(1)

Ir-Regolament ta’ Implimentazzjoni tal-Kummissjoni (UE) Nru 808/2014 (2) jistabbilixxi regoli għall-applikazzjoni tar-Regolament (UE) Nru 1305/2013. Ir-Regolament (UE) 2020/2220 tal-Parlament Ewropew u tal-Kunsill (3) emenda r-Regolament (UE) Nru 1305/2013 u estenda d-durata tal-programmi tal-iżvilupp rurali appoġġati mill-Fond Agrikolu Ewropew għall-Iżvilupp Rurali (“FAEŻR”) sal-31 ta’ Diċembru 2022 u ta l-possibilità lill-Istati Membri li jiffinanzjaw il-programmi estiżi tagħhom mill-allokazzjoni baġitarja korrispondenti għas-snin 2021 u 2022. Barra minn hekk, ir-Regolament (UE) 2020/2220 għamel disponibbli r-riżorsi addizzjonali mill-Istrument ta’ Rkupru tal-Unjoni Ewropea stabbilit bir-Regolament tal-Kunsill (UE) 2020/2094 (4) (“EURI”) fil-programmi estiżi fis-snin 2021 u 2022 biex jiġu ffinanzjati miżuri skont ir-Regolament (UE) Nru 1305/2013 bil-għan li jiġu indirizzati l-impatt tal-kriżi tal-COVID-19 u l-konsegwenzi tagħha għas-settur agrikolu u ż-żoni rurali tal-Unjoni. Għalhekk, ir-regoli għall-implimentazzjoni tar-Regolament (UE) Nru 1305/2013 jenħtieġ li jiġu emendati.

(2)

L-Artikolu 4(2) tar-Regolament ta’ Implimentazzjoni (UE) Nru 808/2014 jistabbilixxi l-għadd massimu ta’ emendi fil-programmi tal-iżvilupp rurali li l-Istati Membri jistgħu jissottomettu lill-Kummissjoni. Sabiex tiżdied il-flessibbiltà għall-Istati Membri biex jużaw l-allokazzjoni baġitarja tagħhom għas-snin 2021 u 2022 fil-programmi estiżi u jiġu integrati r-riżorsi addizzjonali mill-EURI, jenħtieġ li jiżdied l-għadd massimu ta’ emendi msemmija f’dak l-Artikolu u jiġu posposti l-iskadenzi għas-sottomissjoni tat-talbiet għall-aħħar emendi tal-programm. Barra minn hekk, hemm bżonn li jiġi ċċarat li l-għadd massimu ta’ emendi jenħtieġ li ma japplikax għal talbiet biex jiġu emendati programmi ta’ żvilupp rurali fil-każ li jkunu meħtieġa emendi wara d-dħul fis-seħħ tar-Regolament (UE) 2020/2220 sabiex jiġi estiż it-tul ta’ żmien tal-programmi ta’ żvilupp rurali u jiġu integrati r-riżorsi addizzjonali mill-EURI.

(3)

Ir-Regolament (UE) 2020/2220 jipprevedi li għall-programmi estiżi tal-iżvilupp rurali, il-miri stabbiliti fil-kuntest tal-qafas ta’ prestazzjoni jridu jiġu stabbiliti għas-sena 2025. Għalhekk, hemm bżonn li jiġi speċifikat li l-miri tal-indikaturi tal-qafas tal-prestazzjoni jirreferu għall-kisbiet ippjanati sal-31 ta’ Diċembru 2025. Barra minn hekk, ir-Regolament (UE) 2020/2220 jeskludi l-applikazzjoni tal-qafas ta’ prestazzjoni għar-riżorsi addizzjonali mill-EURI. Għalhekk, l-outputs iffinanzjati mir-riżorsi addizzjonali mill-EURI jenħtieġ li jiġu esklużi mill-miri tal-qafas ta’ prestazzjoni.

(4)

Ir-Regolament (UE) 2020/2220 jipprevedi li r-riżorsi addizzjonali mill-EURI jridu jiġu pprogrammati u mmonitorjati separatament mill-appoġġ tal-Unjoni għall-iżvilupp rurali, filwaqt li fil-prinċipju jiġu applikati r-regoli stabbiliti fir-Regolament (UE) Nru 1305/2013. Għalhekk, l-ispeċifikazzjonijiet separati fid-deskrizzjonijiet tal-miżuri rilevanti fil-programmi ta’ żvilupp rurali u l-programmi qafas nazzjonali se jkunu meħtieġa fejn l-operazzjonijiet huma appoġġati bir-riżorsi addizzjonali mill-EURI. Il-pjanijiet ta’ finanzjament tal-programmi għall-iżvilupp rurali, l-oqfsa nazzjonali u n-netwerks rurali nazzjonali jenħtieġ li jindikaw ukoll b’mod separat ir-riżorsi addizzjonali mill-EURI.

(5)

Barra minn hekk, fil-pjan ta’ indikaturi għall-miżuri magħżula, is-subtotal tal-outputs ippjanati u n-nefqa pubblika totali ppjanata li hija ffinanzjata mir-riżorsi addizzjonali mill-EURI jenħtieġ li jiġu indikati b’mod separat. Fir-rapporti annwali ta’ implimentazzjoni, ir-rappurtar dwar in-nefqa impenjata skont il-miżura u l-qasam ta’ fokus jenħtieġ li jindika l-parti tal-impenji li huma ffinanzjati mir-riżorsi addizzjonali mill-EURI.

(6)

L-Artikolu 8(h)(ii) tar-Regolament (UE) Nru 1305/2013 jirrikjedi li għal kull miżura, għal kull tip ta’ operazzjoni b’rata ta’ kontribuzzjoni speċifika tal-FAEŻR, għat-tip ta’ operazzjoni msemmija fl-Artikoli 37(1), 38(3), 39(1) u l-Artikolu 39a tar-Regolament (UE) Nru 1305/2013, meta Stat Membru japplika limitu minimu ta’ telf stabbilit taħt it 30 %; u għall-assistenza teknika, il-pjan ta’ finanzjament irid jinkludi tabella li tindika l-kontribuzzjoni totali tal-Unjoni ppjanata u r-rata ta’ kontribuzzjoni applikabbli tal-FAEŻR. Peress li l-istess regoli japplikaw għall-kontribuzzjoni mir-riżorsi addizzjonali mill-EURI, għal kull miżura minn dawn għal kull tip ta’ operazzjoni, jekk applikabbli, il-pjan ta’ finanzjament jenħtieġ li jindika l-kontribuzzjoni ppjanata EURI u r-rata ta’ kontribuzzjoni EURI.

(7)

Ir-Regolament (UE) 2020/2220 emenda l-Artikoli 38 u 39 tar-Regolament (UE) Nru 1305/2013 fir-rigward tal-limitu minimu għat-telf li l-Istati Membri jistgħu jiddefinixxu fil-programmi ta’ żvilupp rurali tagħhom li abbażi tagħhom il-bdiewa jistgħu jiġu kkumpensati għal telf taħt il-fondi mutwi għal avvenimenti klimatiċi avversi, mard tal-annimali u tal-pjanti, infestazzjonijiet ta’ pesti u inċidenti ambjentali u l-għodda għall-istabbilizzazzjoni tal-introjtu għall-bdiewa tas-setturi kollha. Bħala konsegwenza u għall-finijiet ta’ rappurtar tad-WTO, in-nefqa għall-għodod kollha tal-ġestjoni tar-riskju rregolati mill-Artikolu 36 tar-Regolament (UE) Nru 1305/2013 u fejn il-limitu minimu ta’ telf ikun inqas minn 30 % jeħtieġ li tiġi ppjanata u rrappurtata separatament. Il-pjan ta’ indikaturi jeħtieġ li jispeċifika dawn ir-rekwiżiti ġodda ta’ programmazzjoni u ppjanar kif xieraq.

(8)

Għaldaqstant, ir-Regolament ta’ Implimentazzjoni (UE) Nru 808/2014 jenħtieġ li jiġi emendat skont dan.

(9)

Minħabba l-urġenza relatata mal-kriżi tal-COVID-19, dan ir-Regolament jenħtieġ li jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Iżvilupp Rurali,

(1)

l-Artikolu 4 huwa emendat kif ġej:

(2)

l-Anness I huwa emendat kif stabbilit fl-Anness I ta’ dan ir-Regolament;

(3)

l-Anness VII huwa emendat kif stabbilit fl-Anness II ta’ dan ir-Regolament.