25.2.2020 |
MT |
Il-Ġurnal Uffiċjali tal-Unjoni Ewropea |
L 51/4 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2020/248
tal-21 ta’ Frar 2020
li tistabbilixxi linji gwida tekniċi għall-ispezzjonijiet f’konformità mal-Artikolu 17 tad-Direttiva 2006/21/KE tal-Parlament Ewropew u tal-Kunsill
(notifikata bid-dokument C(2020) 889)
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2006/21/KE tal-Parlament Ewropew u tal-Kunsill tal-15 ta’ Marzu 2006 dwar l-immaniġġar ta’ skart mill-industriji ta’ estrazzjoni u li temenda d-Direttiva 2004/35/KE (1), u b’mod partikolari l-Artikolu 22(1)(c) tagħha,
Billi:
(1) |
L-Artikolu 17 tad-Direttiva 2006/21/KE jistipula li kull faċilità tal-iskart koperta mill-Artikolu 7 f’dik id-Direttiva tiġi spezzjonata sabiex jiġi żgurat li tikkonforma ma’ kwalunkwe kundizzjonijiet rilevanti tal-permess. Sabiex dawk l-ispezzjonijiet ikunu effiċjenti u effettivi, l-awtoritajiet kompetenti jenħtieġ li jkollhom ir-riżorsi xierqa, li jkunu indipendenti mill-operaturi tal-faċilitajiet tal-iskart ikkonċernati, li jkollhom il-funzjonijiet u s-setgħat meħtieġa u li jkunu intitolati għall-assistenza mill-operaturi. L-attivitajiet ta’ spezzjoni jenħtieġ li jkunu jinvolvu wkoll il-kooperazzjoni u l-koordinazzjoni bejn l-awtoritajiet nazzjonali responsabbli biex jiżguraw li l-faċilitajiet tal-iskart fil-ġurisdizzjoni tagħhom jikkonformaw mad-dispożizzjonijiet stabbiliti fid-Direttiva 2006/21/KE. |
(2) |
Sabiex l-ispezzjonijiet ikunu effiċjenti u proattivi, huwa xieraq li jiġu ppjanati minn qabel permezz ta’ pjanijiet ta’ spezzjoni li jirriflettu r-riskji ppreżentati mill-faċilitajiet tal-iskart ikkonċernati. |
(3) |
Billi l-faċilitajiet tal-iskart koperti mill-Artikolu 7 tad-Direttiva 2006/21/KE jinkludu faċilitajiet tal-iskart li suppost ikollhom permess u, billi l-Artikolu 7 jistipula li l-ebda faċilità tal-iskart ma għandha titħalla topera mingħajr permess, jenħtieġ li l-pjanijiet ta’ spezzjoni jieħdu kont ta’ dawk il-faċilitajiet tal-iskart li suppost ikollhom permess iżda li ma għandhomx. |
(4) |
L-Istati Membri jenħtieġ li jżommu marġni ta’ diskrezzjoni fl-applikazzjoni tal-linji gwida ta’ spezzjoni bil-kunsiderazzjoni taċ-ċirkostanzi differenti ta’ kull faċilità tal-iskart, sabiex jiġi żgurat li l-ispezzjonijiet ikunu proporzjonati mar-riskji ambjentali u ta’ sikurezza rilevanti ppreżentati minn kull faċilità tal-iskart. |
(5) |
Sabiex jiġu indirizzati s-sitwazzjonijiet differenti possibbli ta’ nuqqas ta’ konformità mal-permessi, jenħtieġ li jkun hemm provvediment kemm għall-ispezzjonijiet ta’ rutina kif ukoll għall-ispezzjonijiet mhux ta’ rutina biex jirrispondu għal ilmenti, aċċidenti, inċidenti u okkorrenzi serji ta’ nuqqas ta’ konformità. Matul l-ispezzjonijiet, jenħtieġ li l-ispetturi jqisu wkoll is-sejbiet tal-ispezzjonijiet imwettqa skont leġiżlazzjoni applikabbli oħra tal-UE, minħabba li dawk is-sejbiet jistgħu jindikaw problemi possibbli marbuta mar-rekwiżiti tal-permess skont l-Artikolu 7 tad-Direttiva 2006/21/KE. |
(6) |
Sabiex tiġi żgurata l-effettività tal-ispezzjonijiet, huwa meħtieġ li ċertu proporzjon tal-attivitajiet ta’ spezzjoni, u b’mod partikolari taż-żjarat fuq il-post, ikunu għall-għarrieda. |
(7) |
Sabiex ikun possibbli li mill-attivitajiet ta’ spezzjoni joħorġu xi konklużjonijiet, b’mod partikolari miż-żjarat fuq il-post, u biex ikun hemm bażi empirika għal spezzjonijiet futuri u miżuri relatati oħra, huwa importanti li l-attivitajiet ta’ spezzjoni kollha jkunu dokumentati b’mod xieraq, inkluż permezz ta’ rapporti regolari taż-żjarat fuq il-post. |
(8) |
Sabiex tiġi żgurata l-konformità b’mod effettiv mal-kundizzjonijiet tal-permess, huwa importanti li l-ispezzjonijiet jiffaċilitaw u jippermettu kwalunkwe miżuri oħra biex jirrispondu għan-nuqqas ta’ konformità identifikat. |
(9) |
Peress li r-riskji jvarjaw skont l-istadju tal-eżistenza tal-faċilitajiet tal-iskart ikkonċernati, huwa meħtieġ li l-linji gwida tekniċi jkun fihom dispożizzjonijiet dettaljati dwar il-fażijiet tal-ħajja differenti tal-faċilitajiet tal-iskart koperti mill-Artikolu 7 tad-Direttiva 2006/21/KE. |
(10) |
Peress li l-faċilitajiet tal-iskart tal-Kategorija A jippreżentaw riskji potenzjalment ogħla, huwa meħtieġ li l-linji gwida tekniċi jkun fihom dispożizzjonijiet speċifiċi fir-rigward ta’ tali faċilitajiet. |
(11) |
Il-miżuri previsti f’din id-Deċiżjoni huma konformi mal-opinjoni tal-Kumitat stabbilit skont l-Artikolu 23(2) tad-Direttiva 2006/21/KE, |
ADOTTAT DIN ID-DEĊIŻJONI:
Artikolu 1
Il-linji gwida tekniċi għall-ispezzjonijiet tal-faċilitajiet tal-iskart f’konformità mal-Artikolu 17 tad-Direttiva 2006/21/KE stabbiliti fl-Anness ta’ din id-Deċiżjoni huma adottati.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, il-21 ta’ Frar 2020.
Għall-Kummissjoni
Virginijus SINKEVIČIUS
Membru tal-Kummissjoni
ANNESS
LINJI GWIDA TEKNIĊI GĦALL-ISPEZZJONIJIET TAL-FAĊILITAJIET TAL-ISKART
PARTI A
Objettivi
Dawn il-linji gwida jistabbilixxu elementi li għandhom jitqiesu għall-ispezzjonijiet tal-faċilitajiet tal-iskart koperti mill-Artikolu 7 tad-Direttiva 2006/21/KE li għandhom jitwettqu mill-awtoritajiet kompetenti f’konformità mal-Artikolu 17 ta’ dik id-Direttiva. Tali spezzjonijiet għadhom l-għan li jiżguraw li kwalunkwe faċilità tal-iskart tkun kisbet il-permess meħtieġ u tkun konformi mal-kondizzjonijiet rilevanti tal-permess. L-ispezzjonijiet huma marbuta mal-fażijiet tal-ħajja differenti tal-faċilitajiet tal-iskart.
Dawn il-linji gwida jindirizzaw il-qafas ġenerali għat-twettiq tal-ispezzjonijiet (il-Parti C), il-punti fokali tal-ispezzjonijiet għal kull waħda mill-fażijiet ta’ ħajja differenti tal-faċilitajiet tal-iskart (il-Parti D) u l-elementi speċifiċi rilevanti għall-ispezzjoni tal-faċilitajiet ta’ Kategorija A (il-Parti E).
PARTI B
Definizzjoni
Għall-finijiet ta’ dawn il-linji gwida, “spezzjoni” tfisser l-attivitajiet kollha mwettqa minn awtorità kompetenti jew f’isimha sabiex tiżgura l-konformità tal-faċilitajiet tal-iskart koperti mill-Artikolu 7 tad-Direttiva 2006/21/KE mal-kundizzjonijiet tal-permess li jridu jiksbu. Dawn l-attivitajiet jistgħu jinkludu b’mod partikolari:
— |
il-valutazzjoni tal-kwistjonijiet ambjentali u ta’ sikurezza rilevanti u r-riskji ppreżentati mill-faċilitajiet tal-iskart; |
— |
it-twettiq ta’ żjarat fuq il-post għall-kontroll tal-bini, tal-kundizzjonijiet tas-sit, tat-tagħmir rilevanti, inkluż jekk ikunx mantnut b’mod adegwat, tad-dokumenti rilevanti u tad-data elettronika, tal-miżuri u tas-sistemi interni u tal-proċessi ta’ operazzjoni; |
— |
l-intervistar tal-persunal li jaħdem fil-faċilità tal-iskart; |
— |
it-tisħiħ tal-għarfien tal-operaturi dwar ir-rekwiżiti legali rilevanti u l-impatti ambjentali tal-attivitajiet tal-operaturi; |
— |
it-teħid ta’ kampjuni; |
— |
l-użu ta’ tekniki ta’ osservazzjoni tad-dinja u forom oħra ta’ sorveljanza elettronika, inklużi dawk li jinvolvu sensuri in situ, fejn ikun xieraq; |
— |
il-verifika tal-awtomonitoraġġ tal-operatur; |
— |
il-kontroll tad-dokumenti u tad-data elettronika, inkluż ir-rapporti tal-operatur, permezz ta’ modi oħra minbarra ż-żjarat fuq il-post; |
— |
il-kontroll tal-proċessi ta’ operazzjoni, tal-miżuri u tas-sistemi interni tal-operatur, permezz ta’ modi oħra minbarra ż-żjarat fuq il-post; |
— |
il-kontroll tal-garanziji finanzjarji jew l-ekwivalenti tagħhom; |
— |
ir-rekordjar ta’ informazzjoni fattwali dwar in-nuqqas ta’ konformità; |
— |
l-identifikazzjoni tar-raġunijiet għan-nuqqas ta’ konformità identifikat u tat-tipi possibbli ta’ impatti ta’ tali nuqqas ta’ konformità fuq l-ambjent u s-saħħa tal-bniedem; |
— |
id-deskrizzjoni tan-nuqqas ta’ konformità identifikat, b’mod partikolari taċ-ċirkostanzi (inklużi l-persuni) li wasslu għan-nuqqas ta’ konformità, sabiex jiġu identifikati, kemm jista’ jkun, l-azzjonijiet meħtieġa biex tiġi żgurata l-konformità u jiġi permess it-twettiq tagħhom, inkluż permezz tal-kooperazzjoni u tal-kondiviżjoni tas-sejbiet mal-awtoritajiet kompetenti rilevanti l-oħra. |
L-ispezzjonijiet, inklużi ż-żjarat fuq il-post, jistgħu jkunu ta’ rutina, jiġifieri mwettqa bħala parti minn sett regolari ta’ attivitajiet, u mhux ta’ rutina, jiġifieri mwettqa bħala risposta għal ilmenti serji jew għall-investigazzjoni ta’ aċċidenti, inċidenti u okkorrenzi oħra serji ta’ nuqqas ta’ konformità.
PARTI C
Twettiq ta’ kontrolli dettaljati, investigazzjonijiet u ġbir tal-informazzjoni
1. Awtoritajiet kompetenti
Għandhom jitqiesu l-punti li ġejjin:
(a) |
id-disponibbiltà, għat-territorju kollu tal-Istat Membru u għall-firxa sħiħa tal-faċilitajiet tal-iskart koperti mill-Artikolu 7 tad-Direttiva 2006/21/KE, ta’ awtoritajiet kompetenti responsabbli mill-ispezzjonijiet; |
(b) |
l-indipendenza tal-awtoritajiet kompetenti u l-kapaċità tagħhom li jwettqu l-kompiti kollha meħtieġa għat-twettiq tal-ispezzjonijiet; |
(c) |
is-setgħat tal-awtoritajiet kompetenti li jwettqu l-ispezzjonijiet, inkuż id-dritt tagħhom li jidħlu fil-faċilitajiet u jeżaminaw l-assi materjali rilevanti, id-dokument u d-data elettronika rilevanti; |
(d) |
is-suffiċjenza tar-riżorsi, tal-persunal u tat-tagħmir disponibbli għall-awtoritajiet kompetenti biex iwettqu l-ispezzjonijiet; |
(e) |
l-arranġamenti li l-awtoritajiet kompetenti jkollhom fis-seħħ għall-kooperazzjoni u għall-koordinazzjoni tal-attivitajiet tagħhom ma’ awtoritajiet rilevanti oħra, b’mod partikolari ma’ awtoritajiet oħra li għandhom responsabbiltajiet fir-rigward tal-konformità mal-permessi meħtieġa skont il-leġiżlazzjoni nazzjonali jew skont il-leġiżlazzjoni ambjentali tal-Unjoni li hija applikabbli jew rilevanti għall-faċilitajiet koperti mill-Artikolu 7 tad-Direttiva 2006/21/KE; |
(f) |
il-livell ta’ għarfien, esperjenza u kompetenza li l-ispetturi jeħtieġu biex iwettqu l-ispezzjonijiet, b’mod partikolari fir-rigward tad-disinn, tal-bini, tal-operazzjoni u tal-għeluq tal-faċilitajiet tal-iskart; |
(g) |
l-organizzazzjoni tat-taħriġ biex jiġi aġġornat l-għarfien tal-ispetturi; |
(h) |
l-assistenza meħtieġa li l-operaturi jridu jipprovdu lill-awtoritajiet kompetenti biex jippermettulhom iwettqu l-ispezzjonijiet, inklużi ż-żjarat fuq il-post, it-teħid tal-kampjuni u l-ġbir tal-informazzjoni għat-twettiq ta’ dmirijiethom skont l-Artikolu 17 tad-Direttiva 2006/21/KE. |
Huma u jwettqu l-ispezzjonijiet, l-awtoritajiet kompetenti jistgħu jiġu assistiti minn esperti indipendenti f’konformità mal-leġiżlazzjoni nazzjonali u jistgħu jiddelegaw il-kompiti ta’ spezzjoni lilhom, sakemm l-esperti joperaw taħt is-sorveljanza tal-awtorità kompetenti. L-awtorità kompetenti għandha tiddetermina l-kwalifiki minimi tal-esperti u għandha tivvaluta jekk dawk il-kwalifiki jiġux issodisfati. L-awtorità kompetenti għandha tivverifika wkoll li l-esperti ma jkollhom l-ebda interess personali fl-eżitu tal-ispezzjoni.
2. Organizzazzjoni tal-ispezzjonijiet
2.1.
Għandhom jitqiesu l-punti li ġejjin:
(a) |
l-ippjanar minn qabel tal-ispezzjonijiet permezz ta’ pjan jew pjanijiet stabbiliti fil-livell amministrattiv xieraq abbażi ta’ valutazzjoni ġenerali tal-kwistjonijiet ambjentali u ta’ sikurezza rilevanti u tar-riskji tal-faċilitajiet tal-iskart u, fejn diġà jkun hemm disponibbli informazzjoni dwar il-konformità, abbażi ta’ valutazzjoni ġenerali tal-istat ta’ konformità tal-faċilitajiet tal-iskart li joperaw fiż-żona tal-pjan. Tali pjanijiet jistgħu jiġu integrati jew ikkombinati ma’ pjanijiet ta’ spezzjoni oħra fejn jitqies xieraq; |
(b) |
ir-rieżami perjodiku u, fejn xieraq, l-aġġornament tal-pjan jew tal-pjanijiet tal-ispezzjoni; |
(c) |
il-kopertura fil-pjan jew fil-pjanijiet ta’ spezzjoni ta’ kull faċilità tal-iskart skont l-Artikolu 7 tad-Direttiva 2006/21/KE; |
(d) |
l-inklużjoni f’kull pjan ta’ spezzjoni ta’ dawn li ġejjin:
|
2.2.
Għandhom jitqiesu l-punti li ġejjin:
(a) |
it-twettiq ta’ spezzjonijiet ta’ rutina f’intervalli regolari abbażi ta’ valutazzjoni xierqa tar-riskju tal-faċilità tal-iskart ikkonċernata; |
(b) |
frekwenza adegwata ta’ żjarat fuq il-post abbażi ta’ valutazzjoni xierqa tar-riskju tal-faċilità tal-iskart ikkonċernata, li tirrifletti wkoll ir-riskji potenzjalment ogħla tal-faċilitajiet tal-Kategorija A; |
(c) |
l-applikazzjoni tal-kriterji li ġejjin għall-valutazzjoni tar-riskju tal-faċilitajiet tal-iskart:
|
(d) |
it-teħid ta’ noti mill-ispettur, fejn xieraq, tas-sejbiet rilevanti tal-ispezzjonijiet imwettqa skont leġiżlazzjoni applikabbli oħra tal-Unjoni; |
(e) |
l-għoti lill-operatur tal-skeda taż-żjara u tad-dettalji tal-informazzjoni, u ta’ kwalunkwe assistenza oħra li l-operatur ikun mitlub jipprovdi, meta ż-żjarat fuq il-post jiġu mħabbra minn qabel; |
(f) |
f’każ li jinstab nuqqas ta’ konformità jew riskju fejn tidħol il-konformità, titwettaq investigazzjoni u, kif xieraq, ir-riżultati jiġu kondiviżi mal-awtoritajiet l-oħrajn, b’mod partikolari bil-ħsieb li:
|
(g) |
f’każ li jiġi sospiż l-operat ta’ faċilità tal-iskart minħabba nuqqas ta’ konformità mal-kundizzjonijiet tal-permess, jitwettqu attivitajiet ta’ spezzjoni ulterjuri bil-għan li jinkisbu r-riżultati ambjentali u r-riżultati l-oħra li kellhom jinkisbu mill-kundizzjonijiet tal-permess. |
2.3.
Għandhom jitqiesu l-punti li ġejjin:
(a) |
it-twettiq ta’ spezzjonijiet mhux ta’ rutina, inklużi ż-żjarat fuq il-post, isir kemm jista’ jkun malajr wara li l-awtorità kompetenti tirċievi lmenti serji dwar nuqqas ta’ konformità mar-rekwiżiti tal-permess jew inkella wara li ssir taf b’aċċidenti, inċidenti jew okkorrenzi serji ta’ nuqqas ta’ konformità, irrispettivament minn jekk huwa meħtieġ li tali avvenimenti jiġu nnotifikati skont l-Artikolu 11(3) jew l-Artikolu 12(6) tad-Direttiva 2006/21/KE, b’mod partikolari bil-ħsieb li:
|
(b) |
it-teħid ta’ noti mill-ispettur, fejn xieraq, tas-sejbiet rilevanti tal-ispezzjonijiet imwettqa skont leġiżlazzjoni applikabbli oħra tal-Unjoni; |
(c) |
it-twettiq ta’ spezzjonijiet mhux ta’ rutina kemm jista’ jkun malajr fir-rigward tar-rikonsiderazzjoni jew tal-aġġornament ta’ permess u fejn applikabbli li dawn jitwettqu qabilhom. |
2.4.
Għandhom jitqiesu l-punti li ġejjin:
(a) |
it-twettiq ta’ għadd xieraq ta’ żjarat fuq il-post għal għarrieda, b’mod partikolari jekk dawn ikunu rilevanti għall-identifikazzjoni tal-problemi jew tal-esponiment għar-riskju jew tal-ħtieġa li jkun hemm reazzjoni għal sitwazzjoni urġenti; |
(b) |
l-indirizzar, fid-deċiżjonijiet dwar iż-żjarat fuq il-post għal għarrieda, tat-tħassib dwar is-saħħa u s-sikurezza u l-ħtieġa possibbli li jkun hemm persunal operazzjonali tal-faċilità tal-iskart fuq il-post, sakemm dan ikun prattikabbli. |
3. Dokumentazzjoni tal-ispezzjonijiet
3.1.
Għandhom jitqiesu l-punti li ġejjin:
(a) |
id-dokumentazzjoni xierqa tal-attivitajiet kollha ta’ spezzjoni; |
(b) |
il-preparazzjoni, wara kull żjara fuq il-post f’faċilità tal-iskart, ta’ rapport taż-żjara fuq il-post li jiġi rreġistrat bil-miktub u li jinħażen f’forma identifikabbli f’bażi tad-data faċilment aċċessibbli u miżmuma b’mod xieraq; |
(c) |
l-inklużjoni fir-rapport taż-żjara fuq il-post ta’ mill-inqas l-iskop tal-ispezzjoni, id-data, l-informazzjoni u s-sejbiet miġbura, l-evalwazzjoni tagħhom u l-konklużjoni dwar jekk il-faċilità tal-iskart tikkonformax mal-kundizzjonijiet rilevanti tal-permess u jekk għandhiex issegwi kwalunkwe azzjoni ulterjuri; |
(d) |
it-tlestija tar-rapport taż-żjara fuq il-post fi żmien xahrejn wara ż-żjara fuq il-post, sakemm ma jkunux saru sejbiet aktar serji matul iż-żjara fuq il-post, f’liema każ tista’ tkun meħtieġa skadenza oħra; |
(e) |
l-għoti tal-opportunità lill-operatur li jissottometti kummenti, fejn xieraq, qabel jew wara l-finalizzazzjoni tar-rapport taż-żjara fuq il-post; |
(f) |
it-tqegħid għad-disponibbiltà tal-pubbliku tar-riżultati taż-żjara fuq il-post u, fejn xieraq, tal-attivitajiet ta’ spezzjoni oħra, f’konformità mad-Direttiva 2003/4/KE tal-Parlament Ewropew u tal-Kunsill (2). |
PARTI D
Punti fokali tal-ispezzjonijiet matul il-fażijiet ta’ ħajja differenti tal-faċilitajiet tal-iskart
1. Spezzjonijiet tal-faċilitajiet tal-iskart il-ġodda qabel il-bidu tal-operazzjonijiet ta’ depożitu
Għall-iskopijiet tal-ispezzjoni għandhom jitqiesu l-punti li ġejjin:
(a) |
l-implimentazzjoni tal-miżuri meħuda sabiex jiġi minimizzat l-impatt ambjentali matul l-operazzjoni u wara l-għeluq, inkluż, jekk ikun meħtieġ, it-trattament tal-ilma kkontaminat u tal-lissija; |
(b) |
il-konformità tal-post, tad-disinn u tal-bini tal-faċilità tal-iskart mal-elementi ta’ sikurezza u tal-ambjent li hemm fil-permess; |
(c) |
il-kontenut, id-disponibbiltà u l-prestazzjoni tas-sistema ta’ awtomonitoraġġ għall-monitoraġġ regolari u għall-awtospezzjonijiet mill-operaturi kif ukoll tar-rapportar ippjanat tad-data ta’ monitoraġġ lill-awtorità kompetenti; |
(d) |
l-implimentazzjoni tal-ġestjoni, tal-manutenzjoni u tal-miżuri ta’ sorveljanza ppjanati biex tiġi żgurata l-istabbiltà fiżika tal-faċilità u għall-prevenzjoni tat-tniġġis u tal-kontaminazzjoni tal-ħamrija, tal-arja, tal-ilma tal-wiċċ jew tal-ilma ta’ taħt l-art fuq medda qasira u twila ta’ żmien kif ukoll sabiex tiġi minimizzata kemm jista’ jkun il-ħsara fuq il-pajsaġġ; |
(e) |
id-disponibbiltà ta’ riżorsi umani suffiċjenti u l-kompetenza tal-persunal inkarigat mill-ġestjoni ambjentali u s-sikurezza tal-faċilità tal-iskart; |
(f) |
l-adegwatezza tal-pjan għall-għeluq imsemmi fl-Artikolu 5(3)(f) tad-Direttiva 2006/21/KE; |
(g) |
l-adegwatezza tal-garanzija finanzjarja jew l-ekwivalenti tagħha fir-rigward tal-ammont u l-forma tagħha, fejn l-awtorità kompetenti tkun teħtieġ garanzija finanzjarja jew l-ekwivalenti tagħha; jekk ikunx meħtieġ li l-klassifikazzjoni tal-faċilità tal-iskart bħala faċilità tal-Kategorija A jew mhux faċilità tal-Kategorija A tiġi rieżaminata u vverifikata; |
(h) |
il-konformità ma’ kwalunkwe kundizzjoni oħra tal-permess u kwalunkwe rekwiżiti rilevanti oħra stabbiliti fid-Direttiva 2006/21/KE. |
2. Spezzjonijiet tal-faċilitajiet tal-iskart li qed jitħaddmu
Għall-iskopijiet tal-ispezzjoni għandhom jitqiesu l-punti li ġejjin:
(a) |
l-effetti negattivi tal-faċilità tal-iskart fuq l-ambjent u s-saħħa tal-bniedem u l-miżuri meħuda biex jiġi minimizzat l-impatt ambjentali; b’mod partikolari, l-adegwatezza tal-bini, tal-ġestjoni u tal-manutenzjoni tal-faċilità tal-iskart sabiex tiġi żgurata l-istabbiltà fiżika tagħha u għall-prevenzjoni tat-tniġġis u tal-kontaminazzjoni tal-ħamrija, tal-arja, tal-ilma tal-wiċċ jew tal-ilma ta’ taħt l-art fuq medda qasira u twila ta’ żmien kif ukoll sabiex tiġi minimizzata kemm jista’ jkun il-ħsara fuq il-pajsaġġ u kif dawn l-effetti jikkorrispondu mal-kundizzjonijiet tal-permess u mal-informazzjoni fil-valutazzjoni tal-impatt ambjentali jekk tali valutazzjoni tkun meħtieġa; |
(b) |
il-konformità tal-kwantitajiet, tal-karatteristiċi u tal-klassifikazzjoni tal-iskart depożitat fil-faċilità tal-iskart mal-elementi li hemm fil-permess; |
(c) |
il-konformità tal-ġenerazzjoni tal-lissija stmata, inkluż il-kontenut ta’ kontaminant tal-lissija, tal-iskart depożitat, u tal-bilanċ tal-ilma tal-faċilità tal-iskart mal-elementi li hemm fil-permess; |
(d) |
il-bidliet strutturali u operazzjonali tal-faċilità tal-iskart: il-kontroll (1) tal-ġestjoni tal-ilma, (2) tal-kwalità tal-attivitajiet tal-bini ġeotekniku (eż. bini ta’ diga ogħla/ta’ imbankment), (3) tal-ġestjoni ta’ sistemi ta’ sikurezza ġeotekniċi (eż. il-kisi tal-wiċċ, il-monitoraġġ tal-istabbiltà u tas-sikurezza), (4) tal-kwantitajiet u tal-karatteristiċi tal-iskart depożitat meta mqabbel mat-tbassir fil-pjan ta’ ġestjoni tal-iskart, (5) tal-ġenerazzjoni tal-lissija, inkluż il-kontenut kontaminanti tal-lissija meta mqabbel mat-tbassir fil-pjan ta’ ġestjoni tal-iskart, (6) tal-bilanċ tal-ilma tal-faċilità tal-iskart meta mqabbel mat-tbassir fil-pjan ta’ ġestjoni tal-iskart, u (7) tat-tekniki użati għall-ġestjoni tal-ambjent u tas-sikurezza u għall-monitoraġġ tal-ambjent u l-adegwatezza tagħhom; |
(e) |
l-adozzjoni ta’ miżuri rakkomandati jew imposti wara spezzjonijiet preċedenti; |
(f) |
ir-rapporti u d-dikjarazzjonijiet tal-awditjar ambjentali u tas-sikurezza jekk ikunu meħtieġa fil-permess; |
(g) |
ir-riżultati, il-kompletezza, il-ġestjoni u l-prestazzjoni tal-programm ta’ awtomonitoraġġ għall-monitoraġġ regolari u tar-rapportar tad-data ta’ monitoraġġ kollha (jekk applikabbli) lill-awtorità kompetenti; |
(h) |
l-anormalitajiet viżivi tas-sit; |
(i) |
ir-rappreżentattività tat-teħid tal-kampjuni u tal-karatterizzazzjoni tal-iskart mill-estrazzjoni; |
(j) |
ir-rwoli, ir-responsabbiltajiet u l-kompetenza tal-persunal inkarigat mill-ġestjoni ambjentali u tas-sikurezza tal-faċilità tal-iskart kif ukoll id-disponibbiltà ta’ riżorsi umani u taħriġ suffiċjenti pprovdut lill-persunal; |
(k) |
il-proċeduri għan-notifika tal-awtorità kompetenti dwar kwalunkwe avveniment li x’aktarx jaffettwa l-istabbiltà tal-faċilità tal-iskart, u dwar kwalunkwe effett ambjentali negattiv sinifikanti żvelat mill-proċeduri ta’ kontroll u ta’ monitoraġġ rilevanti; |
(l) |
l-adegwatezza tal-pjan għall-għeluq imsemmi fl-Artikolu 5(3)(f) tad-Direttiva 2006/21/KE u l-konformità ma’ kwalunkwe miżuri ta’ għeluq progressiv speċifikati fil-pjan; |
(m) |
l-adegwatezza tal-ammont u tal-għamla tal-garanzija finanzjarja jew l-ekwivalenti tagħha fir-rigward tal-kostijiet ikkalkolati għall-obbligi tal-operatur skont dan il-permess, inkluż l-arranġamenti tal-għeluq u ta’ wara l-għeluq u r-riabilitazzjoni tal-art affettwata, fejn l-awtorità kompetenti teħtieġ garanzija finanzjarja jew l-ekwivalenti tagħha; |
(n) |
il-klassifikazzjoni tal-faċilità tal-iskart bħala faċilità tal-Kategorija A jew mhux faċilità tal-Kategorija A; |
(o) |
il-konformità ma’ kwalunkwe kundizzjoni oħra tal-permess u kwalunkwe rekwiżiti rilevanti oħra stabbiliti fid-Direttiva 2006/21/KE. |
3. Żjara finali fuq il-post tal-faċilitajiet tal-iskart f’konformità mal-Artikolu 12(3) tad-Direttiva 2006/21/KE
Għall-iskopijiet tal-ispezzjoni għandhom jitqiesu l-punti li ġejjin:
(a) |
l-effetti negattivi fuq l-ambjent u fuq is-saħħa tal-bniedem mill-faċilità tal-iskart u l-miżuri meħuda sabiex jitnaqqas tali impatt wara l-għeluq, inkluż, jekk meħtieġ, it-trattament tal-ilma kkontaminat u tal-lissija; |
(b) |
l-implimentazzjoni tal-pjan għall-għeluq imsemmi fl-Artikolu 5(3)(f) tad-Direttiva 2006/21/KE; |
(c) |
ir-riabilitazzjoni tal-art affettwata mill-faċilità ta’ skart; |
(d) |
l-adegwatezza tal-pjan u tal-arranġamenti għall-manutenzjoni, għall-monitoraġġ, għall-kontroll u għall-miżuri korrettivi fil-fażi ta’ wara l-għeluq tal-faċilità tal-iskart, inkluż il-funzjonament u l-adegwatezza tat-tagħmir ta’ monitoraġġ, ta’ sorveljanza u ta’ kontroll; |
(e) |
l-adegwatezza tal-ammont u tal-għamla tal-garanzija finanzjarja jew l-ekwivalenti tagħha fir-rigward tal-kostijiet ikkalkolati għall-obbligi tal-operatur skont dan il-permess, inkluż it-tlestija tal-għeluq u ta’ wara l-għeluq u r-riabilitazzjoni rimanenti tal-art affettwata, fejn l-awtorità kompetenti teħtieġ garanzija finanzjarja jew l-ekwivalenti tagħha; |
(f) |
il-klassifikazzjoni tal-faċilità tal-iskart bħala faċilità tal-kategorija A jew mhux faċilità tal-kategorija A; |
(g) |
il-konformità ma’ kwalunkwe kundizzjoni oħra tal-permess u ma’ kwalunkwe rekwiżiti rilevanti oħra stabbiliti fid-Direttiva 2006/21/KE; |
4. Spezzjonijiet tal-faċilitajiet tal-iskart wara l-għeluq, fir-rigward tal-faċilitajiet li ngħalqu wara l-1 ta’ Mejju 2008
Għall-iskopijiet tal-ispezzjoni għandhom jitqiesu l-punti li ġejjin:
(a) |
l-effetti negattivi fuq l-ambjent u fuq is-saħħa tal-bniedem mill-faċilità tal-iskart u l-miżuri meħuda sabiex jitnaqqas tali impatt wara l-għeluq, inkluż, jekk meħtieġ, it-trattament tal-ilma kkontaminat u tal-lissija |
(b) |
il-korrispondenza bejn, minn naħa waħda, l-effetti avversi msemmija fil-punt (a) u, min-naħa l-oħra, il-kundizzjonijiet tal-permess u l-informazzjoni fil-valutazzjoni tal-impatt ambjentali, jekk ikunu meħtieġa; |
(c) |
il-konformità tal-ġenerazzjoni tal-lissija, inkluż il-kontenut ta’ kontaminant tal-lissija, tal-iskart depożitat, u tal-bilanċ tal-ilma tal-faċilità tal-iskart, u jekk ikun meħtieġ, it-trattament tal-ilma kkontaminat u tal-lissija mal-elementi li hemm fil-permess; |
(d) |
l-implimentazzjoni tal-pjan għall-għeluq imsemmi fl-Artikolu 5(3)(f) tad-Direttiva 2006/21/KE; |
(e) |
l-adegwatezza tal-pjan għall-għeluq imsemmi fl-Artikolu 5(3)(f) tad-Direttiva 2006/21/KE, b’mod partikolari fir-rigward tal-ħtieġa għal miżuri ta’ għeluq u ta’ riabilitazzjoni addizzjonali bbażati fuq valutazzjoni tar-riskju u tal-impatt ambjentali; |
(f) |
ir-riabilitazzjoni tal-art affettwata mill-faċilità ta’ skart; l-adegwatezza tal-pjan u tal-arranġamenti għall-manutenzjoni, għall-monitoraġġ, għall-kontroll u għall-miżuri korrettivi fil-fażi ta’ wara l-għeluq tal-faċilità tal-iskart, inkluż il-funzjonament u l-adegwatezza tat-tagħmir ta’ monitoraġġ, ta’ sorveljanza u ta’ kontroll, u l-irrapportar tad-data ta’ monitoraġġ kollha lill-awtorità kompetenti; |
(g) |
il-proċedura għan-notifika tal-awtorità kompetenti dwar kwalunkwe avveniment jew żviluppi li x’aktarx jaffettwaw l-istabbiltà tal-faċilità tal-iskart, u dwar kwalunkwe effett ambjentali negattiv sinifikanti żvelat mill-proċeduri ta’ kontroll u ta’ monitoraġġ rilevanti; |
(h) |
l-adegwatezza tal-ammont u tal-forma tal-garanzija finanzjarja jew l-ekwivalenti tagħha fir-rigward tal-kostijiet tal-obbligi skont dan il-permess, inklużi t-tlestija tal-arranġamenti ta’ wara l-għeluq, il-miżuri korrettivi u r-riabilitazzjoni tal-art affettwata, fejn l-awtorità kompetenti teħtieġ garanzija finanzjarja jew l-ekwivalenti tagħha; |
(i) |
il-klassifikazzjoni tal-faċilità tal-iskart bħala faċilità tal-kategorija A jew mhux faċilità tal-kategorija A; |
(j) |
il-konformità ma’ kwalunkwe kundizzjoni oħra tal-permess u kwalunkwe rekwiżiti rilevanti oħra stabbiliti fid-Direttiva 2006/21/KE. |
PARTI E
Elementi addizzjonali għall-ispezzjonijiet tal-faċilitajiet tal-iskart tal-Kategorija A
1. Spezzjoni ta’ digi tal-faċilitajiet tal-iskart tal-Kategorija A li jkun fihom iż-żwiel
Flimkien mal-elementi rilevanti elenkati fil-Parti D, għandhom jitqiesu l-punti li ġejjin mill-ispettur meta l-ispezzjoni tirrigwarda d-digi tal-faċilitajiet tal-iskart tal-Kategorija A li jkun fihom iż-żwiel:
(a) |
it-tip u l-kundizzjoni tal-protezzjoni kontra l-erożjoni; |
(b) |
l-adegwatezza tad-disinn idroloġiku, bħall-bilanċ tal-ilma, il-bord disponibbli (id-distanza vertikali (l-għoli) bejn il-livell massimu ta’ operazzjoni normali ta’ għadira u l-quċċata tad-diga); |
(c) |
l-għamla, l-istat u l-integrità strutturali tal-bajja, bħall-preżenza ta’ dipressjonijiet, id-densità taż-żwiel, il-kontroll tat-trab; |
(d) |
il-bidliet fil-quċċata u fl-inklinazzjoni tad-diga meta jitqabbel l-istat attwali mal-istat tad-disinn; |
(e) |
il-funzjonament u l-kundizzjoni tas-sistema tad-drenaġġ, l-istat u l-istrutturi ġeotekniċi tagħha (bħall-ġeomembrani, digi) u t-tagħmir (bħall-monitoraġġ tal-istruttura tad-diga); |
(f) |
iż-żoni ta’ tnixxija, u l-ammont ta’ materjal imnixxi; |
(g) |
kwalunkwe ħsara identifikata; |
(h) |
is-siġar u l-veġetazzjoni fuq id-diga; |
2. Spezzjoni tal-arranġamenti ta’ skariku tal-faċilitajiet tal-iskart tal-Kategorija A li jkun fihom iż-żwiel
Flimkien mal-elementi rilevanti elenkati fil-Parti D, għandhom jitqiesu l-punti li ġejjin mill-ispettur meta l-ispezzjoni tirrigwarda l-arranġamenti ta’ skariku tal-faċilitajiet tal-iskart tal-Kategorija A li jkun fihom iż-żwiel u l-funzjonament ta’ tali arranġamenti ta’ skariku:
(a) |
l-adegwatezza tal-aċċess għal-linji ta’ skariku u għall-punti ta’ skariku; |
(b) |
il-ħsarat tat-tagħmir tal-kostruzzjoni u tal-kontroll; |
(c) |
it-tnixxija mill-arranġamenti ta’ skariku u madwarhom; |
(d) |
l-erożjoni tal-iżbokk downstream; |
(e) |
il-veġetazzjoni fl-arranġamenti ta’ skariku jew qribhom; |
(f) |
it-tagħmir ta’ regolazzjoni tal-iskariku; |
(g) |
l-arranġamenti ta’ skariku ta’ emerġenza; |
(h) |
il-provvista tal-enerġija ta’ riżerva; |
(i) |
ir-rata taż-żieda tal-iskariku fl-għadira taż-żwiel u r-rata taż-żieda tal-livell tal-għadira (imkejla f’metri/sena); |
(j) |
is-sistema ta’ distribuzzjoni taż-żwiel; |
(k) |
is-sistema tal-ġestjoni tal-ilma. |
3. Spezzjonijiet tal-faċilitajiet tal-iskart tal-Kategorija A li jkun fihom skart tal-ġebel
Flimkien mal-elementi rilevanti elenkati fil-Parti D, għandhom jitqiesu l-punti li ġejjin mill-ispettur meta l-ispezzjoni tirrigwarda l-faċilitajiet tal-iskart tal-Kategorija A li jkun fihom skart tal-ġebel:
(a) |
l-esponiment tal-blat għall-kundizzjonijiet tat-temp; |
(b) |
il-kwalità u l-kwantità tal-ilma tat-tnixxija; |
(c) |
jekk il-miżuri meħuda biex jiġu minimizzati l-impatti ambjentali tal-faċilitajiet tal-iskart tal-ġebel humiex adegwati; |
(d) |
il-korrettezza u l-effikaċja tal-attivitajiet ta’ tkabbir mill-ġdid abbażi tal-obbligi ġuridiċi rilevanti. |
(1) http://eippcb.jrc.ec.europa.eu/reference/BREF/jrc109657_mwei_bref_-_for_pubsy_online.pdf
(2) Id-Direttiva 2003/4/KE tal-Parlament Ewropew u tal-Kunsill tat-28 ta’ Jannar 2003 dwar l-aċċess pubbliku għat-tagħrif ambjentali u li tħassar id-Direttiva tal-Kunsill 90/313/KEE (ĠU L 41, 14.2.2003, p. 26).