(1)

Fil-11 ta’ April 2019, il-Korp għas-Soluzzjoni tat-Tilwim tal-Organizzazzjoni Dinjija tal-Kummerċ (World Trade Organization, “WTO”), adotta r-rakkomandazzjonijiet u d-deċiżjonijiet tiegħu fit-tilwima DS353 United States – Measures Affecting Trade in Large Civil Aircraft (Second complaint) – Recourse to Article 21.5 of the DSU by the European Union, li tikkonferma li l-Istati Uniti naqsu milli jikkonformaw il-miżuri tagħhom, li nstab li huma inkonsistenti mal-Ftehim dwar is-Sussidji u l-Miżuri Kompensatorji (“il-Ftehim SCM”), mal-obbligi skont dak il-Ftehim. Fir-rigward tal-konċessjonijiet tat-taxxa FSC/ETI, il-Korp tal-Appell ikkonferma li l-Istati Uniti ma rtirawx is-sussidji u li għadhom joperaw ir-rakkomandazzjonijiet u d-deċiżjonijiet oriġinali (2).

(2)

Fir-rigward ta’ miżuri oħra rilevanti, f’konformità mal-paragrafu 8 tal-“Proċeduri Miftiehma skont l-Artikoli 21 u 22 tal-Qbil dwar is-Soluzzjoni tat-Tilwim (Dispute Settlement Understanding, “DSU”) (3) u l-Artikolu 7 tal-Ftehim dwar is-SCM” bejn l-Unjoni Ewropea u l-Istati Uniti fir-rigward ta’ din it-tilwima, l-Unjoni Ewropea talbet lill-arbitru tal-Artikolu 22.6 tad-DSU biex jerġa’ jibda l-ħidma tiegħu. L-arbitru ħareġ id-deċiżjoni tiegħu fit-13 ta’ Ottubru 2020 (4).

(3)

Id-deċiżjoni tal-arbitru tiddikjara li l-Unjoni Ewropea tista’ titlob l-awtorizzazzjoni mill-Korp għas-Soluzzjoni tat-Tilwim tad-WTO biex tieħu kontromiżuri fir-rigward tal-Istati Uniti tal-Amerka (“l-Istati Uniti”), f’livell li ma jaqbiżx it-USD 3 993 212 564 fis-sena. Dawn il-kontromiżuri jistgħu jieħdu l-forma ta’ (a) sospensjoni tal-konċessjonijiet tat-tariffi u obbligi oħra relatati skont il-GATT tal-1994, (b) sospensjoni tal-konċessjonijiet u obbligi oħra skont il-Ftehim SCM u (c) sospensjoni ta’ impenji orizzontali jew settorjali li jinsabu fl-iskeda tas-servizzi konsolidata tal-Unjoni Ewropea fir-rigward tas-setturi kollha prinċipali identifikati fil-Lista ta’ Klassifikazzjoni Settorjali tas-Servizzi.

(4)

F’konformità mal-Artikolu 22.7 tad-DSU, il-partijiet għandhom jaċċettaw id-deċiżjoni tal-arbitru bħala finali. Fis-26 ta’ Ottubru 2020] il-Korp għas-Soluzzjoni tat-Tilwim tad-WTO [awtorizza] lill-Unjoni Ewropea biex tieħu kontromiżuri kontra l-Istati Uniti li jkunu konsistenti mad-deċiżjoni tal-arbitru. Il-kontromiżuri se jikkonsistu fis-sospensjoni tal-konċessjonijiet tat-tariffi u l-impożizzjoni ta’ dazji doganali ġodda jew miżjuda.

(5)

Fir-rigward tat-tfassil u l-għażla tal-miżuri xierqa, il-Kummissjoni qieset u applikat il-kriterji oġġettivi kollha f’konformità mal-Artikolu 4(2)(a) u l-Artikolu 4(3) tar-Regolament (UE) Nru 654/2014. F’konformità mal-Artikolu 9 tar-Regolament (UE) Nru 654/2014, il-Kummissjoni tat opportunità lill-partijiet ikkonċernati li jesprimu l-fehmiet tagħhom u jippreżentaw informazzjoni rigward l-interessi ekonomiċi rilevanti tal-Unjoni (5).

(6)

Il-Kummissjoni żgurat li d-dazji doganali addizzjonali ma jaqbżux il-livell awtorizzat mil-Korp għas-Soluzzjoni tat-Tilwim tad-WTO. Fil-preżent, l-ammont huwa kkunsidrat xieraq biex effettivament iwassal għall-konformità u jipprovdi għajnuna lill-operaturi ekonomiċi tal-UE minħabba li, fil-klima ekonomika attwali, jippermetti li jiġu imposti miżuri fuq inġenji tal-ajru ċivili kbar u prodotti oħrajn tal-Istati Uniti li jitqiesu simili biżżejjed għall-kontromiżuri imposti mill-Istati Uniti.

(7)

Dawn il-miżuri jikkonċernaw importazzjonijiet ta’ prodotti li joriġinaw fl-Istati Uniti li l-Unjoni Ewropea mhijiex sostanzjalment dipendenti fuqhom għall-provvista tagħha. Dan l-approċċ jevita kemm jista’ jkun impatt negattiv fuq l-atturi diversi fis-suq tal-Unjoni, inkluż il-konsumaturi.

(8)

Jenħtieġ li l-miżuri ta’ politika kummerċjali fil-forma ta’ dazji ad valorem addizzjonali fuq il-prodotti elenkati fl-Anness I u fl-Anness II jiġu applikati kif ġej:

(9)

In-negozjati bejn l-Unjoni Ewropa u l-Istati Uniti li għandhom l-għan li jwasslu għal soluzzjoni bilanċjata għat-tilwim tad-WTO dwar inġenji tal-ajru ċivili kbar sa issa ma wasslux għal riżultati. Fl-istess ħin, l-Istati Uniti jkomplu japplikaw kontromiżuri fl-ammont ta’ USD 7,5 biljun fuq l-importazzjonijiet ta’ prodotti mill-Unjoni Ewropea. Il-Kummissjoni beħsiebha temenda dan ir-Regolament, biex tqis l-iżviluppi rilevanti, inkluż fir-rigward tal-konformità tal-Istati Uniti, jew in-nuqqas tagħha. B’mod partikolari, il-Kummissjoni beħsiebha tissospendi l-applikazzjoni tar-Regolament ta’ Implimentazzjoni, jekk l-Istati Uniti jissospendu l-kontromiżuri tagħhom kontra l-importazzjonijiet mill-Unjoni Ewropea, jew jibdlu l-livell tad-dazji doganali, skont kif meħtieġ, biex tirrifletti l-kontromiżuri applikati mill-Istati Uniti.

(10)

Jenħtieġ li dan l-Att jidħol fis-seħħ fil-jum li jiġi wara dak li fih ikun ippubblikat f’Il-Ġurnal Uffiċjali tal-Unjoni Ewropea.

(11)

Il-miżuri previsti f’dan ir-Regolament huma skont l-opinjoni tal-Kumitat dwar l-Ostakoli għall-Kummerċ, imwaqqaf permezz tar-Regolament (UE) 2015/1843 tal-Parlament Ewropew u tal-Kunsill (6),