(1)

L-Unjoni trid tiżgura protezzjoni effettiva tal-integrità u l-funzjonament xieraq tas-sistema finanzjarja tagħha u tas-suq intern mill-ħasil tal-flus u l-finanzjament tat-terroriżmu. Għalhekk, id-Direttiva (UE) 2015/849 tipprevedi li l-Kummissjoni jenħtieġ li tidentifika pajjiżi terzi b'riskju kbir li jippreżentaw defiċjenzi strateġiċi fir-reġimi tagħhom dwar il-ġlieda kontra l-ħasil tal-flus u l-finanzjament tat-terroriżmu li huma ta' theddid serju għas-sistema finanzjarja tal-Unjoni.

(2)

Jenħtieġ li f'mumenti xierqa l-Kummissjoni tagħmel rieżami tal-lista ta' pajjiżi terzi b'riskju kbir elenkati fir-Regolament Delegat (UE) 2016/1675 (2) fid-dawl tal-progress li jkun sar minn dawk il-pajjiżi terzi b'riskju kbir biex ineħħu n-defiċjenzi strateġiċi fir-reġim dwar il-ġlieda kontra l-ħasil tal-flus u l-finanzjament tat-terroriżmu (“AML/CFT”). Jenħtieġ li fil-valutazzjonijiet tagħha l-Kummissjoni tqis l-informazzjoni ġdida li tasal mingħand organizzazzjonijiet internazzjonali u korpi li jfasslu standards, bħal dawk maħruġa mit-Task Force ta' Azzjoni Finanzjarja (FATF). Fid-dawl ta' din l-informazzjoni, jenħtieġ li l-Kummissjoni tidentifika wkoll aktar pajjiżi terzi b'riskju kbir li jippreżentaw defiċjenzi strateġiċi fir-reġim tagħhom AML/CFT.

(3)

B'konformità mal-kriterji stabbiliti fid-Direttiva (UE) 2015/849, il-Kummissjoni qieset l-iktar informazzjoni reċenti disponibbli b'mod partikolari l-Istqarriji Pubbliċi reċenti tal-FATF, id-dokument tal-FATF “Titjib tal-Konformità Globali tal-AML/CFT: proċess li għadu għaddej”, u r-rapporti tal-FATF tal-Grupp ta' Reviżjoni tal-Kooperazzjoni Internazzjonali fir-rigward tar-riskji maħluqa minn pajjiżi terzi individwali b'konformità mal-Artikolu 9(4) tad-Direttiva (UE) 2015/849.

(4)

L-FATF identifikat lill-Pakistan bħala pajjiż li għandu defiċjenzi strateġiċi fir-reġim tiegħu ta' finanzjament tal-ġlieda kontra l-ħasil tal-flus u dik kontra t-terroriżmu (“AML/CFT”) li jippreżentaw riskju lis-sistema finanzjarja internazzjonali, u li għalihom żviluppa pjan ta' azzjoni mal-FATF.

(5)

Il-qafas AML/CFT fis-seħħ fil-Pakistan u l-mod li bih dak il-qafas huwa applikat jiżvelaw defiċjenzi strateġiċi. Id-defiċjenzi jinkludu s-superviżjoni u l-infurzar ta' kontrolli tal-AML/CFT minn istituzzjonijiet finanzjarji, inklużi negozji tas-servizz tal-flus; miżuri insuffiċjenti biex jiġi evitat it-trasport transfruntier illeċitu ta' flus; l-ebda track record robust ta' investigazzjonijiet u prosekuzzjonijiet ta' finanzjament tat-terroriżmu, inkluż in-nuqqas ta' koordinazzjoni meħtieġa bejn id-diversi awtoritajiet; l-implimentazzjoni insuffiċjenti ta' sanzjonijiet finanzjarji mmirati u tar-Riżoluzzjonijiet tal-Kunsill tas-Sigurtà tan-Nazzjonijiet Uniti 1267 (1999) u 1373 (2001); infurzar insuffiċjenti ta' projbizzjoni ta' fondi u servizzi finanzjarji.

(6)

Meta jitqies il-livell għoli ta' integrazzjoni tas-sistema finanzjarja internazzjonali, ir-rabta stretta tal-operaturi tas-suq, il-volum għoli ta' tranżazzjonijiet transfruntiera lejn jew mill-Unjoni, kif ukoll il-grad ta' ftuħ tas-suq, il-Kummissjoni qis li kull theddida AML/CFT ippreżentata għas-sistema finanzjarja internazzjonali tirrappreżenta wkoll theddida għas-sistema finanzjarja tal-UE.

(7)

Skont l-informazzjoni relevanti l-aktar reċenti, l-analiżi tal-Kummissjoni kkonkludiet li l-Pakistan jenħtieġ li jitqies bħala ġurisdizzjoni ta' pajjiż terz li għandu defiċjenzi strateġiċi fir-reġim AML/CFT tiegħu li jippreżentaw theddid sinifikanti għas-sistema finanzjarja tal-Unjoni b'konformità mal-kriterji stabbiliti fl-Artikolu 9 tad-Direttiva (UE) 2015/849. Madankollu, dan il-pajjiż ipprovda impenn politiku ta' livell għoli bil-miktub sabiex jindirizza id-defiċjenzi identifikati u żviluppa pjan ta' azzjoni mal-FATF, li se jippermettilu jissodisfa r-rekwiżiti stipulati fid-Direttiva (UE) 2015/849. Il-Kummissjoni se terġa' tivvaluta l-istatus ta' dan il-pajjiż fid-dawl tal-implimentazzjoni ta' dan l-impenn.

(8)

Għaldaqstant ir-Regolament Delegat (UE) 2016/1675 jenħtieġ li jiġi emendat skont dan.