(1)

Ftehim ta’ assoċjazzjoni bejn l-Unjoni u l-Ukrajna (2), inkluż Żona ta’ Kummerċ Ħieles Approfondita u Komprensiva, daħal fis-seħħ fl-1 ta’ Settembru 2017.

(2)

Fl-2014, l-Ukrajna bdiet programm ambizzjuż ta’ riforma bil-għan li tistabbilizza l-ekonomija tagħha u ttejjeb l-għajxien taċ-ċittadini tagħha. Il-ġlieda kontra l-korruzzjoni kif ukoll riformi kostituzzjonali, elettorali u ġudizzjarji, huma fost l-ogħla prijoritajiet fuq l-aġenda. L-implimentazzjoni ta’ dawk ir-riformi ġiet appoġġata minn programmi konsekuttivi ta’ assistenza makrofinanzjarja, li taħthom l-Ukrajna rċeviet assistenza mill-Unjoni fil-forma ta’ self għal total ta’ EUR 6,6 biljun.

(3)

L-assistenza makrofinanzjarja ta’ emerġenza, li saret disponibbli fil-kuntest ta’ theddida dejjem tikber, eżatt qabel l-invażjoni Russa, skont id-Deċiżjoni (UE) 2022/313 tal-Parlament Ewropew u tal-Kunsill (3), ipprovdiet EUR 1,2 biljun f’self lill-Ukrajna, żborżat f’żewġ pagamenti parzjali ta’ EUR 600 miljun kull wieħed, f’Marzu u Mejju 2022.

(4)

L-assistenza makrofinanzjarja eċċezzjonali tal-Unjoni sa EUR 1 biljun, magħmula disponibbli skont id-Deċiżjoni (UE) 2022/1201 tal-Parlament Ewropew u tal-Kunsill (4), ipprovdiet appoġġ rapidu u urġenti għall-baġit tal-Ukrajna u ġiet żborżata totalment b’żewġ pagamenti parzjali fl-1 u t-2 ta’ Awwissu 2022. Din l-assistenza kkonstitwit l-ewwel stadju tal-assistenza makrofinanzjarja eċċezzjonali ppjanata lill-Ukrajna sa EUR 9 biljun, imħabbar mill-Kummissjoni fil-komunikazzjoni tagħha tat-18 ta’ Mejju 2022 intitolata “L-Ukrajna: Għajnuna u Rikostruzzjoni” u approvata mill-Kunsill Ewropew tat-23-24 ta’ Ġunju 2022.

(5)

Id-Deċiżjoni (UE) 2022/1628 tal-Parlament Ewropew u tal-Kunsill (5) kkostitwixxiet pass ieħor fl-implimentazzjoni tal-assistenza makrofinanzjarja eċċezzjonali ppjanata tal-Unjoni. Hija stabbiliet il-bażi għall-għoti lill-Ukrajna ta’ ammont ulterjuri sa EUR 5 biljun fil-forma ta’ self b’termini aġevolati ħafna, li minnhom EUR 2 biljun ġew żborżati fit-18 ta’ Ottubru, filwaqt li t-EUR 3 biljun li jifdal għandhom jiġu żborżati sa tmiem l-2022.

(6)

Il- gwerra ta’ aggressjoni mhux provokata u mhux ġustifikata tar-Russja kontra l-Ukrajna, mill-24 ta’ Frar 2022, ikkawżat lill-Ukrajna telf ta’ aċċess għas-swieq finanzjarji kif ukoll tnaqqis sinifikanti fid-dħul pubbliku, filwaqt li l-infiq pubbliku biex tiġi indirizzata s-sitwazzjoni umanitarja u biex tinżamm il-kontinwità tas-servizzi tal-Istat żdied b’mod notevoli. F’dik is-sitwazzjoni volatili u inċerta ħafna, l-aħjar stimi tal-ħtiġijiet ta’ finanzjament tal-Ukrajna mill-Fond Monetarju Internazzjonali (FMI), fis-sajf tal-2022, indikaw diskrepanza straordinarja fil-finanzjament ta’ madwar USD 39 biljun fl-2022, li madwar nofshom jistgħu jiġu ssodisfati bis-saħħa ta’ appoġġ internazzjonali. L-għoti rapidu mill-Unjoni tal- assistenza makrofinanzjarja lill-Ukrajna, skont id-Deċiżjoni (UE) 2022/1628 kien jitqies, fiċ-ċirkostanzi straordinarji attwali, bħala rispons xieraq għal terminu qasir għar-riskji mdaqqsa għall-istabbiltà makrofinanzjarja tal-Ukrajna. L-ammont ulterjuri sa massimu ta’ EUR 5 biljun f’assistenza makrofinanzjarja eċċezzjonali skont dik id-Deċiżjoni kien biex jingħata appoġġ lill-istabbilizzazzjoni makrofinanzjarja tal-Ukrajna, isaħħaħ ir-reżiljenza immedjata tal-pajjiż u jsostni l-kapaċità tiegħu lejn l-irkupru, u b’hekk jikkontribwixxi għas-sostenibbiltà tad-dejn pubbliku tal-Ukrajna u l-kapaċità tagħha li fl-aħħar mill-aħħar tkun f’pożizzjoni li tissodisfa l-obbligi finanzjarji tagħha.

(7)

Sa mill-bidu tal-gwerra ta’ aggressjoni tar-Russja kontra l-Ukrajna, l-Unjoni, l-Istati Membri tagħha u l-istituzzjonijiet finanzjarji Ewropej immobilizzaw EUR 19,7-il biljun għar-reżiljenza ekonomika, soċjali u finanzjarja tal-Ukrajna. Dak l-ammont jgħaqqad appoġġ mill-baġit tal-Unjoni fl-ammont ta’ EUR 12,4-il biljun, inklużi l-assistenza makrofinanzjarja eċċezzjonali u l-appoġġ mill-Bank Ewropew tal-Investiment u l-Bank Ewropew għar-Rikostruzzjoni u l-Iżvilupp, iggarantiti bis-sħiħ jew parzjalment mill-baġit tal-Unjoni, kif ukoll appoġġ finanzjarju ulterjuri mill-Istati Membri, fl-ammont ta’ EUR 7,3 biljun.

(8)

Barra minn hekk, il-Kunsill iddeċieda dwar miżuri ta’ assistenza b’appoġġ lill-forzi armati Ukreni bil-Faċilità Ewropea għall-Paċi, fl-ammont ta’ EUR 3,1 biljun taħt id-Deċiżjoni tal-Kunsill (PESK) 2021/509 (6), u missjoni ta’ assistenza militari b’appoġġ għall-Ukrajna b’EUR 0,1 biljun għall-ispejjeż komuni taħt id-Deċiżjoni tal-Kunsill (PESK) 2022/1968 (7). L-Unjoni u l-Istati Membri tagħha taw ukoll rispons ta’ emerġenza in natura bla preċedent permezz tal-Mekkaniżmu tal-Unjoni għall-Protezzjoni Ċivili taħt ir-Regolament (UE) 2021/836 tal-Parlament Ewropew u tal-Kunsill (8), li jikkostitwixxi l-akbar operazzjoni ta’ emerġenza mill-ħolqien ta’ dak il-mekkaniżmu, u wassal miljuni ta’ oġġetti ta’ emerġenza lejn l-Ukrajna u r-reġjun.

(9)

Il-Kunsill Ewropew tat-23 ta’ Ġunju 2022 ddeċieda li jagħti l-istatus ta’ pajjiż kandidat lill-Ukrajna. L-appoġġ qawwi lill-Ukrajna li għadu għaddej huwa prijorità ewlenija għall-Unjoni. Billi l-ħsara mill-gwerra ta’ aggressjoni tar-Russja lill-ekonomija, iċ-ċittadini u n-negozji Ukrajni hija tremenda, l-appoġġ qawwi lill-Ukrajna li għadu għaddej jirrikjedi approċċ kollettiv organizzat kif stabbilit fl-istrument għall-għoti ta’ appoġġ tal-Unjoni lill-Ukrajna (assistenza makrofinanzjarja +) stabbilit minn dan ir-Regolament (l-‘Istrument’).

(10)

Il-gwerra ta’ aggressjoni tar-Russja kontra l-Ukrajna tirrappreżenta theddida ġeopolitika strateġika għall-Unjoni kollha kemm hi u tirrikjedi li l-Istati Membri jibqgħu b’saħħithom u magħqudin. Għalhekk, huwa essenzjali li l-appoġġ tal-Unjoni jintuża malajr u jkun kapaċi jadatta b’mod flessibbli u gradwali għal għajnuna immedjata u riabilitazzjoni f’perjodu qasir fit-triq lejn rikostruzzjoni futura.

(11)

L-objettiv ġenerali tal-Istrument huwa li jikkontribwixxi biex jingħalaq id-distakk fil-finanzjament tal-Ukrajna fl-2023, b’mod partikolari billi jipprovdi għajnuna finanzjarja aġevolata ħafna b’terminu qasir għall-baġit tal-Istat tal-Ukrajna b’mod prevedibbli, kontinwu, ordnat u f’waqtu, inkluż li jiffinanzja r-riabilitazzjoni u l-appoġġ inizjali lejn ir-rikostruzzjoni ta’ wara l-gwerra, fejn xieraq, bil-ħsieb li jappoġġa lill-Ukrajna fi triqitha lejn l-integrazzjoni Ewropea.

(12)

Sabiex jintlaħaq l-objettiv ġenerali tal-Istrument, l-assistenza jenħtieġ li tingħata biex tappoġġa l-istabbiltà makrofinanzjarja fl-Ukrajna, u biex ittaffi r-restrizzjonijiet tal-finanzjament estern tal-Ukrajna. Jenħtieġ li l-Kummissjoni timplimenta l-appoġġ permezz tal-Istrument f’konformità mal-prinċipji u l-objettivi ewlenin tal-miżuri meħuda fl-oqsma differenti tal-azzjoni esterna u politiki oħrajn rilevanti tal-Unjoni.

(13)

L-għoti ta’ appoġġ għar-riabilitazzjoni, it-tiswija, u l-manutenzjoni ta’ funzjonijiet u infrastruttura kritiċi kif ukoll għajnuna għall-persuni fil-bżonn u għaż-żoni l-aktar affettwati f’termini ta’ appoġġ materjali u soċjali, akkomodazzjoni temporanja, kostruzzjoni residenzjali u infrastrutturali jenħtieġ li jgħoddu wkoll fost l-oqsma ewlenin ta’ appoġġ permezz tal-Istrument.

(14)

Jenħtieġ li l-Istrument jappoġġa wkoll it-tisħiħ tal-kapaċità tal-awtoritajiet Ukreni biex iħejju għar-rikostruzzjoni futura ta’ wara l-gwerra u għall-fażi preparatorja bikrija tal-proċess ta’ qabel l-adeżjoni, kif xieraq, inkluż it-tisħiħ tal-istituzzjonijiet tal-Ukrajna, ir-riforma u t-tisħiħ tal-effettività tal-amministrazzjoni pubblika kif ukoll it-trasparenza, ir-riformi strutturali u l-governanza tajba fil-livelli kollha.

(15)

L-Istrument ser jappoġġa l-politika esterna tal-Unjoni fir-rigward tal-Ukrajna. Il-Kummissjoni u s-Servizz Ewropew għall-Azzjoni Esterna jenħtieġ li jaħdmu flimkien mill-qrib matul l-operazzjoni ta’ appoġġ sabiex jikkoordinaw u jiżguraw il-konsistenza tal-politika esterna tal-Unjoni. L-appoġġ lill-Ukrajna permezz tal-Istrument ser ikompli jikkontribwixxi b’mod sinifikanti biex jiġu ssodisfati l-ħtiġijiet ta’ finanzjament tal-Ukrajna kif stmati mill-FMI, mill-Bank Dinji u minn istituzzjonijiet finanzjarji internazzjonali oħra, filwaqt li titqies il-kapaċità tal-Ukrajna li tiffinanzja lilha nnifisha bir-riżorsi proprji tagħha. Id-determinazzjoni tal-ammont tal-appoġġ tqis ukoll il-kontribuzzjonijiet finanzjarji mistennija minn donaturi bilaterali u multilaterali, kif ukoll l-iskjerament preeżistenti tal-istrumenti ta’ finanzjament esterni l-oħra tal-Unjoni fl-Ukrajna u l-valur miżjud tal-involviment ġenerali tal-Unjoni.

(16)

Is-sitwazzjoni tal-Ukrajna tirrikjedi approċċ gradwali fejn strument li jiffoka fuq l-istabbiltà makrofinanzjarja kif ukoll l-għajnuna u r-riabilitazzjoni immedjati jenħtieġ li jkun akkumpanjat minn appoġġ kontinwu taħt l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali - Ewropa Globali stabbilit bir-Regolament (UE) 2021/947 tal-Parlament Ewropew u tal-Kunsill (9) u l-operazzjonijiet għall-għajnuna umanitarja skont ir-Regolament tal-Kunsill (KE) Nru 1257/96 (10).

(17)

Jenħtieġ li dan ir-Regolament jistabbilixxi r-riżorsi disponibbli għall-Istrument għall-perjodu mill-1 ta’ Jannar 2023 sal-31 ta’ Diċembru 2023 bi żborżi possibbli sal-31 ta’ Marzu 2024. Ammont massimu ta’ EUR 18-il biljun jenħtieġ li jkun disponibbli fil-forma ta’ self. Barra minn hekk, għall-perjodu mill-1 ta’ Jannar 2023 sal-31 ta’ Diċembru 2027, dan ir-Regolament jenħtieġ li jipprovdi għal sussidju tar-rata tal-imgħax. Sabiex tiġi żgurata l-kopertura tal-ispejjeż tal-imgħax matul il-ħajja tas-self, il-kontribuzzjonijiet mill-Istati Membri lil hinn mill-2027 jenħtieġ li jiġġeddu u jkomplu bħala dħul assenjat estern sakemm ma jkunux koperti b’mezzi oħra f’oqfsa finanzjarji pluriennali futuri. Għalhekk, jista’ jkun possibbli li l-kontribuzzjonijiet mill-Istati Membri jiġu estiżi lil hinn mill-2027.

(18)

Dan ir-Regolament jenħtieġ li jipprovdi l-possibbiltà li l-Istati Membri jagħmlu disponibbli riżorsi addizzjonali, bħala dħul assenjat estern, li għandhom jiġu implimentati skont il-memorandum ta’ qbil (“MtQ”) tal-Istrument. Tali possibbiltà għal kontribuzzjoni addizzjonali jenħtieġ li ssir ukoll għal pajjiżi terzi u terzi persuni interessati bħala dħul assenjat estern, f’konformità mal-Artikolu 21(2), il-punti (d) u (e), tar-Regolament (UE, Euratom) 2018/1046 tal-Parlament Ewropew u tal-Kunsill (11) (“ir-Regolament Finanzjarju”). Sabiex jitrawmu sinerġiji u komplementarjetajiet, huwa xieraq li jiġi permess li tali kontribuzzjonijiet addizzjonali mill-Istati Membri, minn pajjiżi terzi u terzi persuni oħra interessati jkunu jistgħu jsiru disponibbli wkoll għall-programmi stabbiliti skont ir-Regolamenti (UE) 2021/947 u (KE) Nru 1257/96 għall-finanzjament ta’ miżuri li jikkontribwixxu għall-objettivi tal-Istrument.

(19)

Il-kontribuzzjonijiet volontarji mill-Istati Membri għandhom ikunu irrevokabbli, mingħajr kundizzjonijiet u fuq talba. Għal dak il-għan, l-Istati Membri jenħtieġ li jidħlu fi ftehim ta’ kontribuzzjoni fis-sens tal-Artikolu 22(2) tar-Regolament Finanzjarju mal-Kummissjoni. Tali ftehim ta’ kontribuzzjoni jenħtieġ li jkopri l-kontribuzzjoni għas-sussidju tar-rata tal-imgħax u, jekk l-Istati Membri jkunu jixtiequ jipprovduhom, ammonti addizzjonali wkoll.

(20)

L-appoġġ permezz tal-Istrument jenħtieġ li jkun disponibbli bil-prekundizzjoni li l-Ukrajna tkompli tirrispetta l-mekkaniżmi demokratiċi effettivi u l-istituzzjonijiet tagħha, inkluża sistema parlamentari b’diversi partiti, u l-istat tad-dritt, u tiggarantixxi r-rispett għad-drittijiet tal-bniedem.

(21)

L-appoġġ permezz tal-Istrument jenħtieġ li jkun marbut mal-kundizzjonijiet ta’ politika li għandhom jiġu stabbiliti f’MtQ. Jenħtieġ li dawk il-kundizzjonijiet jinkludu wkoll impenji biex jissaħħu l-prestazzjoni ekonomika u r-reżiljenza tal-pajjiż, l-ambjent tan-negozju, tiġi ffaċilitata r-rikostruzzjoni kritika u jiġu indirizzati l-isfidi fis-settur tal-enerġija.

(22)

Il-kundizzjonijiet ta’ politika jenħtieġ li jiġu kkomplementati minn rekwiżiti stretti ta’ rappurtar, bil-għan li jiġi żgurat li l-fondi jintużaw b’mod effiċjenti, trasparenti u responsabbli.

(23)

Fid-dawl tas-sitwazzjoni fl-Ukrajna, huwa xieraq li tiġi prevista reviżjoni ta’ nofs it-terminu tal-MtQ.

(24)

L-appoġġ permezz tal-Istrument jenħtieġ li jiġi rilaxxat soġġett għar-rispett tal-prekundizzjonijiet, l-implimentazzjoni sodisfaċenti u l-progress lejn l-implimentazzjoni tal-kundizzjonijiet tal-politika.

(25)

Huwa xieraq li tiġi prevista l-possibbiltà li jiġu vvalutati mill-ġdid il-ħtiġijiet ta’ finanzjament tal-Ukrajna u li l-appoġġ jitnaqqas, jiġi sospiż jew ikkanċellat jekk dawk il-ħtiġijiet jonqsu b’mod fundamentali matul il-perjodu tal-iżborż tal-appoġġ permezz tal-Istrument meta mqabbel mal-proġettazzjonijiet inizjali. Huwa xieraq ukoll li tiġi prevista l-possibbiltà li l-iżborżi jiġu sospiżi jew ikkanċellati f’każ li r-rekwiżiti għar-rilaxx tal-appoġġ permezz tal-Istrument ma jiġux issodisfati.

(26)

Fil-kuntest tal-ħtiġijiet ta’ finanzjament urġenti tal-Ukrajna, huwa xieraq li l-assistenza finanzjarja tiġi organizzata skont l-istrateġija ta’ finanzjament diversifikata prevista skont l-Artikolu 220a tar-Regolament Finanzjarju u stabbilit bħala metodu ta’ finanzjament uniku fih, li huwa mistenni li jtejjeb il-likwidità tal-bonds tal-Unjoni u l-attraenza u l-kosteffettività tal-ħruġ tal-Unjoni.

(27)

Minħabba s-sitwazzjoni diffiċli tal-Ukrajna kkawżata mill-gwerra ta’ aggressjoni tar-Russja u biex tiġi appoġġata l-Ukrajna fit-triq tal-istabbiltà fit-tul tagħha, huwa xieraq li l-Ukrajna tingħata self b’termini konċessjonali ħafna b’tul massimu ta’ żmien ta’ 35 sena u bil-ħlas lura tal-kapital li ma jibdiex qabel l-2033. Huwa xieraq ukoll li ssir deroga mill-Artikolu 220(5), il-punt (e) tar-Regolament Finanzjarju u li l-Unjoni titħallielha l-possibbiltà li tkopri l-ispejjeż tar-rata tal-imgħax u li tirrinunzja l-ispejjeż amministrattivi li inkella jkunu jridu jinġarru mill-Ukrajna. Is-sussidju tar-rata tal-imgħax jenħtieġ li jingħata bħala strument meqjus xieraq biex tiġi żgurata l-effettività tal-appoġġ permezz tal-Istrument fis-sens tal-Artikolu 220(1) tar-Regolament Finanzjarju. Dan jenħtieġ li jkun iffinanzjat minn kontribuzzjonijiet volontarji addizzjonali mill-Istati Membri u jenħtieġ li jsir disponibbli gradwalment hekk kif il-ftehimiet mal-Istati Membri jidħlu fis-seħħ.

(28)

Jenħtieġ li jkun possibbli għall-Ukrajna li titlob is-sussidju tar-rata tal-imgħax u r-rinunzja tal-ispejjeż amministrattivi kull sena.

(29)

L-obbligazzjoni finanzjarja minn self skont dan ir-Regolament ma tkunx appoġġata mill-Garanzija għall-Azzjoni Esterna, b’deroga mit-tieni sentenza tal-Artikolu 31(3) tar-Regolament (UE) 2021/947. L-appoġġ permezz tal-Istrument jenħtieġ li jikkostitwixxi assistenza finanzjarja fis-sens tal-Artikolu 220(1) tar-Regolament Finanzjarju. Meta jitqiesu r-riskji finanzjarji u l-kopertura baġitarja, l-ebda proviżjonament ma jenħtieġ li jkun kostitwit għall-assistenza finanzjarja fil-forma ta’ self permezz tal-Istrument u, b’deroga mill-Artikolu 211(1) tar-Regolament Finanzjarju, jenħtieġ li ma tiġi stabbilita l-ebda rata ta’ proviżjonament bħala perċentwal tal-ammont imsemmi fl-Artikolu 4(1) ta’ dan ir-Regolament.

(30)

Ir-Regolament tal-Kunsill (UE, Euratom) 2020/2093 (12) bħalissa ma jippermettix il-kopertura tal-obbligazzjoni finanzjarja li tirriżulta minn self fi ħdan l-Istrument. Sakemm possibbilment jiġi emendat, u b’hekk jippermetti, bħala garanzija, il-mobilizzazzjoni tar-riżorsi baġitarji lil hinn mil-limiti massimi tal-qafas finanzjarju pluriennali (QFP) u sal-limiti massimi msemmijin fl-Artikolu 3(1) u (2) tad-Deċiżjoni tal-Kunsill (UE, Euratom) 2020/2053 (13), huwa xieraq li tinstab soluzzjoni alternattiva li tipprovdi riżorsi addizzjonali.

(31)

Il-kontribuzzjonijiet volontarji mill-Istati Membri fil-forma ta’ garanziji ġew identifikati bħala għodda xierqa biex tiġi pprovduta l-protezzjoni li tippermetti l-operazzjonijiet ta’ għoti u teħid ta’ self skont dan ir-Regolament. Il-garanziji tal-Istati Membri jenħtieġ li jikkostitwixxu salvagwardja xierqa li tiżgura l-kapaċità tal-Unjoni li tħallas lura t-teħid ta’ self li jappoġġa s-self permezz tal-Istrument.

(32)

Jenħtieġ li l-garanziji pprovduti mill-Istati Membri jkopru l-appoġġ permezz tal-Istrument fil-forma ta’ self sa EUR 18 000 000 000. Huwa importanti li l-Istati Membri jlestu l-proċeduri nazzjonali applikabbli biex jipprovdu l-garanziji bħala kwistjoni tal-ogħla prijorità. Minħabba l-urġenza tas-sitwazzjoni, jenħtieġ li ż-żmien li hemm bżonn għat-tlestija ta’ dawk il-proċeduri ma jdewwimx l-iżborż tal-appoġġ finanzjarju meħtieġ b’mod urġenti lill-Ukrajna fil-forma ta’ self skont dan ir-Regolament. Fl-istess ħin, l-appoġġ finanzjarju permezz tal-Istrument fil-forma ta’ self jenħtieġ li jsir disponibbli progressivament, hekk kif il-garanziji pprovduti mill-Istati Membri jidħlu fis-seħħ. Fid-dawl tal-prinċipju ta’ ġestjoni finanzjarja tajba u l-prudenza, jenħtieġ li l-Kummissjoni tagħmel arranġamenti għas-self filwaqt li tqis kif xieraq l-affidabbiltà kreditizja tagħha. Madankollu, jenħtieġ li l-appoġġ isir disponibbli għall-ammont sħiħ sa EUR 18 000 000 000 mid-data tal-applikazzjoni ta’ emenda għar-Regolament (UE, Euratom) 2020/2093, jew is-suċċessur tiegħu, li tipprevedi garanzija tas-self permezz tal-Istrument taħt il-baġit tal-Unjoni lil hinn mil-limiti massimi tal-QFP u sal-limiti massimi msemmija fl-Artikolu 3(1) u (2) tad-Deċiżjoni (UE, Euratom) 2020/2053.

(33)

Jenħtieġ li l-garanziji tal-Istati Membri jkunu irrevokabbli, mingħajr kundizzjonijiet u b’talba. Dawk il-garanziji jenħtieġ li jiżguraw il-kapaċità tal-Unjoni li tħallas lura l-fondi mislufa fis-swieq kapitali jew mill-istituzzjonijiet finanzjarji. Jenħtieġ li l-garanziji jieqfu jkunu eżerċitabbli mid-data tal-applikazzjoni ta’ emenda għar-Regolament (UE, Euratom) 2020/2093, jew is-suċċessur tiegħu, li tipprevedi garanzija tas-self permezz tal-Istrument taħt il-baġit tal-Unjoni lil hinn mil-limiti massimi tal-QFP u sal-limiti massimi msemmijin fl-Artikolu 3(1) u (2) tad-Deċiżjoni (UE, Euratom) 2020/2053. Jenħtieġ li ssir talba għall-ħlas tal-garanziji fil-każ li l-Unjoni ma tirċevix pagament f’waqtu mill-Ukrajna fir-rigward tas-self permezz tal-Istrument, inkluż, b’mod partikolari, f’każijiet ta’ bidliet fl-iskeda ta’ pagament għal kwalunkwe raġuni kif ukoll nonpagamenti mistennija u mhux mistennija.

(34)

L-ammonti rkuprati skont il-ftehimiet ta’ self fir-rigward tas-self permezz tal-Istrument jenħtieġ li jiġu rimborżati lill-Istati Membri li jkunu onoraw it-talbiet għal ħlas ta’ garanzija, b’deroga mill-Artikolu 211(4), il-punt (c), tar-Regolament Finanzjarju.

(35)

Qabel ma titlob il-ħlas tal-garanziji pprovduti mill-Istati Membri, il-Kummissjoni, fid-diskrezzjoni u r-responsabbiltà unika tagħha bħala l-istituzzjoni tal-Unjoni fdata bl-implimentazzjoni tal-baġit ġenerali tal-Unjoni f’konformità mal-Artikolu 317 tat-Trattat dwar il-Funzjonament tal-Unjoni Ewropea, jenħtieġ li teżamina l-miżuri kollha disponibbli fi ħdan l-istrateġija ta’ finanzjament diversifikati prevista fl-Artikolu 220a tar-Regolament Finanzjarju, f’konformità mal-limiti stabbiliti f’dan ir-Regolament. Fit-talba rilevanti għall-ħlas tal-garanziji, jenħtieġ li l-Kummissjoni tgħarraf lill-Istati Membri dwar l-eżami, kif xieraq.

(36)

Is-sehem relattiv tal-kontribuzzjonijiet ta’ kull Stat Membru (koeffiċjent tal-kontribuzzjoni) għall-ammont globali garantit jenħtieġ li jikkorrispondi għall-ishma relattivi tal-Istati Membri fl-introjtu nazzjonali gross (ING) totali tal-Unjoni. Jenħtieġ li t-talbiet għall-ħlas tal-garanziji jsiru pro rata, u japplikaw il-koeffiċjent tal-kontribuzzjoni. Sakemm jidħlu fis-seħħ il-ftehimiet ta’ garanzija kollha bejn il-Kummissjoni u l-Istati Membri, il-koeffiċjent tal-kontribuzzjoni jenħtieġ li jiġi aġġustat b’mod proporzjonat fuq bażi temporanja.

(37)

Huwa xieraq li l-Kummissjoni u l-Ukrajna jikkonkludu ftehim ta’ self għall-appoġġ tas-self, fil-qafas tal-kundizzjonijiet stabbiliti fil-MtQ. Sabiex jiġi żgurat li l-interessi finanzjarji tal-Unjoni marbuta mal-appoġġ permezz tal-Istrument jiġu protetti b’mod effiċjenti, jenħtieġ li l-Ukrajna tieħu miżuri xierqa fir-rigward tal-prevenzjoni tal-frodi, il-korruzzjoni u kwalunkwe irregolarità oħra marbuta ma’ dak l-appoġġ u l-ġlieda kontrihom. Barra minn hekk, jenħtieġ li fil-ftehim tas-self u fil-ftehim ta’ finanzjament jiġi previst li l-Kummissjoni twettaq kontrolli, li l-Qorti tal-Awdituri twettaq awditi u li l-Uffiċċju tal-Prosekutur Pubbliku Ewropew jeżerċita l-kompetenzi tiegħu, f’konformità mal-Artikoli 129 u 220 tar-Regolament Finanzjarju.

(38)

Minħabba li l-objettiv ta’ dan ir-Regolament, jiġifieri li jikkontribwixxi għat-tnaqqis tad-distakk fil-finanzjament tal-Ukrajna fl-2023, b’mod partikolari billi jipprovdi għajnuna għal terminu qasir b’termini aġevolati ħafna lill-baġit tal-Istat tal-Ukrajna b’mod prevedibbli, kontinwu, ordnat u f’waqtu, ma jistax jinkiseb b’mod suffiċjenti mill-Istati Membri, iżda pjuttost, minħabba l-iskala u l-effetti tiegħu, jista’ jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stipulat f’dak l-Artikolu, dan ir-Regolament ma jmurx lil hinn minn dak li hu meħtieġ sabiex jinkiseb dak l-objettiv.

(39)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (14).

(40)

Fid-dawl tal-urġenza li tirriżulta miċ-ċirkostanzi eċċezzjonali kkawżati mill-gwerra ta’ aggressjoni mhux provokata u mhux ġustifikata tar-Russja, huwa meqjus xieraq li tiġi invokata l-eċċezzjoni għall-perjodu ta’ tmien ġimgħat previst fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea tal-Enerġija Atomika.

(41)

Fid-dawl tas-sitwazzjoni fl-Ukrajna, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,