(1)

L-Anness II tar-Regolament tal-Kunsill (KEE) Nru 1601/91 (2) stabbilixxa l-lista ta’ denominazzjonijiet ġeografiċi tal-prodotti tal-inbid aromatizzat mogħtija protezzjoni skont dak ir-Regolament. Ir-Regolament (KEE) Nru 1601/91 tħassar u ġie sostitwit bir-Regolament (UE) Nru 251/2014. Il-Kapitolu III tar-Regolament (UE) Nru 251/2014 jistabbilixxi regoli dwar il-protezzjoni ta’ Indikazzjonijiet Ġeografiċi fis-settur tal-inbid aromatizzat. Dak il-Kapitolu jagħti wkoll is-setgħa lill-Kummissjoni li fost l-oħrajn tadotta atti ta’ implimentazzjoni biex tistabbilixxi u żżomm reġistru elettroniku aċċessibbli pubblikament ta’ Indikazzjonijiet Ġeografiċi għall-prodotti tal-inbid aromatizzat protetti skont dak ir-Regolament. Jenħtieġ li dak ir-reġistru jinżamm f’sit elettroniku tal-Kummissjoni.

(2)

Skont l-Artikolu 26(1) tar-Regolament (UE) Nru 251/2014, id-denominazzjonijiet ġeografiċi eżistenti tal-prodotti tal-inbid aromatizzat elenkati fl-Anness II tar-Regolament (KEE) Nru 1601/91, jew sottomessi lil Stat Membru u approvati minn dak l-Istat Membru qabel is-27 ta’ Marzu 2014, huma awtomatikament protetti bħala Indikazzjonijiet Ġeografiċi skont dak ir-Regolament. Madankollu, skont l-Artikolu 26(3) tar-Regolament (UE) Nru 251/2014, jenħtieġ li d-denominazzjonijiet ġeografiċi eżistenti li għalihom l-Istat Membru kkonċernat ma bagħatx il-fajl tekniku u d-deċiżjoni nazzjonali ta’ approvazzjoni lill-Kummissjoni sat-28 ta’ Marzu 2017 jitneħħew mir-reġistru.

(3)

Sat-28 ta’ Marzu 2017, il-Kummissjoni rċeviet il-fajl tekniku u d-deċiżjoni nazzjonali ta’ approvazzjoni għad-denominazzjonijiet ġeografiċi eżistenti tal-prodotti tal-inbid aromatizzat elenkati fl-Anness II tar-Regolament (KEE) Nru 1601/91 “Nürnberger Glühwein” (fis-17 ta’ Marzu 2017), “Samoborski bermet” (fit-23 ta’ Marzu 2017), “Thüringer Glühwein” (fis-17 ta’ Marzu 2017) u l-“Vermut di Torino” jew il-“Vermouth di Torino” (fl-24 ta’ Marzu 2017).

(4)

Id-denominazzjoni ġeografika “Vino Naranja del Condado de Huelva” ġiet approvata minn Spanja fis-6 ta’ Lulju 2011. Il-Kummissjoni rċeviet il-fajl tekniku relatat u d-deċiżjoni nazzjonali ta’ approvazzjoni fl-14 ta’ Marzu 2017.

(5)

Il-Kummissjoni vvalutat id-denominazzjonijiet ġeografiċi eżistenti “Nürnberger Glühwein”, “Samoborski bermet”, “Thüringer Glühwein”, “Vermut di Torino” jew “Vermouth di Torino” u “Vino Narana del Condado de Huelva”, u kkonkludiet li dawn jikkonformaw mad-definizzjoni ta’ Indikazzjoni Ġeografika kif prevista fil-punt (3) tal-Artikolu 2 tar-Regolament (UE) Nru 251/2014.

(6)

Għalhekk, jenħtieġ li d-denominazzjonijiet ġeografiċi eżistenti “Nürnberger Glühwein”, “Samoborski bermet”, “Thüringer Glühwein”, “Vermut di Torino” jew “Vermouth di Torino” u “Vino Narana del Condado de Huelva” jiġu rreġistrati fir-reġistru bħala Indikazzjonijiet Ġeografiċi ta’ prodotti tal-inbid aromatizzat protetti bir-Regolament (UE) Nru 251/2014.

(7)

Il-Kummissjoni ma rċevietx il-fajl tekniku u d-deċiżjoni nazzjonali ta’ approvazzjoni tad-denominazzjoni ġeografika eżistenti “Vermouth de Chambéry”. Id-denominazzjoni ġeografika eżistenti “Vermouth de Chambéry” għalhekk tilfet il-protezzjoni mid-29 ta’ Marzu 2017. Peress li r-reġistru għad irid jiġi stabbilit, jenħtieġ li l-Kummissjoni tirrifjuta li telenka l-isem “Vermouth de Chambéry” fir-reġistru.

(8)

Għal raġunijiet ta’ ċarezza u wara talba mill-applikanti, jenħtieġ li l-isem tad-denominazzjoni ġeografika Taljana eżistenti indikata fl-Anness II tar-Regolament (KEE) Nru 1601/91 bħala jew “Vermouth di Torino” jew “Vermut di Torino” skont il-verżjonijiet lingwistiċi tar-Regolament, jiddaħħal fir-reġistru bħala “Vermut di Torino” / “Vermouth di Torino”,