(1)

Wara talba mingħand il-Latvja fis-7 ta’ Awwissu 2020, il-Kunsill, permezz tad-Deċiżjoni ta’ Implimentazzjoni (UE) 2020/1351 (2), ta assistenza finanzjarja lil-Latvja fil-forma ta’ self li jammonta għal massimu ta’ EUR 192 700 000 b’maturità medja massima ta’ 15-il sena, u b’perjodu ta’ disponibilità ta’ 18-il xahar bil-ħsieb li tikkomplementa l-isforzi nazzjonali tal-Latvja biex tindirizza l-impatt tat-tifqigħa tal-COVID-19 u tirreaġixxi għall-konsegwenzi soċjoekonomiċi ta’ dik it-tifqigħa għall-ħaddiema u għall-persuni li jaħdmu għal rashom.

(2)

Is-self kellu jintuża mil-Latvja biex tiffinanzja l-iskemi ta’ xogħol b’ħinijiet iqsar, miżuri simili u miżuri relatati mas-saħħa, kif imsemmi fl-Artikolu 3 tad-Deċiżjoni ta’ Implimentazzjoni (UE) 2020/1351.

(3)

Wara t-tieni talba mil-Latvja fl-11 ta’ Marzu 2021, il-Kunsill, permezz tad-Deċiżjoni ta’ Implimentazzjoni (UE) 2021/677 (3) li temenda d-Deċiżjoni ta’ Implimentazzjoni (UE) 2020/1351, ta assistenza finanzjarja addizzjonali ta’ EUR 112 500 000 lil-Latvja billi żied l-ammont massimu ta’ self għal EUR 305 200 000 b’maturità medja massima ta’ 15-il sena, u b’perjodu ta’ disponibbiltà ta’ 18-il xahar, bil-ħsieb li jikkomplementa l-isforzi nazzjonali tal-Latvja biex tindirizza l-impatt tat-tifqigħa tal-COVID-19 u twieġeb għall-konsegwenzi soċjoekonomiċi ta’ dik it-tifqigħa għall-ħaddiema u għal dawk li jaħdmu għal rashom.

(4)

Is-self addizzjonali kellu jintuża mil-Latvja biex tiffinanzja l-iskemi ta’ xogħol b’ħinijiet iqsar, miżuri simili u miżuri relatati mas-saħħa, kif imsemmi fl-Artikolu 3 tad-Deċiżjoni ta’ Implimentazzjoni (UE) 2020/1351.

(5)

It-tifqigħa tal-COVID-19 ipparalizzat parti sostanzjali tal-forza tax-xogħol fil-Latvja. Dan wassal għal żidiet f’daqqa u qawwija ripetuti fin-nefqa pubblika fil-Latvja fir-rigward tal-miżuri msemmija fl-Artikolu 3, il-punti (a), (c), (d), (g), (h) (f) u (i), tad-Deċiżjoni ta’ Implimentazzjoni (UE) 2020/1351.

(6)

It-tifqigħa tal-COVID-19 u l-miżuri straordinarji implimentati mil-Latvja fl-2020, fl-2021 u fl-2022 biex titrażżan dik it-tifqigħa u l-impatt soċjoekonomiku u l-impatt marbut mas-saħħa tagħha kellhom, u għadu qed ikollhom, impatt drammatiku fuq il-finanzi pubbliċi. Fl-2020, il-Latvja kellha defiċit u dejn tal-gvern estiż ta’ 4,5 % u 43,3 % tal-prodott domestiku gross (PDG), rispettivament, li nbidlu għal 7,3 % u 44,8 % rispettivament fi tmiem l-2021. Skont il-previżjoni tar-rebbiegħa tal-2022 tal-Kummissjoni, il-Latvja hija mistennija jkollha defiċit u dejn tal-gvern estiż ta’ 7,2 % u 47,0 % tal-PDG, rispettivament, sa tmiem l-2022. Skont il-previżjoni interim tas-sajf tal-2022 tal-Kummissjoni, l-PDG tal-Latvja huwa previst li jiżdied b’3,9 % fl-2022.

(7)

Fis-6 ta’ Ottubru 2022, il-Latvja talbet assistenza finanzjarja ulterjuri mill-Unjoni ta’ EUR 167 607 000 bil-ħsieb li tkompli tikkomplementa l-isforzi nazzjonali tagħha li wettqet fl-2020 u fl-2021 u fl-2022 biex titratta l-impatt tat-tifqigħa tal-COVID-19 u tirreaġixxi għall-konsegwenzi soċjoekonomiċi ta’ dik it-tifqigħa għall-ħaddiema u għal dawk li jaħdmu għal rashom. B’mod partikolari, il-Latvja estendiet u emendat b’mod ulterjuri l-iskemi ta’ xogħol b’ħinijiet iqsar u miżuri simili msemmija fil-premessi (8) sa (12).

(8)

L-iskema għall-kumpens taż-żmien inattiv għall-ħaddiema tapplika għall-kumpaniji, għall-persuni li jaħdmu għal rashom u għall-pagaturi tat-tariffa tal-liċenzja, li l-introjtu tagħhom mill-attività ekonomika naqas b’mill-inqas 20 %, meta mqabbel ma’ Awwissu-Ottubru 2020 bħala medja. L-iskema tħallas lill-impjegati assenti bil-permess jew lill-persuni li jaħdmu għal rashom kumpensi ta’ 50 % jew 70 % tas-salarji jew l-introjti tagħhom, skont ir-reġim tat-taxxa li joperaw fih. Il-livell minimu ta’ appoġġ huwa stabbilit għal EUR 500 u l-massimu għal EUR 1 000 għal kull impjegat għal kull xahar kalendarju. L-iskema hija stabbilita bir-Regolament tal-Kabinett Nru 709 (adottat fl-24 ta’ Novembru 2020 (4) u emendat fit-12 ta’ Jannar 2021 (5), fid-19 ta’ Jannar 2021 (6), fl-4 ta’ Frar 2021 (7) u fis-26 ta’ Frar 2021 (8)) “Regolamenti Rigward l-Allowance għall-Inattività għal Kontribwenti għall-Kontinwazzjoni tal-Attività tagħhom fiċ-Ċirkustanzi tal-Kriżi tal-COVID-19”. Il-miżura testendi l-iskema msemmija fl-Artikolu 3, il-punt (a), tad-Deċiżjoni ta’ Implimentazzjoni (UE) 2020/1351 għal persuni impjegati fl-industrija tal-isbuħija, tippermetti lill-persuni li jkunu bidlu t-trattament tat-taxxa tagħhom mill-2021 biex jikkwalifikaw għall-appoġġ, ittejjeb il-kundizzjonijiet ta’ kwalifika għal dawk li jħallsu l-privattivi u tippermetti lill-benefiċjarji jagħżlu bejn żewġ kriterji ta’ kwalifika biex japplikaw għall-appoġġ.

(9)

Mehmuż ma’ din l-iskema għall-kumpens taż-żmien inattiv għall-ħaddiema hemm il-bonus tal-ħaddiema għat-tfal imsemmi fl-Artikolu 3, il-punt (c), tad-Deċiżjoni ta’ Implimentazzjoni (UE) 2020/1351 li għalih il-Latvja titlob appoġġ addizzjonali Il-bonus ta’ EUR 50 fix-xahar għal kull wild jagħti appoġġ addizzjonali lill-ħaddiema inattivi li huma intitolati għal ħelsien mit-taxxa fuq l-introjtu personali għad-dipendenti. Il-miżura ta’ appoġġ ġiet estiża bl-‘Ordni tal-Kabinett Nru 706 tal-1 ta’ Diċembru 2020“Rigward l-Allokazzjoni ta’ Fondi mill-Programm tal-Baġit tal-Istat ‘Fondi għal Avvenimenti Imprevisti’“’ (9)u l-‘Ordni tal-Kabinett Nru 15 tal-11 ta’ Jannar 2021“Rigward l-Allokazzjoni tal-Fondi mill-Programm tal-Baġit tal-Istat ‘Fondi għal Avvenimenti Imprevisti’”’. (10) Il-miżura tista’ titqies bħala miżura simili għal skemi ta’ xogħol b’ħinijiet iqsar, kif imsemmi fir-Regolament (UE) 2020/672, peress li tipprovdi appoġġ għad-dħul għall-impjegati u għal dawk li jaħdmu għal rashom, li se jgħin ikopri l-ispejjeż tal-indukrar tat-tfal matul l-għeluq tal-iskejjel u b’hekk jgħin lill-ġenituri biex ikomplu jaħdmu, u r-relazzjoni tax-xogħol ma tkunx f’riskju.

(10)

L-iskema għas-sussidji tal-pagi tagħti appoġġ għall-impjegaturi li jiffaċċjaw tnaqqis fid-dħul minn kwalunkwe attività ekonomika b’mill-inqas 20 %. L-iskema tammonta għal 50 % tal-paga grossa medja fix-xahar, iżda mhux aktar minn EUR 500 għal kull xahar kalendarju. L-impjegaturi benefiċjarji huma obbligati jżommu l-impjieg tal-ħaddiema appoġġati u li jissupplimentaw is-sussidju tal-pagi għall-paga regolari sħiħa. L-iskema ġiet stabbilita mir-‘Regolament tal-Kabinett Nru 675 dwar “Regolamenti Rigward l-Għoti ta’ Għajnuna lill-Kontribwenti għall-Kontinwazzjoni tal-Attività tagħhom fiċ-Ċirkustanzi tal-Kriżi tal-COVID19”’(adottati fl-10 ta’ Novembru 2020 (11) u emendati fit-12 ta’ Jannar 2021 (12), fl-1 ta’ April 2021 (13), fis-26 t’Ottubru 2021 (14), fid-9 ta’ Novembru 2021 (15), fit-30 ta’ Novembru 2021 (16), fis-7 ta’ Diċembru 2021 (17), fit-23 ta’ Diċembru 2021 (18) u fil-11 ta’ Jannar 2022 (19)) u l-‘Ordni tal-Kabinett Nru 128 “Rigward l-Allokazzjoni ta’ Fondi mill-Programm tal-Baġit tal-Istat ‘Fondi għal Avvenimenti Imprevisti’”’ (20). Il-miżura testendi l-perjodu ta’ appoġġ tal-iskema msemmija fl-Artikolu 3, il-punt (d), tad-Deċiżjoni ta’ Implimentazzjoni (UE) 2020/1351 u tespandi l-kamp ta’ applikazzjoni tal-eliġibbiltà billi tippermetti lill-benefiċjarji jagħżlu bejn żewġ kriterji ta’ kwalifika biex japplikaw għall-appoġġ, tneħħi r-riskju ta’ kumpens żejjed, tiċċara r-restrizzjonijiet ta’ eliġibbiltà għal min iħallas il-privattivi u tillimita l-eliġibbiltà għall-appoġġ minn Ottubru 2021 sa Frar 2022 għal persuni li għandhom ċertifikat tal-COVID-19 li jattesta t-tilqim kontra l-COVID-19 jew il-fatt ta’ mard.

(11)

L-iskema ta’ benefiċċji tal-mard relatati mal-COVID-19 tipprovdi benefiċċji tal-mard imħallsa mill-Istat għal dawk li kellhom jitilfu x-xogħol minħabba l-obbligu ta’ awtoiżolament jew awtokwarantina, filwaqt li normalment parti mill-benefiċċju tal-mard jinqasam mal-impjegatur. L-iskema hija stabbilita mill-Emenda tal-Liġi “Dwar l-Assigurazzjoni tal-Maternità u tal-Mard” (adottata fl-20 ta’ Marzu 2020 (21) u emendata fit-12 ta’ Novembru 2020 (22), fl-4 ta’ Novembru 2021 (23) u fit-13 ta’ Jannar 2022 (24)). Il-miżura tipprevedi l-estensjoni tal-perjodu ta’ appoġġ tal-benefiċċji tal-mard relatati mal-COVID-19 imsemmija fl-Artikolu 3, il-punt (g), tad-Deċiżjoni ta’ Implimentazzjoni (UE) 2020/1351 u fl-istess ħin tnaqqas il-kamp ta’ applikazzjoni tal-eliġibbiltà tal-appoġġ għal persuni li għandhom ċertifikat tat-tilqim kontra l-COVID-19 jew ċertifikat tal-mard jew li rċevew opinjoni dwar il-ħtieġa li jiġi pospost it-tilqim kontra l-COVID-19, u tispeċifika każijiet u kundizzjonijiet meta l-impjegaturi jenħtieġ li jidħlu biex iħallsu kwalunkwe liv minħabba mard bi ħlas lill-impjegat mingħajr appoġġ mill-Istat.

(12)

Il-benefiċċji ta’ għajnuna għall-mard għall-ġenituri u l-indokraturi jagħtu appoġġa lill-impjegati li ma jistgħux jaħdmu mill-bogħod u li jkollhom jieħdu ħsieb tfal taħt l-età ta’ 10 snin jew persuni b’diżabilità meta l-iskejjel u ċ-ċentri ta’ kura matul il-jum jingħalqu minħabba t-tifqigħa tal-COVID-19. Il-miżura tista’ titqies bħala miżura simili għall-iskemi ta’ xogħol b’ħinijiet iqsar, kif imsemmi fir-Regolament (UE) 2020/672, billi din tagħti appoġġ għall-introjtu lill-ġenituri u lill-indokraturi u tgħin biex jiġu ppreservati l-impjiegi billi tipprevjeni lill-ġenituri u lill-indokraturi li jkollhom jieħdu ħsieb lil uliedhom jew lil persuni b’diżabilità meta l-iskejjel u ċ-ċentri ta’ kura matul il-jum ikunu magħluqin mill-ħtieġa li jtemmu r-relazzjoni ta’ impjieg. Il-benefiċċji ta’ għajnuna għall-mard huma previsti fl-‘Emenda tal-Liġi “Dwar l-Assigurazzjoni tal-Maternità u tal-Mard” tas-26 ta’ Novembru 2020’ (25) u l-‘Ordni tal-Kabinett Nru 707 tal-1 ta’ Diċembru 2020“Rigward l-Allokazzjoni ta’ Fondi mill-Programm tal-Baġit tal-Istat ‘Fondi għal Avvenimenti Imprevisti’”’ (26) u l-‘Ordni tal-Kabinett Nru 13 tal-11 ta’ Jannar 2021“Rigward l-Allokazzjoni ta’ Fondi mill-Programmr-Riżorsi Finanzjarji għall-programm tal-Baġit tal-Istat ‘Fondi għal Avvenimenti Imprevisti’”’ (27). Il-Latvja titlob appoġġ addizzjonali għall-miżura eżistenti msemmija fl-Artikolu 3, il-punt (h), tad-Deċiżjoni ta’ Implimentazzjoni (UE) 2021/677.

(13)

Il-Latvja kompliet testendi u tintroduċi wkoll sensiela ta’ miżuri relatati mas-saħħa biex tindirizza t-tifqigħa tal-COVID-19. B’mod partikolari, dan jikkonċerna l-miżuri stabbiliti fil-premessi (14) sa (15).

(14)

In-nefqa relatata mas-saħħa hija prevista għal tagħmir protettiv personali għall-impjegati tas-settur pubbliku biex jiġi żgurat ambjent tax-xogħol sikur għal dawk esposti għall-infezzjoni mill-virus tal-COVID-19. L-iskema hija stabbilita mir- “Regolament tal-Kabinett Nru 380 dwar “Regolamenti dwar ir-Riżorsi għall-Iżgurar ta’ Sikurezza Epidemjoloġika meħtieġa għall-Istituzzjonijiet Inklużi fil-Lista ta’ Istituzzjonijiet u Ħtiġijiet Prijoritarji” (adottat fid-9 ta’ Ġunju 2020 (28)). Il-Latvja titlob appoġġ addizzjonali għall-miżura eżistenti msemmija fl-Artikolu 3, il-punt (f), tad-Deċiżjoni ta’ Implimentazzjoni (UE) 2020/1351.

(15)

Il-primjums għall-prattikanti mediċi u l-impjegati li jittrattaw il-kriżi tal-COVID-19 minn 20 % sa 100 % tas-salarji fix-xahar jippremjaw il-ħidma mwettqa f’kundizzjonijiet ta’ żieda fir-riskju u żieda fl-ammont ta’ xogħol, kif previst fl-‘Ordnijiet tal-Kabinett Nru 136 tas-27 ta’ Marzu 2020 (29) u Nru 656 tas-6 ta’ Novembru 2020“Rigward l-Allokazzjoni ta’ Fondi mill-Programm tal-Baġit tal-Istat ‘Fondi għal Avvenimenti Imprevisti’”’ (30), l-‘Ordni tal-Kabinett Nru 743 tat-8 ta’ Diċembru 2020“Emendi tal-Ordni tal-Kabinett Nru 655 tas-6 ta’ Novembru 2020‘Dwar id-Dikjarazzjoni ta’ Stat ta’ Emerġenza’”’ (31) u l-‘Ordni tal-Kabinett Nru 37 tal-21 ta’ Jannar 2021“Rigward l-Allokazzjoni ta’ Fondi mill-Programm tal-Baġit tal-Istat ‘Fondi għal Avvenimenti Imprevisti’”’ (32). Dawk il-primjums huma addizzjonali għall-primjum massimu stabbilit fil-‘Liġi Dwar ir-Remunerazzjoni tal-Uffiċjali u l-Impjegati tal-Awtoritajiet Statali u tal-Gvern Lokali’. Il-miżura tappoġġa l-impjiegi billi tiżgura s-saħħa u s-sikurezza tal-impjegati u l-kontinwità tas-servizzi pubbliċi essenzjali. Il-Latvja titlob appoġġ addizzjonali għall-miżura eżistenti msemmija fl-Artikolu 3, il-punt (i), tad-Deċiżjoni ta’ Implimentazzjoni (UE) 2020/1351.

(16)

Il-Latvja tissodisfa l-kundizzjonijiet għat-talba ta’ assistenza finanzjarja stabbiliti fl-Artikolu 3 tar-Regolament (UE) 2020/672. Il-Latvija pprovdiet lill-Kummissjoni b’evidenza xierqa li n-nefqa pubblika attwali u ppjanata żdiedet bi EUR 508 124 069 mill-1 ta’ Frar 2020 b’riżultat tal-miżuri nazzjonali meħuda biex jiġu indirizzati l-effetti soċjoekonomiċi tat-tifqigħa tal-COVID-19. Din jikkostitwixxi żieda f’daqqa u qawwija minħabba li hija relatata wkoll ma’ estensjoni jew emenda ta’ miżuri nazzjonali eżistenti marbuta b’mod dirett mal-iskema ta’ xogħol b’ħinijiet iqsar u miżuri simili li jkopru proporzjon sinifikanti ta’ impriżi u tal-forza tax-xogħol fil-Latvja. Il-Latvja biħsiebha tiffinanzja EUR 35 317 069 permezz tal-fondi tagħha stess.

(17)

Il-Kummissjoni kkonsultat lill-Latvja u vverifikat iż-żieda għall-għarrieda u qawwija fin-nefqa pubblika effettiva u ppjanata relatata direttament mal-iskemi ta’ xogħol b’ħinijiet iqsar u miżuri simili, kif ukoll ir-rikors għal miżuri rilevanti relatati mas-saħħa marbutin mat-tifqigħa tal-COVID-19, kif imsemmijin fit-talba tas-6 ta’ Ottubru 2022, f’konformità mal-Artikolu 6 tar-Regolament (UE) 2020/672.

(18)

Il-miżuri relatati mas-saħħa msemmija fit-talba tal-Latvja tas-6 ta’ Ottubru 2022 u fil-premessi (14) sa (15) jammontaw għal EUR 70 921 236.

(19)

Għalhekk, jenħtieġ li tingħata assistenza finanzjarja bil-għan li l-Latvja tiġi megħjuna titratta l-effetti soċjoekonomiċi tat-taqlib ekonomiku qawwi kkawżat mit-tifqigħa tal-COVID-19. Jenħtieġ li l-Kummissjoni tieħu d-deċiżjonijiet rigward il-maturitajiet, id-daqs u r-rilaxx tal-ħlasijiet parzjali u tas-segmenti f’kooperazzjoni mill-qrib mal-awtoritajiet nazzjonali.

(20)

Minħabba li l-perjodu ta’ disponibbiltà indikat fid-Deċiżjoni ta’ Implimentazzjoni (UE) 2020/1351 skada, huwa meħtieġ perjodu ta’ disponibbiltà ġdid għall-assistenza finanzjarja addizzjonali. Il-perjodu ta’ disponibbiltà għall-assistenza finanzjarja ta’ 18-il xahar mogħti bid-Deċiżjoni ta’ Implimentazzjoni (UE) 2020/1351 jenħtieġ li jiġi estiż b 21 xahar u, b’konsegwenza ta’ dan, il-perjodu ta’ disponibbiltà totali jenħtieġ li jkun ta’ 39 xahar li jibda mill-ewwel jum wara li tidħol fis-seħħ id-Deċiżjoni ta’ Implimentazzjoni (UE) 2020/1351.

(21)

Jenħtieġ li l-Latvja u l-Kummissjoni jqisu din id-Deċiżjoni fil-ftehim ta’ self imsemmi fl-Artikolu 8(2) tar-Regolament (UE) 2020/672.

(22)

Jenħtieġ li din id-Deċiżjoni tkun mingħajr preġudizzju għall-eżitu ta’ kull proċedura relatata ma’ distorsjonijiet tal-operat tas-suq intern li tista’ titwettaq, b’mod partikolari skont l-Artikoli 107 u 108 tat-Trattat. Din ma twarrabx il-ħtieġa li l-Istati Membri jinnotifikaw każijiet ta’ għajnuna potenzjali mill-Istat lill-Kummissjoni skont l-Artikolu 108 tat-Trattat.

(23)

Jenħtieġ li l-Latvja tinforma lill-Kummissjoni fuq bażi regolari dwar l-implimentazzjoni tan-nefqa pubblika ppjanata, sabiex il-Kummissjoni tkun tista’ tivvaluta l-punt sa fejn il-Latvja implimentat dik in-nefqa.

(24)

Id-deċiżjoni li tingħata assistenza finanzjarja ttieħdet b’kunsiderazzjoni tal-ħtiġijiet eżistenti u dawk mistennija tal-Latvja, kif ukoll it-talbiet għal assistenza finanzjarja skont ir-Regolament (UE) 2020/672 diġà ppreżentati jew ippjanati li jiġu ppreżentati minn Stati Membri oħra, filwaqt li jiġu applikati l-prinċipji ta’ trattament ugwali, solidarjetà, proporzjonalità u trasparenza,