ANNESS

LI JISTABBILIXXI L-ISPEĊIFIKAZZJONIJIET TEKNIĊI U L-PROĊEDURI MSEMMIJA FL-ARTIKOLU 1

1. Suġġett

Is-sistema ta' Interkonnessjoni tar-Reġistri ta' Insolvenza (IRI) hija sistema deċentralizzata li tgħaqqad ir-reġistri nazzjonali u l-Portal Ewropew tal-Ġustizzja Elettronika. IRI sservi bħala servizz ta' tiftix ċentrali li jagħti aċċess għall-informazzjoni obbligatorja kollha dwar l-insolvenza stabbilita bir-Regolament (UE) 2015/848 flimkien ma' kwalunkwe informazzjoni jew dokumenti oħra inklużi fir-reġistri nazzjonali.

2. Definizzjonijiet

(a)	“HyperText Transport Protocol Secure” jew “HTTPS” tfisser komunikazzjoni kriptata u kanali ta' konnessjoni sikuri;

(b)

“Rekord ta' insolvenza” tfisser is-sett ta' informazzjoni dwar proċedimenti ta' insolvenza ta' debitur wieħed imsemmi fl-Artikolu 24 tar-Regolament (UE) 2015/848 li jrid jiġi ppubblikat fir-reġistri ta' insolvenza elettroniċi nazzjonali u disponibbli mill-punt ta' aċċess elettroniku pubbliku ċentrali (il-Portal Ewropew tal-Ġustizzja Elettronika), kif stabbilit fl-Artikolu 25 tar-Regolament (UE) 2015/848;

(c)	“Terminal RI ta' SM” tfisser is-sors tal-informazzjoni ta' rekord ta' insolvenza; jaġixxi bħala sid din l-informazzjoni, terminal RI ta' SM jiġi kkonsultat mill-Portal tal-Ġustizzja Elettronika u jipprovdi d-data mitluba;

(d)	“Numru ta' Reġistrazzjoni Nazzjonali” tfisser in-numru tar-reġistru li l-entità ġuridika hija rreġistrata bih fir-Reġistru Kummerċjali jew reġistru paragunabbli jew in-Numru ta' Identifikazzjoni Personali jew ekwivalenti għall-individwi.

(e)	“Nonripudju tal-oriġini” tfisser il-miżuri li jipprovdu l-prova tal-integrità u l-prova tal-oriġini tad-data permezz ta' metodi bħalma huma ċ-ċertifikazzjoni diġitali, l-infrastruttura tal-kjavi pubblika u l-firem diġitali;

(f)	“Nonripudju tal-wasla” tfisser il-miżuri li jipprovdu l-prova tal-wasla tad-data għand ir-riċevitur intiż tad-data lill-oriġinatur permezz ta' metodi bħalma huma ċ-ċertifikazzjoni diġitali, l-infrastruttura tal-kjavi pubblika u l-firem diġitali;

(g)	“Pjattaforma” tfisser il-parti tas-sistema ta' tiftix ċentrali tal-Portal tal-Ġustizzja Elettronika;

(h)	“Reġistri” tfisser ir-reġistri tal-insolvenza kif stabbilit fl-Artikolu 24 tar-Regolament (UE) 2015/848;

(i)	“Protokoll ta' Aċċess għal Oġġett Sempliċi” tfisser, f'konformità mal-istandards tal-Konsorzju tal-World Wide Web, speċifikazzjoni ta' protokoll ta' messaġġi għall-iskambju ta' informazzjoni strutturata fl-implimentazzjoni ta' servizzi tal-web f'netwerks tal-kompjuter;

(j)	“Servizz web” tfisser sistema ta' softwer iddiżinjata biex tkun tiflaħ interazzjoni interoperabbli bejn magna u oħra fuq netwerk; għandha interfaċċa deskritta f'format li jista' jiġi pproċessat minn magna.

3. Metodi ta' komunikazzjoni

3.1. IRI għandha tuża metodi ta' komunikazzjoni elettroniċi bbażati fuq is-servizzi, bħal servizzi web jew Infrastrutturi ta' Servizzi Diġitali riutilizzabbli oħrajn, għall-fini ta' interkonnessjoni tar-reġistri.

3.2. Il-komunikazzjoni bejn il-Portal tal-Ġustizzja Elettronika u l-pjattaforma, u bejn it-terminal RI ta' SM u l-pjattaforma, għandha tkun komunikazzjoni ta' wieħed ma' wieħed. Il-komunikazzjoni mill-pjattaforma għar-reġistri tista' tkun komunikazzjoni ta' wieħed ma' wieħed jew ta' wieħed ma' ħafna.

4. Protokolli ta' komunikazzjoni

4.1. Protokolli tal-Internet sikuri, bħal HTTPS, għandhom jintużaw għall-komunikazzjoni bejn il-portal, il-pjattaforma, ir-reġistri u l-punti ta' aċċess fakultattivi.

4.2. Protokolli ta' komunikazzjoni standard, bħall-Protokoll ta' Aċċess ta' Oġġett Uniku għandhom jintużaw għat-trażmissjoni ta' data strutturata u ta' metadata.

5. Standards ta' sigurtà

Għall-komunikazzjoni u d-distribuzzjoni tal-informazzjoni permezz tal-IRI, il-miżuri tekniċi għall-iżgurar tal-istandards minimi tas-sigurtà tat-teknoloġija tal-informazzjoni għandhom jinkludu:

(a)	miżuri għall-iżgurar tal-kunfidenzjalità tal-informazzjoni, inkluż billi jintużaw kanali sikuri (HTTPS);

(b)	miżuri għall-iżgurar tal-integrità tad-data waqt li tkun qed tiġi skambjata;

(c)	miżuri għall-iżgurar ta' nonripudju tal-oriġini tal-mittent tal-informazzjoni fi ħdan l-IRI u n-nonripudju tal-wasla tal-informazzjoni;

(d)	miżuri għall-iżgurar ta' lloggjar ta' avvenimenti ta' sigurtà f'konformità ma' rakkomandazzjonijiet internazzjonali għal standards tas-sigurtà tat-teknoloġija tal-informazzjoni;

(e)	miżuri għall-iżgurar tal-awtentikazzjoni u l-awtorizzazzjoni ta' kull utent irreġistrat u miżuri għall-verifika tal-identità tas-sistemi konnessi mal-portal, mal-pjattaforma jew mar-reġistri fl-IRI;

(f)	miżuri li jipproteġu kontra tiftixiet awtomatizzati, bħall-użu tal-modulu tal-captcha, u l-ikkopjar ta' reġistri, bħal-limitazzjoni tar-riżultati rritornati minn kull reġistru għal numru massimu.

6. Data li trid tiġi skambjata bejn ir-reġistri u l-IRI

6.1. Is-sett komuni ta' informazzjoni bl-istess struttura u tipi għar-reġistri kollha fl-Istati Membri huwa magħruf bħala “rekord ta' insolvenza bażi”

Kull Stat Membru għandu jkollu l-possibbiltà li jestendi r-rekord ta' insolvenza bażi b'informazzjoni speċifika. Id-data mir-rekord ta' insolvenza għandha tiġi mmudellata abbażi tal-ispeċifikazzjoni tal-interfaċċa stabbilita.

6.2. L-iskambju ta' informazzjoni għandha tinkludi wkoll messaġġi meħtieġa għall-konferma tal-wasla, għall-illoggjar u għar-rappurtar.

7. Struttura tal-format ta' messaġġ standard

L-iskambju ta' informazzjoni bejn ir-reġistri, il-pjattaforma u l-portal għandu jkun ibbażat fuq metodi standard ta' strutturar tad-data u jiġi espress f'format ta' messaġġ standard bħal XML.

8. Data għall-pjattaforma

8.1. Ir-rekwiżiti tal-interoperabbiltà jitolbu li s-servizzi li jkunu esposti minn kull Reġistru jkunu unifikati u jippreżentaw l-istess interfaċċa sabiex l-applikazzjoni li tagħmel is-sejħa, bħall-portal tal-Ġustizzja Elettronika, ikollha tinteraġixxi ma' tip wieħed biss ta' interfaċċa li tesponi sett komuni ta' elementi tad-data. Dan l-approċċ jirrikjedi li l-Istati Membri jallinjaw l-istruttura tad-data interna tagħhom biex jissodisfaw l-ispeċifikazzjonijiet tal-interfaċċa pprovduti mill-Kummissjoni.

8.2. Biex il-pjattaforma tkun tista' twettaq il-funzjonijiet tagħha għandhom jiġu pprovduti t-tipi ta' data li ġejjin:

(a)	data li tippermetti l-identifikazzjoni ta' sistemi konnessi mal-pjattaforma; dik id-data tista' tikkonsisti minn URLs li jidentifikaw kull sistema fi ħdan IRI;

(b)

kull data operattiva oħra meħtieġa għall-pjattaforma biex tiżgura l-funzjonament xieraq u effikaċi tas-servizz ta' tiftix u l-interoperabbiltà tar-reġistri; dik id-data tista' tinkludi listi ta' kodiċijiet, data ta' referenza, glossarji u traduzzjonijiet relatati ta' dik il-metadata, kif ukoll data ta' lloggjar u rappurtar.

8.3. Id-data u l-metadata ġestiti mill-pjattaforma għandhom jiġu pproċessati u maħżuna f'konformità mal-istandards tas-sigurtà deskritti fit-Taqsima 5 ta' dan l-Anness.

9. Metodi ta' operazzjoni tas-sistema u s-servizzi tat-teknoloġiji tal-informazzjoni pprovduti mill-pjattaforma

9.1. Għad-distribuzzjoni u l-iskambju ta' informazzjoni, is-sistema għandha tkun ibbażata fuq il-metodu tekniku ta' operazzjoni li ġej:

(a)	għat-twassil ta' messaġġi fil-verżjoni tal-lingwa rilevanti, il-pjattaforma għandha tipprovdi artifatti ta' data ta' referenza, bħal-listi ta' kodiċijiet, vokabularji kkontrollati u glossarji;

(b)	meta jkun rilevanti, it-termini mill-vokabularji u l-glossarji għandhom jiġu tradotti lejn il-lingwi uffiċjali tal-UE; meta jkun possibbli, għandhom jintużaw standards rikonoxxuti u messaġġi standardizzati.

9.2. Il-Kummissjoni se taqsam aktar dettalji dwar il-metodu tekniku ta' operazzjoni u l-implimentazzjoni tas-servizzi tat-teknoloġiji tal-informazzjoni pprovduti mill-pjattaforma mal-Istati Membri.

10. Kriterji tat-Tiftix

10.1. Irid jintgħażel tal-inqas pajjiż wieħed meta ssir tiftixa permezz tal-IRI.

10.2. Il-Portal għandu jipprovdi l-kriterji armonizzati li ġejjin għat-tiftixa:

(a)

l-isem,

(b)	in-Numru tar-Reġistrazzjoni nazzjonali

Dawn iż-żewġ kriterji jistgħu jintużaw alternattivament u addizzjonalment.

10.3. Fuq il-Portal jistgħu jkunu disponibbli kriterji ta' tiftix ulterjuri.

11. Modalitajiet ta' ħlas

11.1. Għad-dokumenti u d-dettalji li l-Istati Membri jitolbu ħlas għalihom u li huma disponibbli fuq il-Portal tal-Ġustizzja elettronika permezz tal-IRI, is-sistema għandha tippermetti lill-utenti jħallsu online bl-użu ta' modalitajiet ta' pagament użati komunement bħall-karti ta' kreditu u ta' debitu.

11.2. Is-sistema tista' tipprovdi wkoll metodi alternattivi ta' ħlas online, bħal trasferimenti bankarji jew kartieri virtwali (depożitu).

12. Id-disponibbiltà tas-servizzi

12.1. Iż-żmien li fih jingħata servizz għandu jkun 24/7, b'rata ta' disponibbiltà tas-sistema ta' mill-inqas 98 % eskluża l-manutenzjoni skedata.

12.2. L-Istati Membri jinnotifikaw lill-Kummissjoni dwar l-attivitajiet ta' manutenzjoni kif ġej:

(a)	ħamest ijiem ta' xogħol minn qabel għal operazzjonijiet ta' manutenzjoni li jistgħu jikkawżaw perjodu ta' nuqqas ta' disponibbiltà ta' sa 4 sigħat;
(b)	10 ijiem ta' xogħol minn qabel għal operazzjonijiet ta' manutenzjoni li jistgħu jikkawżaw perjodu ta' nuqqas ta' disponibbiltà ta' sa 12-il siegħa;
(c)	30 jum tax-xogħol bil-quddiem għal manutenzjoni tal-infrastruttura tal-kamra tal-kompjuters, li tista' tikkawża perjodu ta' nuqqas ta' disponibbiltà ta' sa sitt ijiem fis-sena.

Kemm ikun possibbli, operazzjonijiet ta' manutenzjoni għandhom ikunu ppjanati barra mill-ħinijiet tax-xogħol (19:00 — 8:00 CET).

12.3. Meta l-Istati Membri jkollhom ħinijiet tas-servizz fissi għal kull ġimgħa, dawn għandhom jinfurmaw lill-Kummissjoni bil-ħin u l-ġurnata tal-ġimgħa meta jkunu ppjanati dawn il-ħinijiet tas-servizz. Mingħajr preġudizzju għall-obbligi fil-punti (a) sa (c) tal-punt 12.2., jekk is-sistemi tal-Istati Membri ma jibqgħux disponibbli matul dawn il-ħinijiet fissi, l-Istati Membri jistgħu jagħżlu li ma jinnotifikawx lill-Kummissjoni f'kull okkażjoni.

12.4. F'każ ta' ħsara teknika mhux mistennija tas-sistemi tal-Istati Membri, l-Istati Membri għandhom jinfurmaw lill-Kummissjoni mingħajr dewmien bin-nuqqas ta' disponibbiltà tas-sistema tagħhom, u, jekk ikun magħruf, meta jaħsbu li se jitkompla s-servizz.

12.5. F'każ ta' kwalunkwe bidla li tista' taffettwa l-konnessjoni mal-pjattaforma ċentrali, l-Istat Membru għandu jinforma lill-Kummissjoni minn qabel, malli jkunu disponibbli biżżejjed dettalji tekniċi b'rabta mal-bidla.

12.6. F'każ ta' ħsara mhux mistennija fil-pjattaforma ċentrali jew fil-portal, il-Kummissjoni għandha tinforma lill-Istati Membri mingħajr dewmien bin-nuqqas ta' disponibbiltà tal-pjattaforma jew tal-portal, u jekk ikun magħruf, meta jaħsbu li se jitkompla s-servizz.

13. Regoli ta' Traskrizzjoni u trażlitterazzjoni

L-implimentazzjoni ta' kull Stat Membru għandha tappoġġa l-istandards nazzjonali ta' traskrizzjoni, rumanizzazzjoni u trażlitterazzjoni fir-rigward tal-użu ta' karattri speċjali, l-input tat-tiftix u r-riżultati rritornati.