(1)

Fis-7 ta’ April 2020, il-Kummissjoni rċeviet applikazzjoni mingħand Niacet B.V. (“l-applikant”) għall-approvazzjoni tal-propjonat tal-kalċju bħala sustanza bażika biex tintuża għall-protezzjoni tal-pjanti bħala fungiċida fuq artijiet bil-ħaxix għar-rikreazzjoni u basal tal-fjuri u l-għelejjel tat-tuberi tal-fjuri. Fis-17 ta’ Settembru 2021, il-Kummissjoni rċeviet l-applikazzjoni riveduta, li kienet akkumpanjata mill-informazzjoni meħtieġa skont l-Artikolu 23(3), it-tieni subparagrafu, tar-Regolament (KE) Nru 1107/2009.

(2)

Kien hemm disponibbli evalwazzjoni waħda rilevanti fuq il-propjonat tal-kalċju, li twettqet f’konformità ma’ leġiżlazzjoni oħra tal-Unjoni, kif imsemmi fl-Artikolu 23(2) tar-Regolament (KE) Nru 1107/2009, jiġifieri, l-evalwazzjoni mill-Bord tal-ANS tal-Awtorità Ewropea dwar is-Sigurtà fl-Ikel (“l-Awtorità”) (2). L-eżitu ta’ din l-evalwazzjoni tqies mill-Awtorità, kif ukoll mill-Kummissjoni.

(3)

Il-Kummissjoni talbet lill-Awtorità għal assistenza xjentifika. Fl-24 ta’ Awwissu 2021, l-Awtorità ipprovdiet rapport tekniku dwar il-propjonat tal-kalċju lill-Kummissjoni (3). L-Awtorità kkonkludiet li, għalkemm ma hemm l-ebda klassifikazzjoni armonizzata tal-Unjoni disponibbli fl-inventarju tal-klassifikazzjoni u t-tikkettar (4) fuq is-sit web tal-Aġenzija Ewropea għas-Sustanzi Kimiċi (ECHA), l-informazzjoni ppubblikata tindika li l-propjonat tal-kalċju għandu effetti ta’ ħsara għall-għajnejn. Barra minn hekk, l-Awtorità tqis li hija meħtieġa valutazzjoni tossikoloġika ulterjuri tat-tossiċità tal-propjonat tal-kalċju mill-inalazzjoni jekk, kif previst fl-applikazzjoni, is-sustanza tkun maħsuba biex tintuża f’applikazzjoni tal-bexx wara dilwizzjoni bl-ilma.

(4)

Barra minn hekk, il-valutazzjoni tat-tossiċità dermali, tal-proprjetajiet li jfixklu s-sistema endokrinali u tal-immunotossiċità ma ġietx ipprovduta mill-applikant. L-ebda ġustifikazzjoni ċara u eżawrjenti ma ssemmiet fl-applikazzjoni.

(5)

L-Awtorità nnutat ukoll li hija meħtieġa valutazzjoni tal-esponiment tal-operaturi, tal-ħaddiema, tal-persuni fil-qrib u tar-residenti għal kull wieħed mill-użi inklużi fl-applikazzjoni, iżda din ma ġietx ipprovduta, u lanqas ma ġiet ipprovduta valutazzjoni tar-riskju tal-impuritajiet preżenti fis-sustanza bażika.

(6)

Barra minn hekk, l-Awtorità indikat li l-potenzjal għal akkumulazzjoni tal-impuritajiet ċomb, merkurju u arseniku fl-ambjent jibqa’ kwistjoni miftuħa għall-forma proposta tal-użu, li tirrikjedi frekwenza għolja ta’ applikazzjoni.

(7)

Fl-aħħar nett, l-Awtorità kkonkludiet li l-użi u d-dożi maħsuba jqajmu tħassib dwar l-effetti avversi possibbli tal-propjonat tal-kalċju fuq organiżmi li mhumiex fil-mira, inklużi n-naħal u l-artropodi li mhumiex fil-mira, il-ħniex u l-makroorganiżmi oħra tal-ħamrija, il-mikroorganiżmi tal-ħamrija, u l-organiżmi involuti fil-metodi bijoloġiċi tat-trattament tad-drenaġġ.

(8)

Il-Kummissjoni ppreżentat ir-rapport ta’ rieżami, fejn ikkonkludiet li l-kriterji għall-approvazzjoni tas-sustanzi bażiċi mhumiex issodisfati fil-każ tal-propjonat tal-kalċju u li għalhekk huwa xieraq li ma jiġix approvat bħala sustanza bażika, kif ukoll abbozz ta’ dan ir-Regolament ta’ Implimentazzjoni lill-Kumitat Permanenti dwar il-Pjanti, l-Annimali, l-Ikel u l-Għalf fis-27 ta’ Jannar 2022 u fit-18 ta’ Mejju 2022, rispettivament.

(9)

Il-Kummissjoni stiednet lill-applikant iressaq il-kummenti tiegħu dwar ir-rapport tekniku tal-Awtorità u dwar l-abbozz tar-rapport ta’ rieżami tal-Kummissjoni. L-applikant ressaq il-kummenti tiegħu, li ġew eżaminati bir-reqqa.

(10)

Madankollu, minkejja l-argumenti mressqa mill-applikant, it-tħassib relatat mas-sustanza ma setax jiġi eliminat.

(11)

Għaldaqstant, ma ġiex stabbilit li l-kundizzjonijiet stipulati fl-Artikolu 23 tar-Regolament (KE) Nru 1107/2009 huma ssodisfati. Għalhekk huwa xieraq li l-propjonat tal-kalċju ma jiġix approvat bħala sustanza bażika.

(12)

Dan ir-Regolament ma jimpedixxix is-sottomissjoni ta’ applikazzjoni oħra għall-approvazzjoni tal-propjonat tal-kalċju bħala sustanza bażika f’konformità mal-Artikolu 23(3) tar-Regolament (KE) Nru 1107/2009.

(13)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,