(1)

Ir-Regolament (UE) 2017/625 jistabbilixxi r-regoli ġenerali għat-twettiq ta’ kontrolli uffiċjali biex tkun ivverifikata l-konformità mar-regoli għandhom l-għan li jipprevjenu, jeliminaw jew inaqqsu r-riskji għall-bnedmin u għall-annimali għal livelli aċċettabbli, b’mod dirett jew permezz tal-ambjent.

(2)

B’mod partikolari, ir-Regolament (UE) 2017/625 jistabbilixxi l-kundizzjonijiet ġenerali għad-dħul fl-Unjoni ta’ annimali jew oġġetti minn pajjiżi terzi jew mir-reġjuni tagħhom, inkluż ikel maħsub għall-konsum mill-bniedem. L-Artikolu 129 tar-Regolament (UE) 2017/625 jagħti s-setgħa lill-Kummissjoni li tirrikonoxxi li l-miżuri applikati minn pajjiżi terzi jew mir-reġjuni tagħhom, ikunu ekwivalenti għar-rekwiżiti stabbiliti f’ċerti regoli msemmija fl-Artikolu 1(2) ta’ dak ir-Regolament, jekk il-pajjiżi terzi jagħtu prova oġġettiva f’dan ir-rigward. Jagħti wkoll is-setgħa lill-Kummissjoni li tistabbilixxi l-kundizzjonijiet li jirregolaw id-dħul fl-Unjoni ta’ dawn l-annimali u l-oġġetti minn tali pajjiżi terzi jew mir-reġjuni tagħhom, b’mod partikolari fir-rigward tan-natura u l-kontenut taċ-ċertifikati jew id-dikjarazzjonijiet uffiċjali li jeħtieġ jakkumpanjaw lil dawk il-komoditajiet.

(3)

Id-Deċiżjoni tal-Kunsill 98/258/KE (2) tapprova l-Ftehim bejn il-Komunità Ewropea u l-Istati Uniti tal-Amerika dwar miżuri sanitarji biex jipproteġu s-saħħa pubblika u dik tal-annimali fin-negozju ta’ annimali ħajjin u prodotti tal-annimali, bl-objettiv li jiġi ffaċilitat il-kummerċ, fost l-oħrajn, billi jiġi stabbilit mekkaniżmu għar-rikonoxximent tal-ekwivalenza tal-miżuri sanitarji. Il-molluski bivalvi, l-ekinodermi, it-tunikati u l-gasteropodi tal-baħar ħajjin, imkessħin, iffriżati jew ipproċessati għall-konsum mill-bniedem jaqgħu taħt il-kamp ta’ applikazzjoni ta’ dan il-Ftehim (l-Anness I “Prodotti koperti”).

(4)

Il-kontrolli tal-Unjoni fl-Istati Uniti twettqu mis-17 sas-27 ta’ Marzu 2015 biex tiġi evalwata s-sistema ta’ kontroll fis-seħħ li tirregola l-produzzjoni tal-molluski bivalvi u l-prodotti tas-sajd derivati minnhom, maħsuba għall-esportazzjoni lejn l-Unjoni (il-kontrolli tal-Unjoni). Fil-kuntest ta’ dawk il-kontrolli, l-awtoritajiet tal-Istati Uniti taw informazzjoni dwar ir-regoli sanitarji applikabbli għall-molluski bivalvi, l-ekinodermi, it-tunikati u l-gasteropodi tal-baħar fit-territorju tagħhom, il-proċeduri għall-valutazzjoni ta-riskju u l-fatturi meqjusa għall-valutazzjoni tar-riskji u għad-determinazzjoni tal-livell xieraq ta’ protezzjoni sanitarja fir-rigward ta’ dawk l-oġġetti u l-kontroll, il-proċeduri ta’ spezzjoni u l-mekkaniżmi taċ-ċertifikazzjoni uffiċjali.

(5)

L-ekinodermi, it-tunikati u l-gasteropodi tal-baħar huma soġġetti għar-regoli tal-iġjene applikabbli għall-molluski bivalvi ħajjin, imkessħin u ffriżati stabbiliti fir-Regolament (KE) Nru 853/2004 tal-Parlament Ewropew u tal-Kunsill (3) skont il-punt 1 tat-Taqsima VII tal-Anness III tiegħu. Għalhekk, is-sejba fir-rigward tal-molluski bivalvi ħajjin fil-kuntest tal-kontrolli tal-Unjoni, tapplika għall-ekinodermi, għat-tunikati u għall-gasteropodi tal-baħar.

(6)

Ir-Regolament ta’ Implimentazzjoni tal-Kummissjoni (UE) 2019/626 (4) jistabbilixxi l-listi tal-pajjiżi terzi u tar-reġjuni tagħhom li minnhom il-kunsinni ta’ ċerti annimali u oġġetti maħsuba għall-konsum mill-bniedem għandhom jiġu awtorizzati għad-dħul fl-Unjoni mill-perspettiva tas-sikurezza tal-ikel, f’konformità mal-Artikolu 126(2)(a) tar-Regolament (UE) 2017/625, li jirrikjedi l-konformità mar-rekwiżiti rilevanti stabbiliti bir-regoli msemmija fl-Artikolu 1(2) tiegħu jew mar-rekwiżiti rikonoxxuti bħala tal-inqas ekwivalenti għalihom. Ir-Regolament ta’ Implimentazzjoni (UE) 2019/626 jipprevedi li l-kunsinni ta’ molluski bivalvi, ekinodermi, tunikati u gasteropodi tal-baħar ħajjin, imkessħin, iffriżati jew ipproċessati maħsuba għall-konsum mill-bniedem, għandhom jiġu awtorizzati biss għad-dħul fl-Unjoni jekk jiġu minn pajjiżi terzi jew mir-reġjuni tagħhom li huma elenkati fl-Anness I. L-Istati ta’ Massachusetts u Washington tal-Istati Uniti jidhru f’dik il-lista.

(7)

Il-kontrolli tal-Unjoni, l-assigurazzjonijiet sussegwenti mogħtija mill-Istati Uniti u r-Regolament ta’ Implimentazzjoni (UE) 2019/626 jagħtu raġunijiet biex jiġi stabbilit li l-miżuri applikati fl-Istati ta’ Massachusetts u Washington tal-Istati Uniti għall-protezzjoni tas-saħħa pubblika fir-rigward tal-produzzjoni u t-tqegħid fis-suq ta’ molluski bivalvi, ekinodermi, ttunikati u gasteropodi tal-baħar ħajjin, imkessħin, iffriżati jew ipproċessati għall-konsum mill-bniedem, huma ekwivalenti għar-rekwiżiti stabbiliti fir-regoli dwar is-sikurezza tal-ikel imsemmija fl-Artikolu 1(2) tar-Regolament (UE) 2017/625.

(8)

Biex jiġi permess id-dħul fl-Unjoni tal-molluski bivalvi, tal-ekinodermi, tat-tunikati u tal-gasteropodi tal-baħar ħajjin, imkessħin, iffriżati jew ipproċessati għall-konsum mill-bniedem, jeħtieġ jiġi stabbilit mudell ta’ ċertifikat uffiċjali għall-importazzjonijiet mill-Istati Uniti tal-Amerika ta’ molluski bivalvi, ekinodermi, tunikati u gasteropodi tal-baħar ħajjin, imkessħin, iffriżati jew ipproċessati għall-konsum mill-bniedem, li jirrikjedi ċertifikazzjoni li l-miżuri applikati għall-produzzjoni u t-tqegħid fis-suq ta’ dawk l-oġġetti huma ekwivalenti għar-rekwiżiti stabbiliti fir-regoli dwar is-sikurezza tal-ikel imsemmija fl-Artikolu 1(2) tar-Regolament (UE) 2017/625.

(9)

Meta jiġu stabbiliti r-rekwiżiti għad-dħul fl-Unjoni ta’ kunsinni ta’ ċerti annimali u oġġetti maħsuba għall-konsum mill-bniedem, jenħtieġ li ssir referenza għall-kodiċijiet tan-Nomenklatura Magħquda f’konformità mar-Regolament tal-Kunsill (KEE) Nru 2658/87 (5), li jistabbilixxi l-kodiċijiet għall-molluski bivalvi, l-ekinodermi, it-tunikati u l-gasteropodi tal-baħar ħajjin, imkessħin, iffriżati jew ipproċessati għall-konsum mill-bniedem.

(10)

Il-miżuri previsti f’dan ir-Regolament ta’ Implimentazzjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

Kull kunsinna ta’ molluski bivalvi, ekinodermi, tunikati u gasteropodi tal-baħar ħajjin, imkessħin, iffriżati jew ipproċessati maħsuba għall-konsum mill-bniedem, kif imsemmi fl-Artikolu 1, għandha tidħol biss fl-Unjoni jekk tkun akkumpanjata b’ċertifikat uffiċjali mimli kif meħtieġ f’konformità mal-mudell stabbilit fl-Anness.