30.9.2019 |
MT |
Il-Ġurnal Uffiċjali tal-Unjoni Ewropea |
L 250/91 |
DEĊIŻJONI TA' IMPLIMENTAZZJONI TAL-KUMMISSJONI (UE) 2019/1615
tas-26 ta' Settembru 2019
li tistabbilixxi miżuri ta' emerġenza li jipprevjenu l-introduzzjoni u t-tixrid ġewwa l-Unjoni tal-Virus tal-frott imkemmex u kannella tat-tadam (ToBRFV)
(notifikata bid-dokument C(2019) 6826)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-pjanti jew prodotti tal-pjanti u kontra t-tixrid tagħhom ġewwa l-Komunità (1), u b'mod partikolari t-tielet sentenza tal-Artikolu 16(3) tagħha,
Billi:
(1) |
Il-virus tal-frott imkemmex u kannella tat-tadam (tomato brown rugose fruit virus, ToBRFV) (“l-organiżmu speċifikat”) huwa organiżmu ta' ħsara li bħalissa mhuwiex elenkat fl-Anness I jew l-Anness II tad-Direttiva 2000/29/KE. |
(2) |
Madankollu, lejn l-aħħar tal-2018, il-Ġermanja u l-Italja rrapportaw tifqigħat tal-organiżmu speċifikat fuq l-għelejjel tat-tadam fit-territorji tagħhom u nnotifikaw il-miżuri li ttieħdu biex jikkontrollawh. Analiżi tar-riskju fitosanitarju mwettqa mill-Italja wriet li l-organiżmu speċifikat u l-effetti ta' ħsara tiegħu jistgħu jkunu ta' tħassib sinifikanti għas-saħħa tal-pjanti għall-Unjoni, b'mod partikolari għall-produzzjoni tas-Solanum lycopersicum L. u tal-Capsicum annuum. |
(3) |
Għalhekk, jenħtieġ li l-Istati Membri jiżguraw li kwalunkwe persuna li jkollha taħt il-kontroll tagħha pjanti li għandhom mnejn ikunu infettati bl-organiżmu speċifikat, tkun avżata dwar il-preżenza potenzjali tiegħu u l-miżuri li jridu jittieħdu. |
(4) |
Barra minn hekk, jenħtieġ li l-Istati Membri jwettqu stħarriġ annwali għall-preżenza tal-organiżmu speċifikat fit-territorji tagħhom, sabiex jiżguraw approċċ aktar proattiv kontra l-istabbiliment u t-tixrid ta' dak l-organiżmu. |
(5) |
Fid-dawl tal-evidenza mill-Ġermanja u mill-Italja u tat-tixrid tal-organiżmu speċifikat f'għadd ta' pajjiżi terzi li qed jiżdied, jenħtieġ li l-pjanti suxxettibbli li jkunu speċifikati għat-tħawwil, inkluża ż-żerriegħa tagħhom, ikunu soġġetti għal miżuri speċifiċi meta jiġu introdotti fl-Unjoni u jenħtieġ li jiġu akkumpanjati minn ċertifikat fitosanitarju. |
(6) |
Jenħtieġ li dawk il-miżuri speċifiċi jipprevedu s-sejba bikrija tal-organiżmu speċifikat fit-territorju tal-Unjoni, jipprevedu r-rekwiżiti għall-introduzzjoni fl-Unjoni tal-pjanti speċifikati għat-tħawwil, inkluża ż-żerriegħa tagħhom, kif ukoll il-verifiki uffiċjali li jridu jitwettqu meta dawk il-pjanti speċifikati għat-tħawwil, inkluża ż-żerriegħa tagħhom, jiġu introdotti fl-Unjoni. |
(7) |
Tali miżuri huma meħtieġa biex ikun żgurat li t-territorju tal-Unjoni jkun protett aħjar mid-dħul, mill-istabbiliment u mit-tifrix tal-organiżmu speċifikat. |
(8) |
Biex il-korpi uffiċjali responsabbli u l-operaturi professjonali jkollhom biżżejjed żmien biex jaddattaw ruħhom għal dawk ir-rekwiżiti, jenħtieġ li din id-Deċiżjoni tapplika mill-1 ta' Novembru 2019. |
(9) |
Jenħtieġ li din id-Deċiżjoni tkun temporanja u tibqa' tapplika sal-31 ta' Marzu 2022 biex tkun tista' tiġi evalwata qabel dik id-data. |
(10) |
Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DIN ID-DEĊIŻJONI:
Artikolu 1
Definizzjonijiet
Għall-finijiet ta' din id-Deċiżjoni għandhom japplikaw id-definizzjonijiet li ġejjin:
(a) |
“organiżmu speċifikat” tfisser il-virus tal-frott imkemmex u kannella tat-tadam (ToBRFV); |
(b) |
“pjanti speċifikati għat-tħawwil” tfisser pjanti għat-tħawwil tas-Solanum lycopersicum L. u tal-Capsicum annuum; |
Artikolu 2
Il-projbizzjoni tal-introduzzjoni u tal-moviment fl-Unjoni
L-introduzzjoni u l-moviment fl-Unjoni tal-organiżmu speċifikat għandhom ikunu projbiti.
Artikolu 3
Is-sejba jew is-suspett tal-preżenza tal-organiżmu speċifikat
L-Istati Membri għandhom jiżguraw li kull persuna li jkollha fil-kontroll tagħha xi pjanti li għandhom mnejn ikunu infettati bl-organiżmu speċifikat tiġi avżata minnufih bil-preżenza jew bil-preżenza suspettata tal-organiżmu speċifikat, tingħata t-tagħrif dwar il-konsegwenzi u r-riskji possibbli, u dwar il-miżuri li għandhom jittieħdu biex jipprevjenu l-istabbiliment u t-tixrid tal-organiżmu speċifikat.
Artikolu 4
Stħarriġiet dwar l-organiżmu speċifikat fit-territorji tal-Istati Membri u l-identifikazzjoni
1. L-Istati Membri għandhom iwettqu stħarriġiet annwali dwar il-preżenza tal-organiżmu speċifikat fuq il-pjanti speċifikati fit-territorju tagħhom.
2. Dawn l-istħarriġiet għandhom jitwettqu mill-korp uffiċjali responsabbli, jew taħt is-superviżjoni uffiċjali tal-korp uffiċjali responsabbli. Dawn l-istħarriġiet għandhom jinkludu ttestjar fil-laboratorju u għandhom ikunu bbażati fuq prinċipji xjentifiċi u tekniċi b'saħħithom fir-rigward tal-possibbiltà li jinstab l-organiżmu speċifikat.
3. L-Istat Membri għandhom jinnotifikaw lill-Kummissjoni u lill-Istati Membri l-oħra sal-31 ta' Jannar ta' kull sena, bir-riżultati tal-istħarriġiet li jkunu twettqu fis-sena kalendarja preċedenti.
Artikolu 5
Il-moviment tal-pjanti speċifikati għat-tħawwil fl-Unjoni
Il-pjanti speċifikati għat-tħawwil, li joriġinaw fit-territorju tal-Unjoni, jistgħu jiġu ttrasportati fl-Unjoni biss jekk jiġu akkumpanjati minn passaport tal-pjanti mħejji u maħruġ skont id-Direttiva tal-Kummissjoni 92/105/KEE (2) u jekk jissodisfaw wieħed mir-rekwiżiti li ġejjin:
(a) |
joriġinaw minn żoni fejn l-organiżmu speċifikat huwa magħruf li ma jeżistix; |
(b) |
fil-każ tal-pjanti għat-tħawwil, minbarra ż-żrieragħ:
|
(c) |
fil-każ taż-żrieragħ, il-kampjunar u l-ittestjar uffiċjali għall-organiżmu speċifikat twettaq fuq kampjun rappreżentattiv bl-użu ta' metodi xierqa, u li, f'dawn it-testijiet, instabu li kienu ħielsa mill-organiżmu speċifikat. |
Artikolu 6
Ir-rekwiżiti għad-dħul fl-Unjoni tal-pjanti speċifikati għat-tħawwil
Il-pjanti speċifikati għat-tħawwil għandhom jiġu introdotti fl-Unjoni biss jekk ikunu akkumpanjati miċ-ċertifikat fitosanitarju msemmi fl-Artikolu 13(1)(ii) tad-Direttiva 2000/29/KE u jekk ikunu jissodisfaw wieħed mir-rekwiżiti li ġejjin:
(a) |
Il-pjanti speċifikati għat-tħawwil għandhom ikunu joriġinaw minn pajjiż terz ħieles mill-organiżmu speċifikat, kif stabbilit mill-organizzazzjoni nazzjonali tal-protezzjoni tal-pjanti, skont l-Istandards Internazzjonali għall-Miżuri Fitosanitarji rilevanti. Dik l-informazzjoni għandha tkun iddikjarata fiċ-ċertifikat fitosanitarju taħt “Dikjarazzjoni Addizzjonali”. |
(b) |
Il-pjanti speċifikati għat-tħawwil għandhom ikunu joriġinaw minn żona ħielsa mill-organiżmu speċifikat, kif stabbilit mill-organizzazzjoni nazzjonali tal-protezzjoni tal-pjanti skont l-Istandards Internazzjonali għall-Miżuri Fitosanitarji rilevanti. L-isem ta' dik iż-żona għandu jkun iddikjarat fiċ-ċertifikat fitosanitarju taħt “post tal-oriġini”; |
(c) |
Fejn il-pjanti speċifikati għat-tħawwil ikunu joriġinaw minn pajjiżi terzi jew minn żoni oħra għajr dawk imsemmija fil-punti (a) u (b), dawn għandhom jissodisfaw ir-rekwiżiti li ġejjin:
|
Artikolu 7
Kontrolli uffiċjali mal-introduzzjoni fl-Unjoni
Kull konsenja tal-pjanti speċifikati għat-tħawwil li tiddaħħal fl-Unjoni għandha tkun ikkontrollata b'mod uffiċjali fil-punt tad-dħul fl-Unjoni jew fil-post tad-destinazzjoni stabbilit skont id-Direttiva tal-Kummissjoni 2004/103/KE (3).
Artikolu 8
Data tal-applikazzjoni
Din id-Deċiżjoni għandha tapplika mill-1 ta' Novembru 2019.
Artikolu 9
Data ta' skadenza
Din id-Deċiżjoni għandha tapplika sal-31 ta' Marzu 2022.
Artikolu 10
Destinatarji
Din id-Deċiżjoni hija indirizzata lill-Istati Membri.
Magħmul fi Brussell, is-26 ta' Settembru 2019.
Għall-Kummissjoni
Vytenis ANDRIUKAITIS
Membru tal-Kummissjoni
(1) ĠU L 169, 10.7.2000, p. 1.
(2) Id-Direttiva tal-Kummissjoni 92/105/KEE tat-3 ta' Diċembru 1992 li tistabbilixxi grad ta' standardizzazzjoni għal passaporti ta' pjanti biex jintużaw għaċ-ċaqliq ta' ċerti pjanti, prodotti ta' pjanti jew oġġetti oħra ġewwa l-Komunità, u li tistabbilixxi l-proċeduri dettaljati dwar il-ħruġ ta' passaporti simili u l-kundizzjonijiet u l-proċeduri dettaljati għall-bdil tagħhom (ĠU L 4, 8.1.1993, p. 22).
(3) Id-Direttiva tal-Kummissjoni 2004/103/KE tas-7 ta' Ottubru 2004 dwar il-kontrolli tal-identità u s-saħħa tal-pjanti, prodotti tal-pjanti jew oġġetti oħra, elenkati f'Parti B tal-Anness V tad-Direttiva tal-Kunsill 2000/29/KE, li jistgħu jiġu esegwiti f'post ieħor li mhuwiex il-punt tad-dħul fil-Komunità jew f'post ieħor fil-qrib u tispeċifika l-kundizzjonijiet li jirrigwardaw dawn il-kontrolli (ĠU L 313, 12.10.2004, p. 16).