DEĊIŻJONI TA’ IMPLIMENTAZZJONI TAL-KUMMISSJONI (UE) 2022/172

tas-7 ta’ Frar 2022

li temenda d-Deċiżjoni ta’ Implimentazzjoni (UE) 2018/1538 dwar l-armonizzazzjoni tal-ispettru tar-radju li għandu jintuża mill-apparati ta’ medda qasira fil-baned tal-frekwenzi ta’ 874–876 MHz u 915-921 MHz

(notifikata bid-dokument C(2022) 608)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Deċiżjoni Nru 676/2002/KE tal-Parlament Ewropew u tal-Kunsill dwar qafas regolatorju għall-politika tas-7 ta’ Marzu 2002 dwar l-ispektrum tar-radju fil-Komunità Ewropea (Deċiżjoni dwar l-Ispektrum tar-Radju) (1), u b’mod partikolari l-Artikolu 4(3) tagħha,

Billi:

(1)

Tipikament, l-apparati ta’ medda qasira jkunu prodotti tas-suq tal-massa jew portabbli, jew it-tnejn li huma, li jistgħu jinġarru u jintużaw faċilment bejn il-fruntieri. Id-differenzi fil-kundizzjonijiet tal-aċċess għall-ispettru jistgħu ma jippermettux il-moviment ħieles tagħhom, iżidu l-kostijiet tal-produzzjoni tagħhom u joħolqu riskji ta’ interferenza dannuża ma’ applikazzjonijiet u servizzi tar-radju oħrajn minħabba użu mhux awtorizzat. Id-Deċiżjoni tal-Kummissjoni 2006/771/KE (2) armonizzat il-kundizzjonijiet tekniċi għall-użu tal-ispettru għal varjetà wiesgħa ta’ apparati ta’ medda qasira li, bħala riżultat, huwa soġġett għal reġim regolatorju ħafif ħafna u għal mhux aktar minn awtorizzazzjoni ġenerali skont id-dritt nazzjonali.

(2)

Id-Deċiżjoni ta’ Implimentazzjoni tal-Kummissjoni (UE) 2018/1538 (3) armonizzat il-kundizzjonijiet tekniċi għall-użu tal-baned tal-frekwenzi 874-876 u 915-921 MHz minn soluzzjonijiet teknikament avvanzati għall-identifikazzjoni bil-frekwenza tar-radju (“RFID”) kif ukoll applikazzjonijiet tal-“Internet tal-Oġġetti” ibbażati fuq apparati ta’ medda qasira netwerkjati fin-networks tad-data. F’dawk il-baned tal-frekwenzi, l-ambjent ta’ kondiviżjoni huwa differenti meta mqabbel ma’ dak applikabbli skont id-Deċiżjoni 2006/771/KE, u għalhekk hemm bżonn reġim regolatorju speċifiku.

(3)

Filwaqt li l-baned 873-874,4 MHz u 918-919,4 MHz mhumiex armonizzati għall-użu tas-sistema globali għall-komunikazzjoni mobbli għall-ferrovija (“GSM-R”) mid-dritt tal-Unjoni jew minn Deċiżjoni tal-Kumitat Ewropew tal-Komunikazzjonijiet (“ECC”), dawn il-baned tal-frekwenzi jistgħu jintużaw għal dan l-iskop fuq bażi nazzjonali soġġett għal deċiżjoni nazzjonali f’konformità mar-Regolamenti tar-Radju tal-Unjoni Internazzjonali tat-Telekomunikazzjoni. Għalhekk, fejn il-kundizzjonijiet tekniċi armonizzati ma jkunux suffiċjenti biex jipproteġu l-użu ta’ dawn il-baned għal estensjoni nazzjonali tal-GSM għall-Ferroviji (“E-GSM-R”), l-Istati Membri kkonċernati jistgħu jissoġġettaw l-użu ta’ apparati ta’ medda qasira għal rekwiżiti addizzjonali mingħajr ma jkollhom impatt fuq il-kundizzjonijiet tekniċi armonizzati għall-aċċess għall-ispettru għall-apparati ta’ medda qasira fi ħdan il-baned. Restrizzjonijiet bħal dawn, meta jkunu meħtieġa fi Stat Membru partikolari, jenħtieġ jiżguraw b’mod partikolari li jkun hemm koordinazzjoni bejn l-utenti tal-ispettru li tippermetti l-kondiviżjoni ġeografika bejn l-E-GSM-R minn naħa waħda u l-apparati RFID u l-apparati ta’ medda qasira netwerkjati min-naħa l-oħra.

(4)

L-użu armonizzat għar-radju mobbli ferrovjarju tal-baned tal-frekwenzi akkoppjati 874,4–880,0 MHz u 919,4–925,0 MHz, li huma kontigwi għas-subbaned 874–874,4 MHz u 917,4–919,4 MHz armonizzati għall-apparati ta’ medda qasira permezz ta’ din id-Deċiżjoni, huwa soġġett għad-Deċiżjoni ta’ Implimentazzjoni tal-Kummissjoni (UE) 2021/1730 (4). Il-koeżistenza bejn l-apparati ta’ medda qasira fil-baned tal-frekwenzi 874–874,4 MHz u 917,4–919,4 MHz u r-radju mobbli ferrovjarju fil-baned tal-frekwenzi kontigwi 874,4–880,0 MHz u 919,4–925,0 MHz ġiet ivvalutata fir-Rapport 74 tal-Konferenza Ewropea tal-Amministrazzjonijiet Postali u tat-Telekomunikazzjoni (“CEPT”).

(5)

F’konformità mal-Artikolu 1(4) tad-Deċiżjoni Nru 676/2002/KE, l-Istati Membri għandhom id-dritt li jorganizzaw u jużaw l-ispettru tar-radju tagħhom għal skopijiet ta’ ordni pubbliku u sigurtà pubblika u għad-difiża, u jibqgħu liberi, f’dak il-kuntest, li jipproteġu l-użu eżistenti u futur tal-baned tal-frekwenzi 874–876 u 915–921 MHz u tal-baned kontigwi għal skopijiet militari u skopijiet oħra ta’ ordni pubbliku u sigurtà pubblika filwaqt li jsegwu l-għan li jagħmlu disponibbli l-baned ewlenin armonizzati minimi għall-apparati ta’ medda qasira netwerkjati skont il-kundizzjonijiet tekniċi definiti f’din id-Deċiżjoni u b’mod partikolari f’konformità mal-prinċipji ġenerali tad-dritt tal-UE.

(6)

Sabiex jiġu riflessi l-iżviluppi teknoloġiċi u tas-suq fil-qasam tal-apparati ta’ medda qasira, f’Lulju 2006 inħareġ mandat permanenti lis-CEPT skont l-Artikolu 4(2) tad-Deċiżjoni Nru 676/2002/KE, biex jiġi aġġornat l-Anness tad-Deċiżjoni 2006/771/KE. Il-ħidma mwettqa abbażi tal-mandat permanenti (is-seba’ ċiklu ta’ aġġornament) kienet ukoll il-bażi għad-Deċiżjoni ta’ Implimentazzjoni (UE) 2018/1538 li pprovdiet spettru addizzjonali għall-apparati ta’ medda qasira fi ħdan il-baned tal-frekwenzi 874-876 u 915-921 MHz.

(7)

Fis-16 ta’ Lulju 2019, il-Kummissjoni ħarġet l-ittra gwida tagħha għat-tmien ċiklu ta’ aġġornament tad-Deċiżjoni 2006/771/KE. Bi tweġiba għall-mandat permanenti u f’konformità ma’ dik il-gwida, fil-5 ta’ Marzu 2021 is-CEPT ippreżentat ir-Rapport 77 tagħna lill-Kummissjoni li fih diversi proposti għall-emenda tad-Deċiżjoni ta’ Implimentazzjoni (UE) 2018/1538. Dawk jinkludu l-emenda tad-definizzjonijiet b’rabta mal-apparati ta’ medda qasira, sabiex tiġi evitata l-ambigwità u tiġi żgurata l-konsistenza mad-Deċiżjoni 2006/771/KE. Jipproponu wkoll rivalutazzjoni ta’ xi parametri tekniċi għall-kategoriji ta’ apparati ta’ medda qasira koperti mid-Deċiżjoni ta’ Implimentazzjoni (UE) 2018/1538. Ir-Rapport 77 tas-CEPT jikkostitwixxi l-bażi teknika għal din id-Deċiżjoni.

(8)	Jenħtieġ li l-apparati ta’ medda qasira li joperaw skont il-kundizzjonijiet stabbiliti f’din id-Deċiżjoni jkunu konformi wkoll mad-Direttiva 2014/53/UE tal-Parlament Ewropew u tal-Kunsill (5).

(9)	Għaldaqstant, jenħtieġ li d-Deċiżjoni ta’ Implimentazzjoni (UE) 2018/1538 tiġi emendata.

(10)	Il-miżuri previsti f’din id-Deċiżjoni huma skont l-opinjoni tal-Kumitat tal-Ispettru tar-Radju,

ADOTTAT DIN ID-DEĊIŻJONI:

Artikolu 1

(1)

Id-Deċiżjoni ta’ Implimentazzjoni (UE) 2018/1538 hija emendata kif ġej:

L-Artikolu 2 huwa sostitwit b’dan li ġej:

“Artikolu 2

Għall-finijiet ta’ din id-Deċiżjoni, għanhom japplikaw id-definizzjonijiet li ġejjin:

(1)	‘apparat ta’ medda qasira’ tfisser apparat tar-radju li jipprovdi komunikazzjoni unidirezzjonali jew bidirezzjonali u li jirċievi u/jew jittrażmetti fuq distanza qasira b’potenza baxxa;

(2)

‘bla interferenza u bażi bla protezzjoni’ tfisser li ma tista’ tiġi kkawżata l-ebda interferenza dannuża lil kwalunkwe servizz ta’ komunikazzjoni bir-radju u li ma tista’ ssir l-ebda talba għall-protezzjoni ta’ dawn l-apparati kontra interferenza li toriġina minn servizzi ta’ komunikazzjoni bir-radju;

(3)	‘kategorija ta’ apparati ta’ medda qasira’ tfisser grupp ta’ apparati ta’ medda qasira jew apparati ta’ medda qasira netwerkjati li jużaw spettru b’mekkaniżmi tal-aċċess għal spettri tekniċi simili jew ibbażat fuq xenarji ta’ użu komuni;”;

(2)	L-Anness huwa sostitwit bit-test fl-Anness ta’ din id-Deċiżjoni

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, is-7 ta’ Frar 2022.

Għall-Kummissjoni

Thierry BRETON

Membru tal-Kummissjoni

(1) ĠU L 108, 24.4.2002, p. 1.

(2) Id-Deċiżjoni Nru 771/2006/KE tal-Parlament Ewropew u tal-Kunsill tas-9 ta' Novembru 2006 li tistabbilixxi s-Sena Ewropea ta' Opportunitajiet Ugwali għal Kulħadd (2007) – Lejn Soċjetà Ġusta (ĠU L 312, 11.11.2006, p. 66).

(3) Id-Deċiżjoni ta' Implimentazzjoni tal-Kummissjoni (UE) 2018/1538 tal-11 ta' Ottubru 2018 dwar l-armonizzazzjoni tal-ispettru tar-radju li għandu jintuża mit-tagħmir għal meded qosra fil-baned tal-frekwenzi ta' 874-876 MHz u 915-921 MHz (ĠU L 257, 15.10.2018, p. 57).

(4) Id-Deċiżjoni ta’ Implimentazzjoni tal-Kummissjoni (UE) 2021/1730 tat-28 ta’ Settembru 2021 dwar l-użu armonizzat tal-baned ta’ frekwenzi akkoppjati 874,4–880,0 MHz u 919,4–925,0 MHz u l-banda ta’ frekwenzi mhux akkoppjata 1 900–1 910 MHz għar-Radju Mobbli Ferrovjarju (ĠU L 346, 30.9.2021, p. 1).

(5) Id-Direttiva 2014/53/UE tal-Parlament Ewropew u tal-Kunsill tas-16 ta’ April 2014 dwar l-armonizzazzjoni tal-liġijiet tal-Istati Membri marbuta mat-tqegħid fis-suq ta’ tagħmir tar-radju u li tħassar id-Direttiva 1999/5/KE (ĠU L 153, 22.5.2014, p. 62).

ANNESS

Baned ta’ frekwenzi bil-kundizzjonijiet tekniċi armonizzati u l-iskadenzi ta’ implimentazzjoni korrispondenti għall-apparati ta’ medda qasira

It-tabella li ġejja tispeċifika kombinazzjonijiet differenti ta’ banda ta’ frekwenzi u kategorija ta’ apparati ta’ medda qasira (kif definit fl-Artikolu 2(6)), u l-kundizzjonijiet tekniċi armonizzati għall-aċċess għall-ispettru u l-implimentazzjoni tal-iskadenzi applikabbli hemmhekk.

Il-kundizzjonijiet tekniċi ġenerali li japplikaw għall-baned kollha u għall-apparati ta’ medda qasira li jaqgħu fil-kamp ta’ applikazzjoni ta’ din id-Deċiżjoni:

—

L-Istati Membri jridu jippermettu l-użu tal-ispettru sal-qawwa tat-trażmissjoni, is-saħħa tal-kamp jew id-densità tal-qawwa mogħtija f’din it-tabella. F’konformità mal-Artikolu 3(3), huma jistgħu jimponu kundizzjonijiet inqas restrittivi, jiġifieri jippermettu l-użu ta’ spettru b’qawwa akbar tat-trażmissjoni, b’saħħa akbar tal-kamp jew b’densità akbar tal-qawwa, diment li dan ma jnaqqasx jew ma jikkompromettix il-koeżistenza xierqa bejn l-apparati ta’ medda qasira f’baned armonizzati b’din id-Deċiżjoni;

—

L-Istati Membri jistgħu jimponu biss il-“parametri addizzjonali (regoli dwar it-tqassim tal-kanali u/jew aċċess għall-kanali u l-okkupazzjoni)” identifikati fit-tabella, u ma għandhomx iżidu parametri oħra jew rekwiżiti oħra għall-aċċess tal-ispettru u għall-mitigazzjoni. Kundizzjonijiet anqas restrittivi skont it-tifsira tal-Artikolu 3(3) tfisser li l-Istati Membri jistgħu jħallu barra għalkollox il-“parametri addizzjonali (regoli dwar it-tqassim tal-kanali u/jew aċċess għall-kanali u l-okkupazzjoni)” f’xi ċellola partikolari jew jippermettu valuri ogħla, diment li ma jiġix kompromess l-arranġament xieraq tal-kondiviżjoni fil-banda armonizzata.

—

L-Istati Membri jistgħu jimponu r-“restrizzjonijiet oħra tal-użu” identifikati fit-tabella u ma għandhomx iżidu restrizzjonijiet tal-użu addizzjonali diment li ma japplikawx il-kundizzjonijiet imsemmija fl-Artikolu 3(2). Billi jistgħu jiġu introdotti kundizzjonijiet anqas restrittivi skont it-tifsira tal-Artikolu 3(3), l-Istati Membri jistgħu jħallu barra xi waħda mir-restrizzjonijiet jew ilkoll kemm huma, diment li ma jkunx kompromess l-arranġament xieraq tal-kondiviżjoni fil-banda armonizzata.

It-termini użati:

“Ċiklu tat-tħaddim” hija ddefinita bħala l-proporzjon, espress bħala persentaġġ, ta’ Σ(Ton)/(Tobs) fejn Ton huwa l-ħin “mixgħul” ta’ apparat ta’ trażmettitur uniku u Tobs huwa l-perjodu ta’ osservazzjoni. It-Ton jitkejjel f’banda ta’ frekwenzi ta’ osservazzjoni (Fobs). Sakemm ma jkunx speċifikat mod ieħor f’dan l-anness tekniku, it-Tobs huwa perjodu kontinwu ta’ siegħa u l-Fobs hija l-banda ta’ frekwenzi applikabbli f’dan l-Anness. Il-kundizzjonijiet inqas restrittivi skont l-Artikolu 3(3) tfisser li l-Istati Membri jistgħu jippermettu valur akbar għaċ-“ċiklu tat-tħaddim”.

Nru tal-banda	Banda ta’ frekwenzi	Kategorija tal-apparati ta’ medda qasira	Limitu tal-potenza tat-trażmissjoni/limitu tas-saħħa tal-kamp/limitu tad-densità tal-potenza	Parametri addizzjonali (regoli dwar it-tqassim tal-kanali u/jew aċċess għall-kanali u l-okkupazzjoni)	Restrizzjonijiet oħra tal-użu	Skadenza tal-implimentazzjoni
1	874–874,4 MHz ([8])	Apparati ta’ medda qasira mhux speċifiċi ([1])	e.r.p. ta’ 500 mW Huwa meħtieġ Kontroll tal-Potenza Adattattiv (APC), inkella tekniki ta’ mitigazzjoni oħra li għall-inqas ikollhom livell ekwivalenti ta’ kompatibbiltà tal-ispettru.	Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Jekk it-tekniki rilevanti huma deskritti fi standards armonizzati jew f’partijiet minnhom li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea skont id-Direttiva 2014/53/UE, għandha tiġi żgurata għall-inqas prestazzjoni ekwivalenti għal dawn it-tekniki. Wisa’ tal-banda: ≤ 200 kHz Ċiklu tat-tħaddim: ≤ 10 % għall-punti tal-aċċess tan-network ([4]) Ċiklu tat-tħaddim: 2,5 % f’każijiet oħra	Dan is-sett ta’ kundizzjonijiet għall-użu huwa disponibbli biss għan-networks tad-data L-apparati nomadiċi u mobbli kollha fi ħdan in-network tad-data għandhom ikunu kkontrollati minn punt tal-aċċess tan-network ewlieni ([4]), ([5]), ([6]), ([7])	fl-1 ta’ Lulju 2022.
2	917,4–919,4 MHz ([9])	Apparati tat-trażmissjoni tad-data fuq banda wiesgħa ([3])	e.r.p. ta’ 25 mW	Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Jekk it-tekniki rilevanti huma deskritti fi standards armonizzati jew f’partijiet minnhom li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea skont id-Direttiva 2014/53/UE, għandha tiġi żgurata għall-inqas prestazzjoni ekwivalenti għal dawn it-tekniki. Wisa’ tal-banda: > 600 kHz u ≤ 1 MHz Ċiklu tat-tħaddim: ≤ 10 % għall-punti tal-aċċess tan-network ([4]) Ċiklu tat-tħaddim: ≤ 2,8 % f’każijiet oħra	Dan is-sett ta’ kundizzjonijiet għall-użu huwa disponibbli biss għall-apparati ta’ medda qasira fuq banda wiesgħa f’networks tad-data L-apparati nomadiċi u mobbli kollha fi ħdan in-network tad-data għandhom ikunu kkontrollati minn punt tal-aċċess tan-network ewlieni ([4]), ([5]), ([6])	fl-1 ta’ Lulju 2022.
3	916,1–918,9 MHz ([10])	Apparati ta’ Identifikazzjoni bil-Frekwenza tar-Radju (RFID) ([2])	It-trażmissjonijiet tal-interrogatur b’e.r.p. ta’ 4 W huma permessi biss fil-frekwenzi ċentrali ta’ 916,3 MHz, 917,5 MHz, 918,7 MHz	Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Jekk it-tekniki rilevanti huma deskritti fi standards armonizzati jew f’partijiet minnhom li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea skont id-Direttiva 2014/53/UE, għandha tiġi żgurata għall-inqas prestazzjoni ekwivalenti għal dawn it-tekniki. Wisa’ tal-banda: ≤ 400 kHz	([5]), ([6]), ([7])	fl-1 ta’ Lulju 2022.
4	917,3–918,9 MHz	Apparati ta’ medda qasira mhux speċifiċi ([1])	e.r.p. ta’ 500 mW It-trażmissjonijiet huma permessi biss fil-meded ta’ frekwenzi ta’ 917,3-917,7 MHz, 918,5-918,9 MHz Huwa meħtieġ Kontroll tal-Potenza Adattattiv (APC), inkella tekniki ta’ mitigazzjoni oħra li għall-inqas ikollhom livell ekwivalenti ta’ kompatibbiltà tal-ispettru.	Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Jekk it-tekniki rilevanti huma deskritti fi standards armonizzati jew f’partijiet minnhom li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea skont id-Direttiva 2014/53/UE, għandha tiġi żgurata għall-inqas prestazzjoni ekwivalenti għal dawn it-tekniki. Wisa’ tal-banda: ≤ 200 kHz Ċiklu tat-tħaddim: ≤ 10 % għall-punti tal-aċċess tan-network ([4]) Ċiklu tat-tħaddim: ≤ 2,5 % f’każijiet oħra	Dan is-sett ta’ kundizzjonijiet għall-użu huwa disponibbli biss għan-networks tad-data L-apparati nomadiċi u mobbli kollha fi ħdan in-network tad-data għandhom ikunu kkontrollati minn punt tal-aċċess tan-network ewlieni ([4]), ([5]), ([6]), ([7])	fl-1 ta’ Lulju 2022.
5	917,4–919,4 MHz ([9])	Apparati ta’ medda qasira mhux speċifiċi ([1])	e.r.p. ta’ 25 mW	Għandhom jintużaw tekniki għall-aċċess tal-ispettru u għall-mitigazzjoni tal-interferenzi li jipprovdu livell xieraq ta’ prestazzjoni għall-konformità mar-rekwiżiti essenzjali tad-Direttiva 2014/53/UE. Jekk it-tekniki rilevanti huma deskritti fi standards armonizzati jew f’partijiet minnhom li r-referenzi għalihom ġew ippubblikati f’Il-Ġurnal Uffiċjali tal-Unjoni Ewropea skont id-Direttiva 2014/53/UE, għandha tiġi żgurata għall-inqas prestazzjoni ekwivalenti għal dawn it-tekniki. Wisa’ tal-banda: ≤ 600 kHz Ċiklu tat-tħaddim: ≤ 1 %,	Dan is-sett ta’ kundizzjonijiet għall-użu huwa disponibbli biss għall-apparat ta’ medda qasira f’networks tad-data L-apparati nomadiċi u mobbli kollha fi ħdan in-network tad-data għandhom ikunu kkontrollati minn punt tal-aċċess tan-network ewlieni ([4]), ([5]), ([6])	fl-1 ta’ Lulju 2022.

([1]) Il-kategorija tal-apparat ta’ medda qasira mhux speċifiku tkopri t-tipi kollha ta’ apparati tar-radju, irrispettivament mill-applikazzjoni jew l-iskop, li jissodisfaw il-kundizzjonijiet tekniċi kif speċifikat għal banda speċifika ta’ frekwenzi. Fost l-użi tipiċi hemm it-telemetrija, it-telekmand, l-allarmi, it-trażmissjonijiet tad-data inġenerali u applikazzjonijiet oħra.

([2]) Il-kategorija tal-apparat tal-identifikazzjoni bil-frekwenza tar-radju (l-RFID) tkopri s-sistemi tal-komunikazzjoni bir-radju bbażati fuq interrogatur/tikketta, li jikkonsistu minn apparati tar-radju (tikketti) mehmuża ma’ oġġetti animati jew mhux animati u li jikkonsistu minn unitajiet ta’ trażmettitur/riċevitur (interrogaturi) li jattivaw it-tikketti u jirċievu lura d-data. Fost l-użi tipiċi hemm it-traċċar u l-identifikazzjoni ta’ oġġetti, bħal pereżempju għas-sorveljanza elettronika tal-oġġetti (EAS), u l-ġbir u t-trażmissjoni tad-data relatata mal-oġġetti li magħhom jinhemżu tikketti, li jistgħu jkunu bla batterija, jaħdmu bl-għajnuna ta’ batterija jew jaħdmu bil-batterija. Ir-risponsi minn tikketta jiġu vvalidati mill-interrogatur tagħha u jingħaddu lis-sistema li tospitaha.

([3]) Il-kategorija tal-apparat tat-trażmissjoni tad-data fuq banda wiesgħa tkopri l-apparati tar-radju li jużaw tekniki ta’ modulazzjoni fuq banda wiesgħa biex jaċċessaw l-ispettru. Fost l-użi tipiċi hemm is-sistemi tal-aċċess mingħajr fili bħalma huma n-networks tar-radju ta’ żona lokali (WAS/RLANs) jew l-apparati ta’ medda qasira fuq banda wiesgħa f’networks tad-data.

([4]) Punt tal-aċċess tan-network f’network tad-data huwa apparat terrestri fiss ta’ medda qasira li jaġixxi bħala punt ta’ konnessjoni għall-apparat l-ieħor ta’ medda qasira fin-network tad-data għal pjattaformi ta’ servizzi li jinsabu ’l barra minn dak in-network tad-data. It-terminu “network tad-data” jirreferi għal bosta apparati ta’ medda qasira, inkluż il-punt tal-aċċess tan-network, bħall-komponenti tan-networks, u għall-konnessjonijiet mingħajr fili bejniethom.”

([5]) Skont l-Artikolu 3(1) il-baned ta’ frekwenzi għandhom jiġu indikati u magħmula disponibbli fuq bażi mhux esklużiva u ta’ kondiviżjoni. Il-kundizzjonijiet tekniċi armonizzati għandhom jagħmluha possibbli li jitħaddmu bosta apparati ta’ medda qasira fil-biċċa l-kbira tal-Istati Membri soġġetti għar-reġim ta’ awtorizzazzjoni ġenerali skont id-dritt nazzjonali. Dan huwa mingħajr preġudizzju għall-Artikoli 46 u 51 tad-Direttiva (UE) 2018/1972 u għall-Artikoli 3(2) u 7 tad-Direttiva 2014/53/UE. L-Istati Membri jistgħu jillimitaw l-użu ta’ din l-entrata b’mod li l-installazzjoni u t-tħaddim isiru biss minn utenti professjonali u jistgħu jikkunsidraw awtorizzazzjoni individwali, eż. għall-amministrazzjoni tal-kondiviżjoni ġeografika u/jew l-applikazzjoni ta’ tekniki ta’ mitigazzjoni biex tiġi żgurata l-protezzjoni tas-servizzi tar-radju.

([6]) Fl-Istati Membri fejn din il-medda ta’ frekwenzi hija użata kollha jew parti minnha għall-ordni pubblika u għal finijiet ta’ sigurtà pubblika u d-difiża u fejn il-koordinazzjoni ma tkunx possibbli, l-Istati Membri jistgħu jiddeċiedu li ma jimplimentawx din l-entrata parzjalment jew b’mod sħiħ, f’konformità mal-Artikolu 1(4) tad-Deċiżjoni 676/2002/KE u l-Artikolu 3(2) ta’ din id-Deċiżjoni.

([7]) Jista’ jkun hemm il-ħtieġa ta’ regoli nazzjonali, bħall-koordinazzjoni lokali, biex jiġu evitati l-interferenzi għas-servizzi tar-radju li joperaw f’baned kontigwi, pereżempju minħabba l-intermodulazzjoni jew l-imblukkar.

([8]) Din il-medda ta’ frekwenzi ta’ 874-874,4 MHz hija l-banda ewlenija minima armonizzata.

([9]) Din il-medda ta’ frekwenzi ta’ 917,4-919,4 MHz hija l-banda ewlenija minima armonizzata.

([10]) It-tikketti RFID jirrispondu f’livell baxx ħafna tal-potenza (e.r.p ta’ -10 dBm) f’firxa ta’ frekwenzi madwar il-kanali tal-interrogatur tal-RFID u jridu jkunu konformi mar-rekwiżiti essenzjali tad-Direttiva 2014/53/UE.