(1)

Permezz tar-Regolament ta’ Implimentazzjoni (UE) 2019/159, il-Kummissjoni Ewropea (“il-Kummissjoni”) imponiet miżuri definittivi ta’ salvagwardja fuq ċerti prodotti tal-azzar (“ir-Regolament definittiv”) (3). Il-miżuri imposti mir-Regolament definittiv jikkonsistu fi kwota tariffarja (“TRQ”) fir-rigward ta’ 26 kategorija ta’ prodotti tal-azzar, stabbilita f’livell għoli biżżejjed biex tippreserva l-flussi kummerċjali tradizzjonali. B’mod partikolari, il-limiti kwantitattivi ġew stabbiliti permezz ta’ referenza għall-importazzjonijiet matul il-perjodu 2015-2017, b’żieda ta’ 5 % sabiex jingħata lok għal biżżejjed provvista u tkun aċċertata l-kompetizzjoni fis-suq tal-UE. Dazju tariffarju ta’ 25 % japplika biss lil hinn minn dawk il-livelli kwantitattivi stabbiliti fuq bażi ta’ skont il-kategorija ta’ prodotti.

(2)

Permezz tar-Regolament ta’ Implimentazzjoni (UE) 2019/1590 (4) (ir-“Regolament emendatorju”), il-Kummissjoni emendat dawn il-miżuri, wara investigazzjoni ta’ rieżami, sabiex jirriflettu t-tibdil fiċ-ċirkostanzi li seħħ matul il-perjodu tal-impożizzjoni tal-miżuri u sabiex il-miżuri jsiru aktar effettivi, abbażi tal-interess tal-Unjoni.

(3)

Fl-ambitu ta’ din l-investigazzjoni ta’ rieżami, xi partijiet, inkluża l-Assoċjazzjoni Ewropea tal-Manifatturi tal-Vetturi (“ACEA”), talbu l-esklużjoni tal-kategorija ta’ prodotti 4B (li tkopri l-folji miksija metalliċi użati primarjament fis-settur awtomobilistiku) mill-kamp ta’ applikazzjoni tal-miżuri. L-ACEA argumentat li l-użu ta’ dik il-kategorija ta’ prodotti mill-industrija awtomobilistika tal-Unjoni kien fundamentali għall-kontinwazzjoni tal-operazzjonijiet kummerċjali normali ta’ din l-industrija. Filwaqt li l-Kummissjoni rrikonoxxiet li kien fl-interess tal-Unjoni li l-flussi kummerċjali tradizzjonali tat-tipi ta’ prodotti użati mill-industrija awtomobilistika jkunu delimitati, ma sabet l-ebda raġuni għal esklużjoni daqshekk diretta mis-sistema tat-TRQ. Wara konsultazzjoni mal-partijiet interessati kollha, minflok esklużjoni, il-Kummissjoni, għaldaqstant, iddeċidiet li l-użu tal-kategorija 4B (li jista’ jinkludi wkoll il-prodotti għal użi oħra) jenħtieġ li jkun ristrett biss għall-importazzjonijiet li jistgħu juru użu aħħari fis-settur awtomobilistiku. Għaldaqstant, permezz tar-Regolament emendatorju, l-importazzjonijiet korrispondenti tqiegħdu taħt il-proċedura tal-użu aħħari msemmija fl-Artikolu 254 tar-Regolament (UE) Nru 952/2013 tal-Parlament Ewropew u tal-Kunsill (5). Is-settur awtomobilistiku u l-fornituri tal-azzar tiegħu b’mod ġenerali laqgħu din is-soluzzjoni billi din taċċerta l-użu esklussiv tat-TRQ għall-kategorija ta’ prodotti 4B mill-industrija awtomobilistika tal-Unjoni, kif ukoll tipproteġi l-flussi kummerċjali tradizzjonali. Ir-riżultati tal-konsultazzjonijiet mal-Membri tad-WTO wkoll ma wrew l-ebda oppożizzjoni għal din il-bidla fir-rigward tal-kategorija 4B.

(4)

Wara d-dħul fis-seħħ tar-Regolament emendatorju, il-Kummissjoni baqgħet f’kuntatt mill-qrib mal-ACEA u mal-esportaturi (b’mod partikolari Koreani) tal-prodotti tal-azzar li jaqgħu taħt il-kategorija 4B. Ladarba l-industrija tal-utenti ma kinitx qed timporta direttament il-prodott soġġett għar-rekwiżit tal-użu aħħari, l-implimentazzjoni ta’ dik il-proċedura kienet tirrikjedi kooperazzjoni mill-qrib bejn il-partijiet kollha involuti fil-proċess tal-importazzjoni, mill-ordnijiet inizjali sal-mument li fih l-importazzjonijiet jaslu għand l-utent aħħari tal-prodott. Il-Kummissjoni saret konxja tal-fatt li l-kooperazzjoni mill-qrib meħtieġa fost diversi operaturi (li tinvolvi l-estensjoni tal-awtorizzazzjonijiet eżistenti mogħtija lill-industrija awtomobilistika tal-Unjoni, l-għoti ta’ awtorizzazzjonijiet ġodda favur l-importaturi, u/jew it-trasferiment tad-drittijiet u l-obbligi bejn id-diversi partijiet involuti fil-katina tal-provvista relatata) ma ħadmitx kif kien mistenni oriġinarjament. Minħabba f’hekk, proporzjon kunsiderevoli tal-importazzjonijiet taħt il-kategorija ta’ prodotti 4B ma setgħetx issir wara d-dħul fis-seħħ tal-miżuri emendati, minkejja l-fatt li l-Kummissjoni, l-esportaturi, l-importaturi tal-azzar, u l-awtoritajiet doganali nazzjonali tal-Istati Membri tal-UE u l-pajjiżi terzi kienu qed jikkooperaw mill-qrib biex isolvu dawk il-kwistjonijiet. Lanqas ma kien possibbli li jitħaffef il-proċess amministrattiv sabiex jinkisbu l-awtorizzazzjonijiet għall-użu aħħari meħtieġa.

(5)

Apparti minn hekk deher ukoll li kwalunkwe soluzzjoni biex tiġi implimentata proċedura effettiva tal-użu aħħari xorta tkun teħtieġ iż-żmien, mingħajr ebda garanzija ta’ rimedji adegwati u immedjati. Sadanittant, proporzjon sinifikanti tal-prodotti tal-kategorija 4B jinsab miżmum fil-fruntiera doganali tal-Unjoni jistenna li jiġi żdoganat. Dan jaffettwa serjament u negattivament, jew saħansitra jfixkel, il-katini tal-provvista bbażati fuq sistema “eżatt fil-ħin”, b’mod partikolari għaliex l-industrija awtomobilistika tal-Unjoni tiddependi b’qawwa fuq gradi tal-azzar speċjalizzati ferm. Meta jitqiesu l-konsegwenzi ekonomiċi negattivi potenzjali u l-fatt li tali limitazzjonijiet huma evidentement f’kontradizzjoni mal-objettiv tal-Kummissjoni li taċċerta l-fluss kummerċjali tradizzjonali fl-interess tal-Unjoni, wara li semgħet il-fehmiet tal-partijiet interessati kollha involuti f’din il-kwistjoni, il-Kummissjoni tqis li l-proċedura tal-użu aħħari għal din il-kategorija jenħtieġ li tiġi revokata.

(6)

Ir-Regolament ta’ Implimentazzjoni (UE) 2019/159 u l-annessi tiegħu jenħtieġ għalhekk li jiġu emendati għal darb’oħra sabiex jirriflettu b’mod adegwat is-sitwazzjoni li kienet tipprevali qabel l-introduzzjoni tar-rekwiżit tal-użu aħħari għall-kategoriji 4 A u 4B permezz tar-Regolament emendatorju.

(7)

Wara konsultazzjonijiet mal-Korea, il-pajjiż esportatur li ntlaqat l-aktar mill-mekkaniżmu tal-użu aħħari, il-Kummissjoni qieset li l-allokazzjoni tal-volum tat-TRQ bejn il-kategoriji ta’ prodotti 4 A u 4B għal dan il-pajjiż, kif stabbilita skont ir-Regolament ta’ Implimentazzjoni (UE) 2019/159, jenħtieġ li tiġi emendata wkoll. Dan huwa meħtieġ sabiex jitqies il-volum tal-gradi tal-azzar għas-settur awtomobilistiku li ġew importati taħt il-kategorija ta’ prodotti 4 A mid-dħul fis-seħħ tar-Regolament emendatorju, minħabba l-impossibbiltà li jiġu importati taħt il-kategorija ta’ prodotti 4B soġġetti għall-mekkaniżmu tal-użu aħħari.

(8)

Il-Kummissjoni għadha tal-fehma li, fl-interess tal-Unjoni, jista’ jkun hemm bżonn, fi stadju ulterjuri, mekkaniżmu speċifiku – il-proċedura tal-użu aħħari (ladarba l-kwistjonijiet rigward l-implimentazzjoni jiġu solvuti) jew inkella sistema alternattiva – ikun kif ikun stabbilit, sabiex jiġu delimitati l-importazzjonijiet tal-gradi tal-azzar għas-settur awtomobilistiku taħt il-kategorija ta’ prodotti 4B. Għaldaqstant dawn il-kwistjonijiet se jiġu vvalutati mill-ġdid fil-kuntest ta’ investigazzjoni ta’ rieżami fil-futur, abbażi tal-kummenti u l-proposti magħmula mill-partijiet interessati, kif ukoll ta’ żviluppi oħra li jolqtu din il-kategorija ta’ prodotti. F’dan ir-rigward, ta’ min jinnota wkoll li l-Kummissjoni dan l-aħħar tat bidu għal investigazzjoni kontra ċ-ċirkomvenzjoni tal-miżuri anti-dumping dwar l-importazzjonijiet ta’ azzar inossidabbli li joriġina mir-Repubblika Popolari taċ-Ċina, li jaqgħu fil-kategorija ta’ prodotti 4 (6).

(9)

Dan ir-Regolament jenħtieġ li jingħata effett retroattiv, u b’hekk jirrevoka, mill-1 ta’ Ottubru 2019, ir-rekwiżit tal-użu aħħari introdott mir-Regolament emendatorju. Dan se jippermetti wkoll li jintradd lura kull dazju ta’ salvagwardja eventwali li seta’ tħallas abbażi tat-TRQ stabbilita mir-Regolament emendatorju iżda li ma jibqax iġġustifikat aktar wara d-dħul fis-seħħ ta’ dan ir-Regolament.

(10)

Il-miżuri previsti f’dan ir-Regolament huma skont l-opinjoni tal-Kumitat dwar is-Salvagwardji stabbilit skont l-Artikolu 3(3) tar-Regolament (UE) 2015/478 u tal-Artikolu 22(3) tar-Regolament (UE) 2015/755 rispettivament,