1.

Biex inwettqu l-Patt Ekoloġiku Ewropew bl-għan tiegħu ta’ newtralità klimatika sal-2050 minkejja ċirkostanzi ġeopolitiċi negattivi, ser naħdmu biex naċċelleraw it-tranżizzjoni ekoloġika u ġusta bħala parti ewlenija mis-soluzzjoni għas-sigurtà tal-enerġija u l-prezzijiet għoljin tal-enerġija, kif ukoll għat-tħassib dwar is-sigurtà tal-ikel. Ser naġixxu biex nikkonkludu malajr il-ħidma fuq il-pakkett “Lesti għall-mira ta’ 55 %” biex nilħqu l-miri tagħna ta’ tnaqqis għall-2030, flimkien ma’ ambizzjoni msaħħa biex jintlaħqu l-objettivi tar-REPowerEU li tiġi eliminata gradwalment id-dipendenza fuq il-fjuwils fossili Russi u li tingħata spinta lill-enerġija rinnovabbli fl-Ewropa. Ser nagħtu prijorità lir-rinnovament totali tas-suq tal-elettriku tal-UE, lill-ispinta tal-bidu tas-suq tal-idroġenu tal-UE u lill-introduzzjoni aktar rapida tal-enerġija rinnovabbli. Ser nagħtu attenzjoni għar-restawr u l-protezzjoni tal-bijodiversità; is-saħħa tal-ħamrija; it-trażżin tat-tniġġis tal-ilma, tal-arja u mill-mikroplastiċi, u l-indirizzar tal-kriminalità ambjentali. Bl-għan li nibnu ekonomija ċirkolari, ser nistinkaw biex inwettqu d-dritt għat-tiswija, id-disinn sostenibbli tal-prodotti, l-indirizzar tal-iskart mill-imballaġġ, u niżguraw li l-konsumaturi jkollhom l-informazzjoni t-tajba dwar l-asserzjonijiet ambjentali. Ser naġixxu fuq aktar miżuri klimatiċi, b’mod partikolari dwar l-emissjonijiet u t-tniġġis tat-trasport, l-ekoloġizzazzjoni tat-trasport tal-merkanzija kif ukoll dwar iċ-ċertifikazzjoni tal-assorbiment tal-karbonju. Ser nagħtu prijorità lit-tnaqqis tal-iskart u l-impatt ambjentali tiegħu.

2.

Biex niksbu t-tranżizzjoni diġitali u nsaħħu r-reżiljenza tal-UE, ser niffukaw fuq it-tnaqqis tal-użu tar-riżorsi u l-impatt ambjentali u klimatiku, it-tisħiħ tat-tmexxija tal-Ewropa fit-teknoloġiji pijunieri, is-sigurtà tal-provvista, il-kompetittività u r-reżiljenza tagħna, l-appoġġ tal-ħiliet diġitali rilevanti, u l-ħidma kontinwa għal approċċ iċċentrat fuq il-bniedem. Ser niffukaw l-attenzjoni tagħna fuq proposti pendenti dwar l-intelliġenza artifiċjali, l-aċċess u l-użu tad-data, ir-reżiljenza ċibernetika u ċ-ċibersigurtà, u t-tisħiħ tal-industrija tad-difiża tagħna. Biex niżguraw provvista adegwata u diversifikata għat-tranżizzjoni doppja, ser nagħtu prijorità lill-miżuri dwar il-materja prima kritika u l-materjali tal-art rari, kif ukoll is-semikondutturi. Biex ninkoraġġixxu teknoloġiji innovattivi, ser naġixxu fuq il-qafas regolatorju għall-hyperloop, il-programm il-ġdid tal-politika tal-ispettru tar-radju u komunikazzjoni sigura bbażata fl-ispazju. Ser naġixxu fuq l-ispazju komuni Ewropew tad-data dwar il-mobbiltà. Ser insaħħu s-suq uniku, wieħed mill-assi ewlenin tagħna, inkluż billi naħdmu fuq l-Istrument għall-Emerġenzi fis-Suq Uniku u fuq it-titjib tal-kundizzjonijiet tax-xogħol fuq il-pjattaformi. Ser naħdmu wkoll għal regoli ġodda effiċjenti dwar il-privattivi u nappoġġaw lill-SMEs fi żminijiet diffiċli, inkluż permezz ta’ regoli riveduti dwar il-ħlas tard.

3.

Dwar l-ekonomija li taħdem għan-nies, ser inżidu l-isforzi biex nagħtu spinta lill-kompetittività, niżguraw it-tkabbir u noħolqu opportunitajiet ta’ impjieg għaċ-ċittadini Ewropej. Ser niffukaw b’mod partikolari fuq iż-żgħażagħ u l-iżvilupp ta’ ħiliet rilevanti. Ser inneħħu l-ostakli u l-piżijiet li qed iżommu lura l-kumpaniji ż-żgħar tagħna. Ser naġixxu biex inressqu pakkett ta’ Għajnuna għall-SMEs u biex nappoġġaw u ngħinu lin-negozji, inkluż permezz ta’ aċċess aktar faċli għall-kapital u d-data, soluzzjonijiet ta’ pagament rapidi u innovattivi, u regoli simplifikati dwar l-insolvenza. Ser inkomplu nagħtu prijorità lill-implimentazzjoni tal-Pilastru Ewropew tad-Drittijiet Soċjali u d-dikjarazzjoni tas-Summit ta’ Porto, u nieħdu aktar miżuri biex niżguraw li d-dimensjoni soċjali titqies fl-azzjonijiet kollha tagħna, inkluż id-dritt għall-iskonnessjoni u l-eliminazzjoni tad-differenza bejn il-ġeneri fil-pagi. Ser naħdmu lejn ftehim rapidu dwar il-koordinazzjoni tas-sistemi tas-sigurtà soċjali biex tiġi appoġġata l-mobbiltà tal-forza tax-xogħol, kif ukoll dwar l-assigurazzjoni tad-depożiti, il-governanza korporattiva sostenibbli, il-ġlieda kontra l-ħasil tal-flus, u dwar projbizzjoni fuq prodotti magħmula b’xogħol furzat. Ser nagħtu l-attenzjoni dovuta lir-rieżami tal-governanza ekonomika tal-UE biex niżguraw li jaħdem biex jagħti appoġġ lill-ekonomiji tal-UE u tal-Istati Membri u ser naħdmu biex insaħħu s-swieq kapitali u r-rwol tal-euro, inkluż l-euro diġitali, u nlestu l-unjoni bankarja. Ser nagħmlu ħilitna biex nagħmlu progress fir-riforma globali tat-taxxa. Biex nappoġġaw l-iżvilupp sostenibbli globalment, ser naħdmu lejn ftehim rapidu dwar l-iskema ta’ preferenzi tariffarji ġeneralizzati, u lejn kodiċi doganali riformat.

4.

Għal Ewropa aktar b’saħħitha fid-dinja, irridu nuru l-appoġġ sod tagħna lill-Ukrajna u nżommu sod fil-prinċipji ewlenin tagħna tal-multilateraliżmu u l-ordni bbażat fuq ir-regoli, kif ukoll fl-impenn tagħna għall-iżvilupp u l-għajnuna umanitarja. F’konformità mal-Boxxla Strateġika, ser naħdmu aktar biex nagħtu spinta lill-kapaċitajiet komuni tagħna ta’ difiża u sigurtà u lir-reżiljenza tagħna, inkluż kontra l-manipulazzjoni tal-informazzjoni u l-interferenza minn barranin. Ser naġixxu biex nistabbilixxu sett ta’ għodod qafas biex niġġieldu kontra l-korruzzjoni. Ser inkomplu l-kooperazzjoni tagħna mal-pajjiżi kandidati fil-Balkani tal-Punent, flimkien mal-Ukrajna, ir-Repubblika tal-Moldova u l-Georgia, bil-ħsieb tal-adeżjoni futura tagħhom mal-Unjoni. Biex insaħħu r-reżiljenza tal-UE u niddiversifikaw il-ktajjen tal-provvista tagħna, ser nippromwovu r-ratifika sħiħa tal-ftehimiet kummerċjali u nsaħħu l-involviment tagħna ma’ sħab u alleati tal-istess fehma.

5.

Biex nippromwovu l-istil ta’ ħajja Ewropew tagħna, ser nagħtu prijorità assoluta lill-finalizzazzjoni tar-riforma tal-qafas leġiżlattiv dwar il-migrazzjoni u l-ażil qabel tmiem il-leġiżlatura, abbażi tal-pjan direzzjonali konġunt dwar il-patt dwar il-migrazzjoni u l-ażil. Ser nimmiraw ukoll li nilħqu progress rapidu dwar il-pakkett dwar il-migrazzjoni legali, u l-Kodiċi tal-Fruntieri ta’ Schengen rivedut. Bħala parti mis-Sena Ewropea proposta għall-Ħiliet, għandna l-għan li naħdmu bħala prijorità fuq il-proposta li jmiss dwar ir-rikonoxximent tal-kwalifiki ta’ pajjiżi terzi kif ukoll l-appoġġ għall-mobbiltà għat-tagħlim fl-UE. Ser naġixxu biex nikkonkludu l-ħidma fuq id-diġitalizzazzjoni tal-proċeduri tal-viża u d-dokumenti tal-ivvjaġġar, l-iskambju ta’ informazzjoni bejn l-awtoritajiet nazzjonali tal-infurzar tal-liġi, il-miżuri kontra t-traffikar, l-obbligu li tiġi kkomunikata informazzjoni bil-quddiem dwar il-passiġġieri, l-iffriżar u l-konfiska tar-rikavat mill-kriminalità, kif ukoll il-ġlieda kontra l-abbuż sesswali tat-tfal. Biex inkomplu nibnu l-Unjoni Ewropea tas-Saħħa, ser nagħtu prijorità lill-adozzjoni u l-implimentazzjoni rapidi tal-Ispazju Ewropew tad-Data dwar is-Saħħa. Ser nagħtu wkoll attenzjoni speċjali biex nindirizzaw il-kwistjoni tas-saħħa mentali u l-prevenzjoni tal-kanċer.

6.

Biex nipproteġu d-demokrazija u l-valuri tagħna minn theddid bla preċedent, ser nużaw l-għodod kollha għad-dispożizzjoni tagħna biex insaħħu u niddefendu l-istat tad-dritt, l-ugwaljanza u l-antidiskriminazzjoni, kif ukoll il-libertà u l-pluraliżmu tal-media fl-Unjoni. Ser naħdmu malajr biex nikkonkludu l-ħidma fuq it-trasparenza u l-immirar tar-reklamar politiku, l-istatut u l-finanzjament tal-partiti u l-fondazzjonijiet politiċi Ewropej u d-drittijiet elettorali tal-Ewropej mobbli fil-ħin għall-elezzjonijiet li jmiss tal-Parlament Ewropew. Ser nagħtu attenzjoni partikolari lil aktar inizjattivi biex insaħħu r-reżiljenza demokratika minn ġewwa, u niddefendu s-sistema demokratika tagħna minn interessi esterni, diżinformazzjoni u interferenza minn barranin, flimkien mat-tisħiħ tal-qafas leġiżlattiv tagħna kontra l-korruzzjoni. Ser nagħtu prijorità lit-trasparenza fil-pagi kif ukoll lill-ġlieda kontra l-vjolenza fuq in-nisa u l-vjolenza domestika. Ser naġixxu biex nissalvagwardjaw id-drittijiet tal-persuni b’diżabbiltà u nippromwovu s-solidarjetà interġenerazzjonali.

—

li nibqgħu nappoġġaw lill-Ukrajna u nindirizzaw l-impatt tal-aggressjoni Russa fuq iċ-ċittadini u n-negozji tagħna;

—

li nkomplu nimplimentaw il-pjanijiet nazzjonali għall-irkupru u r-reżiljenza;

—

li, hekk kif infakkru t-30 anniversarju tas-suq uniku fl-2023, naħdmu flimkien biex napprofonduh billi nneħħu l-ostakli u nimlew il-lakuni, speċjalment fis-settur tas-servizzi, biex nisfruttaw il-qawwa sħiħa tiegħu;

—

li fil-kuntest tas-Sena Ewropea tal-Ħiliet, nippromwovu l-Ewropa bħala post attraenti għall-ħaddiema tas-sengħa u biex niffaċilitaw il-mobbiltà intra-UE ta’ ħaddiema tas-sengħa u tat-trainees;

—

li nħaffu l-implimentazzjoni tal-Aġenda 2030 tan-Nazzjonijiet Uniti għall-iżvilupp sostenibbli;

—

li nistinkaw għal ambizzjoni ogħla u aktar azzjoni fil-livell globali biex jiġu indirizzati l-kriżijiet interkonnessi tal-klima u tal-bijodiversità;

—

li nsaħħu l-kuntatti diplomatiċi tagħna mas-sħab madwar id-dinja, inkluż permezz tal-istrateġija Global Gateway, filwaqt li nippromwovu standards għolja ambjentali, tas-saħħa, soċjali u tad-drittijiet tal-bniedem;

—

li noffru perspettiva Ewropea kredibbli lill-Ukrajna, lir-Repubblika tal-Moldova u lill-Georgia, flimkien mal-Balkani tal-Punent, u li nżommu l-appoġġ tagħna għas-Sħubija tal-Lvant u l-Viċinat tan-Nofsinhar;

—

li nagħtu prijorità lill-ftehimiet kummerċjali ma’ sħab tal-istess fehma, li nsaħħu r-relazzjonijiet mal-Amerka Latina u l-Karibew, u li nikkonsolidaw sħubija mġedda mal-Afrika;

—

li nindirizzaw it-theddid li jirriżulta mill-kriminalità organizzata tranżnazzjonali u l-organizzazzjonijiet terroristiċi billi nkomplu insegwu l-Istrateġija dwar l-Unjoni tas-Sigurtà 2020-2025.