċiżjonijiet, riċerkaturi u partijiet ikkonċernati oħra li seħħ taħt it-titolu “Iż-Żgħażagħ fl-Ewropa: Xi jmiss?”. L-għan ta’ dan iċ-ċiklu kien li jinġabru l-ilħna taż-żgħażagħ u jikkontribwixxu flimkien sabiex tinħoloq tal-Istrateġija tal-UE għaż-Żgħażagħ 2019-2027.

L-Għanijiet Ewropej dwar iż-Żgħażagħ jippreżentaw viżjoni għal Ewropa li tippermetti liż-żgħażagħ jirrealizzaw il-potenzjal sħiħ tagħhom. Huma jidentifikaw oqsma transettorjali li jaffettwaw ħajjet iż-żgħażagħ u jindikaw liema sfidi jeħtieġ li jiġu indirizzati.

L-ewwel fażi tas-6 ċiklu tad-Djalogu Strutturat iffoka fuq ħsieb miftuħ u d-definizzjoni ta’ fehim komuni dwar it-tema taċ-ċiklu. Iż-żgħażagħ, flimkien ma’ dawk li jieħdu d-deċiżjonijiet, identifikaw suġġetti rilevanti għat-tfassil tal-politika fil-qasam taż-żgħażagħ, li servew lir-riċerkaturi involuti bħala bażi għat-tfassil ta’ konsultazzjoni madwar l-Ewropa kollha. Fil-fażi ta’ konsultazzjoni ta wara, żgħażagħ minn madwar l-Ewropa kollha, li ġejjin minn firxa wiesgħa ta’ sfondi kienu involuti permezz ta’ gruppi fokus, stħarriġ u metodi oħra. Filwaqt li jibnu fuq ir-riżultati ta’ din il-konsultazzjoni, id-delegati taż-żgħażagħ u min jieħu d-deċiżjonijiet flimkien ifformulaw il-11-il Għan Ewropew dwar iż-Żgħażagħ elenkati hawn taħt, li ġew milqugħa tajjeb ħafna mill-Ministri fid-dibattitu ta’ orjentazzjoni li ġej tal-Kunsill taż-Żgħażagħ tal-UE. L-aħħar fażi taċ-ċiklu ffoka fuq l-ippjanar ta’ azzjonijiet konkreti u l-esplorazzjoni ta’ modi dwar kif jiġu implimentati l-Għanijiet Ewropej dwar iż-Żgħażagħ.

Fi ħdan il-kompetenzi rispettivi tagħhom, l-Istati Membri u l-Kummissjoni Ewropea huma mistiedna li fost oħrajn jispiraw ruħhom mill-Għanijiet Ewropej dwar iż-Żgħażagħ u jinkludu din il-viżjoni kull fejn ikun xieraq fil-politiki u l-aġendi kollha relatati.

B’kont debitu għas-sussidjarjetà, l-Għanijiet Ewropej dwar iż-Żgħażagħ għandhom ikunu trattati skont il-leġislazzjoni nazzjonali u tal-Unjoni u ċ-ċirkostanzi nazzjonali. L-Għanijiet Ewropej dwar iż-Żgħażagħ ma jirrappreżentawx għanijiet legalment vinkolanti.

#1 KONNESSJONI BEJN L-UE U Ż-ŻGĦAŻAGĦ

Sfond: Għadd dejjem akbar ta’ żgħażagħ għandhom nuqqas ta’ fiduċja fl-UE, jiltaqgħu ma’ diffikultajiet fil-fehim tal-prinċipji, il-valuri, u l-funzjonament tagħha. Defiċits demokratiċi fil-proċessi tal-UE ġew ukoll identifikati bħala waħda mir-raġunijiet għal ewroxettiċiżmu li qed jiżdied fost iż-żgħażagħ.

Għan: Jitrawwem is-sens ta’ appartenenza taż-żgħażagħ għall-proġett Ewropew u jinbena pont bejn l-UE u ż-żgħażagħ biex terġa’ tinkiseb il-fiduċja u tiżdied il-parteċipazzjoni.

Miri

—	Jiġi ggarantit l-involviment u d-djalogu sinifikanti taż-żgħażagħ fl-istadji kollha tat-teħid ta’ deċiżjoni tal-UE billi jittejbu l-mekkaniżmi parteċipatorji eżistenti u jinħolqu oħrajn ġodda.

—	Jiġi żgurat aċċess ugwali għall-informazzjoni ta’ kwalità, imparzjali u adatta għaż-żgħażagħ dwar kif taħdem l-UE, kif jistgħu jinvolvu ruħhom fiha u x’opportunitajiet toffri.

—	Jintroduċu u jżidu l-edukazzjoni dwar l-Ewropa u l-UE f’ambjenti formali u mhux formali.

—	Tiġi żgurata rappreżentanza ġusta tal-istati membri kollha fil-korpi politiċi u amministrattivi tal-UE, f’konformità mal-prinċipju ta’ ċittadinanza ugwali.

—	Jiżdied il-baġit u l-impatt tal-programmi tal-UE dwar iż-żgħażagħ.

—	Il-bini tal-fiduċja taż-żgħażagħ fil-proġett tal-UE billi jiġi indirizzat id-defiċit demokratiku, in-nuqqas ta’ trasparenza u viżibilità.

—	Tiġi istituzzjonalizzata l-valutazzjoni tal-impatt u l-effett tal-politiki tal-UE, kif ukoll tal-adattament tagħhom għaż-żgħażagħ.

#2 L-UGWALJANZA GĦALL-ĠENERI KOLLHA (2)

Sfond: Diskriminazzjoni bbażata fuq il-ġeneru għadha taffettwa ħafna żgħażagħ, speċjalment in-nisa żgħażagħ. Opportunitajiet indaqs u aċċess għad-drittijiet jeħtieġ li jiġu żgurati għaż-żgħażagħ tal-ġeneri kollha inkluż żgħażagħ mhux binarji u LGBTQI+ (3).

Għan: Tiġi żgurata l-ugwaljanza tal-ġeneri kollha u l-approċċi sensittivi għall-ġeneri fl-oqsma kollha tal-ħajja ta’ persuna żagħżugħa.

Miri

—	Tiġi ttrattata d-diskriminazzjoni u jiġu żgurati drittijiet ugwali għall-ġeneri kolla fil-ħajja kulturali, ta’ politika u soċjoekonomika.

—	Jinkiseb għarfien universali tal-inugwaljanza u d-diskriminazzjoni sessista, b’mod partikolari fil-media.

—	Tintemm il-vjolenza sessista billi tiġi indirizzata u ttrattata b’mod effettiv fil-forom kollha tagħha.

—	Jiġu eliminati r-rwoli stereotipiċi tal-ġeneri u jitħaddnu l-identitajiet diversi tal-ġeneru fis-sistemi edukattivi, il-ħajja tal-familja, fuq il-post tax-xogħol, u oqsma oħra tal-ħajja.

—	Tintemm id-diskriminazzjoni strutturali sessista fis-suq tax-xogħol u jiġu żgurati drittijiet, aċċess u opportunitajiet ugwali.

—	Tiġi żgurata paga ugwali għal xogħol ugwali u l-kondiviżjoni ugwali tar-responsabbiltajiet tax-xogħol tal-indukrar.

—	Jiġi żgurat l-aċċess ugwali għall-edukazzjoni formali u mhux formali, u li t-tfassil tas-sistemi tal-edukazzjoni jsegwi approċċi sensittivi għall-ġeneri.

#3 SOĊJETAJIET INKLUŻIVI

Sfond: Terz taż-żgħażagħ fl-Ewropa huma f’riskju ta’ faqar u esklużjoni soċjali. Ħafna ma għandhomx aċċess għad-drittijiet soċjali tagħhom. Ħafna jkomplu jiffaċċjaw diskriminazzjoni multipla, jesperjenzaw preġudizzju u atti kriminali ta’ preġudizzju. Il-fenomeni migratorji ġodda ġabu magħhom diversi sfidi soċjali u marbuta mal-inklużjoni. Għalhekk, huwa kruċjali li jkun ssir ħidma favur l-issodisfar tad-drittijiet taż-żgħażagħ kollha fl-Ewropa, inklużi dawk l-aktar emarġinati u esklużi.

Għan: Tiġi permessa u żgurata l-inklużjoni taż-żgħażagħ kollha fis-soċjetà.

Miri

—	Tiġi pprovduta protezzjoni legali u jiġu infurzati strumenti legali internazzjonali għall-ġlieda kontra kull tip ta’ diskriminazzjoni u diskors ta’ mibegħda, filwaqt li jiġi rikonoxxut li ż-żgħażagħ huma soġġetti għal forom multipli ta’ diskriminazzjoni.

—	Tissaħħaħ il-kapaċità li l-informazzjoni tasal għand żgħażagħ emarġinati, biex ikun żgurat li huma jkunu konxji tal-ispazji, l-opportunitajiet u l-esperjenzi disponibbli għalihom.

—	Jiġi żgurat li ż-żgħażagħ emarġinati kollha jkollhom aċċess ugwali għal ambjenti ta’ tagħlim formali u mhux formali, li jindirizzaw id-dimensjonijiet kollha tal-inklużjoni.

—	Jissaħħu l-kapaċitajiet tal-edukaturi li jaħdmu maż-żgħażagħ emarġinati.

—	Jiġu pprovduti aktar spazji, opportunitajiet, riżorsi u programmi li jrawmu d-djalogu u l-koeżjoni soċjali, u jiġġieldu kontra d-diskriminazzjoni u s-segregazzjoni.

—	Jissaħħaħ l-appoġġ soċjali billi jiġi implimentat id-dritt għal paga li tiggarantixxi l-għajxien, kundizzjoni għal xogħol ġust, aċċess universali għal kura tas-saħħa ta’ kwalità, u jiġu żgurati miżuri speċifiċi għal żgħażagħ emarġinati.

—	Jiġi żgurat li żgħażagħ emarġinati jipparteċipaw fil-proċessi kollha ta’ teħid ta’ deċiżjonijiet u jkunu atturi ewlenin, b’mod partikolari fi proċessi li jikkonċernaw id-drittijiet, il-benesseri u l-interessi tagħhom stess.

#4 INFORMAZZJONI U DJALOGU KOSTRUTTIV

Sfond: Iż-żgħażagħ jesperjenzaw diffikultajiet biex jivverifikaw il-preċiżjoni u l-affidabbiltà tal-informazzjoni. Jeħtieġ li dawn ikunu mgħammra b’mod aktar adegwat biex jinnavigaw fl-isfera tal-media u biex jipparteċipaw fi djalogu kostruttiv.

Għan: Jiġi żgurat li ż-żgħażagħ ikollhom aċċess aħjar għal informazzjoni affidabbli, tiġi sostnuta l-abbiltà tagħhom li jevalwaw l-informazzjoni b’mod kritiku u jimpenjaw ruħhom fi djalogu kostruttiv u parteċipatorju.

Miri

—	Iż-żgħażagħ jingħataw is-setgħa li jkunu utenti u produtturi kritiċi u responsabbli tal-informazzjoni.

—	Jiġi żgurat li ż-żgħażagħ ikollhom l-abbiltà li jirrikonoxxu u jirrappurtaw l-aħbarijiet qarrieqa ripetutament u jivverifikaw il-preċiżjoni tas-sorsi użati tal-aħbarijiet.

—	Jiġi żgurat li ż-żgħażagħ ikollhom l-abbiltà li jirrikonoxxu u jirrappurtaw diskors ta’ mibegħda u diskriminazzjoni online u offline.

—	Jiġi żgurat li ż-żgħażagħ ikunu jistgħu jinvolvu ruħhom fi djalogu ta’ rispett u tolleranti, mhux vjolenti, online u offline.

—	Jiġi żgurat aċċess faċli għal informazzjoni li tinftiehem adatta għaż-żgħażagħ u li ssegwi l-kodiċi ta’ etika u l-istandards ta’ kwalità

—	Jiġi żgurat li l-ġenituri u l-persuni li jindukraw, u dawk kollha involuti fl-edukazzjoni u t-taħriġ taż-żgħażagħ ikunu mgħammra b’kompetenzi fil-qasam tal-media u dak diġitali u li huma jkunu sorsi ta’ informazzjoni affidabbli għaż-żgħażagħ.

#5 SAĦĦA U BENESSRI MENTALI

Sfond: Għadd sinifikanti u li qed jiżdied ta’ żgħażagħ madwar l-Ewropa qed jesprimu t-tħassib tagħhom dwar il-prevalenza ta’ kwistjonijiet ta’ saħħa mentali bħal livell għoli ta’ stress, ansjetà, dipressjoni u mard mentali ieħor fost il-pari tagħhom. Iż-żgħażagħ isemmu l-pressjonijiet soċjetali enormi li jiffaċċjaw illum, u jesprimu l-ħtieġa ta’ servizzi tal-kura tas-saħħa mentali aħjar għaż-żgħażagħ.

Għan: Jinkiseb benessri mentali aħjar u tintemm l-istigmatizzazzjoni ta’ kwistjonijiet ta’ saħħa mentali, biex b’hekk tiġi promossa l-inklużjoni soċjali taż-żgħażagħ kollha.

Miri

—	Jiġi inkoraġġut l-iżvilupp tal-għarfien tagħhom infushom u inklinazzjonijiet inqas kompetittivi billi jitrawwem l-apprezzament tal-ħiliet u l-kapaċitajiet individwali.

—	Jitħarsu d-drittijiet għax-xogħol u l-istudju ta’ persuni bi problemi ta’ saħħa mentali kemm waqt kif ukoll wara l-mard biex tkun żgurata l-abbiltà tagħhom li jwettqu l-ambizzjonijiet tagħhom.

—	Jiġi żviluppat approċċ intersezzjonali inklużiv għas-servizzi tal-kura tas-saħħa mentali għal kulħadd, speċjalment għall-gruppi emarġinati.

—	Il-professjonisti kollha li jaħdmu maż-żgħażagħ kif ukoll il-familja u l-ħbieb jiġu pprovduti b’taħriġ fl-ewwel għajnuna ta’ kwalità fil-qasam tas-saħħa mentali.

—	Jiġi pprovdut trattament inklużiv, li juri rispett u ffinanzjat tajjeb billi jiġu inkorporati servizzi tal-kura tas-saħħa mentali ta’ kwalità għolja fl-istituzzjonijiet mediċi kollha.

—	L-attenzjoni tiġi ċċentrata fuq miżuri ta’ prevenzjoni li jiżguraw li ż-żgħażagħ ikunu mgħammra bl-għarfien u l-ħiliet meħtieġa għal benessri mentali aħjar.

—	Tiġi miġġielda l-istigma fir-rigward ta’ kwistjonijiet ta’ saħħa mentali billi jiġu żviluppati programmi ta’ sensibilizzazzjoni.

#6 APPOĠĠ GĦALL-IŻVILUPP TAŻ-ŻGĦAŻAGĦ RURALI

Sfond: Minkejja l-impenn wiesa’ tal-UE għall-iżvilupp rurali u minħabba l-fatt li sas-sena 2015 kważi terz tal-popolazzjoni tal-UE kienu qed jgħixu f’żoni rurali, jeżistu differenzi prevalenti bejn l-għajxien f’żoni urbani u f’żoni rurali (4) . Għalhekk, huwa importanti li tiġi żgurata l-ugwaljanza għal żgħażagħ f’ambjenti urbani u rurali.

Għan: Jinħolqu kundizzjonijiet li jippermettu liż-żgħażagħ jiksbu l-potenzjal tagħhom f’żoni rurali.

Miri

—	Tiġi żgurata infrastruttura xierqa f’żoni rurali sabiex jiġi provdut il-forniment ekwu ta’ servizzi pubbliċi, konnettività tad-data u opportunitajiet ta’ akkomodazzjoni għaż-żgħażagħ.

—	Jiġi żgurat li fiż-żoni rurali jinħolqu impjiegi sostenibbli u ta’ kwalità għolja li jkunu aċċessibbli għaż-żgħażagħ.

—	Tiġi żgurata d-deċentralizzazzjoni ta’ attivitajiet differenti miż-żgħażagħ, għaż-żgħażagħ u maż-żgħażagħ sabiex tiġi appoġġata l-inklużjoni tagħhom u biex ikunu ta’ benefiċċju għall-komunitajiet lokali.

—	Jiġi żgurat li ż-żgħażagħ f’żoni rurali qegħdin jipparteċipaw b’mod attiv fil-proċessi tat-teħid ta’ deċiżjonijiet.

—	Jiġi żgurat aċċess ugwali għal edukazzjoni ta’ kwalità għolja għaż-żgħażagħ f’żoni rurali.

—	Tiġi stabbilita immaġni pożittiva taż-żoni rurali.

—	Tiġi żgurata l-protezzjoni tad-drawwiet rurali.

#7 IMPJIEGI TA’ KWALITÀ GĦAL KULĦADD

Sfond: Iż-żgħażagħ qed ibatu minn livell għoli ta’ qgħad fost iż-żgħażagħ, kundizzjonijiet ta’ xogħol prekarju u abbużiv kif ukoll diskriminazzjoni fis-suq tax-xogħol u fuq il-post tax-xogħol. In-nuqqas ta’ informazzjoni u ħiliet adatti għall-impjieg futur qed jipprevjenu liż-żgħażagħ milli jintegraw bis-sħiħ fis-suq tax-xogħol. B’hekk jeħtieġ li jittieħdu miżuri sabiex jiġu żgurati impjiegi ta’ kwalità għal kulħadd.

Għan: Garanzija għal suq tax-xogħol aċċessibbli b’opportunitajiet li jwasslu għal impjiegi ta’ kwalità għaż-żgħażagħ kollha.

Miri

—	Jinħolqu impjiegi ta’ kwalità li jiggarantixxu kundizzjonijiet tax-xogħol ġusti, drittijiet tax-xogħol u d-dritt ta’ paga li tiggarantixxi l-għajxien għaż-żgħażagħ kollha.

—	Jiġu ssalvagwardjati l-protezzjoni soċjali u l-kura tas-saħħa għal ħaddiema żgħażagħ kollha.

—	Jiġu ggarantiti trattament ġust u opportunitajiet indaqs għaż-żgħażagħ kollha sabiex tintemm id-diskriminazzjoni fis-suq tax-xogħol.

—	Jiġu żgurati opportunitajiet indaqs għaż-żgħażagħ kollha biex jiżviluppaw il-ħiliet meħtieġa u jiksbu esperjenza prattika sabiex tittaffa t-transizzjoni mill-edukazzjoni għas-suq tax-xogħol.

—	Jiġu żgurati r-rikonoxximent u l-validazzjoni ta’ kompetenzi miksuba permezz ta’ internships, apprendistati u forom oħra ta’ tagħlim ibbażat fuq ix-xogħol, kif ukoll il-volontarjat u l-edukazzjoni mhux formali.

—	Jiġi żgurat l-involviment taż-żgħażagħ u l-organizzazzjonijiet taż-żgħażagħ bħala sħab ugwali fl-iżvilupp, l-implimentazzjoni, il-monitoraġġ u l-evalwazzjoni tal-politiki dwar l-impjiegi fil-livelli kollha.

—	Jiġi żgurat aċċess ugwali għal informazzjoni ta’ kwalità u mekkaniżmi adegwati ta’ appoġġ li jħejju liż-żgħażagħ għas-suq tax-xogħol li qed jinbidel u l-futur tax-xogħol.

#8 TAGĦLIM TA’ KWALITÀ

Sfond: L-edukazzjoni tibqa’ kruċjali għaċ-ċittadinanza attiva, soċjetà inklużiva u l-impjegabbiltà. Huwa għalhekk li neħtieġu li nwessgħu l-viżjoni tagħna dwar l-edukazzjoni għas-seklu 21, billi niffokaw aktar fuq ħiliet trasferibbli, tagħlim iċċentrat fuq l-istudent u l-edukazzjoni mhux formali biex niksbu verament aċċess ugwali u universali għat-tagħlim ta’ kwalità.

Għan: Jiġu integrati u mtejba t-tipi differenti ta’ tagħlim, b’mod li jgħammru liż-żgħażagħ għall-isfidi dejjem jinbidlu tal-ħajja fis-seklu 21.

Miri

—	Jiġi ggarantit aċċess universali u ugwali għal edukazzjoni ta’ kwalità u tagħlim tul il-ħajja.

—	Jiġi żgurat li ż-żgħażagħ kollha jkollhom aċċess għall-edukazzjoni mhux formali ffinanzjata b’mod adegwat fil-livelli kollha, li hija rikonoxxuta u vvalidata.

—	Tiġi promossa mentalità miftuħa u jiġi appoġġat l-iżvilupp tal-ħiliet interpersonali u interkulturali.

—	Jinħolqu u jiġu implimentati metodi kooperattivi aktar personalizzati, parteċipattivi, u ċċentrati fuq l-istudent f’kull pass tal-proċess tal-edukazzjoni.

—	Jiġi garantit li l-edukazzjoni tgħammar liż-żgħażagħ kollha b’ħiliet għall-ħajja bħal ġestjoni tal-flus u l-edukazzjoni dwar is-saħħa inkluż is-saħħa sesswali u riproduttiva

—	Jiġu inkorporati metodi fi ħdan ambjenti edukattivi formali u mhux formali li jippermettu lill-istudent biex jiżviluppa ħiliet personali inkluż il-ħsieb kritiku u analitiku, il-kreattività u t-tagħlim.

—	Jiġi żgurat li ż-żgħażagħ ikollhom aċċess għall-edukazzjoni ċivika biex jiġu pprovduti b’għarfien solidu dwar is-sistemi politiċi, id-demokrazija u d-drittijiet tal-bniedem, miksuba ukoll permezz ta’ esperjenzi bbażati fil-komunità sabiex tiġi promossa l-parteċipazzjoni ċivili attiva.

#9 SPAZJU U PARTEĊIPAZZJONI GĦAL KULĦADD

Sfond: Iż-żgħażagħ mhumiex rappreżentati biżżejjed fil-proċessi tat-teħid tad-deċiżjonijiet li jaffettwawhom għalkemm l-impenn tagħhom huwa kruċjali għad-demokrazija. Jeħtieġu aċċess għal spazji fiżiċi fil-komunitajiet tagħhom biex jingħata appoġġa għall-iżvilupp personali, kulturali u politiku tagħhom.

Għan: Tissaħħaħ il-parteċipazzjoni demokratika u l-awtonomija taż-żgħażagħ kif ukoll jiġu pprovduti spazji ddedikati għaż-żgħażagħ fl-oqsma kollha tas-soċjetà.

Miri

—

Jiġi żgurat li ż-żgħażagħ jistgħu jinfluwenzaw b’mod adegwat l-oqsma kollha tas-soċjetà u l-partijiet kollha tal-proċessi tat-teħid tad-deċiżjonijiet, mit-tfassil tal-aġenda għall-implimentazzjoni, il-monitoraġġ u l-evalwazzjoni permezz ta’ mekkaniżmi u strutturi adatti għaż-żgħażagħ u aċċessibbli, filwaqt li jiġi żgurat li l-politiki jirrispondu għall-ħtiġijiet taż-żgħażagħ.

—	Jiġi żgurat aċċess ugwali għat-teħid ta’ deċiżjonijiet ta’ kuljum għaż-żgħażagħ kollha minn sfondi differenti.

—	Tiżdied il-parteċipazzjoni taż-żgħażagħ u b’hekk ir-rappreżentanza ugwali fil-proċess elettorali kif ukoll fil-korpi eletti u organi oħra fit-teħid ta’ deċiżjonijiet fil-livelli kollha tas-soċjetà.

—	Jiġu pprovduti faċilitajiet fiżiċi u infrastrutturi mmexxija miż-żgħażagħ imsejħa spazji għaż-żgħażagħ definiti billi jkunu awtonomi, miftuħa u sikuri, aċċessibbli għal kulħadd, li joffru appoġġ professjonali għall-iżvilupp u li jiżguraw opportunitajiet għall-parteċipazzjoni taż-żgħażagħ.

—	Jiġu żgurati spazji virtwali u sikuri għaż-żgħażagħ li jkunu aċċessibbli għal kull żagħżugħ u li jipprovdu aċċess għal informazzjoni u servizzi kif ukoll jiżguraw l-opportunitajiet għall-parteċipazzjoni taż-żgħażagħ.

—	Jiġu żgurati finanzjament sostenibbli, rikonoxximent komuni u żvilupp ta’ ħidma ta’ kwalità fost iż-żgħażagħ sabiex jissaħħu l-organizzazzjonijiet taż-żgħażagħ u r-rwol tagħhom fl-inklużjoni, il-parteċipazzjoni u l-edukazzjoni mhux formali.

—	Tiġi pprovduta informazzjoni rilevanti, komprensiva u adatta għaż-żgħażagħ, żviluppata wkoll miż-żgħażagħ u maż-żgħażagħ, sabiex tippermetti l-parteċipazzjoni taż-żgħażagħ.

#10 EWROPA EKOLOĠIKA SOSTENIBBLI

Sfond: Illum il-ġurnata nikkonsmaw b’mod li l-ambjent tagħna ma jiflaħx għalih. Is-soċjetà jeħtieġ li tieħu azzjoni kontra l-bidla fil-klima u t-theddid ambjentali li dejjem qed jikber. Iżda s-soċjetà tagħna ma tistax issolvi problema li mhijiex lesta tirrikonoxxi. Huwa minħabba f’hekk li kulħadd, inkluż iż-żgħażagħ, għandu jibda jieħu r-responsabbiltà għall-azzjonijiet tiegħu, u l-impatt fuq il-ħajja tal-ġenerazzjonijiet futuri. Li nsiru sostenibbli mhijiex għażla, iżda obbligu.

Għan: Tinkiseb soċjetà fejn iż-żgħażagħ kollha jkunu attivi ambjentalment, edukati u kapaċi li jagħmlu differenza fil-ħajja tagħhom ta’ kuljum.

Miri

—	Jiġi żgurat li kulħadd inkluż iż-żgħażagħ jafu l-effett tal-azzjonijiet tagħhom fuq l-ambjent.

—	Tingħata s-setgħa lis-soċjetà kollha speċjalment liż-żgħażagħ biex jaġixxu bħala aġenti tal-bidla għall-iżvilupp ambjentali u sostenibbli.

—	Jitqies l-impatt ambjentali ta’ kull politika u deċiżjoni tal-ħajja filwaqt li jiġi żgurat li ż-żgħażagħ ikunu inklużi fit-tfassil tal-politiki dwar l-iżvilupp sostenibbli fil-livelli kollha.

—	Tiżdied il-kooperazzjoni internazzjonali biex jiġu eliminati l-produzzjoni u l-konsum ta’ ħsara għall-ambjent.

—	Jiġu appoġġati u msaħħa l-opportunitajiet għaż-żgħażagħ biex jivvolontarjaw fis-settur ambjentali.

—	Jiġi żgurat li kulħadd speċjalment iż-żgħażagħ ikollu aċċess għal infrastruttura ekoloġika għal għajxien fi stil ta’ ħajja aktar sostenibbli.

—	Jiġu estiż r-riċerka u l-innovazzjoni f’soluzzjonijiet u teknoloġiji ekoloġiċi.

#11 ORGANIZZAZZJONIJIET TAŻ-ŻGĦAŻAGĦ U PROGRAMMI EWROPEJ

Sfond: L-organizzazzjonijiet taż-żgħażagħ u l-programmi Ewropej għaż-żgħażagħ jinvolvu miljuni ta’ żgħażagħ biex jappoġġaw iċ-ċittadinanza attiva tagħhom u biex jiżviluppaw il-ħiliet għall-ħajja tagħhom. Madankollu, l-organizzazzjonijiet taż-żgħażagħ u l-programmi Ewropej għaż-żgħażagħ għadhom nieqsa minn finanzi adegwati u għadhom nieqsa mir-rikonoxximent u l-aċċessibbiltà.

Għan: Jiġi żgurat aċċess ugwali għaż-żgħażagħ kollha għall-organizzazzjonijiet taż-żgħażagħ u l-programmi Ewropej għaż-żgħażagħ, filwaqt li tinbena soċjetà bbażata fuq valuri u l-identità Ewropej.

Miri

—	Tiġi żgurata l-viżibbiltà u tiġi pprovduta informazzjoni ta’ kwalità dwar l-organizzazzjonijiet taż-żgħażagħ u l-programmi Ewropej għaż-żgħażagħ, liż-żgħażagħ kollha.

—	Jiġu żgurati biżżejjed riżorsi mill-programmi tal-UE għall-organizzazzjonijiet taż-żgħażagħ biex jiżviluppaw proġetti u jaċċessaw appoġġ strutturali biex iwettqu l-missjonijiet tagħhom u biex jappoġġaw il-ħidma tagħhom.

—	Jiġi żgurat li l-organizzazzjonijiet taż-żgħażagħ u l-programmi Ewropej għaż-żgħażagħ jkunu rrikonċiljati aħjar mas-sistemi edukattivi u rikonoxxuti bħala atturi li jrawmu ħiliet għall-ħajja u ċ-ċittadinanza attiva.

—	Tiżdied l-aċċessibbiltà tal-programmi Ewropej għaż-żgħażagħ, jiġi żgurat proċess amministrattiv adatt għaż-żgħażagħ u jiġi pprovdut appoġġ u informazzjoni ta’ kwalità għall-parteċipanti u l-applikanti kollha.

—	Jintlaħqu u jiġu appoġġati ż-żgħażagħ emarġinati biex ikunu attivi f’organizzazzjonijiet taż-żgħażagħ, gruppi taż-żgħażagħ u l-programmi tal-UE dwar iż-żgħażagħ.

—	Jiżdiedu r-riżorsi, u titwessa’ l-varjetà ta’ għotjiet u diversità ta’ inizjattivi disponibbli għall-organizzazzjonijiet taż-żgħażagħ u gruppi taż-żgħażagħ.

—	Tiġi żgurata l-parteċipazzjoni taż-żgħażagħ fil-proċessi ta’ governanza tal-programmi Ewropej għaż-żgħażagħ.

(1) www.youthgoals.eu

L-ikoni tal-Għanijiet dwar iż-Żgħażagħ ġew iddisinjati minn Mireille van Bremen u jistgħu jitniżżlu flimkien mal-manwal tad-disinn.

(2) B’kont debitu għas-sussidjarjetà, “il-ġeneri kollha” għandhom ikunu trattati skont il-leġislazzjoni nazzjonali u tal-Unjoni u ċ-ċirkostanzi nazzjonali.

(3) L-abbrevjazzjoni “LGBTQI +” għandha l-għan li tiġbor identitajiet mhux eterosesswali u/jew mhux binarji, l-ittri jfissru Leżbjani, Gay, Bisesswali, Transġeneru, Queer/Questioning, Intersesswali, il-+ jissimbolizza li l-lista mhijiex eżawrjenti

(4) https://ec.europa.eu/eurostat/statistics-explained/index.php/Statistics_on_rural_areas_in_the_EU

ANNESS 4

dwar il-Pjan ta’ Ħidma għall-Istrateġija tal-UE dwar iż-Żgħażagħ 2019-2021

Data

Metodu ta’ ħidma/Strument

Mira indikattiva u riżultati

Għanijiet dwar iż-Żgħażagħ Relatati

Proposta minn

Riżultati Ġenerali

Darba fis-sena

Pjattaforma tal-Istrateġija tal-UE għaż-żgħażagħ

Għall-inqas darba fis-sena (b’laqgħat mal-partijiet ikkonċernati bejn laqgħa u oħra).

Rapport mill-pjattaforma biex jitqassam lil udjenza wiesgħa.

—	Konnessjoni bejn iż-Żgħażagħ u l-UE

—	Soċjetajiet Inklużivi

—	Informazzjoni u Djalogu Kostruttiv

COM

RO, FI, HR Triju ta’ Presidenzi

Suġġett ġenerali: “Ħolqien ta’ opportunitajiet għaż-żgħażagħ”

Nofs l-2019

Grupp ta’ esperti dwar l-indikaturi

Indikaturi ta’ politika biex jgħinu l-monitoraġġ tal-progress fl-implimentazzjoni tal-Istrateġija għaż-Żgħażagħ

—	Informazzjoni u Djalogu Kostruttiv

COM

2019

Grupp ta’ esperti dwar is-solidarjetà transkonfinali

Rakkomandazzjonijiet ta’ politika biex jintużaw fir-rieżami tar-Rakkomandazzjoni tal-Kunsill dwar il-mobbiltà ta’ voluntiera żgħażagħ madwar l-Unjoni Ewropea

—	Konnessjoni bejn iż-Żgħażagħ u l-UE

—	Organizzazzjonijiet taż-Żgħażagħ u Programmi Ewropej

DE, (COM)

2019 (l-ewwel nofs)

Konklużjonijiet tal-Kunsill dwar iż-żieda tal-adattabbiltà taż-żgħażagħ għall-isfidi tal-futur tax-xogħol

—	Impjiegi ta’ Kwalità għal Kulħadd

—	Tagħlim ta’ Kwalità

2019 (l-ewwel nofs)

Konferenza/Seminar dwar aċċess ugwali għal impjiegi ta’ kwalità għaż-żgħażagħ

Rakkomandazzjonijiet ta’ politika mfasslin flimkien maż-żgħażagħ dwar l-iffaċilitar tad-dħul fis-suq tax-xogħol

—	Impjiegi ta’ Kwalità għal Kulħadd

—	Informazzjoni u Djalogu Kostruttiv

2019 (l-ewwel nofs)

Programm pilota tad-Delegati taż-Żgħażagħ tal-UE

Programm pilota fejn rappreżentanti taż-żgħażagħ mill-pajjiż tal-Presidenza attwali jistgħu jipparteċipaw fit-twassil u/jew il-promozzjoni ta’ attivitajiet tal-Presidenza fil-qasam taż-żgħażagħ, kemm fil-livell tal-UE u dak nazzjonali.

—	Informazzjoni u Djalogu Kostruttiv

—	Spazju u Parteċipazzjoni għal Kulħadd

2019 (it-tieni nofs)

Konklużjonijiet tal-Kunsill dwar l-edukazzjoni u t-taħriġ ta’ ħaddiema żgħażagħ

Adozzjoni mill-Kunsill

Promozzjoni tal-kwalità tal-ħidma fost iż-żgħażagħ permezz tal-edukazzjoni u t-taħriġ ta’ ħaddiema żgħażagħ

—	Spazju u Parteċipazzjoni għal Kulħadd

—	Informazzjoni u Djalogu Kostruttiv

—	Tagħlim ta’ Kwalità

2019 (it-tieni nofs)

Konklużjonijiet tal-Kunsill dwar il-ħidma diġitali fost iż-żgħażagħ

Adozzjoni mill-Kunsill

Promozzjoni ta’ fehim komuni u żvilupp strateġiku tal-ħidma diġitali fost iż-żgħażagħ

—	Spazju u Parteċipazzjoni għal Kulħadd

—	Informazzjoni u Djalogu Kostruttiv

—	Soċjetajiet Inklużivi

2020

Żvilupp ta’ kors online dwar il-ħidma fost iż-żgħażagħ

Kors online dwar il-ħidma fost iż-żgħażagħ;

Disseminazzjoni ulterjuri tal-Manwal dwar Titjib tal-ħidma fost iż-żgħażagħ – il-gwida tiegħek għall-iżvilupp ta’ kwalità (2017)

Disseminazzjoni ulterjuri tar-rapport tal-grupp ta’ esperti dwar L-iżvilupp tal-ħidma diġitali fost iż-żgħażagħ (2018)

—	Spazju u Parteċipazzjoni għal Kulħadd

—	Informazzjoni u Djalogu Kostruttiv

COM

2020

Attività ta’ tagħlim bejn il-pari dwar approċċi transettorjali fil-ħidma fost iż-żgħażagħ

Kompendju ta’ eżempji ta’ prattika tajba

COM

2020

Studju biex jipproponi sett ta’ għodod dwar il-politiki taż-żgħażagħ li jilħqu l-livell lokali

Żvilupp ta’ sett ta’ għodod prattiċi mmirati lejn dawk li jfasslu l-politika fil-livell lokali u reġjonali dwar l-indirizzar tal-ħtiġijiet taż-żgħażagħ, b’attenzjoni speċjali fuq sħubijiet transettorjali

—	Spazju u Parteċipazzjoni għal Kulħadd

COM

2020

Grupp ta’ Esperti dwar approċċ ibbażat fuq id-drittijiet għall-politiki dwar iż-żgħażagħ.

Rakkomandazzjonijiet ta’ politika dwar il-Promozzjoni ta’ approċċ ibbażat fuq id-drittijiet lejn iż-żgħażagħ

—	Impjiegi ta’ Kwalità għal Kulħadd

—	Spazju u Parteċipazzjoni għal Kulħadd

2020

Attività ta’ tagħlim bejn il-pari

Proġett Konġunt Possibbli mal-Kumitat tar-Reġjuni.

Governanza f’diversi livelli u Parteċipazzjoni

It-tisħiħ ta’ governanza f’diversi livelli fil-promozzjoni tal-parteċipazzjoni taż-żgħażagħ fil-proċessi politiċi u oħrajn ta’ teħid ta’ deċiżjonijiet fil-livelli lokali, reġjonali, nazzjonali u Ewropej

—	Spazju u Parteċipazzjoni għal Kulħadd

2020 (l-ewwel nofs)

(poss.) Konklużjonijiet tal-Kunsill dwar il-Ħidma fost iż-żgħażagħ f’żoni rurali u l-promozzjoni ta’ solidarjetà interġenerazzjonali

—	Appoġġ għall-Iżvilupp taż-Żgħażagħ Rurali

—	Soċjetajiet Inklużivi

2020 (l-ewwel nofs)

(poss.) Konklużjonijiet tal-Kunsill dwar il-Promozzjoni tal-ħidma fost iż-żgħażagħ billi titqajjem kuxjenza dwar is-settur taż-żgħażagħ permezz ta’ informazzjoni u t-tisħiħ tar-riżorsi

—	Spazju u Parteċipazzjoni għal Kulħadd

2020 (l-ewwel nofs)

(poss.) suġġett għal matul il-laqgħa tad-DG Promozzjoni tal-intraprenditorija soċjali fost iż-żgħażagħ

—	Impjiegi ta’ Kwalità għal Kulħadd

—	Soċjetajiet Inklużivi

DE, PT, SI Triju ta’ Presidenzi

2020 (it-tieni nofs)

Aġġornament tar-Rakkomandazzjoni tal-Kunsill tal-2008 dwar il-mobbiltà ta’ voluntiera żgħażagħ madwar l-Unjoni Ewropea

Adozzjoni mill-Kunsill

Tisħiħ tal-potenzjal tal-Programmi Ewropej għaż-Żgħażagħ biex jilħqu liż-żgħażagħ u jgħinu biex tinbena komunità.

—	Spazju u Parteċipazzjoni għal Kulħadd

—	Konnessjoni bejn iż-Żgħażagħ u l-UE

—	Organizzazzjonijiet taż-Żgħażagħ u Programmi Ewropej

DE, (COM)

2020 (it-tieni nofs)

Riżoluzzjoni tal-Kunsill “Aġenda dwar il-Ħidma fost iż-Żgħażagħ” (terminu f’konformità ma’ EU-YS finali)

Adozzjoni mill-Kunsill

Sommarju/Fużjoni/Konsolidazzjoni ta’ azzjonijiet u riżoluzzjonijiet fil-qasam tal-Ħidma fost iż-Żgħażagħ fl-Ewropa u l-identifikazzjoni ta’ sinerġiji fil-kooperazzjoni mal-Kunsill tal-Ewropa.

—	Organizzazzjonijiet taż-Żgħażagħ u Programmi Ewropej

—	Spazju u Parteċipazzjoni għal Kulħadd

Diċ. 2020

It-Tielet Konvenzjoni Ewropea dwar il-Ħidma fost iż-Żgħażagħ

Bidu tal-proċess ta’ implimentazzjoni tal-Aġenda Ewropea dwar il-Ħidma fost iż-Żgħażagħ u r-Rakkomandazzjoni tal-Kunsill tal-Ewropa dwar il-Ħidma fost iż-Żgħażagħ.

—	Organizzazzjonijiet taż-Żgħażagħ u Programmi Ewropej

—	Spazju u Parteċipazzjoni għal Kulħadd

2020 (it-tieni nofs)

Konklużjonijiet tal-Kunsill dwar iż-żgħażagħ u d-demokrazija

Adozzjoni mill-Kunsill

—	Konnessjoni bejn l-UE u ż-Żgħażagħ

—	Spazju u Parteċipazzjoni għal Kulħadd

2020 (it-tieni nofs)

(poss.) Laqgħa Konġunta tad-DG u Kapijiet tal-Aġenziji Nazzjonali għall-Erasmus+ Żgħażagħ fl-Azzjoni/Korp Ewropew ta’ Solidarjetà

Diskussjoni dwar il-kontribut tal-Programmi l-ġodda tal-UE għaż-Żgħażagħ li ser jibdew fl-2021 u ser jilħqu l-għanijiet politiċi tal-Politika tal-UE dwar iż-Żgħażagħ.

—	Organizzazzjonijiet taż-Żgħażagħ u Programmi Ewropej

2020 jew 2021

(poss.) Eżerċizzju ta’ tagħlim bejn il-pari dwar il-ħidma diġitali fost iż-żgħażagħ

—	Spazju u Parteċipazzjoni għal Kulħadd

—	Informazzjoni u Djalogu Kostruttiv

2020-2021

Attivitajiet ta’ tagħlim bejn il-pari dwar attivitajiet ta’ solidarjetà nazzjonali

Attivitajiet ta’ tagħlim bejn il-pari għall-iskambju ta’ attivitajiet ta’ prattiki tajba

—	Konnessjoni bejn iż-Żgħażagħ u l-UE

—	Organizzazzjonijiet taż-Żgħażagħ u Programmi Ewropej

COM

Mejju 2021

Seminar Internazzjonali

Edukazzjoni mhux formali u informali bħala għodod għall-ħidma maż-żgħażagħ fl-ilħuq tal-Għanijiet ta’ Żvilupp Sostenibbli.

(poss.) Konklużjonijiet tal-Presidenza

—	Ewropa Ekoloġika Sostenibbli

—	Tagħlim ta’ Kwalità

2021 (l-ewwel nofs)

(poss.) Konklużjonijiet tal-Kunsill dwar l-iżgurar ta’ approċċ ibbażat fuq id-drittijiet għall-politiki dwar iż-żgħażagħ

Adozzjoni mill-Kunsill

(b’kunsiderazzjoni tal-konklużjonijiet tal-Kunsill dwar il-promozzjoni tal-aċċess taż-żgħażagħ għal drittijiet għat-trawwim tal-awtonomija u l-parteċipazzjoni tagħhom fis-soċjetà ċivili, 12 ta’ Diċembru 2014)

—	Impjiegi ta’ Kwalità għal Kulħadd

—	Spazju u Parteċipazzjoni għal Kulħadd

2021 (l-ewwel nofs)

(poss.) Konklużjonijiet tal-Kunsill dwar it-tisħiħ ta’ governanza f’diversi livelli fil-promozzjoni tal-parteċipazzjoni taż-żgħażagħ fil-proċessi politiċi u oħrajn ta’ teħid ta’ deċiżjonijiet fil-livelli lokali, reġjonali, nazzjonali u Ewropej

Adozzjoni mill-Kunsill

Fl-okkażjoni tal-10 anniversarju tar-Riżoluzzjoni tal-Kunsill dwar l-inkoraġġiment ta’ forom ġodda u effettivi ta’ parteċipazzjoni taż-żgħażagħ kollha fil-ħajja demokratika fl-Ewropa

—	Spazju u Parteċipazzjoni għal Kulħadd

—	Konnessjoni bejn iż-Żgħażagħ u l-UE

2021

Attività ta’ tagħlim bejn il-pari dwar modi innovattivi dwar il-finanzjament tal-ħidma fost iż-żgħażagħ

Kompendju ta’ eżempji ta’ prattika tajba

—	Spazju u Parteċipazzjoni għal Kulħadd

COM

2021 (it-tieni nofs)

Rapport Konġunt tal-Kunsill u l-Kummissjoni dwar l-implimentazzjoni tal-Istrateġija tal-UE għaż-Żgħażagħ

Rapport dwar il-progress li sar matul 2019-2021 fl-implimentazzjoni tal-Istrateġija għaż-Żgħażagħ, inkluż il-pjan ta’ ħidma ta’ kull tliet snin

SI, (COM)

2021 (it-tieni nofs)

Il-pjan ta’ ħidma 2022-2024

2021 (it-tieni nofs)

Djalogu tal-UE maż-Żgħażagħ, Konklużjonijiet tal-Kunsill