22.3.2019 |
MT |
Il-Ġurnal Uffiċjali tal-Unjoni Ewropea |
L 81/58 |
REGOLAMENT DELEGAT TAL-KUMMISSJONI (UE) 2019/360
tat-13 ta' Diċembru 2018
li jissupplimenta r-Regolament (UE) 2015/2365 tal-Parlament Ewropew u tal-Kunsill fir-rigward tat-tariffi imposti mill-Awtorità Ewropea tat-Titoli u s-Swieq fuq ir-repożitorji tat-tranżazzjonijiet
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2015/2365 tal-Parlament Ewropew u tal-Kunsill tal-25 ta' Novembru 2015 dwar it-trasparenza ta' transazzjonijiet ta' finanzjament tat-titoli u l-użu mill-ġdid u li jemenda r-Regolament (UE) Nru 648/2012 (1), u b'mod partikolari l-Artikolu 11(2) tiegħu,
Billi:
(1) |
L-Artikolu 62 tar-Regolament (UE) Nru 1095/2010 tal-Parlament Ewropew u tal-Kunsill (2) jipprovdi li d-dħul tal-Awtorità Ewropea tat-Titoli u s-Swieq (ESMA) jikkonsisti f'tariffi mħallsa lill-ESMA fil-każijiet speċifikati fil-leġiżlazzjoni tal-Unjoni, flimkien ma' kontribuzzjonijiet mill-awtoritajiet pubbliċi nazzjonali u sussidju mill-Unjoni. |
(2) |
Jenħtieġ li tiġi imposta tariffa għar-reġistrazzjoni fuq ir-repożitorji tat-tranżazzjonijiet stabbiliti fl-Unjoni sabiex jiġu koperti l-ispejjeż tal-ESMA għall-ipproċessar tal-applikazzjoni għar-reġistrazzjoni. |
(3) |
L-ispejjeż tal-ESMA għall-ipproċessar tal-applikazzjoni għar-reġistrazzjoni jkunu ogħla meta r-repożitorju tat-tranżazzjonijiet jipprovdi servizzi anċillari. Il-provvista ta' tali servizzi anċillari hija indikatur ta' fatturat għoli mistenni u ta' spejjeż ogħla assoċjati mal-valutazzjoni tal-applikazzjoni għar-reġistrazzjoni. Għalhekk, għall-fini tal-impożizzjoni ta' tariffi għar-reġistrazzjoni, ir-repożitorji tat-tranżazzjonijiet jenħtieġ li jiġu kklassifikati f'żewġ kategoriji ta' fatturat totali mistenni, fatturat mistenni ogħla u aktar baxx, li għalihom jenħtieġ li japplikaw tariffi għar-reġistrazzjoni differenti, skont jekk għandhomx l-intenzjoni li jipprovdu servizzi anċillari. |
(4) |
Meta repożitorju tat-tranżazzjonijiet diġà rreġistrat skont ir-Regolament (UE) Nru 648/2012 tal-Parlament Ewropew u tal-Kunsill (3) japplika għal estensjoni tar-reġistrazzjoni, in-nefqa meħtieġa għall-valutazzjoni u għall-eżaminazzjoni preċiżi tal-applikazzjoni tkun inqas minn dik għal reġistrazzjoni ġdida peress li l-ESMA diġà jkollha informazzjoni pertinenti dwar ir-repożitorju tat-tranżazzjonijiet applikanti. Għalhekk, ir-repożitorju tat-tranżazzjonijiet applikanti jenħtieġ li jħallas tariffa mnaqqsa. Meta repożitorju tat-tranżazzjonijiet li ma jkunx diġà rreġistrat skont ir-Regolament (UE) Nru 648/2012 jissottometti simultanjament applikazzjonijiet għar-reġistrazzjoni kemm skont ir-Regolament (UE) Nru 648/2012 kif ukoll ir-Regolament (UE) 2015/2365, in-nefqa meħtieġa għall-valutazzjoni u għall-eżaminazzjoni preċiżi tal-applikazzjonijiet tkun ukoll aktar baxxa minħabba s-sinerġiji tar-reviżjoni unika tal-istess tip ta' dokumenti. Fil-każ ta' applikazzjonijiet simultanji, ir-repożitorju tat-tranżazzjonijiet jenħtieġ li jħallas it-tariffa għar-reġistrazzjoni sħiħa dovuta skont ir-Regolament (UE) Nru 648/2012, u l-ħlas imnaqqas għall-estensjoni tar-reġistrazzjoni dovut skont ir-Regolament (UE) 2015/2365. |
(5) |
Jekk, wara r-reġistrazzjoni, repożitorju tat-tranżazzjonijiet jibda joffri servizzi anċillari u b'hekk jaqa' taħt kategorija ogħla f'termini ta' fatturat totali mistenni, ir-repożitorju tat-tranżazzjonijiet jenħtieġ li jħallas id-differenza bejn it-tariffa għar-reġistrazzjoni inizjali u t-tariffa għar-reġistrazzjoni li tikkorrispondi għall-kategorija ta' fatturat ogħla mistenni. Bil-maqlub, meta repożitorju tat-tranżazzjonijiet jieqaf joffri servizzi anċillari wara r-reġistrazzjoni, jenħtieġ li ma jiġix rimborżat mill-ESMA peress li n-nefqa meħtieġa għall-valutazzjoni tal-applikazzjoni ta' repożitorju tat-tranżazzjonijiet b'fatturat għoli tkun effettivament intefqet waqt ir-reġistrazzjoni. |
(6) |
Sabiex jiġu evitati applikazzjonijiet mhux iġġustifikati, it-tariffi għar-reġistrazzjoni jenħtieġ li ma jiġux rimborżati jekk applikant jirtira l-applikazzjoni tiegħu matul il-proċess ta' reġistrazzjoni, u lanqas jekk ir-reġistrazzjoni tiġi rifjutata. |
(7) |
Sabiex jiġi żgurat użu effiċjenti tal-baġit tal-ESMA u, fl-istess ħin, jittaffa l-piż finanzjarju għall-Istati Membri u għall-Unjoni, hemm bżonn li jiġi żgurat li r-repożitorji tat-tranżazzjonijiet iħallsu talanqas l-ispejjeż kollha relatati mas-superviżjoni tagħhom. It-tariffi għas-superviżjoni jenħtieġ li jiġu stabbiliti f'livell sabiex li fih tiġi evitata akkumulazzjoni sinifikanti ta' defiċit jew ta' eċċess għall-attivitajiet relatati mar-repożitorji tat-tranżazzjonijiet. Fil-każ ta' defiċits, l-ESMA jenħtieġ li ma tirkuprax id-defiċit mingħand ir-repożitorji tat-tranżazzjonijiet. Jekk id-defiċit ikun sinifikanti, l-ESMA jenħtieġ li tanalizza r-raġunijiet u temenda l-ispejjeż għas-superviżjoni proforma tagħha għall-perjodu baġitarju li jmiss. Fir-rigward ta' eċċessi, ir-repożitorji tat-tranżazzjonijiet jenħtieġ li ma jirkuprawx l-eċċessi tat-tariffi. |
(8) |
Sabiex tiġi żgurata allokazzjoni ġusta u ċara tat-tariffi li, fl-istess ħin, tirrifletti l-isforz amministrattiv reali ddedikat lil kull entità taħt superviżjoni, it-tariffa għas-superviżjoni jenħtieġ li tiġi kkalkulata abbażi tal-fatturat iġġenerat mill-attivitajiet ewlenin ta' repożitorju tat-tranżazzjonijiet u mis-servizzi anċillari tiegħu. Għall-fini tal-kalkolu tal-fatturat applikabbli, huwa meħtieġ li ssir distinzjoni bejn servizzi anċillari relatati direttament mal-provvista tas-servizzi ewlenin ta' ġbir u ta' żamma f'post ċentrali ta' rekords ta' tranżazzjonijiet ta' finanzjament tat-titoli (securities financing transactions, SFTs) skont ir-Regolament (UE) 2015/2365, bħal self minn aġenti u mmaniġġjar tal-kollateral jew servizzi relatati mal-ġbir u maż-żamma f'post ċentrali ta' rekords ta' SFTs u ta' derivattivi, bħal tqabbil tat-tranżazzjonijiet, konferma/affermazzjoni tat-tranżazzjonijiet, valwazzjoni tal-kollateral, u rapportar minn partijiet terzi. It-tariffi għas-superviżjoni imposti fuq repożitorju tat-tranżazzjonijiet jenħtieġ li jkunu proporzjonati mal-attività ta' dak ir-repożitorju tat-tranżazzjonijiet individwali meta mqabbla mal-attività totali tar-repożitorji tat-tranżazzjonijiet kollha reġistrati u taħt superviżjoni f'sena partikolari. Madankollu, minħabba li hemm xi spejjeż amministrattivi fissi għas-superviżjoni ta' repożitorji tat-tranżazzjonijiet, jenħtieġ li tiġi stabbilita tariffa minima annwali għas-superviżjoni. Dan l-ammont mhuwiex affettwat mill-ħlas ta' tariffi għas-superviżjoni skont ir-Regolament (UE) Nru 648/2012. |
(9) |
Jenħtieġ li jiġu pprovduti regoli dwar it-tariffi li jridu jiġu imposti fuq ir-repożitorji tat-tranżazzjonijiet ta' pajjiżi terzi li japplikaw għar-rikonoxximent fl-Unjoni skont ir-Regolament (UE) 2015/2365, sabiex jiġu koperti l-ispejjeż għar-rikonoxximent u amministrattivi annwali għas-superviżjoni. F'dan ir-rigward, it-tariffa għar-rikonoxximent jenħtieġ li tinkludi żewġ komponenti, in-nefqa meħtieġa relatata mal-ipproċessar tal-applikazzjoni għar-rikonoxximent ta' dawn ir-repożitorji tat-tranżazzjonijiet ta' pajjiżi terzi mill-ESMA skont l-Artikolu 19(4) ta' dak ir-Regolament u n-nefqa meħtieġa relatata mal-konklużjoni ta' arranġamenti ta' kooperazzjoni mal-awtoritajiet kompetenti tal-pajjiż terz fejn ir-repożitorju tat-tranżazzjonijiet huwa rreġistrat skont l-Artikolu 20 ta' dak ir-Regolament. L-ispejjeż assoċjati mal-konklużjoni ta' arranġamenti ta' kooperazzjoni jenħtieġ li jinqasmu bejn ir-repożitorji tat-tranżazzjonijiet rikonoxxuti mill-istess pajjiż terz. Barra minn hekk, repożitorji tat-tranżazzjonijiet ta' pajjiżi terzi jenħtieġ li jintalbu jħallsu tariffa annwali għas-superviżjoni. |
(10) |
Meta repożitorju tat-tranżazzjonijiet ta' pajjiż terz diġà rikonoxxut skont ir-Regolament (UE) Nru 648/2012 japplika għal estensjoni tar-reġistrazzjoni għar-rikonoxximent tiegħu, l-ispejjeż għall-ipproċessar tal-applikazzjoni huwa mistenni li jkunu inqas mill-ispejjeż għall-ipproċessar ta' applikazzjoni ġdida minħabba s-sinerġiji bejn ir-reġimi taħt ir-Regolament (UE) Nru 648/2012 u r-Regolament (UE) 2015/2365. Għalhekk, il-komponent tat-tariffa għar-rikonoxximent relatat mal-ipproċessar tal-applikazzjoni jenħtieġ li jitnaqqas. Min-naħa l-oħra, l-ispejjeż għall-konklużjoni ta' ftehim ta' kooperazzjoni jinvolvu spejjeż speċifiċi għall-konformità mar-Regolament (UE) 2015/2365. Għalhekk, il-komponent tat-tariffa għar-rikonoxximent relatat ma' ftehimiet ta' kooperazzjoni jenħtieġ li jkun indipendenti mill-eżistenza ta' ftehimiet ta' kooperazzjoni skont ir-Regolament (UE) Nru 648/2012. |
(11) |
Il-funzjonijiet ta' superviżjoni eżerċitati mill-ESMA fir-rigward ta' repożitorji tat-tranżazzjonijiet rikonoxxuti ta' pajjiżi terzi huma l-aktar relatati mal-implimentazzjoni ta' arranġamenti ta' kooperazzjoni, inkluż l-iskambju effettiv ta' data bejn l-awtoritajiet rilevanti. Il-kost għall-provvista ta' dawk il-funzjonijiet jenħtieġ li jkun kopert mit-tariffi annwali għas-superviżjoni li jiġu imposti fuq ir-repożitorji tat-tranżazzjonijiet rikonoxxuti. Peress li dawk l-ispejjeż ser ikunu ħafna aktar baxxi mill-ispejjeż imġarrba mill-ESMA biex tipprovdi superviżjoni diretta tar-repożitorji tat-tranżazzjonijiet reġistrati fl-Unjoni, it-tariffi għas-superviżjoni tar-repożitorji tat-tranżazzjonijiet rikonoxxuti jenħtieġ li jkunu ferm aktar baxxi mit-tariffa għas-superviżjoni minima imposta fuq repożitorji tat-tranżazzjonijiet reġistrati taħt superviżjoni diretta tal-ESMA. |
(12) |
L-awtoritajiet nazzjonali kompetenti jġarrbu spejjeż meta jwettqu ħidma skont ir-Regolament (UE) 2015/2365 u bħala riżultat ta' kwalunkwe delega ta' kompiti mill-ESMA lill-awtoritajiet nazzjonali kompetenti skont l-Artikolu 74 tar-Regolament (UE) Nru 648/2012 u skont l-Artikolu 9(1) tar-Regolament (UE) 2015/2365. It-tariffi imposti mill-ESMA fuq ir-repożitorji tat-tranżazzjonijiet jenħtieġ li jkopru wkoll dawk l-ispejjeż. Sabiex jiġi evitat li l-awtoritajiet kompetenti jġarrbu telf jew jagħmlu profitt mit-twettiq tal-kompiti ddelegati jew mill-assistenza lill-ESMA, l-ESMA jenħtieġ li tirrimborża l-ispejjeż reali mġarrba minn dik l-awtorità nazzjonali kompetenti. |
(13) |
Peress li fis-sena li fiha ssir ir-reġistrazzjoni ser ikun hemm biss data limitata dwar l-attività ta' repożitorju tat-tranżazzjonijiet, jenħtieġ li tiġi kkalkulata tariffa interim għas-superviżjoni abbażi ta' stima tan-nefqa neċessarja għas-superviżjoni ta' dak ir-repożitorju tat-tranżazzjonijiet fl-ewwel sena tiegħu. Il-kalkolu eżatt tat-tariffa jenħtieġ li jqis id-data tar-reġistrazzjoni tar-repożitorju tat-tranżazzjonijiet u d-data li fiha jibda l-obbligu ta' rapportar imsemmi fl-Artikolu 4(1) tar-Regolament (UE) 2015/2365 b'tali mod li jiġi rifless b'mod preċiż il-livell ta' superviżjoni meħtieġ mill-ESMA. Jekk ir-rapportar regolatorju ta' repożitorju tat-tranżazzjonijiet jibda biss fis-sena wara r-reġistrazzjoni tiegħu, it-tariffa interim għas-superviżjoni għas-sena tar-reġistrazzjoni jenħtieġ li tkun ibbażata fuq it-tariffa għar-reġistrazzjoni. Dan huwa minħabba li n-nefqa meħtieġa għas-superviżjoni ta' repożitorju tat-tranżazzjonijiet li jkun għadu mhuwiex qed jirrapporta hija komparabbli man-nefqa meħtieġa għall-valutazzjoni tal-applikazzjoni għar-reġistrazzjoni. Skont iż-żmien bejn ir-reġistrazzjoni u l-aħħar tas-sena, l-ammont jiġi aġġustat pro rata bis-suppożizzjoni li proċess ta' reġistrazzjoni standard jeħtieġ 150 jum ta' xogħol. Jekk ir-rapportar regolatorju ta' repożitorju tat-tranżazzjonijiet jibda fl-ewwel sitt xhur tas-sena tar-reġistrazzjoni tiegħu, it-tariffa għas-superviżjoni interim jenħtieġ li tiġi kkalkulata abbażi tal-fatturat applikabbli li jirrifletti d-dħul tar-repożitorju tat-tranżazzjonijiet għall-ewwel nofs tas-sena. Jekk ir-rapportar regolatorju ta' repożitorju tat-tranżazzjonijiet jibda fl-aħħar sitt xhur tas-sena tar-reġistrazzjoni tiegħu, it-tariffa għas-superviżjoni interim jenħtieġ li tiġi kkalkulata abbażi tal-livell tat-tariffa għar-reġistrazzjoni tar-repożitorju tat-tranżazzjonijiet. Dan huwa minħabba li hemm biss data limitata disponibbli għall-applikazzjoni tal-fatturat applikabbli. |
(14) |
Ir-repożitorji tat-tranżazzjonijiet reġistrati fl-2019 mhumiex ser jibdew jipprovdu servizzi ta' rapportar qabel l-aħħar tal-2019 u l-livell ta' attività tagħhom fl-2019 x'aktarx ikun kważi ineżistenti. Għalhekk, it-tariffa annwali għas-superviżjoni tagħhom għall-2020 jenħtieġ li tiġi kkalkulata abbażi tal-fatturat applikabbli tagħhom matul l-ewwel nofs tal-2020. |
(15) |
Dan ir-Regolament jenħtieġ li jifforma l-bażi għad-dritt tal-ESMA li timponi tariffi fuq ir-repożitorji tat-tranżazzjonijiet, |
ADOTTAT DAN IR-REGOLAMENT:
KAPITOLU I
DISPOŻIZZJONIJIET ĠENERALI
Artikolu 1
Irkupru tal-ispejjeż kollha ta' superviżjoni
It-tariffi imposti fuq ir-repożitorji tat-tranżazzjonijiet għandhom ikopru:
(a) |
l-ispejjeż kollha relatati mar-reġistrazzjoni u mas-superviżjoni ta' repożitorji tat-tranżazzjonijiet mill-ESMA skont ir-Regolament (UE) 2015/2365, inklużi dawk l-ispejjeż li jirriżultaw mir-rikonoxximent ta' repożitorji tat-tranżazzjonijiet kif ukoll l-ispejjeż li jirriżultaw mill-estensjoni ta' reġistrazzjoni jew mill-estensjoni ta' rikonoxximent għal repożitorji tat-tranżazzjonijiet li diġà ġew reġistrati jew rikonoxxuti skont ir-Regolament (UE) Nru 648/2012; |
(b) |
l-ispejjeż kollha għar-rimborż tal-awtoritajiet kompetenti li jkunu wettqu ħidma skont ir-Regolament (UE) 2015/2365, u bħala riżultat ta' kwalunkwe delega ta' kompiti skont l-Artikolu 74 tar-Regolament (UE) Nru 648/2012 u skont l-Artikolu 9 tar-Regolament (UE) 2015/2365. |
Artikolu 2
Fatturat applikabbli
1. Ir-repożitorji tat-tranżazzjonijiet reġistrati skont ir-Regolament (UE) 2015/2365 għandhom iżommu biss kontijiet awditjati għall-finijiet ta' dan ir-Regolament li jiddistingwu talanqas bejn dawn li ġejjin:
(a) |
id-dħul iġġenerat mill-funzjonijiet ewlenin tal-ġbir u ż-żamma b'mod ċentrali tar-rekords tal-SFTs skont ir-Regolament (UE) 2015/2365; |
(b) |
id-dħul iġġenerat minn servizzi anċillari li huma relatati direttament mal-ġbir u maż-żamma f'post ċentrali tar-rekords tal-SFTs skont ir-Regolament (UE) 2015/2365. |
Id-dħul applikabbli mis-servizzi anċillari tar-repożitorju tat-tranżazzjonijiet għal sena partikolari (n) għandu jkun id-dħul mis-servizzi determinati skont il-punt (b).
2. Ir-repożitorji tat-tranżazzjonijiet reġistrati kemm skont ir-Regolament (UE) 2015/2365 kif ukoll skont ir-Regolament (UE) Nru 648/2012 għandhom iżommu kontijiet awditjati għall-finijiet ta' dan ir-Regolament li jiddistingwu talanqas bejn dawn li ġejjin:
(a) |
id-dħul iġġenerat mill-funzjonijiet ewlenin tal-ġbir u ż-żamma b'mod ċentrali tar-rekords tal-SFTs skont ir-Regolament (UE) 2015/2365; |
(b) |
id-dħul iġġenerat mill-funzjonijiet ewlenin tal-ġbir u ż-żamma b'mod ċentrali tar-rekords tad-derivattivi skont ir-Regolament (UE) Nru 648/2012; |
(c) |
id-dħul iġġenerat minn servizzi anċillari li huma relatati direttament mal-ġbir u maż-żamma f'post ċentrali tar-rekords tal-SFTs skont ir-Regolament (UE) 2015/2365; |
(d) |
id-dħul iġġenerat minn servizzi anċillari li huma relatati direttament kemm mal-ġbir u maż-żamma f'post ċentrali ta' rekords ta' SFTs skont ir-Regolament (UE) 2015/2365 kif ukoll mal-ġbir u maż-żamma f'post ċentrali ta' rekords ta' derivattivi skont ir-Regolament (UE) Nru 648/2012. |
Id-dħul applikabbli mis-servizzi anċillari tar-repożitorju tat-tranżazzjonijiet għal sena partikolari (n) għandu jkun is-somma ta'
— |
id-dħul imsemmi fil-punt (c) u |
— |
sehem mid-dħul imsemmi fil-punt (d). |
Is-sehem mid-dħul imsemmi fil-punt (d) għandu jkun daqs id-dħul imsemmi fil-punt (a), diviż bl-għadd ta'
— |
id-dħul imsemmi fil-punt (a) u |
— |
id-dħul imsemmi fil-punt (b). |
3. Il-fatturat applikabbli ta' repożitorju tat-tranżazzjonijiet għal sena partikolari (n) għandu jkun is-somma ta'
— |
id-dħul iġġenerat mill-funzjonijiet ewlenin tal-ġbir u taż-żamma f'post ċentrali ta' rekords ta' SFTs skont ir-Regolament (UE) 2015/2365 abbażi tal-kontijiet awditjati tas-sena preċedenti (n – 1) u |
— |
id-dħul applikabbli tiegħu minn servizzi anċillari determinat skont il-paragrafi 1 u 2, kif applikabbli, abbażi tal-kontijiet awditjati tas-sena preċedenti (n – 1) |
diviż bis-somma ta'
— |
id-dħul totali tar-repożitorji tat-tranżazzjonijiet kollha reġistrati ġġenerat mill-funzjonijiet ewlenin ta' ġbir u ta' żamma f'post ċentrali ta' rekords ta' SFTs skont ir-Regolament (UE) 2015/2365 abbażi tal-kontijiet awditjati tas-sena preċedenti (n – 1) u |
— |
id-dħul totali applikabbli minn servizzi anċillari tar-repożitorji tat-tranżazzjonijiet kollha reġistrati determinat skont il-paragrafi 1 u 2, kif applikabbli, abbażi tal-kontijiet awditjati tas-sena preċedenti (n – 1). |
Għalhekk il-fatturat applikabbli ta' repożitorju tat-tranżazzjonijiet speċifiku (“TRi” fil-formula hawn taħt) għandu jiġi kkalkulat kif ġej:
fejn id-dħul mill-SFTs = dħul minn servizzi ewlenin ta' SFTs + dħul minn servizzi anċillari applikabbli.
4. Meta r-repożitorju tat-tranżazzjonijiet ma jkunx opera matul is-sena preċedenti sħiħa (n – 1), il-fatturat applikabbli tiegħu għandu jiġi stmat skont il-formula stabbilita fil-paragrafu 3 billi jiġi estrapolat, għar-repożitorju tat-tranżazzjonijiet, il-valur ikkalkulat għall-għadd ta' xhur li matulhom ir-repożitorju tat-tranżazzjonijiet opera fis-sena (n – 1) għas-sena kollha (n – 1).
Artikolu 3
Aġġustament tat-tariffi
It-tariffi imposti għall-attivitajiet tal-ESMA relatati mar-repożitorji tat-tranżazzjonijiet għandhom jiġu stabbiliti f'livell sabiex tiġi evitata akkumulazzjoni sinifikanti ta' defiċit jew ta' eċċess.
Meta jkun hemm eċċess jew defiċit sinifikanti rikorrenti, il-Kummissjoni għandha tirrevedi l-livell tat-tariffi.
KAPITOLU II
TARIFFI
Artikolu 4
Tipi ta' tariffi
1. Ir-repożitorji tat-tranżazzjonijiet stabbiliti fl-Unjoni li japplikaw għal reġistrazzjoni skont l-Artikolu 5(1) tar-Regolament (UE) 2015/2365 għandhom jintalbu jħallsu t-tipi ta' tariffi li ġejjin:
(a) |
tariffi għar-reġistrazzjoni u għall-estensjoni tar-reġistrazzjoni skont l-Artikolu 5; |
(b) |
tariffi annwali għas-superviżjoni skont l-Artikolu 6. |
2. Repożitorji tat-tranżazzjonijiet stabbiliti f'pajjiżi terzi li japplikaw għar-rikonoxximent skont l-Artikolu 19(4) tar-Regolament (UE) 2015/2365 għandhom jintalbu jħallsu t-tipi ta' tariffi li ġejjin:
(a) |
tariffi għar-rikonoxximent jew għall-estensjoni tar-reġistrazzjoni skont il-paragrafi 1 u 2 tal-Artikolu 7; |
(b) |
tariffi annwali għas-superviżjoni għal repożitorji tat-tranżazzjonijiet rikonoxxuti skont l-Artikolu 7(3). |
Artikolu 5
Tariffa għar-reġistrazzjoni u tariffa għall-estensjoni ta' reġistrazzjoni
1. It-tariffa għar-reġistrazzjoni li għandha titħallas minn repożitorji tat-tranżazzjonijiet applikanti individwali għandha tirrifletti n-nefqa meħtieġa għall-valutazzjoni u għall-eżaminazzjoni preċiżi tal-applikazzjoni għar-reġistrazzjoni jew għall-estensjoni tar-reġistrazzjoni, b'kont meħud tas-servizzi li ser jiġu pprovduti mir-repożitorju tat-tranżazzjonijiet, inkluż kull servizz anċillari.
2. Repożitorju tat-tranżazzjonijiet għandu jitqies li joffri servizzi anċillari f'kull waħda mis-sitwazzjoni segwenti:
(a) |
meta jipprovdi servizzi anċillari b'mod dirett; |
(b) |
meta entità li tappartjeni għall-istess grupp bħal dak tar-repożitorju tat-tranżazzjonijiet tipprovdi servizzi anċillari; |
(c) |
meta entità li magħha r-repożitorju tat-tranżazzjonijiet ikun ikkonkluda ftehim fil-kuntest tal-katina jew tal-linja operatorja tat-tranżazzjoni jew ta' wara t-tranżazzjoni għall-kooperazzjoni fil-forniment ta' servizzi tkun tipprovdi s-servizzi anċillari. |
3. Meta repożitorju tat-tranżazzjonijiet ma jipprovdix servizzi anċillari kif imsemmi fil-paragrafu 2, ir-repożitorju tat-tranżazzjonijiet ikkonċernat għandu jitqies li jkollu fatturat totali mistenni baxx u għandu jħallas tariffa għar-reġistrazzjoni ta' EUR 65 000.
4. Meta repożitorju tat-tranżazzjonijiet jipprovdi servizzi anċillari kif imsemmi fil-paragrafu 2, ir-repożitorju tat-tranżazzjonijiet jitqies li jkollu fatturat totali mistenni għoli u għandu jħallas tariffa għar-reġistrazzjoni ta' EUR 100 000.
5. Meta repożitorju tat-tranżazzjonijiet ikun qiegħed japplika għar-reġistrazzjoni u jkun diġà ġie rreġistrat skont it-Titolu VI, il-Kapitolu 1 tar-Regolament (UE) Nru 648/2012, ir-repożitorju tat-tranżazzjonijiet għandu jħallas tariffa għall-estensjoni tar-reġistrazzjoni ta':
(a) |
EUR 50 000 għal repożitorji tat-tranżazzjonijiet li jipprovdu servizzi anċillari kif imsemmi fil-paragrafu 2; |
(b) |
EUR 32 500 għal repożitorji tat-tranżazzjonijiet b'fatturat mistenni baxx li ma jipprovdux servizzi anċillari kif imsemmi fil-paragrafu 2. |
6. Meta repożitorju tat-tranżazzjonijiet li ma jkunx diġà rreġistrat skont ir-Regolament (UE) Nru 648/2012 jissottometti simultanjament applikazzjonijiet għar-reġistrazzjoni kemm skont ir-Regolament (UE) Nru 648/2012 kif ukoll skont ir-Regolament (UE) 2015/2365, ir-repożitorju tat-tranżazzjonijiet għandu jħallas it-tariffa għar-reġistrazzjoni kollha dovuta skont ir-Regolament (UE) Nru 648/2012, u t-tariffa għall-estensjoni tar-reġistrazzjoni skont il-paragrafu 5.
7. Fil-każ li jkun hemm tibdil materjali fil-kundizzjonijiet għar-reġistrazzjoni kif imsemmi fl-Artikolu 5(4) tar-Regolament (UE) 2015/2365, li bħala konsegwenza tiegħu r-repożitorju tat-tranżazzjonijiet ikollu jħallas tariffa għar-reġistrazzjoni ogħla skont il-paragrafi 3, 4 u 5 mit-tariffa għar-reġistrazzjoni mħallsa fil-bidu, ir-repożitorju tat-tranżazzjonijiet għandu jintalab iħallas id-differenza bejn it-tariffa għar-reġistrazzjoni li tħallset fil-bidu u t-tariffa għar-reġistrazzjoni ogħla applikabbli bħala riżultat ta' dak it-tibdil materjali.
Artikolu 6
Tariffi annwali għas-superviżjoni għal repożitorji tat-tranżazzjonijiet reġistrati u għal repożitorji tat-tranżazzjonijiet li estendew ir-reġistrazzjoni tagħhom
1. Repożitorju tat-tranżazzjonijiet reġistrat għandu jintalab iħallas tariffa annwali għas-superviżjoni.
2. It-tariffa annwali għas-superviżjoni totali u t-tariffa annwali għas-superviżjoni għal repożitorju tat-tranżazzjonijiet partikolari għal sena partikolari (n) għandhom jiġu kkalkulati kif ġej:
(a) |
it-tariffa annwali għas-superviżjoni totali għal sena partikolari (n) għandha tkun l-istima tan-nefqa relatata mas-superviżjoni tal-attivitajiet ta' repożitorji tat-tranżazzjonijiet skont ir-Regolament (UE) 2015/2365 kif inkluż fil-baġit tal-ESMA għal dik is-sena; |
(b) |
it-tariffa annwali għas-superviżjoni ta' repożitorju tat-tranżazzjonijiet għal sena partikolari (n) għandha tkun it-tariffa annwali għas-superviżjoni totali determinata skont il-punt (a), maqsuma bejn ir-repożitorji tat-tranżazzjonijiet kollha reġistrati fis-sena n – 1, b'mod proporzjonali mal-fatturat applikabbli tagħhom ikkalkulat skont l-Artikolu 2(3). |
3. Fl-ebda każ repożitorju tat-tranżazzjonijiet li jkun qiegħed japplika għal reġistrazzjoni jew għal estensjoni tar-reġistrazzjoni skont l-Artikolu 5(5) tar-Regolament (UE) 2015/2365 ma għandu jħallas tariffa annwali għas-superviżjoni ta' inqas minn EUR 30 000.
Artikolu 7
Tariffi għal repożitorji tat-tranżazzjonijiet ta' pajjiżi terzi
1. Repożitorju tat-tranżazzjonijiet li jkun qiegħed japplika għar-rikonoxximent skont l-Artikolu 19(4)(a) tar-Regolament (UE) 2015/2365 għandu jħallas tariffa għar-rikonoxximent li tiġi kkalkulata bħala s-somma ta' dawn li ġejjin:
(a) |
EUR 20 000; |
(b) |
l-ammont li jirriżulta mid-diviżjoni ta' EUR 35 000 bejn l-għadd totali ta' repożitorji tat-tranżazzjonijiet mill-istess pajjiż terz li jew huma rikonoxxuti mill-ESMA, jew li applikaw għar-rikonoxximent iżda għadhom ma ġewx rikonoxxuti. |
2. Repożitorju tat-tranżazzjonijiet li jkun qiegħed japplika għal estensjoni tar-reġistrazzjoni skont l-Artikolu 19(4)(b) tar-Regolament (UE) 2015/2365 għandu jħallas tariffa għar-rikonoxximent li tiġi kkalkulata bħala s-somma ta' EUR 10 000 u l-ammont ikkalkulat skont il-paragrafu 1(b).
3. Repożitorju tat-tranżazzjonijiet rikonoxxut skont l-Artikolu 19(3) tar-Regolament (UE) 2015/2365 għandu jħallas tariffa annwali għas-superviżjoni ta' EUR 5 000.
KAPITOLU III
KUNDIZZJONIJIET TA' ĦLAS U TA' RIMBORŻ
Artikolu 8
Modalitajiet ġenerali tal-ħlas
1. It-tariffi kollha għandhom jitħallsu f'euro. Huma għandhom jitħallsu kif speċifikat fl-Artikoli 9, 10 u 11.
2. Kull ħlas tard għandu jkun soġġett għal penali ta' kuljum ugwali għal 0,1 % tal-ammont dovut.
Artikolu 9
Ħlas tat-tariffi għar-reġistrazzjoni
1. It-tariffa sħiħa għar-reġistrazzjoni msemmija fl-Artikolu 5 għandha titħallas meta r-repożitorju tat-tranżazzjonijiet jippreżenta l-applikazzjoni tiegħu għar-reġistrazzjoni skont l-Artikolu 5(5) tar-Regolament (UE) 2015/2365.
2. It-tariffi għar-reġistrazzjoni ma għandhomx jiġu rimborżati jekk repożitorju tat-tranżazzjonijiet jirtira l-applikazzjoni tiegħu għar-reġistrazzjoni qabel ma l-ESMA tkun adottat id-deċiżjoni motivata li taċċetta jew li tiċħad ir-reġistrazzjoni, jew jekk ir-reġistrazzjoni tiġi rifjutata.
Artikolu 10
Ħlas tat-tariffi annwali għas-superviżjoni
1. It-tariffa annwali għas-superviżjoni msemmija fl-Artikolu 6 għal sena partikolari għandha titħallas f'żewġ pagamenti akkont.
L-ewwel pagament akkont għandu jsir fit-28 ta' Frar ta' dik is-sena u għandu jkun ta' 5/6 tal-istima tat-tariffa annwali għas-superviżjoni. Jekk il-fatturat applikabbli kkalkulat skont l-Artikolu 2 ma jkunx għadu disponibbli dak iż-żmien, il-kalkolu fuq il-fatturat għandu jkun ibbażat fuq l-aħħar fatturat applikabbli disponibbli skont l-Artikolu 2.
It-tieni pagament akkont għandu jsir fil-31 ta' Ottubru. L-ammont tat-tieni pagament akkont għandu jkun it-tariffa annwali għas-superviżjoni kkalkulata skont l-Artikolu 6 mnaqqsa bl-ammont tal-ewwel pagament akkont.
2. L-ESMA għandha tibgħat il-fatturi għall-pagamenti akkont lir-repożitorji tat-tranżazzjonijiet talanqas 30 jum qabel id-data tal-ħlas rispettiva.
Artikolu 11
Ħlas tat-tariffi għal repożitorji tat-tranżazzjonijiet ta' pajjiżi terzi
1. It-tariffi sħaħ għar-reġistrazzjoni msemmija fl-Artikoli 7(1) u 7(2) għandhom jitħallsu meta r-repożitorju tat-tranżazzjonijiet jippreżenta l-applikazzjoni tiegħu għal rikonoxximent skont l-Artikolu 19(4) tar-Regolament (UE) 2015/2365. Dawn ma għandhomx jiġu rimborżati.
2. Kull darba li tiġi ppreżentata applikazzjoni ġdida għar-rikonoxximent ta' repożitorju tat-tranżazzjonijiet ta' pajjiż terz skont l-Artikolu 19(4) tar-Regolament (UE) 2015/2365, l-ESMA għandha terġa' tikkalkula l-ammont imsemmi fl-Artikolu 7(1)(b).
L-ESMA għandha tirrimborża d-differenza bejn l-ammont impost skont l-Artikolu 7(1)(b) u l-ammont li jirriżulta mill-kalkolu mill-ġdid b'mod ugwali bejn ir-repożitorji tat-tranżazzjonijiet diġà rikonoxxuti mill-istess pajjiż terz. Dik id-differenza għandha tiġi rimborżata jew permezz ta' ħlas dirett jew permezz ta' tnaqqis fit-tariffi imposti għas-sena ta' wara.
3. It-tariffa annwali għas-superviżjoni għal repożitorju tat-tranżazzjonijiet rikonoxxut għandha titħallas sal-aħħar ta' Frar ta' kull sena. L-ESMA għandha tibgħat fattura għall-ħlas lil repożitorju tat-tranżazzjonijiet rikonoxxut talanqas 30 jum qabel dik id-data.
Artikolu 12
Rimborż tal-awtoritajiet kompetenti
1. L-ESMA biss għandha timponi tariffi fuq ir-repożitorji tat-tranżazzjonijiet għar-reġistrazzjoni, għall-estensjoni tar-reġistrazzjoni, għas-superviżjoni u għar-rikonoxximent tagħhom skont dan ir-Regolament.
2. L-ESMA għandha tirrimborża lil awtorità kompetenti għall-ispejjeż reali mġarrba bħala riżultat tat-twettiq ta' kompiti skont ir-Regolament (UE) 2015/2365 u bħala riżultat ta' kull delega ta' kompiti skont l-Artikolu 74 tar-Regolament (UE) Nru 648/2012 u skont l-Artikolu 9(1) tar-Regolament (UE) 2015/2365.
KAPITOLU IV
DISPOŻIZZJONIJIET TRANŻITORJI U FINALI
Artikolu 13
Kalkolu tat-tariffi għas-superviżjoni interim
1. Meta l-obbligu ta' rapportar imsemmi fl-Artikolu 4(1) tar-Regolament (UE) 2015/2365 skont l-Artikolu 33(2)(a) ta' dak ir-Regolament ikun jibda fis-sena ta' wara r-reġistrazzjoni ta' repożitorju tat-tranżazzjonijiet skont l-Artikolu 5(5) tar-Regolament (UE) 2015/2365, ir-repożitorju tat-tranżazzjonijiet għandu jħallas, fis-sena tar-reġistrazzjoni tiegħu, tariffa għas-superviżjoni interim li tiġi kkalkulata skont il-Parti 1 tal-Anness.
2. Meta l-obbligu ta' rapportar imsemmi fl-Artikolu 4(1) tar-Regolament (UE) 2015/2365 skont l-Artikolu 33(2)(a) ta' dak ir-Regolament ikun jibda fl-ewwel sitt xhur tas-sena tar-reġistrazzjoni ta' repożitorju tat-tranżazzjonijiet skont l-Artikolu 5(5) tar-Regolament (UE) 2015/2365, ir-repożitorju tat-tranżazzjonijiet għandu jħallas, fis-sena tar-reġistrazzjoni tiegħu, tariffa għas-superviżjoni interim li tiġi kkalkulata skont il-Parti 2 tal-Anness.
3. Meta l-obbligu ta' rapportar imsemmi fl-Artikolu 4(1) tar-Regolament (UE) 2015/2365 skont l-Artikolu 33(2)(a) ta' dak ir-Regolament ikun jibda fl-aħħar sitt xhur tas-sena tar-reġistrazzjoni ta' repożitorju tat-tranżazzjonijiet skont l-Artikolu 5(5) tar-Regolament (UE) 2015/2365, ir-repożitorju tat-tranżazzjonijiet għandu jħallas, fis-sena tar-reġistrazzjoni tiegħu, tariffa għas-superviżjoni interim ikkalkulata skont il-Parti 3 tal-Anness.
Artikolu 14
Ħlas tat-tariffi għar-reġistrazzjoni u t-tariffi għar-repożitorji tat-tranżazzjonijiet ta' pajjiżi terzi fl-2019
1. Ir-repożitorji tat-tranżazzjonijiet li japplikaw għar-reġistrazzjoni skont l-Artikolu 5(5) tar-Regolament (UE) 2015/2365 fl-2019 għandhom iħallsu t-tariffa sħiħa għar-reġistrazzjoni msemmija fl-Artikolu 6 30 jum wara d-dħul fis-seħħ ta' dan ir-Regolament jew fid-data tas-sottomissjoni tal-applikazzjoni għar-reġistrazzjoni, skont liema tiġi l-aħħar.
2. Ir-repożitorji tat-tranżazzjonijiet ta' pajjiżi terzi li japplikaw għar-rikonoxximent skont l-Artikolu 19(4) tar-Regolament (UE) 2015/2365 fl-2019 għandhom iħallsu t-tariffa sħiħa għar-rikonoxximent imsemmija fl-Artikolu 7(1) jew 7(2), skont kif ikun applikabbli, 30 jum wara d-dħul fis-seħħ ta' dan ir-Regolament jew fid-data tas-sottomissjoni tal-applikazzjoni għar-reġistrazzjoni, skont liema tiġi l-aħħar.
3. Ir-repożitorji tat-tranżazzjonijiet ta' pajjiżi terzi rikonoxxuti fl-2019 skont l-Artikolu 19(3) tar-Regolament (UE) 2015/2365 għandhom iħallsu tariffa sħiħa annwali għas-superviżjoni għall-2019 skont l-Artikolu 7(3) 60 jum wara d-dħul fis-seħħ ta' dan ir-Regolament jew 30 jum wara li l-ESMA tkun għarrfet lir-repożitorju tat-tranżazzjonijiet bid-deċiżjoni dwar ir-rikonoxximent imsemmija fl-Artikolu 19(7) tar-Regolament (UE) 2015/2365, skont liema tiġi l-aħħar.
Artikolu 15
Tariffa annwali għas-superviżjoni għall-2020 għal repożitorji tat-tranżazzjonijiet reġistrati jew li estendew ir-reġistrazzjoni fl-2019
1. It-tariffa annwali għas-superviżjoni ta' repożitorju tat-tranżazzjonijiet għall-2020 għandha tkun it-tariffa annwali għas-superviżjoni totali determinata skont l-Artikolu 6(2)(a) diviża bejn ir-repożitorji tat-tranżazzjonijiet kollha reġistrati fl-2019, b'mod proporzjonali mal-fatturat applikabbli kkalkulat skont il-paragrafu 2.
2. Għall-finijiet tal-kalkolu tat-tariffa annwali għas-superviżjoni għall-2020 skont l-Artikolu 6 għal repożitorju tat-tranżazzjonijiet reġistrat fl-2019 skont l-Artikolu 5(5) tar-Regolament (UE) 2015/2365, il-fatturat applikabbli tar-repożitorju tat-tranżazzjonijiet għandu jkun is-somma ta'
— |
id-dħul iġġenerat mill-funzjonijiet ewlenin ta' ġbir u ta' żamma f'post ċentrali ta' rekords ta' SFTs matul il-perjodu mill-1 ta' Jannar 2020 sat-30 ta' Ġunju 2020 u |
— |
id-dħul applikabbli mis-servizzi anċillari tar-repożitorju tat-tranżazzjonijiet skont il-paragrafi 1 u 2 tal-Artikolu 2 matul il-perjodu mill-1 ta' Jannar 2020 sat-30 ta' Ġunju 2020 |
diviż bis-somma ta'
— |
id-dħul totali ġġenerat mill-funzjonijiet ewlenin ta' ġbir u ta' żamma f'post ċentrali ta' rekords ta' SFTs matul il-perjodu mill-1 ta' Jannar 2020 sat-30 ta' Ġunju 2020 tar-repożitorji tat-tranżazzjonijiet kollha reġistrati u |
— |
id-dħul applikabbli mis-servizzi anċillari tar-repożitorji tat-tranżazzjonijiet kollha skont il-paragrafi 1 u 2 tal-Artikolu 2 matul il-perjodu mill-1 ta' Jannar 2020 sat-30 ta' Ġunju 2020. |
3. It-tariffa annwali għas-superviżjoni għall-2020 għar-repożitorji tat-tranżazzjonijiet reġistrati fl-2019 għandha titħallas f'żewġ pagamenti akkont.
L-ewwel pagament akkont għandu jsir fit-28 ta' Frar 2020 u għandu jammonta għat-tariffa għar-reġistrazzjoni mħallsa mir-repożitorju tat-tranżazzjonijiet fl-2019 skont l-Artikolu 5.
It-tieni pagament akkont għandu jsir fil-31 ta' Ottubru 2020. L-ammont tat-tieni pagament akkont għandu jkun it-tariffa annwali għas-superviżjoni kkalkulata skont il-paragrafu 1 mnaqqsa bl-ammont tal-ewwel pagament akkont.
Meta l-ammont imħallas minn repożitorju tat-tranżazzjonijiet fl-ewwel pagament akkont ikun ogħla mit-tariffa annwali għas-superviżjoni kkalkulata skont il-paragrafu 1, l-ESMA għandha tirrimborża lir-repożitorju tat-tranżazzjonijiet id-differenza bejn l-ammont imħallas fl-ewwel pagament akkont u t-tariffa annwali għas-superviżjoni kkalkulata skont il-paragrafu 1.
4. L-ESMA għandha tibgħat il-fatturi għall-pagamenti akkont tat-tariffa annwali għas-superviżjoni għall-2020 lir-repożitorji tat-tranżazzjonijiet reġistrati fl-2019 talanqas 30 jum qabel id-data tal-ħlas.
5. Meta l-kontijiet awditjati għall-2020 isiru disponibbli, ir-repożitorji tat-tranżazzjonijiet reġistrati fl-2019 għandhom jirrapportaw lill-ESMA kull tibdil fil-fatturat applikabbli kkalkulat skont il-paragrafu 2, li jirriżulta mid-differenza bejn id-data finali għall-perjodu mill-1 ta' Jannar 2020 sat-30 ta' Ġunju 2020 u d-data proviżorja użata għall-kalkolu skont il-paragrafu 2.
Ir-repożitorji tat-tranżazzjonijiet għandhom jintalbu jħallsu d-differenza bejn it-tariffa annwali għas-superviżjoni għall-2020 effettivament imħallsa skont il-paragrafu 1 u t-tariffa annwali għas-superviżjoni għall-2020 li għandha titħallas bħala konsegwenza ta' xi tibdil fil-fatturat applikabbli msemmi fl-ewwel subparagrafu.
L-ESMA għandha tibgħat il-fattura għal kull pagament addizzjonali msemmi fis-subparagrafu preċedenti talanqas 30 jum qabel id-data tal-ħlas rispettiva.
Artikolu 16
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-13 ta' Diċembru 2018.
Għall-Kummissjoni
Il-President
Jean-Claude JUNCKER
(1) ĠU L 337, 23.12.2015, p. 1.
(2) Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (l-Awtorità Ewropea tat-Titoli u s-Swieq), u li jemenda d-Deċiżjoni 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).
(3) Ir-Regolament (UE) Nru 648/2012 tal-Parlament Ewropew u tal-Kunsill tal-4 ta' Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (ĠU L 201, 27.7.2012, p. 1).
ANNESS
IT-TARIFFI INTERIM TAL-EWWEL SENA
Parti 1
It-tariffa superviżorja interim għas-sena tar-reġistrazzjoni tar-repożitorju tat-tranżazzjonijiet fejn l-obbligu ta' rapportar jibda fis-sena ta' wara
1. |
It-tariffa superviżorja interim tar-repożitorju tat-tranżazzjonijiet għandha tkun l-inqas waħda mit-tnejn li ġejjin:
Dan il-kalkolu għandu jsir kif ġej: It-tariffa superviżorja interim TR = Min (it-tariffa tar-reġistrazzjoni, it-tariffa tar-reġistrazzjoni *il-Koeffiċjent)
|
2. |
It-tariffa superviżorja interim għandha titħallas kompletament 60 jum wara d-dħul fis-seħħ ta' dan ir-Regolament jew 30 jum wara n-notifika msemmija fl-Artikolu 8(1) tar-Regolament (UE) 2015/2365, skont liema data tkun l-iżjed tard. |
Parti 2
It-tariffa superviżorja interim għas-sena tar-reġistrazzjoni tar-repożitorju tat-tranżazzjonijiet fejn l-obbligu ta' rapportar jibda fl-ewwel sitt xhur tal-istess sena
1. |
It-tariffa superviżorja interim tar-repożitorju tat-tranżazzjonijiet għandha tkun it-tariffa superviżorja annwali totali stabbilita skont l-Artikolu 6(2)(a) tar-Regolament preżenti diviża bejn ir-repożitorji tat-tranżazzjonijiet kollha rreġistrati matul dik is-sena, fi proporzjon mal-fatturat applikabbli kkalkulat skont il-paragrafu 2. |
2. |
Għall-finijiet tal-kalkolu tat-tariffa superviżorja interim, il-fatturat applikabbli ta' repożitorju tat-tranżazzjonijiet għandu jkun is-somma
diviża bid-dħul totali ġġenerat mill-funzjonijiet ewlenin tal-ġbir u ż-żamma b'mod ċentrali ta' rekords ta' SFTs u d-dħul applikabbli mis-servizzi anċillari tar-repożitorji tat-tranżazzjonijiet irreġistrati kollha skont il-paragrafi 1 u 2 tal-Artikolu 2 tar-Regolament preżenti, kif applikabbli, matul il-perjodu mill-1 ta' Jannar sat-30 ta' Ġunju ta' dik is-sena. |
3. |
It-tariffa superviżorja interim għandha titħallas f'żewġ ħlasijiet parzjali.
L-ewwel ħlas parzjali għandu jkun dovut fi żmien 30 jum min-notifika msemmija fl-Artikolu 8(1) tar-Regolament (UE) 2015/2365 u għandu jammonta għat-tariffa tar-reġistrazzjoni tar-repożitorju tat-tranżazzjonijiet skont l-Artikolu 5 tar-Regolament preżenti. It-tieni pagament parzjali għandu jkun dovut fil-31 ta' Ottubru. L-ammont tat-tieni ħlas parzjali għandu jkun it-tariffa superviżorja interim ikkalkulata skont il-paragrafu 1 imnaqqsa bl-ammont tal-ewwel ħlas parzjali. Jekk l-ammont imħallas minn repożitorju tat-tranżazzjonijiet fl-ewwel ħlas parzjali jkun ogħla mit-tariffa superviżorja interim ikkalkulata skont il-paragrafu 1, l-ESMA għandha tirrimborża lir-repożitorju tat-tranżazzjonijiet id-differenza bejn l-ammont imħallas fl-ewwel ħlas parzjali u t-tariffa superviżorja interim ikkalkulata skont il-paragrafu 1. |
4. |
Meta l-kontijiet awditjati għas-sena ta' reġistrazzjoni jsiru disponibbli, ir-repożitorji tat-tranżazzjonijiet għandhom jirrapportaw lill-ESMA kull bidla fil-fatturat applikabbli kkalkulat skont il-paragrafu 1, li tirriżulta mid-differenza bejn id-data finali għall-perjodu mill-1 ta' Jannar sat-30 ta' Ġunju u d-data proviżorja użata għall-kalkolu skont il-paragrafu 1.
Ir-repożitorji tat-tranżazzjonijiet jiġu ċċarġjati d-differenza bejn it-tariffa superviżorja annwali għas-sena tar-reġistrazzjoni effettivament imħallsa skont il-paragrafu 3 u t-tariffa superviżorja annwali għas-sena tar-reġistrazzjoni li għandha titħallas bħala konsegwenza ta' kull bidla fil-fatturat applikabbli msemmija fl-ewwel subparagrafu. |
5. |
Mingħajr preġudizzju għall-paragrafi 1 u 4, it-tariffa superviżorja interim ma għandhiex tkun inqas minn EUR 15 000. |
Parti 3
It-tariffa superviżorja interim għas-sena tar-reġistrazzjoni tar-repożitorju tat-tranżazzjonijiet fejn l-obbligu ta' rapportar jibda fl-aħħar sitt xhur tal-istess sena
1. |
It-tariffa superviżorja interim tar-repożitorju tat-tranżazzjonijiet għandha tkun it-tariffa superviżorja totali ddeterminata skont l-Artikolu 6(2)(a) tar-Regolament preżenti, diviża bejn ir-repożitorji tat-tranżazzjonijiet kollha, fi proporzjon mal-proporzjon tat-tariffa għar-reġistrazzjoni tar-repożitorju tat-tranżazzjonijiet imħallsa lill-ESMA mat-total tat-tariffi għar-reġistrazzjoni kollha mħallsa mir-repożitorji tat-tranżazzjonijiet lill-ESMA f'dik is-sena. |
2. |
It-tariffa stabbilita skont il-paragrafu 1 għandha tkun dovuta 30 jum wara n-notifika msemmija fl-Artikolu 8(1) tar-Regolament (UE) 2015/2365. |