(1)

Skont l-Artikolu 75(1) tad-Direttiva (UE) 2018/1972, il-Kummissjoni għandha tistabbilixxi, permezz ta’ att delegat, rata massima unika għat-terminazzjoni ta’ sejħiet madwar l-Unjoni għal servizzi tal-mobile u rata massima unika għat-terminazzjoni ta’ sejħiet madwar l-Unjoni għal servizzi fissi sabiex jitnaqqas il-piż regolatorju fl-indirizzar tal-problemi ta’ kompetizzjoni relatati mat-terminazzjoni ta’ sejħiet bl-ingrossa b’mod konsistenti madwar l-Unjoni. Il-prinċipji, il-kriterji u l-parametri li l-Kummissjoni jenħtieġ li tikkonforma magħhom meta tadotta l-att delegat huma stabbiliti fl-Anness III ta’ dik id-Direttiva.

(2)

Dan ir-Regolament huwa mingħajr preġudizzju għas-setgħat tal-Awtoritajiet Regolatorji Nazzjonali (ARN) li jiddefinixxu s-swieq rilevanti xierqa għaċ-ċirkostanzi nazzjonali, iwettqu t-test tat-tliet kriterji u jimponu rimedji oħra minbarra l-kontroll tal-prezzijiet skont l-Artikolu 64(3), 67 u 68 tal-Kodiċi. Konsegwentement, l-obbligi li mhumiex marbuta mal-prezzijiet li bħalissa huma imposti mill-ARN fuq l-operaturi b’saħħa sinifikanti fis-suq fir-rigward tas-servizzi ta’ terminazzjoni ta’ telefonati fissi jew tal-mobile ma għandhomx jiġu affettwati mid-dħul fis-seħħ ta’ dan ir-Regolament, u għalhekk se jibqgħu validi sakemm jiġu rieżaminati, f’konformità mar-regoli tal-Unjoni u dawk nazzjonali.

(3)

Il-prattika regolatorja turi li n-numru li fuqu jiġu tterminati telefonati bil-mobile jew fissi għandu rwol kruċjali fis-sostitwibbiltà tad-domanda u fid-dinamika kompetittiva fit-terminazzjoni tat-telefonati, u għalhekk huwa l-element ewlieni li jwassal għall-monopolju tat-terminazzjoni li jiġġustifika l-ħtieġa ta’ regolamentazzjoni. Għalhekk, il-kriterju ewlieni użat għad-definizzjoni ta’ servizzi ta’ terminazzjoni jenħtieġ li jkun il-firxa ta’ numerazzjoni, jiġifieri jekk it-telefonata tiġix mwassla lil numru tal-mobile, f’każ ta’ servizz ta’ terminazzjoni ta’ telefonati bil-mobile, jew għal tipi oħra ta’ numri bħal numri ġeografiċi u ċerti numri mhux ġeografiċi, fil-każ ta’ servizzi ta’ terminazzjoni ta’ telefonati fissi.

(4)

Is-servizzi tat-terminazzjoni jenħtieġ li jinkludu servizzi pprovduti permezz ta’ kwalunkwe teknoloġija li tintuża biex jiġu tterminati s-sejħiet bil-vuċi mill-fornitur tat-terminazzjoni bħal pereżempju fuq network 2G, 3G, 4G jew 5G u/jew permezz tal-WiFi, jew kwalunkwe tip ta’ network fiss, irrispettivament mill-oriġini tat-telefonata.

(5)

Kwalunkwe servizz ta’ terminazzjoni, ta’ telefonati bil-mobile jew fissi, jinvolvi li n-network tal-operatur ta’ terminazzjoni jkun interkonness ma’ mill-inqas network wieħed li ma jkunx tiegħu stess. Il-fornituri ta’ servizzi ta’ terminazzjoni ta’ sejħiet bil-vuċi jenħtieġ għalhekk li jitqiesu bħala dawk li għandhom kontroll tekniku u d-dritt legali li jużaw in-numru li fuqu wieħed ikun ċempel u r-routing tat-telefonata lir-riċevitur.

(6)

Is-servizz ta’ terminazzjoni jenħtieġ li jeskludi l-faċilitajiet assoċjati li jistgħu jkunu meħtieġa minn ċerti operaturi jew f’ċerti Stati Membri għall-forniment ta’ servizzi ta’ terminazzjoni. Madankollu, il-ports ta’ interkonnessjoni, li bħalissa huma regolati f’ħafna Stati Membri, huma elementi essenzjali tas-servizzi ta’ terminazzjoni għal kwalunkwe operatur peress li hija meħtieġa kapaċità akbar għall-interkonnessjoni biż-żieda fit-traffiku, u għalhekk jenħtieġ li jiġu inklużi fid-definizzjoni tas-servizz ta’ terminazzjoni. Fornitur ta’ servizzi ta’ terminazzjoni ta’ sejħiet bil-vuċi jenħtieġ li ma jimponi l-ebda kost għajr ir-rati rilevanti stabbiliti minn dan ir-Regolament għas-servizz sħiħ li jtemm telefonata lil utent fuq in-network tiegħu.

(7)

Servizzi ta’ terminazzjoni ta’ sejħiet fil-vuċi għal ċerti numri mhux ġeografiċi, bħal dawk li jintużaw għal servizzi ta’ rati primjum, servizzi bla ħlas u servizzi b’kostijiet komuni (magħrufa wkoll bħala “servizzi ta’ valur miżjud”), ma jġibux irwieħhom bħala servizzi ta’ terminazzjoni “tradizzjonali” fejn hemm monopolju tal-operaturi li jtemmu t-telefonata. Il-fornituri ta’ servizzi bħal dawn għandhom xi setgħa ta’ negozjar, u jistgħu jinnegozjaw ir-rata ta’ terminazzjoni bħala parti mill-ftehim dwar il-kondiviżjoni tad-dħul. Għalhekk, il-fornituri tat-terminazzjoni jiffaċċjaw ċerti restrizzjonijiet meta jiffissaw l-imposti għat-terminazzjoni ta’ telefonati għal dawn in-numri mhux ġeografiċi, b’differenza mit-terminazzjoni ta’ telefonati għal numri ġeografiċi jew tal-mobile. Għalhekk, it-terminazzjoni ta’ telefonati għal dawn in-numri jenħtieġ li tiġi eskluża mill-kamp ta’ applikazzjoni ta’ dan ir-Regolament. Fil-maġġoranza tal-każijiet, il-meded tan-numerazzjoni speċifiċi għall-komunikazzjonijiet bejn magna u oħra (M2M) ma jintużawx biex jipprovdu komunikazzjonijiet interpersonali, peress li huma traffiku tad-data u mhux traffiku tal-vuċi, u għalhekk jenħtieġ li ma jiġux inklużi fil-kamp ta’ applikazzjoni ta’ dan ir-Regolament li huwa limitat għall-komunikazzjonijiet bil-vuċi.

(8)

Servizzi ta’ terminazzjoni ta’ sejħiet għal telefonati għal tipi oħra ta’ numri mhux ġeografiċi, bħal dawk li jintużaw għal servizzi nomadiċi fissi u biex jiġu aċċessati servizzi ta’ emerġenza, juru l-karatteristiċi tal-monopolju tat-terminazzjoni, u huma pprovduti fuq infrastruttura fissa. Għalhekk, jenħtieġ li dawn jaqgħu fil-kamp ta’ applikazzjoni ta’ dan ir-Regolament u jiġu ttrattati bħala servizzi ta’ terminazzjoni ta’ telefonati fissi.

(9)

Xi servizzi ta’ sejħiet bil-vuċi pprovduti mill-operaturi ma jistgħux jiġu kklassifikati bħala servizzi purament tal-mobile jew purament fissi iżda huma servizzi ibridi. Is-servizzi taż-“Żona tal-Oriġini” huma eżempju ta’ dawn is-servizzi ibridi, fejn it-telefonati huma tipikament mwassla għal numru fiss fuq network tal-mobile. Skont id-definizzjoni tas-servizzi ta’ terminazzjoni ta’ sejħiet bil-vuċi fejn in-numru li wieħed iċempel fuqu jkun il-kriterju determinanti, tali servizzi ibridi jenħtieġ li jiġu ttrattati bħala servizzi ta’ terminazzjoni ta’ telefonati bil-mobile jew fissi skont in-numru li wieħed ikun ċempel fuqu.

(10)

Jenħtieġ li r-rati regolati għas-servizzi ta’ terminazzjoni ta’ sejħiet bil-vuċi japplikaw għal telefonati li joriġinaw minn u jintemmu għal numru inkluż fil-pjanijiet nazzjonali ta’ numerazzjoni li jikkorrispondi għall-kodiċijiet tal-pajjiżi tal-E.164 għal żoni ġeografiċi li jappartjenu għat-territorju tal-Unjoni (numri tal-Unjoni). In-numri tal-pajjiżi terzi huma kollha numri għajr in-numri tal-Unjoni. L-inklużjoni ta’ telefonati li joriġinaw minn numri ta’ pajjiżi terzi u li jintemmu għal numru tal-Unjoni, fil-każ fejn l-operaturi ta’ pajjiżi terzi jitolbu rati ta’ terminazzjoni ogħla mir-rati massimi uniċi għat-terminazzjoni ta’ sejħiet bil-vuċi madwar l-Unjoni jew fejn tali rati ta’ terminazzjoni ma jkunux regolati skont prinċipji kosteffiċjenti li huma ekwivalenti għal dawk stabbiliti fl-Artikolu 75 u l-Anness III tal-Kodiċi, toħloq ir-riskju li jiġu mminati l-għanijiet ta’ dan ir-Regolament, b’mod partikolari dawk li tiġi żgurata l-integrazzjoni tas-suq intern.

(11)

Il-kombinazzjoni ta’ rati baxxi ta’ terminazzjoni regolati għal telefonati li jkunu oriġinaw minn numri ta’ pajjiżi terzi u li jkunu ntemmu għal numri tal-Unjoni u rati ta’ terminazzjoni għolja u mhux kosteffiċjenti għal telefonati lil numri ta’ pajjiżi terzi x’aktarx tirriżulta f’rati ta’ terminazzjoni ogħla għal telefonati li joriġinaw minn numri tal-Unjoni u li jintemmu għal numri ta’ pajjiżi terzi, li jkollha impatt negattiv fuq it-tariffi bl-imnut fl-Unjoni u fuq l-istruttura tal-kost tal-operaturi tal-Unjoni. Il-gradi differenti ta’ esponiment tal-operaturi tal-Unjoni għal telefonati li jintemmu minn tali operaturi ta’ pajjiżi terzi li jimponu rati ta’ terminazzjoni għolja u mhux kosteffiċjenti jwasslu għal żbilanċi fl-istrutturi tal-kostijiet tal-operaturi tal-Unjoni minħabba fatturi barra mill-kontroll tal-operaturi nfushom. Dan x’aktarx jipprevjeni l-ħolqien ta’ offerti bl-imnut pan-Ewropej li jkunu jinkludu telefonati għal ċerti numri ta’ pajjiżi terzi, minħabba rati ogħla ta’ terminazzjoni għat-telefonati għal dawk il-pajjiżi, li jista’ jkollhom impatt negattiv fuq il-konsumaturi u speċjalment fuq in-negozji fl-Unjoni. Barra minn hekk, dan joħloq distorsjoni fil-kompetizzjoni peress li l-impatt asimetriku tal-esponiment għal rati għolja ta’ terminazzjoni għal telefonati li jintemmu għal numri ta’ pajjiżi terzi jirriżulta f’kundizzjonijiet kompetittivi differenti li jiffaċċjaw operaturi differenti tal-Unjoni, li fl-aħħar mill-aħħar iwassal ukoll għal distorsjoni fil-kapaċità ta’ investiment u inċentivi madwar l-Unjoni (kemm l-investiment fl-operaturi kif ukoll mill-operaturi). Dawn l-effetti kollha jmorru b’mod ċar kontra l-għanijiet ta’ dan ir-Regolament, li huma li jippromwovu l-integrazzjoni tas-suq uniku billi jneħħu d-distorsjonijiet bejn l-operaturi minħabba rati ta’ terminazzjoni mitluba li huma ferm ogħla mill-kost.

(12)

Bil-għan li jiġu applikati r-rati massimi uniċi għat-terminazzjoni ta’ sejħiet bil-vuċi madwar l-Unjoni b’mod miftuħ, trasparenti u mhux diskriminatorju, u li tiġi limitata l-esklużjoni ta’ telefonati li joriġinaw minn numri ta’ pajjiżi terzi għal dak li huwa strettament meħtieġ biex jiġi żgurat li jintlaħqu l-objettivi tas-suq intern u biex tiġi żgurata l-proporzjonalità, ir-rati stabbiliti minn dan ir-Regolament jenħtieġ li japplikaw għal telefonati li joriġinaw minn numri ta’ pajjiżi terzi u li jintemmu għal numri tal-Unjoni meta r-rati ta’ terminazzjoni applikati minn fornituri ta’ pajjiżi terzi ta’ servizzi ta’ terminazzjoni ta’ sejħiet bil-vuċi li joriġinaw minn numri tal-Unjoni jkunu f’livell ugwali jew inqas mil-livell tar-rati massimi ta’ terminazzjoni ta’ sejħiet bil-vuċi stabbiliti minn dan ir-Regolament. Matul il-perjodu tranżitorju għar-rati għat-terminazzjoni ta’ telefonati fissi fl-2021 u matul il-perjodu ta’ traħħis gradwali għar-rati għat-terminazzjoni ta’ telefonati bil-mobile (mill-2021 sal-2023), ir-rati massimi rilevanti għat-terminazzjoni ta’ telefonati bil-mobile li se jiskattaw dan il-mekkaniżmu se jkunu dawk stabbiliti mill-paragrafi 2 sa 5 tal-Artikolu 4 tar-Regolament. Ir-rati massimi rilevanti għat-terminazzjoni ta’ telefonati fissi li se jiskattaw dan il-mekkaniżmu fl-2021 se jkunu dawk stabbiliti mill-Artikolu 5(2) tar-Regolament Delegat. Il-fornituri ta’ servizzi ta’ terminazzjoni ta’ sejħiet bil-vuċi fl-Unjoni jenħtieġ li japplikaw dawn ir-rati abbażi tar-rati applikati jew proposti minn fornituri ta’ servizzi ta’ terminazzjoni ta’ sejħiet bil-vuċi f’pajjiżi terzi.

(13)

Minħabba li l-fornituri tas-servizzi ta’ terminazzjoni ta’ sejħiet bil-vuċi tal-Unjoni mhux dejjem jistgħu jkunu fil-pożizzjoni li jkunu jafu l-livell tar-rata ta’ terminazzjoni applikata mill-operaturi ta’ pajjiżi terzi, normalment jenħtieġ li dawn tal-aħħar ikunu responsabbli biex jipprovdu informazzjoni verifikabbli li turi l-livell tar-rata ta’ terminazzjoni offruta. Meta l-fornituri ta’ tranżitu (jew intermedjarji oħra) jerġgħu jbigħu servizzi ta’ terminazzjoni lill-operaturi tal-Unjoni, ir-rata ta’ terminazzjoni applikata jew offruta minn dawk il-fornituri ta’ tranżitu tkun dik rilevanti biex jiġi ddeterminat jekk tkunx daqs jew inqas mir-rati massimi għat-terminazzjoni ta’ sejħiet bil-vuċi stabbiliti minn dan ir-Regolament.

(14)

Meta l-operaturi ta’ pajjiżi terzi jitolbu rati ta’ terminazzjoni għal telefonati li joriġinaw minn numri tal-Unjoni u li jintemmu għal numri ta’ pajjiżi terzi li jkunu ogħla mir-rati ta’ terminazzjoni madwar l-Unjoni, ir-rati stabbiliti minn dan ir-Regolament jenħtieġ li japplikaw ukoll għal telefonati li joriġinaw minn numri ta’ pajjiżi terzi u li jintemmu għal numri tal-Unjoni, meta l-Kummissjoni tiddetermina, abbażi tal-informazzjoni pprovduta lill-Kummissjoni minn pajjiżi terzi bħal dawn, li r-regolamentazzjoni tar-rati ta’ terminazzjoni f’dawn il-pajjiżi tkun ibbażata fuq prinċipji ekwivalenti għal dawk stabbiliti fl-Artikolu 75 tad-Direttiva (UE) 2018/1972 u l-Anness III tagħha. Il-lista ta’ pajjiżi terzi li jissodisfaw rekwiżiti bħal dawn jenħtieġ li sussegwentement tiġi inkluża f’dan ir-Regolament u tiġi aġġornata kif xieraq.

(15)

Peress li l-oriġini tat-telefonata tiddefinixxi jekk ir-rati ta’ terminazzjoni madwar l-Unjoni japplikawx jew le, huwa essenzjali li l-operaturi tal-Unjoni jkunu jistgħu jidentifikaw il-pajjiż tal-oriġini ta” min ikun qed iċempel. Għal dan il-għan, l-operaturi jistgħu joqogħdu fuq il-kodiċi tal-pajjiż fl-identifikazzjoni tal-linja ta’ min iċempel (CLI). Sabiex tiġi żgurata l-applikazzjoni korretta ta’ dan ir-Regolament, l-operaturi tal-Unjoni jenħtieġ li jirċievu CLI valida assenjata għal kull telefonata li tidħol. Konsegwentement, l-operaturi tal-Unjoni ma jkunux marbuta li japplikaw rati ta’ terminazzjoni madwar l-Unjoni għat-terminazzjoni ta’ telefonati jekk is-CLI tkun nieqsa, invalida jew frawdolenti.

(16)

Sabiex jiġi stmat il-kost effiċjenti għat-terminazzjoni ta’ sejħa bil-vuċi fuq network ipotetiku tal-mobile jew fiss fl-Unjoni f’konformità mal-prinċipji stabbiliti fl-Artikolu 75(1) tad-Direttiva (UE) 2018/1972 u l-Anness III tagħha, ġew żviluppati żewġ mudelli tal-kost, rispettivament għat-terminazzjoni ta’ telefonati bil-mobile u fissi, billi tqiesu l-kostijiet f’kull Stat Membru.

(17)

Abbażi tal-feedback dwar il-kostijiet f’kull Stat Membru li wasal permezz tal-proċess ta’ konsultazzjoni, il-mudelli tal-kost ġew finalizzati kemm għan-networks tal-mobile kif ukoll għal dawk fissi. Skont l-Anness III tad-Direttiva (UE) 2018/1972, il-mudelli tal-kost stabbilixxew rati abbażi tal-irkupru tal-kostijiet imġarrba minn operatur effiċjenti. Għalhekk, ir-rati huma bbażati biss fuq l-ispejjeż inkrementali għall-forniment tas-servizz ta’ terminazzjoni ta’ sejħiet bil-vuċi bl-ingrossa, jiġifieri dawk il-kostijiet relatati mat-traffiku biss li jiġu evitati fin-nuqqas ta’ servizz ta’ terminazzjoni ta’ sejħiet bil-vuċi bl-ingrossa.

(18)

Ir-rati massimi uniċi għat-terminazzjoni ta’ telefonati bil-mobile u fissi madwar l-Unjoni ġew stabbiliti b’referenza għall-kost effiċjenti fil-pajjiż bl-ogħla kost skont il-mudelli tal-kost ikkummissjonati, biex b’hekk jiġi żgurat il-prinċipju tal-irkupru tal-kost madwar l-Unjoni, u sussegwentement jiżdied marġini ta’ sikurezza minuri biex jitqiesu ineżattezzi possibbli fil-mudelli tal-kost.

(19)

Ir-rati massimi uniċi ta’ terminazzjoni ta’ sejħiet bil-vuċi madwar l-Unjoni stabbiliti b’dan ir-Regolament jenħtieġ li jibdew japplikaw xahrejn wara d-dħul fis-seħħ tiegħu, sabiex jiġi żgurat li l-operaturi jkollhom iż-żmien meħtieġ biex jaġġustaw is-sistemi tagħhom ta’ informazzjoni, fatturar u kontabbiltà, u jagħmlu l-bidliet meħtieġa fil-ftehimiet ta’ interkonnessjoni.

(20)

Meta r-rati medji attwali ta’ terminazzjoni ta’ sejħiet bil-vuċi fl-Unjoni jkunu ogħla b’mod sinifikanti mir-rati li għandhom jiġu imposti fil-futur, jiġifieri r-rati massimi uniċi kosteffiċjenti ta’ terminazzjoni ta’ sejħiet bil-vuċi madwar l-Unjoni stabbiliti f’dan ir-Regolament, jenħtieġ li jiġi applikat perjodu ta’ traħħis gradwali, li huwa prattika regolatorja komuni. F’każijiet bħal dawn, il-perjodu ta’ traħħis gradwali jenħtieġ li jipprovdi għodda effettiva biex tiġi indirizzata l-applikazzjoni ta’ rati aktar baxxi f’konformità mal-prinċipju tal-proporzjonalità.

(21)

Meta wieħed iqis il-medja attwali tar-rati għat-terminazzjoni ta’ telefonati bil-mobile madwar l-Istati Membri, jenħtieġ li jitfassal perjodu ta’ traħħis gradwali biex tintlaħaq ir-rata massima unika għat-terminazzjoni ta’ telefonati bil-mobile madwar l-Unjoni. Sabiex jintlaħaq bilanċ bejn implimentazzjoni rapida u l-ħtieġa li jiġi evitat tfixkil sinifikanti għall-operaturi, it-traħħis gradwali jenħtieġ li jibda f’livell qrib il-medja attwali tar-rati ta’ terminazzjoni tat-telefonati bil-mobile u jonqos kull sena fuq perjodu ta’ tliet snin qabel ma tintlaħaq ir-rata massima unika għat-terminazzjoni ta’ telefonati bil-mobile madwar l-Unjoni fl-2024.

(22)

Għalhekk, dan ir-Regolament jistabbilixxi traħħis gradwali ta’ tliet snin, li jilħaq ir-rata massima unika kosteffiċjenti għat-terminazzjoni ta’ telefonati bil-vuċi madwar l-Unjoni fl-2024. Jenħtieġ li ma jkun meħtieġ l-ebda perjodu tranżitorju fil-każ ta’ fornituri fl-Istati Membri li japplikaw rati ogħla mir-rati massimi uniċi għat-terminazzjoni ta’ telefonati bil-mobile madwar l-Unjoni għall-2021, peress li t-traħħis gradwali jilħaq l-objettiv li jitnaqqas l-impatt tal-implimentazzjoni tar-rata massima unika għat-terminazzjoni ta’ telefonati bil-mobile madwar l-Unjoni.

(23)

F’xi Stati Membri, ir-rati massimi regolati bħalissa għat-terminazzjoni ta’ telefonati bil-mobile huma inqas mir-rati għat-terminazzjoni ta’ telefonati bil-mobile stabbiliti għall-2021, l-2022 u l-2023 bħala riżultat tal-perjodu ta’ traħħis gradwali, u qrib ir-rata massima unika għat-terminazzjoni ta’ telefonati bil-mobile madwar l-Unjoni. Sabiex jiġu evitati żidiet potenzjali fil-prezzijiet bl-imnut f’dawk l-Istati Membri, li jirriżultaw minn żieda temporanja fir-rati regolati għat-terminazzjoni ta’ telefonati bil-mobile, jenħtieġ li jkun possibbli li r-rati regolati attwali għat-terminazzjoni ta’ telefonati bil-mobile f’dawk l-Istati Membri jkomplu jiġu applikati sas-sena fejn ir-rata massima għat-terminazzjoni ta’ telefonati bil-mobile stabbilita minn dan ir-Regolament għal dik is-sena tkun f’livell ugwali jew inqas mir-rati attwali ta’ terminazzjoni ta’ dawk l-Istati Membri għal dik is-sena.

(24)

Peress li d-differenza bejn il-medja tar-rati attwali għat-terminazzjoni ta’ telefonati fissi u r-rata massima unika għat-terminazzjoni ta’ telefonati fissi madwar l-Unjoni stabbilita f’dan ir-Regolament hija iżgħar minn dik tar-rati għat-terminazzjoni ta’ telefonati bil-mobile, perjodu ta’ traħħis gradwali ma jkunx meħtieġ. Madankollu, l-għoti ta’ perjodu tranżitorju lil ċerti Stati Membri jenħtieġ li jkun xieraq biex tiġi żgurata tranżizzjoni bla xkiel għar-rata massima unika għat-terminazzjoni ta’ telefonati fissi madwar l-Unjoni u biex jiġi evitat kwalunkwe dewmien bla bżonn għall-applikazzjoni tagħha.

(25)

Abbażi tal-livelli attwali tar-rati għat-terminazzjoni ta’ telefonati fissi f’ċerti Stati Membri u l-livell tar-rata massima unika għat-terminazzjoni ta’ telefonati fissi madwar l-Unjoni stabbilita f’dan ir-Regolament, huwa ġġustifikat li jingħata perjodu tranżitorju lil xi Stati Membri. Il-perjodu tranżitorju jenħtieġ li jibda mid-data tal-applikazzjoni ta’ dan ir-Regolament u jenħtieġ li jintemm fil-31 ta’ Diċembru 2021. Matul il-perjodu tranżitorju, fl-Istati Membri kkonċernati jistgħu japplikaw rati speċifiċi, differenti mir-rata massima unika għat-terminazzjoni ta’ telefonati fissi madwar l-Unjoni.

(26)

F’dawk l-Istati Membri fejn ir-rati attwali għat-terminazzjoni ta’ telefonati fissi huma ogħla b’mod sinifikanti mir-rata massima unika għat-terminazzjoni ta’ telefonati fissi madwar l-Unjoni, huwa ġġustifikat li jingħata perjodu tranżitorju biex ikun jista’ jsir aġġustament gradwali ta’ dawk ir-rati. Fl-Istati Membri kollha għajr tnejn fejn ir-rati attwali għat-terminazzjoni ta’ telefonati fissi huma ogħla minn EUR 0,0875 ċenteżmi (ir-rata massima unika għat-terminazzjoni ta’ telefonati fissi madwar l-Unjoni flimkien ma’ 25 %), ir-rata massima għat-terminazzjoni ta’ telefonati fissi fl-2021 jenħtieġ li tkun ugwali għar-rati attwali tagħhom imnaqqsa b’20 %. Fil-Polonja u l-Finlandja, li s’issa għadhom ma segwewx il-prinċipji stabbiliti fir-Rakkomandazzjoni tal-Kummissjoni 2009/396/KE (2) u li bħalissa għandhom rati għolja ħafna għat-terminazzjoni ta’ telefonati fissi, tnaqqis ta’ 20 % ikun pass insuffiċjenti lejn ir-rata massima unika għat-terminazzjoni ta’ telefonati fissi madwar l-Unjoni. Għalhekk, ir-rata tagħhom għall-perjodu tranżitorju jenħtieġ li tkun dik tal-Istat Membru bl-ogħla rata matul il-perjodu tranżitorju, bl-esklużjoni ta’ dawk iż-żewġ Stati Membri. Għall-bqija tal-Istati Membri fejn ir-rati attwali għat-terminazzjoni ta’ telefonati fissi huma taħt ir-rata massima unika għat-terminazzjoni ta’ telefonati fissi madwar l-Unjoni, jew fejn tnaqqis ta’ 20 % jġibhom fil-livell tar-rata massima unika għat-terminazzjoni ta’ telefonati fissi madwar l-Unjoni jew inqas minnha, jenħtieġ li ma jiġi stabbilit l-ebda perjodu tranżitorju.

(27)

Il-Korp ta’ Regolaturi Ewropej tal-Komunikazzjonijiet Elettroniċi ġie kkonsultat skont l-Artikolu 75(1) tad-Direttiva (UE) 2018/1972 u ta l-opinjoni tiegħu fil-15 ta’ Ottubru 2020.