(1)

Ir-Regolament (UE) 2017/625 jistabbilixxi r-regoli dwar it-twettiq ta' kontrolli uffiċjali mill-awtoritajiet kompetenti tal-Istati Membri fuq annimali u oġġetti li jidħlu fl-Unjoni sabiex jivverifikaw il-konformità mal-leġiżlazzjoni tal-katina agroalimentari tal-Unjoni.

(2)

L-Artikolu 5(4) tar-Regolament (UE) 2017/625 jirrikjedi li l-impjegati kollha li jwettqu l-kontrolli uffiċjali u attivitajiet uffiċjali oħra jeħtiġilhom jirċievu taħriġ xieraq għall-qasam ta' kompetenza tagħhom. Il-Kapitolu I tal-Anness II tar-Regolament (UE) 2017/625 jistabbilixxi s-suġġetti għat-taħriġ tal-persunal li jwettaq il-kontrolli uffiċjali u attivitajiet uffiċjali oħra.

(3)

L-Artikolu 21(2)(c) tar-Regolament (UE) 2017/625 jesiġi li l-awtoritajiet kompetenti jwettqu l-kontrolli uffiċjali fuq l-annimali li jiġu ppreżentati fil-postijiet ta' kontroll fuq il-fruntiera biex jivverifikaw il-konformità mar-rekwiżiti tat-trattament xieraq tal-annimali u b'mod partikolari mar-regoli li japplikaw għat-trasport tagħhom fl-Unjoni. It-tali kontrolli uffiċjali jridu jinkludu l-kontrolli dwar l-istat ta' saħħa tal-annimali li jkunu qed jiġu ttrasportati u fuq il-mezz ta' trasport.

(4)

L-Artikolu 21(3) tar-Regolament (UE) 2017/625 jirrikjedi li matul it-twettiq tal-kontrolli uffiċjali l-awtoritajiet kompetenti jieħdu l-miżuri meħtieġa biex jipprevjenu jew inaqqsu għall-minimu kwalunkwe dewmien bejn it-tagħbija tal-annimali u t-tluq tagħhom. Jekk l-annimali jkollhom jinżammu waqt it-trasport għal aktar minn sagħtejn, l-awtoritajiet kompetenti jridu jiżguraw li jsiru arranġamenti xierqa għall-kura tal-annimali u, fejn neċessarju, it-tmiegħ, it-tisqija, il-ħatt u l-akkommodazzjoni tagħhom. Għalhekk jixraq li l-persunal li jassisti lill-veterinarju uffiċjali fit-twettiq tal-kontrolli fiżiċi fuq l-annimali fil-postijiet tal-kontroll fuq il-fruntiera jkun imħarreġ b'mod speċifiku għal dak l-iskop.

(5)

L-Artikolu 47(1) tar-Regolament (UE) 2017/625 jipprevedi li ċerti kategoriji ta' annimali u ta' oġġetti ġejjin minn pajjiżi terzi għandhom ikunu soġġetti għall-kontrolli uffiċjali fil-post ta' kontroll fuq il-fruntiera tal-ewwel wasla fl-Unjoni. Skont l-Artikolu 49(1) ta' dak ir-Regolament, dawn il-kontrolli uffiċjali għandhom jinkludu l-kontrolli tad-dokumenti, il-kontrolli tal-identità kif ukoll il-kontrolli fiżiċi.

(6)

L-Artikolu 49(2) tar-Regolament (UE) 2017/625 jipprevedi li meta l-kontrolli fiżiċi jikkonċernaw annimali, minbarra l-annimali akkwatiċi, jew laħam u ġewwieni li jittiekel, il-kontrolli fiżiċi għandhom jitwettqu minn veterinarju uffiċjali. Il-veterinarju uffiċjali jista' jkun assistit minn persunal imħarreġ f'materji veterinarji skont ir-rekwiżiti stabbiliti f'dak ir-Regolament, u maħtur mill-awtoritajiet kompetenti għal dak l-iskop. Dan jipprevedi wkoll li l-kontrolli fiżiċi għandhom jitwettqu minn veterinarju uffiċjali jew minn persunal imħarreġ skont ir-rekwiżiti stabbiliti b'dak ir-Regolament u maħtur mill-awtoritajiet kompetenti għal dak l-iskop meta dawk il-kontrolli jikkonċernaw annimali akkwatiċi, prodotti li joriġinaw mill-annimali, minbarra laħam u ġewwieni li jittiekel, prodotti ġerminali jew prodotti sekondarji tal-annimali.

(7)

Għaldaqstant, jeħtieġ li l-persunal li jwettaq il-kontrolli fiżiċi bħala parti mill-kontrolli uffiċjali fuq l-annimali u fuq ċerti kategoriji ta' oġġetti fil-postijiet ta' kontroll fuq il-fruntiera jkun imħarreġ b'mod aktar speċifiku għal dak l-iskop. Jenħtieġ li t-taħriġ jiżgura li dawn il-kontrolli fiżiċi jitwettqu bl-istess livell ta' kompetenza fil-postijiet kollha ta' kontroll fuq il-fruntiera.

(8)

Id-Direttiva 2005/36/KE tal-Parlament Ewropew u tal-Kunsill (2) tistabbilixxi programm dettaljat ta' studju għall-kirurgi veterinarji. Dan il-programm ta' studju jinkludi suġġetti bħall-anatomija, il-patoloġija, il-parassitoloġija, il-mediċina klinika, il-mediċina veterinarja statali u s-saħħa pubblika, il-leġiżlazzjoni veterinarja, il-produzzjoni ta' annimali u l-iġjene tal-ikel (spezzjoni u kontrolli ta' oġġetti tal-ikel li joriġinaw mill-annimali, iġjene tal-ikel u teknoloġija u xogħol prattiku, inkluż xogħol prattiku fil-postijiet fejn iseħħ il-qtil tal-annimali u l-ipproċessar tal-oġġetti tal-ikel). L-għarfien ta' dawn is-suġġetti huwa meħtieġ għat-twettiq kompetenti tal-kontrolli fiżiċi fuq l-annimali, fuq prodotti li joriġinaw mill-annimali, fuq prodotti ġerminali u fuq prodotti sekondarji tal-annimali. Għalhekk jixraq li jiġu stabbiliti rekwiżiti speċifiċi għat-taħriġ tal-persunal, minbarra l-veterinarji uffiċjali, biex dawn jilħqu l-istandard ta' prestazzjoni meħtieġ. Fil-preżent, ma ġiet identifikata l-ebda ħtieġa għall-introduzzjoni ta' rekwiżiti speċifiċi għat-taħriġ tal-uffiċjali tas-saħħa tal-pjanti li jmorru lil hinn mir-rekwiżiti eżistenti. Għalhekk, mhux meħtieġ li l-veterinarji uffiċjali u l-uffiċjali tas-saħħa tal-pjanti uffiċjali jidħlu fil-kamp ta' applikazzjoni ta' dan ir-Regolament.

(9)

Jenħtieġ li l-Istati Membri jitħallew jaħtru persunal li, għalkemm ma segwiex il-programm ta' taħriġ skont dan ir-Regolament, lesta l-attivitajiet ta' taħriġ jew il-programmi għall-iskambju ta' persunal imsemmija fl-Artikolu 130 tar-Regolament (UE) 2017/625, bil-kundizzjoni li dawn l-attivitajiet jew programmi jkopru l-istess suġġetti bħal dawk meħtieġa minn dan ir-Regolament.

(10)

Id-Deċiżjoni tal-Kummissjoni 93/352/KEE (3) tistipula r-regoli dwar il-ħatra ta' aġent uffiċjali, li jkun speċifikament imħarreġ biex iwettaq kontrolli fuq il-ħut fil-postijiet ta' spezzjoni fuq il-fruntiera li jinsabu fil-portijiet fejn jinħatt il-ħut. Billi l-kamp ta' applikazzjoni ta' dik id-Deċiżjoni huwa kopert mir-Regolament (UE) 2017/625 u r-rekwiżiti tat-taħriġ huma stabbiliti f'dan ir-Regolament, din jenħtieġ li titħassar.

(11)

Ir-Regolament (UE) 2017/625 japplika mill-14 ta' Diċembru 2019. Għaldaqstant, ir-regoli stabbiliti b'dan ir-Regolament jenħtieġ li japplikaw ukoll minn dik id-data,