|
20.3.2019 |
MT |
Il-Ġurnal Uffiċjali tal-Unjoni Ewropea |
L 77/78 |
DEĊIŻJONI TA' IMPLIMENTAZZJONI TAL-KUMMISSJONI (UE) 2019/450
tad-19 ta' Marzu 2019
dwar il-pubblikazzjoni tad-Dokumenti Ewropej ta' Valutazzjoni (EADs) għall-prodotti tal-bini abbozzati b'appoġġ tar-Regolament (UE) Nru 305/2011 tal-Parlament Ewropew u tal-Kunsill
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 305/2011 tal-Parlament Ewropew u tal-Kunsill tad-9 ta' Marzu 2011 li jistabbilixxi kundizzjonijiet armonizzati għall-kummerċjalizzazzjoni tal-prodotti għall-bini u li jħassar id-Direttiva tal-Kunsill 89/106/KEE (1), u b'mod partikolari l-Artikolu 22 tiegħu,
Billi:
|
(1) |
B'konformità mar-Regolament (UE) Nru 305/2011, il-Korpi tal-Valutazzjoni Teknika għandhom jużaw il-metodi u l-kriterji mogħtija fid-Dokumenti Ewropej ta' Valutazzjoni, li r-referenzi tagħhom ġew ippubblikati f'Il-Ġurnal Uffiċjali tal-Unjoni Ewropea, għall-valutazzjoni tal-prestazzjoni tal-prodotti tal-bini koperti minn dawk id-dokumenti b'rabta mal-karatteristiċi essenzjali tagħhom. |
|
(2) |
B'konformità mal-Artikolu 19 tar-Regolament (UE) Nru 305/2011, wara diversi talbiet min-naħa tal-manifatturi għal Valutazzjonijiet Tekniċi Ewropej, l-organizzazzjoni tal-Korpi tal-Valutazzjoni Teknika fasslet u adottat diversi Dokumenti Ewropej ta' Valutazzjoni. |
|
(3) |
Il-Kummissjoni vvalutat jekk id-Dokumenti Ewropej ta' Valutazzjoni abbozzati mill-organizzazzjoni tal-Korpi tal-Valutazzjoni Teknika jissodisfawx it-talbiet li jridu jiġu ssodisfati fir-rigward tar-rekwiżiti bażiċi għax-xogħlijiet tal-bini stabbiliti fl-Anness I tar-Regolament (UE) Nru 305/2011. |
|
(4) |
Id-Dokumenti Ewropej ta' Valutazzjoni abbozzati mill-organizzazzjoni tal-Korpi tal-Valutazzjoni Teknika jissodisfaw it-talbiet li jridu jiġu ssodisfati fir-rigward tar-rekwiżiti bażiċi għax-xogħlijiet tal-bini stabbiliti fl-Anness I tar-Regolament (UE) Nru 305/2011. Għalhekk jixraq li jiġu ppubblikati r-referenzi ta' dawk id-Dokumenti Ewropej ta' Valutazzjoni f'Il-Ġurnal Uffiċjali tal-Unjoni Ewropea, |
ADOTTAT DIN ID-DEĊIŻJONI:
Artikolu 1
Ir-referenzi tad-Dokumenti Ewropej ta' Valutazzjoni għall-prodotti tal-bini abbozzati b'appoġġ tar-Regolament (UE) Nru 305/2011 li huma elenkati fl-Anness ta' din id-Deċiżjoni huma b'dan ippubblikati f'Il-Ġurnal Uffiċjali tal-Unjoni Ewropea.
Artikolu 2
Din id-Deċiżjoni għandha tidħol fis-seħħ fil-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, id-19 ta' Marzu 2019.
Għall-Kummissjoni
Il-President
Jean-Claude JUNCKER
ANNESS
Referenza u titlu tad-Dokument Ewropew ta' Valutazzjoni
|
040427-00-0404 |
Kittijiet għal sistema komposta ta' insulazzjoni termali esterna (ETICS) b'mehrież bħala prodott ta' iżolament termali u renderings jew kisjiet mhux kontinwi bħala qoxra esterna |
|
060012-00-0802 |
Kitt li jikkonsisti minn inforra tat-tubi taċ-ċmieni, magħmula minn fibri tal-ħġieġ, sustanzi minerali u organiċi, u partijiet anċillari |
|
090119-00-0404 |
Kittijiet għal kisjiet tal-ħitan esterni bi pjanċi minerali b'renderings applikati fuq il-post |
|
090120-00-0404 |
Kittijiet għal sistemi ta' ħitan esterni bi pjanċi minerali b'piż li mhux tat-tagħbija |
|
130031-00-0304 |
Travi u kolonni tal-metall |
|
130082-00-0603 |
Sistema ta' tiswija tal-faċċati – brekit tal-plastik għat-twaħħil tal-injam jew tal-elementi bbażati fuq l-injam mas-substruttura |
|
260014-00-0301 |
Żieda tat-tip II abbażi ta' silikat b'saff kalċinat |