16.2.2021 |
MT |
Il-Ġurnal Uffiċjali tal-Unjoni Ewropea |
L 54/1 |
ID-DEĊIŻJONI TAL-KUNSILL (UE) 2021/176
tal-5 ta’ Frar 2021
dwar il-konklużjoni tal-emendi tal-Ftehim għall-kooperazzjoni fit-trattament tat-tniġġis tal-Baħar tat-Tramuntana miż-żejt u sustanzi oħra perikolużi (Il-Ftehim ta’ Bonn) fir-rigward tal-estensjoni tal-kamp ta’ applikazzjoni ta’ dak il-Ftehim u dwar l-Adeżjoni tar-Renju ta’ Spanja għal dak il-Ftehim
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 192(1) u l-Artikolu 196(2), flimkien mal-Artikolu 218(6)(a)(v) tiegħu,
Wara li kkunsidra l-proposta tal-Kummissjoni Ewropea,
Wara li kkunsidra l-approvazzjoni ta-Parlament Ewropew (1),
Billi:
(1) |
Il-Ftehim għall-Kooperazzjoni fit-Trattament tat-Tniġġis fil-Baħar tat-Tramuntana miż-Żejt u Sustanzi Oħra Perikolużi (il-“Ftehim ta’ Bonn”) (2) ġie konkluż mill-Komunità Ekonomika Ewropea permezz tad-Deċiżjoni tal-Kunsill 84/358/KEE (3) u daħal fis-seħħ fl-1 ta’ Settembru 1989. Il-Ftehim ta’ Bonn ġie emendat fl-1989. Dawk l-emendi ġew approvati bid-Deċiżjoni tal-Kunsill 93/540/KEE (4) u daħlu fis-seħħ fl-1 ta’ April 1994. |
(2) |
Permezz ta’ Deċiżjoni tal-Kunsill tas-7 ta’ Ottubru 2019, il-Kunsill awtorizza lill-Kummissjoni biex twettaq negozjati f’isem l-Unjoni fir-rigward ta’ emendi għall-kamp ta’ applikazzjoni materjali u ġeografiku tal-Ftehim ta’ Bonn. |
(3) |
Skont l-Artikolu 16(1) tal-Ftehim ta’ Bonn, il-Partijiet Kontraenti kkunsidraw proposta għal emenda biex jiġi estiż il-kamp ta’ applikazzjoni tal-Ftehim ta’ Bonn biex tittejjeb il-kooperazzjoni dwar is-sorveljanza fir-rigward tar-rekwiżiti tal-Anness VI għall-Konvenzjoni Internazzjonali għall-Prevenzjoni tat-Tniġġis minn Vapuri, iffirmata f’Londra fit-2 ta’ Novembru 1973, kif issupplimentata mill-Protokoll tas-17 ta’ Frar 1978 (“il-Konvenzjoni MARPOL”). Barra minn hekk, il-Partijiet Kontraenti kkunsidraw ukoll l-emendi għall-Ftehim ta’ Bonn u l-Anness tiegħu minħabba l-adeżjoni ta’ Spanja ma’ dan il-Ftehim skont l-Artikolu 20 tiegħu. |
(4) |
Il-Kummissjoni, f’konformità mad-Deċiżjoni tal-Kunsill tas-7 ta’ Ottubru 2019, innegozjat dawk l-emendi għall-Ftehim ta’ Bonn, li ġew adottati b’vot unanimu b’żewġ deċiżjonijiet fil-wieħed u tletin laqgħa tal-Partijiet Kontraenti għall-Ftehim ta’ Bonn li saret f’Bonn mid-9 sal-11 ta’ Ottubru 2019. |
(5) |
Dawk l-emendi għall-Ftehim ta’ Bonn jenħtieġ li jiġu approvati f’isem l-Unjoni Ewropea, |
ADOTTA DIN ID-DEĊIŻJONI:
Artikolu 1
L-emendi għall-Ftehim għall-kooperazzjoni fit-trattament tat-tniġġis fil-Baħar tat-Tramuntana miż-żejt u ta’ sustanzi oħra perikolużi (“il-Ftehim ta’ Bonn”) fir-rigward tal-estensjoni tal-kamp ta’ applikazzjoni tal-Ftehim ta’ Bonn u dwar l-Adeżjoni tar-Renju ta’ Spanja għall-Ftehim ta’ Bonn, li ġew adottati mill-Partijiet Kontraenti waqt il-wieħed u tletin laqgħa tagħhom li saret f’Bonn mid-9 sal-11 ta’ Ottubru 2019, huma b’dan approvati f’isem l-Unjoni. (5)
Artikolu 2
Il-President tal-Kunsill għandu jaħtar il-persuna jew persuni bis-setgħa li jagħmlu notifika, f’isem l-Unjoni, prevista fl-Artikolu 16 tal-Ftehim ta’ Bonn. (6)
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, il-5 ta’ Frar 2021.
Għall-Kunsill
Il-President
A. P. ZACARIAS
(1) Approvazzjoni tad-19 ta’ Jannar 2021.
(2) ĠU L 188, 16.7.1984, p. 9.
(3) Id-Deċiżjoni tal-Kunsill 84/358/KEE tat-28 ta’ Ġunju 1984 dwar il-konklużjoni tal-Ftehim għall-kooperazzjoni dwar kif jiġi trattat it-tniġġis tal-Baħar tat-Tramuntana bħala riżultat taż-żejt u ta’ sustanzi oħra perikolużi (ĠU L 188, 16.7.1984, p. 7).
(4) Id-Deċiżjoni tal-Kunsill 93/540/KEE tat-18 ta’ Ottubru 1993 li tapprova ċerti emendi tal-Ftehim għall-kooperazzjoni dwar kif jiġi trattat it-tniġġis tal-Baħar tat-Tramuntana bħala riżultat taż-żejt u ta’ sustanzi oħra perikolużi (Ftehim Bonn) (ĠU L 263, 22.10.1993, p. 51).
(5) It-testi tad-Deċiżjonijiet dwar l-emendi għall-Ftehim ta’ Bonn huma ppubblikati fil-paġni 3 u 6 ta’ dan il-Gurnal Uffiċjali.
(6) Id-data tad-dħul fis-seħħ tal-emendi għall-Ftehim ta’ Bonn ser tiġi ppubblikata f’Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.