(1)

Il-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (2) tistabbilixxi s-sustanzi attivi li kienu ġew approvati skont ir-Regolament (KE) Nru 1107/2009.

(2)

L-approvazzjoni tas-sustanza attiva glifosat tiskadi fil-15 ta’ Diċembru 2022. Fit-12 ta’ Diċembru 2019 tressqet applikazzjoni għat-tiġdid tal-approvazzjoni ta’ dik is-sustanza skont l-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (3).

(3)

Ir-Regolament ta’ Implimentazzjoni tal-Kummissjoni (UE) 2019/724 (4) ħatar lil Franza, lill-Ungerija, lin-Netherlands u lill-Iżvezja biex jaġixxu b’mod konġunt bħala Stat Membru relatur għat-tiġdid tal-proċedura ta’ approvazzjoni għall-glifosat. L-erba’ Stati Membri ffurmaw il-Grupp ta’ Valutazzjoni dwar il-Glifosat (“Assessment Group on Glyphosate, AGG”). Fit-18 ta’ Awwissu 2020, l-AGG ikkonferma l-ammissibbiltà tal-applikazzjoni għat-tiġdid. Fil-15 ta’ Ġunju 2021, l-AGG ressaq l-abbozz inizjali tiegħu tar-Rapport ta’ Valutazzjoni tat-Tiġdid lill-Awtorità Ewropea dwar is-Sigurtà fl-Ikel (“l-Awtorità”).

(4)

Matul il-konsultazzjoni pubblika dwar l-abbozz inizjali tar-Rapport ta’ Valutazzjoni tat-Tiġdid dwar il-glifosat, tressqu għadd kbir ħafna ta’ kummenti lill-Awtorità. Barra minn hekk, fl-14 ta’ Marzu 2022, l-Awtorità talbet ammont sinifikanti ta’ informazzjoni addizzjonali mingħand l-applikant, li ġiet sottomessa fiż-żmien xieraq. Minbarra dan, l-AGG u l-Awtorità identifikaw għadd kbir ħafna ta’ punti li kellhom jiġu diskussi mill-esperti matul l-evalwazzjoni bejn il-pari. L-evalwazzjoni tal-informazzjoni addizzjonali mill-AGG u l-evalwazzjoni bejn il-pari mwettqa skont l-Artikolu 13(1) tar-Regolament (UE) Nru 844/2012 mill-Awtorità jeħtieġu ħafna aktar żmien biex jitlestew.

(5)

Għaldaqstant, fl-10 ta’ Mejju 2022, l-Awtorità u l-Aġenzija Ewropea għas-Sustanzi Kimiċi (“ECHA”) infurmaw lill-Kummissjoni li l-adozzjoni tal-konklużjoni dwar l-evalwazzjoni bejn il-pari tal-valutazzjoni tar-riskju tal-glifosat mill-Awtorità se tiġi ttardjata u li d-data tal-adozzjoni prevista ma kinitx se tkun qabel Lulju 2023. Dan ifisser li ma tista’ tittieħed l-ebda deċiżjoni dwar it-tiġdid tal-approvazzjoni tal-glifosat qabel il-15 ta’ Diċembru 2022.

(6)

Billi għalhekk il-valutazzjoni tas-sustanza attiva glifosat ġiet ittardjata għal raġunijiet li mhumiex fil-kontroll tal-applikant, jeħtieġ li l-perjodu ta’ approvazzjoni ta’ dik is-sustanza attiva jiġi estiż biex jingħata ż-żmien neċessarju biex titlesta l-valutazzjoni meħtieġa u sabiex tittieħed deċiżjoni dwar l-applikazzjoni għat-tiġdid tal-approvazzjoni tagħha.

(7)

Fil-każ li l-Kummissjoni tkun se tadotta Regolament li jipprevedi li l-approvazzjoni tal-glifosat ma tiġġeddidx minħabba li l-kriterji għall-approvazzjoni mhumiex issodisfati, il-Kummissjoni trid tiffissa d-data ta’ skadenza li tkun l-istess data ta’ qabel dan ir-Regolament, jew id-data tad-dħul fis-seħħ tar-Regolament, dment li l-approvazzjoni tal-glifosat ma tiġġeddidx, u skont liema data tiġi l-aħħar. Fil-każ li l-Kummissjoni tkun se tadotta Regolament li jipprevedi t-tiġdid tal-approvazzjoni tal-glifosat, il-Kummissjoni se tara li tistabbilixxi, skont iċ-ċirkostanzi, l-eqreb data ta’ applikazzjoni possibbli.

(8)

Għalhekk jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(9)

Billi l-approvazzjoni attwali tal-glifosat tiskadi fil-15 ta’ Diċembru 2022, jenħtieġ li dan ir-Regolament jidħol fis-seħħ malajr kemm jista’ jkun.

(10)

Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni qabel l-iskadenza stipulata mill-President tiegħu. Att ta’ implimentazzjoni ġie meqjus neċessarju u l-president issottometta l-abbozz tal-att ta’ implimentazzjoni lill-kumitat ta’ appell għal iktar deliberazzjonijiet. Il-kumitat ta’ appell ma tax opinjoni,